ថ្ងៃសុក្រ ទី២២ ខែធ្នូ ឆ្នាំ២០២៣

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា!។ ព្រះអង្គមិនសព្វព្រះហឫទ័យបណ្តោយមនុស្សលោកឱ្យវិនាសអន្តរាយឡើយ គឺទ្រង់សព្វព្រះហឫទ័យឱ្យមនុស្សមានជីវិត ដោយសារព្រះបុត្រាតែមួយរបស់ព្រះអង្គវិញ។ សូមទ្រង់ព្រះមេត្តាប្រោសអស់អ្នកដែលគោរពថ្វាយបង្គំព្រះបុត្រាដែលប្រសូត្រជាមនុស្ស ឱ្យទទួលជីវិតថ្មីពីព្រះអង្គផង។

អត្ថបទទី១៖ សូមថ្លែងព្រះគម្ពីរសាមូអែលទី១ ១សម ១,២៤-២,១

កាលនាងហាណ្ហាផ្តាច់ដោះសាមូអែលជាកូនគាត់ ហើយនាងនាំកូន​ទៅព្រះដំណាក់​របស់​​​ព្រះអម្ចាស់នៅភូមិស៊ីឡូ។ នាងយកគោឈ្មោលស្ទាវមួយអាយុបីខួប យកម្សៅ​មួយ​ថាំង និងស្រាទំពាំងបាយជូរមួយឪទិនទៅជាមួយផង។ គេសម្លាប់គោធ្វើជាយញ្ញបូជា​ថ្វាយ​ព្រះអម្ចាស់ ហើយនាំកុមារសាមូអែលទៅជួបលោកបូជាចារ្យអេលី។ នាងហាណ្ហា​ប្រាប់​លោកអេលីថា៖ «លោកម្ចាស់! នាងខ្ញុំជាស្ត្រីដែលបានអង្វរព្រះអម្ចាស់កាលពីមុននៅទីនេះ ជិតលោក។ នេះជាការពិត ដូចលោកម្ចាស់មានជីវិតនៅសព្វថ្ងៃដែរ។ នាងខ្ញុំបានអង្វរ​ព្រះអម្ចាស់សូមឱ្យមានកូន ព្រះអង្គក៏បានប្រោសប្រទានតាមពាក្យអង្វររបស់នាងខ្ញុំដែរ។ ឥឡូវនេះ នាងខ្ញុំយកកូនមកថ្វាយព្រះអម្ចាស់។ កូននេះនឹងបម្រើព្រះអង្គអស់មួយជីវិត»។ បន្ទាប់មកគេនាំគ្នាក្រាបថ្វាយបង្គំព្រះអម្ចាស់។ ពេលនោះនាងហាណ្ហាស្មូតបទលើកតម្កើង​ព្រះអម្ចាស់ដូចតទៅ៖

ទំនុកតម្កើងរបស់នាងហាណ្ហា (១ សម ២, ១.៤-៨) បទកាកគតិ

ពិធីអបអរសាទរព្រះគម្ពីរដំណឹងល្អ

អាលេលូយ៉ា! អាលេលូយ៉ា!
ឱព្រះមហក្សត្រនៃពិភពទាំងមូល! សូមយាង​មក! ព្រះអង្គជាថ្មគ្រឹះដ៏សំខាន់បំផុតនៃព្រះសហគមន៍! សូមយាងមកសង្គ្រោះមនុស្សដែលទ្រង់បានសូនពីដីមក!។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១,៤៦-៥៦

នាងម៉ារីអរព្រះគុណព្រះអម្ចាស់ដោយថ្លែងឡើងថា៖ «ខ្ញុំសូមលើកតម្កើងព្រះអម្ចាស់! អស់ពីដួងចិត្ត ខ្ញុំមានសេចក្តីត្រេកអរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ ព្រះអង្គទតមើលភាពទន់ទាបនៃអ្នកបម្រើរបស់ព្រះអង្គ។ អំណើះតទៅមនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គល។ ព្រះដ៏មានឫទ្ធានុភាពបានសម្តែងការប្រសើរអស្ចារ្យ​ចំពោះរូបខ្ញុំ ព្រះនាមព្រះអង្គពិតជាវិសុទ្ធមែន! ទ្រង់មានព្រះហឫទ័យមេត្តាករុណាដល់​អស់​អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ។ ទ្រង់បានសម្តែងឫទ្ធិបារមីកម្ចាត់​មនុស្សមានចិត្តឆ្មើងឆ្មៃ។ ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើក​តម្កើង​​មនុស្សទន់ទាបឡើង។ ទ្រង់បានប្រទានសម្បត្តិយ៉ាងបរិបូរណ៌ដល់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។ ទ្រង់បានជួយប្រជារាស្ត្រអ៊ីស្រាអែលជាអ្នកបម្រើព្រះអង្គ ហើយតែងតែសម្តែងព្រះហឫទ័យមេត្តាករុណាឥត​ភ្លេចឡើយ ដូចទ្រង់បានសន្យាជាមួយបុព្វបុរស គឺលោកអប្រាហាំ និងពូជពង្សរបស់លោក​​​ជានិច្ចតរៀងទៅ»។
នាងម៉ារីស្នាក់នៅជាមួយនាងអេលីសាបិតអស់រយៈពេលប្រមាណបីខែទើបនាង​ត្រឡប់​ទៅផ្ទះវិញ។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គស្រឡាញ់មនុស្សលោកយ៉ាងក្រៃលែង រហូតដល់ចាត់ព្រះបុត្រាព្រះអង្គឱ្យយាងមករួមរស់ជា​មួយយើងខ្ញុំ។ យើងខ្ញុំសូមផ្ញើជីវិតទាំងស្រុងទៅលើព្រះហឫទ័យមេត្តាករុណារបស់ព្រះអង្គ។ សូមជម្រះចិត្តគំនិតយើងខ្ញុំក្នុងអភិបូជា​នេះផង។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គមានព្រះហឫទ័យស្មោះត្រង់ជានិច្ច។ ព្រះអង្គបានសង្គ្រោះប្រជារាស្ត្ររបស់ព្រះអង្គតាមព្រះ​បន្ទូលសន្យា។ សូមទ្រង់ព្រះមេត្តាពង្រឹងជំនឿរបស់​យើងខ្ញុំ សូមឱ្យថ្ងៃណាមួយយើងខ្ញុំអាចទទួលសុភមង្គលដ៏ពេញលេញ តាមព្រះបន្ទូលសន្យា​នេះផង។