តើខ្ញុំអាចរៀនស្រឡាញ់រូបកាយរបស់ខ្លួនយ៉ាងដូចម្តេច?

មាតិកា | Contents

ក្រុមទី៣
តើខ្ញុំអាចរៀនស្រឡាញ់រូបកាយរបស់ខ្លួនយ៉ាងដូចម្តេច?
How can I learn to love my body?

រូបសម្បត្ដិ និងបុគ្គលិកលក្ខណៈរបស់យើងមានឥទ្ធិពលមកលើយើង ពីព្រោះរបៀបដែលយើងបង្ហាញលក្ខណៈខាងក្រៅទាក់ទងនឹងលក្ខណៈខាងក្នុងខ្លួនយើងជានរណា។ ប៉ុន្តែ យើងមានជម្រើសពីរគឺ៖ រៀងរាល់ថ្ងៃ តើខ្ញុំបណ្តោយខ្លួនឯងទៅតាមសំពាធដែលចង់កែកុនរូបកាយឱ្យបានស្អាតឥតខ្ចោះដែលមិនអាចទៅរួចដែរឬទេ? ឬតើខ្ញុំនឹងជ្រើសរើសក្លាយទៅជាខ្លួនខ្ញុំ គឺក្លាយជាមនុស្សដែលព្រះជាម្ចាស់បានបង្កើតខ្ញុំមកតាមលក្ខណៈរបស់ព្រះអង្គ? ជម្រើសនេះមិនមែនជាការងាយស្រួលនោះទេ។

មានពេលខ្លះ យើងមានអារម្មណ៍ថា យើងមិនល្អគ្រប់គ្រាន់ទេ។ ហេតុនេះ យើងចង់ប្ដូរដើម្បីឱ្យអ្នកដទៃទទួលយកយើង។ ថ្វីដ្បិតតែធ្វើដូច្នោះ នៅតែមិនប្រាកដថា យើងរស់នៅស្របតាមការរំពឹងទុករបស់ពួកគេឡើយ។

ប៉ុន្តែ ព្រះជាម្ចាស់ជួបយើងនៅទីកន្លែងរបស់យើង និងស្រឡាញ់យើងជាបុត្រធីតា។ យើងម្នាក់ៗមានតម្លៃ ជាបុគ្គលតែម្នាក់គត់ និងជាទីស្រឡាញ់របស់ព្រះជាម្ចាស់។

ព្រះអាទិករឯស្ថានបរមសុខស្រឡាញ់យើងតាមលក្ខណៈរបស់យើងជានរណា ហើយតែងសព្វព្រះហឫទ័យនូវអ្វីដ៏ល្អបំផុតសម្រាប់យើង។

ព្រះជាម្ចាស់យកព្រះហឫទ័យទុកដាក់អំពីរបៀបដែលយើងស្រឡាញ់អ្នកដទៃជ្រាលជ្រៅប៉ុណ្ណា អំពីរបៀបដែលយើងពឹងផ្អែកលើព្រះអង្គដោយអស់ពីចិត្ដនៅពេលមានអាសន្ន និងការលំបាក ព្រមទាំងអំពីរបៀបដែលយើងរួមដំណើរជាមួយព្រះគ្រីស្តនៅក្នុងជីវិតរស់នៅដូចម្ដេច។ យើងពិបាកនឹកឃើញអំពីសេចក្ដីទាំងអស់នេះ ពីព្រោះយើងមិនទទួលសេចក្ដីទាំងនេះញឹកញ៉ាប់ពីបណ្តាញទំនាក់ទំនងសង្គម ឬពីមនុស្សដែលជ្រើសរើសយកការបង្កភាពអាម៉ាស់ដល់អ្នកដទៃឡើយ។

រៀងរាល់ថ្ងៃ មានរូបភាពច្រើនអនេកបង្ហាញយើងថា យើងសមនឹងមានរូបរាងដូចម្តេច ដាក់សំពាធមកលើយើងឱ្យសម្រេចតាមបំណងដែលមិនអាចទៅរួច គឺរូបរាងក្លែងក្លាយឥតខ្ចោះ។ ឥទ្ធិពលមិនល្អជាច្រើនអូសទាញយើងឱ្យសម្លឹងមើលខ្លួនឯង ហើយពិបាកបែងចែកថា អ្វីដែលយើងដឹងគឺជាការពិត។ ប៉ុន្តែ យើងអាចព្យាយាមឡើងវិញរៀងរាល់ថ្ងៃ។

យើងអាចជ្រើសរើសធ្វើតាមកល្យាណមិត្តដែលស្រឡាញ់យើងតាមលក្ខណៈរបស់យើង ហើយជំរុញយើងឱ្យរីកចម្រើន ស្តែងចេញមកពីចំណង់ប្រាថ្នាដែលចង់ឱ្យយើងក្លាយទៅជាអ្នកដែលព្រះជាម្ចាស់បានបង្កើតយើងមកតាមលក្ខណៈរបស់ព្រះអង្គ។ យើងត្រូវដឹងឱ្យប្រាកដថា អ្នកប្រើប្រាស់ និងអ្នកមានឥទ្ធិពល ដែលយើងតាមដាននៅលើបណ្តាញអ៊ីនធើណែតនឹងជួយកសាងយើងឱ្យរីកចម្រើន ឬបំផ្លាញយើងឱ្យអន្តរាយ។ នៅថ្ងៃណាដែលមានអ្វីៗកើតឡើងច្រើនពេក យើងអាចស្វែងរកដំបូន្មានពីនរណាម្នាក់ ដែលយើងទុកចិត្តថា អាចជួយយើងឱ្យចេះដោះស្រាយបានត្រឹមត្រូវ។

ចូរមានមោទនភាពចំពោះខ្លួនឯងជានរណា ហើយកុំខ្មាស់ចំពោះអ្នកដទៃដែលសម្លឹងមើលមកអ្នក។ ចូរស្រឡាញ់រូបកាយ និងស្រឡាញ់ខ្លួនឯង!

តើព្រះគម្ពីរចែងអ្វីខ្លះ?

ព្រះជាម្ចាស់បង្កើតមនុស្សជារូបតំណាងព្រះអង្គ។ យើងម្នាក់ៗគឺជាស្នាព្រះហស្តដ៏អស្ចារ្យរបស់ព្រះជាម្ចាស់ ជាលក្ខណៈឥតខ្ចោះរបស់ព្រះអង្គ ល្អល្អះ និងស្រស់ស្អាតអស្ចារ្យ។ ដូចទំនុកតម្កើងលេខ ១៣៩,១៣-១៤ ចែងថា៖

«ព្រះ‌អង្គបានបង្កើតទូល‌បង្គំមក ព្រះ‌អង្គបានបង្កប់ទូល‌បង្គំនៅក្នុងផ្ទៃម្ដាយ។
ទូល‌បង្គំសូមលើកតម្កើងព្រះ‌អង្គ ដ្បិតទូល‌បង្គំជាស្នាព្រះ‌ហស្ដដ៏ល្អអស្ចារ្យ
ទូល‌បង្គំដឹងច្បាស់ថាអ្វីៗដែលព្រះ‌អង្គធ្វើសុទ្ធតែល្អអស្ចារ្យទាំងអស់។»

តើលទ្ធិព្រះសហគមន៍ចែងអ្វីខ្លះ?

សម្តេចប៉ាប ហ្រ្វង់ស៊ីស្កូ មានបន្ទូលថា៖ «វប្បធម៌នាសម័យកាលរបស់យើងនេះ គេយករូបភាពយុវវ័យមកធ្វើអាជីវកម្ម។ ភាពស្រស់ស្អាតទាក់ទងនឹងលក្ខណៈយុវភាព គេប្រើប្រាស់គ្រឿងសម្អិតសម្អាងខ្លួនដើម្បីបិទបាំងវ័យ។ គេតែងប្រើប្រាស់រូបកាយក្មេងវ័យក្នុងគោលបំណងផ្សព្វផ្សាយការលក់ផលិតផល។ ឧត្ដមគតិអំពីសោភ័ណភាពគឺជាយុវវ័យ ប៉ុន្តែយើងត្រូវដឹងថា ឧត្ដមគតិនេះផ្តល់តម្លៃតិចតួចដល់យុវជន។ មានន័យថា មនុស្សពេញវ័យចង់ប្រើប្រាស់រូបភាពយុវជននេះសម្រាប់ខ្លួនគេ មិនមែនពួកគេគោរព ស្រឡាញ់ និងយកចិត្តទុកដាក់ចំពោះយុវជននោះទេ។»។

ពាក្យអធិដ្ឋានឱ្យចិត្តរីករាយ

បពិត្រព្រះអម្ចាស់! ក្នុងពិភពលោកនេះមានពោរពេញដោយមនុស្សខ្នះខ្នែងធ្វើខ្លួនឱ្យបានស្អាតឥតខ្ចោះ តាមសង្គមដែលឱ្យតម្លៃទៅលើសម្រស់ខាងមុខមាត់របស់យើងខ្ញុំ និងមានរូបភាពទាក់ទាញជាច្រើនឱ្យយើងខ្ញុំប្រៀបធៀបខ្លួនជាមួយញឹកញាប់។ សូមព្រះអង្គជួយយើងខ្ញុំឱ្យយល់សេចក្ដីពិត ដែលព្រះអង្គបានបង្កើតយើងខ្ញុំឱ្យមានលក្ខណៈដោយឡែក។ ព្រះអង្គមិនបានបង្កើតទូលបង្គំតែផ្នែកណាមួយដោយចៃដន្យនោះទេ។ សូមព្រះអង្គប្រោសឱ្យយើងខ្ញុំចេះមើលរូបកាយរបស់ខ្លួនតាមរបៀបរបស់ព្រះអង្គ គឺអច្ឆរិយៈ និងអស្ចារ្យគួរឱ្យស្ងប់ស្ងែង។ ឱព្រះបិតាអើយ! សូមលើកលែងទោសឱ្យយើងខ្ញុំ ដែលចំណាយពេលវេលាខកចិត្ដជាមួយនឹងរូបសម្បត្ដិដែលព្រះអង្គបានប្រទានដល់អ្នកដទៃ។

ឱព្រះបិតាអើយ! សូមជួយយើងខ្ញុំឱ្យចេះទទួលស្គាល់ថា ព្រះអង្គបានបង្កើតយើងខ្ញុំឱ្យមានលក្ខណៈតែមួយគត់ និងដោយមានគោលបំណងច្បាស់លាស់។ សូមប្រោសឱ្យយើងខ្ញុំកុំគ្រាន់តែរីករាយជាមួយរូបកាយប៉ុណ្ណោះឡើយ តែចេះលើកតម្កើងទាំងភាពខុសប្លែកគ្នា ទាំងពិការភាព ទាំងគុណវិបត្តិ ទាំងរូបសម្រស់ស្អាត និងមិនស្អាតផង។