រដូវបុណ្យចម្លង សប្តាហ៍ទី៧ ថ្ងៃអង្គារ

Posted on 20 ខែឧសភា 20252 ខែមិថុនា 2025 by Siya Khim

រដូវបុណ្យចម្លង

សន្តឆាលល្វង់ហ្គា និងសហជីវិន ជាមរណសាក្សី នៅយូហ្គាន់ដា

(រំឭកចាំបាច់)

ថ្ងៃអង្គារ អាទិត្យទី៧
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១២៥

ព្រះអម្ចាស់គង់នៅជុំវិញប្រជារាស្ត្ររបស់ព្រះអង្គ

សូមព្រះជាម្ចាស់ប្រទានសេចក្តីសុខសាន្ត…ដល់ប្រជារាស្ត្រអ៊ីស្រាអែលរបស់ព្រះអង្គ (កាឡ ៦,១៦)។

បន្ទរទី១ ៖ «សូមឱ្យអ្នករាល់គ្នាបានប្រកបដោយសេចក្ដីសុខសាន្ត! ខ្ញុំទេតើ កុំភ័យខ្លាចអ្វីឡើយ អាលេលូយ៉ា!

^១-	អ្នកណាផ្ញើជីវិតលើព្រះអម្ចាស់ អ្នកនោះប្រៀបបាននឹងភ្នំស៊ីយ៉ូនដែលស្ថិតស្ថេររហូត ឥតរង្គើឡើយ។
^២-	ភ្នំនានានៅព័ទ្ធជុំវិញក្រុងយេរូសាឡឹមយ៉ាងណា ព្រះអម្ចាស់ក៏គង់នៅជុំវិញប្រជារាស្ត្ររបស់ព្រះអង្គ តាំងពីពេលនេះ រហូតដល់អស់កល្បជានិច្ចយ៉ាងនោះដែរ។
^៣-	ដ្បិតស្តេចពាលពុំអាចគ្រប់គ្រងលើទឹកដីរបស់មនុស្សសុចរិតបានទេ ដូច្នេះ មនុស្សសុចរិតគ្មានចិត្តលំអៀងទៅប្រព្រឹត្តអំពើទុច្ចរិតឡើយ។
^៤-	ឱព្រះអម្ចាស់អើយ! សូមសម្តែងព្រះហឫទ័យសប្បុរស ចំពោះអស់អ្នកដែលមានចិត្តសប្បុរស និងទៀងត្រង់។
^៥-	រីឯអស់អ្នកដែលដើរតាមមាគ៌ាដ៏វៀចវេរវិញ សូមព្រះអម្ចាស់ដេញគេឱ្យទៅជាមួយអស់អ្នក ដែលប្រព្រឹត្តអំពើទុច្ចរិតចុះ។ សូមឱ្យអ៊ីស្រាអែលបានប្រកបដោយសេចក្តីសុខសាន្ត!។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ «សូមឱ្យអ្នករាល់គ្នាបានប្រកបដោយសេចក្ដីសុខសាន្ត! ខ្ញុំទេតើ កុំភ័យខ្លាចអ្វីឡើយ អាលេលូយ៉ា!

ទំនុកតម្កើងលេខ ១៣១

ដូចកូននៅជាប់ទ្រូងម្តាយ

ចូរយកនឹមរបស់ខ្ញុំដាក់លើអ្នករាល់គ្នា ហើយរៀនពីខ្ញុំទៅ អ្នករាល់គ្នាមុខជាបានស្ងប់ចិត្តមិនខាន ដ្បិតខ្ញុំស្លូត និងមានចិត្តសុភាព (មថ ១១,២៩)។

បន្ទរទី២ ៖ អ៊ីស្រា‌អែលអើយ ចូរទុកចិត្តលើព្រះអម្ចាស់ អាលេលូយ៉ា!

(បទកាកគតិ)

^១-	បពិត្រព្រះម្ចាស់	ទូលបង្គំជាមនុស្ស	ដែលមិនអំនួត
	មិនវាយឫកខ្ពស់	មិនអាងមិនអួត	មិនចង់ប្រកួត
		អ្នកតូចអ្នកទាប	។
	ខ្ញុំមិនលោភលន់	ចង់បានទ្រព្យធន	គេជាដរាប
	មិនចង់បានអ្វី	ដែលធំហួសមាឌ	លើសសមត្ថភាព
		របស់ខ្ញុំឡើយ	។
^២-	តែផ្ទុយទៅវិញ	ចិត្តខ្ញុំពោរពេញ	ស្ងៀមស្ងាត់ព្រងើយ
	ដូចជាកូនក្មេង	ជាប់ទ្រូងម្តាយហើយ	វាធ្វើកន្តើយ
		នឹងអ្វីទាំងអស់	។
^៣-	អ៊ីស្រាអែលអើយ	កុំបង្អង់ឡើយ	ទុកចិត្តលើព្រះ
	តាំងពីឥឡូវ	តទៅឥតខ្ចោះ	រហូតដល់អស់
		កប្បកល្បជានិច្ច	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ ៖ អ៊ីស្រា‌អែលអើយ ចូរទុកចិត្តលើព្រះអម្ចាស់ អាលេលូយ៉ា!

បទលើកតម្កើងតាមគម្ពីរវិវរណៈ (វវ ៤,១១.៥,៩-១០.១២)

ទំនុកនៃការប្រោះលោះ

បន្ទរទី៣ ៖ សូមឱ្យអ្វីៗសព្វសារពើដែលព្រះជាម្ចាស់បានបង្កើតមក គោរពបម្រើព្រះអង្គ។ ព្រះអង្គបង្គាប់យ៉ាងណាក៏កើតមានយ៉ាងនោះមែន អាលេលូយ៉ា!

^១១	“បពិត្រព្រះអម្ចាស់ជាព្រះនៃយើងខ្ញុំ ព្រះអង្គសមនឹងទទួលសិរីរុងរឿង ព្រះកិត្តិនាម និងឫទ្ធានុភាព ដ្បិតព្រះអង្គបានបង្កើតរបស់សព្វសារពើមក អ្វីៗទាំងអស់សុទ្ធតែកើតមាន ហើយនៅស្ថិតស្ថេរ ដោយសារព្រះហឫទ័យរបស់ព្រះអង្គ”។
^៩	គេនាំគ្នាច្រៀងបទចម្រៀងថ្មីថា ៖ “ព្រះអង្គសមនឹងទទួលក្រាំង ហើយបកត្រាផង ព្រោះទ្រង់ត្រូវគេសម្លាប់ធ្វើយញ្ញបូជា ព្រះអង្គបានលោះមនុស្សពីគ្រប់ពូជ គ្រប់ភាសា គ្រប់ប្រជាជន និងពីគ្រប់ជាតិសាសន៍ យកមកថ្វាយព្រះជាម្ចាស់ ដោយសារព្រះលោហិតរបស់ព្រះអង្គ។
^១០	ព្រះអង្គបានធ្វើឱ្យយើងទៅជារាជាណាចក្រ និងជាក្រុមបូជាចារ្យ បម្រើព្រះជាម្ចាស់របស់យើង ហើយយើងនឹងគ្រងរាជ្យលើផែនដី” ។
^១២	“កូនចៀមដែលគេសម្លាប់ធ្វើយញ្ញបូជា ទ្រង់សមនឹងទទួលឫទ្ធានុភាព រាជ្យសម្បត្តិ ព្រះប្រាជ្ញាញាណ ឥទ្ធិឫទ្ធិ ព្រះកិត្តិនាម សិរីរុងរឿង និងការសរសើរតម្កើង” ។

បន្ទរ ៖ សូមឱ្យអ្វីៗសព្វសារពើដែលព្រះជាម្ចាស់បានបង្កើតមក គោរពបម្រើព្រះអង្គ។ ព្រះអង្គបង្គាប់យ៉ាងណាក៏កើតមានយ៉ាងនោះមែន អាលេលូយ៉ា!

ព្រះបន្ទូលរបស់ព្រះជាម្ចាស់ (រ៉ូម ៨,២៦-២៧)

យ៉ាងណា‌មិញ ព្រះ‌វិញ្ញាណក៏យាងមកជួយយើងដែលទន់ខ្សោយនេះដែរ ដ្បិតយើងពុំដឹងអធិដ្ឋានដូចម្ដេច ដើម្បីឱ្យបានសមនោះឡើយ តែព្រះ‌វិញ្ញាណផ្ទាល់ព្រះ‌អង្គទូល‌អង្វរឱ្យយើង ដោយព្រះ‌សូរសៀងដែលគ្មាននរណាអាចថ្លែងបាន។ រីឯព្រះ‌ជាម្ចាស់ដែលឈ្វេងយល់ចិត្តមនុស្ស ព្រះ‌អង្គជ្រាបព្រះ‌បំណងរបស់ព្រះ‌វិញ្ញាណ ព្រោះព្រះ‌វិញ្ញាណទូល‌អង្វរឱ្យប្រជាជនដ៏‌វិសុទ្ធ ស្របតាមព្រះ‌ហឫទ័យរបស់ព្រះ‌ជាម្ចាស់។

បន្ទរ៖ ព្រះវិញ្ញាណដ៏វិសុទ្ធ គឺជាព្រះដ៏ជួយការពារ *អាលេលូយ៉ា! អាលេលូយ៉ា!។ បន្ទរឡើងវិញ៖…
-ព្រះ‌អង្គនឹងណែ‌នាំអ្នករាល់គ្នាឱ្យស្គាល់សេចក្ដីពិតគ្រប់ចំពូក។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ អ្នករាល់គ្នានឹងទទួលឫទ្ធា‌នុភាពមួយ គឺឫទ្ធា‌នុភាពនៃព្រះ‌វិញ្ញាណដ៏‌វិសុទ្ធមកសណ្ឋិតលើអ្នករាល់គ្នា។ អ្នករាល់គ្នានឹងធ្វើជាបន្ទាល់របស់ខ្ញុំ រហូតដល់ស្រុកដាច់ស្រយាលនៃផែន‌ដី អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ អ្នករាល់គ្នានឹងទទួលឫទ្ធា‌នុភាពមួយ គឺឫទ្ធា‌នុភាពនៃព្រះ‌វិញ្ញាណដ៏‌វិសុទ្ធមកសណ្ឋិតលើអ្នករាល់គ្នា។ អ្នករាល់គ្នានឹងធ្វើជាបន្ទាល់របស់ខ្ញុំ រហូតដល់ស្រុកដាច់ស្រយាលនៃផែន‌ដី អាលេលូយ៉ា!

ពាក្យអង្វរសកល

សូមសរសើរតម្កើងសិរីរុងរឿងរបស់ព្រះគ្រីស្ត ដែលបានប្រទានឱ្យសាសនិកជនរួមចំណែកក្នុងព្រះវិញ្ញាណដ៏វិសុទ្ធ។ ចូរយើងស្រែករកព្រះអង្គ ហើយទូលថា ៖

បន្ទរ ៖ ឱព្រះគ្រីស្តអើយ ! សូមព្រះសណ្តាប់ពាក្យអង្វរយើងខ្ញុំ !

បពិត្រព្រះអម្ចាស់យេស៊ូ ! សូមព្រះអង្គចាត់ព្រះវិញ្ញាណដ៏វិសុទ្ធចេញពីព្រះបិតាមក
—ដើម្បីលាងសម្អាត និងពង្រឹងព្រះសហគមន៍ ឱ្យកាន់តែរីកដុះដាលពាសពេញពិភពលោក។ (បន្ទរ)

បពិត្រព្រះអម្ចាស់ ! សូមព្រះអង្គណែនាំអស់អ្នកដែលគ្រប់គ្រងយើងខ្ញុំ ដោយព្រះវិញ្ញាណរបស់ព្រះអង្គ
—ដើម្បីឱ្យពួកគេក្លាយជាអ្នកបម្រើផលប្រយោជន៍រួម ក្នុងព្រះនាមព្រះអង្គ។ (បន្ទរ)

សូមព្រះអង្គចាក់បង្ហូរព្រះវិញ្ញាណដែលជួយការពារជនក្រីក្រ
—ដើម្បីជួយអស់អ្នកដែលត្រូវការជំនួយ។ (បន្ទរ)

យើងខ្ញុំសូមទូលអង្វរព្រះអង្គសម្រាប់អ្នកបម្រើគម្រោងការដ៏អស្ចារ្យរបស់ព្រះអង្គ
—ដើម្បីឱ្យពួកគេមានចិត្តស្មោះត្រង់ជានិច្ចផង។ (បន្ទរ)

ដោយទុក្ខលំបាក ការរស់ឡើងវិញ និងការយាងឡើងស្ថានបរមសុខ ព្រះអង្គបានសម្រេចការប្រោសលោះយើងខ្ញុំ
—សូមព្រះអង្គនាំព្រលឹង និងរូបកាយនៃមនុស្សស្លាប់ ឱ្យបានចូលនៅក្នុងការប្រោសលោះនេះយ៉ាងពេញលេញផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះអម្ចាស់ជាព្រះបិតា ! ព្រះអង្គប្រោសឱ្យឈាមរបស់មរណសាក្សីត្រឡប់ទៅជាគ្រាប់ពូជ ដែលបង្កើតគ្រីស្តបរិស័ទថ្មីៗជាច្រើន។ សូមព្រះអង្គប្រទានព្រះពរដល់ព្រះសហគមន៍ ដែលស្រោចស្រពដោយឈាមរបស់សន្តឆាលល្វង់ហ្គា និងសហជីវិន បានបង្កើតជាផលផ្លែដ៏បរិបូរណ៍។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

19 Views

Post Views: 19