ថ្ងៃអាទិត្យ ទី២៣ ខែវិច្ឆិកា ឆ្នាំ២០២៥

ពាក្យអធិដ្ឋាននៅពេលចូល

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យប្រមូលអ្វីៗទាំងអស់ឱ្យស្ថិត នៅក្រោមអំណាចរបស់ព្រះគ្រីស្ដ ជាព្រះមហាក្សត្រនៃពិភពលោក។ សូមទ្រង់ព្រះមេត្ដា ពង្រឹងសេចក្ដីក្លាហានរបស់យើងខ្ញុំជាអ្នកបម្រើព្រះអង្គ! សូម​ប្រោសយើងខ្ញុំឱ្យយកចិត្ដ ទុកដាក់កសាងពិភពលោកថ្មី តាមព្រះហឫទ័យ​ព្រះ​អង្គ! សូមជួយយើងខ្ញុំក្នុងកិច្ចរៀបចំ ផ្លូវថ្វាយព្រះគ្រីស្ដ ដែលយាងមកវិញផង។

អត្ថបទទី១៖ សូមថ្លែងព្រះគម្ពីរសាម៉ូអែលទី ២ ២សម ៥,១-៣

កុលសម្ព័ន្ធទាំងអស់នៃជនជាតិអ៊ីស្រាអែល នាំគ្នាមកគាល់ព្រះបាទដាវីឌនៅក្រុងហេប្រូន ហើយទូលថា៖«ទូលបង្គំយើងខ្ញុំទាំងអស់គ្នា ក៏ជាសាច់សារលោហិតរបស់ព្រះករុណាដែរ។ កាលពីមុន នៅគ្រាដែលព្រះបាទសាអ៊ូលគ្រងរាជ្យលើពួកទូលបង្គំ ព្រះករុណាធ្លាប់ដឹកនាំកង​ទ័ពអ៊ីស្រាអែលចេញទៅធ្វើសឹក ហើយព្រះអម្ចាស់មានព្រះបន្ទូលមកកាន់ព្រះករុណាថា «អ្នកនឹងគ្រប់គ្រងលើជនជាតិអ៊ីស្រាអែល ជាប្រជារាស្រ្ដរបស់យើង អ្នកនឹងដឹកនាំពួកគេ»។ ដូច្នេះ ព្រឹទ្ធាចារ្យទាំងអស់របស់ជនជាតិអ៊ីស្រាអែលចូលមកគាល់ព្រះរាជានៅក្រុងហេប្រូន។ ព្រះបាទដាវីឌចងសម្ពន្ធមេត្រីជាមួយព្រឹទ្ធាចារ្យទាំងនោះ ចំពោះព្រះភក្រ្ដព្រះអម្ចាស់នៅក្រុងហេប្រូន រួចពួកគេចាក់ប្រេងអភិសេកព្រះបាទដាវីឌធ្វើជាស្ដេចរបស់ជនជាតិអ៊ីស្រាអែល។

ទំនុកតម្កើងលេខ ១២២ (១២១),១-៧ បទកាកគតិ

អត្ថបទទី២៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូឡូស កូឡូ ១,១២-២០

បងប្អូនជាទីស្រឡាញ់!
ចូរអរព្រះគុណព្រះជាម្ចាស់ជាព្រះបិតាដោយចិត្ដរីករាយ ព្រោះព្រះអង្គបានប្រោសប្រទានឱ្យបងប្អូនមានសមត្ថភាពអាចទទួលចំណែកមត៌ករួមជាមួយប្រជាជនដ៏វិសុទ្ធនៅក្នុងពន្លឺ។ ព្រះអង្គបានរំដោះយើងឱ្យរួចផុតពីអំណាចនៃសេចក្ដីងងឹត ហើយចម្លងយើងចូលទៅក្នុងព្រះរាជ្យនៃព្រះបុត្រាដ៏ជាទីស្រឡាញ់របស់ព្រះអង្គ។ ដោយយើងរួមក្នុងអង្គព្រះបុត្រា ព្រះអង្គបានលោះយើង និងលើកលែងទោសឱ្យយើងរួចពីបាប។ ព្រះគ្រីស្ដជាតំណាងរបស់ព្រះជាម្ចាស់ដែលមនុស្សមើលពុំឃើញ ព្រះអង្គជារៀមច្បងរបស់សត្វលោកទាំងអស់ដែលព្រះជាម្ចាស់បានបង្កើតមក ដ្បិតព្រះជាម្ចាស់បានបង្កើតអ្វីៗសព្វសារពើក្នុងអង្គព្រះគ្រីស្ដ ទាំងនៅលើមេឃ ទាំងនៅលើផែនដី ទាំងអ្វីៗដែលមនុស្សមើលឃើញ ទាំងអ្វីៗដែលមនុស្សមើលមិនឃើញ ទាំងទេវតា ទាំងម្ចាស់ទឹកម្ចាស់ដី ទាំងវត្ថុសក្ដិសិទ្ធិ និងអំណាចនានា។ ព្រះជាម្ចាស់បានបង្កើតអ្វីៗសព្វសាររពើដោយសារព្រះគ្រីស្ដ និងសម្រាប់ព្រះគ្រីស្ដ។ ព្រះគ្រីស្ដមានព្រះជន្ម​មុនអ្វីៗទាំងអស់ ហើយអ្វីៗសព្វសារពើក៏នៅស្ថិតស្ថេររួមគ្នាដោយសារព្រះអង្គដែរ។ ព្រះអង្គជាសិរសានៃព្រះកាយរបស់ព្រះ​​​អង្គ គឺព្រះ​សហគមន៍។ ព្រះគ្រីស្ដជាដើមកំណើតនៃជីវិតថ្មី។ ព្រះអង្គជារៀមច្បងដែលមានព្រះជន្មរស់ឡើងវិញមុនគេ ក្នុងចំណោមមនុស្សស្លាប់ទាំងអស់ ដើម្បីធ្វើជាប្រ​មុខក្នុងគ្រប់វិស័យទាំងអស់ ដ្បិតព្រះជាម្ចាស់សព្វព្រះហឫទ័យឱ្យគ្រប់លក្ខណសម្បត្ដិរបស់ព្រះអង្គស្ថិតនៅក្នុងព្រះគ្រីស្ដ។ ព្រះជាម្ចាស់ បានសម្រុះសម្រួលអ្វីៗសព្វសារពើនៅលើផែនដី និងនៅលើមេឃឱ្យជានានឹងព្រះអង្គវិញ ដោយ​សារព្រះគ្រីស្ដ និងសម្រាប់ព្រះគ្រីស្ដ គឺព្រះជាម្ចាស់បានធ្វើឱ្យមានសន្ដិភាព ដោយព្រះបុត្រាបង្ហូរព្រះលោហិតនៅលើឈើឆ្កាង។

ពិធីអបអរសាទរព្រះគម្ពីរដំណឹងល្អតាម មក ១១,១០

សូមថ្លែងព្រះគម្ពីរដំណឹងល្អតាមសន្តលូកា លក ២៣,៣៥-៤៣

គេទើបបានឆ្កាងព្រះយេស៊ូ។ ប្រជាជននាំគ្នាឈរមើល រីឯពួកនាម៉ឺននិយាយចំអកមើលងាយព្រះអង្គថា៖«គាត់បានសង្គ្រោះមនុស្សឯទៀតៗ បើគាត់ជាព្រះគ្រីស្ដរបស់ព្រះជាម្ចាស់ ហើយជាអ្នកដែលព្រះអង្គបានជ្រើសរើសមែននោះ ឱ្យគាត់សង្គ្រោះខ្លួនឯងទៅ!»។ ពួកទាហារក៏ចំអកដាក់ព្រះអង្គដែរ គេយកទឹកខ្មេះមកថ្វាយព្រះអង្គសោយទាំងពោលថា៖«បើអ្នកជាស្ដេចជនជាតិ​យូដាមែន ចូរសង្គ្រោះខ្លួនអ្នកទៅ!»។ នៅពីលើព្រះអង្គមានសរសេរអក្សរ​ថា «អ្នកនេះជាស្ដេចជនជាតិយូដា»។ អ្នកទោសម្នាក់ដែលជាប់ឆ្កាង ពោល​ប្រ​មាថ​ព្រះយេស៊ូថា៖«បើអ្នកជាព្រះគ្រីស្ដមែន ចូរសង្គ្រោះខ្លួនអ្នកទៅ ហើយ​សង្គ្រោះ​យើងផង!»។ ប៉ុន្ដែ អ្នកទោសម្នាក់ទៀតស្ដីឱ្យអ្នកនោះ​ថា៖«ឯងមិនកោតខ្លាច​ព្រះ​​ជាម្ចាស់ទេឬ? ឯងត្រូវគេកាត់ទោសដូចលោកដែរ។ គេធ្វើទោសយើងនេះត្រូវហើយ យើងទទួលទោសតាមអំពើដែលយើងបានប្រព្រឹត្ដ។ រីឯលោក​​​​​វិញ លោកមិនបានធ្វើអំពើអាក្រក់អ្វីសោះ»។ បន្ទាប់មក គាត់ទូលព្រះអង្គថា៖«ឱព្រះ​​យេស៊ូ​អើយ! ពេលព្រះអង្គយាងមកគ្រងរាជ្យ សូមកុំភ្លេចទូលបង្គំឡើយ»។ ព្រះយេស៊ូមានព្រះបន្ទូលថា៖«ខ្ញុំសុំប្រាប់ឱ្យអ្នករាល់គ្នាដឹងច្បាស់ថា ថ្ងៃនេះ អ្នក​បានទៅនៅស្ថានបរមសុខជាមួយខ្ញុំ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! យើងខ្ញុំសូមយកតង្វាយទាំងនេះមកថ្វាយព្រះអង្គ។ យើងខ្ញុំក៏សូមថ្វាយកាយ វាចា ចិត្ដ រួមនឹងតង្វាយទាំងនោះដែរ។ សូមទ្រង់ព្រះមេត្ដា ទទួលដោយអនុគ្រោះ។ សូមជួយយើងខ្ញុំក្នុងកិច្ចរៀបចំផ្លូវថ្វាយព្រះគ្រីស្ដដែលយាងមក វិញផង

ធម៌លើកតម្កើង

បពិត្រព្រះបិតាជាអម្ចាស់ ប្រកបដោយធម៌មេត្ដាករុណាយ៉ាងក្រៃលែងអើយ! យើងខ្ញុំ សូមលើកតម្កើងសិរីរុងរឿងរបស់ព្រះអង្គ និងអរព្រះគុណព្រះអង្គជានិច្ច ដ្បិតព្រះអង្គ បានតាំងព្រះយេស៊ូធ្វើជាព្រះមហាក្សត្រត្រួតត្រាលើអ្វីៗទាំងអស់។ ព្រះយេស៊ូគ្រីស្ដនេះពិតជាមហាបូជាចារ្យយើងខ្ញុំ។ ទ្រង់បានបូជាព្រះជន្មនៅលើឈើឆ្កាង ដើម្បីរំដោះ មនុស្សលោកឱ្យរួចពីបាប និងបានបញ្ចូលសត្វលោកទាំងឡាយក្នុងព្រះរាជ្យរបស់ព្រះអង្គ ដែលជាព្រះរាជ្យប្រកបដោយធម៌មេត្ដា យុត្ដិធម៌ សេរីភាព សន្ដិភាព និងសុភមង្គល។
អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងសន្ដបុគ្គល ទាំងឡាយ ដើម្បីលើកតម្កើងសិរីរុងរឿងរបស់ព្រះអង្គដោយប្រកាសថា៖“ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”។

ពាក្យអរព្រះគុណ

បពិត្រព្រះជាម្ចាស់ដ៏មានតេជានុភាពសព្វប្រការ! ព្រះអង្គបានប្រោសប្រទានព្រះ កាយ និងព្រះលោកហិតព្រះគ្រីស្ដឱ្យយើងខ្ញុំ សូមទ្រង់ព្រះមេត្ដាកុំបណ្ដោយឱ្យយើងខ្ញុំឃ្លាត ឆ្ងាយពីព្រះអង្គឡើយ សូមឱ្យយើងខ្ញុំចូលរួមរស់ជា​មួយព្រះអង្គ ក្នុងការកសាងពិភព លោកថ្មី តាមព្រះហឫទ័យព្រះអង្គផង!។