សន្តបាស៊ីល និងសន្តក្រេគ័រ ជាជនដ៏ប្រសើរឧត្តម នៅណាស៊ីយ៉ាង

(បុណ្យរំឭកចាំបាច់)

ថ្ងៃព្រហស្បតិ៍ (សប្តាហ៍ទី១)

(ពេលព្រឹក)

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ព្រះគ្រីស្តបានប្រសូតមកសម្រាប់យើង ! ចូរនាំគ្នាមក យើងលើកតម្កើងព្រះអង្គ។

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៥៧

ពាក្យអធិដ្ឋាននៅពេលមានទុក្ខព្រួយ

ទំនុកតម្កើងនេះលើកតម្កើងពីទុក្ខលំបាករបស់ព្រះគ្រីស្ដ (សន្តអូគូស្ទីន)។

បន្ទរទី១ ៖ ឱពិណនិងឃឹមរបស់ខ្ញុំអើយ ! ចូរបន្លឺសំឡេងឡើង ខ្ញុំនឹងដាស់ព្រះអាទិត្យឱ្យរះឡើង។

២	ឱព្រះជាម្ចាស់អើយ! សូមអាណិតមេត្តាទូលបង្គំ សូមអាណិតមេត្តាទូលបង្គំផង! ដ្បិតទូលបង្គំមកពឹងផ្អែកលើព្រះអង្គហើយ ទូលបង្គំសូមជ្រកកោនក្រោមម្លប់បារមីរបស់ព្រះអង្គ រហូតទាល់តែទុក្ខលំបាកនេះកន្លងផុតទៅ។
៣	ខ្ញុំស្រែកហៅរកព្រះដ៏ខ្ពង់ខ្ពស់បំផុត គឺព្រះជាម្ចាស់ដែលប្រោសប្រទានមកខ្ញុំនូវអ្វីៗដែលខ្ញុំត្រូវការ។
៤	សូមព្រះអង្គប្រទានការសង្គ្រោះពីស្ថានបរមសុខមកខ្ញុំ សូមព្រះអង្គវាយប្រហារអស់អ្នកដែលបៀតបៀនខ្ញុំ សូមព្រះជាម្ចាស់សម្តែងព្រះហឫទ័យមេត្តាករុណា និងព្រះហឫទ័យស្មោះស្ម័គ្ររបស់ព្រះអង្គ។
៥	ខ្មាំងសត្រូវនាំគ្នាឡោមព័ទ្ធខ្ញុំ ប្រៀបដូចជាសិង្ហដែលប្រុងស៊ីសាច់មនុស្ស ធ្មេញរបស់គេប្រៀបដូចជាលំពែង និងព្រួញ អណ្តាតរបស់គេដូចដាវដ៏មុត។
៦	ឱព្រះជាម្ចាស់អើយ! សូមសម្តែងភាពថ្កុំថ្កើងឧត្តុង្គឧត្តមរបស់ព្រះអង្គនៅលើផ្ទៃមេឃ សូមឱ្យសិរីរុងរឿងរបស់ព្រះអង្គភ្លឺចែងចាំងនៅលើផែនដីទាំងមូល។
៧	សត្រូវរបស់ទូលបង្គំនាំគ្នាដាក់អន្ទាក់ចាំចាប់ទូលបង្គំ ធ្វើឱ្យទូលបង្គំអស់សង្ឃឹម។ ពួកគេជីករណ្តៅនៅពីមុខទូលបង្គំ តែខ្លួនគេផ្ទាល់បានធ្លាក់ទៅក្នុងរណ្តៅនោះ។
៨	បពិត្រព្រះជាម្ចាស់! ទូលបង្គំទុកចិត្តលើព្រះអង្គ ទូលបង្គំទុកចិត្តលើព្រះអង្គទាំងស្រុង ទូលបង្គំនឹងច្រៀង ទូលបង្គំនឹងស្មូតទំនុកតម្កើង
៩	ឱព្រលឹងខ្ញុំអើយ! ចូរភ្ញាក់ឡើង! ឱឃឹម និងពិណរបស់ខ្ញុំអើយ! ចូរបន្លឺសំឡេងឡើង ខ្ញុំនឹងដាស់ព្រះអាទិត្យឱ្យរះឡើង
១០	បពិត្រព្រះអម្ចាស់! ទូលបង្គំនឹងលើកតម្កើងព្រះអង្គ ក្នុងចំណោមប្រជាជនទាំងឡាយ ទូលបង្គំនឹងស្មូតទំនុកតម្កើងថ្វាយព្រះអង្គ ក្នុងចំណោមប្រជាជាតិនានា
១១	ដ្បិតព្រះហឫទ័យមេត្តាករុណារបស់ព្រះអង្គខ្ពស់រហូតដល់ផ្ទៃមេឃ ព្រះហឫទ័យស្មោះស្ម័គ្ររបស់ព្រះអង្គខ្ពស់ដល់អាកាសវេហាស៍។
១២	ឱព្រះជាម្ចាស់អើយ! សូមបង្ហាញភាពថ្កុំថ្កើងឧត្តុងឧត្តមរបស់ព្រះអង្គ នៅលើផ្ទៃមេឃ សូមឱ្យសិរីរុងរឿងរបស់ព្រះអង្គភ្លឺចែងចាំងនៅលើផែនដីទាំងមូល។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ឱពិណនិងឃឹមរបស់ខ្ញុំអើយ ! ចូរបន្លឺសំឡេងឡើង ខ្ញុំនឹងដាស់ព្រះអាទិត្យឱ្យរះឡើង។

បទលើកតម្កើងតាមព្យាការីយេរេមី (យរ ៣១,១០-១៤)

សុភមង្គលរបស់មនុស្សដែលទទួលការសង្រ្គោះ

ព្រះយេស៊ូត្រូវសោយទិវង្គត ដើម្បីឱ្យកូនចៅរបស់ព្រះជាម្ចាស់ ដែលបានបែក​ខ្ញែក​គ្នា​ មកចូលរួមជាប្រជាជនតែមួយឡើងវិញ (យហ ១១,៥១.៥២)។

បន្ទរទី២ ៖ ព្រះអម្ចាស់មានព្រះបន្ទូលថា៖ យើងនឹងផ្ដល់សម្បត្តិដ៏បរិបូណ៌ដល់ប្រជារាស្រ្តរបស់យើង។

(បទព្រហ្មគីតិ)

១០-	ប្រជាជាតិទាំងឡាយ	សូមខ្វល់ខ្វាយនាំគ្នាស្តាប់
	បន្ទូលព្រះផ្សាយផ្សព្វ	ទៅដល់សព្វកោះនៅឆ្ងាយ	។
	ចូរអ្នកប្រកាសថា	ព្រះដែលជាអ្នកកម្ចាយ
	អ៊ីស្រាអែលទៅឆ្ងាយ	តែពេលក្រោយទ្រង់ប្រមូល	។
	ព្រះអង្គថែររក្សា	ឱ្យគ្រប់គ្នាជុំត្រកូល
	ដូចគង្វាលប្រមូល	ចៀមមកមូលមិនឱ្យបាត់	។
១១-	ព្រះអម្ចាស់បានលោះ	ឱ្យរួចគ្រោះលែងខ្ចាយខ្ចាត់
	រំដោះឱ្យរួចផុត	ពួកទុច្ចរិតដែលខ្លាំងក្លា	។
១២-	ពួកគេត្រឡប់វិញ	គ្មានទោម្នេញស្រែកខ្ញៀវខ្ញារ
	ហើយគេក៏នាំគ្នា	ចាំត្រៀបត្រាទទួលទ្រព្យ	។
	ដែលព្រះម្ចាស់ប្រទាន	គេឱ្យមានលែងអភ័ព្វ
	មានស្រូវស្រាល្អគាប់	ប្រេងក្រអូបទាំងចៀមគោ	។
	ចិត្តពួកគេប្រៀបបាន	សួនឧទ្យានមានទឹកហូរ
	ស្រោចស្រពឡើងជន់ជោរ	គេលែងថ្ងូរលែងហេវហត់	។
១៣-	គ្រានោះស្ត្រីក្រមុំ	ចូលមករាំតាមបែបបទ
	ក្មេងចាស់មិនកំណត់	គេមិនហត់រាំសប្បាយ	។
	យើងប្រែទុក្ខវេទនា	គេទៅជាសើចក្អាកក្អាយ
	ឱ្យពួកគេសប្បាយ	គេរីករាយលែងលំបាក	។
១៤-	អស់លោកបូជាចារ្យ	បានភោក្តាគ្មានសម្រាក
	សាច់ឆ្ងាញ់មិនស្រាន្តស្រាក	មិនលំបាកដើររុករក	។
	យើងនឹងផ្តល់អំណោយ	ទានទៅឱ្យរាស្ត្រគ្រប់ស្រុក
	លែងព្រួយលែងកើតទុក្ខ	រស់បានសុខសាន្តតទៅ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ព្រះអម្ចាស់មានព្រះបន្ទូលថា៖ យើងនឹងផ្ដល់សម្បត្តិដ៏បរិបូណ៌ដល់ប្រជារាស្រ្តរបស់យើង។

ទំនុកតម្កើងលេខ ៤៨

ពាក្យអរព្រះគុណសម្រាប់ការរំដោះប្រជារាស្រ្ត

ទេវទូត​នោះ​បាន​លើក​វិញ្ញាណ​ខ្ញុំ​ឡើង​ទៅ​លើ​ភ្នំ​មួយ​យ៉ាង​ធំ​ខ្ពស់ រួច​បង្ហាញ​ឲ្យ​ខ្ញុំ​ឃើញ​ក្រុង​ដ៏‌វិសុទ្ធ
ជា​ក្រុង​យេរូ‌សាឡឹម​ដែល​ចុះ​ពី​ស្ថាន​បរម‌សុខ គឺ​ចុះ​មក​ពី​ព្រះ‌ជាម្ចាស់ (វវ ២១,១០)។

បន្ទរទី៣ ៖ ព្រះអម្ចាស់ជាព្រះដ៏ប្រសើរឧត្តម ដែលត្រូវតែលើកតម្កើងឱ្យខ្ពង់ខ្ពស់បំផុត នៅក្នុងបុរីព្រះជាម្ចាស់របស់យើង។

២	ព្រះអម្ចាស់ជាព្រះដ៏ប្រសើរឧត្តម ដែលត្រូវតែលើកតម្កើងឱ្យខ្ពង់ខ្ពស់បំផុត នៅក្នុងបុរីព្រះជាម្ចាស់របស់យើង គឺនៅលើភ្នំដ៏វិសុទ្ធរបស់ព្រះអង្គ។
៣	ភ្នំរបស់ព្រះជាម្ចាស់ជាភ្នំមួយដ៏ល្អប្រណីត គឺភ្នំស៊ីយ៉ូនដែលជាកំពូលនៃពិភព ជាបុរីរបស់ព្រះមហាក្សត្រដែលនាំឱ្យផែនដីទាំងមូលមានអំណរ។
៤	ព្រះជាម្ចាស់បានសម្តែងឱ្យដឹងថា ព្រះអង្គជាកំពែងដ៏រឹងមាំនៅក្នុងបុរីនោះ។
៥	ស្តេចនានាបានលើកគ្នាមកវាយប្រហារភ្នំស៊ីយ៉ូន
៦	ពេលគេឃើញក្រុងស៊ីយ៉ូន គេស្រឡាំងកាំង ភ័យតក់ស្លុត នាំគ្នារត់ចេញទៅវិញ
៧	គេភ័យញាប់ញ័រ ឈឺចុកចាប់ ដូចជាស្ត្រីសម្រាលកូន
៨	ដូចជាខ្យល់ព្យុះបក់មកពីទិសបូព៌ាបំបែកនាវា។
៩	យើងបានឮគេថ្លែងអំពីស្នាព្រះហស្តដ៏អស្ចារ្យរបស់ព្រះអង្គ ឥឡូវនេះ យើងក៏បានឃើញផ្ទាល់ នៅក្នុងបុរីរបស់ព្រះអម្ចាស់នៃពិភពទាំងមូល ដែលជាបុរីនៃព្រះរបស់យើង ព្រះអង្គនឹងការពារក្រុងនេះឱ្យបានរឹងមាំរហូតតរៀងទៅ។
១០	បពិត្រព្រះជាម្ចាស់! ពេលយើងខ្ញុំនៅក្នុងព្រះវិហាររបស់ព្រះអង្គ យើងខ្ញុំនឹកអំពីព្រះហឫទ័យមេត្តាករុណារបស់ព្រះអង្គ។
១១	បពិត្រព្រះជាម្ចាស់! ព្រះនាមរបស់ព្រះអង្គល្បីរន្ទឺ ក្នុងលោកទាំងមូលយ៉ាងណា មនុស្សម្នាក៏នឹងលើកតម្កើងព្រះអង្គ រហូតដល់ស្រុកដាច់ស្រយាលផែនដីយ៉ាងនោះដែរ។ ព្រះអង្គគ្រប់គ្រងដោយសុចរិត។
១២	សូមឱ្យអ្នកក្រុងស៊ីយ៉ូនរីករាយឡើង សូមឱ្យអ្នកក្រុងនៃស្រុកយូដារីករាយជាខ្លាំង ដ្បិតព្រះអង្គវិនិច្ឆ័យប្រកបដោយយុត្តិធម៌។
១៣	ចូរនាំគ្នាហែក្បួនព័ទ្ធជុំវិញក្រុងស៊ីយ៉ូន! ចូររាប់ចំនួនប៉មរបស់ក្រុងនេះមើល!
១៤	ចូរស្ងើចសរសើរកំពែងក្រុង ចូរពិនិត្យមើលវិមានបុរីនេះទៅ ដើម្បីឱ្យអ្នករាល់គ្នាយកទៅថ្លែងប្រាប់មនុស្សនៅជំនាន់ក្រោយថា ៖
១៥	“ព្រះជាម្ចាស់ពិតជាព្រះរបស់យើងអស់កល្បជានិច្ច ព្រះអង្គក៏ដឹកនាំយើងជាអង្វែងតរៀងទៅដែរ” ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះអម្ចាស់ជាព្រះដ៏ប្រសើរឧត្តម ដែលត្រូវតែលើកតម្កើងឱ្យខ្ពង់ខ្ពស់បំផុត នៅក្នុងបុរីព្រះជាម្ចាស់របស់យើង។

ព្រះបន្ទូលរបស់ព្រះជាម្ចាស់ (ប្រាញ ៧,២៦-៣០)

ព្រះ‌ប្រាជ្ញា​ញាណ​ជា​រស្មីនៃ​ពន្លឺ​ដែល​នៅ​ស្ថិត​ស្ថេរ​អស់​កល្បជានិច្ច ជា​កញ្ចក់​ដ៏​ភ្លឺថ្លា ឆ្លុះ​បញ្ចាំង​មហិទ្ធិ‌ឫទ្ធិ​របស់​ព្រះ‌ជាម្ចាស់ និង​ជា​តំណាង​នៃ​ព្រះ‌ហឫទ័យ​សប្បុរស​របស់​ព្រះ‌អង្គ។ ព្រះ‌ប្រាជ្ញា​ញាណ​មាន​តែ​មួយ​អង្គ​គត់ តែ​ព្រះ‌អង្គ​អាច​សម្រេច​កិច្ច‌ការ​ទាំង​អស់​បាន។ ព្រះ‌ប្រាជ្ញា​ញាណ​មិន​ដែល​ប្រែ​ប្រួល​ទេ តែ​ព្រះ‌អង្គ​ធ្វើ​ឲ្យ​អ្វីៗ​ទាំង​អស់​ផ្លាស់​ប្រែ​ជា​ថ្មីបាន។ ពីជំនាន់​មួយ ទៅ​ជំនាន់​មួយ ព្រះ‌ប្រាជ្ញា​ញាណ​យាង​មក​សណ្ឋិត​ក្នុង​ដួង‌ចិត្ត​របស់​មនុស្ស​វិសុទ្ធ ដើម្បី​ឲ្យ​គេ​ទៅ​ជា​មិត្ត​សម្លាញ់​របស់​ព្រះ‌ជាម្ចាស់ និង​ទៅ​ជា​ព្យាការី។ ដ្បិត​ព្រះ‌ជាម្ចាស់ ស្រឡាញ់​តែ​អស់​អ្នក​ដែល​រួម​រស់​ជា​មួយ​ព្រះ‌ប្រាជ្ញា​ញាណ​ប៉ុណ្ណោះ។ ព្រះ‌ប្រាជ្ញា​ញាណ​ភ្លឺជាង​ពន្លឺ​ព្រះ‌អាទិត្យ និង​កញ្ចុំ​ផ្កាយ​ទាំង‌ឡាយ​ទៅ​ទៀត បើ​ប្រៀប​ផ្ទឹម​នឹង​ពន្លឺថ្ងៃ ព្រះ‌អង្គ​ភ្លឺ​ហួស​ប្រមាណ។ យប់​រមែង​ផ្ទេរ​កន្លែង​ទៅ​ឲ្យ​ថ្ងៃ ផ្ទុយ​ទៅ​វិញ ព្រះ‌ប្រាជ្ញា​ញាណ​ឈ្នះ​សេចក្តី​អាក្រក់​ជា‌និច្ច។

បន្ទរ៖ ព្រះ‌អម្ចាស់​បាន​បង្ហាញ​ការ​សង្គ្រោះ​របស់​ព្រះ‌អង្គ *អាលេលូយ៉ា! អាលេលូយ៉ា! បន្ទរឡើងវិញ៖…
—ដោយព្រះ‌ចេស្ដា​ដ៏‌វិសុទ្ធ​របស់​ព្រះ‌អង្គ។ បន្ទរ៖ *…
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ៖ រីឯ​អស់​អ្នក​ដែល​មាន​ប្រាជ្ញា​វិញ នឹង​ភ្លឺដូច​ផ្ទៃ​មេឃ ហើយ​អស់​អ្នក​ដែល​ជួយ​ណែ‌នាំ​មនុស្ស‌ម្នា​ជា​ច្រើន​ឲ្យ​ប្រព្រឹត្ត​អំពើ​សុចរិត គេ​នឹង​បាន​ភ្លឺ​ដូច​ផ្កាយ អស់‌កល្ប​ជា​អង្វែង​ត​រៀង​ទៅ។

៦៨	”សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល ដ្បិតទ្រង់សព្វព្រះហឫទ័យយាងមករំដោះប្រជារាស្ត្ររបស់ព្រះអង្គ។
៦៩	ទ្រង់បានប្រទានព្រះសង្គ្រោះដ៏មានឫទ្ធិមួយព្រះអង្គ ពីក្នុងចំណោមព្រះញាតិវង្សរបស់ព្រះបាទដាវីឌ ជាអ្នកបម្រើព្រះអង្គឱ្យមកយើង។
៧០	ព្រះជាម្ចាស់ប្រទានព្រះសង្គ្រោះនេះមកយើង ស្របនឹងព្រះបន្ទូលសន្យា ថ្លែងតាមរយៈព្យាការីរបស់ព្រះអង្គនៅជំនាន់ដើម
៧១	គឺព្រះអង្គសង្គ្រោះយើងឱ្យរួចពីកណ្តាប់ដៃរបស់ខ្មាំងសត្រូវ និងរួចពីអំណាចរបស់អ្នកដែលស្អប់យើង
៧២	ព្រះអង្គសម្ដែងព្រះហឫទ័យមេត្តាករុណាដល់បុព្វបុរសយើង ហើយគោរពតាមសម្ពន្ធមេត្រីរបស់ព្រះអង្គយ៉ាងស្មោះស្ម័គ្រ
៧៣	គឺព្រះអង្គបានសន្យាយ៉ាងម៉ឺងម៉ាត់ដល់លោកអប្រាហាំ ជាបុព្វបុរសរបស់យើងថា
៧៤	ទ្រង់នឹងរំដោះយើងឱ្យរួចពីកណ្តាប់ដៃរបស់ខ្មាំងសត្រូវ ដើម្បីយើងអាចគោរពបម្រើព្រះអង្គបានដោយឥតភ័យខ្លាច
៧៥	ព្រមទាំងឱ្យយើងរស់នៅបានបរិសុទ្ធ និងសុចរិតជាទីគាប់ព្រះហឫទ័យព្រះជាម្ចាស់ ជារៀងរាល់ថ្ងៃ រហូតអស់មួយជីវិត។
៧៦	ចំណែកឯកូនវិញ កូននឹងទៅជាព្យាការីរបស់ព្រះដ៏ខ្ពង់ខ្ពស់បំផុត ព្រោះកូននឹងដើរមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។
៧៧	កូននឹងឱ្យប្រជារាស្ត្ររបស់ព្រះអង្គដឹងថា ព្រះអង្គសង្គ្រោះគេ ដោយលើកលែងគេឱ្យរួចពីបាប។
៧៨	ព្រះរបស់យើងមានព្រះទ័យមេត្តាករុណាដ៏លើសលប់ ព្រះអង្គប្រទានថ្ងៃរះពីស្ថានលើមក ដើម្បីរំដោះយើង
៧៩	និងដើម្បីបំភ្លឺអស់អ្នកដែលស្ថិតនៅក្នុងទីងងឹត ក្រោមអំណាចនៃសេចក្តីស្លាប់ ព្រមទាំងតម្រង់ផ្លូវយើងឆ្ពោះទៅរកសេចក្តីសុខសាន្ត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ឬ ទំនុកតម្កើងរបស់លោកសាការី (តាមបែបស្មូត) បទពាក្យ ៧

៦៨-	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្ម័គ្រស្មោះ	យាងមករំដោះរាស្ត្រព្រះអង្គ	។
៦៩-	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	នៃអង្គដាវីឌបម្រើជាក់	។
៧០-	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលអាក់
	ដូចបានសន្យាតាមរយៈ	ព្យាការីធ្លាប់ស្ម័គ្រកាលគ្រាមុន	។
៧១-	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២-	ព្រះអង្គសម្ដែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣-	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូច្នេះថា	។
៧៤-	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបវន្ទា	ព្រះអង្គគ្រប់គ្រាគ្មានភ័យភិត	។
៧៥-	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦-	ចំណែកឯរូបរបស់កូន	នឹងក្លាយខ្លួនជាព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧-	កូននឹងធ្វើឱ្យអស់ប្រជា	រាស្ត្រទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨-	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩-	សម្រាប់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះទៅរកក្តីសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ រីឯ​អស់​អ្នក​ដែល​មាន​ប្រាជ្ញា​វិញ នឹង​ភ្លឺដូច​ផ្ទៃ​មេឃ ហើយ​អស់​អ្នក​ដែល​ជួយ​ណែ‌នាំ​មនុស្ស‌ម្នា​ជា​ច្រើន​ឲ្យ​ប្រព្រឹត្ត​អំពើ​សុចរិត គេ​នឹង​បាន​ភ្លឺ​ដូច​ផ្កាយ អស់‌កល្ប​ជា​អង្វែង​ត​រៀង​ទៅ។

ពាក្យអង្វរសកល

ព្រះគ្រីស្តជារូបតំណាងនៃព្រះប្រាជ្ញាញាណរបស់ព្រះជាម្ចាស់ ដែលមានភាពយុត្តិធម៌ ភាពដ៏វិសុទ្ធ និងអំណាចចេស្តា។ ចូរយើងកោតសរសើរព្រះអង្គ និងទូលអង្វរព្រះអង្គ ដោយមានទំនុកចិត្តថា ៖

បន្ទរ៖ ឱព្រះអម្ចាស់អើយ ! ដោយព្រះអង្គចាប់កំណើតជាមនុស្ស សូមសង្រ្គោះយើងខ្ញុំផង !

ឱព្រះមហាក្សត្រនៃពិភពលោក ! ពួកគង្វាលរកឃើញព្រះអង្គរុំនឹងសំពត់ស្នប
—សូមព្រះអង្គប្រោសឱ្យយើងខ្ញុំមានឆន្ទៈចូលរួមក្នុងភាពក្រីក្រ និងភាពសាមញ្ញរបស់ព្រះអង្គផង។ (បន្ទរ)

បពិត្រព្រះអម្ចាស់នៃស្ថានបរមសុខ ! ព្រះអង្គបានយាងចុះពីបល្ល័ង្ករបស់ព្រះអង្គមកក្នុងពិភពលោក
—សូមប្រៀនប្រដៅយើងខ្ញុំឱ្យចេះគោរពបងប្អូនដែលក្រីក្រ។ (បន្ទរ)

ព្រះគ្រីស្តជាពន្លឺដ៏ត្រចះត្រចង់អស់កល្បជានិច្ច ព្រះអង្គបានរស់នៅនាលោកនេះ ជាមនុស្សដូចយើងខ្ញុំក្នុងគ្រប់ប្រការ តែព្រះអង្គមិនត្រូវរបួស ឬស្នាមប្រឡាក់នៃអំពើបាបដើមសោះឡើយ
—សូមព្រះអង្គមេត្តាប្រោសឲ្យអ្នកជឿសង្ឃឹមលើព្រះអង្គ ចេះប្រើសម្បត្តិលោកីយ៍នេះ ដើម្បីធ្វើជាប្រយោជន៍សម្រាប់ព្រះកិត្តិនាមដ៏រុងរឿងរបស់ព្រះអង្គជានិច្ចផង។ (បន្ទរ)

ព្រះអង្គជាព្រះស្វាមីនៃព្រះសហគមន៍ ព្រះអង្គគង់នៅក្នុងចំណោមយើងខ្ញុំ ប្រៀបដូចកំពែងការពារ
—សូមព្រះអង្គមេត្តាជួយដល់គ្រីស្តបរិស័ទ ឱ្យចេះតស៊ូក្នុងព្រះសហគមន៍ ធ្វើដំណើរឆ្ពោះទៅកាន់ការសង្រ្គោះផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះជាម្ចាស់! ព្រះអង្គសព្វព្រះហឫទ័យបំភ្លឺព្រះសហគមន៍ ដោយសារការប្រៀនប្រដៅ និងការរស់នៅរបស់សន្តបាស៊ីល និងសន្តក្រេគ័រ។ សូមព្រះអង្គមេត្តាប្រោសយើងខ្ញុំឲ្យយកចិត្តទុកដាក់ស្វែងរកសេចក្តីពិត និងសេចក្តីស្រឡាញ់ ដើម្បីឲ្យយើងខ្ញុំប្រព្រឹត្តនូវអ្វីៗទាំងអស់ ដោយចិត្តសុភាពរាបសារ។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ
និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅ ដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។