ថ្ងៃសុក្រ ទី៣១ ខែឧសភា ឆ្នាំ២០២៥

ពាក្យអធិដ្ឋានពេលចូល

បពិត្រព្រះជាម្ចាស់ដ៏មានតេជានុភាពសព្វប្រការ! ព្រះអង្គសព្វព្រះហឫទ័យបំភ្លឺចិត្តគំនិតនាងម៉ារី ជាព្រះបិតានៃព្រះបុត្រាព្រះអង្គឱ្យ​ទៅសួរសុខទុក្ខនាងអេលីសាបិត។ សូមព្រះអង្គទ្រង់ព្រះមេត្តាប្រោសយើងខ្ញុំឱ្យសុខចិត្តធ្វើតាមសេចក្តីដែលព្រះវិញ្ញាណបង្ហាញឱ្យយើងខ្ញុំប្រព្រឹត្ត។ សូមឱ្យថ្ងៃណាមួយ យើងខ្ញុំលើកតម្កើងព្រះអង្គអស់កល្បជាអង្វែងតរៀងទៅ។

អត្ថបទទី១៖ សូមថ្លែងព្រះគម្ពីរព្យាការីសេផានី សផ ៣,១៤-១៨

ប្រជាជននៃក្រុងស៊ីយ៉ូនអើយ! សូមបន្លឺសំឡេងដោយអំណរ! ជនជាតិអ៊ីស្រាអែលអើយ! ចូរនាំគ្នាស្រែកជ័យឃោស! ប្រជាជនក្រុងយេរូសាឡឹមអើយ! ចូរអរសប្បាយ និងមានចិត្តរីករាយយ៉ាងខ្លាំង! ព្រះជាម្ចាស់បានលើកលែងទោសឱ្យអ្នក ព្រះអង្គបានពង្វាងខ្មាំងសត្រូវចេញពីអ្នក។ ព្រះជាម្ចាស់ជាព្រះមហាក្សត្រនៃជនជាតិអ៊ីស្រាអែលគង់នៅជាមួយអ្នក អ្នកនឹងមិនខ្លាញទុក្ខវេទនាទៀតឡើយ។ នៅថ្ងៃនោះ គេនឹងពោលមកកាន់ក្រុងយេរូសាឡឹមថា កុំខ្លាចអ្វីឡើយ! ក្រុងស៊ីយ៉ូនអើយ! កុំបាក់ទឹកចិត្តឱ្យសោះ!។ ព្រះជាម្ចាស់ជាព្រះរបស់អ្នក ទ្រង់គង់ជាមួយអ្នក ព្រះអង្គជាវីរបុរសដែលមានជ័យជំនះ ព្រោះតែអ្នក ព្រះអង្គមានអំណរសប្បាយជាខ្លាំង។ ព្រះហឫទ័យស្រឡាញ់របស់ព្រះអង្គធ្វើឱ្យអ្នកមានជីវិតថ្មី។​ ព្រោះតែអ្នក ព្រះអង្គច្រៀងយ៉ាងរីករាយបំផុត។ ព្រះអង្គមានព្រះបន្ទូលថា៖ “យើងនឹងប្រមូលអស់អ្នកដែលកើតទុក្ខព្រួយ មិនអាចចូលរួមក្នុងពិធីបុណ្យដ៏សំខាន់ គឺអស់អ្នកដែលនៅឆ្ងាយពីអ្នក ហើយត្រូវអាម៉ាស់មុខ”។

សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងរ៉ូម រម ១២,៩-១៦ខ

បងប្អូនជាទីស្រឡាញ់!
ចូរមានចិត្តស្រឡាញ់ដោយឥតលាក់ពុតឡើយ។ ចូរស្អប់ខ្ពើមអ្វីៗដែលអាក្រក់ ហើយជាប់ចិត្តតែនឹងអ្វីៗដែលល្អវិញ។ ចូរស្រឡាញ់រាប់អានគ្នាទៅវិញទៅមកទុកដូចជាបងប្អូនបង្កើត។ ត្រូវលើកកិត្តិយសគ្នាទៅវិញទៅមកដោយចិត្តគោរព។ ត្រូវឧស្សាហ៍ខ្នះខ្នែង កុំខ្ជិលច្រអូសឡើយ។ ត្រូវបម្រើព្រះអង្គម្ចាស់ដោយចិត្តក្លៀរក្លា។ ចូរសប្បាយរីករាយដោយចិត្តសង្ឈឹម។ ចូរកាន់ចិត្តអត់ធ្មត់ក្នុងពេលមានទុក្ខលំបាក។ ចូរព្យាយាមអធិដ្ឋាន។ ត្រូវជួយទំនុកបម្រុងប្រជាជនដ៏វិសុទ្ធដែលខ្វះខាត ព្រមទាំងទទួលភ្ញៀវដោយរាក់ទាក់ផង។ ត្រូវជូនពរអស់អ្នកដែលបៀតបៀនបងប្អូន ត្រូវជូនពរគេ កុំដាក់បណ្តាសាគេឡើយ។ ចូរអរសប្បាយជាមួយអស់អ្នកដែលអរសប្បាយ ចូរយំសោកជាមួយអស់អ្នកដែលយំសោក។ ត្រូវមានចិត្តគំនិតចុះសំរុងគ្នាទៅវិញទៅមក។ មិនត្រូវមានគំនិតលើកខ្លួនឡើយ តែត្រូវចាប់​ចិត្តនឹងអ្វីៗដែលទន់ទាបវិញ។ មិនត្រូវអួតខ្លួនថា ជាអ្នកមានប្រាជ្ញាឡើយ។

ទំនុកតម្កើងព្យាការីអេសាយ ១២, ២.៤-៦ បទពាក្យ ៧

ពិធីអបអរសាទរព្រះគម្ពីរដំណឹងល្អតាម លក ១,៤៥

សូមថ្លែងព្រះគម្ពីរដំណឹងល្អតាមសន្តលូកា លក ១,៣៩-៥៦

នៅគ្រានោះ នាងម៉ារីប្រញាប់ប្រញាល់ធ្វើដំណើរទៅកាន់ភូមិមួយនៅតំបន់ភ្នំក្នុងស្រុកយូដា។ នាងចូលទៅក្នុងផ្ទះលោកសាការី ហើយជម្រាបសួរនាងអេលីសាបិត។ ពេលនាងអេលីសាបិតឮនាងម៉ារីជម្រាបសួរ ទារកនៅក្នុងផ្ទៃនាងបម្រះឡើង ហើយគាត់ក៏ពោរពេញ ដោយព្រះវិញ្ញាណដ៏វិសុទ្ធ រួចបន្លឺសំឡេងថា៖ «ព្រះជាម្ចាស់ប្រទានពរដល់នាងលើស្ត្រីនានា ហើយព្រះអង្គក៏ប្រទានពរដល់បុត្រនាងដែរ។ តើរូបខ្ញុំមានឋានៈអ្វី បានជាមាតាព្រះអម្ចាស់របស់ខ្ញុំមកសួរសុខទុក្ខខ្ញុំដូច្នេះ?។ កាលខ្ញុំឮពាក្យជម្រាប់សួររបស់នាង ស្រាប់តែកូននៅក្នុងផ្ទៃខ្ញុំបម្រះឡើងដោយអំណរសប្បាយ នាងពិតជាមានសុភមង្គលមែន ព្រោះនាងជឿព្រះបន្ទូលដែលព្រះអម្ចាស់ប្រាប់នាង មុខ​ជាសម្រេចមិនខាន»។ ពេលនោះ នាងម៉ារីថ្លែងឡើងថា៖ «ព្រលឹងខ្ញុំសូមលើកតម្កើងព្រះអម្ចាស់ ខ្ញុំមានចិត្តអំណរយ៉ាងខ្លាំង ព្រោះព្រះជា​ម្ចាស់ជាព្រះសង្គ្រោះរបស់ខ្ញុំ ព្រះអង្គទតមើលមកភាពទន់ទាបនៃអ្នកបម្រើរ​បស់ព្រះអង្គ​ អំណឹះតទៅ មនុស្សគ្រប់ជំនាន់នឹងពោល​ថា ខ្ញុំជាអ្នកមានសុភមង្គលពិតមែន ព្រះដ៏មានឫទ្ធានុភាពបា​នសម្តែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន! ទ្រង់មានព្រះហឫទ័យមេត្តាករុណាដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀតទៅ ទ្រង់សម្តែងឫទ្ធិបារមីកំចាត់មនុស្សដែលមានចិត្តឆ្មើងឆ្មៃ ទ្រង់ទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។ ទ្រង់ប្រទានសម្បត្តិយ៉ាងបរិបូណ៌ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។ ព្រះអង្គបានជួបប្រជារាស្ត្រអ៊ីស្រាអែលជាអ្នកបម្រើរបស់ព្រះអង្គ ហើយតែងតែសម្តែងព្រះហឫទ័យមេត្តាករុណាដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសរបស់យើងឥតភ្លេចសោះឡើយ»។ នាងម៉ារីបានស្នាក់នៅជាមួយនាងអេលីសាបិតអស់​រយៈពេលប្រមាណបីខែ ទើបនាងត្រឡប់ទៅផ្ទះវិញ។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គគាប់ព្រះហឫទ័យនឹងនាងម៉ារីដែលប្រញាប់ប្រញាល់ទៅសួរសុខទុក្ខនាងអេលីសាបិត។ សូមទ្រង់ព្រះមេត្តាទទួលសក្ការបូជាដែលយើងខ្ញុំសូមថ្វាយនៅថ្ងៃនេះ។ សូមប្រោសយើងខ្ញុំឱ្យខិតខំយកចិត្តទុកដាក់នឹងអ្នកដ៏ទៃផង។

ធម៌លើកតម្កើង                                                             

បពិត្រព្រះបិតាដ៏វិសុទ្ធបំផុត! ព្រះអង្គជាព្រះជាម្ចាស់ប្រកបដោយតេជានុភាព និងដែលមានព្រះជន្មគង់នៅអស់កល្បជានិច្ច។ នៅថ្ងៃយើងខ្ញុំនាំគ្នាគោរពព្រះនាងម៉ារី យើងខ្ញុំមានបំណងលើកតម្កើង កោតសសើរព្រះអង្គ។ ព្រះនាងមានគភ៌ ដោយព្រះវិញ្ញាណយាងមកគ្របបាំងព្រះនាង។ ព្រះនាងរក្សាទុកកិត្តិយសជាព្រហ្មចារិនីជាដរាប ហើយព្រះនាងបានប្រសូតពន្លឺដែលស្ថិតនៅអស់កល្បជានិច្ច គឺព្រះយេស៊ូគ្រីស្តជាព្រះអម្ចាស់យើងខ្ញុំ។ អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គល ដើម្បី​លើតម្កើងព្រះអង្គ ដោយសូរស័ព្ទតែមួយថា៖ “ព្រះដ៏វិសុទ្ធ”

ពាក្យអរព្រះគុណ

បពិត្រព្រះជាម្ចាស់ជាព្រះបិតា! យើងខ្ញុំសូមលើកតម្កើងព្រះអង្គ រួមជាមួយព្រះសហគមន៍ទាំងមូល​ ដ្បិតព្រះអង្គ បានប្រព្រឹត្តស្នាព្រះហស្ដដ៏អស្ចារ្យ ដើម្បីសង្គ្រោះមនុស្សលោក។ ដូចលោកយ៉ូហានបានត្រេកអរដោយទទួលស្គាល់ព្រះគ្រីស្តមុនទ្រង់ប្រសូតយ៉ាងណា សូមទ្រង់ព្រះមេត្តាប្រោសយើងខ្ញុំឱ្យទទួលស្គាល់ព្រះអង្គ ដែលគង់នៅជាមួយយើងខ្ញុំ ជារៀងរាល់ថ្ងៃយ៉ាងនេះដែរ។