ពាក្យអង្វរពេលចូល

បពិត្រព្រះជាម្ចាស់ដ៏មានតេជានុភាពសព្វប្រការ! ព្រះអង្គសព្វព្រះហប្ញទ័យប្រទានជីវិតឱ្យមនុស្សលោក ដើម្បីឱ្យយើងខ្ញុំស្គាល់ ស្រឡាញ់ និងបម្រើព្រះអង្គ ព្រមទាំងឱ្យមានសុភមង្គលយ៉ាងពេញលេញផង! ក្នុងរដូវអប់រំពិសេស សូមទ្រង់ព្រះមេត្តាបំភ្លឺចិត្តគំនិតយើងខ្ញុំ ឱ្យស្គាល់ព្រះយេស៊ូគ្រីស្តកាន់តែច្បាស់ឡើងៗ ព្រោះមានតែព្រះយេស៊ូមួយព្រះអង្គគត់ ដែលបង្ហាញមាគ៌ានាំឆ្ពោះទៅកាន់ព្រះអង្គ។

អត្ថបទទី១៖ សូមថ្លែងព្រះគម្ពីរកំណើត កណ ៩,៨-១៥

ក្រោយពីទឹកជន់លិចផែនដី ព្រះជាម្ចាស់មានព្រះបន្ទូលមកលោកណូអេ និងកូនប្រុសទាំងបីរបស់លោកថា៖ «យើងចងសម្ពន្ធមេត្រីជាមួយអ្នករាល់គ្នា និងជាមួយពូជពង្សអ្នករាល់គ្នាតរៀងទៅ។ យើងក៏ចងសម្ពន្ធមេត្រីជាមួយសត្វមានជីវិតទាំងប៉ុន្មានដែលនៅជាមួយអ្នករាល់គ្នាដែរ មានបក្សាបក្សី មានសត្វស្រុកសត្វព្រៃ ពោលគឺសត្វទាំងអស់ដែលចេញពីសំពៅជាមួយអ្នករាល់គ្នា។ យើងចងសម្ពន្ធមេត្រីជាមួយអ្នករាល់គ្នាដូចតទៅ គ្មានសត្វលោកណាមួយត្រូវបាត់បង់ជីវិតដោយទឹកជន់លិចទៀតឡើយ ហើយក៏នឹងលែងមានទឹកជន់​លិចបំផ្លាញផែនដីទៀតដែរ។ ព្រះជាម្ចាស់មានព្រះបន្ទូលទៀតថា៖ «នេះជាសញ្ញាសម្គាល់នៃសម្ពន្ធមេត្រីដែលយើងចងជាមួយអ្នករាល់គ្នា និងជាមួយសត្វលោកទាំងឡាយដែលនៅជាមួយអ្នករាល់គ្នាគ្រប់ជំនាន់តរៀងទៅ គឺយើងដាក់ធ្នូរបស់យើងនៅលើមេឃ ធ្វើជាសញ្ញាសម្គាល់នៃសម្ពន្ធមេត្រីដែលយើងចងជាមួយនឹងសត្វលោកនៅលើផែនដី។ ពេលណាយើងប្រមូលពពកឱ្យមូលផ្តុំគ្នាពីលើផែនដីហើយពេលណាឥន្ទធនូលេចចេញនៅកណា្តលពពក ពេលនោះ យើងនឹងនឹកដល់សម្ពន្ធមេត្រីដែលយើងបានចងជាមួយអ្នករាល់គ្នា និងជាមួយសត្វលោកទាំងឡាយ។ ទឹកក៏លែងជន់លិចបំផ្លាញសត្វលោកទាំងអស់ឱ្យវិនាសទៀតហើយ»។

ទំនុកតម្កើងលេខ ២៥ (២៤),៤-៩ បទពាក្យ ៧

អត្ថបទទី២៖ សូមថ្លែងលិខិតទី ១ របស់លោកសិលា ១ សល ៣,១៨-២២

បងប្អូ​នជាទីស្រលាញ់!
ព្រះគ្រីស្តសោយទិវង្គតម្តងជាស្រេច ព្រោះតែបាប គឺព្រះដ៏សុចរិតបានសោយទិវង្គតជាប្រយោជន៍ដល់មនុស្សទុច្ចរិត ដើម្បីនាំបងប្អូនទៅថ្វាយព្រះជាម្ចាស់។ កាលព្រះអង្គរស់នៅក្នុងឋានៈជាមនុស្ស ទ្រង់ត្រូវគេធ្វើគុត តែព្រះជាម្ចាស់បានប្រោសព្រះអង្គឱ្យមានព្រះជន្មដោយសារព្រះវិញ្ញាណវិញ។ នៅពេលនោះ ព្រះអង្គបានយាងទៅប្រកាសព្រះបន្ទូលដល់វិញ្ញាណក្ខន្ធដែលជាប់ឃុំឃាំង ជាវិញ្ញាណក្ខន្ធរបស់អ្នកបះបោរប្រឆាំងនឹងព្រះជាម្ចាស់កាលពីសម័យដើម ក្នុងពេលដែលព្រះអង្គអត់ធ្មត់នៅសម័យលោកណូអេសង់សំពៅធំ។ មានមនុស្សមួយចំនួនតូចដែលបានចូលទៅក្នុងសំពៅ និងបានរួចជីវិតដោយសារទឹក គឺមានប្រាំបីនាក់ប៉ុណ្ណោះ។ នេះជានិមិត្តរូបនៃពិធី ជ្រមុជទឹកដែលសង្រ្គោះបងប្អូននាបច្ចុប្បន្នកាល។ តែពិធីជ្រមុជទឹកមិនមែនជាពិធីលាងជម្រះរូបកាយនោះទេ គឺជាការថ្វាយជីវិតទាំង​ស្រុងទៅព្រះជាម្ចាស់ ដោយមនសិការល្អវិញ។ ពិធីជ្រមុជទឹកនេះសង្រ្គោះបងប្អូនដោយរួមជាមួយព្រះយេស៊ូគ្រីស្តដែលមានព្រះជន្មថ្មីនោះ។ ព្រះអង្គក៏យាងឡើងទៅស្ថានបរមសុខ គង់នៅខាងស្តាំព្រះជាម្ចាស់ ហើយពួកទេវទូត ព្រមទាំងវត្ថុស័ក្តិសិទ្ធនានា អារក្សអ្នកតាចុះចូលនឹងព្រះអង្គទាំងអស់។

ពិធីអបអរសាទរព្រះគម្ពីរដំណឹងល្អតាម មថ ៤,៤

សូមថ្លែងព្រះគម្ពីរដំណឹងល្អតាមសន្តម៉ាកុស មក ១,១២-១៥

ក្រោយពីព្រះយេស៊ូទទួលពិធីជ្រមុជទឹក ព្រះវិញ្ញាណនាំព្រះអង្គឆ្ពោះទៅវាលរហោស្ថាន។ ព្រះអង្គគង់នៅវាលរហោស្ថានអស់រយៈពេលសែសិបថ្ងៃ ទាំងត្រូវមារសាតាំងល្បួងព្រះអង្គគង់នៅជាមួយសត្វព្រៃ ហើយមានពួកទេវទូតបម្រើព្រះអង្គផង។ ក្រោយគេចាប់លោកយ៉ូហានបាទីស្តយកទៅឃុំឃាំង ព្រះយេស៊ូយាងទៅស្រុកកាលីឡេ ហើយទ្រង់ប្រកាសដំណឹងល្អរបស់ព្រះជាម្ចាស់។ ព្រះអង្គមានព្រះបន្ទូលថា៖ «ពេលកំណត់មកដល់ហើយ រីឯព្រះរាជ្យរបស់ព្រះជាម្ចាស់ក៏មកជិតបង្កើយដែរ។ ចូរនាំគ្នាប្រែចិត្តគំនិត ហើយជឿដំណឹងល្អចុះ!»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គពិតជាម្ចាស់ជីវិតរបស់យើងខ្ញុំ! ព្រះអង្គក៏បានប្រោសប្រទានអ្វីៗទាំងអស់ឱ្យយើងខ្ញុំប្រើប្រាស់! ដោយយើងខ្ញុំគ្មានអ្វីតបស្នងព្រះគុណព្រះអង្គ សូមទ្រង់ព្រះមេត្តាទទួលកាយ វាចា ចិត្តយើងខ្ញុំទុកជាតង្វាយ រួមជាមួយនឹងសក្ការបូជារបស់ព្រះយេស៊ូគ្រីស្ត ដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ធម៌លើកតម្កើង

បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែង! យើងខ្ញុំសូមលើកតម្កើងសិរីរុងរឿងរបស់ព្រះអង្គ និងសូមអរព្រះគុណព្រះអង្គជានិច្ច ដោយរួមជាមួយព្រះគ្រីស្តជាអម្ចាស់យើងខ្ញុំ។ មារបានប្រើឧបាយកលគ្រប់យ៉ាងមកល្បួងព្រះយេស៊ូ តែព្រះយេស៊ូផ្ចាញ់​វាឱ្យរាងចាលវិញ។ ព្រះយេស៊ូបានបង្ហាញមាគ៌ាឱ្យយើងខ្ញុំជៀសផុតពីអំពើបាប ដោយផ្ញើជីវិតលើព្រះអង្គគ្រប់ពេលវេលា។ ទ្រង់ក៏ប្រទានព្រះវិញ្ញាណឱ្យយើងខ្ញុំមានចិត្តក្លាហាន ក្នុងការធ្វើដំណើរទៅកាន់ព្រះអង្គ។
អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយ ដើម្បីលើកតម្កើងសិរីរុងរឿងរបស់ព្រះអង្គ ដោយប្រកាសថា “ព្រះដ៏វិសុទ្ធ!“។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានព្រះកាយ និងព្រះលោហិតរបស់ព្រះគ្រីស្តឱ្យយើងខ្ញុំ។ ដោយយើងខ្ញុំរួមជាមូយព្រះគ្រីស្តដូច្នេះ យើងខ្ញុំទទួលជីវិតថ្មី មានជំនឿ និងសេចក្តីសង្ឃឹមមាំមួន។ សូមទ្រង់ព្រះមេត្តាប្រោសយើងខ្ញុំឱ្យស្គាល់ព្រះគ្រីស្តជាព្រះបន្ទូលព្រះអង្គកាន់តែច្បាស់ឡើងៗផង។