រដូវធម្មតា

សន្តបារណាបាស ជាគ្រីស្តទូត

(បុណ្យរំឭកចាំបាច់)

ថ្ងៃពុធ អាទិត្យទី១០
_{(ពេលព្រឹក)}

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ចូរនាំគ្នាមក យើងលើកតម្កើងព្រះវិញ្ញាណដ៏វិសុទ្ធ ដ្បិតព្រះអង្គមានព្រះបន្ទូលមកកាន់យើង តាមរយៈពួកព្យាការី និងគ្រូអប់រំជំនឿនៃព្រះសហគមន៍។

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៧៧

ការរំឭកឡើងវិញនូវស្នាព្រះហស្តរបស់ព្រះជាម្ចាស់

គេ​សង្កត់‌សង្កិន​យើង​គ្រប់​យ៉ាង​មែន តែ​យើង​មិន​ភ័យ​បារម្ភ​អ្វីឡើយ យើង​ទ័ល‌ច្រក​មែន តែ​យើង​នៅ​តែ​ទៅ​មុខ​រួច (២ករ ៤,៨)។

បន្ទរទី១ ៖ ព្រះ‌ជាម្ចាស់​អើយ មាគ៌ា​របស់​ព្រះ‌អង្គ​ជា​មាគ៌ា​ដ៏‌វិសុទ្ធ គ្មាន​ព្រះ​ឯ​ណា​ទៀតធំ​ឧត្តុង្គ‌ឧត្ដម ដូច​ព្រះ‌អង្គ​ឡើយ។

២	ខ្ញុំបន្លឺសំឡេងហៅព្រះជាម្ចាស់ ខ្ញុំស្រែកអង្វរព្រះអង្គ ខ្ញុំបន្លឺសំឡេងហៅព្រះជាម្ចាស់ ព្រះអង្គផ្ទៀងព្រះការណ៌ស្តាប់ពាក្យខ្ញុំ
៣	នៅថ្ងៃមានអាសន្ន ខ្ញុំស្វែងរកព្រះអម្ចាស់ នៅពេលយប់ ខ្ញុំលើកដៃអង្វរព្រះអង្គឥតឈប់ឈរ ខ្ញុំមិនចង់ឱ្យនរណាសម្រាលទុក្ខខ្ញុំឡើយ
៤	ពេលនឹកដល់ព្រះជាម្ចាស់ ខ្ញុំយំថ្ងូរ ពេលរំពឹងគិត ខ្ញុំក៏បាក់ទឹកចិត្តដែរ។
៥	បពិត្រព្រះអម្ចាស់! ព្រះអង្គធ្វើឱ្យទូលបង្គំទទួលទានដំណេកមិនលក់ ទូលបង្គំខ្វល់ខ្វាយក្នុងចិត្ត រកនិយាយអ្វីមិនកើត។
៦	ទូលបង្គំរំពឹងគិតអំពីអតីតកាល គឺពីជំនាន់ដើមដ៏យូរលង់ណាស់មកហើយ
៧	ទូលបង្គំរិះគិតដដែលៗពេញមួយយប់ ទូលបង្គំចេះតែត្រិះរិះពិចារណានៅក្នុងចិត្ត ដើម្បីស្វែងយល់ថា
៨	តើព្រះអម្ចាស់បោះបង់ចោលយើងរហូតឬ? តើព្រះអង្គមិនគាប់ព្រះហឫទ័យនឹងយើងទៀតទេឬ?
៩	តើព្រះអង្គលែងមានព្រះហឫទ័យមេត្តាករុណាចំពោះយើងហើយឬ? តើព្រះអង្គនៅស្ងៀម លែងមានព្រះបន្ទូលមកយើង អស់កល្បជាអង្វែងតរៀងទៅឬ?
១០	តើព្រះជាម្ចាស់ភ្លេចសម្តែង ព្រះហឫទ័យប្រណីសន្តោសចំពោះយើងហើយឬ? តើព្រះអង្គឈប់អាណិតអាសូរយើង ដោយទ្រង់ព្រះពិរោធឬ?
១១	ទូលបង្គំនឹកគិតថា ទូលបង្គំរងទុក្ខវេទនាដូច្នេះ មកពីព្រះអង្គខ្ពង់ខ្ពស់បំផុត លែងសម្តែងព្រះបារមីជួយយើងទៀតហើយ!
១២	បពិត្រព្រះអម្ចាស់! ទូលបង្គំរំលឹកនូវស្នាព្រះហស្តព្រះអង្គឡើងវិញ ទូលបង្គំនៅចាំពីកិច្ចការដ៏អស្ចារ្យ ដែលព្រះអង្គបានធ្វើកាលពីជំនាន់ដើម។
១៣	ទូលបង្គំរិះគិតអំពីកិច្ចការទាំងប៉ុន្មាន ដែលព្រះអង្គបានធ្វើ ទូលបង្គំពិចារណាអំពីស្នាព្រះហស្តដ៏ថ្កុំថ្កើងរបស់ព្រះអង្គ។
១៤	បពិត្រព្រះជាម្ចាស់! មាគ៌ារបស់ព្រះអង្គពិតជាវិសុទ្ធ គ្មានព្រះឯណាទៀតធំឧត្តុង្គឧត្តុមដូចព្រះអង្គឡើយ។
១៥	មានតែព្រះអង្គទេដែលប្រព្រឹត្តការអស្ចារ្យ ព្រះអង្គសម្តែងឫទ្ធានុភាពឱ្យជាតិសាសន៍នានាឃើញ។
១៦	ព្រះអង្គបានប្រើឫទ្ធិបារមីមកលោះប្រជារាស្ត្ររបស់ព្រះអង្គ ព្រះអង្គបានរំដោះពូជពង្សរបស់លោកយ៉ាកុប និងពូជពង្សរបស់លោកយ៉ូសែប។
១៧	បពិត្រព្រះជាម្ចាស់! ទឹកសមុទ្របានឃើញព្រះអង្គ! ពេលទឹកសមុទ្របានឃើញព្រះអង្គ វាពុះកញ្ជ្រោល សូម្បីតែបាតសមុទ្រក៏រញ្ជួយញាប់ញ័រដែរ។
១៨	មានភ្លៀងបង្អុរចុះពីលើមេឃ ហើយក៏មានផ្គរលាន់ឮពីលើមេឃមកយ៉ាងខ្លាំងដែរ រន្ទះរបស់ព្រះអង្គភ្លឺផ្លេកពាសពេញផ្ទៃមេឃ។
១៩	នៅពេលផ្គរលាន់បន្លឺសំឡេងយ៉ាងគគ្រឹកគគ្រេង ផ្លេកបន្ទោររបស់ព្រះអង្គភ្លឺចាំងមកលើពិភពលោក ធ្វើឱ្យផែនដីរញ្ជួយញាប់ញ័រ។
២០	ព្រះអង្គយាងកាត់សមុទ្រ ព្រះអង្គយាងកាត់តាមបាតមហាសាគរ គ្មាននរណាអាចរកដានព្រះបាទារបស់ព្រះអង្គឃើញទេ។
២១	ព្រះអង្គដឹកនាំប្រជារាស្ត្ររបស់ព្រះអង្គ ដោយសារលោកម៉ូសេ និងលោកអរ៉ុន ដូចគង្វាលដឹកនាំហ្វូងចៀមដែរ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ព្រះជាម្ចាស់​អើយ មាគ៌ា​របស់​ព្រះ‌អង្គ​ជា​មាគ៌ា​ដ៏‌វិសុទ្ធ គ្មានព្រះ​ឯណា​ទៀតធំ​ឧត្តុង្គ‌ឧត្ដម ដូច​ព្រះអង្គ​ឡើយ។

បទលើកតម្កើងតាមគម្ពីរព្យាការីសាមូអែលទី១ (១សម ២,១-១០)

ខ្ញុំ​មាន​អំណរ​យ៉ាង​ខ្លាំង ព្រោះ​ព្រះ‌ជាម្ចាស់

ព្រះ‌អង្គ​បាន​ទម្លាក់​អ្នក​កាន់​អំណាច​ចុះ​ពី​តំណែង ហើយ​ព្រះ‌អង្គ​លើក​តម្កើង​មនុស្ស​ទន់‌ទាប​ឡើង។
ព្រះ‌អង្គ​បាន​ប្រទាន​សម្បត្តិ​យ៉ាង​បរិបូណ៌ដល់​អស់​អ្នក​ដែល​ស្រេក​ឃ្លាន ហើយ​បណ្ដេញ​ពួក​អ្នក​មានឱ្យ​ត្រឡប់​ទៅ​វិញ​ដោយ​ដៃ​ទទេ (លក ១,៥២-៥៣)។

បន្ទរទី២ ៖ ព្រះ‌អម្ចាស់​ប្រោស​ប្រទាន​ឱ្យខ្ញុំ​មាន​ចិត្តត្រេក‌អរ​សប្បាយ​យ៉ាងខ្លាំង ព្រះ‌អម្ចាស់​លើក​ខ្ញុំឡើង​ឱ្យបាន​ខ្ពស់​មុខ។

(បទកាកគតិ)

១	ព្រះម្ចាស់ប្រទាន	ចិត្តខ្ញុំឱ្យមាន	អំណរសប្បាយ
	ព្រោះព្រះអង្គលើក	ខ្ញុំខ្ពស់ពេកក្រៃ	ខ្ញុំអាចនិយាយ
		តទល់ពួកខ្មាំង	។
២	គ្មានព្រះអង្គណា	វិសុទ្ធអស្ចារ្យ	ដូចជាព្រះអង្គ
	ឥតមានព្រះណា	ប្រសើរដូចទ្រង់	ជាថ្មជួយបាំង
		ដូចព្រះយើងទេ	។
៣	កុំអួតបំប៉ោង	ពោលពាក្យកាចកោង	ព្រហើនដៀលជេរ
	ដ្បិតព្រះជាម្ចាស់	ថ្លឹងថ្លែងរិះរេ	វិនិច្ឆ័យឥតប្រែ
		តាមអំពើមនុស្ស	។
៤	អ្នកខ្លាំងពូកែ	ព្រះអង្គបំបែរ	បំបាក់ទាំងអស់
	បំផ្លាញទាំងធ្នូ	តែទ្រង់សន្តោស	ប្រទានដល់មនុស្ស
		កម្លាំងទន់ខ្សោយ	។
៥	ពួកអ្នកដែលមាន	អាហារគ្រប់គ្រាន់	ឥឡូវគេធ្លោយ
	ធ្លាក់ខ្លួនវេទនា	ខ្វះខាតមុខក្រោយ	គ្មានអ្វីនឹងឱ្យ
		ចម្អែតក្រពះ	។
	ឯអ្នកធ្លាប់ឃ្លាន	បែរទៅជាមាន	អាហារមិនខ្វះ
	គេបរិភោគឆ្អែត	បរិបូណ៌ពេញពាស	មានច្រើនដេរដាស
		លែងមុខស្រពោន	។
	មិនតែប៉ុណ្ណោះ	ព្រះអង្គសន្តោស	ស្រីអារគ្មានកូន
	មិនឱ្យដាច់ពូជ	វិនាសសាបសូន្យ	អាចសម្រាលកូន
		បានប្រាំពីរដង	។
៦	ជីវិតនៃមនុស្ស	ត្រូវស្លាប់ឬរស់	ស្រេចលើព្រះអង្គ
	គេត្រូវធ្លាក់ទៅ	ស្ថានមនុស្សស្លាប់ផង	ឬក៏បានឡើង
		ស្រេចទ្រង់ចាត់ចែង	។
៧	មនុស្សមានក្រ	អាក្រក់ឬល្អ	មិនមែនខ្លួនឯង
	ព្រះម្ចាស់បន្ទាប	ឬក៏លើកឡើង	ព្រះអង្គចាត់ចែង
		តាមព្រះហឫទ័យ	។
៨	ទ្រង់លើកមនុស្ស	ទុគ៌តស្រីប្រុស	ពីធូលីដី
	ដកអ្នកកំសត់	វេទនាក្រក្រី	នោះគឺដើម្បី
		ឱ្យស្មើអ្នកធំ	។
	ឱ្យបានគ្រងរាជ្យ	ពេញដោយអំណាច	រុងរឿងឧត្តម
	ដ្បិតព្រះអម្ចាស់	តាំងគ្រឹះរឹងមាំ	ផែនដីដ៏ធំ
		មិនរលំឡើយ	។
៩	ព្រះអង្គមើលថែ	ជីវិតពួកគេ	ផុតទុក្ខល្ហែល្ហើយ
	គឺអ្នកស្មោះត្រង់	ព្រះអង្គនោះហើយ	ទ្រង់មិនកន្តើយ
		ថ្នាក់ថ្នមបមបី	។
	ឯមនុស្សអាក្រក់	ចិត្តខ្មៅកខ្វក់	ទុយ៌សអប្រីយ៍
	គេនឹងវិនាស	ក្នុងពេលដ៏ខ្លី	ដ្បិតមនុស្សគ្មានជ័យ
		ដោយកម្លាំងទេ	។
១០	ព្រះអង្គបញ្ចោញ	រន្ទះដេញបាញ់	ទៅលើពួកគេ
	ព្រះម្ចាស់វិនិច្ឆ័យ	ទោសផែនដីដែរ	ទ្រង់គ្រប់គ្រងថែ
		មិនប្រែទាល់សោះ	។
	ព្រះអង្គប្រទាន	អានុភាពឱ្យមាន	ដល់ក្សត្រអង្គនោះ
	ប្រទានអំណាច	ចេស្តាទាំងអស់	ដែលទ្រង់ថ្កើងយស
		ចាក់ប្រេងអភិសេក	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ៖ ព្រះ‌អម្ចាស់​ប្រោស​ប្រទាន​ឱ្យខ្ញុំ​មាន​ចិត្តត្រេក‌អរ​សប្បាយ​យ៉ាងខ្លាំង ព្រះ‌អម្ចាស់​លើក​ខ្ញុំ​ឡើងឱ្យបាន​ខ្ពស់​មុខ។

ទំនុកតម្កើងលេខ ៩៧

សីរីរុងរឿងរបស់ព្រះអម្ចាស់ ជះពន្លឺមកលើពិភពលោក

នៅក្នុងទំនុកតម្កើងនេះ មានរៀបរាប់អំពីការសង្គ្រោះពិភពលោក ដែលមនុស្សគ្រប់ជាតិសាសន៍នឹងទទួលជឿលើព្រះគ្រីស្ត (សន្តអាថាណាស)។

បន្ទរទី៣ ៖ ព្រះ‌អម្ចាស់​គ្រង​រាជ្យ ! ចូរ​ឱ្យផែនដី​បាន​រីក‌រាយ​ឡើង !

១	ព្រះអម្ចាស់គ្រងរាជ្យ! ចូរឱ្យផែនដីរីករាយឡើង! ចូរឱ្យកោះទាំងឡាយមានអំណរសប្បាយ!
២	មានពពកដ៏ខ្មៅងងឹតនៅព័ទ្ធជុំវិញព្រះអង្គ ព្រះអង្គគ្រងរាជ្យដោយសុចរិតយុត្តិធម៌។
៣	មានភ្លើងឆេះនៅខាងមុខព្រះអង្គ បំផ្លាញខ្មាំងសត្រូវដែលនៅជុំវិញព្រះអង្គ។
៤	ផ្លេកបន្ទោររបស់ព្រះអង្គជះពន្លឺមកលើពិភពលោក ផែនដីឃើញពន្លឺនេះ ហើយញាប់ញ័រ។
៥	ភ្នំនានារលាយនៅចំពោះព្រះភក្ត្រព្រះអម្ចាស់ ដូចក្រមួនត្រូវថ្ងៃ គឺនៅចំពោះព្រះភក្រ្តព្រះអម្ចាស់នៃផែនដីទាំងមូល។
៦	ផ្ទៃមេឃប្រកាសអំពីសេចក្តីសុចរិតរបស់ព្រះអង្គ ហើយប្រជារាស្ត្រទាំងអស់បានឃើញសីរីរុងរឿងរបស់ព្រះអង្គ។
៧	អស់អ្នកដែលថ្វាយបង្គំព្រះក្លែងក្លាយ គឺអួតអាងក្នុងការគោរពបម្រើព្រះឥតបានការ នឹងត្រូវអាម៉ាស! ព្រះទាំងឡាយអើយ! ចូរនាំគ្នាក្រាបថ្វាយបង្គំព្រះអង្គ។
៨	បពិត្រព្រះអម្ចាស់! ពេលអ្នកក្រុងស៊ីយ៉ូនឮដំណឹងថា ព្រះអង្គវិនិច្ឆ័យដូច្នេះ គេមានអំណររីករាយ អ្នកក្រុងនានានៅស្រុកយូដា ក៏ត្រេកអរសប្បាយយ៉ាងខ្លាំងដែរ
៩	បពិត្រព្រះអម្ចាស់! ព្រះអង្គជាព្រះដ៏ខ្ពង់ខ្ពស់នៅលើផែនដីទាំងមូល ព្រះអង្គប្រសើរបំផុតលើព្រះទាំងប៉ុន្មាន។
១០	អស់អ្នកដែលស្រឡាញ់ព្រះអម្ចាស់អើយ! ចូរស្អប់អំពើអាក្រក់! ព្រះអង្គនឹងថែរក្សាអាយុជីវិតអស់អ្នកដែលស្មោះត្រង់នឹងព្រះអង្គ ព្រះអង្គរំដោះគេឱ្យបានរួចពីកណ្តាប់ដៃរបស់មនុស្សអាក្រក់។
១១	មានពន្លឺបំភ្លឺមនុស្សសុចរិត មនុស្សដែលមានចិត្តទៀងត្រង់នឹងមានអំណរសប្បាយ។
១២	មនុស្សសុចរិតអើយ! ចូរនាំគ្នាសប្បាយចំពោះកិច្ចការដែលព្រះអម្ចាស់បានប្រព្រឹត្ត ! ចូរលើកតម្កើងព្រះនាមដ៏វិសុទ្ធរបស់ព្រះអង្គ !

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ព្រះ‌អម្ចាស់​គ្រង​រាជ្យ ! ចូរ​ឱ្យផែនដី​បាន​រីក‌រាយ​ឡើង !

ព្រះបន្ទូលរបស់ព្រះជាម្ចាស់ (១ករ ១៥,១-២^ក.៣-៤)

បងប្អូន​អើយ ខ្ញុំ​សូម​រំឭក​បង‌ប្អូន ដំណឹងល្អដែល​ខ្ញុំ​បាន​ប្រកាស​ប្រាប់​បង‌ប្អូន ជា​ដំណឹង‌ល្អ​ដែល​បង‌ប្អូន​បាន​ទទួល និង​បាន​ជឿ​យ៉ាង​ខ្ជាប់‌ខ្ជួន​ស្រាប់​ហើយ។ ប្រសិន​បើ​បង‌ប្អូន​មិន​ឃ្លាត​ចាក​ពី​ដំណឹង‌ល្អ ដែល​ខ្ញុំ​បាន​ប្រកាស​ប្រាប់​បង‌ប្អូន​ទេ​នោះ បង‌ប្អូន​នឹង​ទទួល​ការ​សង្គ្រោះ តាម‌រយៈ​ដំណឹង‌ល្អ​នេះ​ដែរ។ មុន​ដំបូង​បង្អស់ ខ្ញុំ​ជម្រាប​ជូន​បង‌ប្អូន​នូវ​សេចក្ដីដែល​ខ្ញុំ​បាន​ទទួល គឺ​ថា​ព្រះ‌គ្រីស្ត​បាន​សោយ​ទិវង្គត ដើម្បី​រំដោះ​បាប​យើងស្រប​តាម​គម្ពីរ។ គេ​បាន​បញ្ចុះ​ព្រះ‌សព​ព្រះ‌អង្គ​នៅ​ក្នុង​ផ្នូរ ហើយ​ព្រះ‌អង្គ​មាន​ព្រះ‌ជន្ម​រស់​ឡើង​វិញ​នៅ​ថ្ងៃ​ទី​បី ស្រប​តាម​គម្ពីរ។

បន្ទរ៖ ពួកគេនាំគ្នាសរសើរតម្កើងព្រះអម្ចាស់ និងប្រកាសអំពីឫទ្ធានុភាពដែលជួយសង្រ្គោះ *អាលេលូយ៉ា! អាលេលូយ៉ា!។ បន្ទរឡើងវិញ៖..
-និងអំពី​ការ​អស្ចារ្យ​ទាំង​ប៉ុន្មានដែល​ព្រះ‌អង្គ​បាន​ធ្វើ!។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ៖ លោក​បារណាបាស​ចេញ​ដំណើរ​ទៅ​រក​លោក​សូល នៅ​ក្រុង​តារសុស។ កាល​បាន​ជួប​ហើយ គាត់​ក៏​នាំ​លោក​មក​ក្រុង​អន់ទី‌យ៉ូក។ លោក​ទាំង​ពីរ​បាន​រស់​នៅ​ជា​មួយ​ព្រះ‌សហគមន៍ ហើយ​បង្រៀន​បណ្ដាជន​ជា​ច្រើន​ផង (អាលេលូយ៉ា!)។

៦៨	”សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល ដ្បិតទ្រង់សព្វព្រះហឫទ័យយាងមករំដោះប្រជារាស្ត្ររបស់ព្រះអង្គ។
៦៩	ទ្រង់បានប្រទានព្រះសង្គ្រោះដ៏មានឫទ្ធិមួយព្រះអង្គ ពីក្នុងចំណោមព្រះញាតិវង្សរបស់ព្រះបាទដាវីឌ ជាអ្នកបម្រើព្រះអង្គឱ្យមកយើង។
៧០	ព្រះជាម្ចាស់ប្រទានព្រះសង្គ្រោះនេះមកយើង ស្របនឹងព្រះបន្ទូលសន្យា ថ្លែងតាមរយៈព្យាការីរបស់ព្រះអង្គនៅជំនាន់ដើម
៧១	គឺព្រះអង្គសង្គ្រោះយើងឱ្យរួចពីកណ្តាប់ដៃរបស់ខ្មាំងសត្រូវ និងរួចពីអំណាចរបស់អ្នកដែលស្អប់យើង
៧២	ព្រះអង្គសម្ដែងព្រះហឫទ័យមេត្តាករុណាដល់បុព្វបុរសយើង ហើយគោរពតាមសម្ពន្ធមេត្រីរបស់ព្រះអង្គយ៉ាងស្មោះស្ម័គ្រ
៧៣	គឺព្រះអង្គបានសន្យាយ៉ាងម៉ឺងម៉ាត់ដល់លោកអប្រាហាំ ជាបុព្វបុរសរបស់យើងថា
៧៤	ទ្រង់នឹងរំដោះយើងឱ្យរួចពីកណ្តាប់ដៃរបស់ខ្មាំងសត្រូវ ដើម្បីយើងអាចគោរពបម្រើព្រះអង្គបានដោយឥតភ័យខ្លាច
៧៥	ព្រមទាំងឱ្យយើងរស់នៅបានបរិសុទ្ធ និងសុចរិតជាទីគាប់ព្រះហឫទ័យព្រះជាម្ចាស់ ជារៀងរាល់ថ្ងៃ រហូតអស់មួយជីវិត។
៧៦	ចំណែកឯកូនវិញ កូននឹងទៅជាព្យាការីរបស់ព្រះដ៏ខ្ពង់ខ្ពស់បំផុត ព្រោះកូននឹងដើរមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។
៧៧	កូននឹងឱ្យប្រជារាស្ត្ររបស់ព្រះអង្គដឹងថា ព្រះអង្គសង្គ្រោះគេ ដោយលើកលែងគេឱ្យរួចពីបាប។
៧៨	ព្រះរបស់យើងមានព្រះទ័យមេត្តាករុណាដ៏លើសលប់ ព្រះអង្គប្រទានថ្ងៃរះពីស្ថានលើមក ដើម្បីរំដោះយើង
៧៩	និងដើម្បីបំភ្លឺអស់អ្នកដែលស្ថិតនៅក្នុងទីងងឹត ក្រោមអំណាចនៃសេចក្តីស្លាប់ ព្រមទាំងតម្រង់ផ្លូវយើងឆ្ពោះទៅរកសេចក្តីសុខសាន្ត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ទំនុកតម្កើងរបស់លោកសាការី (តាមបែបស្មូត) បទពាក្យ ៧

៦៨-	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្ម័គ្រស្មោះ	យាងមករំដោះរាស្ត្រព្រះអង្គ	។
៦៩-	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	នៃអង្គដាវីឌបម្រើជាក់	។
៧០-	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលអាក់
	ដូចបានសន្យាតាមរយៈ	ព្យាការីធ្លាប់ស្ម័គ្រកាលគ្រាមុន	។
៧១-	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២-	ព្រះអង្គសម្ដែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣-	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូច្នេះថា	។
៧៤-	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបវន្ទា	ព្រះអង្គគ្រប់គ្រាគ្មានភ័យភិត	។
៧៥-	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦-	ចំណែកឯរូបរបស់កូន	នឹងក្លាយខ្លួនជាព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧-	កូននឹងធ្វើឱ្យអស់ប្រជា	រាស្ត្រទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨-	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩-	សម្រាប់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះទៅរកក្តីសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ លោក​បារណាបាស​ចេញ​ដំណើរ​ទៅ​រក​លោក​សូល នៅ​ក្រុង​តារសុស។ កាល​បាន​ជួប​ហើយ គាត់​ក៏​នាំ​លោក​មក​ក្រុង​អន់ទី‌យ៉ូក។ លោក​ទាំង​ពីរ​បាន​រស់​នៅ​ជា​មួយ​ព្រះ‌សហគមន៍ ហើយ​បង្រៀន​បណ្ដាជន​ជា​ច្រើន​ផង (អាលេលូយ៉ា!)។

ពាក្យអង្វរសកល

ចូរយើងច្រៀងសរសើរតម្កើងដល់ព្រះសង្រ្គោះនៃយើង ដែលបានបំផ្លាញអំណាចនៃសេចក្តីស្លាប់ និងបានធ្វើផ្លូវទៅកាន់ជីវិតអមតៈ តាមរយៈដំណឹងល្អ។ ចូរយើងទូលអង្វរព្រះអង្គ ដោយចិត្តរាបសាថា ៖

បន្ទរ៖ សូមព្រះអង្គពង្រឹងព្រះសហគមន៍ក្នុងសេចក្តីស្រឡាញ់ និងជំនឿ !

ព្រះអង្គបានប្រទានអ្នកណែនាំដ៏អស្ចារ្យមកព្រះសហគមន៍ តាមរយៈភាពដ៏វិសុទ្ធ និងគ្រូៗអប់រំជំនឿ
—សូមឱ្យគ្រីស្តបរិស័ទមានអំណរសប្បាយជានិច្ច នៅក្នុងកេរដំណែលដ៏អស្ចារ្យដែលបានប្រទានមកឱ្យព្រះសហគមន៍ព្រះអង្គ។ (បន្ទរ)

នៅពេលលោកគង្វាលដ៏វិសុទ្ធអធិដ្ឋានទៅកាន់ព្រះអង្គ ដូចលោកម៉ូសេបានធ្វើ ព្រះអង្គបានលើកលែងទោសអំពើបាបរបស់ប្រជាជន
—តាមរយៈពាក្យទូលអង្វររបស់លោកគង្វាលដ៏វិសុទ្ធទាំងនេះ សូមព្រះអង្គបន្តជម្រះព្រះសហគមន៍ឱ្យបានវិសុទ្ធផង។ (បន្ទរ)

ព្រះអង្គបានចាក់ប្រេងតែងតាំងព្រះដ៏វិសុទ្ធ នៅក្នុងចំណោមបងប្អូនរបស់ព្រះអង្គ ហើយព្រះអង្គបានត្រាស់ហៅព្រះវិញ្ញាណដ៏វិសុទ្ធ ឱ្យយាងចុះមកសណ្ធិតលើពួកគេ
—សូមព្រះអង្គបង្ហូរព្រះវិញ្ញាណដ៏វិសុទ្ធដល់មេដឹកនាំប្រជារាស្រ្តរបស់ព្រះអង្គផង។ (បន្ទរ)

ព្រះអង្គតែមួយគត់ដែលកាន់កាប់លោកគង្វាលដ៏វិសុទ្ធរបស់ព្រះអង្គ
—សូមប្រោសឱ្យអស់លោកទាំងនោះ ដែលព្រះអង្គបានលោះដោយព្រះលោហិតរបស់ព្រះអង្គ ស្ថិតនៅជាប់នឹងព្រះអង្គជានិច្ចផង។ (បន្ទរ)

ធម៌ “ឱព្រះបិតា”

ឱព្រះបិតាយើងខ្ញុំ ដែលគង់នៅស្ថានបរមសុខអើយ!
សូមសម្តែងព្រះបារមី ឱ្យមនុស្សលោកស្គាល់ព្រះនាមព្រះអង្គ
សូមឱ្យព្រះរាជ្យព្រះអង្គបានមកដល់
សូមឱ្យព្រះហឫទ័យរបស់ព្រះអង្គបានសម្រេចនៅលើផែនដី
ដូចនៅស្ថានបរមសុខដែរ។
សូមប្រទានអាហារ ដែលយើងខ្ញុំត្រូវការនៅថ្ងៃនេះ។
សូមអត់ទោសឱ្យយើងខ្ញុំ ដូចយើងខ្ញុំអត់ទោសឱ្យ
អស់អ្នកដែលបានប្រព្រឹត្តខុសនឹងយើងខ្ញុំ។
សូមកុំបណ្តោយឱ្យយើងខ្ញុំ ចាញ់ការល្បួងឡើយ
តែសូមរំដោះយើងខ្ញុំ ឱ្យរួចពីមារកំណាច។

ពាក្យអធិដ្ឋាន

ឱព្រះជាម្ចាស់អើយ ! ព្រះអង្គសព្វព្រះហឫទ័យញែកសន្តបារណាបាសទៅជាមនុស្សម្នាក់ ពោរពេញដោយព្រះវិញ្ញាណដ៏វិសុទ្ធ និងជំនឿ ចេញទៅប្រកាសដំណឹងល្អដល់ប្រជាជាតិនានា។ សូមព្រះអង្គមេត្តាប្រោសឱ្យអស់អ្នកជឿហ៊ានប្រកាសព្រះបន្ទូលព្រះអង្គ និងប្រព្រឹត្តតាមផង។ យើងខ្ញុំសូមអង្វរព្រះអង្គដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន។

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។