ថ្ងៃអង្គារ ទី០៨ ខែកញ្ញា ឆ្នាំ២០២៦

បុណ្យគោរព
ថ្ងៃកំណើតព្រះនាងព្រហ្មចារិនីម៉ារី

សូមចុចទីនេះ

ពេលកូនម្នាក់កើតមក ឪពុកម្តាយតែងអរសប្បាយ និងអរព្រះគុណព្រះជាម្ចាស់ ដែលទ្រង់បានប្រទានជីវិតព្រះអង្គឱ្យមនុស្ស។ ព្រះអង្គពិតជាប្រភពនៃជីវិតមែន។ ព្រះសហគមន៍មានអំណរដោយនឹកពីពេលព្រះនាងម៉ារីកើតមក ព្រោះជាពេលព្រះមាតានៃព្រះបុត្រារបស់ព្រះជាម្ចាស់កើតឡើង។ ព្រះនាងពោរពេញដោយព្រះវិញ្ញាណតាំងពីកំណើតមក។ ព្រះសហគមន៍សន្មតយកថ្ងៃនេះធ្វើជាថ្ងៃនឹកដល់ពេលព្រះនាងកើតមក ព្រោះជាថ្ងៃខួបបុណ្យឆ្លងព្រះវិហារសង់ឡើងនៅកន្លែងគេស្មានថា ជាផ្ទះរបស់សន្តីហាណ្ណា។

សូមថ្លែងលិខិតទី១ របស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូរិនថូស ១ករ ៦,១-១១

បងប្អូនជាទីស្រឡាញ់!
ក្នុងចំណោមបងប្អូន កាលណាម្នាក់មានរឿងទាស់ទែងនឹងម្នាក់ទៀត ហេតុអ្វីបានជាគេហ៊ានរកចៅក្រមដែលជាអ្នកទុច្ចរិតឱ្យកាត់ក្ដី ម្ដេចក៏មិនទុកឱ្យជនដ៏វិសុទ្ធកាត់ក្ដីវិញទៅ! បងប្អូនជ្រាបថា ជនដ៏វិសុទ្ធនឹងវិនិច្ឆ័យពិភព​លោក! ប្រសិនបើបងប្អូនវិនិច្ឆ័យ ពិភពលោកដូច្នេះ ហេតុដូចម្ដេចបានជាបងប្អូនថា​ ខ្លួនមិនសមនឹងអារកាត់រឿងរ៉ាវដ៏តូចបំផុតនេះ? បងប្អូនជ្រាបច្បាស់ថា សូម្បីតែ​ពួកទេវទូតក៏យើងនឹងវិនិច្ឆ័យដែរ ចុះទម្រាំបើរឿងរ៉ាវក្នុងជីវិតនេះវិញ ម្ដេចក៏យើងអារ​កាត់មិនកើត!។ ពេលបងប្អូនមានរឿងប្ដឹងផ្ដល់គ្នាអំពីបញ្ហាក្នុងជីវិតនេះ ម្ដេចក៏បងប្អូនទៅរកពួកអ្នកដែលព្រះសហគមន៍មិនរាប់រកឱ្យមកកាត់ក្ដីដូច្នេះ។ ខ្ញុំនិយាយ​នេះ ដើម្បីឱ្យបងប្អូនខ្មាសខ្លួនឯង។ ក្នុងចំណោមបងប្អូន តើគ្មាននរណាមានប្រាជ្ញាអាចអារកាត់រឿងរ៉ាវដែលកើតឡើងរវាងបងប្អូន សូម្បីតែម្នាក់ក៏គ្មានផងដែរទេឬ? បងប្អូនបែរជាប្ដឹងផ្ដល់គ្នាឯង ហើយថែមទាំងនៅមុខអ្នកមិនជឿទៀតផង! គ្រាន់តែ​បងប្អូនប្ដឹងផ្ដល់គ្នាឯងនោះ វាខុសទាំងស្រុងទៅហើយ!។ ហេតុអ្វីបានជាបងប្អូនមិនស៊ូទ្រាំនឹងអំពើអយុត្តិធម៌? ហេតុអ្វីបានជាមិនព្រមឱ្យគេរឹបយកទ្រព្យរបស់បងប្អូន?។ ផ្ទុយទៅវិញ គឺបងប្អូនទេតើដែលប្រព្រឹត្តអំពើអយុត្តិធម៌ ហើយរឹបអូសយកទ្រព្យពីគេ​ដែលសុទ្ធតែជាបងប្អូនរបស់ខ្លួនថែមទៀត! បងប្អូនជ្រាបច្បាស់ថា អ្នកប្រព្រឹត្តិអំពើ​ទុច្ចរិត ពុំអាចទទួលព្រះរាជ្យព្រះជាម្ចាស់ទុកជាមត៌កបានឡើយ! សូមបងប្អូនកុំយល់​ច្រឡំឱ្យសោះ! អស់អ្នកដែលប្រព្រឹត្តអំពើប្រាសចាកសីលធម៌ ពួកថ្វាយបង្គំព្រះក្លែងក្លាយ ពួកមានសាហាយស្មន់ ពួកជនពាល ពួកអ្នករួមសង្វាសនឹងភេទដូចគ្នា​​ពួកចោរប្លន់ ពួក​លោភលន់ចង់បានទ្រព្យគេ ពួកប្រមឹក ពួកជេរប្រមាថ ពួកប្លន់យកទ្រព្យគេពុំអាចទទួល​ព្រះរាជ្យរបស់ព្រះជាម្ចាស់ទុកជាមត៌កបានឡើយ។ កាលពីដើម បងប្អូនខ្លះក៏ជាមនុស្ស​ប្រភេទនេាះដែរ។ ប៉ុន្ដែ ព្រះជាម្ចាស់បានលាងសម្អាតបងប្អូន! ព្រះអង្គបានប្រោសបង​ប្អូនឱ្យបានវិសុទ្ធ! ទ្រង់ក៏បានប្រោសបងប្អូនឱ្យបានសុចរិតដែរ ក្នុងព្រះនាមព្រះអម្ចាស់​យេស៊ូគ្រីស្ដ និងដោយសារព្រះវិញ្ញាណនៃព្រះជាម្ចាស់របស់យើងរួចស្រេចហើយ។

ទំនុកតម្កើងលេខ ១៥០(១៤៩),១-៦.៩ បទកាកគតិ

ពិធីអបអរសាទរព្រះគម្ពីរដំណឹងល្អតាម យហ ១៥,១៦

សូមថ្លែងព្រះគម្ពីរដំណឹងល្អតាមសន្តលូកា លក ​៦,១២-១៩

នៅគ្រានោះ ព្រះយេស៊ូយាងឡើងទៅលើភ្នំដើម្បីអធិដ្ឋាន។ ព្រះអង្គអធិដ្ឋានពេញ​មួយយប់។ លុះព្រលឹមឡើង ព្រះអង្គត្រាស់ហៅក្រុមសាវ័កមក។ ក្នុងចំណោមសាវ័ក​ទាំងនោះ ព្រះអង្គជ្រើសយកដប់ពីរនាក់ ហើយទ្រង់ប្រទានងារជាទូតរបស់ព្រះអង្គ គឺមានស៊ីម៉ូន ដែលទ្រង់ប្រទានឈ្មោះថា សិលា និងអន់ដ្រេជាប្អូនរបស់គាត់ យ៉ាកុប យ៉ូហាន ភីលីព បាថូឡូមេ ម៉ាថាយ ថូម៉ាស យ៉ាកុបជាកូនលោក​អាល់ផាយ​ ស៊ីម៉ូន​ហៅអ្នកជាតិនិយម យូដាសជាកូនលោកយ៉ាកុប និងយូដាសអ៊ីស្ការីយ៉ុត ដែលនឹងក្បត់​ព្រះអង្គ។ ព្រះយេស៊ូយាងចុះពីលើភ្នំជាមួយសាវ័កទាំងដប់ពីរនាក់ មកប្រថាប់នៅត្រង់កន្លែង​មួយរាបស្មើ។ នៅទីនោះមានសាវ័កជាច្រើន និងមហាជនពីស្រុកយូដា ពីក្រុង​យេរូសាឡឹម ពីក្រុងទីរ៉ូស និងក្រុងស៊ីដូន នៅតាមមាត់សមុទ្រមករង់ចាំព្រះអង្គយ៉ាងកកកុញ។ គេនាំគ្នាមកស្ដាប់ព្រះអង្គ និងសូមព្រះអង្គប្រោសឱ្យជាពីជំងឺ។ រីឯអស់​អ្នកដែលមានខ្មោចចូលក៏បានជាដែរ។ បណ្ដាជនប្រជៀតគ្នាចូលមកពាល់ព្រះយេស៊ូ​ ដ្បិតមានប្ញទ្ធានុភាពចេញពីព្រះអង្គមកប្រោសគេឱ្យជាគ្រប់ៗគ្នា។

​​