រដូវបុណ្យចម្លង

ថ្ងៃសៅរ៍ អាទិត្យទី៧
_{(ពេលព្រឹក)}

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ព្រះអម្ចាស់មានព្រះជន្មរស់ឡើងវិញហើយ អាលេលូយ៉ា!

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩,១៤៥-១៥២

ខ្ញុំស្រែកហៅ ព្រះអង្គគង់ជិតខ្ញុំ

បន្ទរទី១ ៖ រីឯ​ពាក្យ​ទាំង​ប៉ុន្មាន​ដែល​ខ្ញុំ​បាន​និយាយ​ប្រាប់​អ្នក​រាល់​គ្នា សុទ្ធ​តែ​ចេញ​មក​ពី​ព្រះ‌វិញ្ញាណ​ដែល​ផ្ដល់​ជីវិត អាលេលូយ៉ា!

១៤៥	បពិត្រព្រះអម្ចាស់! ទូលបង្គំអង្វរព្រះអង្គយ៉ាងអស់ពីចិត្ត សូមឆ្លើយតបមកទូលបង្គំផង ដើម្បីឱ្យទូលបង្គំប្រតិបត្តិតាមក្រឹត្យវិន័យរបស់ព្រះអង្គ!
១៤៦	ទូលបង្គំស្រែកអង្វរព្រះអង្គ សូមសង្គ្រោះទូលបង្គំផង ដើម្បីឱ្យទូលបង្គំប្រព្រឹត្តតាមដំបូន្មានរបស់ព្រះអង្គ!
១៤៧	ទូលបង្គំស្រែកហៅព្រះអង្គ តាំងពីមុនថ្ងៃរះទៅទៀត ទូលបង្គំទន្ទឹងរង់ចាំព្រះអង្គមានព្រះបន្ទូល។
១៤៨	ទូលបង្គំសញ្ជឹងគិតអំពីព្រះបន្ទូលសន្យារបស់ព្រះអង្គមុនពេលភ្លឺ។
១៤៩	សូមស្តាប់ពាក្យអង្វររបស់ទូលបង្គំ ដោយព្រះហឫទ័យមេត្តាករុណា ឱព្រះអម្ចាស់អើយ! សូមជួយទូលបង្គំឱ្យរស់ឡើងវិញ តាមសេចក្តីដែលព្រះអង្គបានសម្រេចផង។
១៥០	អស់អ្នកដែលតាមព្យាបាទទូលបង្គំ នាំគ្នាចូលមកជិតទូលបង្គំ អ្នកទាំងនោះ ឃ្លាតចេញឆ្ងាយពីធម្មវិន័យរបស់ព្រះអង្គ។
១៥១	បពិត្រព្រះអម្ចាស់! ព្រះអង្គគង់នៅជិតទូលបង្គំ វិន័យទាំងប៉ុន្មានរបស់ព្រះអង្គ សុទ្ធតែត្រឹមត្រូវទាំងអស់
១៥២	តាំងពីយូរយារណាស់មកហើយ ទូលបង្គំដឹងថា ព្រះអង្គប្រទានដំបូន្មានឱ្យនៅស្ថិតស្ថេរអស់កល្បជានិច្ច។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ រីឯ​ពាក្យ​ទាំង​ប៉ុន្មាន​ដែល​ខ្ញុំ​បាន​និយាយ​ប្រាប់​អ្នក​រាល់​គ្នា សុទ្ធ​តែ​ចេញ​មក​ពី​ព្រះ‌វិញ្ញាណ​ដែល​ផ្ដល់​ជីវិត អាលេលូយ៉ា!

បទលើកតម្កើងតាមគម្ពីរព្រះប្រាជ្ញាញាណ (ប្រាញ ៩,១-៦.៩-១១)

សូមព្រះអង្គប្រទានព្រះប្រាជ្ញាញាណមកទូលបង្គំ

ដ្បិត​ខ្ញុំ​នឹង​ផ្ដល់​ឲ្យ​អ្នក​រាល់​គ្នា​មាន​ថ្វីមាត់ និង​ប្រាជ្ញា មិន​ឲ្យ​ពួក​ប្រឆាំងអាច​ប្រកែក​តទល់​នឹង​អ្នក​រាល់​គ្នា​បាន​ឡើយ (លក ២១,១៥)។

បន្ទរទី២ ៖ បពិត្រព្រះអម្ចាស់ ! ព្រះអង្គបានសង់​ព្រះ‌វិហារ ព្រម​ទាំង​សង់​អាសនៈ​មួយ​នៅ​លើ​ភ្នំ​ដ៏‌វិសុទ្ធ​របស់​ព្រះអង្គ អាលេលូយ៉ា!

(បទពាក្យ ៧)

បន្ទរ ៖ បពិត្រព្រះអម្ចាស់ ! ព្រះអង្គបានសង់​ព្រះ‌វិហារ ព្រម​ទាំង​សង់​អាសនៈ​មួយ​នៅ​លើ​ភ្នំ​ដ៏‌វិសុទ្ធ​របស់​ព្រះអង្គ អាលេលូយ៉ា!

ទំនុកតម្កើងលេខ ១១៧

ចូរសរសើរតម្កើងព្រះអម្ចាស់ ដ្បិតព្រះអង្គមានព្រះហឫទ័យមេត្តាករុណា

រីឯ​សាសន៍​ដទៃ​វិញ គេ​លើក​តម្កើង​សិរី‌រុង​រឿង​របស់​ព្រះ‌ជាម្ចាស់ ដោយ​ព្រះ‌អង្គ​សម្ដែង​ព្រះ‌ហឫទ័យ​មេត្តា‌ករុណា​ដល់​គេ (រ៉ូម ១៥,៩)។

បន្ទរទី៣ ៖ ខ្ញុំជាផ្លូវ ជាសេចក្តីពិត និងជាជីវិត អាលេលូយ៉ា!

១	ប្រជាជាតិទាំងឡាយអើយ! ចូរសរសើរតម្កើងព្រះអម្ចាស់! ប្រជារាស្ត្រទាំងប៉ុន្មានអើយ! ចូរលើកតម្កើងសិរីរុងរឿងរបស់ព្រះអង្គ!
២	ដ្បិតព្រះអង្គមានព្រះហឫទ័យមេត្តាករុណាចំពោះយើងពន់ពេកក្រៃ ព្រះអម្ចាស់មានព្រះហឫទ័យស្មោះស្ម័គ្រចំពោះយើងរហូតតរៀងទៅ។ សូមសរសើរតម្កើងព្រះអម្ចាស់

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ខ្ញុំជាផ្លូវ ជាសេចក្តីពិត និងជាជីវិត អាលេលូយ៉ា!

ព្រះបន្ទូលរបស់ព្រះជាម្ចាស់ (រ៉ូម ១៤,៧-៩)​

ក្នុង​ចំណោម​បង‌ប្អូន គ្មាន​នរណា​ម្នាក់​រស់ ឬ​ស្លាប់​សម្រាប់​ខ្លួន​ឯង​ឡើយ ដ្បិត​បើ​យើង​រស់ យើង​រស់​សម្រាប់​ព្រះ‌អម្ចាស់ ហើយ​បើ​យើង​ស្លាប់ ក៏​ស្លាប់​សម្រាប់​ព្រះ‌អម្ចាស់​ដែរ។ ទោះ​បី​យើង​រស់​ក្តី ស្លាប់​ក្តី យើង​ថ្វាយ​ខ្លួន​ទៅ​ព្រះ‌អម្ចាស់​ជា‌និច្ច ដ្បិត​ព្រះ‌គ្រីស្ដ​បាន​សោយ​ទិវង្គត និង​មាន​ព្រះ‌ជន្ម​រស់​ឡើង​វិញ ដើម្បី​ធ្វើជា​ព្រះ‌អម្ចាស់​ទាំង​លើ​មនុស្ស​ស្លាប់​ទាំង​លើ​មនុស្ស​រស់។

បន្ទរ៖ ព្រះអម្ចាស់មានព្រះជន្មរស់ឡើងវិញ *អាលេលូយ៉ា! អាលេលូយ៉ា!។ បន្ទរឡើងវិញ៖…
-ព្រះអង្គត្រូវគេព្យួរនៅលើឈើឆ្កាងសម្រាប់យើងខ្ញុំ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ ៖ «ចូរ​ដឹង​ថា ខ្ញុំ​នៅ​ជា​មួយ​អ្នក​រាល់​គ្នា​ជា​រៀង​រាល់​ថ្ងៃ រហូត​ដល់​អវសាន​កាល​នៃ​ពិភព‌លោក» អាលេលូយ៉ា!

៦៨	”សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល ដ្បិតទ្រង់សព្វព្រះហឫទ័យយាងមករំដោះប្រជារាស្ត្ររបស់ព្រះអង្គ។
៦៩	ទ្រង់បានប្រទានព្រះសង្គ្រោះដ៏មានឫទ្ធិមួយព្រះអង្គ ពីក្នុងចំណោមព្រះញាតិវង្សរបស់ព្រះបាទដាវីឌ ជាអ្នកបម្រើព្រះអង្គឱ្យមកយើង។
៧០	ព្រះជាម្ចាស់ប្រទានព្រះសង្គ្រោះនេះមកយើង ស្របនឹងព្រះបន្ទូលសន្យា ថ្លែងតាមរយៈព្យាការីរបស់ព្រះអង្គនៅជំនាន់ដើម
៧១	គឺព្រះអង្គសង្គ្រោះយើងឱ្យរួចពីកណ្តាប់ដៃរបស់ខ្មាំងសត្រូវ និងរួចពីអំណាចរបស់អ្នកដែលស្អប់យើង
៧២	ព្រះអង្គសម្ដែងព្រះហឫទ័យមេត្តាករុណាដល់បុព្វបុរសយើង ហើយគោរពតាមសម្ពន្ធមេត្រីរបស់ព្រះអង្គយ៉ាងស្មោះស្ម័គ្រ
៧៣	គឺព្រះអង្គបានសន្យាយ៉ាងម៉ឺងម៉ាត់ដល់លោកអប្រាហាំ ជាបុព្វបុរសរបស់យើងថា
៧៤	ទ្រង់នឹងរំដោះយើងឱ្យរួចពីកណ្តាប់ដៃរបស់ខ្មាំងសត្រូវ ដើម្បីយើងអាចគោរពបម្រើព្រះអង្គបានដោយឥតភ័យខ្លាច
៧៥	ព្រមទាំងឱ្យយើងរស់នៅបានបរិសុទ្ធ និងសុចរិតជាទីគាប់ព្រះហឫទ័យព្រះជាម្ចាស់ ជារៀងរាល់ថ្ងៃ រហូតអស់មួយជីវិត។
៧៦	ចំណែកឯកូនវិញ កូននឹងទៅជាព្យាការីរបស់ព្រះដ៏ខ្ពង់ខ្ពស់បំផុត ព្រោះកូននឹងដើរមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។
៧៧	កូននឹងឱ្យប្រជារាស្ត្ររបស់ព្រះអង្គដឹងថា ព្រះអង្គសង្គ្រោះគេ ដោយលើកលែងគេឱ្យរួចពីបាប។
៧៨	ព្រះរបស់យើងមានព្រះទ័យមេត្តាករុណាដ៏លើសលប់ ព្រះអង្គប្រទានថ្ងៃរះពីស្ថានលើមក ដើម្បីរំដោះយើង
៧៩	និងដើម្បីបំភ្លឺអស់អ្នកដែលស្ថិតនៅក្នុងទីងងឹត ក្រោមអំណាចនៃសេចក្តីស្លាប់ ព្រមទាំងតម្រង់ផ្លូវយើងឆ្ពោះទៅរកសេចក្តីសុខសាន្ត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ឬ ទំនុកតម្កើងរបស់លោកសាការី (តាមបែបស្មូត) បទពាក្យ ៧

៦៨-	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្ម័គ្រស្មោះ	យាងមករំដោះរាស្ត្រព្រះអង្គ	។
៦៩-	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	នៃអង្គដាវីឌបម្រើជាក់	។
៧០-	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលអាក់
	ដូចបានសន្យាតាមរយៈ	ព្យាការីធ្លាប់ស្ម័គ្រកាលគ្រាមុន	។
៧១-	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២-	ព្រះអង្គសម្ដែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣-	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូច្នេះថា	។
៧៤-	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបវន្ទា	ព្រះអង្គគ្រប់គ្រាគ្មានភ័យភិត	។
៧៥-	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦-	ចំណែកឯរូបរបស់កូន	នឹងក្លាយខ្លួនជាព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧-	កូននឹងធ្វើឱ្យអស់ប្រជា	រាស្ត្រទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨-	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩-	សម្រាប់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះទៅរកក្តីសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ «ចូរ​ដឹង​ថា ខ្ញុំ​នៅ​ជា​មួយ​អ្នក​រាល់​គ្នា​ជា​រៀង​រាល់​ថ្ងៃ រហូត​ដល់​អវសាន​កាល​នៃ​ពិភព‌លោក» អាលេលូយ៉ា!

ពាក្យអង្វរសកល

យើងខ្ញុំបានទទួលពិធីជ្រមុជក្នុងព្រះវិញ្ញាណដ៏វិសុទ្ធ។ ដោយរួមជាមួយអ្នកដែលទទួលពិធីជ្រមុជទឹកទាំងអស់ យើងទូលព្រះអង្គថា ៖

បន្ទរ៖ បពិត្រព្រះអម្ចាស់យេស៊ូ ! សូមប្រទានព្រះវិញ្ញាណព្រះអង្គឱ្យយើងខ្ញុំ ដើម្បីប្រោសយើងខ្ញុំឱ្យបានវិសុទ្ធ !

បពិត្រព្រះអម្ចាស់ ! សូមចាត់ព្រះវិញ្ញាណដ៏វិសុទ្ធរបស់ព្រះអង្គឱ្យយើងខ្ញុំ
—ដើម្បីឱ្យយើងខ្ញុំអាចប្រកាសអំពីព្រះអង្គ នៅចំពោះមុខមនុស្សលោកថា ព្រះអង្គជាព្រះអម្ចាស់ និងជាព្រះមហាក្សត្រ។ (បន្ទរ)

សូមព្រះអង្គប្រទានឱ្យយើងខ្ញុំមានសេចក្តីស្រឡាញ់ដ៏ស្មោះស្ម័គ្រ
—ដូច្នេះ ព្រះសហគមន៍អាចជាគ្រួសារដែលមានសេចក្តីស្រឡាញ់។ (បន្ទរ)

សូមព្រះអង្គប្រទានព្រះហឫទ័យប្រណីសន្តោសដល់គ្រីស្តបរិស័ទទាំងឡាយ
—ដើម្បីឱ្យពួកគេអាចទទួលនូវអំណរសប្បាយ ដែលជាអំណោយពីព្រះវិញ្ញាណ។ (បន្ទរ)

សូមប្រោសប្រទានឱ្យយើងខ្ញុំមានឫទ្ធានុភាពនៃព្រះវិញ្ញាណដ៏វិសុទ្ធ
—ដើម្បីព្យាបាលរបួសរបស់យើងខ្ញុំ និងធ្វើឱ្យយើងខ្ញុំបានរឹងមាំ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាព ! សូមឱ្យសេចក្តីស្រឡាញ់ដែលយើងខ្ញុំបានប្រារព្ធក្នុងរដូវបុណ្យចម្លងនេះ យកទៅអនុវត្តក្នុងជីវិតប្រចាំថ្ងៃរបស់យើងខ្ញុំផង។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។