ពាក្យអធិដ្ឋានពេលចូល

បពិត្រព្រះអម្ចាស់ប្រកបដោយឫទ្ធានុភាពសព្វប្រការ! ព្រះអង្គបានសង្គ្រោះមនុស្សលោក ដោយប្រោសស្ត្រីព្រហ្មចារីម្នាក់ឱ្យអាចបង្កើតបុត្របាន។ សូមទ្រង់ព្រះមេត្តាជួយយើងខ្ញុំឱ្យទទួលព្រះបុត្រាដែលជាប្រភពនៃជីវិតថ្មីដោយចិត្តជឿ។ សូមបំភ្លឺចិត្តគំនិតយើងខ្ញុំឱ្យយល់អំពីតម្លៃដ៏ថ្លៃថ្នូរនៃជីវិតរបស់យើងខ្ញុំ ជាបុត្រធីតារបស់ព្រះអង្គផង។

អត្ថបទទី១៖ សូមថ្លែងព្រះគម្ពីរជំរឿនប្រជាជន ជរ ៦,២២-២៧

ព្រះអម្ចាស់មានព្រះបន្ទូលមកកាន់លោកម៉ូសេថា៖ «ចូរប្រាប់អរ៉ុន និងកូនចៅរបស់គាត់ ឱ្យជូនពរជនជាតិអ៊ីស្រាអែលដូចតទៅ: “សូមព្រះអម្ចាស់ប្រទានពរ និង​ថែរក្សាអ្នក។ សូមព្រះអម្ចាស់ទតមកអ្នកដោយព្រះហឫទ័យមេត្តាករុណា សូមព្រះអង្គប្រណីសន្ដោសអ្នក។ សូមព្រះអម្ចាស់សម្ដែងព្រះហឫទ័យសប្បុរសចំពោះអ្នក និងប្រទានឱ្យអ្នកបានប្រកបដោយសេចក្ដីសុខសាន្ត”។ ពេលពួកបូជាចារ្យឱ្យ​ពរជនជាតិអ៊ីស្រាអែលក្នុងនាមយើងដូច្នេះ យើងនឹងឱ្យពរពួកគេ»។

ទំនុកតម្កើងលេខ ៦៧ (៦៦) ,២-៣.៥.៧-៨ បទពាក្យ ៧

អត្ថបទទី២៖ សូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទស្រុកកាឡាទី កាឡ ៤,៤-៧

បងប្អូនជាទីស្រឡាញ់ទាំងឡាយ! កាលពេលកំណត់បានមកដល់ហើយ ព្រះជាមា្ចស់ចាត់ព្រះបុត្រារបស់ព្រះអង្គឱ្យមកប្រសូតចេញមកពីមនុស្សស្រី។ ព្រះបុត្រានេះស្ថិតនៅក្រោមអំណាចនៃធម្មវិន័យ ដើម្បីលោះអស់អ្នកស្ថិតក្រោមអំណាចនៃធម្មវិន័យ និងដើម្បីឱ្យយើងទទួលឋានៈជាបុត្រធីតារបស់ព្រះបិតា។ បងប្អូនពិតជាបុត្រធីតារបស់ព្រះជាម្ចាស់មែន ព្រោះព្រះអង្គបានចាត់ព្រះវិញ្ញាណរបស់ព្រះបុត្រាឱ្យយាងមកសណ្ឋិតក្នុងចិត្តយើង គឺព្រះវិញ្ញាណនេះហើយ ដែលបន្លឺព្រះសូរសៀងថា “អប្បា” “ឱព្រះបិតា អើយ!”។ ហេតុនេះ អ្នកមិនមែនជាអ្នកបម្រើទៀតឡើយ គឺជាបុត្រធីតារបស់ព្រះអង្គវិញ។ បើអ្នកជាបុត្រធីតាមែន អ្នកក៏ត្រូវទទួលមត៌កដែលព្រះជាម្ចាស់នឹងប្រទានឱ្យនោះដែរ។

ពិធីអបអរសាទរព្រះគម្ពីរដំណឹងល្អតាម យហ ១,១-២

អាលេលូយ៉ា! អាលេលូយ៉ា!
នៅជំនាន់ដើម ព្រះជាម្ចាស់មានព្រះបន្ទូលមកកាន់បុព្វបុរសដោយសារអស់លោកព្យាការី។ តែឥឡូវនេះ ព្រះអង្គមានព្រះបន្ទូលមកយើងដោយសារព្រះបុត្រា!។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ២,១៦-២១

កាលពួកគង្វាលនាំគ្នាធ្វើដំណើរទៅដល់ភូមិបេថ្លេហិមហើយ គេឃើញនាងម៉ារី លោកយ៉ូសែបព្រមទាំងព្រះឱរសផ្ទុំក្នុងស្នូកសត្វ។ ពេលពួកគង្វាលឃើញព្រះឱរស គេរៀបរាប់អំពីសេចក្តីដែលទេវទូតបានប្រាប់អំពីព្រះឱរសនេះ។ អស់អ្នកដែលឮពួកគង្វាលនិយាយ នឹកឆ្ងល់យ៉ាងខ្លាំង។ រីឯនាងម៉ារីវិញ នាងចងចាំហេតុការណ៍ទាំងនេះទុកក្នុងចិត្តព្រមទាំងត្រិះរិះពិចារណាថែមទៀតផង។ បន្ទាប់មក ពួកគង្វាលត្រឡប់ទៅវិញទាំងច្រៀងលើកតម្កើងសិរីរុងរឿងរបស់ព្រះជាម្ចាស់ ព្រោះហេតុការណ៍ទាំងអស់ដែលគេបានឃើញ និងបាន​ឮ ស្របតាមសេចក្តីដែលទេវទូតបានប្រាប់គេឥតមានខ្វះត្រង់ណាឡើយ។ ប្រាំបីថ្ងៃកន្លងមក ដល់ពេលកំណត់ធ្វើពិធីកាត់ស្បែកថ្វាយព្រះឱរស គេថ្វាយព្រះនាមថា “យេស៊ូ” ជាព្រះនាមដែលទេវទូតបានប្រាប់នាងម៉ារីមុនពេលមានផ្ទៃពោះ។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គជាប្រភពនៃព្រះអំណោយទានគ្រប់យ៉ាង ព្រះអង្គក៏សព្វព្រះហឫទ័យឱ្យយើងខ្ញុំយកព្រះអំណោយទាននេះខ្លះមកថ្វាយព្រះអង្គ ដើម្បីអរព្រះគុណព្រះអង្គ។ សូមទ្រង់ព្រះមេត្តាតម្រែតម្រង់ចិត្តយើងខ្ញុំ ឱ្យសុខចិត្តរួមស្លាប់ រួមរស់ជាមួយព្រះយេស៊ូ ជាព្រះបុត្រាព្រះអង្គ និងជាព្រះអម្ចាស់យើងខ្ញុំ ដែលទ្រង់មានព្រះជន្មគង់នៅ និងសោយរាជ្យរួមជាមួយព្រះអង្គ អស់កល្បជាអង្វែងតរៀងទៅ។

ធម៌លើកតម្កើង

បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែង! យើងខ្ញុំសូមអរព្រះគុណព្រះអង្គ។ ព្រះអង្គបានប្រោសនាងព្រហ្មចារីម៉ារី ឱ្យមានគភ៌ដោយតេជានុភាពនៃព្រះវិញ្ញាណ ហើយប្រសូតបានបុត្រមួយ ព្រមទាំងរក្សាទុកនូវកិត្យានុភាពជាស្រ្តីព្រហ្មចារីជាដរាប។ ព្រះនាងប្រសូតព្រះយេស៊ូគ្រីស្តជាអម្ចាស់យើងខ្ញុំ និងជាពន្លឺដែលបំភ្លឺពិភពលោកអស់កល្បជានិច្ច។ ដោយព្រះអង្គលើកតម្កើងព្រះនាងម៉ារីដូច្នេះ ព្រះអង្គក៏បានប្រគល់កិត្តិយសដ៏ខ្ពង់ខ្ពស់ឱ្យយើងខ្ញុំទាំងអស់គ្នាដែរ។ អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយ ដើម្បីលើកតម្កើងសិរីរុងរឿងរបស់ព្រះអង្គ ដោយប្រកាសថា៖ “ព្រះដ៏វិសុទ្ធ!”

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានព្រះកាយព្រះគ្រីស្ត នៅថ្ងៃដែលយើងខ្ញុំនាំគ្នាលើកតម្កើងព្រះនាងព្រហ្មចារីម៉ារី ជាព្រះមាតានៃព្រះបុត្រាដ៏ជាទីស្រឡាញ់របស់ព្រះអង្គ និងជាព្រះមាតានៃព្រះសហគមន៍ផង។ សូមទ្រង់ព្រះមេត្តាបំភ្លឺចិត្តគំនិតគ្រីស្តបរិស័ទទូទាំងសកលលោក សូមប្រោសយើងខ្ញុំឱ្យខិតខំរួមគ្នាកសាងសន្តិភាពផង។