បុណ្យព្រះវិញ្ញាណយាងមក (ពេលល្ងាចទី១)

Posted on 22 ខែឧសភា 202522 ខែឧសភា 2025 by Siya Khim

បុណ្យព្រះវិញ្ញាណយាងមក

(បុណ្យឱឡារិក)

_{(ពេលល្ងាចទី១)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៣

បន្ទរទី១៖ នៅបុណ្យថ្ងៃទីហា‌សិប ពួកសាវ័កបានរួមប្រជុំទាំងអស់គ្នានៅកន្លែងតែមួយ អាលេលូយ៉ា!

^១	ចូរសរសើរតម្កើងព្រះអម្ចាស់! អ្នកបម្រើរបស់ព្រះ‌អម្ចាស់អើយ ចូរនាំគ្នាសរសើរតម្កើងព្រះអង្គ! ចូរនាំគ្នាសរសើរតម្កើងព្រះ‌នាមព្រះ‌អម្ចាស់!
^២	ចូរលើកតម្កើងព្រះ‌នាមព្រះ‌អម្ចាស់តាំងពីពេលនេះរហូតតទៅ!
^៣	តាំងពីពេលថ្ងៃរះ រហូតទល់ថ្ងៃលិច ចូរសរសើរតម្កើងព្រះ‌នាមរបស់ព្រះ‌អម្ចាស់!
^៤	ព្រះ‌អម្ចាស់គង់នៅពីលើប្រជា‌ជាតិទាំង‌ឡាយ សិរី‌រុងរឿងរបស់ព្រះ‌អង្គខ្ពស់ជាងផ្ទៃមេឃទៅទៀត។
^៥	តើមាននរណាអាចផ្ទឹមស្មើនឹងព្រះអម្ចាស់ជាព្រះរបស់យើងបាន? ព្រះ‌អង្គគង់នៅលើស្ថានដ៏ខ្ពស់បំផុត
^៦	ព្រះ‌អង្គទតមើលមកផ្ទៃមេឃ និងផែន‌ដី ដែលនៅខាងក្រោមព្រះ‌អង្គ។
^៧	ព្រះ‌អង្គលើកមនុស្សទន់ខ្សោយឡើងពីធូលីដី ព្រះ‌អង្គលើកមនុស្សទុរគតឡើងពីភក់ជ្រាំ
^៨	ដើម្បីឱ្យគេកាន់កាប់អំណាចរួមជាមួយពួកអ្នកធំ គឺរួមជាមួយពួកអ្នកធំនៅក្នុងចំណោមប្រជា‌រាស្ដ្ររបស់ព្រះ‌អង្គ។
^៩	ព្រះ‌អង្គប្រទានឱ្យស្ត្រីអារមានកូន ឱ្យនាងរស់នៅក្នុងផ្ទះយ៉ាងសប្បាយជាមួយកូនៗរបស់នាង។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ នៅបុណ្យថ្ងៃទីហា‌សិប ពួកសាវ័កបានរួមប្រជុំទាំងអស់គ្នានៅកន្លែងតែមួយ អាលេលូយ៉ា!

ទំនុកតម្កើងលេខ ១៤៧,១-១១

បន្ទរទី២៖ ក្រុមគ្រីស្តទូតបានឃើញហាក់ដូចជាមានអណ្ដាតភ្លើងបែកចេញពីគ្នា ចុះមកសណ្ឋិតលើពួកគេម្នាក់ៗ អ្នកទាំងនោះបានពោរ‌ពេញដោយព្រះ‌វិញ្ញាណដ៏‌វិសុទ្ធ ហើយចាប់ផ្ដើមនិយាយភាសាផ្សេងៗពីគ្នា អាលេលូយ៉ា!

(បទព្រហ្មគីតិ)

^១-	យើងស្មូតបទថ្វាយព្រះ	ជាអម្ចាស់របស់យើង
	សរសើរលើកតម្កើង	ដ៏រុងរឿងល្អប្រពៃ	។
^២-	ព្រះម្ចាស់បានសង់ក្រុង	ល្អឧត្តុង្គឧត្តមក្រៃ
	យេរូសាឡឹមថ្មី	អ្នកខ្ចាត់ខ្ចាយនាំមកវិញ	។
^៣-	អ្នកដែលមានវិបត្តិ	គ្រាំគ្រាចិត្តគិតមិនចេញ
	ទ្រង់ប្រោសផុតទោម្នេញ	របួសវិញជាសះស្បើយ	។
^៤-	ព្រះអង្គអាចរាប់បាន	ផ្កាយឥតមានខ្វះមួយឡើយ
	ដាក់ឈ្មោះឱ្យរួចហើយ	មិនភ្លេចឡើយស្គាល់ទាំងអស់	។
^៥-	ព្រះម្ចាស់របស់យើង	សែនថ្កុំថ្កើងឧត្តមខ្ពស់
	ចេស្តាខ្លាំងមុតមោះ	ព្រះតម្រិះធំធេងក្រៃ	។
^៦-	ព្រះអម្ចាស់គាំទ្រ	ជនក្រីក្រខ្សត់រីងរៃ
	ទ្រង់បន្ទាបដល់ដី	ជនអប្រីយ៍ធ្វើអាក្រក់	។
^៧-	ចូរនាំគ្នាច្រៀងអរ	ថ្លែងអំណរគុណព្រះម្ចាស់
	ចូរដេញពិណថ្វាយព្រះ	ជាអម្ចាស់នៃយើងផង	។
^៨-	ទ្រង់ឱ្យពពកបិទ	គ្របជុំជិតអស់តែម្តង
	បាំងទាំងផ្ទៃមេឃផង	អាប់មួរហ្មងគ្មានរស្មី	។
	ព្រះអង្គបានឱ្យភ្លៀង	ធ្លាក់ទាត់ទៀងលើផែនដី
	ស្មៅលាស់ស្រស់ខៀវខ្ចី	ពាសពេញដីនៅលើភ្នំ	។
^៩-	ទ្រង់ផ្តល់ទាំងអាហារ	អស់សព្វសាសត្វតូចធំ
	កូនក្អែកដែលស្រែកយំ	ទ្រង់ថ្នាក់ថ្នមផ្តល់ចំណី	។
^១០-	ព្រះអង្គមិនដែលគាប់	ព្រះទ័យជាប់នឹងសេះថ្មី
	ទ្រង់មិនពេញព្រះទ័យ	មនុស្សពេញដីដែលខ្លាំងក្លា	។
^១១-	តែព្រះអង្គទ្រង់គាប់	ព្រះទ័យជាប់នឹងមនុស្សណា
	កោតខ្លាចព្រះចេស្តា	ផ្ញើជីវ៉ាលើព្រះអង្គ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ ក្រុមគ្រីស្តទូតបានឃើញហាក់ដូចជាមានអណ្ដាតភ្លើងបែកចេញពីគ្នា ចុះមកសណ្ឋិតលើពួកគេម្នាក់ៗ អ្នកទាំងនោះបានពោរ‌ពេញដោយព្រះ‌វិញ្ញាណដ៏‌វិសុទ្ធ ហើយចាប់ផ្ដើមនិយាយភាសាផ្សេងៗពីគ្នា អាលេលូយ៉ា!

បទលើកតម្កើងតាមគម្ពីរវិវរណៈ (វវ ១៥,៣-៤)

បន្ទរទី៣៖ ព្រះវិញ្ញាណដែលយាងចេញពីព្រះបិតា ព្រះ‌អង្គនឹងសម្ដែងសិរី‌រុងរឿងរបស់ខ្ញុំ អាលេលូយ៉ា!

^៣

«ឱព្រះ‌ជា‌អម្ចាស់ដ៏មានព្រះ‌ចេស្ដាលើអ្វីៗទាំងអស់អើយ
ស្នាព្រះហស្ដរបស់ព្រះអង្គប្រសើរឧត្ដម គួរឱ្យកោតស្ញប់ស្ញែងពន់ពេកណាស់ !
ឱព្រះ‌មហាក្សត្រនៃប្រជា‌ជាតិទាំង‌ឡាយអើយ
មាគ៌ារបស់ព្រះ‌អង្គសុទ្ធតែសុចរិត និងត្រឹមត្រូវទាំងអស់ !

^៤

បពិត្រព្រះ‌អម្ចាស់ ! តើមាននរណាមិនគោរពកោតខ្លាចព្រះ‌នាមព្រះ‌អង្គ !
តើនរណាមិនលើកតម្កើងសិរី‌រុងរឿងនៃព្រះ‌នាមព្រះ‌អង្គ !
ដ្បិតមានតែព្រះ‌អង្គប៉ុណ្ណោះជាព្រះដ៏‌វិសុទ្ធ។
មនុស្សគ្រប់ជាតិសាសន៍នឹងនាំគ្នាមកក្រាបថ្វាយ‌បង្គំព្រះ‌អង្គ
ដ្បិតគេបានឃើញច្បាស់ថា ព្រះ‌អង្គវិនិច្ឆ័យដោយយុត្តិធម៌»។

បន្ទរ៖ ព្រះវិញ្ញាណដែលយាងចេញពីព្រះបិតា ព្រះ‌អង្គនឹងសម្ដែងសិរី‌រុងរឿងរបស់ខ្ញុំ អាលេលូយ៉ា!

ព្រះបន្ទូលរបស់ព្រះជាម្ចាស់ (រ៉ូម ៨,៩-១១)

ចំពោះបង‌ប្អូន ដោយព្រះ‌វិញ្ញាណរបស់ព្រះ‌ជាម្ចាស់សណ្ឋិតនៅក្នុងបង‌ប្អូន បង‌ប្អូនមិននៅខាងលោកីយ៍ទៀតទេ គឺនៅខាងព្រះ‌វិញ្ញាណ។ អ្នកណាគ្មានព្រះ‌វិញ្ញាណរបស់ព្រះ‌គ្រីស្ដ អ្នកនោះមិនមែនជាកូនចៅរបស់ព្រះ‌អង្គទេ។ ប្រសិនបើព្រះ‌គ្រីស្ដគង់នៅក្នុងបង‌ប្អូន ទោះបីរូបកាយរបស់បង‌ប្អូនស្លាប់ ព្រោះតែបាបក៏ដោយ ក៏ព្រះ‌វិញ្ញាណនៅតែផ្ដល់ជីវិតឱ្យបង‌ប្អូនដែរ មកពីព្រះ‌ជាម្ចាស់ប្រោសបង‌ប្អូនឱ្យសុចរិត។ ប្រសិនបើព្រះ‌វិញ្ញាណរបស់ព្រះ‌ជាម្ចាស់ ដែលបានប្រោសព្រះ‌យេស៊ូឱ្យមានព្រះ‌ជន្មរស់ឡើងវិញ សណ្ឋិតនៅក្នុងបង‌ប្អូនមែននោះ ព្រះ‌ជាម្ចាស់ដែលបានប្រោសព្រះ‌គ្រីស្ដឱ្យមានព្រះជន្មរស់ឡើងវិញ ព្រះ‌អង្គក៏នឹងប្រទានឱ្យរូបកាយរបស់បង‌ប្អូន ដែលតែង‌តែស្លាប់នេះ មានជីវិតតាម‌រយៈព្រះ‌វិញ្ញាណដែលសណ្ឋិតនៅក្នុងបង‌ប្អូននោះដែរ។

បន្ទរ៖ ព្រះវិញ្ញាណដ៏វិសុទ្ធ គឺជាព្រះដ៏ជួយការពារ *អាលេលូយ៉ា! អាលេលូយ៉ា!។ បន្ទរឡើងវិញ៖…
-ព្រះ‌អង្គនឹងណែ‌នាំអ្នករាល់គ្នាឱ្យស្គាល់សេចក្ដីពិតគ្រប់ចំពូក។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ ឱព្រះវិញ្ញាណដ៏វិសុទ្ធ សូមយាងមកបង្កាត់ភ្លើងនៃសេចក្តីស្រឡាញ់របស់ព្រះអង្គ ក្នុងដួងចិត្តអ្នកជឿទាំងអស់។ ទោះបីជាពួកគេនិយាយភាសាផ្សេងៗពីគ្នាយ៉ាងណាក្តី ក៏ព្រះអង្គបង្រួបបង្រួមជាតិសាសន៍ទាំងអស់ឱ្យមានជំនឿតែមួយ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ ឱព្រះវិញ្ញាណដ៏វិសុទ្ធ សូមយាងមកបង្កាត់ភ្លើងនៃសេចក្តីស្រឡាញ់របស់ព្រះអង្គ ក្នុងដួងចិត្តអ្នកជឿទាំងអស់។ ទោះបីជាពួកគេនិយាយភាសាផ្សេងៗពីគ្នាយ៉ាងណាក្តី ក៏ព្រះអង្គបង្រួបបង្រួមជាតិសាសន៍ទាំងអស់ឱ្យមានជំនឿតែមួយ អាលេលូយ៉ា!

ពាក្យអង្វរសកល

នៅបុណ្យថ្ងៃទីហាសិបបានបញ្ចប់ ព្រះជាម្ចាស់បានចាត់ព្រះវិញ្ញាណដ៏វិសុទ្ធ ចុះមកសណ្ឋិតលើក្រុមគ្រីស្តទូត។ ដូចយើងខ្ញុំបានប្រារព្ធពិធីបុណ្យដ៏អស្ចារ្យនេះ រួមនឹងអំណរសប្បាយ និងជំនឿ ដោយស្រែកឡើងថា ៖

បន្ទរ៖ សូមព្រះអង្គចាត់ព្រះវិញ្ញាណឱ្យយាងមក និងធ្វើឱ្យពិភពលោកទាំងមូលផ្លាស់ប្រែជាថ្មីផង !

កាលពីដើមដំបូងបង្អស់ ព្រះអង្គបានបង្កើតផ្ទៃមេឃ និងផែនដី ហើយដល់ពេលកំណត់ ព្រះអង្គបានធ្វើឱ្យអ្វីៗទាំងអស់ផ្លាស់ប្រែជាថ្មី ក្នុងអង្គព្រះគ្រីស្ត
—តាមរយៈព្រះវិញ្ញាណព្រះអង្គ សូមទ្រង់បន្តបង្កើតពិភពលោក ជាមួយនឹងព្រះអំណោយនៃការសង្រ្គោះ។ (បន្ទរ)

ព្រះអង្គបានផ្លុំខ្យល់នៃដង្ហើមជីវិតចូលទៅក្នុងខ្លួនលោកអដាំ
—សូមព្រះអង្គចាត់ព្រះវិញ្ញាណឱ្យយាងមកក្នុងព្រះសហគមន៍ ដើម្បីឱ្យព្រះសហគមន៍ក្លាយជាជីវិត និងមានភាពរឹងមាំ ហើយនាំជីវិតថ្មីទៅកាន់ពិភពលោកទាំងមូល។ (បន្ទរ)

ដោយព្រះពន្លឺនៃព្រះវិញ្ញាណ សូមព្រះអង្គបំភ្លឺពិភពលោក និងកម្ចាត់ភាពងងឹតនៃពេលវេលា
—សូមព្រះអង្គបង្វែរការស្អប់ឱ្យទៅជាការស្រឡាញ់ បង្វែរទុក្ខព្រួយឱ្យទៅជាអំណរសប្បាយ បង្វែរសង្រ្គាមឱ្យទៅជាសន្តិភាព ដែលយើងខ្ញុំប្រាថ្នាចង់បានយ៉ាងខ្លាំង។ (បន្ទរ)

ទឹកបានហូរចេញពីឆ្អឹងជំនីររបស់ព្រះគ្រីស្ត ដែលជាប្រភពនៃព្រះវិញ្ញាណរបស់ព្រះអង្គ
—សូមឱ្យទឹកនេះហូរមកស្រោចស្រពផែនដីទាំងមូល និងនាំសេចក្តីល្អមកជាមួយផង។ (បន្ទរ)

ព្រះអង្គបាននាំជីវិត និងសិរីរុងរឿងមកឱ្យមនុស្សលោក តាមរយៈព្រះវិញ្ញាណដ៏វិសុទ្ធ
—សូមព្រះអង្គនាំអ្នកដែលបានលាចាកលោកនេះឱ្យចូលទៅក្នុងសេចក្តីស្រឡាញ់ និងអំណរសប្បាយនៃស្ថានបរមសុខ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាពសព្វប្រការ ! អស់រយៈពេលហាសិបថ្ងៃ ព្រះអង្គប្រោសឱ្យយើងខ្ញុំជួបជុំគ្នាអបអរសាទរបុណ្យចម្លង ដែលជាគម្រោងការដ៏អស្ចាររបស់ព្រះអង្គ។ សូមព្រះអង្គបង្រួបបង្រួមមនុស្សគ្រប់ជាតិសាសន៍ដែលបែកខ្ញែកគ្នា ឱ្យទៅជាមហាគ្រួសារតែមួយ និងសូមប្រោសឱ្យប្រជាជនដែលច្របូកច្របល់និយាយភាសារៀងៗខ្លួន រួមគ្នាប្រកាសព្រះនាមព្រះអង្គវិញ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

7 Views

Post Views: 7