ថ្ងៃអាទិត្យ បុណ្យហែស្លឹក

Posted on 13 ខែមេសា 202512 ខែមីនា 2025 by Siya Khim

ថ្ងៃអាទិត្យ បុណ្យហែស្លឹក លើកតម្កើងព្រះអម្ចាស់រងទុក្ខលំបាក

_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១០,១-៥.៧

ព្រះមេស្ស៊ី ជាព្រះមហាក្សត្រ និងជាបូជាចារ្យ

ព្រះគ្រីស្តត្រូវតែគ្រងរាជ្យ ទម្រាំដល់ព្រះជាម្ចាស់បង្ក្រាបខ្មាំងសត្រូវទាំងប៉ុន្មាន មកដាក់ក្រោមព្រះបាទារបស់ព្រះអង្គ (១ករ ១៥,២៥)។

បន្ទរទី១៖ លោកត្រូវរងរបួស ហើយលោកបានបន្ទាបខ្លួន ប៉ុន្តែ ព្រះជាម្ចាស់បានប្រោសលោកឱ្យតើនឡើង ដោយមហិទ្ធិឫទ្ធិរបស់ព្រះអង្គផ្ទាល់។

^១	ព្រះអម្ចាស់មានព្រះបន្ទូលមកកាន់ព្រះរាជា ជាអម្ចាស់របស់ខ្ញុំថា ៖ “សូមគង់នៅខាងស្តាំយើង ទម្រាំដល់យើងបង្រ្កាបខ្មាំងសត្រូវរបស់ព្រះអង្គ មកដាក់ក្រោមព្រះបាទារបស់ព្រះអង្គ!”។
^២	សូមព្រះអង្គប្រោសប្រទានឱ្យព្រះរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះករុណាបង្ក្រាបខ្មាំងសត្រូវដែលនៅជុំវិញ!
^៣	នៅថ្ងៃព្រះករុណាកេណ្ឌទ័ពទៅច្បាំង ប្រជារាស្ត្រចូលរួមដោយស្ម័គ្រចិត្ត ពួកយុវជននាំគ្នាចូលគាល់ព្រះករុណា នៅលើភ្នំដ៏វិសុទ្ធ ប្រៀបដូចជាទឹកសន្សើមនៅពេលព្រឹកព្រលឹម។
^៤	ព្រះអម្ចាស់មានព្រះបន្ទូលសន្យា ដោយឥតប្រែប្រួលថា ៖ “ព្រះអង្គជាបូជាចារ្យអស់កល្បតរៀងទៅ តាមរបៀបស្តេចមែលគីសេដែក”។
^៥	ព្រះអម្ចាស់គង់នៅខាងស្តាំព្រះករុណា នៅថ្ងៃដែលព្រះអង្គទ្រង់ព្រះពិរោធ ព្រះអង្គកម្ទេចស្តេចនានា។
^៧	នៅតាមផ្លូវ ព្រះរាជាសោយទឹកជ្រោះ រួចហើយ ព្រះអង្គងើបព្រះភក្ត្រប្រកបដោយជោគជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ លោកត្រូវរងរបួស ហើយលោកបានបន្ទាបខ្លួន ប៉ុន្តែ ព្រះជាម្ចាស់បានប្រោសលោកឱ្យតើនឡើង ដោយមហិទ្ធិឫទ្ធិរបស់ព្រះអង្គផ្ទាល់។

ទំនុកតម្កើងលេខ ១១៥

សូមលើកតម្កើងព្រះជាម្ចាស់ដ៏ពិតប្រាកដ

មនុស្សម្នារៀបរាប់អំពីរបៀបដែលបងប្អូនទទួលយើង នៅពេលយើងមករកបងប្អូន និងអំពីរបៀបដែលបងប្អូនលះបង់ព្រះក្លែងក្លាយ
បែរមករកព្រះជាម្ចាស់ ដើម្បីគោរពបម្រើព្រះអង្គដែលមានព្រះជន្មរស់ និងជាព្រះដ៏ពិតប្រាកដ (១ថស ១,៩)។

បន្ទរទី២ ៖ ព្រះលោហិតរបស់ព្រះគ្រីស្តជម្រះយើងខ្ញុំ ដើម្បីបម្រើព្រះជាម្ចាស់ដែលមានព្រះជន្មគង់នៅ។

(បទកាកគតិ)

^១-	បពិត្រព្រះម្ចាស់	ខ្ញុំមិនគួរសោះ	ឱ្យគេតម្កើង
	មានតែព្រះអង្គ	ទើបត្រូវលើកឡើង	ឱ្យខ្ពស់ថ្កុំថ្កើង
		ព្រោះទ្រង់សប្បុរស	។
^២-	ម្តេចក៏ប្រជា	គ្រប់ជាតិនានា	នាំគ្នាសួរស្រុះ
	មកយើងខ្ញុំថា	“ពួកឯងទាំងអស់	តើព្រះឯងនោះ
		ស្ថិតនៅឯណា? “	។
^៣-	ព្រះរបស់ខ្ញុំ	នៅទីបរម	សុខឥតឧបមា
	ទ្រង់សព្វព្រះទ័យ	ធ្វើកិច្ចអស្ចារ្យ	អ្វីសព្វប្រការ
		បានឥតមានទាស់	។
^៤-	ឯព្រះពួកអ្នក	ប្រាកដជាជាក់	ព្រះក្លែងក្លាយស្មោះ
	ខ្លះធ្វើពីឈើ	គគីរកកោះ	ពីប្រាក់ពីមាស
		ជាព្រះមនុស្សច្នៃ	។
^៥-	ព្រះនោះមានមាត់	និយាយមិនកើត	មិនដែលចេញស្តី
	តាមតែជាងឆ្លាក់	ដាក់មកធ្វើអ្វី	ភ្នែកឥតប្រស្រី
		មើលអ្វីមិនបាន	។
^៦-	រីឯត្រចៀក	មានប្រាកដជាក់	តែមិនចំណាន
	ព្រោះស្តាប់មិនកើត	មិនដឹងដើមដាន	ច្រមុះដែលមាន
		តែមិនដឹងក្លិន	។
^៧-	មានសព្វទាំងដៃ	តែមិនអាចលៃ	ប៉ះពាល់ឬកាន់
	មានជើងនៅស្ងៀម	ព្រោះដើរមិនបាន	បំពង់កមាន
		តែគ្មានសំឡេង	។
^៨-	សូមឱ្យអស់អ្នក	ដែលបានដាប់ឆ្លាក់	រូបព្រះនោះឯង
	ហើយផ្ញើជីវិត	គ្មានគិតកោតក្រែង	ឱ្យគេចំបែង
		ដូចព្រះទាំងនោះ	។
^៩-	អ៊ីស្រាអែលអើយ	ចូរកុំកន្តើយ	ជីវិតផ្ញើព្រះ
	នោះទ្រង់នឹងជួយ	អ្នកបានទាំងអស់	ជាខែលគ្រឿងក្រោះ
		ពាំងអ្នករាល់គ្នា	។
^១០-	ពូជពង្សរបស់	អរ៉ុនទាំងអស់	ចូរអ្នកម្នីម្នា
	ផ្ញើជន្មជីវ៉ា	លើព្រះនាមា	ទ្រង់នឹងការពារ
		ឱ្យអ្នកបានសុខ	។
^១១-	អ្នកដែលកោតខ្លាច	ព្រះមានអំណាច	នឹងមិនជួបទុក្ខ
	បើផ្ញើជីវិត	អ្នកនឹងបានសុខ	ពីនេះទៅមុខ
		ផុតទុក្ខល្ហើយល្ហែ	។
^១២-	ព្រះមិនបំភ្លេច	សូម្បីតួចតិច	ដល់ពួកយើងទេ
	ព្រះអង្គឱ្យពរ	យើងកើនឡើងទ្វេ	អ៊ីស្រាអែលដែរ
		និងលោកអរ៉ុន	។
^១៣-	ព្រះអង្គប្រទាន	ពរទាំងអ្នកមាន	អ្នកតូចអ្នកធំ
	ដែលចេះកោតខ្លាច	ក្រាបថ្វាយបង្គំ	យកព្រះជាធំ
		ជាម្លប់ថ្លៃថ្លា	។
^១៤-	សូមព្រះប្រទាន	ពរនោះឱ្យមាន	ដល់អ្នករាល់គ្នា
	បានចម្រើនឡើង	គ្រប់ពេលវេលា	បានសុខរមនា
		កូនចៅប្រុសស្រី	។
^១៥-	សូមអ្នកទទួល	កុំបីអំពល់	ពីម្ចាស់មេឃដី
	ទ្រង់ប្រទានពរ	បវរសួស្តី	ព្រះអម្ចាស់ថ្លៃ
		ជាព្រះយើងពិត	។
^១៦-	ផ្ទៃមេឃផែនដី	សន្លឹមអន្លាយ	គឺជាកម្មសិទ្ធ
	របស់ព្រះម្ចាស់	តែមួយអង្គគត់	ព្រះអង្គអាណិត
		ឱ្យដីមកមនុស្ស	។
^១៧-	មនុស្សស្លាប់ជាខ្មោច	មានក្លិនអសោច៍	ពុំអាចថ្កើងយស
	អស់អ្នកដែលចុះ	ទៅស្ថានក្រោមនោះ	ក៏ពុំមានឈ្មោះ
		តម្កើងសិរី	។
^១៨-	គឺយើងនេះហើយ	គ្មានអ្នកផ្សេងឡើយ	ដែលរស់លើដី
	បានលើកតម្កើង	ព្រះអង្គរាល់ថ្ងៃ	ឥតមានសំចៃ
		ជារៀងរហូត	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ ៖ ព្រះលោហិតរបស់ព្រះគ្រីស្តជម្រះយើងខ្ញុំ ដើម្បីបម្រើព្រះជាម្ចាស់ដែលមានព្រះជន្មគង់នៅ។

បទលើកតម្កើងតាមលិខិតរបស់សន្តសិលា (១សល ២,២១^ខ-២២.២៣^ខ-២៤)

ព្រះគ្រីស្តជាអ្នកបម្រើរបស់ព្រះជាម្ចាស់ ព្រះអង្គសព្វព្រះហឫទ័យរងទុក្ខលំបាក

បន្ទរទី៣ ៖ ព្រះគ្រីស្តបានផ្ទុកបាបរបស់យើង ក្នុងព្រះកាយរបស់ព្រះអង្គ ដែលជាប់លើឈើឆ្កាង ដើម្បីឲ្យយើងលែងជំពាក់‌ជំពិន នឹងបាបតទៅមុខទៀត ហើយឲ្យយើងមានជីវិត ដោយប្រព្រឹត្តតែអំពើសុចរិត។

^២១	ព្រះ‌គ្រីស្តក៏បានរងទុក្ខលំបាក សម្រាប់បង‌ប្អូន ទុកជាគំរូ ឲ្យបងប្អូនដើរតាមគន្លងរបស់ព្រះអង្គដែរ។
^២២	ព្រះអង្គពុំដែលបានប្រព្រឹត្តអំពើបាបសោះ ហើយក៏ពុំដែលមានព្រះ‌បន្ទូលវៀចវេរណា ចេញពីព្រះ‌ឱស្ឋរបស់ព្រះ‌អង្គឡើយ។
^២៣	ព្រះអង្គបានរងទុក្ខលំបាក តែព្រះ‌អង្គពុំបានគំរាមកំហែងគេវិញទេ ព្រះអង្គផ្ញើជីវិតទៅលើព្រះជាម្ចាស់ ដែលព្រះ‌អង្គវិនិច្ឆ័យដោយយុត្តិធម៌។
^២៤	ព្រះ‌គ្រីស្តបានផ្ទុកបាបរបស់យើង ក្នុងព្រះ‌កាយរបស់ព្រះ‌អង្គដែលជាប់លើឈើឆ្កាង ដើម្បីឲ្យយើងលែងជំពាក់‌ជំពិន នឹងបាបតទៅមុខទៀត ហើយឲ្យយើងមានជីវិត ដោយប្រព្រឹត្តតែអំពើសុចរិត។ បង‌ប្អូនបានជាសះ‌ស្បើយ ដោយ‌សារស្នាមរបួសរបស់ព្រះ‌អង្គ។

បន្ទរ ៖ ព្រះគ្រីស្តបានផ្ទុកបាបរបស់យើង ក្នុងព្រះកាយរបស់ព្រះអង្គ ដែលជាប់លើឈើឆ្កាង ដើម្បីឲ្យយើងលែងជំពាក់‌ជំពិន នឹងបាបតទៅមុខទៀត ហើយឲ្យយើងមានជីវិត ដោយប្រព្រឹត្តតែអំពើសុចរិត។

ព្រះបន្ទូលរបស់ព្រះជាម្ចាស់ (កក ១៣,២៦-៣០)

បង‌ប្អូនជាពូជពង្សលោកអប្រាហាំ និងបង‌ប្អូនដែលគោរពកោតខ្លាចព្រះ‌ជាម្ចាស់អើយ! ព្រះ‌អង្គបានចាត់ព្រះ‌បន្ទូលស្ដីអំពីការសង្គ្រោះ មកឲ្យយើងទាំងអស់គ្នានេះហើយ ដ្បិតអ្នកក្រុងយេរូ‌សាឡឹម និងពួកមេដឹកនាំរបស់គេ ពុំបានដឹងថាព្រះ‌យេស៊ូជានរណាឡើយ។ គេបានកាត់ទោសព្រះ‌អង្គ ស្របនឹងសេចក្ដីដែលព្យាការីថ្លែងទុកមក ហើយគេអានរៀងរាល់ថ្ងៃសប្ប័ទ ទោះបីគេរកកំហុសអ្វីមកកាត់ទោសលោកមិនឃើញក៏ដោយ ក៏គេនៅតែសុំឲ្យលោកពីឡាតប្រហារជីវិតព្រះ‌អង្គដែរ។ កាលគេបានធ្វើស្របនឹងសេចក្ដីដែលមានចែងទុកអំពីព្រះ‌អង្គចប់សព្វគ្រប់ហើយ គេក៏យកព្រះសពព្រះ‌អង្គចុះពីឈើឆ្កាងទៅបញ្ចុះក្នុងផ្នូរ។ ប៉ុន្តែ ព្រះ‌ជាម្ចាស់បានប្រោសព្រះ‌អង្គឲ្យរស់ឡើងវិញ។

បន្ទរ៖ យើងខ្ញុំសូមក្រាបថ្វាយបង្គំព្រះគ្រីស្ត *យើងខ្ញុំសូមកោតសរសើរព្រះអង្គ។ បន្ទរឡើងវិញ៖…
-ដ្បិតព្រះអង្គបានសង្រ្គោះពិភពលោក ដោយសារឈើឆ្កាងរបស់ព្រះអង្គ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ ដ្បិតមានចែងទុកមកថាៈ “យើងនឹងវាយសម្លាប់គង្វាល ហើយចៀមនៅក្នុងហ្វូងនឹងត្រូវខ្ចាត់‌ខ្ចាយ” ។ ប៉ុន្តែ ក្រោយពេលខ្ញុំមានជីវិតរស់ឡើងវិញ ខ្ញុំនឹងទៅស្រុកកាលី‌ឡេ មុនអ្នករាល់គ្នា» ។ នៅទីនោះ អ្នករាល់គ្នានឹងឃើញខ្ញុំ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ ដ្បិតមានចែងទុកមកថាៈ “យើងនឹងវាយសម្លាប់គង្វាល ហើយចៀមនៅក្នុងហ្វូងនឹងត្រូវខ្ចាត់‌ខ្ចាយ” ។ ប៉ុន្តែ ក្រោយពេលខ្ញុំមានជីវិតរស់ឡើងវិញ ខ្ញុំនឹងទៅស្រុកកាលី‌ឡេ មុនអ្នករាល់គ្នា» ។ នៅទីនោះ អ្នករាល់គ្នានឹងឃើញខ្ញុំ។

ពាក្យអង្វរសកល

ព្រះសង្រ្គោះនៃមនុស្សលោកបានសោយទិវង្គត ដើម្បីបំផ្លាញសេចក្តីស្លាប់ ហើយដោយព្រះអង្គមានព្រះជន្មរស់ឡើងវិញ ព្រះអង្គបានស្តារជីវិតឡើងវិញ។ ចូរយើងទូលសូមព្រះអង្គ ដោយចិត្តរាបសារថា ៖

បន្ទរ៖ សូមប្រោសឱ្យប្រជារាស្រ្តដែលព្រះអង្គបានលោះ ដោយព្រះលោហិតរបស់ព្រះអង្គបានវិសុទ្ធផង !

ឱព្រះសង្រ្គោះនៃពិភពលោក! សូមប្រោសឱ្យយើងខ្ញុំអាចចែករំលែកនូវទុក្ខលំបាករបស់ព្រះអង្គ តាមរយៈការប្រែចិត្តគំនិតនៅទីជម្រៅខាងវិញ្ញាណ
—ដើម្បីឱ្យយើងខ្ញុំអាចទទួលសិរីរុងរឿងនៃការមានព្រះជន្មរស់ឡើងវិញរបស់ព្រះអង្គ។ (បន្ទរ)

សូមព្រះមាតាលួងលោមអ្នកដែលរងទុក្ខ និងការពារយើងខ្ញុំ
—សូមឱ្យយើងខ្ញុំចេះលួងលោមអ្នកដទៃ ដូចព្រះអង្គបានលួងលោមយើងខ្ញុំដែរ។ (បន្ទរ)

នៅក្នុងទុក្ខលំបាករបស់ពួកគេ សូមព្រះអង្គធ្វើឱ្យគ្រីស្តបរិស័ទអាចចែករំលែកនូវទុក្ខលំបាករបស់ព្រះអង្គ
—ហើយសូមព្រះអង្គសម្តែងឫទ្ធានុភាពក្នុងជីវិតរស់នៅរបស់ពួកគេផង។ (បន្ទរ)

ព្រះអង្គបានបន្ទាបខ្លួនដោយការស្តាប់បង្គាប់ រហូតដល់សោយទិវង្គតនៅលើឈើឆ្កាងថែមទៀតផង
—សូមព្រះអង្គប្រទានព្រះអំណោយទាននៃការស្តាប់បង្គាប់ និងចិត្តស៊ូទ្រាំ ឱ្យអ្នកបម្រើព្រះអង្គ។ (បន្ទរ)

សូមព្រះអង្គបំផ្លាស់បំប្រែរូបកាយរបស់មនុស្សស្លាប់ ឱ្យទៅជារូបកាយដែលប្រកបដោយសិរីរុងរឿងដូចព្រះអង្គ
—ហើយសូមព្រះអង្គនាំយើងខ្ញុំឱ្យចូលរួមជាមួយពួកគេនៅថ្ងៃចុងក្រោយផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាពសព្វប្រការ ! ព្រះយេស៊ូគ្រីស្តជាព្រះបុត្រាព្រះអង្គសព្វព្រះហឫទ័យរងទុក្ខលំបាក និងសោយទិវង្គតយ៉ាងសែនអាម៉ាស់ ដើម្បីសង្គ្រោះមនុស្សលោកឲ្យរួចពីបាប។ សូមព្រះអង្គមេត្តាបំភ្លឺចិត្តគំនិតរបស់យើងខ្ញុំឲ្យយល់ពីគម្រោងការដ៏អស្ចារ្យរបស់ព្រះអង្គ ហើយសូមប្រោសឲ្យយើងខ្ញុំសុខចិត្តធ្វើតាមព្រះយេស៊ូជានិច្ចផង។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

9 Views

Post Views: 9