រដូវបុណ្យចម្លង សប្តាហ៍ទី៥ ថ្ងៃព្រហស្បតិ៍

Posted on 19 ខែឧសភា 202519 ខែឧសភា 2025 by Siya Khim

រដូវបុណ្យចម្លង

(សន្តីរីតា នៅកាស៊ីយ៉ា ជាបព្វជិតា)

ថ្ងៃព្រហស្បតិ៍ អាទិត្យទី៥
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៣០

ព្រះ‌អង្គបានរំដោះទូល‌បង្គំឱ្យរួចពីស្លាប់

ព្រះគ្រីស្តអរព្រះគុណព្រះបិតា ក្រោយពីព្រះអង្គមានព្រះជន្មរស់ឡើងវិញដ៏រុងរឿង (Cassian)។

បន្ទរទី១ ៖ ព្រះអង្គបានធ្វើឱ្យទុក្ខសោករបស់ទូលបង្គំ ប្រែទៅជាអំណរសប្បាយវិញ អាលេលូយ៉ា!

^២	បពិត្រព្រះអម្ចាស់! ទូលបង្គំសូមលើកតម្កើងព្រះអង្គ ព្រោះព្រះអង្គបានស្រោចស្រង់ទូលបង្គំ ព្រះអង្គពុំបានបណ្តោយឱ្យខ្មាំងសត្រូវ លេងសើចនឹងទូលបង្គំឡើយ។
^៣	ឱព្រះអម្ចាស់ជាព្រះនៃទូលបង្គំអើយ! ទូលបង្គំស្រែកអង្វរព្រះអង្គ ហើយព្រះអង្គប្រោសទូលបង្គំឱ្យបានជា។
^៤	បពិត្រព្រះអម្ចាស់! ព្រះអង្គបានស្រង់ជីវិតទូលបង្គំចេញពីចំណោមមនុស្សស្លាប់ ទូលបង្គំធ្លាក់ទៅក្នុងរណ្តៅមច្ចុរាជ តែព្រះអង្គប្រោសទូលបង្គំឱ្យមានជីវិតឡើងវិញ។
^៥	អ្នករាល់គ្នាដែលជាប្រជារាស្ត្ររបស់ព្រះអង្គអើយ! ចូរច្រៀងបទតម្កើងព្រះអម្ចាស់! ចូរលើកតម្កើងព្រះនាមដ៏វិសុទ្ធរបស់ព្រះអង្គ!
^៦	ព្រះអង្គទ្រង់ព្រះពិរោធតែមួយស្របក់ តែព្រះអង្គប្រណីសន្តោសមនុស្សអស់មួយជីវិត។ ពេលល្ងាច គេបង្ហូរទឹកភ្នែក តែព្រលឹមឡើង គេនឹងអរសប្បាយវិញ។
^៧	នៅពេលទូលបង្គំបានសុខសាន្ត ទូលបង្គំពោលថា “ទូលបង្គំនឹងមិនត្រូវរលំឡើយ!” ។
^៨	បពិត្រព្រះអម្ចាស់! ព្រះអង្គបានប្រោសឱ្យទូលបង្គំរឹងប៉ឹងដូចភ្នំ តែព្រះអង្គបានលាក់ព្រះភក្រ្តពីទូលបង្គំ នោះទូលបង្គំតក់ស្លុតក្រៃលែង។
^៩	ឱព្រះអម្ចាស់អើយ! ទូលបង្គំបានស្រែកដង្ហោយអង្វរព្រះអង្គ ទូលបង្គំទទូចអង្វរព្រះអម្ចាស់ថា ៖
^១០	“បើព្រះអង្គទុកឱ្យទូលបង្គំស្លាប់ តើបានប្រយោជន៍អ្វី? បើព្រះអង្គឱ្យទូលបង្គំធ្លាក់ទៅក្នុងរណ្តៅមច្ចុរាជ្យ តើបានប្រយោជន៍អ្វី? តើមនុស្សស្លាប់អាចសរសើរព្រះអង្គកើតឬ? តើគេអាចថ្លែងពីព្រះហឫទ័យមេត្តាករុណារបស់ព្រះអង្គកើតឬ?
^១១	ឱព្រះអម្ចាស់អើយ! សូមអាណិតមេត្តាស្តាប់ពាក្យទូលបង្គំ! ឱព្រះអម្ចាស់អើយ! សូមយាងមកសង្គ្រោះទូលបង្គំផង!” ។
^១២	ព្រះអង្គបានធ្វើឱ្យទុក្ខសោករបស់ទូលបង្គំ ប្រែទៅជាអំណរសប្បាយវិញ ព្រះអង្គបានយកសម្លៀកបំពាក់កាន់ទុក្ខចេញ ហើយប្រទានសម្លៀកបំពាក់សម្រាប់ពិធីបុណ្យឱ្យទូលបង្គំវិញ។
^១៣	ដូច្នេះ ទូលបង្គំនៅស្ងៀមមិនបានឡើយ ទូលបង្គំស្មូតទំនុកតម្កើង បពិត្រព្រះអម្ចាស់ជាព្រះនៃទូលបង្គំ! ទូលបង្គំសរសើរតម្កើងព្រះអង្គរហូតតទៅ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះអង្គបានធ្វើឱ្យទុក្ខសោករបស់ទូលបង្គំ ប្រែទៅជាអំណរសប្បាយវិញ អាលេលូយ៉ា!

ទំនុកតម្កើងលេខ ៣២

សុភមង្គលរបស់អ្នកដែលព្រះ‌អម្ចាស់អត់‌ទោសឱ្យ

ហេតុនេះហើយបានជាព្រះបាទដាវីឌ ថ្លែងអំពីសុភមង្គលរបស់អ្នកដែលព្រះជាម្ចាស់ប្រោសឲ្យសុចរិត ដោយមិនគិតដល់ផលបុណ្យ (រ៉ូម ៤,៦)។

បន្ទរទី២ ៖ យើងបានជានានឹងព្រះជាម្ចាស់វិញ ដោយព្រះបុត្រារបស់ព្រះអង្គសោយទិវង្គត អាលេលូយ៉ា!

(បទព្រហ្មគីតិ)

^១-	អ្នកដែលព្រះជាម្ចាស់	លើកលែងទោសប្រោសប្រណី
	រួចពីបាបទុក្ខភ័យ	មានសិរីសុខមង្គល	។
^២-	អស់អ្នកដែលព្រះម្ចាស់	មិនចាប់ទោសផុតអំពល់
	គ្មានចិត្តវៀចវិលវល់	មានមង្គលសុខឥតល្ហែ	។
^៣-	ដរាបណារូបខ្ញុំ	នៅមិនព្រមសារភាពទេ
	នោះខ្ញុំកើតទុក្ខទ្វេ	មិនឈប់ទេចុកចាប់ក្រៃ	។
^៤-	ដ្បិតព្រះអង្គដាក់ទោស	ព្រោះខ្ញុំខុសទាំងយប់ថ្ងៃ
	ហេវខ្សោះស្ទើរក្សិណក្ស័យ	ដូចជាដីហួតទឹកអស់	។
^៥-	រូបខ្ញុំបានសារភាព	អំពើបាបមុខព្រះម្ចាស់
	ខ្ញុំមិនលាក់លៀមសោះ	នូវកំហុសខ្ញុំនោះឡើយ	។
	ទូលបង្គំពោលថា	ខ្ញុំនេះណាសារភាពហើយ
	ទោសខ្ញុំធ្ងន់ឥតស្បើយ	ទ្រង់លើកឱ្យរួចពីបាប	។
^៦-	ហេតុនេះហើយបានជា	អ្នករាល់គ្នាប្រណិប័តន៍ក្រាប
	ព្រះម្ចាស់ជាដរាប	ជាប់រៀងរៀបមិនភិតភ័យ	។
	ទោះជាមានកង្វល់	ជួបព្យុះខ្យល់ទឹកជន់ក្តី
	ព្រះម្ចាស់តែងប្រណី	មិនឱ្យក្ស័យឬលិចលង់	។
^៧-	ព្រះអង្គជាជម្រក	ឱ្យខ្ញុំជ្រកមិនឱ្យហ្មង
	ការពាររូបខ្ញុំផង	កម្ចាត់បង់អាសន្នភ័យ	។
^៨-	យើងនឹងប្រដៅអ្នក	ឱ្យស្គាល់ជាក់ផ្លូវប្រពៃ
	ផ្តល់យោបល់ថ្លាថ្លៃ	ថែរាល់ថ្ងៃមិនឱ្យឆ្គង	។
^៩-	កុំឆោតល្ងង់ដូចលា	ឬសេះជាជំនិះម្តង
	ដាក់ដែកបង្ខាំងផង	រួចមានចងទាំងបង្ហៀរ	។
^១០-	មនុស្សពាលត្រូវរងគ្រប់	ទុក្ខទោសសព្វវេទនា
	ព្រះម្ចាស់តែងមេត្តា	ដល់អ្នកណាពឹងព្រះអង្គ	។
^១១-	មនុស្សសុចរិតអើយ	កុំកន្តើយសប្បាយឡើង
	អស់អ្នកដែលទៀងត្រង់	ស្រែកហ៊ោរផងដោយអំណរ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ យើងបានជានានឹងព្រះជាម្ចាស់វិញ ដោយព្រះបុត្រារបស់ព្រះអង្គសោយទិវង្គត អាលេលូយ៉ា!

បទលើកតម្កើងតាមគម្ពីរវិវរណៈ (វវ ១១,១៧-១៨ ; ១២,១០^ខ-១២^ក)

ការវិនិច្ឆ័យទោសរបស់ព្រះជាម្ចាស់

បន្ទរទី៣ ៖ ព្រះ‌អម្ចាស់អើយ តើមានព្រះណាអាចផ្ទឹមនឹងព្រះ‌អង្គបាន? តើនរណាមានភាពថ្កុំ‌ថ្កើងដ៏‌វិសុទ្ធដូចព្រះ‌អង្គ? អាលេលូយ៉ា!

^១៧	“បពិត្រព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ព្រះអង្គមានព្រះជន្មគង់នៅសព្វថ្ងៃនេះ ហើយក៏មានព្រះជន្មគង់នៅ តាំងពីដើមរៀងមកដែរ! យើងខ្ញុំសូមអរព្រះគុណព្រះអង្គ ព្រោះទ្រង់បានយកឫទ្ធានុភាពដ៏ខ្លាំងក្លារបស់ព្រះអង្គ មកតាំងព្រះរាជ្យរបស់ព្រះអង្គឡើង។
^១៨	ជាតិសាសន៍នានាបាននាំគ្នាខឹង ហើយពេលដែលព្រះអង្គ សម្តែងព្រះពិរោធក៏មកដល់ដែរ គឺជាពេលកំណត់ដែលព្រះអង្គ វិនិច្ឆ័យទោសមនុស្សស្លាប់។ នៅពេលនោះ ព្រះអង្គនឹងប្រទានរង្វាន់ដល់ពួកព្យាការី ជាអ្នកបម្រើរបស់ព្រះអង្គ ដល់ប្រជាជនដ៏វិសុទ្ធ និងដល់អស់អ្នកដែលគោរពកោតខ្លាចព្រះនាមព្រះអង្គ ទាំងអ្នកតូច ទាំងអ្នកធំ ហើយក៏ជាពេលដែលព្រះអង្គត្រូវបំផ្លាញ អស់អ្នកដែលបានបំផ្លាញផែនដីដែរ” ។
^១០	“ឥឡូវនេះ ដល់ពេលព្រះជាម្ចាស់ សង្គ្រោះមនុស្សលោកហើយ ហើយឫទ្ធានុភាព និងព្រះរាជ្យព្រះជាម្ចាស់របស់យើង ព្រមទាំងអំណាចព្រះគ្រីស្តរបស់ព្រះអង្គក៏បានមកដល់ដែរ ដ្បិតអ្នកចោទប្រកាន់ទោសបងប្អូនយើង ត្រូវគេទម្លាក់ចោលហើយ គឺអ្នកនោះឯងដែលចោទប្រកាន់បងប្អូនយើង ទាំងថ្ងៃទាំងយប់ នៅមុខព្រះភក្ត្រនៃព្រះរបស់យើង។
^១១	បងប្អូនយើងបានឈ្នះវា ដោយសារព្រះលោហិតរបស់កូនចៀម និងដោយសក្ខីភាពរបស់ពួកគេ ហើយបងប្អូនទាំងនោះ បានស៊ូប្តូរជីវិតឥតស្តាយសោះឡើយ។
^១២	ហេតុនេះ ស្ថានបរមសុខ និងអស់អ្នកដែលរស់នៅក្នុងស្ថានបរមសុខអើយ! ចូរមានអំណរសប្បាយឡើង!

បន្ទរ ៖ ព្រះ‌អម្ចាស់អើយ តើមានព្រះណាអាចផ្ទឹមនឹងព្រះ‌អង្គបាន? តើនរណាមានភាពថ្កុំ‌ថ្កើងដ៏‌វិសុទ្ធដូចព្រះ‌អង្គ? អាលេលូយ៉ា!

ព្រះបន្ទូលរបស់ព្រះជាម្ចាស់ (១សល ៣,១៨.២២)

សូម្បីតែព្រះ‌គ្រីស្តក៏ព្រះ‌អង្គបានសោយទិវង្គតម្ដងជាសូរេច ព្រោះតែបាបដែរ គឺព្រះដ៏សុចរិតបានសោយទិវង្គត ជាប្រយោជន៍ដល់មនុស្សទុច្ចរិត ដើម្បីនាំបង‌ប្អូនទៅថ្វាយព្រះ‌ជាម្ចាស់។ កាលព្រះ‌អង្គមានឋានៈជាមនុស្ស ព្រះ‌អង្គត្រូវគេធ្វើគុត តែព្រះ‌ជាម្ចាស់បានប្រោសព្រះ‌អង្គឱ្យមានព្រះ‌ជន្មរស់ ដោយ‌សារព្រះ‌វិញ្ញាណវិញ។ ព្រះ‌អង្គបានយាងឡើងទៅស្ថានបរម‌សុខ គង់នៅខាងស្ដាំព្រះ‌ជាម្ចាស់ ហើយពួកទេវទូត ព្រមទាំងវត្ថុស័ក្តិ‌សិទ្ធិនានាដែលមានអំណាច និងឫទ្ធា‌នុភាពនានា ចុះចូលនឹងព្រះ‌អង្គទាំងអស់។

បន្ទរ៖ ពួកសាវ័កសប្បាយចិត្តជាខ្លាំង *អាលេលូយ៉ា! អាលេលូយ៉ា!។ បន្ទរឡើងវិញ…
-ដោយបានឃើញព្រះអម្ចាស់មានព្រះជន្មរស់ឡើងវិញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ ខ្ញុំបាននិយាយសេចក្ដីទាំងនេះប្រាប់អ្នករាល់គ្នា ដើម្បីឱ្យអំណររបស់ខ្ញុំស្ថិតនៅក្នុងអ្នករាល់គ្នា ហើយដើម្បីឱ្យអ្នករាល់គ្នាមានអំណរពេញលក្ខណៈ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ ខ្ញុំបាននិយាយសេចក្ដីទាំងនេះប្រាប់អ្នករាល់គ្នា ដើម្បីឱ្យអំណររបស់ខ្ញុំស្ថិតនៅក្នុងអ្នករាល់គ្នា ហើយដើម្បីឱ្យអ្នករាល់គ្នាមានអំណរពេញលក្ខណៈ អាលេលូយ៉ា!

ពាក្យអង្វរសកល

ព្រះគ្រីស្តតើនឡើងពីចំណោមមនុស្សស្លាប់ ទុកដូចជាផលផ្លែដំបូងនៃអស់អ្នកដែលសម្រាន្តលក់។ ចូរយើងកោតសរសើរព្រះអង្គ ដោយអំណរសប្បាយថា ៖

បន្ទរ៖ បពិត្រព្រះយេស៊ូ ! ព្រះអង្គជាផលផ្លែដំបូងដែលកើតពីចំណោមមនុស្សស្លាប់ សូមព្រះសណ្តាប់ពាក្យអង្វរយើងខ្ញុំផង !

បពិត្រព្រះអម្ចាស់យេស៊ូ ! សូមព្រះអង្គនឹកដល់ព្រះសហគមន៍ដ៏វិសុទ្ធ ដែលព្រះអង្គបានសង់លើក្រុមគ្រីស្តទូត ហើយលាតសន្ធឹងដល់ទីដាច់ស្រយាលនៃផែនដី
—សូមព្រះអង្គប្រទានព្រះពរដល់អស់អ្នកដែលជឿសង្ឃឹមលើព្រះអង្គ។ (បន្ទរ)

ព្រះអង្គជាគ្រូពេទ្យដែលព្យាបាលទាំងព្រលឹង និងរូបកាយ
—សូមព្រះអង្គយាងមក ហើយសង្រ្គោះយើងខ្ញុំក្នុងសេចក្តីស្រឡាញ់របស់ព្រះអង្គ។ (បន្ទរ)

សូមព្រះអង្គប្រោសអ្នកជំងឺឱ្យបានជាសះស្បើយ និងប្រទានកម្លាំងដល់ពួកគេ
—សូមព្រះអង្គរំដោះពួកគេឱ្យរួចពីភាពទន់ខ្សោយរបស់ខ្លួនផង។ (បន្ទរ)

សូមព្រះអង្គជួយដល់អស់អ្នកដែលធ្លាក់ទឹកចិត្ត ឬរាងកាយ
—ដោយក្តីមេត្តារបស់ព្រះអង្គ សូមព្រះអង្គលើកអ្នកត្រូវការជំនួយឱ្យឈរឡើងវិញផង។ (បន្ទរ)

តាមរយៈឈើឆ្កាង និងការរស់ឡើងវិញ ព្រះអង្គបានបើកផ្លូវឱ្យមនុស្សចូលទៅកាន់ជីវិតអមតៈ
—សូមព្រះអង្គប្រោសឱ្យបងប្អូនដែលលាចាកលោក នេះ បានទទួលអំណរសប្បាយនៃព្រះរាជ្យរបស់ព្រះអង្គ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះបិតាដ៏មានធម៌មេត្តាករុណាដ៏លើសលប់ ! ព្រះអង្គសង្គ្រោះអស់អ្នកដែលផ្ញើជីវិតលើព្រះអង្គ ដោយផ្តល់សេរីភាពដ៏ពិតប្រាកដដល់គេ។ សូមព្រះអង្គមេត្តាប្រោសឱ្យព្រះសហគមន៍របស់ព្រះអង្គ ចេះគោរព និងការពារសេរីភាពនេះ ព្រមទាំងណែនាំឱ្យមនុស្សគ្រប់ជាតិសាសន៍ ចូលរួមជាមហាគ្រួសារតែមួយ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

4 Views

Post Views: 4