ថ្ងៃអាទិត្យ ទី១៧ ខែមីនា ឆ្នាំ២០២៤

ពាក្យអង្វរនៅពេលចូល

បពិត្រព្រះអម្ចាស់ជាព្រះបិតា! ព្រះអង្គសព្វព្រះហប្ញទ័យត្រាស់ហៅមនុស្សឱ្យស្គាល់ និងស្រឡាញ់ព្រះអង្គ។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំឱ្យស្គាល់ព្រះហប្ញទ័យស្រឡាញ់របស់ព្រះអង្គ។ សូមប្រោសយើងខ្ញុំ ជាពិសេសបងប្អូនដែលត្រៀមខ្លួនទទួលអគ្គសញ្ញាជ្រមុជទឹកក្នុងបុណ្យចម្លងខាងមុខនេះ ឱ្យទទួលជីវិតថ្មីរួមជាមួយព្រះគ្រីស្ត។

ក្នុងព្រះសហគមន៍ដែលមានអ្នកទទួលអប់រំជំនឿត្រៀមបម្រុងនឹងទទួលអគ្គសញ្ញាជ្រមុជទឹក ក្នុងឱកាសបុណ្យចម្លងខាងមុខនេះ ត្រូវអានព្រះគម្ពីរដំណឹងល្អតាមសន្តយ៉ូហាន ១១,១-៤៥ សម្រាប់ឆ្នាំ «ក» នៅទំព័រ ៣៤១ ទោះបីជាឆ្នាំ «ខ» និងឆ្នាំ«គ» ក៏ដោយ។

អត្ថបទទី១ យរ ៣១,៣១-៣៤

ប្រជាជនអ៊ីស្រាអែលបានផ្តាច់សម្ពន្ធមេត្រីទាំងប៉ុន្មាន ដោយសារអំពើបាបរបស់គេ។ ព្រះជាម្ចាស់សន្យាថានឹងចងសម្ពន្ធមេត្រីថ្មីដោយសារព្រះវិញ្ញាណដែលព្រះជន្មផ្ទាល់ របស់ព្រះអង្គ។ ព្រះយេស៊ូដែលប្រសូត្រជាមនុស្សដូចយើង យាងមកចងសម្ពន្ធមេត្រីនេះ។

សូមថ្លែងព្រះគម្ពីរព្យាការីយេរេមី យរ ៣១,៣១-៣៤

ព្រះអម្ចាស់មានព្រះបន្ទូលថា៖ «នៅគ្រាខាងមុខ យើងនឹងចងសម្ពន្ធមេត្រីជាមួយកូនចៅអ៊ីស្រាអែល និងកូនចៅយូដា។ សម្ពន្ធមេត្រីថ្មីនេះ មិនដូចសម្ពន្ធមេត្រីដែលយើងបានចងជាមួយបុព្វបុរសរបស់ពួកគេ នៅគ្រាដែលយើងដឹកដៃបុព្វបុរសនោះនាំចេញពីស្រុកអេស៊ីប​មកទេ។ ទោះបីយើងជាម្ចាស់របស់ពួកគេក្តី ក៏ពួកគេផ្តាច់សម្ពន្ធមេត្រីនោះដែរ។ រីឯសម្ពន្ធមេត្រីថ្មីដែលនឹងចងជាមួយកូនចៅអ៊ីស្រាអែល​នៅពេលខាងមុខ មានដូចតទៅ ”យើងដាក់វិន័យរបស់យើងនៅក្នុងប្រាជ្ញារបស់ពួកគេ យើងនឹងចារវិន័យនោះក្នុងចិត្តរបស់ពួកគេ យើងនឹងធ្វើជាព្រះរបស់ពួកគេ ហើយពួកគេធ្វើជាប្រជារាស្ត្ររបស់យើង។ គេនឹងលែងបង្រៀនជនរួមជាតិរបស់ខ្លួនគេ ក៏លែងនិយាយប្រាប់បងប្អូនរបស់ខ្លួនថា ”ត្រូវតែស្គាល់ព្រះអម្ចាស់” ទៀតហើយ ព្រោះតាំងពីអ្នកតូចបំផុត រហូតដល់អ្នកធំបំផុត គេនឹងស្គាល់យើងគ្រប់ៗគ្នា ដ្បិតយើងអត់ឱនឱ្យគេចំពោះអំពើទុច្ចរិតដែលគេបានប្រព្រឹត្ត ហើយយើងក៏មិននឹកនាពីអំពើបាបរបស់គេទៀតដែរ»។ នេះជាព្រះបន្ទូលរបស់ព្រះជាម្ចាស់។

ទំនុកតម្កើងលេខ ៥១(៥០), ៣-៤.១២-១៥ បទពាក្យ ៧

អត្ថបទទី ២៖ សូមថ្លែងលិខិតផ្ញើជូនគ្រីស្តបរិស័ទជាតិហេប្រឺ ហប ៥,៧-៩

កាលព្រះគ្រីស្តរស់នៅក្នុងលោកនេះនៅឡើយ ព្រះអង្គបានបន្លឺសំឡេងយ៉ាងខ្លាំង និងបង្ហូរទឹកភ្នែកទូលអង្វរ ទូលសូមព្រះជាម្ចាស់ដែលអាចសង្គ្រោះព្រះអង្គឱ្យរួចពីស្លាប់។ ដោយព្រះគ្រីស្តបានគោរពប្រណិប័តន៍ព្រះជាម្ចាស់ក្នុងគ្រប់កិច្ចការ នោះព្រះជាម្ចាស់ក៏ ប្រោសប្រទានតាមពាក្យទូលអង្វរ។ ថ្វីដ្បិតតែព្រះអង្គជាព្រះបុត្រាក៏ដោយ ព្រះអង្គក៏បានរៀនស្តាប់បង្គាប់ ដោយទ្រង់រងទុក្ខលំបាក។ បន្ទាប់ពីព្រះអង្គបានគ្រប់លក្ខណហើយ ទ្រង់ក៏បានទៅជាប្រភពនៃការសង្គ្រោះដ៏ស្ថិតស្ថេរអស់កល្បជានិច្ច សម្រាប់អ្នកដែលស្តាប់បង្គាប់ព្រះអង្គ។

ពិធីអបអរសាទរព្រះគម្ពីរដំណឹងល្អតាម ទន ១៣០,៧

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១២,២០-៣៣

ក្នុងចំណោមអស់អ្នកដែលឡើងទៅយេរូសាឡឹមក្នុងឱកាសបុណ្យចម្លង មានជនជាតិក្រិកខ្លះដែរ។ គេចូលទៅជិតលោកភីលីព ជាអ្នកភូមិបេតសៃដាក្នុងស្រុកកាលីឡេ ទាំងពោលថា៖ «លោកម្ចាស់! យើងខ្ញុំចង់ជួបលោកយេស៊ូ»។ លោកភីលីពទៅប្រាប់លោកអន់ដ្រេ ហើយលោកអន់ដ្រេ និងលោកភីលីពចូលទៅទូលព្រះយេស៊ូ។ ព្រះយេស៊ូមានព្រះបន្ទូលទៅគេថា៖ «ឥឡូវនេះ ដល់ពេលកំណត់ដែលបុត្រមនុស្សត្រូវសម្តែងសិរីរុងរឿងហើយ។ ខ្ញុំសុំប្រាប់ឱ្យអ្នករាល់គ្នាដឹងច្បាស់ថា គ្រាប់ស្រូវធ្លាក់ដល់ដីហើយ បើមិនងាប់ទេ គ្រាប់នោះនៅតែមួយដដែល។ ផ្ទុយទៅវិញ បើគ្រាប់ស្រូវនោះងាប់ វានឹងបង្កើតផលបានច្រើន។ អ្នកណាស្រឡាញ់ជីវិតរបស់ខ្លួន អ្នកនោះនឹងបាត់បង់ជីវិតទៅ រីឯអ្នកដែលមិនជំពាក់ចិត្តនឹងជីវិតរបស់ខ្លួនក្នុងពិភពលោកនេះទេ នឹងរក្សាជីវិតខ្លួនឱ្យនៅស្ថិតស្ថេរអស់កល្បជានិច្ច។ បើអ្នកណាចង់បម្រើខ្ញុំ អ្នកនោះត្រូវមកតាមខ្ញុំ ខ្ញុំនៅទីណា អ្នកបម្រើរបស់ខ្ញុំក៏នឹងនៅទីនោះដែរ។ បើអ្នកណាបម្រើខ្ញុំ ព្រះបិតានឹងលើក​​កិត្តិយសអ្នកនោះ។ ឥឡូវនេះ ទូលបង្គំរន្ធត់ចិត្តខ្លាំងណាស់ មិនដឹងជានឹងទូលថាដូចម្តេចឡើយ។ ឱព្រះបិតាអើយ! សូមសង្គ្រោះ​​ ទូលបង្គំឱ្យផុតពីទុក្ខលំបាកនៅពេលកំណត់នេះផង!។ ប៉ុន្តែ ទូលបង្គំមកដើម្បីរងទុក្ខលំបាកក្នុងពេលកំណត់នេះហើយ។ ឱព្រះបិតា​អើយ! សូមសម្តែងសិរីរុងរឿងព្រះនាមរបស់ព្រះអង្គឡើង»។ ពេលនោះ មានឮព្រះសូរសៀងពីលើមេឃមកថា៖ «យើងបានសម្តែងសិរីរុងរឿងរបស់យើង ហើយយើងក៏នឹងសម្តែងសិរីរុងរឿងជាថ្មីទៀត»។ បណ្តាជននៅទីនោះបានឮព្រះសូរសៀងក៏ពោលថា៖ «សន្ធឹកផ្គរលាន់»។ អ្នកខ្លះទៀតពោលថា៖ «មានទេវទូតនិយាយមកលោក»។ ព្រះយេស៊ូមានព្រះបន្ទូលថា៖ «សំឡេងនេះបន្លឺឡើងសម្រាប់អ្នករាល់គ្នា មិនមែនសម្រាប់ខ្ញុំទេ។ ឥឡូវនេះ ដល់ពេលកាត់ទោសមនុស្សលោកហើយ! ហើយចៅហ្វាយរបស់មនុស្សលោកនឹងត្រូវបណ្តេញ​ចេញទៅក្រៅ។ រីឯខ្ញុំវិញ កាលណាគេលើកខ្ញុំឡើងពីដី ខ្ញុំនឹងទាញមនុស្សទាំងអស់មកឯខ្ញុំ»។ ព្រះអង្គមានព្រះបន្ទូលដូច្នេះ ដើម្បីប្រាប់គេអំពីរបៀបដែលព្រះអង្គត្រូវសោយទិវង្គត។

សេចក្ដីអត្ថាធិប្បាយគម្ពីរដំណឹងល្អតាមសន្តយ៉ូហាន ១២,២០-៣៣

ជនជាតិក្រិក ជាសាសន៍ដទៃចង់ស្គាល់ព្រះយេស៊ូ។ នេះជាលទ្ធផលដើមដំបូងនៃទុក្ខលំបាករបស់ព្រះយេស៊ូនៅលើឈើឆ្កាង ដែលព្រះអង្គទាក់ទាញមនុស្សទាំងអស់។

ពាក្យពន្យល់៖ សូមអានសេចក្ដីអត្ថធិប្បាយសន្តយ៉ូហាន ទំព័រ ១៧០-១៧៦

– “ជនជាតិក្រិក”៖ ជាតំណាងសាសន៍ដទៃក្រៅពីជនជាតិអ៊ីស្រាអែល គឺជាតំណាងរបស់មនុស្សទាំងអស់ដែលចង់ស្គាល់ព្រះយេស៊ូ ។

– “ដល់ពេលកំណត់”៖ គឺជាពេលដែលព្រះយេស៊ូសម្ដែងឫទ្ធានុភាពនៃព្រះហឫទ័យស្រឡាញ់របស់ព្រះបិតា ដោយព្រះអង្គជាប់លើឈើឆ្កាង ចូលទីវង្គត ហើយមានព្រះជន្មរស់ឡើងវិញ។ ពេលនោះ មនុស្សគ្រប់ជាតិសាសន៍នឹងមករកព្រះយេស៊ូ។

– “ទូលបង្គំរន្ធត់ចិត្តណាស់”៖ លោកយ៉ូហានរៀបរាប់អំពីព្រះយេស៊ូអង្វរព្រះបិតា ដូចអ្នកនិពន្ធគម្ពីរសហចក្ខុចែងអំពីព្រះយេស៊ូអង្វរព្រះបិតានៅក្នុងសួនច្បារកេតសេម៉ានី។ ព្រះយេស៊ូ ភ័យខ្លាចរងទុក្ខវេទនា និងខ្លាចស្លាប់ ប៉ុន្តែ ព្រះអង្គសព្វព្រះហឫទ័យធ្វើតាមព្រះហឫទ័យព្រះបិតា។

– “សូមសម្តែងសិរីរុងរឿងរបស់ព្រះនាមព្រះអង្គឡើង”៖ ដោយព្រះយេស៊ូសោយព្រះទិវង្គត និងព្រះជាម្ចាស់ប្រោសព្រះអង្គឱ្យមានព្រះជន្មរស់ឡើងវិញ ទ្រង់សម្ដែងព្រះហឫទ័យស្រឡាញ់ដ៏លើសលប់របស់ព្រះបិតាចំពោះមនុស្សលោក។ ពាក្យ “សិរីរុងរឿង” សំដៅទៅ​លើឫទ្ធានុភាព និងព្រះហឫទ័យស្រឡាញ់របស់ព្រះបិតា ។

– “ដល់ពេលកាត់ទោសមនុស្សលោកហើយ”៖ មនុស្សលោកនេះសំដៅទៅលើ “អ្នកបាប” គឺអស់អ្នកដែលរឹងរូស ប្រឆាំងនឹងព្រះជាម្ចាស់។

– “ចៅហ្វាយរបស់មនុស្សលោក”៖ មារសាតាំងពុំមែនជាចៅហ្វាយមនុស្សលោកទេ គឺជាចៅហ្វាយនៃអ្នកបាបដែលចុះចូលក្រោមអំណាចរបស់វា។

– “កាលណាគេលើកខ្ញុំពីដីឡើង”៖ គឺពេលព្រះអង្គជាប់លើឈើឆ្កាង និងពេលព្រះជាម្ចាស់លើកព្រះយេស៊ូឡើងស្ថានបរមសុខ។

អត្ថន័យសម្រាប់យើងសព្វថ្ងៃ

– មានមនុស្សជាច្រើនចង់ស្គាល់ព្រះយេស៊ូ អ្នកខ្លះស្វែងរកដោយដឹងខ្លួន អ្នកខ្លះស្វែងរកដោយមិនដឹងខ្លួន។ យើងជាគ្រីស្តបរិស័ទមានមុខងារណែនាំគេឱ្យស្គាល់ព្រះអង្គ។

– ព្រះយេស៊ូបានបូជាព្រះជន្មព្រះអង្គដោយគ្មាននរណាបង្ខំ ដើម្បីរំដោះមនុស្សឱ្យរួចពីបាប។ ព្រះអង្គហៅរកអ្នកដែលចង់បំរើព្រះអង្គ ឱ្យបូជាជីវិតតាមព្រះអង្គ។

– ព្រះយេស៊ូទទួលសិរីរុងរឿងដោយព្រះអង្គស្រឡាញ់ព្រះបិតាហួសកំរិត នៅពេលទ្រង់រងទុក្ខលំបាក និងសោយទិវង្គត។ ដូច្នេះ ព្រះអង្គឈ្នះសេចក្ដីអាក្រក់គ្រប់យ៉ាង និងទាក់ទាញចិត្តថ្លើមមនុស្សទាំងអស់ឱ្យទៅរកព្រះអង្គ។

ពាក្យថ្វាយតង្វាយ

បពិត្រព្រះបិតាដ៏មានតេជានុភាពសព្វប្រការ! ព្រះអង្គមិនសព្វព្រះហប្ញទ័យឱ្យមនុស្សបាបវិនាសអន្តរាយឡើយ គឺឱ្យគេប្រែចិត្ត និងមានជីវិតវិញ។ យើងខ្ញុំគ្មានអ្វីតបស្នងព្រះគុណព្រះអង្គដែលស្រឡាញ់មនុស្សលោកដល់កម្រិតនេះ។ សូមថ្វាយកាយ វាចា ចិត្ត រួមជាមួយសក្ការបូជារបស់ព្រះយេស៊ូគ្រីស្ត ដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ធម៌លើកតម្កើង កាលណាអានព្រះគម្ពីរដំណឹងល្អតាមសន្តៈយ៉ូហាន ១១,១-៤៥

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង យើងខ្ញុំសូមលើកតម្កើងសិរីរុងរឿងរបស់ព្រះអង្គ និងសូមអរព្រះគុណព្រះអង្គ ដោយរួមជាមួយព្រះយេស៊ូគ្រីស្ត ជាព្រះអម្ចាស់យើងខ្ញុំ។ ព្រះគ្រីស្តបង្ហាញធម៌មេត្តាករុណាដ៏លើសលប់របស់ព្រះអង្គឱ្យយើងខ្ញុំស្គាល់។ ទ្រង់យំសោកនៅឯផ្នូរលោកឡាសារជាមិត្តសម្លាញ់ ទ្រង់មានព្រះហប្ញទ័យអាណិតអាសូរដល់មនុស្សបាបជានិច្ច មិនប្រកាន់ទោសនរណាឡើយ។ ទ្រង់សព្វព្រះហប្ញទ័យប្រោសប្រទានជីវិតថ្មីឱ្យអស់អ្នកដែលវិលមករកព្រះអង្គវិញ។
អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់អ្នកជឿសង្ឃឹមលើព្រះអង្គ ដើម្បីលើកតម្កើងសិរីរុងរឿងរបស់ព្រះអង្គ ដោយប្រកាសថា៖ ”ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”។

ពាក្យអរព្រះគុណ

បពិត្រព្រះបិតាដ៏មានតេជានុភាពសព្វប្រការ! ព្រះអង្គបានប្រទានព្រះកាយ និងព្រះលោហិតរបស់ព្រះគ្រីស្តឱ្យយើងខ្ញុំទទួលទាន។ សូមទ្រង់ព្រះមេត្តាពង្រឹងជំនឿរបស់យើងខ្ញុំ និងរបស់បងប្អូនដែលត្រៀមខ្លួនទទួលអគ្គសញ្ញាជ្រមុជទឹក ក្នុងឱកាសបុណ្យចម្លង