រដូវបុណ្យចម្លង សប្តាហ៍ទី៥ ថ្ងៃសៅរ៍

Posted on 17 ខែឧសភា 202516 ខែឧសភា 2025 by Siya Khim

រដូវបុណ្យចម្លង

ថ្ងៃអាទិត្យ អាទិត្យទី៥
_{(ថ្ងៃសៅរ៍ ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១៤១,១-៩

ពាក្យអធិដ្ឋានក្នុងគ្រាមានអាសន្ន

“ផ្សែងគ្រឿងក្រអូបនោះក៏ហុយចេញពីដៃទេវទូតឡើងទៅលើ ជាមួយពាក្យអធិដ្ឋានរបស់ប្រជាជនដ៏វិសុទ្ធ នៅចំពោះព្រះភក្ត្ររបស់ព្រះជាម្ចាស់” (វវ ៨,៤)។

បន្ទរទី១ ៖ ឱព្រះ‌អម្ចាស់អើយ សូមទទួលពាក្យសរសើរតម្កើងរបស់ទូលបង្គំដូចតង្វាយនៅពេលល្ងាច! អាលេលូយ៉ា!

^១	ឱព្រះអម្ចាស់អើយ! ទូលបង្គំសូមអង្វរព្រះអង្គ សូមមេត្តាយាងមកជួយ ទូលបង្គំជាប្រញាប់! ពេលទូលបង្គំអង្វរព្រះអង្គ សូមផ្ទៀងព្រះការណ៍ស្តាប់ទូលបង្គំផង!
^២	សូមឱ្យពាក្យអធិដ្ឋានរបស់ទូលបង្គំឡើងទៅដល់ព្រះអង្គ ដូចផ្សែងគ្រឿងក្រអូប សូមទទួលពាក្យសរសើរតម្កើងរបស់ទូលបង្គំ ដូចតង្វាយនៅពេលល្ងាច !
^៣	ឱព្រះអម្ចាស់អើយ! សូមរក្សាមាត់ទូលបង្គំ សូមកុំឱ្យទូលបង្គំពោលពាក្យអាក្រក់ឡើយ។
^៤	សូមកុំបណ្តោយឱ្យចិត្តទូលបង្គំ លំអៀងទៅរកអំពើអាក្រក់ ហើយប្រព្រឹត្តអំពើទុច្ចរិតរួមជាមួយមនុស្សទុច្ចរិត សូមកុំឱ្យទូលបង្គំចូលរួមជប់លៀងជាមួយពួកគេឡើយ។
^៥	បើមនុស្សសុចរិតវាយប្រដៅ និងស្តីបន្ទោសទូលបង្គំ ដោយចិត្តស្មោះត្រង់ ទូលបង្គំមិនប្រកែកទេ ព្រោះជាការល្អចំពោះទូលបង្គំ ប្រៀបដូចជាទឹកអប់ហូរលើក្បាលទូលបង្គំ។ ក៏ប៉ុន្តែ ទូលបង្គំនៅតែបន្តអធិដ្ឋានតបនឹងអំពើឃោរឃៅរបស់មនុស្សទុច្ចរិត។
^៦	សូមឱ្យចៅក្រមរបស់ពួកនោះ ត្រូវគេច្រានទម្លាក់ទៅក្នុងក្រហែងថ្ម ហើយសូមឱ្យបច្ចាមិត្តស្ដាប់សេចក្ដីដែលទូលបង្គំនិយាយ ដោយសុទ្ធចិត្ត។
^៧	“ដីប្រេះចេញពីគ្នាយ៉ាងណា សូមឱ្យស្ថានមនុស្សស្លាប់បើកចំហ លេបឆ្អឹងរបស់គេដែលនៅរាយប៉ាយ គ្រប់ទីកន្លែងយ៉ាងនោះដែរ” ។
^៨	បពិត្រព្រះជាអម្ចាស់! ទូលបង្គំសម្លឹងទៅរកព្រះអង្គជានិច្ច ទូលបង្គំផ្ញើជីវិតលើព្រះអង្គហើយ សូមកុំបណ្តោយឱ្យទូលបង្គំបាត់បង់ជីវិត។
^៩	សូមការពារទូលបង្គំឱ្យរួចផុតពីអន្ទាក់ ដែលគេដាក់ចាំចាប់ទូលបង្គំ សូមកុំឱ្យទូលបង្គំធ្លាក់ទៅក្នុងរណ្តៅរបស់មនុស្សទុច្ចរិតឡើយ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ឱព្រះ‌អម្ចាស់អើយ សូមទទួលពាក្យសរសើរតម្កើងរបស់ទូលបង្គំដូចតង្វាយនៅពេលល្ងាច! អាលេលូយ៉ា!

ទំនុកតម្កើងលេខ ១៤២

ព្រះអង្គជាជម្រករបស់ទូលបង្គំ

អ្វីដែលបានសរសេរនៅក្នុងទំនុកតម្កើងនេះ ត្រូវបានបំពេញនៅក្នុងទុក្ខលំបាករបស់ព្រះអម្ចាស់យើង (សន្តហ៊ីលឡារី)។

បន្ទរទី២ ៖ សូមដោះលែងទូលបង្គំឱ្យមានសេរីភាព ដើម្បីឱ្យទូល‌បង្គំលើកតម្កើងព្រះ‌នាមព្រះ‌អង្គ អាលេលូយ៉ា!

(បទកាកគតិ)

^២-	ខ្ញុំខំបន្លឺ	សម្លេងរន្ទឺ	អង្វរព្រះម្ចាស់
	ស្រែកដោយទទូច	ឱ្យទ្រង់ឮច្បាស់	ព្រោះរូបខ្ញុំនេះ
		វេទនាពេកក្រៃ	។
^៣-	ខ្ញុំទូលព្រះអង្គ	ឱ្យបានជ្រាបផង	នូវអស់អត្ថន័យ
	ពីពាក្យត្អូញត្អែរ	ទុក្ខសោករីងរៃ	វេទនារាល់ថ្ងៃ
		ស្ទើរក្ស័យជីវិត	។
^៤-	ពេលទូលបង្គំ	មានទុក្ខក្រៀមក្រំ	បាក់ធ្លាក់ទឹកចិត្ត
	ព្រះអង្គជ្រាបច្បាស់	ពីដំណើរពិត	ពួកគេជុំជិត
		ដាក់អន្ទាក់ខ្ញុំ	។
^៥-	សូមទ្រង់ទតចុះ	គ្មាននរណាសោះ	អើពើទូលបង្គំ
	គ្មានទីជ្រកកោន	ឱ្យបានសមរម្យ	នរណាក៏ពុំ
		រវល់ឡើយណា	។
^៦-	បពិត្រព្រះម្ចាស់	ខ្ញុំស្រែកពោលនេះ	អង្វរទ្រង់ថា
	ទ្រង់ជាជម្រក	នៅក្នុងលោកា	គ្មានអ្វីអស្ចារ្យ
		ជាងព្រះអង្គឡើយ	។
^៧-	សូមទ្រង់ប្រណី	សម្តែងហឫទ័យ	កុំបីកន្តើយ
	ដ្បិតទូលបង្គំ	ទាល់ច្រកអស់ហើយ	រំដោះឱ្យស្បើយ
		ពីជនអប្រីយ៍	។
^៨-	សូមដោះលែងខ្ញុំ	ផុតពីទុក្ខធំ	មានសិទ្ធិសេរី
	ដើម្បីខ្ញុំអាច	ថ្កើងព្រះនាមល្បី	ចំណោមប្រុសស្រី
		នៃជនសុចរិត	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ ៖ សូមដោះលែងទូលបង្គំឱ្យមានសេរីភាព ដើម្បីឱ្យទូល‌បង្គំលើកតម្កើងព្រះ‌នាមព្រះ‌អង្គ អាលេលូយ៉ា!

បទលើកតម្កើងតាមលិខិតទៅភីលីព (ភីល ២,៦-១១)

ព្រះគ្រីស្ដជាអ្នកបម្រើរបស់ព្រះជាម្ចាស់

បន្ទរទី៣ ៖ បន្ទាប់ពីព្រះ‌អង្គបានគ្រប់លក្ខណៈហើយ ព្រះ‌អង្គក៏បានទៅជាប្រភពនៃការសង្គ្រោះដ៏នៅស្ថិត‌ស្ថេរអស់កល្ប‌ជានិច្ច សម្រាប់អស់អ្នកដែលស្ដាប់បង្គាប់ព្រះ‌អង្គ អាលេលូយ៉ា!

^៦	ទោះបីព្រះអង្គមានឋានៈជាព្រះជាម្ចាស់ក៏ដោយ ក៏ព្រះអង្គពុំបានក្តោបក្តាប់ឋានៈ ដែលស្មើនឹងព្រះជាម្ចាស់នេះ ទុកជាកម្មសិទ្ធិដាច់មុខរបស់ព្រះអង្គឡើយ។
^៧	ផ្ទុយទៅវិញ ព្រះអង្គបានលះបង់អ្វីៗទាំងអស់ មកយកឋានៈជាទាសករ ព្រះអង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។
^៨	ព្រះអង្គបានដាក់ខ្លួនធ្វើតាមព្រះបញ្ជា រហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។
^៩	ហេតុនេះហើយ បានជាព្រះជាម្ចាស់ លើកតម្កើងព្រះអង្គឡើងយ៉ាងខ្ពង់ខ្ពស់បំផុត ព្រមទាំងប្រោសប្រទានឱ្យព្រះអង្គមានព្រះនាមប្រសើរលើសអ្វីៗទាំងអស់
^១០	ដើម្បីឱ្យអ្វីៗទាំងអស់ ទាំងនៅស្ថានបរមសុខ ទាំងនៅលើផែនដី ទាំងនៅក្រោមដី នាំគ្នាក្រាបថ្វាយបង្គំ នៅពេលណាឮព្រះនាមព្រះយេស៊ូ
^១១	និងឱ្យមនុស្សគ្រប់ភាសាប្រកាសឡើងថា ព្រះយេស៊ូគ្រីស្តជាព្រះអម្ចាស់ ដើម្បីលើកតម្កើងសិរីរុងរឿងព្រះជាម្ចាស់ជាព្រះបិតា។

បន្ទរ ៖ បន្ទាប់ពីព្រះ‌អង្គបានគ្រប់លក្ខណៈហើយ ព្រះ‌អង្គក៏បានទៅជាប្រភពនៃការសង្គ្រោះដ៏នៅស្ថិត‌ស្ថេរអស់កល្ប‌ជានិច្ច សម្រាប់អស់អ្នកដែលស្ដាប់បង្គាប់ព្រះ‌អង្គ អាលេលូយ៉ា!

ព្រះបន្ទូលរបស់ព្រះជាម្ចាស់ (១សល ២,៩-១០)

រីឯបង‌ប្អូនវិញ បង‌ប្អូនជាពូជសាសន៍ដែលព្រះ‌អង្គបានជ្រើសរើស ជាក្រុមបូជា‌ចារ្យរបស់ព្រះ‌មហាក្សត្រ ជាជាតិសាសន៍ដ៏‌វិសុទ្ធ ជាប្រជា‌រាស្ដ្រដែលព្រះ‌ជាម្ចាស់បានយកមកធ្វើជាកម្ម‌សិទ្ធិផ្ទាល់របស់ព្រះ‌អង្គ ដើម្បីឱ្យបង‌ប្អូនប្រកាសដំណឹងអំពីស្នាព្រះ‌ហស្ដដ៏អស្ចារ្យរបស់ព្រះ‌អង្គ ដែលបានហៅបង‌ប្អូនឱ្យចេញពីទីងងឹត មកកាន់ពន្លឺដ៏រុងរឿងរបស់ព្រះ‌អង្គ។ ពីដើម បង‌ប្អូនមិនមែនជាប្រជា‌រាស្ដ្ររបស់ព្រះ‌ជាម្ចាស់ទេ តែឥឡូវនេះ បង‌ប្អូនជាប្រជា‌រាស្ដ្ររបស់ព្រះ‌អង្គហើយ ពីដើម បង‌ប្អូនពុំបានទទួលព្រះ‌ហឫទ័យមេត្តា‌ករុណាទេ តែឥឡូវនេះ បង‌ប្អូនបានទទួលព្រះ‌ហឫទ័យមេត្តា‌ករុណាហើយ។

បន្ទរ៖ ពួកសាវ័កសប្បាយចិត្តជាខ្លាំង *អាលេលូយ៉ា! អាលេលូយ៉ា!។ បន្ទរឡើងវិញ៖…
-ដោយបានឃើញព្រះអម្ចាស់មានព្រះជន្មរស់ឡើងវិញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ «ខ្ញុំហ្នឹងហើយជាផ្លូវ ជាសេចក្ដីពិត និងជាជីវិត។ គ្មាននរណាម្នាក់អាចទៅកាន់ព្រះ‌បិតាបានឡើយ លើក‌លែងតែទៅតាម‌រយៈខ្ញុំ។ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ «ខ្ញុំហ្នឹងហើយជាផ្លូវ ជាសេចក្ដីពិត និងជាជីវិត។ គ្មាននរណាម្នាក់អាចទៅកាន់ព្រះ‌បិតាបានឡើយ លើក‌លែងតែទៅតាម‌រយៈខ្ញុំ។ អាលេលូយ៉ា!

ពាក្យអង្វរសកល

ព្រះគ្រីស្តជាជីវិត និងជាការរស់ឡើងវិញរបស់យើងខ្ញុំ។ ចូរយើងស្រែករកព្រះអង្គដោយជំនឿថា ៖

បន្ទរ៖ បពិត្រព្រះបុត្រារបស់ព្រះជាម្ចាស់ ដែលមានព្រះជន្មគង់នៅ ! សូមព្រះអង្គថែរក្សាការពារប្រជារាស្រ្តរបស់ព្រះអង្គផង !

បពិត្រព្រះអម្ចាស់យេស៊ូ ! យើងខ្ញុំសូមទូលអង្វរព្រះអង្គសម្រាប់ព្រះសហគមន៍កាតូលិក
—សូមប្រោសឱ្យព្រះសហគមន៍បានវិសុទ្ធ ដើម្បីឱ្យព្រះរាជ្យរបស់ព្រះអង្គអាចបង្កើតឡើង នៅក្នុងចំណោមប្រជាជាតិទាំងឡាយ។ (បន្ទរ)

យើងខ្ញុំសូមទូលអង្វរព្រះអង្គសម្រាប់អ្នកជំងឺ និងអ្នកមានទុក្ខព្រួយ សម្រាប់អស់អ្នកដែលជាប់ឃុំឃាំង និងនិរទេសខ្លួន
—សូមឱ្យពួកគេបានទទួលការលួងលោម និងការជួយផង។ (បន្ទរ)

យើងខ្ញុំសូមទូលអង្វរព្រះអង្គសម្រាប់អស់អ្នកដែលចាកឆ្ងាយពីមាគ៌ារបស់ព្រះអង្គ
—សូមឱ្យគេមានបទពិសោធន៍ពីព្រះហឫទ័យនៃការលើកលែងទោស និងអំណរសប្បាយនៃការមានជីវិតថ្មីផង។ (បន្ទរ)

ឱព្រះសង្រ្គោះដែលត្រូវគេឆ្កាង និងមានព្រះជន្មរស់ឡើងវិញអើយ! ព្រះអង្គនឹងយាងមកវិញ ដើម្បីវិនិច្ឆ័យទោសមនុស្សលោក
—សូមអាណិតអាសូរយើងខ្ញុំជាអ្នកបាប។ (បន្ទរ)

យើងខ្ញុំសូមទូលអង្វរព្រះអង្គសម្រាប់ការរស់នៅគ្រប់បែបយ៉ាង
—និងសម្រាប់អស់អ្នកដែលបានឃ្លាតឆ្ងាយពីយើងខ្ញុំ ដោយមានចិត្តសង្ឃឹមនឹងរស់ឡើងវិញ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះអម្ចាស់ជាព្រះបិតាយើងខ្ញុំ ! ព្រះអង្គសព្វព្រះហឫទ័យចាត់ព្រះបុត្រាឱ្យយាងមកណែនាំ និងប្រមូលមនុស្សគ្រប់ជាតិសាសន៍ ធ្វើជាមហាគ្រួសារតែមួយ។ សូមព្រះអង្គមេត្តាប្រែចិត្តគំនិតរបស់យើងខ្ញុំឱ្យស្រឡាញ់ព្រះអង្គ និងស្រឡាញ់បងប្អូនយ៉ាងស្មោះតាមគំរូព្រះយេស៊ូ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

4 Views

Post Views: 4