រដូវរង់ចាំ

ថ្ងៃអាទិត្យ សប្ដាហ៍ទី២
_{(ពេលព្រឹក)}

ការអញ្ជើញមុនអធិដ្ឋាននៅពេលព្រឹក

ចាប់ពីអាទិត្យទី១ នៃរដូវរង់ចាំ រហូតដល់ថ្ងៃទី១៦ ខែធ្នូ៖

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ សូមអញ្ជើញមក យើងនាំគ្នាលើកតម្កើងព្រះ‌អម្ចាស់ ជាព្រះមហាក្សត្រ! ដ្បិតព្រះអង្គនឹងយាងមកសង្គ្រោះយើង។

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៨

បទចម្រៀងនៃអំណរសប្បាយក្នុងការសង្រ្គោះ

ព្រះ‌អង្គហ្នឹងហើយជា“ថ្មដែលលោកទាំងអស់គ្នាជាជាងសំណង់បោះចោល បានត្រឡប់មកជាថ្មគ្រឹះដ៏សំខាន់បំផុតវិញ (កក ៤,១១)។

បន្ទរទី១៖ យើងមានក្រុងមួយដ៏រឹង‌មាំ ព្រះ‌អម្ចាស់ប្រទានការសង្គ្រោះមកយើងទុកជាកំពែង និងជញ្ជាំងការ‌ពារយើង។ ចូរនាំគ្នាបើកទ្វារចំហ! ដ្បិតព្រះជាម្ចាស់កាន់ខាងយើងហើយ អាលេលូយ៉ា!

១	ចូរលើកតម្កើងព្រះអម្ចាស់ ដ្បិតព្រះអង្គមានព្រះហឫទ័យសប្បុរស ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!
២	សូមឱ្យជនជាតិអ៊ីស្រាអែលប្រកាសឡើងថា ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!
៣	សូមឱ្យពូជពង្សរបស់លោកអរ៉ុនប្រកាសឡើងថា ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!
៤	សូមឱ្យអស់អ្នកដែលគោរពកោតខ្លាចព្រះអម្ចាស់ ប្រកាសឡើងថា ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!
៥	នៅពេលតប់ប្រមល់ ខ្ញុំអង្វរព្រះអម្ចាស់ ព្រះអម្ចាស់ក៏ឆ្លើយតបមកខ្ញុំវិញ ហើយប្រទានឱ្យខ្ញុំមានសេរីភាព។
៦	ព្រះអម្ចាស់កាន់ខាងខ្ញុំ ខ្ញុំមិនភ័យខ្លាចអ្វីឡើយ តើមនុស្សលោកអាចធ្វើអ្វីខ្ញុំកើត?
៧	ព្រះអម្ចាស់កាន់ខាងខ្ញុំ ហើយជួយគាំទ្រខ្ញុំ ខ្ញុំនឹងឃើញខ្មាំងសត្រូវបរាជ័យ។
៨	ផ្ញើជីវិតលើព្រះអម្ចាស់ប្រសើរជាងទុកចិត្តលើមនុស្ស។
៩	ផ្ញើជីវិតលើព្រះអម្ចាស់ប្រសើរជាងទុកចិត្តលើអ្នកធំ។
១០	ប្រជាជាតិទាំងប៉ុន្មាន នាំគ្នាមកឡោមព័ទ្ធខ្ញុំ ខ្ញុំបានកម្ទេចពួកគេ ដោយសារព្រះនាមរបស់ព្រះអម្ចាស់។
១១	ប្រជាជាតិទាំងនោះ ឡោមព័ទ្ធខ្ញុំគ្រប់ទិសទី ខ្ញុំបានកម្ទេចពួកគេ ដោយសារព្រះនាមរបស់ព្រះអម្ចាស់។
១២	ប្រជាជាតិទាំងនោះ ឡោមព័ទ្ធខ្ញុំដូចហ្វូងឃ្មុំ តែពួកគេត្រូវឆេះអស់ទៅ ដូចភ្លើងដែលឆេះបន្លា ខ្ញុំបានកម្ទេចពួកគេ ដោយសារព្រះនាមរបស់ព្រះអម្ចាស់។
១៣	គេបានច្រានខ្ញុំយ៉ាងខ្លាំងដើម្បីឱ្យខ្ញុំដួល តែព្រះអម្ចាស់យាងមកជួយខ្ញុំ។
១៤	ព្រះអម្ចាស់ជាកម្លាំងរបស់ខ្ញុំ ខ្ញុំស្រែករកព្រះនាមព្រះអង្គ នៅពេលចេញទៅច្បាំង ព្រះអង្គសង្គ្រោះខ្ញុំ។
១៥	មនុស្សសុចរិតនឹងនាំគ្នាស្រែកហ៊ោរ នៅក្នុងជំរំរបស់ខ្លួន ខ្ញុំច្រៀងថ្វាយព្រះអង្គ ព្រោះតែមានជ័យជម្នះ ព្រះអម្ចាស់សម្តែងព្រះបារមីប្រកបដោយឫទ្ធានុភាព!
១៦	ព្រះអម្ចាស់សម្តែងព្រះបារមីដ៏ខ្ពង់ខ្ពស់បំផុត! ព្រះអម្ចាស់សម្តែងព្រះបារមីប្រកបដោយឫទ្ធានុភាព។
១៧	ខ្ញុំនឹងមានជីវិត ខ្ញុំនឹងមិនត្រូវស្លាប់ឡើយ ដើម្បីរៀបរាប់អំពីស្នាព្រះហស្តរបស់ព្រះអម្ចាស់។
១៨	មែនហើយ! ព្រះអម្ចាស់បានវាយប្រដៅខ្ញុំយ៉ាងខ្លាំង តែព្រះអង្គមិនបណ្តោយឱ្យខ្ញុំស្លាប់ឡើយ។
១៩	ចូរនាំគ្នាបើកទ្វារសម្រាប់មនុស្សសុចរិត ដើម្បីឱ្យចូលទៅលើកតម្កើងព្រះអម្ចាស់។
២០	នេះនែ៎! ទ្វារដែលនាំទៅគាល់ព្រះអម្ចាស់ មានតែមនុស្សសុចរិតទេ ដែលចូលតាមទ្វារនេះបាន។
២១	ទូលបង្គំលើកតម្កើងព្រះអង្គ ព្រោះព្រះអង្គឆ្លើយតបមកទូលបង្គំ ព្រះអង្គបានសង្គ្រោះទូលបង្គំ។
២២	ថ្មដែលពួកជាងសង់ផ្ទះបោះបង់ចោល បានត្រឡប់មកជាថ្មគ្រឹះដ៏សំខាន់បំផុត។
២៣	ព្រះអម្ចាស់បានសម្រេចការអស្ចារ្យ យើងក៏បានឃើញ ហើយស្ងើចសរសើរផង។
២៤	ថ្ងៃនេះជាថ្ងៃដែលព្រះអម្ចាស់បានបង្កើតមក យើងនាំគ្នាត្រេកអរសប្បាយរីករាយនៅថ្ងៃនេះ!
២៥	ឱព្រះអម្ចាស់អើយ! សូមសង្គ្រោះយើងខ្ញុំ! ឱព្រះអម្ចាស់អើយ! សូមប្រទានឱ្យយើងខ្ញុំមានជោគជ័យ!
២៦	សូមលើកតម្កើងព្រះអង្គ ដែលយាងមកក្នុងព្រះនាមព្រះអម្ចាស់ យើងដែលស្ថិតនៅក្នុងព្រះដំណាក់របស់ព្រះអម្ចាស់ សូមឱ្យពរអ្នករាល់គ្នា។
២៧	មានតែព្រះអម្ចាស់ទេ ដែលជាព្រះដ៏ពិតតែមួយព្រះអង្គ ព្រះអង្គបានប្រទានពន្លឺឱ្យយើង ចូរនាំគ្នាលើកធាងទន្សែឡើង ហើយហែជាក្បួន រហូតដល់ជ្រុងអាសនៈ
២៨	ព្រះអង្គជាព្រះនៃទូលបង្គំ ទូលបង្គំនឹងសរសើរតម្កើងព្រះអង្គ ឱព្រះនៃទូលបង្គំអើយ! ទូលបង្គំសូមលើកតម្កីងព្រះអង្គ!
២៩	ចូរលើកតម្កើងព្រះអម្ចាស់ ដ្បិតព្រះអង្គមានព្រះហឫទ័យសប្បុរស ព្រះហឫទ័យមេត្តាករុណារបស់ព្រះអង្គ នៅស្ថិតស្ថេររហូតតរៀងទៅ!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ យើងមានក្រុងមួយដ៏រឹង‌មាំ ព្រះ‌អម្ចាស់ប្រទានការសង្គ្រោះមកយើងទុកជាកំពែង និងជញ្ជាំងការ‌ពារយើង។ ចូរនាំគ្នាបើកទ្វារចំហ! ដ្បិតព្រះជាម្ចាស់កាន់ខាងយើងហើយ អាលេលូយ៉ា!

បទលើកតម្កើងតាមព្យាការីដានីអែល (ដន ៣,៥២-៥៧)

ស្នាព្រះ‌ហស្តទាំងប៉ុន្មានរបស់ព្រះ‌អម្ចាស់ ចូរសរសើរតម្កើងព្រះ‌អង្គ!

…សូមលើកតម្កើងព្រះ‌អង្គអស់កល្បជានិច្ច! (រ៉ូម ១,២៥)។

បន្ទរទី២ ៖ អស់អ្នកដែលស្រេកទឹកអើយ ចូរនាំគ្នាមករកទឹកឯ‌ណេះ! ចូរស្វែងរកព្រះអម្ចាស់ ក្នុងពេលដែលព្រះអង្គសព្វព្រះហឫទ័យឱ្យអ្នករាល់គ្នារកព្រះ‌អង្គឃើញ អាលេលូយ៉ា!

(បទកាកគតិ)

៥២-	បពិត្រព្រះម្ចាស់	ជាព្រះរបស់	ដូនតាយើងខ្ញុំ
	សូមកោតសរសើរ	ទាំងថ្វាយបង្គំ	ថ្កើងព្រះឧត្តម
		អស់កល្បតទៅ	។
	ខ្ញុំសូមតម្កើង	លើកព្រះខ្ពស់ឡើង	ពុំមានអាស្រូវ
	សុចរិតយុត្តិធម៌	ទ្រង់គង់ជាផ្លូវ	អង្វែងតទៅ
		សរសើរព្រះអង្គ	។
៥៣-	សូមកោតសរសើរ	ព្រះគ្មានអ្វីស្មើ	ក្នុងគ្រានេះម្តង
	ទ្រង់ប្រកបដោយ	សិរីរឿងរុង	ក្នុងវិហារទ្រង់
		កុំនៅទីមទាម	។
៥៤-	សូមលើកតម្កើង	ព្រះម្ចាស់យាងឡើង	លើខេរ៉ូប៊ីម
	ខ្ពង់ខ្ពស់បំផុត	គ្មានអ្វីប្រៀបផ្ទឹម	ស្មូតទាំងញញឹម
		តម្កើងជានិច្ច	។
៥៥-	សូមតម្កើងទ្រង់	ដែលយាងឡើងគង់	លើបល្ល័ង្ករាជ្យ
	សូមច្រៀងតម្កើង	រាល់ថ្ងៃព្រឹកល្ងាច	ព្រះម្ចាស់ជានិច្ច
		កុំប្រែក្រឡះ	។
៥៦-	សូមថ្កើងសរសើរ	ព្រះអង្គនៅលើ	វេហាស៍អាកាស
	ព្រះអង្គគ្រប់គ្រង	ស្ថានបរមសុខខ្ពស់	លើកសិរីយស
		ព្រះអង្គរហូត	។
៥៧-	គ្រប់ស្នាព្រះហស្ត	ព្រះម្ចាស់ទាំងអស់	នៅមិនរបូត
	ជារៀងដរាប	សូមនាំគ្នាស្មូត	តម្កើងរហូត
		អស់កល្បអន្លាយ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ ៖ អស់អ្នកដែលស្រេកទឹកអើយ ចូរនាំគ្នាមករកទឹកឯ‌ណេះ! ចូរស្វែងរកព្រះអម្ចាស់ ក្នុងពេលដែលព្រះអង្គសព្វព្រះហឫទ័យឱ្យអ្នករាល់គ្នារកព្រះ‌អង្គឃើញ អាលេលូយ៉ា!

ទំនុកតម្កើងលេខ ១៥០

ចូរសរសើរតម្កើងព្រះអម្ចាស់!

សូមឱ្យចិត្ត និងគំនិត​ ស្ថិតក្នុងបទចម្រៀងរបស់អ្នក។
នេះគឺជាការលើកតម្កើងព្រះជាម្ចាស់ ដោយខ្លួនអ្នកផ្ទាល់ (Hesychius)។

បន្ទរទី៣ ៖ មើលហ្ន៎ ព្រះ‌ជា‌អម្ចាស់យាងមកប្រកបដោយឫទ្ធានុភាព ដើម្បីបើកភ្នែកគេឱ្យភ្លឺ និងដើម្បីឱ្យអស់អ្នកបម្រើរបស់ព្រះអង្គងាកចេញពីសេចក្ដីងងឹត បែរមករកពន្លឺ អាលេលូយ៉ា!

១	អាលេលូយ៉ា! ចូរសរសើរតម្កើងព្រះ‌ជាម្ចាស់នៅក្នុងកន្លែងដ៏‌វិសុទ្ធ! ចូរសរសើរតម្កើងព្រះ‌អង្គនៅក្នុងលំហអាកាស ដែលជាព្រះ‌ដំណាក់ដ៏រឹង‌មាំរបស់ព្រះ‌អង្គ!
២	ចូរសរសើរតម្កើងព្រះ‌អង្គចំពោះស្នាព្រះ‌ហស្ដដ៏អស្ចារ្យ! ចូរសរសើរតម្កើងព្រះ‌អង្គ ដ្បិតព្រះ‌អង្គប្រសើរឧត្តុង្គ‌ឧត្ដមបំផុត!
៣	ចូរសរសើរតម្កើងព្រះ‌អង្គដោយសំឡេងត្រែ ចូរសរសើរតម្កើងព្រះ‌អង្គ ដោយដេញចាប៉ី និងដេញពិណ!
៤	ចូរសរសើរតម្កើងព្រះ‌អង្គ ដោយវាយក្រាប់ និងរាំរបាំ! ចូរសរសើរតម្កើងព្រះ‌អង្គ ដោយវាយឃឹម និងផ្លុំខ្លុយ!
៥	ចូរសរសើរតម្កើងព្រះ‌អង្គ ដោយវាយស្គរយ៉ាងពីរោះ! ចូរសរសើរតម្កើងព្រះ‌អង្គ ដោយវាយស្គរឲ្យលាន់ឮរំពង!
៦	ចូរឲ្យអ្វីៗទាំងអស់ដែលមានដង្ហើមចេញចូល សរសើរតម្កើងព្រះ‌អម្ចាស់! អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ មើលហ្ន៎ ព្រះ‌ជា‌អម្ចាស់យាងមកប្រកបដោយឫទ្ធានុភាព ដើម្បីបើកភ្នែកគេឱ្យភ្លឺ និងដើម្បីឱ្យអស់អ្នកបម្រើរបស់ព្រះអង្គងាកចេញពីសេចក្ដីងងឹត បែរមករកពន្លឺ អាលេលូយ៉ា!

ព្រះបន្ទូលរបស់ព្រះជាម្ចាស់ (រ៉ូម ១៣,១១-១២)

បងប្អូនជ្រាបហើយថា យើងកំពុងតែរស់នៅក្នុងគ្រាណា គឺដល់ពេលយើងត្រូវក្រោកពីដេក
ដ្បិតឥឡូវនេះ ការសង្គ្រោះខិតមកជិតយើងជាងកាលយើងទើបនឹងជឿ។
យប់ជិតផុតហើយ ហើយថ្ងៃចក៏ជិតដល់ដែរ ដូច្នេះ យើងត្រូវលះ‌បង់អំពើនៃសេចក្ដីងងឹតចោលទៅ
ហើយប្រដាប់ខ្លួនដោយគ្រឿងសាស្ត្រា‌វុធនៃពន្លឺវិញ។

បន្ទរ៖ ឱព្រះ‌គ្រីស្តជាព្រះបុត្រារបស់ព្រះជាម្ចាស់ ដែលមានព្រះជន្មគង់នៅអើយ! *សូមអាណិតមេត្តាយើងខ្ញុំផង។ បន្ទរឡើងវិញ៖…
—ព្រះអង្គជាព្រះអម្ចាស់ដែលនឹងយាងមក។ បន្ទរ៖ *…
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

អាទិត្យទី២៖ យើង​នឹង​ចាត់​ទេវទូតមួយ​រូប​ឲ្យ​ដើរ​នៅ​មុខ​អ្នក ដើម្បី​ការ‌ពារ​អ្នក​នៅ​តាម​ផ្លូវ។

៦៨	”សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល ដ្បិតទ្រង់សព្វព្រះហឫទ័យយាងមករំដោះប្រជារាស្ត្ររបស់ព្រះអង្គ។
៦៩	ទ្រង់បានប្រទានព្រះសង្គ្រោះដ៏មានឫទ្ធិមួយព្រះអង្គ ពីក្នុងចំណោមព្រះញាតិវង្សរបស់ព្រះបាទដាវីឌ ជាអ្នកបម្រើព្រះអង្គឱ្យមកយើង។
៧០	ព្រះជាម្ចាស់ប្រទានព្រះសង្គ្រោះនេះមកយើង ស្របនឹងព្រះបន្ទូលសន្យា ថ្លែងតាមរយៈព្យាការីរបស់ព្រះអង្គនៅជំនាន់ដើម
៧១	គឺព្រះអង្គសង្គ្រោះយើងឱ្យរួចពីកណ្តាប់ដៃរបស់ខ្មាំងសត្រូវ និងរួចពីអំណាចរបស់អ្នកដែលស្អប់យើង
៧២	ព្រះអង្គសម្ដែងព្រះហឫទ័យមេត្តាករុណាដល់បុព្វបុរសយើង ហើយគោរពតាមសម្ពន្ធមេត្រីរបស់ព្រះអង្គយ៉ាងស្មោះស្ម័គ្រ
៧៣	គឺព្រះអង្គបានសន្យាយ៉ាងម៉ឺងម៉ាត់ដល់លោកអប្រាហាំ ជាបុព្វបុរសរបស់យើងថា
៧៤	ទ្រង់នឹងរំដោះយើងឱ្យរួចពីកណ្តាប់ដៃរបស់ខ្មាំងសត្រូវ ដើម្បីយើងអាចគោរពបម្រើព្រះអង្គបានដោយឥតភ័យខ្លាច
៧៥	ព្រមទាំងឱ្យយើងរស់នៅបានបរិសុទ្ធ និងសុចរិតជាទីគាប់ព្រះហឫទ័យព្រះជាម្ចាស់ ជារៀងរាល់ថ្ងៃ រហូតអស់មួយជីវិត។
៧៦	ចំណែកឯកូនវិញ កូននឹងទៅជាព្យាការីរបស់ព្រះដ៏ខ្ពង់ខ្ពស់បំផុត ព្រោះកូននឹងដើរមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។
៧៧	កូននឹងឱ្យប្រជារាស្ត្ររបស់ព្រះអង្គដឹងថា ព្រះអង្គសង្គ្រោះគេ ដោយលើកលែងគេឱ្យរួចពីបាប។
៧៨	ព្រះរបស់យើងមានព្រះទ័យមេត្តាករុណាដ៏លើសលប់ ព្រះអង្គប្រទានថ្ងៃរះពីស្ថានលើមក ដើម្បីរំដោះយើង
៧៩	និងដើម្បីបំភ្លឺអស់អ្នកដែលស្ថិតនៅក្នុងទីងងឹត ក្រោមអំណាចនៃសេចក្តីស្លាប់ ព្រមទាំងតម្រង់ផ្លូវយើងឆ្ពោះទៅរកសេចក្តីសុខសាន្ត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ឬ ទំនុកតម្កើងរបស់លោកសាការី (តាមបែបស្មូត) បទពាក្យ ៧

៦៨-	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្ម័គ្រស្មោះ	យាងមករំដោះរាស្ត្រព្រះអង្គ	។
៦៩-	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	នៃអង្គដាវីឌបម្រើជាក់	។
៧០-	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលអាក់
	ដូចបានសន្យាតាមរយៈ	ព្យាការីធ្លាប់ស្ម័គ្រកាលគ្រាមុន	។
៧១-	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២-	ព្រះអង្គសម្ដែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣-	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូច្នេះថា	។
៧៤-	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបវន្ទា	ព្រះអង្គគ្រប់គ្រាគ្មានភ័យភិត	។
៧៥-	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦-	ចំណែកឯរូបរបស់កូន	នឹងក្លាយខ្លួនជាព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧-	កូននឹងធ្វើឱ្យអស់ប្រជា	រាស្ត្រទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨-	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩-	សម្រាប់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះទៅរកក្តីសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

អាទិត្យទី២៖ យើង​នឹង​ចាត់​ទេវទូតមួយ​រូប​ឲ្យ​ដើរ​នៅ​មុខ​អ្នក ដើម្បី​ការ‌ពារ​អ្នក​នៅ​តាម​ផ្លូវ។

ពាក្យអង្វរសកល

អាទិត្យទី២&៤

បពិត្រព្រះយេស៊ូគ្រីស្តជាអម្ចាស់ ដែលវិនិច្ឆ័យទោសទាំងមនុស្សរស់ និងមនុស្សស្លាប់ យើងខ្ញុំសូមទូលអង្វរទៅព្រះអង្គថា ៖

បន្ទរ ៖ ឱព្រះអម្ចាស់យេស៊ូអើយ សូមយាងមក !

បពិត្រព្រះអម្ចាស់យេស៊ូ ព្រះអង្គបានយាងមក ដើម្បីសង្រ្គោះអ្នកបាប
—សូមការពារយើងខ្ញុំនៅពេលជួបនឹងការល្បួងទាំងឡាយផង។ (បន្ទរ)

បពិត្រព្រះគ្រីស្ត! ព្រះអង្គនឹងយាងមកក្នុងសិរីរុងរឿង ដើម្បីធ្វើជាចៅក្រមរបស់យើងខ្ញុំ
—សូមសម្តែងឫទ្ធានុភាពរបស់ព្រះអង្គ ជួយសង្រ្គោះយើងខ្ញុំផង។ (បន្ទរ)

សូមព្រះអង្គជួយយើងខ្ញុំឱ្យប្រកាន់ខ្ជាប់តាមការប្រៀនប្រដៅនៃច្បាប់របស់ព្រះអង្គ ដោយកម្លាំងដែលមកពីព្រះវិញ្ញាណដ៏វិសុទ្ធ
—ទាំងទន្ទឹងរង់ចាំព្រះអង្គ ដោយសេចក្តីស្រឡាញ់ផង។ (បន្ទរ)

សូមឱ្យមនុស្ស​នៅ​គ្រប់​ជំនាន់លើក​តម្កើង​ពី​ស្នា​ព្រះហស្ដ​ដ៏​អស្ចារ្យរបស់ព្រះ‌អង្គ
សូមឱ្យព្រះហឫទ័យមេត្តាករុណារបស់ព្រះអង្គ ជួយយើងខ្ញុំឱ្យរស់នៅមានភាពស្មោះត្រង់ និងចេះប្រមាណខ្លួនក្នុងជីវិតនេះ
—នៅពេលយើងខ្ញុំទន្ទឹងរង់ចាំព្រះអង្គ ដោយមានចិត្តសង្ឃឹមថា នឹងបានចូលទៅក្នុងសិរីរុងរឿងរួមជាមួយព្រះអង្គដែរ។ (បន្ទរ)

ធម៌ “ឱព្រះបិតា”

ឱព្រះបិតាយើងខ្ញុំ ដែលគង់នៅស្ថានបរមសុខអើយ!
សូមសម្តែងព្រះបារមី ឱ្យមនុស្សលោកស្គាល់ព្រះនាមព្រះអង្គ
សូមឱ្យព្រះរាជ្យព្រះអង្គបានមកដល់
សូមឱ្យព្រះហឫទ័យរបស់ព្រះអង្គបានសម្រេចនៅលើផែនដី
ដូចនៅស្ថានបរមសុខដែរ។
សូមប្រទានអាហារ ដែលយើងខ្ញុំត្រូវការនៅថ្ងៃនេះ។
សូមអត់ទោសឱ្យយើងខ្ញុំ ដូចយើងខ្ញុំអត់ទោសឱ្យ
អស់អ្នកដែលបានប្រព្រឹត្តខុសនឹងយើងខ្ញុំ។
សូមកុំបណ្តោយឱ្យយើងខ្ញុំ ចាញ់ការល្បួងឡើយ
តែសូមរំដោះយើងខ្ញុំ ឱ្យរួចពីមារកំណាច។

ពាក្យអធិដ្ឋាន

ឱព្រះបិតាដ៏មានឫទ្ធានុភាពសព្វប្រការអើយ ! ព្រះអង្គសព្វព្រះហឫទ័យចាត់ព្យាការីយ៉ូហានបាទីស្ត ឲ្យមករៀបចំផ្លូវថ្វាយព្រះបុត្រាព្រះអង្គ។
សូមព្រះអង្គមេត្តាបំភ្លឺចិត្តគំនិតយើងខ្ញុំឲ្យយកចិត្តទុកដាក់ រៀបចំផ្លូវថ្វាយព្រះគ្រីស្ត ដែលកំពុងយាងមក និងប្រោសឲ្យយើងខ្ញុំចេះកសាងពិភពលោកប្រកបដោយយុត្តិធម៌។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ
និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។