អធិដ្ឋានជានិច្ច

---

តើអធិដ្ឋានជាអ្វី?

គ្រីស្តបរិស័ទរួមរស់ជាមួយព្រះយេស៊ូ ដែលគង់នៅជាមួយខ្លួន។ ហេតុដូច្នេះហើយទើបគ្រីស្តបរិស័ទតែងនិយាយសន្ទនាជាមួយ ព្រះអង្គគ្រប់ពេលវេលា ដូចមិត្តសម្លាញ់សន្ទនាជាមួយមិត្តដែល ខ្លួនស្រឡាញ់យ៉ាងជិតស្និទ្ធដែរ។
ម្យ៉ាងទៀត គ្រីស្តបរិស័ទរួមជាមួយព្រះយេស៊ូ ដែលសន្ទនា ជាមួយព្រះបិតា ដូចកូនតែងនិយាយរឿងរ៉ាវផ្សេងៗជាមួយឪពុក ម្តាយ។ «ព្រះវិញ្ញាណរបស់ព្រះយេស៊ូរួមជាមួយវិញ្ញាណយើង ដើម្បីបន្លឺសម្លេងថា៖ ឱ! ប៉ារ ឱព្រះបិតាអើយ!» (រ៉ូម ៤.១៥)។ ពាក្យសន្ទនានេះ គ្រីស្តបរិស័ទសន្មតថា «អធិដ្ឋាន»។ សៀវភៅ នេះ មានពាក្យអធិដ្ឋានល្អៗជាច្រើន។ យើងសង្ឃឹមថា ពាក្យ អធិដ្ឋានទាំងនេះ ជួយឱ្យបងប្អូនរួមជាមួយព្រះយេស៊ូ និងសន្ទនា ជាមួយព្រះបិតាបាន។

១ អធិដ្ឋានពេលភ្ញាក់ពីដំណេក

សូមថ្វាយខ្លួន

ខ្ញុំសូមថ្វាយកាយ វាចា ចិត្ត ចំពោះព្រះបិតាជាអម្ចាស់ សូមព្រះអង្គគង់ជាមួយខ្ញុំ ជួយការពារខ្ញុំគ្រប់ពេលវេលាឱ្យខ្ញុំប្រព្រឹត្តតែកិច្ចការដែលគាប់ព្រះហឫទ័យព្រះអង្គផង។

***

បពិត្រព្រះបិតារបស់មនុស្សទាំងអស់ កូនសូមផ្ញើជីវិតលើព្រះអង្គ ទាំងអរព្រះគុណផង។ សូមព្រះអង្គប្រោសឱ្យកូនលែងសង្ស័យ
សូមប្រោសឱ្យកូនបន្តពន្លឺនៃសេចក្តីសង្ឃឹម ទៅអ្នកដទៃតាមការរស់នៅរបស់កូនផង ។ អាម៉ែន។

***

សូមថ្វាយបង្គំព្រះបិតា ព្រះបុត្រា និងព្រះវិញ្ញាណដ៏វិសុទ្ឋ! អាម៉ែន។
បពិត្រព្រះបិតាជាអម្ចាស់! សូមព្រះមេត្តាបើកបបូរមាត់កូន ឱ្យកូនច្រៀងលើកតម្កើង
ពីស្នាព្រះហស្តដ៏អស្ចារ្យរបស់ព្រះអង្គ។

***

បពិត្រព្រះយេស៊ូជាអម្ចាស់! ក្នុងថ្ងៃនេះ ខ្ញុំចង់ឱ្យគាប់ព្រះហឫទ័យព្រះអង្គ។ សូមប្រោសឱ្យខ្ញុំប្រព្រឹត្តកិច្ចការទាំងអស់ តាមព្រះអង្គសព្វព្រះហឫទ័យ។ សូមថ្វាយបង្គំព្រះបិតា ព្រះបុត្រា និងព្រះវិញ្ញាណដ៏វិសុទ្ឋ! អាម៉ែន ។

***

២. អធិដ្ឋានពេលព្រឹក

សូមថ្វាយបង្គំព្រះបិតាព្រះបុត្រា និងព្រះវិញ្ញាណដ៏វិសុទ្ធ! អាម៉ែន។

ឱ! ព្រះបិតាយើងខ្ញុំ

ឱ! ព្រះបិតាយើងខ្ញុំ ដែលគង់នៅស្ថានបរមសុខអើយ!
សូមសម្តែងព្រះបារមីឱ្យមនុស្សលោកស្គាល់ព្រះនាមព្រះអង្គ សូមឱ្យព្រះរាជ្យព្រះអង្គបានមកដល់
សូមឱ្យព្រះហឫទ័យរបស់ព្រះអង្គបានសម្រេចនៅលើផែនដី ដូចនៅស្ថានបរមសុខដែរ។
សូមប្រទានអាហារដែលយើងខ្ញុំត្រូវការនៅថ្ងៃនេះ។ សូមអត់ទោសឱ្យយើងខ្ញុំ ដូចយើងខ្ញុំអត់ទោសឱ្យអស់អ្នក
ដែលបានប្រព្រឹត្តខុសនឹងយើងខ្ញុំ។ សូមកុំបណ្តោយឱ្យយើងខ្ញុំចាញ់ការល្បងឡើយ
តែសូមរំដោះយើងខ្ញុំឱ្យរួចពីមារកំណាច ។

សូមអង្វរព្រះនាងម៉ារី

បពិត្រព្រះនាងម៉ារី ជាទីគាប់ព្រះហឫទ័យព្រះអម្ចាស់ សូមព្រះនាងមានអំណរសប្បាយ ព្រះអង្គគង់ជាមួយនាង
ព្រះអង្គបានប្រទានពរដល់នាងលើសស្ត្រីទាំងឡាយ ហើយទ្រង់ក៏ប្រទានពរដល់បុត្រព្រះនាងដែរ។
ឱ! សន្តីម៉ារី ជាព្រះមាតាព្រះអម្ចាស់ សូមជួយអង្វរព្រះអង្គឱ្យយើងខ្ញុំជាអ្នកបាប នៅពេលឥឡូវនេះហើយនៅពេលស្លាប់ផង។ អាម៉ែន។

សូមកោតសរសើរ

សូមកោតសរសើរព្រះបិតា ព្រះបុត្រា ព្រះវិញ្ញាណដ៏វិសុទ្ឋ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

សូមអរព្រះគុណព្រះបិតា

សូមថ្វាយបង្គំព្រះបិតា
ព្រះបុត្រា និងព្រះវិញ្ញាណដ៏វិសុទ្ធ! អាម៉ែន។

• បពិត្រព្រះបិតា កូនសូមអរព្រះគុណព្រះអង្គ! ចំពោះពិភពលោកយើងដ៏ល្អប្រណិត។
• កូនសូមអរព្រះគុណព្រះអង្គ ដែលប្រទានឱ្យមានព្រះអាទិត្យរះឡើងបំភ្លឺកូន។
• កូនសូមអរព្រះគុណព្រះអង្គ ដែលប្រទានឱ្យមានព្រះចន្ទ និងផ្កាយទាំងឡាយ។
• សូមព្រះបិតាប្រទាន ឱ្យកូនមានចិត្តស្រឡាញ់តែព្រះអង្គ និងធ្វើអ្វីៗតាមដែលព្រះអង្គសព្វព្រះហឫទ័យ។ សូមប្រោសប្រទានព្រះអំណោយទានដ៏ប្រសើរបំផុត គឺឱ្យកូនស្រឡាញ់ព្រះអង្គអស់ពីចិត្ត ស្រឡាញ់ព្រះអង្គច្រើនជាងពីថ្ងៃម្សិលម៉ិញ និងស្រឡាញ់អ្នកឯទៀតផង ។
  « ឱ! ព្រះបិតា…បពិត្រព្រះនាងម៉ារី…សូមកោតសរសើរ…»

សូមអង្វរសម្រាប់ថ្ងៃថ្មី

• បពិត្រព្រះបិតាដ៏សប្បុរស ថ្ងៃថ្មីចាប់ផ្តើមហើយ សូមប្រោសកូនឱ្យរួមជាមួយអ្នកឯទៀតៗ កសាងពិភពលោកថ្មីប្រកបដោយមនុស្សធម៌។
• សូមប្រោសឱ្យកូនមានចិត្តក្លាហាន សុខចិត្តទៅទាក់ទងនឹងអ្នកដទៃ ឱ្យកូនញញឹមដាក់គេ និងឱ្យកូនបានទទួលស្នាមញញឹមពីគេដែរ ។
• សូមឱ្យកូនជម្រាបសួរគេ និងឱ្យបានទទួលពាក្យជម្រាបសួរពីគេវិញដែរ ។
• សូមប្រោសឱ្យកូននិយាយលេងជាមួយអ្នកឯទៀតៗ និងផ្តល់អំណរសប្បាយដែលមកពីព្រះអង្គ ដល់អ្នកទាំងនោះផង។
• សូមឱ្យអ្នកដទៃមានអំណរសប្បាយ ហើយសូមឱ្យខ្ញុំមានអំណរសប្បាយតាមរយៈបងប្អូនទាំងនោះដែរ ។
  « ឱ! ព្រះបិតា…បពិត្រព្រះនាងម៉ារី… សូមកោតសរសើរ…»

ព្រះអម្ចាស់ប្រទានពរដល់អស់អ្នកកើតទុក្ខព្រួយ

ឱ ព្រះអម្ចាស់អើយ! សូមព្រះអង្គប្រទានពរដល់អស់អ្នកដែលរងទុក្ខលំបាកយ៉ាងខ្លាំង
ដល់អស់អ្នកដែលរស់នៅគ្មានញាតិជាទីពឹង ដល់អស់អ្នកដែលធ្វើការហត់នឿយគ្មានពេលសម្រាក
ដល់អស់អ្នកដែលមិនហ៊ាននិយាយពីទុក្ខលំបាករបស់ខ្លួន។
ឱ ព្រះអម្ចាស់អើយ! សូមព្រះអង្គប្រទានពរដល់អស់អ្នកស្លាប់ដោយអត់អាហារ
សូមព្រះអង្គទទួលគាត់ឱ្យចូលក្នុងព្រះរាជ្យព្រះអង្គផង។
ឱ ព្រះអម្ចាស់អើយ! សូមព្រះអង្គកុំឱ្យនរណាម្នាក់នៅលើផែនដីនេះ កើតទុក្ខព្រួយឡើយ។
ឱ ព្រះអម្ចាស់អើយ! សូមព្រះអង្គប្រទានពរដល់អស់អ្នកដែលមានអំណរសប្បាយដែរ
សូមព្រះអង្គការពារពួកគាត់ផង។ ចំពោះកូនវិញ ព្រះអង្គមិនបាច់រំដោះកូន
ឱ្យរួចផុតពីទុក្ខព្រួយទេ តែសូមព្រះអង្គប្រទានកម្លាំងឱ្យកូនអាចស៊ូទ្រាំនឹងទុក្ខព្រួយទាំងនោះវិញ។
សន្តី អេឌីត ស្ដាំង

៣. អធិដ្ឋានពេលល្ងាច

សូមថ្វាយកិច្ចការទាំងអស់របស់សត្វលោក

សូមថ្វាយបង្គំព្រះបិតា
ព្រះបុត្រា និងព្រះវិញ្ញាណដ៏វិសុទ្ធ! អាម៉ែន ។

• បពិត្រព្រះបិតាយើងខ្ញុំ ព្រះអង្គជាព្រះបិតារបស់មនុស្សទាំងអស់ ដ្បិតព្រះអង្គគង់នៅក្នុងជម្រៅចិត្តកូន ហើយក៏គង់នៅក្នុងជម្រៅចិត្តមនុស្សគ្រប់ៗគ្នាដែរ ព្រះអង្គគង់នៅគ្រប់ទីកន្លែង។
• រាល់ល្ងាច កូននៅស្ងៀមស្ងាត់ដើម្បីអធិដ្ឋានទៅរកព្រះអង្គ កូនសូមថ្វាយកិច្ចការទាំងអស់របស់សត្វលោក ថ្វាយទាំងអំណរសប្បាយ និងទាំងទុក្ខលំបាកផង។ កូនសូមបន្លឺសូរស័ព្ទតែមួយថា៖
  « ឱ! ព្រះបិតា … បពិត្រព្រះនាងម៉ារី… សូមកោតសរសើរ…

សូមប្រទានសេចក្តីសុខសាន្ត

សូមថ្វាយបង្គំព្រះបិតា … អាម៉ែន។

• បពិត្រព្រះអម្ចាស់ ក្រោយពីចប់ការងារពេញមួយថ្ងៃ កូនសូមនៅចំពោះព្រះភ័ក្ត្រព្រះអង្គ។
• សូមទ្រង់ព្រះមេត្តាទទួលអ្វីៗដ៏ល្អ ដែលកូនបានប្រព្រឹត្តក្នុងថ្ងៃនេះ សូមអត់ទោសចំពោះអំពើអាក្រក់ដែលកូនបានប្រព្រឹត្តដែរ។
• សូមព្រះអង្គលួងលោមអស់បងប្អូនដែលរងការឈឺចាប់ដោយសារកូន។
• សូមព្រះអង្គប្រទានសេចក្តីសុខសាន្តដល់អស់បងប្អូនដែលរិះគន់ ដាក់ទោសកូន និងចំពោះអស់បងប្អូនដែលបានរាប់អានកូនដែរ ហើយសូមប្រោសប្រទានព្រះវិញ្ញាណរបស់ព្រះអង្គ ថ្នាក់ថ្នមគេ។
• នៅយប់នេះ សូមព្រះអង្គប្រោសប្រណីដល់កូនទាំងអស់គ្នាឱ្យមានសេចក្តីសុខសាន្ត។
• សូមឱ្យកូនទាំងអស់ទទួលទានដំណេកលង់លក់ស្រួលក្នុងពន្លឺរបស់ព្រះអង្គ។ អាម៉ែន ។
  សូមកោតសរសើរ…

សូមព្រះបិតាគង់នៅជាមួយកូន

សូមថ្វាយបង្គំព្រះបិតា
ព្រះបុត្រា និងព្រះវិញ្ញាណដ៏វិសុទ្ធ! អាម៉ែន។

• បពិត្រព្រះបិតាដែលគង់នៅស្ថានដ៏ខ្ពង់ខ្ពស់បំផុត កូនសូមអរព្រះគុណព្រះអង្គ ដោយរួមជាមួយព្រះយេស៊ូគ្រីស្ត
  ជាព្រះបុត្រាជាទីស្រឡាញ់របស់ព្រះអង្គ ដែលគង់នៅជាមួយកូនក្នុងថ្ងៃនេះ។
• កូនសូមធ្វើកាយ និងអ្វីៗទាំងអស់ក្នុងព្រះហស្ថរបស់ព្រះអង្គ។ សូមព្រះបិតាចាត់ទេវទូតមកការពារកូន កុំឱ្យមារកំណាចមានអំណាចលើកូនឡើយ ។ អាម៉ែន ។
• រួមជាមួយព្រះយេស៊ូគ្រីស្ត និងគ្រីស្តបរិស័ទទូទាំងពិភពលោក កូនហ៊ានសូត្រថា៖
  «ឱ! ព្រះបិតាយើងខ្ញុំ…»(ទំព័រ ៥)

ព្រះបិតាជាជម្រករបស់កូន

សូមថ្វាយបង្គំព្រះបិតា
ព្រះបុត្រា និងព្រះវិញ្ញាណដ៏វិសុទ្ធ! អាម៉ែន ។

• បពិត្រព្រះអម្ចាស់! ព្រះអង្គជាជម្រកដ៏រឹងមាំរបស់កូន សូមព្រះអង្គយាងមកសង្គ្រោះកូន សូមព្រះអង្គប្រទានពរដល់អស់អ្នកដែលមានចិត្តស្រឡាញ់អ្នកដទៃ និងដល់អស់អ្នកដែលគ្មាននរណាស្រឡាញ់គេផងដែរ។
• រួមជាមួយព្រះយេស៊ូគ្រីស្ត និងគ្រីស្តបរិស័ទទូទាំងពិភពលោក កូនហ៊ានសូត្រថា៖ « ឱ! ព្រះបិតាយើងខ្ញុំ…» (ទំព័រ ៥)
  «បពិត្រព្រះនាងម៉ារី… សូមកោតសរសើរ…» (ទំព័រ ៦)

ព្រះបិតាជ្រាបគ្រប់កិច្ចការ

• យប់មកដល់ហើយ! បពិត្រព្រះបិតា ព្រះអង្គជ្រាបច្បាស់ហើយថា ថ្ងៃនេះ កូនជួបបញ្ហាជាច្រើន កូនបានទទួលភ្ញៀវ ហើយក៏បានរំលែកសុខទុក្ខពីគេ កូនបានស្តាប់ ហើយក៏បាននិយាយជាមួយគេដែរ។ ពេលនោះ ព្រះអង្គគង់នៅជាមួយកូន គឺដូចជាព្រះអង្គបានទទួលគេតាមរយៈកូន។
• សូមអរព្រះគុណព្រះបិតា ដែលគង់នៅជាមួយកូន មានតែព្រះអង្គទេដែលទ្រង់ជ្រាបគ្រប់កិច្ចការទាំងអស់។ កូនសូមទូលថ្វាយព្រះអង្គនូវពាក្យចុងក្រោយ ក្នុងថ្ងៃនេះ ដោយរួមជាមួយព្រះយេស៊ូគ្រីស្ត និងគ្រីស្តបរិស័ទទូទាំងពិភពលោក ដោយសូត្រថា៖
  «ឱ! ព្រះបិតាយើងខ្ញុំ…» ទំព័រ ៥)

អធិដ្ឋានរួមក្នុងគ្រួសារ

• មានមេគ្រួសារម្នាក់ជាអ្នកណែនាំអធិដ្ឋាន (ឧបមា ឪពុក ឬម្តាយ ឬបង…)។ កូនម្នាក់ដុតទៀន ហើយទាំងអស់គ្នាចាប់ផ្តើមលើកដៃប្រណម្យ៖
• សូមថ្វាយបង្គំព្រះបិតា ព្រះបុត្រា និងព្រះវិញ្ញាណដ៏វិសុទ្ឋ! អាម៉ែន ។
• មេគ្រួសារ៖ «សូមតាំងចិត្តនឹកដល់ព្រះបិតា» បពិត្រព្រះបិតាជាអម្ចាស់! ព្រះអង្គត្រាស ត្រាស់ហៅកូនទាំងអស់គ្នាឱ្យស្គាល់
  និងស្រឡាញ់ព្រះអង្គកាន់តែខ្លាំងឡើងៗជារៀងរាល់ថ្ងៃ ព្រះអង្គក៏ប្រោសកូនទាំងអស់គ្នាឱ្យជួបជុំគ្នា រួមជាមួយព្រះអង្គដែរ។
• សូមទ្រង់ព្រះមេត្តាប្រោសឱ្យកូនទាំងអស់គ្នាចេះស្តាប់ និងធ្វើតាមព្រះបន្ទូលព្រះអង្គ ដូចសន្តបុគ្គលទាំងឡាយដែលធ្វើតាមព្រះហឫទ័យព្រះអង្គដែរ ។
• យើងខ្ញុំសូមសន្តបុគ្គលទាំងឡាយដែលរស់នៅមុនយើងខ្ញុំ ដែលជួយឱ្យយើងខ្ញុំមានជំនឿ សូមជួយអង្វរព្រះបិតាឱ្យយើងខ្ញុំ
  សូមថែរក្សាក្រុមគ្រួសារយើងខ្ញុំផង។
• មេគ្រួសារអង្វរសន្តបុគ្គល៖
• សូមសន្តីម៉ារីជាព្រះមាតាព្រះយេស៊ូ និងសន្តយ៉ូសែប ជាស្វាមី
  បន្ទរ៖ «សូមជួយអង្វរព្រះបិតាឱ្យយើងខ្ញុំផង»
• សូមសន្តទេវទូត មីកាអែល សន្តទេវទូត កាត្រីអែល សន្តទេវទូត រ៉ាហ្វាអែល និងសន្តទេវទូតទាំងឡាយ បន្ទរ
• សូមសន្តីអេលីហ្សាប៊ែត និងសន្តសាការី បន្ទរ
• សូមសន្តយ៉ូហានបាទីស្ត បន្ទរ
• សូមសន្តសិលា និងសន្ត ប៉ូល បន្ទរ
• សូមអស់គ្រីស្តទូតទាំងឡាយ បន្ទរ
• ម្នាក់ៗអាចអង្វរដល់សនៈ សន្តិរបស់ខ្លួន ព្រមទាំងដល់ដូនតា ឬនរណាម្នាក់ដែលចែកឋានទៅហើយបានដែរ។ នៅពេលចុងក្រោយមេគ្រួសារសូត្រថា៖
• សូមសន្តបុគ្គលទាំងអស់
  ជួយអង្វរព្រះបិតាឱ្យយើងខ្ញុំផង។
• ឱ! ព្រះបិតា….។ បពិត្រព្រះនាងម៉ារី ។
• សូមថ្វាយបង្គំព្រះបិតា ព្រះបុត្រា និងព្រះវិញ្ញាណជីវិសុទ្ធ! អាម៉ែន ។

សូមអរព្រះគុណព្រះបិតា

• កូនសូមថ្វាយបង្គំព្រះបិតា ព្រះបុត្រា និងព្រះវិញ្ញាណដ៏វិសុទ្ឋ! អាម៉ែន ។
• បពិត្រព្រះបិតាជាអម្ចាស់
  ថ្ងៃនេះ កូនសូមអរព្រះគុណព្រះអង្គ ចំពោះ (ឪពុក ឬម្តាយ បងប្អូន មិត្ត…) ដែលបាន (ធ្វើអ្វីមួយដ៏ល្អដល់ខ្លួន)
• សូមព្រះអង្គលើកលែងទោសឱ្យកូនដែលបានប្រព្រឹត្តកំហុសចំពោះ (……………)
• កូនសូមទូលព្រះអង្គអំពី «មិត្តរបស់ខ្ញុំ….. ដែលបាន (ធ្វើអ្វីមួយដ៏ល្អដល់ខ្លួន)
• ដោយរួមជាមួយព្រះយេស៊ូគ្រីស្ត និងគ្រីស្តបរិស័ទទូទាំងពិភពលោក កូនសូមសូត្រថា៖
  «ឱ! ព្រះបិតាយើងខ្ញុំ…(ទំព័រ ៥)
  បពិត្រព្រះនាងម៉ារី… (ទំព័រ ៦)
  សូមកោតសរសើរព្រះបិតា … អាម៉ែន ។»

សូមព្រះអម្ចាស់បំភ្លឺចិត្តគំនិតកូន!

– បពិត្រព្រះអម្ចាស់ជាម្ចាស់របស់កូន! កូនមើលផ្លូវដែលនៅពីខាងមុខមិនឃើញ កូនមិនអាចរៀបចំខ្លួនឱ្យបានត្រឹមត្រូវ កូនមិនដឹងថា កូនត្រូវទៅទីណាឡើយ។

• កូនស្គាល់ខ្លួនឯងមិនច្បាស់ទេ នៅពេលកូននិយាយថា កូនជឿ និងដើរតាមព្រះអង្គ ប្រហែលពេលនោះកូនមិនបានប្រព្រឹត្តតាមព្រះហឫទ័យព្រះអង្គនោះទេ។
  – កូនសូមផ្ញើជីវិតលើព្រះអង្គ ហើយកូនក៏ចង់ឱ្យគាប់ព្រះហឫទ័យព្រះអង្គដែរ។ កូនសង្ឃឹមថា អ្វីៗដែលកូនបានប្រព្រឹត្តនោះនឹងគាប់ព្រះហឫទ័យព្រះអង្គ។
• កូនជឿទុកចិត្តលើព្រះអង្គជារៀងរហូត ទោះបីកូនអស់សង្ឃឹមក្តី ដើរក្នុងទីងងឹតក្តី កូនមិនខ្លាចអ្វីសោះ ព្រោះព្រះអង្គគង់នៅជាមួយកូនជានិច្ច ព្រះអង្គមិនទុកកូនចោលឱ្យជួបគ្រោះថ្នាក់ទេ។ ថូម៉ាសមែរតុន
  « – បពិត្រព្រះនាងម៉ារី… – សូមកោតសរសើរ…»(ទំព័រ ៦)

៤. អធិដ្ឋានពេលទទួលទានអាហារ

សូមអរព្រះគុណព្រះជាអម្ចាស់
ចំពោះអាហារថ្ងៃនេះ ហើយសូមប្រទានឱ្យយើង
និងមនុស្សទាំងឡាយ បានបរិភោគរាល់ថ្ងៃ។

*****

អស់មួយជីវិត ខ្ញុំច្រៀងសរសើរព្រះយេស៊ូគ្រីស្ត
ឱ! ព្រះម្ចាស់អើយ មួយជីវិតខ្ញុំ ខ្ញុំលើកតម្កើងតែព្រះនាមនេះ។

*****

អរគុណព្រះម្ចាស់ អរព្រះគុណទាំងអស់គ្នា ព្រោះទ្រង់
ការពារយើងរាល់គ្នាឱ្យផុតទុក្ខ ឱ្យរស់ស្រណុកនៅក្នុងសុខ
សន្តិភាព ហើយផ្តល់កម្លាំងក្នុងជីវិតរស់នៅសព្វថ្ងៃ។

*****

ពេលនេះឱ្យយើងច្រៀង ពេលនេះឱ្យយើងរាំ ពេលនេះ
ឱ្យយើងច្រៀងកោតសរសើរព្រះជាអម្ចាស់ កោតសរសើរ
ព្រះជាអម្ចាស់ យើងលើកតម្កើងព្រះនាមព្រះអង្គ
សូមឱ្យមនុស្ស គ្រប់ជាតិសាសន៍លើកតម្កើងព្រះជាម្ចាស់។

*****

បងប្អូនធ្វើអ្វីក៏ដោយ ចូរធ្វើទាំងអស់ ដើម្បីលើកតម្កើងសិរីរុងរឿងរបស់ព្រះជាម្ចាស់។

*****

• បពិត្រព្រះបិតា! ព្រះអង្គប្រមែប្រមូលកូនទាំងអស់ឱ្យទទួលទានអាហាររួមគ្នា។
• សូមប្រោសឱ្យកូនរួបរួមគ្នាដោយចិត្តស្រឡាញ់ សូមបង្ហាត់ឱ្យកូនចេះចែកអាហារដល់គ្នាទៅវិញទៅមកផង។

*****

• កូនទាំងអស់គ្នាមានអំណរសប្បាយ ដោយបានរួមតុអាហារជាមួយគ្នា សូមឱ្យថ្ងៃណាមួយ កូនទាំងអស់គ្នាបានរួមតុជាមួយគ្នា ក្នុងព្រះរាជ្យរបស់ព្រះអង្គ។
• កូនទាំងអស់គ្នាសូមអង្វរព្រះបិតាដោយរួមជាមួយព្រះយេស៊ូជាព្រះគ្រីស្ត និងជាព្រះអម្ចាស់យើងខ្ញុំ។ អាម៉ែន។

*****

• ពេលនេះ យើងរួមគ្នាអរព្រះគុណព្រះបិតាជាអម្ចាស់ ព្រះអង្គសូមឱ្យយើងរួមគ្នា ឱ្យយើងស្រឡាញ់បងប្អូនទាំងអស់ ឱ្យយើងរួមគ្នាអរព្រះគុណព្រះអង្គ ។

*****

• បពិត្រព្រះបិតា! យើងខ្ញុំសូមអរព្រះគុណចំពោះអាហារ ពេលនេះ។ សូមព្រះអង្គប្រោសប្រទានអាហារដល់អ្នកក្រីក្រទាំងឡាយ
  ហើយក៏សូមប្រមូលយើងខ្ញុំឱ្យរួមតុ ក្នុងព្រះរាជ្យរបស់ព្រះអង្គដែរ។
• យើងខ្ញុំសូមអង្វរព្រះអង្គរួមជាមួយព្រះយេស៊ូជាព្រះគ្រីស្ត និងជាព្រះអម្ចាស់យើងខ្ញុំ។ អាម៉ែន។

*****

• បពិត្រព្រះបិតា ព្រះអង្គស្រឡាញ់ជីវិត ព្រះអង្គចិញ្ចឹមអស់បក្សាបក្សីនៅលើមេឃ និងប្រទានឱ្យផ្កាមានសម្រស់ល្អ និងក្លិនក្រអូបដែរ។
• សូមកោតសរសើរព្រះបិតា ចំពោះអាហារដែលយើងខ្ញុំហៀបនឹងទទួលទាន។ សូមទ្រង់ព្រះមេត្តាប្រទានឱ្យមនុស្សលោកមានអាហារបរិភោគគ្រប់គ្រាន់ ជារៀងរាល់ថ្ងៃផង។
• យើងខ្ញុំសូមអង្វរព្រះអង្គដោយរួមជាមួយព្រះយេស៊ូជាព្រះគ្រីស្ត និងជាព្រះអម្ចាស់យើងខ្ញុំ។ អាម៉ែន។

*****

៥. ខ្ញុំសូមអរព្រះគុណព្រះបិតា

អធិដ្ឋានរួមជាមួយព្រះនាងម៉ារី

– ខ្ញុំមានចិត្តត្រេកអរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ។

• ព្រះអង្គទតមើលមកខ្ញុំជាអ្នកបម្រើដ៏ទន់ទាបរបស់ព្រះអង្គ អំណឹះតទៅមនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន។ ខ្ញុំសូមអរព្រះគុណព្រះបិតា
  • ព្រះដ៏មានឫទ្ធានុភាពបានសម្តែងការដ៏ប្រសើរអស្ចារ្យចំពោះរូបខ្ញុំ ។
• ព្រះនាមរបស់ព្រះអង្គពិតជាវិសុទ្ឋមែន! ព្រះអង្គមានព្រះហឫទ័យមេត្តាករុណាដល់អស់អ្នក ដែលកោតខ្លាចព្រះអង្គ នៅគ្រប់ជំនាន់តរៀងទៅ។
  • ទ្រង់បានសម្តែងឫទ្ធិបារមីកម្ចាត់មនុស្សដែលមានចិត្តឆ្មើងឆ្មៃ ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
• ទ្រង់បានប្រទានទ្រព្យសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
  • ព្រះអង្គបានជួយប្រជារាស្ត្រអ៊ីស្រាអែលជាអ្នកបម្រើរបស់ព្រះអង្គ ហើយតែងតែសម្តែងព្រះហឫទ័យមេត្តាករុណាដល់
    លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសរបស់យើងខ្ញុំឥតភ្លេចសោះឡើយ។

កូនស្រឡាញ់ព្រះបិតា!

– បពិត្រព្រះបិតាជាអម្ចាស់! កូនស្រឡាញ់ព្រះអង្គ កូនមានបំណងស្រឡាញ់ព្រះអង្គតែមួយគត់អស់មួយជីវិត។

• ឱ! ព្រះអម្ចាស់អើយ! ខ្ញុំស្រឡាញ់ព្រះអង្គណាស់ ហើយកូនសូមព្រះអង្គប្រទានព្រះអំណោយទានតែមួយគត់ គឺសូមឱ្យកូនស្រឡាញ់ព្រះអង្គរហូតអស់កល្បជានិច្ចផង។
  • បពិត្រព្រះបិតា! ទោះបីជាកូនមិនអាចអះអាងថា កូនស្រឡាញ់ព្រះអង្គគ្រប់ពេលយ៉ាងណាក៏ដោយ ក៏ក្នុងចិត្តកូនតែងនឹកចង់ស្រឡាញ់ព្រះអង្គគ្រប់ដង្ហើមចេញចូលដែរ។
• បពិត្រព្រះបិតាអើយ! សូមព្រះអង្គប្រោសឱ្យកូនស្រឡាញ់ព្រះអង្គជានិច្ចផង ទោះបីនៅពេលកូនរងទុក្ខលំបាកក៏ដោយ។
• ឱ! ព្រះសង្គ្រោះរបស់ខ្ញុំអើយ! ខ្ញុំស្រឡាញ់ព្រះអង្គ ដ្បិតព្រះអង្គរងទុក្ខលំបាកលើឈើឆ្កាង ដោយសារតែខ្ញុំ។ ខ្ញុំស្រឡាញ់ព្រះអង្គណាស់ ដ្បិតព្រះបិតានាំកូនមកទីនេះ ឱ្យរងទុក្ខលំបាករួមជាមួយព្រះអង្គដែរ។
  សនៈ យ៉ូហាន ម៉ារីរិយ៉ាណេ

សូមកោតសរសើរព្រះបិតា

– បពិត្រព្រះបិតាដ៏ខ្ពង់ខ្ពស់បំផុត ព្រះអង្គមានឫទ្ធានុភាពសព្វប្រការ មានព្រះហឫទ័យមេត្តាករុណាដ៏លើសលុប!

• កូនសូមលើកតម្កើងព្រះអង្គ សូមកោតសរសើរសិរីរុងរឿងរបស់ព្រះអង្គ សូមលើកតម្កើងព្រះអង្គរួមជាមួយសត្វលោកទាំងឡាយ
  ដែលកើតមក។
  – កូនសូមលើកតម្កើងព្រះបិតា ដែលប្រទានបងសុរិយាដ៏ល្អប្រសើរ ឱ្យបញ្ចេញរស្មីភ្លឺថ្លាដ៏ចិញ្ចាចចិញ្ចែងរុងរឿង។
• សូមលើកតម្កើងព្រះបិតា ដែលប្រទានបងចន្ទ្រា និងបងតារាទាំងឡាយឱ្យភ្លឺនៅពេលយប់។
  – សូមលើកតម្កើងព្រះបិតា ដែលប្រទានបងវាយោ និងបងពពកដ៏ត្រជាក់ត្រជុំ។
• សូមលើកតម្កើងព្រះបិតា ដែលប្រទានបងគង្គា ដែលមានប្រយោជន៍ និងមានតម្លៃដ៏ពិសេស។
• សូមលើកតម្កើងព្រះបិតា ដែលប្រទានបងអគ្គី មកបំភ្លឺភាពងងឹតអន្និកា។
• សូមលើកតម្កើងព្រះបិតា ដែលប្រទានឱ្យបងប្អូនអត់ទោសដល់គ្នា ព្រោះខ្លួនស្រឡាញ់ព្រះអង្គ។
• សូមលើកតម្កើងព្រះបិតាដែលប្រទានបងមច្ចុរាជ។
• សូមសត្វលោកទាំងឡាយលើកតម្កើងព្រះបិតា សូមដាក់ខ្លួនបម្រើព្រះអង្គដោយចិត្តស្មោះ។
  សនៈ ហ្វ្រង់ស្វ័រ នៅអាស៊ីសី

កូនសូមលះបង់ខ្លួនថ្វាយព្រះអង្គ

• ឱ! ព្រះបិតាអើយ! កូនសូមលះបង់ខ្លួនថ្វាយព្រះអង្គ កូនក៏សូមធ្វើជីវិតទាំងស្រុងលើព្រះអង្គដែរ។
• ឱ! ព្រះបិតាអើយ! សូមព្រះអង្គប្រព្រឹត្តចំពោះកូនតាមព្រះហឫទ័យព្រះអង្គ ព្រះអង្គប្រព្រឹត្តអ្វីក៏បានដែរ កូនសូមអរព្រះគុណព្រះអង្គជានិច្ច។
• កូនសូមអរព្រះគុណព្រះអង្គចំពោះអ្វីៗទាំងអស់ កូនក៏សូមត្រៀមខ្លួននឹងធ្វើអ្វីៗគ្រប់យ៉ាងដែរ ។ កូនក៏យល់ព្រមនឹងអ្វីៗទាំងអស់ជានិច្ច ឱ្យតែព្រះអង្គសម្រេចព្រះហឫទ័យ ។ កូនមិនចង់បានអ្វីក្រៅពីឱ្យគាប់ព្រះហឫទ័យព្រះអង្គទេ កូនសូមប្រគល់ខ្លួទាំងស្រុងទៅក្នុងព្រះហស្ថព្រះអង្គ។
  • កូនសូមថ្វាយខ្លួនដោយស្មោះអស់ពីដួងចិត្ដ ព្រោះកូនស្រឡាញ់ព្រះអង្គ ហើយព្រោះតែសេចក្តីស្រឡាញ់នោះ កូនត្រូវតែប្រគល់ខ្លួនទាំងស្រុងលើព្រះអង្គ និងផ្ញើជីវិតកូននៅក្នុងព្រះហស្ថព្រះអង្គ ដោយគ្មានស្ទាក់ស្ទើរ។
• កូនសូមប្រគល់ខ្លួនកូនទៅក្នុងព្រះហស្ថព្រះអង្គ ដោយផ្ញើជីវិតទាំងស្រុងលើព្រះអង្គ ព្រោះព្រះអង្គជាព្រះបិតារបស់កូន។

៦. សូមកោតសរសើរព្រះយេស៊ូ

ព្រះគ្រីស្តបន្ទាបព្រះកាយ និងទទួលសិរីរុងរឿង

• ព្រះគ្រីស្តមានឋានៈជាព្រះជាម្ចាស់ ព្រះអង្គពុំបានក្ដោបក្ដាប់ឋានៈដែលស្មើនឹងព្រះជាម្ចាស់នេះ ទុកជាកម្មសិទ្ធិដាច់មុខរបស់ព្រះអង្គឡើយ។ ផ្ទុយទៅវិញ ព្រះអង្គបានលះបង់អ្វីៗទាំងអស់មកយកឋានៈជាអ្នកបម្រើ។
• ព្រះអង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។ ព្រះអង្គបានដាក់ខ្លួនធ្វើតាមព្រះបញ្ជា រហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។
• ហេតុនេះហើយ បានជាព្រះជាម្ចាស់លើកតម្កើងព្រះអង្គឡើងយ៉ាងខ្ពង់ខ្ពស់បំផុត ព្រមទាំងប្រោសប្រទានឱ្យព្រះអង្គមានព្រះនាមប្រសើរលើសអ្វីៗទាំងអស់ ដើម្បីឱ្យអ្វីៗទាំងអស់ទាំងនៅលើមេឃ ទាំងនៅលើផែនដីទាំងនៅក្រោមដី នាំគ្នាក្រាបថ្វាយបង្គំ នៅពេលណាឮព្រះនាមព្រះយេស៊ូ និងឱ្យមនុស្សគ្រប់ភាសាប្រកាសឡើងថា ព្រះយេស៊ូគ្រីស្តជាព្រះអម្ចាស់ ដើម្បីលើកតម្កើងសិរីរុងរឿងព្រះជាម្ចាស់ជាព្រះបិតា។
  តាមភីលីព ២

សូមកោតសរសើរព្រះយេស៊ូគ្រីស្ត

ឱ ព្រះយេស៊ូអើយ! ព្រះអង្គជាតំណាងរបស់ព្រះបិតាដែលយើងមើលពុំឃើញ ព្រះអង្គជារៀមច្បងនៃអ្វីៗទាំងអស់ ដែលព្រះជាម្ចាស់បានសូនមក
ដ្បិតព្រះជាម្ចាស់បានធ្វើអ្វីៗសព្វសារពើក្នុងអង្គព្រះគ្រីស្ត ទាំងនៅស្ថានបរមសុខ ទាំងនៅលើផែនដី ទាំងអ្វីៗដែលមើលឃើញ ទាំងអ្វីៗដែលមើលមិនឃើញ
ទាំងអារក្ខ អ្នកតា ទេវតាព្រៃភ្នំ ម្ចាស់ទឹកម្ចាស់ដី ទាំងវត្ថុសក្តិសិទ្ធិ និងអំណាចនានា ព្រះជាម្ចាស់បានបង្កើតទាំងអស់មក ដោយសារព្រះគ្រីស្ត និងសម្រាប់ព្រះគ្រីស្ត។
ឱ ព្រះយេស៊ូអើយ! ព្រះអង្គមានព្រះជន្មមុនអ្វីៗទាំងអស់ ហើយអ្វីៗទាំងអស់ក៏ស្ថិតនៅរួមគ្នាដោយសារព្រះអង្គដែរ។ ព្រះអង្គជាសិរសានៃព្រះសហគមន៍ដែលជាព្រះកាយរបស់ព្រះអង្គ។

ឱ ព្រះយេស៊ូគ្រីស្តអើយ! ព្រះអង្គជាដើមកំណើតនៃអ្វីៗទាំងអស់ក្នុងចំណោយមនុស្សស្លាប់។ ព្រះអង្គមានព្រះជន្មមុនគេដើម្បីធ្វើជាប្រមុខក្នុងគ្រប់វិស័យ ដ្បិតព្រះជាម្ចាស់សព្វព្រះហឫទ័យឱ្យគ្រប់លក្ខណសម្បត្តិរបស់ព្រះអង្គ ស្ថិតក្នុងព្រះគ្រីស្ត។ ព្រះជាម្ចាស់បានសម្រុះសម្រួលអ្វីៗទាំងអស់នៅលើផែនដី និងនៅស្ថានបរមសុខឱ្យជានានឹងព្រះអង្គវិញ ដោយសារព្រះគ្រីស្ត និងសម្រាប់ព្រះគ្រីស្ត។
ព្រះជាម្ចាស់បានធ្វើឱ្យមានសន្តិភាព ដោយព្រះបុត្រាបង្ហូរព្រះលោហិតនៅលើឈើឆ្កាង។
តាមកូឡូស១

ចូរនឹកដល់ព្រះយេស៊ូគ្រីស្ត

– ចូរនឹកដល់ព្រះយេស៊ូគ្រីស្ត ដែលព្រះបិតាលើកឡើងទៅគង់ខាងស្តាំព្រះអង្គ ព្រះអង្គជាប់ព្រះញាតិវង្សព្រះបាទដាវីឌ។

• ប្រសិនបើយើងស្លាប់ជាមួយព្រះអង្គ យើងក៏មានជីវិតរស់រួមជាមួយព្រះអង្គដែរ។
  • ប្រសិនបើយើងស៊ូទ្រាំ យើងនឹងបានគ្រងរាជ្យជាមួយព្រះអង្គ។
• ប្រសិនបើយើងបដិសេធមិនទទួលស្គាល់ព្រះអង្គ ព្រះអង្គក៏នឹងបដិសេធមិនទទួលស្គាល់យើងវិញដែរ។
  • ប្រសិនបើយើងមិនស្មោះត្រង់ ព្រះអង្គនៅតែស្មោះត្រង់ដដែល ដ្បិតព្រះអង្គមិនអាចបដិសេធព្រះអង្គផ្ទាល់បានឡើយ។
    ២ ធម ២

ព្រះយេស៊ូសូមកុំភ្លេចខ្ញុំ

បន្ទរ៖ ព្រះយេស៊ូ សូមកុំភ្លេចខ្ញុំ ពេលព្រះអង្គយាងមកគ្រងរាជ្យ។ ព្រះយេស៊ូមិនដែលបោះបង់អស់អ្នកដែលកើតទុក្ខឡើយ។ (បន្ទរ)
ព្រះយេស៊ូស្តាប់បង្គាប់ព្រះបិតា រហូតសោយទិវង្គត ។ (បន្ទរ)
ព្រះយេស៊ូត្រូវគេចាក់ទម្លុះព្រះឱរ៉ា និងព្រះហស្តរបស់ព្រះអង្គ ។ (បន្ទរ)
ព្រះយេស៊ូជាព្រះបុត្រា និងជាសិរីរុងរឿងនៃព្រះបិតា ។ (បន្ទរ)

ចូរនឹកដល់ព្រះយេស៊ូគ្រីស្ត

*បន្ទរ ក្រោយឃ្លានីមួយៗ៖ សូមអាណិតអាសូរយើងខ្ញុំ ឬ យើងខ្ញុំកោតសរសើរព្រះយេស៊ូ។

-ព្រះយេស៊ូគ្រីស្ត ជាសិរីរុងរឿងនៃព្រះបិតា – ព្រះយេស៊ូគ្រីស្ត ជាពន្លឺបំភ្លឺជីវិតយើងខ្ញុំ – ព្រះយេស៊ូគ្រីស្ត ជាព្រះបុតាព្រះនាងព្រហ្មចារិនីម៉ារី – ព្រះយេស៊ូគ្រីស្ត មានឫទ្ធានុភាពដ៏មហិមា – ព្រះយេស៊ូគ្រីស្ត មានព្រះហឫទ័យអត់ធ្មត់ក្រៃលែង – ព្រះយេស៊ូគ្រីស្ត ស្រឡាញ់អ្នកមានចិត្តមេត្តាករុណា – ព្រះយេស៊ូគ្រីស្ត ស្រឡាញ់យើងខ្ញុំ – ព្រះយេស៊ូគ្រីស្ត ប្រទានសុខសន្តិភាព – ព្រះយេស៊ូគ្រីស្ត ជាគំរូនៃអំពើល្អទាំងឡាយ – ព្រះយេស៊ូគ្រីស្ត ស្រឡាញ់មនុស្សទាំងអស់ – ព្រះយេស៊ូគ្រីស្ត ជាព្រះអម្ចាស់នៃយើង – ព្រះយេស៊ូគ្រីស្ត ជាទីពឹងពាក់នៃយើង – ព្រះយេស៊ូគ្រីស្តប្រោសប្រណីអស់អ្នកកម្សត់ទុគ៌តទាំងឡាយ – ព្រះយេស៊ូគ្រីស្ត មានព្រះហឫទ័យសប្បុរសយ៉ាងក្រៃលែង – ព្រះយេស៊ូគ្រីស្ត ជាមាគ៌ា និងជាអាយុជីវិតយើង – ព្រះយេស៊ូគ្រីស្ត ជាព្រះអម្ចាស់នៃបុព្វបុរសទាំងឡាយ – ព្រះយេស៊ូគ្រីស្ត ប្រទានឱ្យចិត្តមនុស្សបានបរិសុទ្ឋ – ព្រះយេស៊ូគ្រីស្ត ជាអំណរសប្បាយនៃមរណបុគ្គល – ព្រះយេស៊ូគ្រីស្ត មេត្តាករុណា អាណិតអាសូរយើង – ព្រះយេស៊ូគ្រីស្ត ជាកម្លាំងរបស់យើង – ព្រះយេស៊ូគ្រីស្ត ជាគង្វាលដ៏សប្បុរសនៃមនុស្សទាំងឡាយ។ *****

៧.លើកតម្កើងអគ្គសញ្ញាព្រះកាយព្រះគ្រីស្ត

សូមលើកតម្កើងព្រះកាយព្រះគ្រីស្ត

• ចូរយើងគ្រប់គ្នាឱនកាយក្រាបថ្វាយបង្គំ អគ្គសញ្ញាពិសិដ្ឋថ្លៃថ្លាឧត្តម គឺព្រះកាយានៃព្រះយេស៊ូ
  ទ្រង់ចងសម្ពន្ធនៃមេត្រីថ្មី ទោះបីជាភ្នែកយើងមើលមិនឃើញ តែយើងជឿពិត ថាទ្រង់គង់នៅទីនេះ។
• ចូរយើងថ្លែងឡើងសរសើរតម្កើងព្រះម្ចាស់ គឺព្រះបិតា និងព្រះបុត្រាវិសេស ទាំងព្រះវិញ្ញាណជាព្រះត្រៃឯក ទ្រង់មានសិរីរុងរឿងថ្លាថ្លៃ តេជានុភាពពេញទាំងមេឃដី វិសុទ្ឋអស់កាលជាអង្វែងតរៀងទៅ។ សូមលើកតម្កើងអគ្គសញ្ញាព្រះកាយព្រះគ្រីស្ត ជាភាសាឡាតាំង
  Tantum ergo sacraméntum venerémur cérnui,
  et antiquum documéntum novo cedat ritui,
  praestet fides suppleméntum sénsuum deféctui. Genitóri Genitóque laus et iubilátio,
  salus, honor, virtus quoque sit et benedictio.
  procedénti ab utroque comper sit laudário. Amen.

សូមថ្វាយបង្គំអគ្គសញ្ញាព្រះកាយព្រះគ្រីស្ត

• បពិត្រព្រះបិតា! ដោយអគ្គសញ្ញាអរព្រះគុណ ព្រះអង្គបានប្រោសឱ្យកូនទាំងឡាយរួបរួមជាមួយព្រះបុត្រាដែលបានបូជាព្រះជន្ម និងទទួលព្រះជន្មថ្មី ។
• សូមទ្រង់ព្រះមេត្តាប្រោសប្រទានឱ្យគ្រីស្តបរិស័ទទាំងឡាយ រួមជាព្រះកាយតែមួយដែលជាព្រះសហគមន៍ ដើម្បីធ្វើជាសញ្ញាសម្គាល់បញ្ជាក់ថា ព្រះអង្គស្រឡាញ់មនុស្សលោកពិតប្រាកដមែន។

យើងលើកតម្កើងព្រះបិតា

បពិត្រព្រះបិតាជីវិសុទ្ឋ នៅពិធីជប់លៀងចុងក្រោយបំផុត ព្រះយេស៊ូបានបូជាព្រះជន្មថ្វាយព្រះអង្គ ទុកជាកូនចៀមដ៏ឥតសៅហ្មង។
ពេលកូនទាំងអស់គ្នាចូលរួមថ្វាយសក្ការបូជានេះ ព្រះអង្គប្រទានព្រះជន្មផ្ទាល់របស់ព្រះអង្គឱ្យកូនទាំងអស់គ្នា ជាសញ្ញាសម្គាល់បញ្ជាក់ថា មនុស្សគ្រប់គ្នាអាចចូលរួមក្នុងមហាគ្រួសារតែមួយ ។

សូមលើកតម្កើងព្រះអម្ចាស់

បពិត្រព្រះយេស៊ូជាអម្ចាស់! គេឆ្កាងព្រះអង្គមានទឹក និងព្រះលោហិតហូរមកតាមស្នាមរបួស។ សូមព្រះអង្គទ្រង់ព្រះសណ្តាប់ ពាក្យអង្វររបស់ព្រះសហគមន៍ ជាព្រះមហេសីរបស់ព្រះអង្គ។
បន្ទរ៖ សូមអាណិតអាសូរយើងខ្ញុំ។
ព្រះយេស៊ូ ដែលស្តាប់បង្គាប់ព្រះបិតារហូតដល់សោយទិវង្គត គេយកលំពែងចាក់ទម្លុះព្រះឱរ៉ា ហើយរំព្រះសពនឹងសំពត់ស្នប (បន្ទរ)
ព្រះយេស៊ូ ជាផ្លូវរបស់អស់អ្នកវង្វេង ព្រះអង្គប្រទានព្រះជន្មព្រះបិតាឱ្យយើង (បន្ទរ)
ព្រះយេស៊ូ ជាសេចក្តីសុខសាន្ត និងជាស្ពានមេត្រីរបស់យើង ព្រះអង្គដកបន្ទុកពីអ្នកបាប (បន្ទរ)
ព្រះយេស៊ូ ជាមិត្ដសម្លាញ់របស់មនុស្សទាំងអស់ ព្រះអង្គជារៀមច្បងរបស់អ្នកក្រីក្រ (បន្ទរ)
ព្រះយេស៊ូ ជាព្រះវិហារដ៏វិសុទ្ធរបស់ព្រះជាម្ចាស់ ព្រះអង្គជាទ្វារចូលស្ថានបរមសុខ (បន្ទរ)

ព្រះអម្ចាស់យេស៊ូ ផ្តល់ជីវិតឱ្យយើង

បន្ទរ៖ សូមលើកតម្កើងព្រះកាយនិងព្រះលោហិត។ ព្រះគ្រីស្ត សូមឱ្យយើងអរព្រះគុណនិងនឹករឭកដល់ព្រះអង្គ។
– សូមប្រោសឱ្យយើងខ្ញុំរក្សាជំនឿ និងចូលរួមក្នុងពិធីដ៏អស្ចារ្យរបស់ព្រះអង្គផង។ (បន្ទរ) ព្រះគ្រីស្ត ជាមហាបូជាចារ្យ រួមជាមួយព្រះជាម្ចាស់នៅស្ថានដ៏ខ្ពង់ខ្ពស់បំផុត។
– សូមប្រោសឱ្យអ្នកបម្រើពិធីបុណ្យបានគាប់ព្រះហឫទ័យព្រះអង្គផង។ (បន្ទរ) ព្រះគ្រីស្ត ប្រោសឱ្យអស់អ្នកចូលរួមថ្វាយអភិបូជា
ចូលក្នុងព្រះកាយតែមួយរបស់ព្រះអង្គ។
– សូមឱ្យយើងខ្ញុំរួមគ្នាជាធ្លុងតែមួយផង។ (បន្ទរ) ព្រះគ្រីស្តជាអាហារមកពីព្រះបិតាប្រោសឱ្យយើងជាសះស្បើយ។
– សូមឱ្យយើងខ្ញុំបានសេចក្តីសុខសាន្តទាំងខាងរូបកាយ ទាំងខាងវិញ្ញាណផង។ (បន្ទរ) ព្រះគ្រីស្ត សូមឱ្យយើងទទួលព្រះកាយនិងប្រកាសអំពីព្រះអង្គដែលសោយទិវង្គតនិងទទួលព្រះជន្មថ្មីដ៏រុងរឿង។
– សូមឱ្យយើងខ្ញុំទទួលជីវិតអស់កល្បជានិច្ចផង។ (បន្ទរ)

សូមកោតសរសើរ

សូមកោតសរសើរព្រះបិតាជាព្រះជាម្ចាស់! សូមកោតសរសើរព្រះនាមព្រះអង្គ!
សូមកោតសរសើរព្រះយេស៊ូគ្រីស្តជាព្រះជាម្ចាស់ដ៏ពិតប្រាកដ និងជាមនុស្សដ៏ពិតប្រាកដដែរ!
សូមកោតសរសើរព្រះនាមព្រះយេស៊ូ!
សូមកោតសរសើរព្រះហឫទ័យដ៏វិសុទ្ធរបស់ព្រះអង្គ!
សូមកោតសរសើរព្រះលោហិតដ៏វិសុទ្ធរបស់ព្រះអង្គ!
សូមកោតសរសើរព្រះយេស៊ូដែលគង់នៅជាមួយយើង តាមអគ្គសញ្ញាដ៏វិសុទ្ឋ!
សូមកោតសរសើរព្រះវិញ្ញាណដ៏វិសុទ្ឋដែលលួងលោមចិត្តយើង
សូមកោតសរសើរសន្តីព្រហ្មចារីម៉ារីជាព្រះមាតាព្រះយេស៊ូ!
សូមកោតសរសើរសន្តីម៉ារីដ៏និមលគ្មានជំពាក់បាប!
សូមកោតសរសើរសន្តីម៉ារីយាងឡើងស្ថានបរមសុខ!
សូមកោតសរសើរសន្តយ៉ូសែបជាស្វាមីព្រះនាងម៉ារី! សូមកោតសរសើរព្រះជាម្ចាស់ ដែលប្រោសឱ្យមានទេវទូត និងសន្តបុគ្គលទាំងឡាយ ។

៨. កូនសូមអង្វរព្រះវិញ្ញាណ

សូមយាងមក ឱ! ព្រះវិញ្ញាណ

ឱ! ព្រះវិញ្ញាណ សូមយាងមក ឱ្យយើងពោរពេញ ដោយភ្លើងនៃក្តីស្រឡាញ់! ឱ! ព្រះវិញ្ញាណ សូមយាងមកៗ។

ភ្លើងនៃក្តីស្រឡាញ់

ភ្លើង! ភ្លើង! ភ្លើង!
នៃក្តីស្រឡាញ់មកសណ្ឋិតលើពួកយើង
ឱ្យពួកយើងពោរពេញទៅដោយព្រះវិញ្ញាណដ៏វិសុទ្ឋ។
បន្ទរ៖ ឱ! ព្រះយេស៊ូគ្រីស្តអើយ! ប្រទានភ្លើងឱ្យយើងខ្ញុំ
ឱ! ព្រះយេស៊ូគ្រីស្តអើយ! ប្រទានភ្លើងក្នុងចិត្តយើងខ្ញុំ។

សូមអង្វរព្រះវិញ្ញាណដ៏វិសុទ្ធ

សូមថ្វាយបង្គំព្រះបិតា ព្រះបុត្រា និងព្រះវិញ្ញាណជីវិសុទ្ធ! អាម៉ែន។

• បពិត្រព្រះបិតា! សូមប្រោសប្រទានព្រះវិញ្ញាណមកបំភ្លឺយើងខ្ញុំ ឱ្យប្រព្រឹត្តតែកិច្ចការដែលគាប់ព្រះហឫទ័យព្រះអង្គ និងឱ្យយើងខ្ញុំមានអំណរតរៀងទៅ ដោយរួមជាមួយព្រះយេស៊ូគ្រីស្តជាអម្ចាស់យើងខ្ញុំ។ អាម៉ែន។

សូមអង្វរព្រះវិញ្ញាណ បទពាក្យ ៧

ទទួលព្រះកាយព្រះគ្រីស្ត

ដូចព្រះយេស៊ូប្រៀនប្រដៅយើងខ្ញុំ ហើយតាមបញ្ជារបស់ព្រះអង្គ យើងខ្ញុំហ៊ានសូត្រថា៖ “ឱ! ព្រះបិតាយើងខ្ញុំ”

• នេះជាព្រះកាយព្រះគ្រីស្ត ដែលរំដោះបាបមនុស្សលោកីយ៍ អស់អ្នកដែលព្រះជាម្ចាស់អញ្ជើញឱ្យរួមក្នុងពិធីជប់លៀងនេះ ពេលចុងក្រោយបំផុតនៅស្ថានបរមសុខពិតជាបានសុភមង្គល។
• ឱ! ព្រះអម្ចាស់អើយ ខ្ញុំមិនសមនឹងទទួលព្រះអង្គទេ តែសូមព្រះអង្គមានព្រះបន្ទូលតែមួយព្រះឱស្ឋមក នោះខ្ញុំនឹងបានជាសះស្បើយ។ (ជូនព្រះកាយព្រះគ្រីស្ត)

• ព្រះកាយព្រះគ្រីស្ត
• អាម៉ែន។ (នៅស្ងៀមស្ងាត់បន្តិច)

សូមបងប្អូនតាំងចិត្តអធិដ្ឋាន

• ឱ! ព្រះបិតាជាព្រះជីវិសុទ្ធប្រកបដោយតេជានុភាពសព្វប្រការ ដោយសារបង/ប្អូន…បានទទួលព្រះកាយព្រះលោហិតព្រះយេស៊ូគ្រីស្ត ដែលសោយរាជ្យអស់កល្បជានិច្ច យើងខ្ញុំសូមអង្វរព្រះអង្គ សូមឱ្យបង/ប្អូន…បានជាសះស្បើយជារៀងរហូត អាម៉ែន ។
• ច្រៀង៖ អស់មួយជីវិត។

ពាក្យអង្វរក្នុងបុណ្យសព (១)

ឱ! ព្រះបិតាជាអម្ចាស់យើងខ្ញុំ សូមទ្រង់ព្រះមេត្តាទទួលវិញ្ញាណក្ខន្ធ (បង/ប្អូន/មា/មីង ឈ្មោះ) ដែលទើបនឹងចែកឋានអម្បាញ់មិញនេះ
សូមឱ្យគាត់បានពោរពេញដោយអំណរសប្បាយនៅឯស្ថានបរមសុខរួមជាមួយព្រះអង្គផង ទោះបីគាត់បានប្រព្រឹត្តអំពើបាយ៉ាងណាក្តី
ក៏សូមទ្រង់ព្រះមេត្តាលើកលែងទោសឱ្យគាត់រួចពីបាប តាមព្រះហឫទ័យមេត្តាករុណាដ៏លើសលុបរបស់ព្រះអង្គ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ។ អាម៉ែន។

ពាក្យអង្វរក្នុងបុណ្យសព (២)

ឱ ព្រះបិតាជាអម្ចាស់ ! យើងខ្ញុំសូមផ្ញើជីវិតបង/ប្អូន/តា/យាយ(ឈ្មោះ) របស់ខ្ញុំ ដែលបានទទួលមរណភាពនេះ ទៅព្រះអង្គដោយមាន
ចិត្តសង្ឃឹមថា អស់អ្នកដែលបានជឿលើព្រះគ្រីស្តនឹងបានសម្រាកដោយសុខសាន្ត ហើយនឹងមានជីវិតដ៏រុងរឿងផង ។ សូមទ្រង់ព្រះមេត្តាពង្រឹងជំនឿរបស់យើងខ្ញុំ និងប្រោសប្រទានយើងខ្ញុំនៅថ្ងៃណាមួយឱ្យរួមរស់ជាមួយបង/ ប្អូន/ តា/ យាយ (ឈ្មោះ) ទាំងរួមជាមួយព្រះអង្គផង។ យើងខ្ញុំសូមអង្វរព្រះបិតា តាមរយៈព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ។

ពាក្យដាស់តឿនគ្រីស្តបរិស័ទ

អ្នកណែនាំពិធីអាចនិយាយពាក្យខាងក្រោមនេះ ឬពាក្យផ្សេងក៏បាន៖

• យើងជាគ្រីស្តបរិស័ទជួបជុំគ្នា ចូលរួមរំលែកទុក្ខលោក/អ្នកស្រី(ឈ្មោះ) ដែល(ឪពុក/ម្តាយ/បង/ប្អូន របស់គាត់) ទើបនឹងទទួលមរណភាព។
• សូមព្រះបិតាសម្រាលទុក្ខគាត់ និងពង្រឹងជំនឿរបស់គាត់ក្នុងថ្ងៃដ៏សែនព្រួយនេះផង។ យើងក៏សូមព្រះអង្គទទួលវិញ្ញាណក្ខ័ន្ធ (ឈ្មោះ…) ដែលបានចែកស្ថានទៅ ឱ្យបាននៅជាមួយព្រះអង្គ គឺឱ្យបានប្រកបដោយបរមសុខគ្រប់យ៉ាងតាមព្រះបន្ទូលសន្យារបស់ព្រះអង្គ ។
• យើងខ្ញុំសូមអុជទៀននេះ ទុកជាសញ្ញាសម្គាល់បញ្ជាក់ពីជំនឿរបស់យើងខ្ញុំថា មនុស្សស្លាប់នឹងទទួលជីវិតដ៏រុងរឿងរួមជាមួយព្រះគ្រីស្តអស់កល្បជានិច្ចវិញ ។
  «ឱ!ព្រះបិតា… បពិត្រព្រះនាងម៉ារី… សូមកោតសរសើរ…» (ទំព័រ ៥-៦)

១២. ពាក្យអង្វរមុនពេលធ្វើដំណើរ

សូមព្រះបិតាការពារកូនទាំងអស់គ្នា

ឱ! ព្រះបិតាអើយ! ក្នុងពេលធ្វើដំណើរនេះ សូមព្រះអង្គមេត្តាណែនាំ និងការពារកូនទាំងអស់គ្នាឱ្យរួចផុតពីឧបទ្រពចង្រៃ ព្រមទាំងគ្រោះកាចទាំងឡាយផង។ អាម៉ែន ។

សូមព្រះបិតាប្រណីសន្តោសយើងខ្ញុំ

• បពិត្រព្រះបិតាប្រកបដោយព្រះហឫទ័យមេត្តាករុណាយ៉ាងក្រៃលែង!
• សូមព្រះអង្គជូនដំណើរកូនទាំងអស់គ្នាឱ្យបានដល់ទីដៅដោយសេចក្តីសុខសាន្ត។
• សូមព្រះបិតាការពារកូនទាំងអស់គ្នាកុំឱ្យមានគ្រោះថ្នាក់ កុំឱ្យមានទុក្ខព្រួយអ្វីឡើយ។
• សូមព្រះអង្គអាណិតអាសូរកូនទាំងអស់គ្នា សូមព្រះអង្គមេត្តាស្តាប់ពាក្យអង្វររបស់កូនទាំងអស់គ្នា។
• សូមកោតសរសើរព្រះបិតាជាអម្ចាស់ សូមព្រះអង្គប្រទានពរ និងថែរក្សាកូនទាំងអស់គ្នា។
• សូមព្រះអង្គអាណិតមេត្តា និងប្រណីសន្តោសកូនទាំងអស់គ្នា។
• សូមព្រះបិតាសម្តែងព្រះហឫទ័យសប្បុរស និងប្រទានឱ្យកូនទាំងអស់គ្នាបានប្រកបដោយសេចក្តីសុខសាន្តផង។

ព្រះជាម្ចាស់ស្រឡាញ់យើង

ព្រះជាម្ចាស់ស្រឡាញ់យើង ព្រះអង្គគង់ជាមួយយើង នៅទីណាក៏មិនខ្លាច ទៅឆ្ងាយក៏មិនភ័យ ព្រោះព្រះជាម្ចាស់ស្រឡាញ់យើង។

ចូរនាំគ្នាទៅ

ចូរនាំគ្នាទៅគ្រប់ទីកន្លែង ក្នុងពិភពលោកទាំមូល ហើយប្រកាសដំណឹងល្អ ដល់មនុស្សលោកទាំងអស់។

ទីណាមានមេត្តា

ទីណាមានមេត្តា និងក្តីស្រឡាញ់
ទីណាមានមេត្តា ព្រះជាម្ចាស់គង់ជាមួយយើង។

១៣. ធម៌ប្រកាសជំនឿផ្សេងៗ

ធម៌ប្រកាសជំនឿរបស់គ្រីស្តទូតទាំងឡាយ

• ខ្ញុំជឿលើព្រះជាម្ចាស់ ជាព្រះបិតាដីមានឫទ្ធានុភាពសព្វប្រការ ជាព្រះបង្កើតមេឃ និងដី។
• ខ្ញុំជឿលើព្រះយេស៊ូគ្រីស្ត ជាព្រះបុត្រាតែមួយនៃព្រះបិតា ហើយជាព្រះអម្ចាស់យើងខ្ញុំ។

ព្រះអង្គមានកំណើត ដោយសារព្រះវិញ្ញាណដ៏វិសុទ្ឋ ហើយទ្រង់ប្រសូតពីព្រះនាងព្រហ្មចារិនីម៉ារី ព្រះអង្គសោយទុក្ខលំបាកនៅជំនាន់លោកប៉ុនពីឡាត។ ព្រះអង្គត្រូវគេឆ្កាងសោយទិវង្គត ហើយព្រះសពព្រះអង្គត្រូវគេបញ្ចុះក្នុងរូងថ្មមួយ។ ព្រះអង្គបានយាងចុះទៅស្ថានក្រោម លុះដល់ថ្ងៃទី ៣ ព្រះអង្គមានព្រះជន្មរស់ឡើងវិញ ពីចំណោមមនុស្សស្លាប់ ព្រះអង្គយាងឡើងស្ថានបរមសុខ ទៅគង់ខាងស្តាំព្រះបិតាដ៏មានឫទ្ធានុភាពសព្វប្រការ។ ព្រះអង្គនឹងយាងមកវិញ ដើម្បីវិនិច្ឆ័យមនុស្សទាំងរស់ទាំងស្លាប់។

• ខ្ញុំជឿលើព្រះវិញ្ញាណដ៏វិសុទ្ឋ ខ្ញុំជឿលើព្រះសហគមន៍កាតូលិកដ៏វិសុទ្ឋ និងសហភាពរវាងជនដ៏វិសុទ្ធទាំងឡាយ។ ខ្ញុំជឿថា មានការលើកលែងទោសមនុស្សឱ្យរួចពីបាប ហើយរូបកាយមនុស្សនឹងរស់ឡើងវិញ ព្រមទាំងមានជីវិតរស់នៅអស់កល្បជានិច្ចផង។ អាម៉ែន ។

ខ្ញុំជឿពិតប្រាកដលើព្រះត្រៃឯក

ឱ! ព្រះជាអម្ចាស់អើយ! ខ្ញុំជឿលើព្រះបិតា
ដែលទ្រង់ស្រឡាញ់អស់មនុស្សទាំងឡាយ។
ខ្ញុំជឿលើព្រះយេស៊ូជាព្រះបុត្រាព្រះអង្គ
ដែលទ្រង់សង្គ្រោះមនុស្សលោក។
ខ្ញុំជឿលើព្រះវិញ្ញាណដ៏វិសុទ្ធ ដែលគង់ជាមួយយើងខ្ញុំ
ហើយណែនាំយើងខ្ញុំ ក្នុងព្រះសហគមន៍ព្រះអង្គ។

ខ្ញុំសង្ឃឹមលើព្រះជាម្ចាស់

ឱ ព្រះជាម្ចាស់អើយ!
ខ្ញុំសង្ឃឹមយ៉ាងមាំលើព្រះអង្គ
ដែលទ្រង់ជួយដឹកនាំការពារខ្ញុំគ្រប់ពេលវេលា
ព្រះអង្គមុខជានឹងប្រទានឱ្យខ្ញុំបានរួមជាមួយព្រះយេស៊ូ
គ្រីស្ត នាថ្ងៃព្រះអង្គយាងមកវិញ
តាមព្រះបន្ទូលសន្យារបស់ព្រះអង្គ។

ខ្ញុំជឿព្រះបិតា ព្រះបុត្រា ព្រះវិញ្ញាណដ៏វិសុទ្ធ