រដូវបុណ្យចម្លង សប្តាហ៍ទី៦ ថ្ងៃសៅរ៍

Posted on 19 ខែឧសភា 202519 ខែឧសភា 2025 by Siya Khim

រដូវបុណ្យចម្លង

ថ្ងៃអាទិត្យ អាទិត្យទី៦
_{(ថ្ងៃសៅរ៍ ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩,១០៥-១១២

ការស្មឹងស្មាធិ៍លើច្បាប់របស់ព្រះជាម្ចាស់

វិន័យរបស់ខ្ញុំមានដូចតទៅនេះ គឺអ្នករាល់គ្នាស្រឡាញ់គ្នាទៅវិញទៅមក (យហ ១៥,១២)។

បន្ទរទី១ ៖ អស់អ្នកដែលប្រព្រឹត្តតាមសេចក្ដីពិតតែង‌តែចូលមករកពន្លឺ អាលេលូយ៉ា!

^១០៥	ព្រះបន្ទូលរបស់ព្រះអង្គជាចង្កៀង ដែលបំភ្លឺជំហានទូលបង្គំ និងជាពន្លឺដែលបំភ្លឺផ្លូវរបស់ទូលបង្គំ។
^១០៦	ទូលបង្គំសូមសន្យាដោយឥតងាករេថា ទូលបង្គំនឹងប្រតិបត្តិតាមសេចក្តីសម្រេចដ៏សុចរិតរបស់ព្រះអង្គ។
^១០៧	បពិត្រព្រះអម្ចាស់! ទូលបង្គំរងទុក្ខវេទនាខ្លាំងពន់ពេកណាស់ សូមប្រោសប្រទានឱ្យទូលបង្គំមានជីវិតឡើងវិញ ស្របតាមព្រះបន្ទូលរបស់ព្រះអង្គផង!
^១០៨	ឱព្រះអម្ចាស់អើយ! សូមទទួលពាក្យអង្វររបស់ទូលបង្គំ ទុកជាតង្វាយ សូមបង្រៀនក្រិត្យវិន័យរបស់ព្រះអង្គឱ្យទូលបង្គំស្គាល់ផង!
^១០៩	ជីវិតទូលបង្គំប្រឈមមុខទល់នឹងអន្តរាយជានិច្ច ប៉ុន្តែ ទូលបង្គំមិនភ្លេចធម្មវិន័យរបស់ព្រះអង្គទេ។
^១១០	មនុស្សអាក្រក់នាំគ្នាដាក់អន្ទាក់ចាំចាប់ទូលបង្គំ តែទូលបង្គំមិនវង្វេងចេញឆ្ងាយពីច្បាប់របស់ព្រះអង្គឡើយ។
^១១១	ដំបូន្មានរបស់ព្រះអង្គជាកេរមត៌ករបស់ទូលបង្គំ ដំបូន្មានទាំងនេះធ្វើឱ្យទូលបង្គំមានអំណរនៅក្នុងចិត្ត។
^១១២	ទូលបង្គំប្តេជ្ញាចិត្តធ្វើតាមក្រិត្យវិន័យរបស់ព្រះអង្គ គឺជារង្វាន់របស់ទូលបង្គំរហូតដល់ទីបំផុត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ អស់អ្នកដែលប្រព្រឹត្តតាមសេចក្ដីពិតតែង‌តែចូលមករកពន្លឺ អាលេលូយ៉ា!

ទំនុកតម្កើងលេខ ១៦

បពិត្រព្រះអម្ចាស់! ព្រះអង្គជាចំណែកមត៌ករបស់ខ្ញុំ

ព្រះ‌ជាម្ចាស់បានប្រោសលោកឲ្យរស់ឡើងវិញ ព្រះ‌អង្គដោះលែងលោកឲ្យរួចពីទុក្ខលំបាកនៃសេចក្ដីស្លាប់ (កក ២,២៤)។

បន្ទរទី២៖ ព្រះជាម្ចាស់បានប្រោសលោកឱ្យរស់ឡើងវិញ ព្រះ‌អង្គដោះលែងលោកឱ្យរួចពីទុក្ខលំបាកនៃសេចក្ដីស្លាប់ អាលេលូយ៉ា!

(បទពាក្យ ៧)

^១-	ឱព្រះជាម្ចាស់ដ៏ឧត្តម	សូមការពារខ្ញុំឱ្យសុខសាន្ត
	ដ្បិតទូលបង្គំសុំផ្ញើប្រាណ	ជ្រកក្រោមទីស្ថានម្លប់បារមី	។
^២-	ខ្ញុំសូមទូលថ្វាយព្រះម្ចាស់ថា	ព្រះអង្គពិតជាអម្ចាស់ថ្លៃ
	ក្រៅពីព្រះអង្គឥតមានអ្វី	ផ្តល់មង្គលជ័យគ្រាអាសន្ន	។
^៣-	អារុក្ខអារក្សអ្នកតាព្រៃ	ម្ចាស់ទឹកម្ចាស់ដីកាលពីមុន
	ដែលខ្ញុំពេញចិត្តខ្លាំងពេកពន់	ផ្តល់តែទារុណរាល់វេលា	។
^៤-	ទូលបង្គំនឹងមិនចូលរួម	មិនទទួលព្រមរួមជាគ្នា
	គោរពនិងថ្វាយយញ្ញបូជា	មិនពោលនាមាព្រះក្លែងក្លាយ	។
^៥-	បពិត្រព្រះអម្ចាស់ឧត្តម	ព្រះអង្គជាចំណែកស្រស់ស្រាយ
	មត៌កនៃខ្ញុំឥតក្លែងក្លាយ	ផ្តល់អ្វីទាំងឡាយតាមប្រាថ្នា	។
^៦-	ព្រះអង្គប្រទានកេរមត៌ក	វិសេសឥតអាក់ដ៏ថ្លៃថ្លា
	មកទូលបង្គំខ្ញុំនេះណា	ជាកេរអស្ចារ្យប្រសើរផុត	។
^៧-	ខ្ញុំសូមតម្កើងព្រះអម្ចាស់	ព្រោះព្រះអង្គនេះសែនមោះមុត
	ទ្រង់ផ្តល់យោបល់ខ្ញុំម្នាក់គត់	ទោះយប់ងងឹតក៏តឿនដែរ	។
^៨-	ខ្ញុំនឹកដល់ព្រះអម្ចាស់ជាប់	ដែលជាទម្លាប់ទ្រង់គង់ក្បែរ
	ខាងស្តាំរូបខ្ញុំឥតប្រួលប្រែ	ខ្ញុំមិនបែកបែរញាប់ញ័រឡើយ	។
^៩-	ហេតុនេះបានជាខ្ញុំរីករាយ	ត្រេកអរសប្បាយបានល្ហែល្ហើយ
	ខ្ញុំបានសម្រាកកាយធូរស្បើយ	ដោយសុខសាន្តហើយផុតកង្វល់	។
^១០-	ដ្បិតព្រះអង្គមិនបោះបង់ខ្ញុំ	ឱ្យរងទុក្ខធំស្លាប់សោតសល់
	ព្រះអង្គក៏មិនបណ្តោយដល់	សពបម្រើផ្ទាល់ស្អុយរលួយ	។
^១១-	ព្រះអង្គបង្ហាញផ្លូវជីវិត	ឱ្យខ្ញុំឃើញពិតគ្មានភ័យព្រួយ
	ដោយព្រះអង្គនៅគង់ជាមួយ	ទូលបង្គំគ្មានព្រួយអរសប្បាយ	។
	ដោយព្រះអង្គគង់នៅខាងស្តាំ	ជាប់ជាប្រចាំមិនជិនណាយ
	ទូលបង្គំសែនរីករាយសប្បាយ	អស់កល្បវែងឆ្ងាយតរៀងទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ ព្រះជាម្ចាស់បានប្រោសលោកឱ្យរស់ឡើងវិញ ព្រះ‌អង្គដោះលែងលោកឱ្យរួចពីទុក្ខលំបាកនៃសេចក្ដីស្លាប់ អាលេលូយ៉ា!

បទលើកតម្កើងតាមលិខិតទៅភីលីព (ភីល ២,៦-១១)

ព្រះគ្រីស្តជាអ្នកបម្រើដ៏វិសុទ្ធរបស់ព្រះជាម្ចាស់

បន្ទរទី៣ ៖ ព្រះ‌គ្រីស្ដត្រូវតែរងទុក្ខលំបាកបែបនេះសិន មុននឹងចូលទៅទទួលសិរី‌រុងរឿងរបស់ព្រះ‌អង្គ» អាលេលូយ៉ា!

^៦	ទោះបីព្រះអង្គមានឋានៈជាព្រះជាម្ចាស់ក៏ដោយ ក៏ព្រះអង្គពុំបានក្តោបក្តាប់ឋានៈ ដែលស្មើនឹងព្រះជាម្ចាស់នេះ ទុកជាកម្មសិទ្ធិដាច់មុខរបស់ព្រះអង្គឡើយ។
^៧	ផ្ទុយទៅវិញ ព្រះអង្គបានលះបង់អ្វីៗទាំងអស់ មកយកឋានៈជាទាសករ ព្រះអង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។
^៨	ព្រះអង្គបានដាក់ខ្លួនធ្វើតាមព្រះបញ្ជា រហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។
^៩	ហេតុនេះហើយ បានជាព្រះជាម្ចាស់ លើកតម្កើងព្រះអង្គឡើងយ៉ាងខ្ពង់ខ្ពស់បំផុត ព្រមទាំងប្រោសប្រទានឱ្យព្រះអង្គមានព្រះនាមប្រសើរលើសអ្វីៗទាំងអស់
^១០	ដើម្បីឱ្យអ្វីៗទាំងអស់ ទាំងនៅស្ថានបរមសុខ ទាំងនៅលើផែនដី ទាំងនៅក្រោមដី នាំគ្នាក្រាបថ្វាយបង្គំ នៅពេលណាឮព្រះនាមព្រះយេស៊ូ
^១១	និងឱ្យមនុស្សគ្រប់ភាសាប្រកាសឡើងថា ព្រះយេស៊ូគ្រីស្តជាព្រះអម្ចាស់ ដើម្បីលើកតម្កើងសិរីរុងរឿងព្រះជាម្ចាស់ជាព្រះបិតា។

បន្ទរ ៖ ព្រះ‌គ្រីស្ដត្រូវតែរងទុក្ខលំបាកបែបនេះសិន មុននឹងចូលទៅទទួលសិរី‌រុងរឿងរបស់ព្រះ‌អង្គ» អាលេលូយ៉ា!

ព្រះបន្ទូលរបស់ព្រះជាម្ចាស់ (១សល ២,៩-១០)

រីឯបង‌ប្អូនវិញ បង‌ប្អូនជាពូជសាសន៍ដែលព្រះ‌អង្គបានជ្រើសរើស ជាក្រុមបូជា‌ចារ្យរបស់ព្រះ‌មហាក្សត្រ ជាជាតិសាសន៍ដ៏‌វិសុទ្ធ ជាប្រជា‌រាស្ដ្រដែលព្រះ‌ជាម្ចាស់បានយកមកធ្វើជាកម្ម‌សិទ្ធិផ្ទាល់របស់ព្រះ‌អង្គ ដើម្បីឱ្យបង‌ប្អូនប្រកាសដំណឹងអំពីស្នាព្រះ‌ហស្ដដ៏អស្ចារ្យរបស់ព្រះ‌អង្គ ដែលបានហៅបង‌ប្អូនឱ្យចេញពីទីងងឹត មកកាន់ពន្លឺដ៏រុងរឿងរបស់ព្រះ‌អង្គ។ ពីដើម បង‌ប្អូនមិនមែនជាប្រជា‌រាស្ដ្ររបស់ព្រះ‌ជាម្ចាស់ទេ តែឥឡូវនេះ បង‌ប្អូនជាប្រជា‌រាស្ដ្ររបស់ព្រះ‌អង្គហើយ ពីដើម បង‌ប្អូនពុំបានទទួលព្រះ‌ហឫទ័យមេត្តា‌ករុណាទេ តែឥឡូវនេះ បង‌ប្អូនបានទទួលព្រះ‌ហឫទ័យមេត្តា‌ករុណាហើយ។

បន្ទរ៖ ពួកសាវ័កសប្បាយចិត្តជាខ្លាំង *អាលេលូយ៉ា! អាលេលូយ៉ា!។ បន្ទរឡើងវិញ៖…
-ដោយបានឃើញព្រះអម្ចាស់មានព្រះជន្មរស់ឡើងវិញ។ បន្ទរ៖ *..
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ..

ទំនុកតម្កើងរបស់ព្រះនាងម៉ារី

បន្ទរ៖ ខ្ញុំនឹងទូល‌អង្វរព្រះ‌បិតា ហើយព្រះ‌អង្គប្រទានព្រះដ៏ជួយការ‌ពារមួយអង្គទៀត ឱ្យគង់នៅជាមួយអ្នករាល់គ្នាជាដរាបតរៀងទៅ។ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ ខ្ញុំនឹងទូល‌អង្វរព្រះ‌បិតា ហើយព្រះ‌អង្គប្រទានព្រះដ៏ជួយការ‌ពារកមួយអង្គទៀត ឱ្យគង់នៅជាមួយអ្នករាល់គ្នាជាដរាបតរៀងទៅ។ អាលេលូយ៉ា!

ពាក្យអង្វរសកល

ដោយការរស់ឡើងវិញ ព្រះគ្រីស្តបានបំផ្លាញអំណាចនៃសេចក្តីស្លាប់ និងបានប្រទានជីវិតសាជាថ្មី។ ចូរយើងស្រែករកព្រះអង្គ ហើយទូលថា ៖

បន្ទរ៖ បពិត្រព្រះអម្ចាស់យេស៊ូ ! ព្រះអង្គមានព្រះជន្មគង់នៅអស់កល្បជានិច្ច ! សូមព្រះសណ្តាប់ពាក្យអង្វរយើងខ្ញុំ !

ព្រះអង្គជាថ្មដែលជាងសំណង់បោះបង់ចោល ហើយបានត្រឡប់មកជាថ្មគ្រឹះដ៏សំខាន់បំផុត
—សូមប្រោសឱ្យយើងខ្ញុំធ្វើជាថ្មដ៏មានជីវិត ក្នុងព្រះដំណាក់នៃព្រះសហគមន៍របស់ព្រះអង្គ។ (បន្ទរ)

ព្រះអង្គស្មោះត្រង់ និងជាសាក្សីដ៏ពិតប្រាកដ។ ព្រះអង្គជាផលដំបូងពីចំណោមមនុស្សស្លាប់
—សូមប្រោសឱ្យព្រះសហគមន៍ធ្វើជាសាក្សីអំពីព្រះអង្គឥតឈប់ឈរសោះឡើយ។ (បន្ទរ)

ព្រះអង្គតែមួយគត់ជាកូនកំលោះរបស់ព្រះសហគមន៍ ដែលកើតចេញពីស្នាមរបួសត្រង់ឆ្នឹងជំនីរព្រះអង្គ
—សូមប្រោសឱ្យយើងខ្ញុំអាចបង្ហាញអំពីសេចក្តីស្រឡាញ់របស់កូនកំលោះ និងកូនក្រមុំ ទៅកាន់ពិភពលោកផង។ (បន្ទរ)

ព្រះអង្គជាដើមដំបូង និងជាចុងក្រោយបំផុត ព្រះអង្គបានស្លាប់ និងមានជីវិតរស់ឡើងវិញ
—សូមព្រះអង្គថែរក្សាអស់អ្នកដែលបានទទួលពិធីជ្រមុជទឹក ឱ្យមានចិត្តស្មោះត្រង់រហូតដល់ថ្ងៃស្លាប់ ដើម្បីពួកគេអាចទទួលមកុដនៃជ័យជម្នះ។ (បន្ទរ)

ព្រះអង្គជាព្រះពន្លឺ និងជាចង្កៀង ដែលបំភ្លឺក្រុងដ៏វិសុទ្ធរបស់ព្រះជាម្ចាស់
—សូមបំភ្លឺមិត្តសម្លាញ់របស់ព្រះអង្គ ដែលបានស្លាប់ទៅហើយ ដើម្បីឱ្យពួកគេអាចសោយរាជ្យរួមជាមួយព្រះអង្គជារៀងរហូត។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែង ! ព្រះអង្គសព្វព្រះហឫទ័យបង្រួបបង្រួមមនុស្សលោក ដែលបាក់បែកគ្នាឱ្យចូលរួមជាមហាគ្រួសារតែមួយ។ សូមព្រះអង្គមេត្តាប្រទានព្រះវិញ្ញាណដ៏វិសុទ្ធមកណែនាំយើងខ្ញុំ ឱ្យរស់នៅសមនឹងឋានៈរបស់ខ្លួនជាបុត្រធីតារបស់ព្រះអង្គ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

4 Views

Post Views: 4