អេសេគីអែល - Catholic Faith Cambodia

ព្យាការីអេសេ‌គីអែល

(អេសេ‌គាល)

ពាក្យលំនាំ

លោកអេសេ‌គីអែលជាបូជា‌ចារ្យមួយរូប បំពេញមុខ‌ងារក្នុងព្រះ‌វិហារនៅក្រុងយេរូ‌សាឡឹម។ លោកស្ថិតនៅក្នុងចំណោមប្រជាជន ដែលត្រូវកង‌ទ័ពរបស់ព្រះ‌ចៅនេប៊ូ‌កានេសារកៀរយកទៅជាឈ្លើយសឹក នៅគ្រាដែលស្តេចនេះវាយយកបានក្រុងយេរូ‌សាឡឹមជាលើកទីមួយ នៅឆ្នាំ ៥៩៧ មុនគ្រីស្ត‌សករាជ។ ប្រមាណបួនឆ្នាំកន្លងមកទៀត ព្រះ‌ជាម្ចាស់បានត្រាស់ហៅលោកឲ្យធ្វើជាព្យាការី ដើម្បីនាំព្រះ‌បន្ទូលរបស់ព្រះ‌អង្គទៅថ្លែងប្រាប់ប្រជាជន គឺទាំងអ្នកដែលជាប់ជាឈ្លើយនៅស្រុកបាប៊ីឡូន ទាំងអ្នកដែលនៅសល់ក្នុងក្រុងយេរូ‌សាឡឹម។ ក្រោយពេលក្រុងយេរូ‌សាឡឹមរលំនៅឆ្នាំ ៥៨៧ មុន គ.ស. លោកប្រកាសអំពីការសម្រាលទុក្ខ និងសេចក្ដីសង្ឃឹមរបស់ជនជាតិអ៊ីស្រា‌អែល។

យើងអាចបែងចែកកណ្ឌគម្ពីរអេសេ‌គីអែលជាបួនផ្នែកសំខាន់ៗ:

១. ព្រះ‌បន្ទូលស្តីប្រដៅជនជាតិអ៊ីស្រា‌អែល មុនពេលស្រុករលំជាលើកទីពីរ (ចំពូក ១‑២៤)។

២. ព្រះ‌បន្ទូលស្តីអំពីការវិនិច្ឆ័យទោសប្រជា‌ជាតិនានាដែលបានបោកបញ្ឆោត និងជិះ‌ជាន់សង្កត់‌សង្កិនជនជាតិអ៊ីស្រា‌អែល (ចំពូក ២៥‑៣២)។

៣. ព្រះ‌បន្ទូលដែលព្រះ‌អម្ចាស់ថ្លែងក្រោយពេលអ៊ីស្រា‌អែលបែកស្រុក មានខ្លឹមសារជាពាក្យលើកទឹកចិត្តប្រជា‌រាស្ដ្ររបស់ព្រះ‌អង្គ (ចំពូក ៣៣‑៣៩)។

៤. និមិត្ត‌ហេតុអស្ចារ្យអំពីព្រះ‌វិហារថ្មី (ចំពូក ៤០-៤៨)។

ព្យាការីអេសេ‌គីអែលប្រើនិមិត្តអស្ចារ្យជាច្រើនដែលលោកបានឃើញ ដើម្បីបញ្ជាក់សេចក្ដីដែលលោកប្រកាស។ ក្នុងឋានៈលោកជាបូជា‌ចារ្យ សេចក្ដីដែលលោកប្រកាស សង្កត់យ៉ាងខ្លាំងទៅលើព្រះ‌វិហារ ប៉ុន្តែ លោកក៏អះ‌អាងថា ព្រះ‌អម្ចាស់មិនត្រឹមតែគង់ក្នុងទី‌សក្ការៈនៅក្រុងយេរូ‌សាឡឹមប៉ុណ្ណោះទេ ព្រះ‌អង្គក៏គង់នៅជាមួយប្រជា‌រាស្ដ្ររបស់ព្រះ‌អង្គ ដែលជាប់ជាឈ្លើយនៅស្រុកបាប៊ីឡូនដែរ (សូមអាន ១១.១៦)។ លោកប្រកាសហៅប្រជាជនគ្រប់រូបៗឲ្យកែប្រែចិត្តគំនិត ដោយសង្កត់ថា មនុស្សម្នាក់ៗមានភារ‌កិច្ចទទួលខុសត្រូវលើអំពើដែលខ្លួនប្រព្រឹត្ត (ចំពូក ១៨) គឺមិនមែនសហគមន៍ទេដែលទទួលខុសត្រូវ។ តាម‌រយៈនិមិត្ត‌ហេតុ អំពីឆ្អឹងរបស់មនុស្សមកផ្គុំគ្នាសាជាថ្មី ហើយមានជីវិតរស់ឡើងវិញ (ចំពូក ៣៧) លោកប្រកាសថា ព្រះ‌ជាម្ចាស់នឹងស្តារស្ថាន‌ភាពប្រជា‌រាស្ដ្ររបស់ព្រះ‌អង្គ ហើយនាំគេវិលត្រឡប់ទៅស្រុករបស់ពួកគេវិញ (១១.១៤-២០, ៣៦.១-៣៨)។

ព្យាការីអេសេ‌គីអែល

(អេសេ‌គាល)

ព្រះ‌បន្ទូលស្ដីអំពីក្រុងយេរូ‌សាឡឹម

លោកអេសេ‌គីអែលនិមិត្តឃើញសិរី‌រុងរឿងព្រះ‌អម្ចាស់

១ នៅឆ្នាំទីសាម‌សិប ថ្ងៃទីប្រាំ ក្នុងខែទីបួន ពេលខ្ញុំស្ថិតនៅក្បែរទន្លេកេបារ ជាមួយប្រជាជន ដែលគេកៀរមកជាឈ្លើយ ស្រាប់តែផ្ទៃមេឃបើកចំហ ហើយខ្ញុំឃើញនិមិត្ត‌ហេតុអស្ចារ្យពីព្រះ‌ជាម្ចាស់។

២ នៅថ្ងៃទីប្រាំ ក្នុងខែនោះ ត្រូវនឹងឆ្នាំទីប្រាំ ក្រោយគេចាប់ព្រះ‌បាទយ៉ូយ៉ា‌គីនមកជាឈ្លើយ ៣ ព្រះ‌អម្ចាស់មានព្រះ‌បន្ទូលមកលោកអេសេ‌គីអែល ជាកូនរបស់លោកបូជា‌ចារ្យប៊ូស៊ី នៅស្រុកខាល់ដេ ជិតទន្លេកេបារ។ ពេលនោះ ព្រះ‌អម្ចាស់ដាក់ព្រះ‌ហស្ដលើលោក។

៤ ខ្ញុំក្រឡេកមើលទៅ ឃើញមានខ្យល់ព្យុះបក់បោកមកពីទិសខាងជើង មានដុំពពកមួយយ៉ាងធំ និងមានផ្លេកបន្ទោរចេញពីពពកនោះ ទាំងមានពន្លឺព័ទ្ធជុំ‌វិញ ហើយនៅចំកណ្ដាលមានដុំភ្លើងមួយបញ្ចេញរស្មីយ៉ាងត្រចះ‌ត្រចង់។ ៥ នៅខាងក្នុងពពកនោះ មានសត្វលោកបួន ដែលមានទ្រង់‌ទ្រាយដូចមនុស្ស។ ៦ សត្វនីមួយៗមានមុខបួន និងស្លាបបួន។ ៧ ជើងរបស់សត្វទាំងនោះត្រង់ រីឯប្រអប់ជើងមានរាងដូចក្រចកជើងកូនគោ ហើយចាំងពន្លឺដូចលង្ហិនដ៏រលោង។ ៨ នៅក្រោមស្លាបទាំងបួន មានដៃដូចដៃមនុស្ស លាតសន្ធឹងទៅរកទិសទាំងបួន ដូចមុខ និងស្លាបដែរ។ ៩ ស្លាបរបស់សត្វទាំងនោះភ្ជាប់គ្នាទៅវិញទៅមក។ សត្វទាំងបួនហើរតម្រង់ទៅមុខជា‌និច្ច ឥតងាករេឡើយ។ ១០ សត្វនីមួយៗមានមុខបួន នៅផ្នែកខាងមុខមានភិន‌ភាគដូចមនុស្ស ផ្នែកខាងស្តាំដូចសិង្ហ ផ្នែកខាងឆ្វេងដូចគោ និងផ្នែកខាងក្រោយដូចឥន្ទ្រី។ ១១ ស្លាបពីររបស់សត្វនីមួយៗត្រដាងទៅលើ ហើយជាប់គ្នាទៅវិញទៅមក រីឯស្លាបពីរទៀតហ៊ុម‌ព័ទ្ធរូបកាយ។ ១២ សត្វនីមួយៗហើរតម្រង់ទៅមុខឥតងាករេឡើយ តាមវិញ្ញាណជំរុញឲ្យទៅ។ ១៣ នៅចន្លោះសត្វទាំងបួនមានទ្រង់‌ទ្រាយដូចជាគប់ភ្លើង ហើយភ្លើងនោះធ្វើចលនាពីសត្វមួយទៅសត្វមួយ ទាំងបញ្ចេញពន្លឺរស្មីភ្លឺផ្លេក។ ១៤ សត្វទាំងបួនហើរចុះឡើង លឿនដូចរន្ទះ។

១៥ ពេលខ្ញុំសម្លឹងមើលសត្វទាំងបួន ខ្ញុំឃើញមានកង់នៅដី ចំពីមុខសត្វទាំងបួន។ ១៦ កង់ទាំងនោះមានទ្រង់‌ទ្រាយ និងមានសណ្ឋានដូចៗគ្នាទាំងអស់ គឺភ្លឺចាំងដូចត្បូងពេជ្រ ហើយកង់មួយហាក់ដូចជាស្ថិតនៅក្នុងកង់មួយទៀត។ ១៧ ពេលកង់ទាំងនោះវិលទៅមុខ វាវិលទៅទិសទាំងបួនដោយឥតងាករេ។ ១៨ កង់នោះមានកម្ពស់ខ្ពស់អស្ចារ្យ ហើយនៅតាមរង្វង់កង់ទាំងបួនមានផ្កាភ្លើងនៅពាស‌ពេញ។ ១៩ ពេលសត្វទាំងបួនទៅមុខ កង់ក៏វិលទៅមុខ ពេលសត្វទាំងបួនហោះឡើងផុតពីដី កង់ក៏ឡើងដែរ។ ២០ សត្វទាំងនោះហោះទៅមុខ តាមវិញ្ញាណជំរុញឲ្យទៅ ហើយកង់ក៏ហោះឡើងទៅដែរ ដ្បិតវិញ្ញាណរបស់សត្វទាំងនោះស្ថិតនៅក្នុងកង់។ ២១ ពេលសត្វទៅមុខ កង់ក៏ទៅមុខ ពេលសត្វឈប់ កង់ក៏ឈប់ ពេលសត្វឡើងផុតពីដី កង់ក៏ឡើងទៅជាមួយ ដ្បិតវិញ្ញាណរបស់សត្វទាំងនោះស្ថិតនៅក្នុងកង់។

២២ នៅលើក្បាលសត្វនីមួយៗមានដូចជាលំហអាកាស ដែលចាំងពន្លឺរស្មីដ៏ភ្លឺថ្លាពីលើក្បាលសត្វទាំងនោះ។ ២៣ នៅក្រោមលំហ ស្លាបពីររបស់សត្វនីមួយៗសំកាំងយ៉ាងត្រង់ជាប់គ្នាទៅវិញទៅមក ស្លាបពីរទៀតហ៊ុម‌ព័ទ្ធជុំ‌វិញខ្លួន។ ២៤ ពេលសត្វទាំងនោះហោះទៅមុខ ខ្ញុំឮសន្ធឹកស្លាបដូចសូរ‌ស័ព្ទមហាសាគរ និងដូចព្រះ‌សូរសៀងរបស់ព្រះដ៏មានឫទ្ធា‌នុភាពដ៏ខ្ពង់‌ខ្ពស់បំផុត។ សន្ធឹកស្លាបនោះក៏លាន់ឮឡើងយ៉ាងទ្រហឹងអឺង‌អាប់ ដូចសន្ធឹកកង‌ទ័ព។ នៅពេលសត្វនោះឈប់ហើរ គេក៏ទម្លាក់ស្លាបចុះ។ ២៥ មានសំឡេងមួយលេចឮពីលំហអាកាស ដែលស្ថិតនៅលើក្បាលសត្វទាំងបួន នៅពេលសត្វនោះឈប់ហើរ គេទម្លាក់ស្លាបចុះ។

២៦ នៅលើលំហអាកាសដែលស្ថិតនៅលើក្បាលសត្វទាំងនោះ មានដូចជាត្បូងកណ្ដៀងមួយ ដែលមានរាងជាបល្ល័ង្ក។ នៅលើត្បូងដែលមានរាងជាបល្ល័ង្កនោះ គឺនៅខាងលើបំផុត មានដូចជាទ្រង់‌ទ្រាយរបស់មនុស្សម្នាក់។ ២៧ ខ្ញុំក៏បានឃើញពន្លឺក្រហមឆ្អៅ ភ្លឺដូចភ្លើងនៅជុំ‌វិញ ហើយពីត្រង់កន្លែងដែលមានរាងដូចចង្កេះឡើងទៅលើ និងពីត្រង់កន្លែងដែលមានរាងដូចចង្កេះចុះទៅក្រោម ក៏មានដូចជាពន្លឺភ្លើងដ៏ភ្លឺត្រចះ‌ត្រចង់ព័ទ្ធជុំ‌វិញដែរ។ ២៨ ពន្លឺដ៏ត្រចះ‌ត្រចង់ព័ទ្ធជុំ‌វិញនោះ ដូចឥន្ទធនូ នៅថ្ងៃមានភ្លៀង គឺដូចជារស្មីនៃសិរី‌រុងរឿងរបស់ព្រះ‌អម្ចាស់។ ពេលឃើញភ្លាម ខ្ញុំក្រាបថ្វាយ‌បង្គំឱនមុខដល់ដី ហើយខ្ញុំឮសំឡេងមួយពោលមកកាន់ខ្ញុំ។

ព្រះ‌អម្ចាស់ត្រាស់ហៅលោកអេសេ‌គីអែល

១ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ ចូរក្រោកឈរឡើង យើងចង់និយាយជាមួយអ្នក»។ ២ ពេលព្រះ‌អង្គមានព្រះ‌បន្ទូលដូច្នោះហើយ ព្រះ‌វិញ្ញាណក៏យាងចូលមកគង់នៅក្នុងខ្ញុំ ធ្វើឲ្យខ្ញុំអាចក្រោកឈរឡើងបាន ហើយស្ដាប់ព្រះ‌អង្គមានព្រះ‌បន្ទូល។

៣ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ! យើងចាត់អ្នកឲ្យទៅរកជនជាតិអ៊ីស្រា‌អែល គឺទៅរកប្រជា‌ជាតិដែលបះ‌បោរប្រឆាំងនឹងយើង។ ពួកគេបះ‌បោរប្រឆាំងនឹងយើងរហូតដល់សព្វថ្ងៃ ដូចដូន‌តារបស់ពួកគេដែរ។ ៤ ពួកគេជាកូនក្បាលរឹង និងមានចិត្តចចេសទៀតផង។ យើងចាត់អ្នកឲ្យទៅរកពួកគេ ហើយត្រូវនិយាយថា: “នេះជាព្រះ‌បន្ទូលរបស់ព្រះ‌ជា‌អម្ចាស់”។ ៥ ទោះបីពួកគេស្ដាប់ ឬមិនស្ដាប់ក្តី -ដ្បិតពួកគេជាពូជអ្នកបះ‌បោរ- ពួកគេនឹងដឹងថា មានព្យាការីមួយរូបស្ថិតនៅក្នុងចំណោមពួកគេ។ ៦ រីឯអ្នកវិញ កូនមនុស្សអើយ កុំខ្លាចពួកគេឡើយ ហើយក៏កុំខ្លាចពាក្យដែលពួកគេប្រកែកតវ៉ានឹងអ្នកដែរ ដ្បិតពួកនោះប្រៀបដូចជាបន្លា និងអញ្ចាញ អ្នកនឹងអង្គុយជាមួយមនុស្សដែលមានចិត្តដូចខ្យា‌ដំរី។ កុំខ្លាចពាក្យរបស់ពួកគេ ហើយក៏កុំញ័ររន្ធត់ ដោយឃើញទឹកមុខរបស់ពួកគេឡើយ ដ្បិតពួកគេជាពូជអ្នកបះ‌បោរ។ ៧ ទោះបីពួកគេស្ដាប់ ឬមិនស្ដាប់ក្តី -ដ្បិតពួកគេជាមនុស្សបះ‌បោរ - អ្នកត្រូវតែនាំពាក្យយើងទៅប្រាប់ពួកគេ។ ៨ កូនមនុស្សអើយ ចូរស្ដាប់សេចក្ដីដែលយើងប្រាប់! កុំមានចិត្តរឹង‌រូសដូចពូជបះ‌បោរនេះឡើយ ចូរហាមាត់ ហើយបរិភោគអាហារដែលយើងនឹងឲ្យអ្នកនៅពេលនេះ»។

៩ ពេលនោះ ខ្ញុំក្រឡេកមើលទៅ ឃើញដៃមួយកាន់ក្រាំងហុចមកឲ្យខ្ញុំ។ ១០ ដៃនោះបើកក្រាំង នៅចំពោះមុខខ្ញុំ ក្រាំងនោះមានសរសេរទាំងខាងក្នុង ទាំងខាងក្រៅ ដែលកត់‌ត្រាសុទ្ធតែពាក្យសំណោក ពាក្យទំនួញ និងពាក្យត្អូញ‌ត្អែរ។

១ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ! ចូរបរិភោគក្រាំងដែលយើងឲ្យនេះ រួចទៅប្រៀន‌ប្រដៅពូជ‌ពង្សអ៊ីស្រា‌អែលចុះ»។ ២ ខ្ញុំក៏ហាមាត់ ហើយព្រះ‌អង្គឲ្យខ្ញុំទទួលទានក្រាំងនោះ។ ៣ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ! ចូរបរិភោគក្រាំងដែលយើងប្រគល់ឲ្យយ៉ាងឆ្អែតចុះ!»។ ខ្ញុំក៏ទទួលទានក្រាំងនោះ ដែលមានរស‌ជាតិផ្អែម ដូចទឹកឃ្មុំនៅក្នុងមាត់ខ្ញុំ។

៤ បន្ទាប់មក ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ! ចូរទៅរកពូជ‌ពង្សអ៊ីស្រា‌អែល ហើយថ្លែងពាក្យរបស់យើងប្រាប់គេចុះ! ៥ យើងចាត់អ្នកឲ្យទៅរកពូជ‌ពង្សអ៊ីស្រា‌អែល គឺមិនមែនឲ្យទៅរកសាសន៍ដទៃ ដែលនិយាយភាសាពិបាកស្ដាប់ និងពិបាកយល់នោះទេ។ ៦ យើងមិនចាត់អ្នកឲ្យទៅរកសាសន៍ជាច្រើន ដែលនិយាយភាសាពិបាកស្ដាប់ និងជាភាសាដែលអ្នកមិនយល់នោះឡើយ។ ប្រសិនបើយើងចាត់អ្នកទៅរកសាសន៍ទាំងនោះមែន ពួកគេមុខជាស្ដាប់អ្នកពុំ‌ខាន ៧ គឺយើងចាត់អ្នកទៅរកពូជ‌ពង្សអ៊ីស្រា‌អែលដែលមិនចង់ស្ដាប់អ្នក ព្រោះពួកគេមិនព្រមស្ដាប់យើង។ ពូជ‌ពង្សអ៊ីស្រា‌អែលទាំងមូលជាមនុស្សក្បាលរឹង និងមានចិត្តចចេស។ ៨ ប៉ុន្តែ យើងធ្វើឲ្យអ្នកមានចិត្តមានះ ដើម្បីឲ្យអ្នកតតាំងនឹងចិត្តមានះរបស់ពួកគេ យើងធ្វើឲ្យអ្នកមានចិត្តរឹង ដើម្បីតតាំងនឹងចិត្តរឹងរបស់ពួកគេ។ ៩ យើងធ្វើឲ្យអ្នកមានចិត្តរឹងដូចពេជ្រ ហើយរឹងជាងដុំថ្មទៅទៀត។ កុំខ្លាចពួកគេ កុំញ័ររន្ធត់នៅចំពោះមុខពួកគេឡើយ ដ្បិតអ្នកទាំងនោះជាពូជបះ‌បោរ»។

១០ ព្រះ‌អង្គមានព្រះ‌បន្ទូលមកខ្ញុំទៀតថា៖ «កូនមនុស្សអើយ ចូរផ្ចង់ចិត្ត ហើយត្រង‌ត្រាប់ស្ដាប់ពាក្យទាំងប៉ុន្មានដែលយើងថ្លែងប្រាប់។ ១១ ចូរទៅជួបប្រជាជនរបស់អ្នក ដែលត្រូវខ្មាំងកៀរមកជាឈ្លើយ រួចនិយាយជាមួយពួកគេ ទោះបីពួកគេស្ដាប់ ឬមិនស្ដាប់ក្តី ចូរនិយាយប្រាប់ពួកគេថា នេះជាព្រះ‌បន្ទូលរបស់ព្រះ‌ជា‌អម្ចាស់»។

១២ ពេលនោះ ព្រះ‌វិញ្ញាណលើកខ្ញុំឡើង ហើយខ្ញុំឮសូរសំឡេងអឺង‌កងពីក្រោយខ្ញុំថា «សូមលើកតម្កើងសិរី‌រុងរឿងរបស់ព្រះ‌អម្ចាស់ នៅក្នុងដំណាក់របស់ព្រះ‌អង្គ!»។ ១៣ ខ្ញុំឮសន្ធឹកស្លាបរបស់សត្វទាំងបួនដែលទទះប៉ះគ្នាទៅវិញទៅមក ព្រមទាំងឮស្នូរសន្ធឹកកង់ដែលលាន់ឡើងយ៉ាងខ្លាំង នៅក្បែរសត្វទាំងនោះដែរ។ ១៤ ព្រះ‌វិញ្ញាណលើកខ្ញុំឡើង ហើយនាំខ្ញុំយកទៅ ខ្ញុំទៅទាំងខឹងមួម៉ៅ តែព្រះ‌អម្ចាស់ដាក់ព្រះ‌ហស្ដលើខ្ញុំ ធ្វើឲ្យខ្ញុំជំទាស់មិនបាន។ ១៥ ខ្ញុំទៅដល់តេល-‌អាវីវ ក្បែរទន្លេកេបារ គឺកន្លែងដែលប្រជាជនជាប់ជាឈ្លើយស្នាក់នៅ។ ខ្ញុំស្នាក់នៅជាមួយពួកគេ ទាំងមិនដឹងខ្លួន អស់‌រយៈពេលប្រាំពីរថ្ងៃ។

១៦ លុះប្រាំពីរថ្ងៃកន្លងផុតទៅ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ១៧ «កូនមនុស្សអើយ! យើងតែង‌តាំងអ្នកឲ្យធ្វើជាអ្នកយាម‌ល្បាត សម្រាប់ពូជ‌ពង្សអ៊ីស្រា‌អែល។ កាលណាអ្នកឮពាក្យរបស់យើង ចូរយកទៅថ្លែងប្រាប់ពួកគេក្នុងនាមយើងផង។ ១៨ ពេលយើងនិយាយទៅកាន់មនុស្សអាក្រក់ថា “អ្នកនឹងត្រូវស្លាប់!”។ ប្រសិនបើអ្នកមិនប្រាប់គេឲ្យដឹងខ្លួន ប្រសិនបើអ្នកមិនទូន្មានគេឲ្យងាកចេញពីផ្លូវអាក្រក់ ដើម្បីបានរួចជីវិតទេ ជនអាក្រក់នោះត្រូវស្លាប់ ព្រោះអំពើបាបរបស់ខ្លួន តែយើងនឹងដាក់ទោសអ្នក។ ១៩ ផ្ទុយទៅវិញ បើអ្នកទូន្មានមនុស្សអាក្រក់ តែគេមិនងាកចេញពីផ្លូវអាក្រក់របស់ខ្លួនទេ ជនអាក្រក់នោះត្រូវស្លាប់ ព្រោះតែអំពើបាបរបស់ខ្លួន រីឯអ្នកវិញ អ្នកនឹងបានរួចជីវិត។ ២០ ប្រសិនបើមនុស្សសុចរិតម្នាក់ងាកចេញពីផ្លូវសុចរិតរបស់ខ្លួន ទៅប្រព្រឹត្តអំពើទុច្ចរិត យើងនឹងធ្វើឲ្យគេជំពប់ជើងដួល ហើយគេនឹងស្លាប់ពុំ‌ខាន។ គេនឹងត្រូវស្លាប់ ព្រោះតែអំពើបាបរបស់ខ្លួន ដោយអ្នកមិនបានទូន្មានគេ។ គ្មាននរណានឹកឃើញអំពើសុចរិតដែលអ្នកនោះធ្លាប់ប្រព្រឹត្តឡើយ តែយើងនឹងដាក់ទោសអ្នក។ ២១ ផ្ទុយទៅវិញ ប្រសិនបើអ្នកទូន្មានមនុស្សសុចរិត កុំឲ្យប្រព្រឹត្តអំពើបាប ហើយបើគេមិនប្រព្រឹត្តអំពើបាបទេនោះ គេនឹងមានជីវិតតទៅមុខទៀត ព្រោះតែអ្នកបានទូន្មានគេ ចំណែកឯអ្នកវិញ អ្នកនឹងបានរួចជីវិត»។

ព្រះ‌អម្ចាស់ឲ្យលោកអេសេ‌គីអែលនៅស្ងៀមស្ងាត់

២២ ព្រះ‌អម្ចាស់ដាក់ព្រះ‌ហស្ដលើខ្ញុំសាជាថ្មី ព្រះ‌អង្គមានព្រះ‌បន្ទូលមកខ្ញុំថា៖ «ចូរក្រោកឡើង ទៅជ្រលងភ្នំ នៅទីនោះ យើងនឹងនិយាយជាមួយអ្នក»។ ២៣ ខ្ញុំក៏ក្រោកឡើង ចេញទៅជ្រលងភ្នំ ហើយខ្ញុំឃើញសិរី‌រុងរឿងរបស់ព្រះ‌អម្ចាស់នៅទីនោះ ដូចខ្ញុំធ្លាប់ឃើញនៅជិតទន្លេកេបារដែរ។ ពេលនោះ ខ្ញុំក្រាបចុះ ឱនមុខដល់ដី។ ២៤ ព្រះ‌វិញ្ញាណយាងចូលមកគង់នៅក្នុងខ្ញុំ ធ្វើឲ្យខ្ញុំក្រោកឈរឡើង។ ព្រះ‌អម្ចាស់មានព្រះ‌បន្ទូលមកខ្ញុំថា៖ «ចូរទៅបិទទ្វារ សំងំនៅក្នុងផ្ទះរបស់អ្នកទៅ។ ២៥ កូនមនុស្សអើយ ពួកគេនឹងបោះខ្សែ‌ពួរលើអ្នក ពួកគេនឹងយកខ្សែនោះចងអ្នក ហើយអ្នកពុំអាចចេញទៅក្នុងចំណោមពួកគេបានទៀតឡើយ។ ២៦ យើងនឹងធ្វើឲ្យអ្នកទៅជាមនុស្សគ និយាយពុំកើត ហើយក៏ពុំអាចស្តីបន្ទោសពួកគេបានដែរ ដ្បិតពួកគេជាពូជអ្នកបះ‌បោរ។ ២៧ ប៉ុន្តែ ពេលណាយើងនិយាយទៅកាន់អ្នក យើងនឹងបើកមាត់របស់អ្នក ដើម្បីឲ្យពោលទៅពួកគេថា “នេះជាព្រះ‌បន្ទូលរបស់ព្រះ‌ជា‌អម្ចាស់”។ មានអ្នកខ្លះចង់ស្ដាប់ ហើយអ្នកខ្លះទៀតមិនចង់ស្ដាប់ទេ ដ្បិតពួកគេជាពូជអ្នកបះ‌បោរ»។

ការឡោម‌ព័ទ្ធក្រុងយេរូ‌សាឡឹម

១ «កូនមនុស្សអើយ ចូរយកឥដ្ឋមួយដុំមកដាក់នៅមុខអ្នក ហើយគូរផែនទីក្រុងយេរូ‌សាឡឹមនៅលើឥដ្ឋនោះ។ ២ បន្ទាប់មក ចូរដាក់ខ្មាំងសត្រូវឡោម‌ព័ទ្ធក្រុងនោះ ព្រមទាំងសង់ប៉ម និងលើកទួលឡើងសម្រាប់វាយលុកក្រុងនោះផង។ ចូរដាក់ទីតាំងទ័ព និងដាក់គ្រឿងសាស្ត្រា‌វុធដ៏ធំៗ ត្រៀមជុំ‌វិញទីក្រុង ដើម្បីទម្លុះកំពែង។ ៣ ចូរយកបន្ទះដែកមួយមកធ្វើជាជញ្ជាំងខណ្ឌអ្នកពីក្រុងនោះ។ ចូរសម្លឹងទៅរកទីក្រុង ហើយឡោម‌ព័ទ្ធក្រុងនោះ ទុកជាទីសម្គាល់ឲ្យជនជាតិអ៊ីស្រា‌អែលដឹងថា ខ្មាំងសត្រូវនឹងព័ទ្ធក្រុងយេរូ‌សាឡឹម។

៤ រីឯអ្នកវិញ ចូរដេកផ្អៀងខាងឆ្វេង ហើយដាក់អំពើបាបរបស់ជនជាតិអ៊ីស្រា‌អែលលើខ្លួនអ្នកដែរ។ អ្នកត្រូវទទួលយកអំពើបាបរបស់ពួកគេគ្រប់ចំនួនថ្ងៃដែលអ្នកដេកផ្អៀង។ ៥ យើងឲ្យអ្នកដេកដូច្នេះ បី‌រយកៅ‌សិបថ្ងៃ ស្មើនឹងចំនួនឆ្នាំដែលពួកគេបានប្រព្រឹត្តអំពើបាប។ អ្នកត្រូវផ្ទុកអំពើបាបរបស់ជនជាតិអ៊ីស្រា‌អែលតាមរបៀបនេះ។ ៦ ពេលអ្នកដេកផ្អៀងខាងឆ្វេងគ្រប់ចំនួនថ្ងៃហើយ ចូរដេកផ្អៀងខាងស្តាំម្ដង។ អ្នកត្រូវផ្ទុកអំពើបាបរបស់ជនជាតិយូដាចំនួនសែ‌សិបថ្ងៃ គឺមួយថ្ងៃស្មើនឹងមួយឆ្នាំ។ ៧ អ្នកត្រូវសម្លឹងទៅរកក្រុងយេរូ‌សាឡឹម ដែលខ្មាំងឡោម‌ព័ទ្ធ ហើយលើកដៃប្រកាសប្រឆាំងនឹងក្រុងនេះក្នុងនាមយើង។ ៨ យើងនឹងយកខ្សែ‌ពួរចងអ្នក ដើម្បីកុំឲ្យអ្នកអាចប្រែពីម្ខាងទៅម្ខាង រហូត ដល់គ្រប់ចំនួនថ្ងៃ ដែលអ្នកត្រូវឡោម‌ព័ទ្ធទីក្រុង។

៩ ចូរយកម្សៅ‌មី អង្ករ កន្ទក់ សណ្តែក គ្រាប់ពោត និងល្ង មកលាយក្នុងចានតែមួយ ហើយដុតធ្វើនំបុ័ងសម្រាប់បរិភោគ ក្នុង‌រយៈពេលបី‌រយកៅ‌សិបថ្ងៃដែលអ្នកដេកផ្អៀង។ ១០ ក្នុងអំឡុងពេលនោះ អ្នកត្រូវបរិភោគអាហារនេះដោយកម្រិត គឺមួយថ្ងៃពីរខាំកន្លះ។ ១១ រីឯទឹកក៏ត្រូវកម្រិតដែរ គឺក្នុងអំឡុងពេលនោះ មួយថ្ងៃផឹកយ៉ាងច្រើនមួយលីត្រ។ ១២ អ្នកត្រូវបរិភោគនំធ្វើពីម្សៅអង្ករ ដែលអ្នកយកលាមករបស់មនុស្សមកប្រើសម្រាប់ដុតនំ នៅមុខពួកគេទាំងអស់គ្នា»។

១៣ ព្រះ‌អម្ចាស់មានព្រះ‌បន្ទូលទៀតថា៖ «ជនជាតិអ៊ីស្រា‌អែលដែលយើងបណ្តេញឲ្យទៅរស់នៅក្នុងចំណោមប្រជា‌ជាតិទាំង‌ឡាយ ក៏នឹងបរិភោគអាហារមិនបរិសុទ្ធយ៉ាងនោះដែរ»។

១៤ ខ្ញុំពោលឡើងថា៖ «បពិត្រព្រះ‌ជា‌អម្ចាស់ ទូល‌បង្គំតែងតែចៀស‌វាងអ្វីៗគ្រប់យ៉ាង ដែលធ្វើឲ្យមានសៅហ្មង គឺតាំងពីក្មេងមកទល់សព្វថ្ងៃ ទូល‌បង្គំមិនធ្លាប់បរិភោគសាច់សត្វដែលងាប់ដោយជំងឺ ឬដោយសត្វសាហាវខាំឡើយ ហើយទូល‌បង្គំក៏មិនបរិភោគសាច់សត្វមិនបរិសុទ្ធដែរ»។ ១៥ ព្រះ‌អង្គមានព្រះ‌បន្ទូលមកខ្ញុំវិញថា៖ «បើដូច្នេះ យើងអនុញ្ញាតឲ្យអ្នកប្រើលាមកគោជំនួសលាមកមនុស្ស សម្រាប់ដុតនំបុ័ង»។ ១៦ ព្រះ‌អង្គមានព្រះ‌បន្ទូលមកខ្ញុំទៀតថា៖ «កូនមនុស្សអើយ! យើងនឹងបំបាត់នំបុ័ងឲ្យអស់ពីក្រុងយេរូ‌សាឡឹម។ ពួកគេនឹងបរិភោគអាហារ ដោយមានកម្រិត ទាំងព្រួយបារម្ភ ហើយផឹកទឹកដោយវាល់ ទាំងខ្លោច‌ផ្សា។ ១៧ ពួកគេនឹងខ្វះអាហារ ខ្វះទឹក ហើយខ្លោច‌ផ្សាទាំងអស់គ្នា ពួកគេនឹងត្រូវវិនាស ដោយ‌សារអំពើបាបរបស់ខ្លួន»។

ព្រះ‌ជាម្ចាស់ដាក់ទោសអ៊ីស្រា‌អែល

១ «កូនមនុស្សអើយ ចូរយកដាវមួយយ៉ាងមុត មកធ្វើកាំបិតកោរ ហើយកោរសក់ និងកោរពុកមាត់ ពុកចង្ការបស់អ្នក រួចយកជញ្ជីងមកថ្លឹង បែងចែកជាច្រើនចំណែក។ ២ ចូរយកមួយភាគបីទៅដុតកណ្ដាលទីក្រុង នៅពេលផុតកំណត់ថ្ងៃដែលអ្នកត្រូវឡោម‌ព័ទ្ធទីក្រុងនោះ ចូរយកមួយភាគបីទៀតទៅកាប់នឹងដាវជុំ‌វិញទីក្រុង ហើយបាចមួយភាគបីឲ្យប៉ើងទៅតាមខ្យល់។ យើងនឹងយកដាវដេញវាយពីក្រោយ។ ៣ ត្រូវយកមួយចំនួនតូចមកចងនឹងជាយសម្លៀក‌បំពាក់របស់អ្នក។ ៤ បន្ទាប់មក ចូរយកចំណែកខ្លះពីចំនួនតូចនោះបោះទៅក្នុងភ្លើង ហើយមានភ្លើងមួយចេញពីក្នុងនោះមកប្រឆាំងនឹងពូជ‌ពង្សអ៊ីស្រា‌អែលទាំងមូល»។

៥ ព្រះ‌ជា‌អម្ចាស់មានព្រះ‌បន្ទូលថា៖ «នេះហើយក្រុងយេរូ‌សាឡឹម! យើងបានដាក់ក្រុងនេះនៅកណ្ដាលប្រជា‌ជាតិទាំង‌ឡាយ និងមាននគរផ្សេងៗនៅជុំ‌វិញ។ ៦ ប៉ុន្តែ អ្នកក្រុងយេរូ‌សាឡឹមបានបះ‌បោរប្រឆាំងនឹងបទ‌បញ្ជា និងវិន័យរបស់យើង គឺពួកគេអាក្រក់ជាងប្រជា‌ជាតិ និងនគរទាំងប៉ុន្មានដែលនៅជុំ‌វិញទៅទៀត ដ្បិតពួកគេបានបោះបង់ចោលបទ‌បញ្ជារបស់យើង ហើយមិនកាន់តាមវិន័យរបស់យើងទេ»។ ៧ ហេតុនេះ ព្រះ‌ជា‌អម្ចាស់មានព្រះ‌បន្ទូលថា៖ «អ្នករាល់គ្នាព្រហើនលើសប្រជា‌ជាតិនានាដែលនៅជុំ‌វិញ គឺអ្នករាល់គ្នាពុំបានធ្វើតាមវិន័យ និងបទ‌បញ្ជារបស់យើងទេ។ លើសពីនេះទៀត សូម្បីតែទម្លាប់របស់ប្រជា‌ជាតិដែលនៅជុំ‌វិញ ក៏អ្នករាល់គ្នាមិនធ្វើតាមផង។ ៨ ហេតុនេះហើយបានជាយើងដែលជាព្រះ‌ជា‌អម្ចាស់ប្រាប់ថា យើងក៏ប្រឆាំងនឹងអ្នកដែរ យើងនឹងដាក់ទោសអ្នកឲ្យប្រជា‌ជាតិនានាឃើញ។ ៩ យើងនឹងធ្វើទោសអ្នក ព្រោះអ្នកបានគោរពព្រះដ៏គួរស្អប់ខ្ពើមទាំងប៉ុន្មាន យើងនឹងដាក់ទោសអ្នក តាមរបៀប ដែលយើងមិនធ្លាប់ប្រើពីមុន ហើយជារបៀបដែលយើងមិនប្រើនៅពេលខាងមុខទៀតដែរ ១០ គឺក្នុងក្រុងនេះ ឪពុកនឹងស៊ីសាច់កូន កូននឹងស៊ីសាច់ឪពុក។ យើងនឹងដាក់ទោសអ្នក ហើយកម្ចាត់ប្រជាជនដែលនៅសេស‌សល់ឲ្យទៅនៅគ្រប់ទិស‌ទី»។ ១១ ព្រះ‌ជា‌អម្ចាស់មានព្រះ‌បន្ទូលថា៖ «យើងជាព្រះដែលមានព្រះ‌ជន្មគង់នៅ! ដោយអ្នកបានយករូបព្រះដ៏គួរស្អប់ខ្ពើម ជារូបដ៏ចង្រៃ មកដាក់នៅក្នុងទី‌សក្ការៈរបស់យើង ធ្វើឲ្យកន្លែងនេះទៅជាសៅហ្មង យើងនឹងដកប្រជាជនចេញពីអ្នក យើងនឹងមិនអាណិតមេត្តាអ្នកទេ ហើយយើងនឹងប្រព្រឹត្តចំពោះអ្នក ដោយឥតត្រាប្រណីឡើយ។ ១២ ប្រជាជនមួយភាគបីនៅក្រុងនេះនឹងត្រូវស្លាប់ ដោយជំងឺរាតត្បាត និងដោយទុរ្ភិក្ស មួយភាគបីនឹងស្លាប់ដោយមុខដាវ ហើយមួយភាគបីទៀត យើងនឹងកម្ចាត់‌កម្ចាយឲ្យទៅគ្រប់ទិស‌ទី ដោយយកដាវដេញតាមពីក្រោយផង។

១៣ យើងនឹងបណ្តោយតាមកំហឹងរបស់យើង រហូតចប់ចុងចប់ដើម។ យើងនឹងជះកំហឹងរបស់យើងលើពួកគេ រហូតទាល់តែអស់ចិត្ត។ ពេលនោះ ពួកគេនឹងដឹងថា យើងជាព្រះ‌អម្ចាស់ដែលបាននិយាយជាមួយពួកគេ យើងដាក់ទោសគេតាមកំហឹងរបស់យើង ព្រោះយើងមានចិត្តប្រច័ណ្ឌ។ ១៤ យើងនឹងធ្វើឲ្យអ្នកក្លាយទៅជាគំនរបាក់បែក បាត់បង់កិត្តិយសក្នុងចំណោមប្រជា‌ជាតិដែលនៅជុំ‌វិញ និងអស់អ្នកដែលដើរកាត់តាមនេះ។ ១៥ ពេលឃើញយើងវាយប្រដៅ និងដាក់ទោសអ្នក តាមកំហឹងដ៏ខ្លាំងក្លារបស់យើងដូច្នេះ ប្រជា‌ជាតិនានានៅជុំ‌វិញនឹងមើល‌ងាយ ជេរប្រមាថអ្នក។ ពួកគេតក់‌ស្លុត ហើយយករឿងរបស់អ្នកទៅព្រមានគ្នា។ យើងជាព្រះ‌អម្ចាស់ យើងប្រកាសឲ្យអ្នកដឹងសេចក្ដីនេះ។

១៦ យើងនឹងធ្វើឲ្យទុរ្ភិក្សកើតមានដល់ប្រជាជនរបស់អ្នក បណ្តាលឲ្យគេឈឺចុកចាប់ ដូចមានព្រួញបាញ់រះទៅលើពួកគេឲ្យវិនាស។ យើងនឹងធ្វើឲ្យទុរ្ភិក្សកើតមានដល់ពួកគេ កាន់តែខ្លាំងឡើង ដោយបំផ្លាញស្បៀងអាហារដែលពួកគេបានបង្ការទុក។ ១៧ យើងនឹងចាត់ទុរ្ភិក្ស ព្រមទាំងសត្វសាហាវ ទៅប្រហារកូនចៅរបស់ពួកគេ។ ជំងឺរាត‌ត្បាត ការបង្ហូរឈាម សង្គ្រាមនឹងកើតមានដល់ក្រុងនេះ។ យើងជាព្រះ‌អម្ចាស់ យើងប្រកាសឲ្យអ្នកដឹងសេចក្ដីនេះ»។

ព្រះ‌បន្ទូលប្រឆាំងនឹងស្រុកអ៊ីស្រា‌អែល

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ! ចូរបែរមុខទៅរកភ្នំនៅស្រុកអ៊ីស្រា‌អែល ហើយថ្លែងពាក្យយើងឲ្យគេស្ដាប់។ ៣ ចូរពោលថា: ភ្នំទាំង‌ឡាយនៅស្រុកអ៊ីស្រា‌អែលអើយ ចូរស្ដាប់ព្រះ‌បន្ទូលរបស់ព្រះ‌ជា‌អម្ចាស់! ដ្បិតព្រះ‌ជា‌អម្ចាស់មានព្រះ‌បន្ទូលមកកាន់ភ្នំតូចធំ ព្រមទាំងជ្រោះ និងជ្រលងភ្នំទាំងអស់ដូចតទៅ “យើងមកដល់ហើយ យើងធ្វើឲ្យសង្គ្រាមកើតមានដល់អ្នករាល់គ្នា យើងនឹងកម្ទេចកន្លែងសក្ការៈនៅតាមទួលខ្ពស់ៗរបស់អ្នករាល់គ្នា។ ៤ អាសនៈរបស់អ្នករាល់គ្នានឹងត្រូវអន្តរាយ ហើយកន្លែងដុតគ្រឿងក្រអូបរបស់អ្នករាល់គ្នា ក៏ត្រូវបាក់បែកអស់ដែរ។ យើងនឹងធ្វើឲ្យអ្នករាល់គ្នាមួយចំនួនធំ ដួលស្លាប់នៅមុខព្រះក្លែង‌ក្លាយទាំងនោះ។ ៥ យើងនឹងយកសាក‌សពជនជាតិអ៊ីស្រា‌អែល ដាក់នៅមុខរូបព្រះក្លែង‌ក្លាយរបស់ខ្លួន ហើយយើងធ្វើឲ្យឆ្អឹងរបស់អ្នករាល់គ្នា នៅរាយ‌ប៉ាយជុំ‌វិញអាសនៈរបស់អ្នករាល់គ្នា។ ៦ គ្រប់ទីកន្លែងដែលអ្នករាល់គ្នាទៅរស់នៅ ក្រុងរបស់អ្នករាល់គ្នានឹងត្រូវវិនាស ទី‌សក្ការៈរបស់អ្នករាល់គ្នា នឹងត្រូវហិន‌ហោច អាសនៈរបស់អ្នករាល់គ្នាក៏នឹងត្រូវវិនាសអន្តរាយដែរ រូបព្រះក្លែង‌ក្លាយរបស់អ្នករាល់គ្នានឹងត្រូវបាក់បែក ហើយរលាយសូន្យ កន្លែងដែលអ្នករាល់គ្នាដុតគ្រឿងក្រអូបមុខជាត្រូវរលំ រីឯព្រះដែលជាស្នាដៃរបស់អ្នករាល់គ្នា ក៏ត្រូវរលាយបាត់អស់ទៅដែរ។ ៧ មានប្រជាជនមួយចំនួនក្នុងចំណោមអ្នករាល់គ្នានឹងដួលស្លាប់ ពេលនោះ ទើបអ្នករាល់គ្នាដឹងថា យើងពិតជាព្រះ‌អម្ចាស់មែន។

៨ ប៉ុន្តែ យើងនឹងទុកអ្នករាល់គ្នាមួយចំនួនឲ្យនៅសេស‌សល់ អ្នកទាំងនោះនឹងគេចផុតពីមុខដាវ ហើយទៅរស់នៅក្នុងចំណោមប្រជា‌ជាតិទាំង‌ឡាយ។ ៩ ពេលរស់នៅក្នុងចំណោមប្រជា‌ជាតិនានា ប្រជាជនដែលនៅសេស‌សល់ទាំងនោះនឹងនឹកឃើញយើង។ យើងធ្វើឲ្យពួកគេគ្រាំ‌គ្រាចិត្ត ព្រោះពួកគេបានប្រព្រឹត្តអំពើផិតក្បត់ ងាកចេញឆ្ងាយពីយើង ទៅចាប់ចិត្តលើព្រះក្លែង‌ក្លាយ។ ពួកគេនឹកខ្មាសខ្លួនឯង ព្រោះតែអំពើទុច្ចរិតដែលខ្លួនបានប្រព្រឹត្ត ដោយគោរពបម្រើព្រះគួរស្អប់ខ្ពើម។ ១០ ពួកគេនឹងទទួលស្គាល់ថា យើងនេះហើយជាព្រះ‌អម្ចាស់ យើងមិនមែននិយាយឥតបានការទេ គឺយើងដាក់ទោសពួកគេតាមពាក្យរបស់យើង”។

១១ ព្រះ‌ជា‌អម្ចាស់មានព្រះ‌បន្ទូលថា “ចូរគក់ទ្រូង និងទន្ទ្រាំជើង ទាំងស្រែកយំសោកស្តាយ ព្រោះតែអំពើអាក្រក់ថោកទាប ដែលជនជាតិអ៊ីស្រា‌អែលបានប្រព្រឹត្ត។ ពួកគេនឹងស្លាប់ដោយមុខដាវ ដោយទុរ្ភិក្ស និងដោយជំងឺរាត‌ត្បាត។ ១២ អ្នកនៅឆ្ងាយនឹងស្លាប់ដោយជំងឺរាត‌ត្បាត អ្នកនៅជិតនឹងស្លាប់ដោយមុខដាវ អ្នកដែលនៅសេស‌សល់ ហើយត្រូវខ្មាំងឡោម‌ព័ទ្ធ នឹងស្លាប់ដោយទុរ្ភិក្ស។ យើងនឹងដាក់ទោសពួកគេ រហូតចប់ចុងចប់ដើម តាមកំហឹងរបស់យើង។ ១៣ ពេលណាប្រជាជនរបស់គេដួលស្លាប់ ក្នុងចំណោមរូបព្រះក្លែង‌ក្លាយរបស់ខ្លួន នៅជុំ‌វិញអាសនៈ នៅតាមទួលខ្ពស់ៗ នៅតាមកំពូលភ្នំ ក្រោមដើមឈើខៀវខ្ចី និងក្រោមដើមជ្រៃដ៏ស្កឹម‌ស្កៃ គឺស្លាប់នៅតាមកន្លែងដែលពួកគេដុតគ្រឿងក្រអូប សែនព្រះក្លែង‌ក្លាយទាំងប៉ុន្មាន នោះទើបអ្នករាល់គ្នាទទួលស្គាល់ថា យើងពិតជាព្រះ‌អម្ចាស់មែន។ ១៤ យើងនឹងលើកដៃប្រហារពួកគេ យើងនឹងធ្វើឲ្យស្រុករបស់ពួកគេ គឺគ្រប់ទីកន្លែងដែលពួកគេរស់នៅ ក្លាយទៅជាទីស្មសានដ៏ស្ងាត់ជ្រងំ គឺចាប់តាំងពីវាលរហោ‌ស្ថាន រហូតដល់ក្រុងឌីបឡា។ ពេលនោះ ទើបពួកគេទទួលស្គាល់ថា យើងពិតជាព្រះ‌អម្ចាស់មែន”»។

ចុងបញ្ចប់របស់ស្រុកអ៊ីស្រា‌អែល

១ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ២ «កូនមនុស្សអើយ យើងជាព្រះ‌ជា‌អម្ចាស់ យើងប្រាប់ឲ្យអ្នកដឹងថា ស្រុកអ៊ីស្រា‌អែលត្រូវវិនាសហើយ មហន្ត‌រាយកំពុងតែចូលមកតាមទិសទាំងបួន! ៣ អ៊ីស្រា‌អែលអើយ ចុងបញ្ចប់របស់អ្នកមកដល់ហើយ យើងនឹងជះកំហឹងទៅលើអ្នក យើងនឹងវិនិច្ឆ័យទោសអ្នក តាមអំពើដែលអ្នកប្រព្រឹត្ត យើងនឹងដាក់ទោសអ្នក ព្រោះតែព្រះដ៏គួរស្អប់ខ្ពើមទាំងប៉ុន្មានរបស់អ្នក។ ៤ យើងនឹងមិនអាណិតមេត្តាអ្នក ហើយយើងក៏មិនត្រាប្រណីអ្នកដែរ យើងនឹងដាក់ទោសអ្នក ព្រោះតែអំពើអាក្រក់ដែលអ្នកប្រព្រឹត្ត និងការគោរពព្រះដ៏គួរស្អប់ខ្ពើមក្នុងចំណោមអ្នក។ ពេលនោះ អ្នករាល់គ្នានឹងទទួលស្គាល់ថា យើងនេះហើយជាព្រះ‌អម្ចាស់»។

៥ ព្រះ‌ជា‌អម្ចាស់មានព្រះ‌បន្ទូលថា៖ «ទុក្ខវេទនាមកដល់ហើយ! គឺទុក្ខវេទនាខុសប្លែកពីធម្មតា! ៦ ចុងបញ្ចប់កំពុងតែមក ចុងបញ្ចប់មកដល់ហើយ ចុងបញ្ចប់មកប្រឆាំងនឹងអ្នកយ៉ាងឆាប់ៗ ចុងបញ្ចប់មកដល់ហើយ! ៧ អ្នកស្រុកអើយ ពេលដែលអ្នកត្រូវវិនាសមកដល់ហើយ ពេលកំណត់ក៏មកដល់ដែរ។ ថ្ងៃនោះមកដល់ហើយ គឺថ្ងៃដែលលែងមានសម្រែកអរសប្បាយនៅតាមភ្នំ ផ្ទុយទៅវិញ មានតែសម្រែកស្លន់‌ស្លោ។

៨ ឥឡូវនេះ យើងត្រៀមខ្លួនជះកំហឹងលើអ្នក ឥតបង្អង់ឡើយ។ យើងនឹងធ្វើទោសអ្នកតាមកំហឹងរបស់យើង រហូតដល់ចប់ចុងចប់ដើម ព្រោះតែអំពើអាក្រក់ដែលអ្នកប្រព្រឹត្ត។ យើងនឹងវិនិច្ឆ័យទោសអ្នក ព្រោះតែព្រះដ៏គួរស្អប់ខ្ពើមទាំងប៉ុន្មានរបស់អ្នក។ ៩ យើងនឹងមិនអាណិតមេត្តាអ្នក ហើយយើងក៏មិនត្រាប្រណីអ្នកដែរ យើងនឹងដាក់ទោសអ្នក ស្របតាមអំពើអាក្រក់ដែលអ្នកប្រព្រឹត្ត ដោយគោរពព្រះដ៏គួរស្អប់ខ្ពើមទាំងប៉ុន្មាន។ ពេលនោះ អ្នករាល់គ្នានឹងទទួលស្គាល់ថា យើងនេះហើយជាព្រះ‌អម្ចាស់ ដែលបានវាយអ្នក»។

១០ នុ៎ះ‌ហ្ន ថ្ងៃកំណត់! ថ្ងៃកំណត់មកដល់ហើយ! ពេលដែលត្រូវវិនាសមកដល់ហើយ អំពើឃោរ‌ឃៅកាន់តែរីកចម្រើន មនុស្សព្រហើនកើនដល់កម្រិត! ១១ អំពើហិង្សាក៏កើនឡើង ធ្វើឲ្យអំពើអាក្រក់រឹតតែឃោរ‌ឃៅ។ ពួកគេគ្មាននៅសល់អ្វីទៀតទេ គឺបាត់បង់ទ្រព្យ‌សម្បត្តិ បាត់បង់កិត្តិយស និងភាពថ្លៃ‌ថ្នូរ។

១២ ពេលកំណត់មកដល់ហើយ ថ្ងៃកំណត់ក៏មកដល់ដែរ! អ្នកទិញមិនត្រូវអរសប្បាយ អ្នកលក់មិនត្រូវសោកសង្រេង ដ្បិតមហន្ត‌រាយនឹងកើតមានដល់ប្រជាជនទាំងអស់! ១៣ អ្នកលក់ពុំអាចប្រមូលយកអ្វីៗដែលខ្លួនលក់នោះបានមកវិញទេ ទោះបីគេនៅមានជីវិតក៏ដោយ។ ពាក្យដែលយើងប្រកាសដាក់ទោសប្រជាជនទាំងនោះ នឹងសម្រេចជារូបរាង។ ដោយ‌សារកំហុសដែលម្នាក់ៗប្រព្រឹត្ត ពួកគេមិនអាចរក្សាជីវិតរបស់ខ្លួនឡើយ។ ១៤ សំឡេងត្រែលាន់ឮឡើង គ្រប់ៗគ្នាប្រុងប្រៀបខ្លួនជាស្រេច ប៉ុន្តែ គ្មាននរណាម្នាក់ចេញទៅច្បាំងទេ ដ្បិតមហន្ត‌រាយនឹងកើតមានដល់ប្រជាជនទាំងអស់!។

ការដាក់ទោសជនជាតិអ៊ីស្រា‌អែល

១៥ ខាងក្រៅ មានសង្គ្រាម ខាងក្នុងផ្ទះ មានជំងឺរាតត្បាត និងទុរ្ភិក្ស អ្នកនៅតាមស្រែចម្ការនឹងស្លាប់ដោយមុខដាវ រីឯអ្នកនៅក្នុងក្រុងនឹងត្រូវវិនាសដោយទុរ្ភិក្ស និងជំងឺរាតត្បាត។ ១៦ អ្នកដែលគេចខ្លួនរួច នាំគ្នារត់ទៅរស់នៅតាមភ្នំ ដូចព្រាបរស់នៅតាមជ្រលងភ្នំ។ ពួកគេទាំងអស់គ្នាស្រែកថ្ងូរ ព្រោះតែកំហុសដែលម្នាក់ៗបានប្រព្រឹត្ត។

១៧ ពួកគេអស់កម្លាំង ទន់ដៃទន់ជើង។

១៨ ពួកគេស្លៀកបាវកាន់ទុក្ខ ទាំងភ័យញ័ររន្ធត់

ពួកគេបាក់មុខ ហើយកោរសក់ទាំងអស់គ្នា។

១៩ ពួកគេបាចប្រាក់របស់ខ្លួនចោលតាមផ្លូវ

មាសរបស់គេក៏អស់តម្លៃ។

នៅថ្ងៃព្រះ‌អម្ចាស់ព្រះ‌អង្គព្រះ‌ពិរោធ

ប្រាក់ និងមាសពុំអាចរំដោះពួកគេ

ឲ្យរួចខ្លួនឡើយ។

ពួកគេក៏ពុំអាចយកមាសប្រាក់នេះ

ទៅទិញអ្វីមកចម្អែតក្រពះបានដែរ

ដ្បិតមាស និងប្រាក់ ជាមូលហេតុ

នាំពួកគេឲ្យប្រព្រឹត្តអំពើបាប។

២០ គ្រឿងអលង្ការធ្វើឲ្យពួកគេមានចិត្តអំនួត

ពួកគេយកគ្រឿងអលង្ការទាំងនោះទៅសូន

ធ្វើជារូបព្រះដ៏ចង្រៃ គួរស្អប់ខ្ពើម។

ហេតុនេះហើយបានជាយើងធ្វើឲ្យ

គ្រឿងអលង្ការរបស់ពួកគេអស់តម្លៃ។

២១ យើងនឹងបណ្តោយឲ្យសាសន៍ដទៃ

រឹបអូសយកគ្រឿងអលង្ការទាំងនោះ

ហើយឲ្យពួកចោរប្លន់យកជារបស់ជ័យ‌ភ័ណ្ឌ

ព្រមទាំងប្រមាថរូបព្រះធ្វើពី

គ្រឿងអលង្ការទាំងនោះទៀតផង។

២២ ទោះបីមានចោរប្លន់

ហើយប្រមាថសម្បត្តិក្នុងដំណាក់របស់យើងក្តី

ក៏យើងមិនរវី‌រវល់ដែរ។

២៣ «ចូររៀប‌ចំច្រវាក់

ដ្បិតស្រុកនេះពោរ‌ពេញដោយអំពើឧក្រិដ្ឋ

ទីក្រុងពោរ‌ពេញដោយអំពើឃោរ‌ឃៅ។

២៤ យើងនឹងនាំប្រជា‌ជាតិដ៏សាហាវបំផុត

ឲ្យមករឹបអូសយកផ្ទះរបស់ពួកគេ

យើងនឹងបំបាក់អំនួតរបស់ពួកខ្លាំងពូកែ

ហើយខ្មាំងនឹងប្រមាថទី‌សក្ការៈរបស់ពួកគេ។

២៥ ភយន្ដ‌រាយមកដល់ហើយ!

ពួកគេប្រាថ្នាចង់បានសេចក្ដីសុខ

តែគ្មានសេចក្ដីសុខឡើយ!

២៦ មហន្ត‌រាយកើតមានផ្ទួនៗគ្នា

ដំណឹងមិនល្អក៏លេចឮជាបន្តបន្ទាប់ដែរ។

គេចង់ដឹងនិមិត្ត‌ហេតុអស្ចារ្យពីព្យាការី*

ដ្បិតពួកបូជា‌ចារ្យ*លែងទូន្មានពួកគេ

ហើយពួកព្រឹទ្ធា‌ចារ្យ*

ក៏លែងផ្តល់យោបល់អ្វីទៀតដែរ។

២៧ ស្តេចកាន់ទុក្ខ មេដឹកនាំអស់សង្ឃឹម

ប្រជាជននៅក្នុងស្រុកបាក់ទឹកចិត្ត។

យើងនឹងប្រព្រឹត្តចំពោះពួកគេ

តាមអំពើដែលពួកគេបានប្រព្រឹត្ត

យើងនឹងវិនិច្ឆ័យទោសពួកគេ

តាមការវិនិច្ឆ័យរបស់ពួកគេផ្ទាល់។

ពេលនោះ ពួកគេនឹងដឹងថា

យើងជាព្រះ‌អម្ចាស់»។

ការថ្វាយ‌បង្គំព្រះក្លែង‌ក្លាយនៅក្រុងយេរូ‌សាឡឹម

១ នៅឆ្នាំទីប្រាំមួយ ថ្ងៃទីប្រាំ ខែទីប្រាំមួយ ពេលខ្ញុំកំពុងអង្គុយនៅក្នុងផ្ទះ ហើយមានព្រឹទ្ធា‌ចារ្យ*នៃជនជាតិយូដាអង្គុយនៅមុខខ្ញុំ ព្រះ‌ជា‌អម្ចាស់ដាក់ព្រះ‌ហស្ដលើខ្ញុំ។

២ ខ្ញុំក្រឡេកមើលទៅ ឃើញមានដូចជាទ្រង់‌ទ្រាយរបស់មនុស្សម្នាក់។ ពីត្រង់កន្លែងដែលមានរាងដូចចង្កេះចុះទៅក្រោម មានសណ្ឋានដូចភ្លើង ហើយត្រឹមចង្កេះឡើងទៅលើ មានសណ្ឋានដូចជាពន្លឺដ៏ត្រចះ‌ត្រចង់។ ៣ ពេលនោះ មានដូចជាទ្រង់‌ទ្រាយដៃ លូកមកចាប់ទាញសក់ខ្ញុំ។ ព្រះ‌វិញ្ញាណលើកខ្ញុំពីដីឡើងទៅលើមេឃ ឲ្យខ្ញុំឃើញនិមិត្ត‌ហេតុអស្ចារ្យមកពីព្រះ‌ជាម្ចាស់ គឺនាំខ្ញុំទៅក្រុងយេរូ‌សាឡឹម ត្រង់មាត់ទ្វារខាងក្នុង នាទិសខាងជើងកន្លែងមានរូបព្រះក្លែង‌ក្លាយដែលបណ្តាលឲ្យព្រះ‌ជាម្ចាស់ប្រច័ណ្ឌ។ ៤ សិរី‌រុងរឿងរបស់ព្រះនៃជនជាតិអ៊ីស្រា‌អែលសណ្ឋិតនៅទីនោះ មានទ្រង់‌ទ្រាយដូចខ្ញុំបានឃើញនៅតាមជ្រលងភ្នំដែរ។

៥ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ ចូរក្រឡេកមើលទៅទិសខាងជើងទៅ!»។ ខ្ញុំក៏ក្រឡេកមើលទៅទិសខាងជើង ឃើញរូបដែលបណ្តាលឲ្យព្រះ‌ជាម្ចាស់ប្រច័ណ្ឌនោះ ស្ថិតនៅខាងជើងមាត់ទ្វារចូលទីអាសនៈ។ ៦ ព្រះ‌អង្គមានព្រះ‌បន្ទូលមកខ្ញុំទៀតថា៖ «កូនមនុស្សអើយ តើអ្នកឃើញអំពើដែលពួកគេកំពុងប្រព្រឹត្តឬទេ? ពូជ‌ពង្សអ៊ីស្រា‌អែលនាំគ្នាប្រព្រឹត្តអំពើគួរស្អប់ខ្ពើម ធ្វើឲ្យយើងចាកចេញឆ្ងាយពីទី‌សក្ការៈ*របស់យើង។ ប៉ុន្តែ អ្នកនឹងឃើញអំពើគួរស្អប់ខ្ពើមបំផុតជាច្រើនទៀត»។

៧ ពេលនោះ ព្រះ‌អង្គនាំខ្ញុំឆ្ពោះទៅមាត់ទ្វារចូលលានព្រះ‌វិហារ។ ខ្ញុំក្រឡេកមើលទៅឃើញមានរន្ធមួយនៅក្នុងជញ្ជាំង។ ៨ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ ចូរចោះជញ្ជាំងទៅ!»។ ខ្ញុំក៏ចោះជញ្ជាំង ធ្វើប្រឡោះមួយ។ ៩ ព្រះ‌អង្គមានព្រះ‌បន្ទូលមកខ្ញុំថា៖ «ចូរចូលមកមើលអំពើអាក្រក់គួរឲ្យស្អប់ខ្ពើម ដែលពួកគេកំពុងប្រព្រឹត្តនៅទីនេះ!»។ ១០ ខ្ញុំក៏ចូលទៅមើល ឃើញមានរូបសត្វលូនវារ និងសត្វចង្រៃគ្រប់ប្រភេទ ព្រមទាំងរូបព្រះក្លែង‌ក្លាយទាំងអស់របស់ពូជ‌ពង្សអ៊ីស្រា‌អែល ឆ្លាក់លើជញ្ជាំងដែលនៅជុំ‌វិញ។ ១១ មានព្រឹទ្ធា‌ចារ្យនៃពូជ‌ពង្សអ៊ីស្រា‌អែលចិត‌សិបនាក់ ឈរនៅមុខរូបទាំងនោះ ម្នាក់ៗកាន់គ្រឿងក្រអូប ដែលធ្វើឲ្យមានផ្សែងខ្មួល‌ខ្មាញ់ហុយឡើង។ លោកយ៉ាសា‌ណា ជាកូនរបស់លោកសាផន ស្ថិតនៅកណ្ដាលចំណោមពួកគេ។ ១២ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ តើអ្នកឃើញអំពើដែលព្រឹទ្ធា‌ចារ្យរបស់ពូជ‌ពង្សអ៊ីស្រា‌អែលធ្វើនៅទីងងឹតឬទេ? នៅក្នុងបន្ទប់ ម្នាក់ៗថ្វាយ‌បង្គំរូបព្រះរបស់ខ្លួន។ ពួកគេពោលថា “ព្រះ‌អម្ចាស់មើលយើងពុំឃើញទេ! ព្រះ‌អម្ចាស់បោះបង់ចោលស្រុកនេះហើយ”»។

១៣ ព្រះ‌អង្គមានព្រះ‌បន្ទូលមកខ្ញុំថា៖ «អ្នកនឹងឃើញអំពើគួរស្អប់ខ្ពើមបំផុតជាច្រើនទៀត ដែលពួកគេកំពុងប្រព្រឹត្ត»។ ១៤ ព្រះ‌អង្គនាំខ្ញុំទៅទ្វារចូលព្រះ‌ដំណាក់របស់ព្រះ‌អម្ចាស់ ប៉ែកខាងជើង។ នៅទីនោះ ស្រីៗអង្គុយយំស្រណោះព្រះតាមុស។ ១៥ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ តើអ្នកឃើញឬទេ? អ្នកនឹងឃើញអំពើគួរស្អប់ខ្ពើមអាក្រក់ជាងនេះទៅទៀត»។

១៦ បន្ទាប់មក ព្រះ‌អង្គនាំខ្ញុំទៅទី‌លានខាងក្នុងព្រះ‌ដំណាក់របស់ព្រះ‌អម្ចាស់។ នៅមាត់ទ្វារព្រះ‌វិហារ គឺនៅចន្លោះច្រកចូល និងអាសនៈ មានមនុស្សប្រមាណម្ភៃ‌ប្រាំនាក់បែរខ្នងដាក់ទី‌សក្ការៈរបស់ព្រះ‌អម្ចាស់ ហើយបែរមុខទៅទិសខាងកើត នាំគ្នាក្រាបថ្វាយ‌បង្គំព្រះ‌អាទិត្យ។ ១៧ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ តើអ្នកឃើញឬទេ? អំពើគួរស្អប់ខ្ពើមដែលពូជ‌ពង្សយូដាប្រព្រឹត្តនៅទីនេះមិនទាន់គ្រប់គ្រាន់ទេ បានជាពួកគេប្រព្រឹត្តអំពើឃោរ‌ឃៅពាស‌ពេញស្រុកថែមទៀត ពួកគេចេះតែធ្វើឲ្យយើងខឹង។ ពួកគេយកមែកឈើដាក់ជិតច្រមុះរបស់ខ្លួន។ ១៨ យើងនឹងប្រព្រឹត្តចំពោះពួកគេ តាមកំហឹងរបស់យើង។ យើងនឹងមិនអាណិតមេត្តាពួកគេ ហើយក៏មិនត្រាប្រណីពួកគេដែរ។ កាលណាពួកគេស្រែកអង្វរយើង យើងនឹងមិនស្ដាប់ពួកគេឡើយ»។

ការដាក់ទោសក្រុងយេរូ‌សាឡឹម

១ បន្ទាប់មក ខ្ញុំឮព្រះ‌អង្គមានព្រះ‌បន្ទូលយ៉ាងខ្លាំងៗថា៖ «អស់អ្នកដែលត្រូវធ្វើទោសក្រុងយេរូ‌សាឡឹមអើយ ចូរនាំគ្នាកាន់អាវុធសម្រាប់ប្រល័យជីវិតចូលមក!»។

២ ពេលនោះ ខ្ញុំឃើញមានមនុស្សប្រាំមួយនាក់ចូលតាមទ្វារកំពែងខាងជើង ម្នាក់ៗកាន់អាវុធសម្រាប់ប្រហារជីវិត។ ក្នុងចំណោមអ្នកទាំងនោះ មានបុរសម្នាក់ពាក់អាវទេស‌ឯកសុទ្ធ ស្ពាយប្រដាប់‌ប្រដាសរសេរនៅចង្កេះផង។ ពួកគេចូលមកឈរនៅខាងមុខអាសនៈលង្ហិន។ ៣ ពេលនោះ សិរី‌រុងរឿងរបស់ព្រះនៃជនជាតិអ៊ីស្រា‌អែល ដែលស្ថិតនៅលើខេរូប៊ីម*ក៏អណ្ដែតឡើង ឆ្ពោះទៅមាត់ទ្វារព្រះ‌ដំណាក់។ ព្រះ‌អម្ចាស់ត្រាស់ហៅបុរសដែលពាក់អាវទេស‌ឯកសុទ្ធ និងស្ពាយប្រដាប់‌ប្រដាសម្រាប់សរសេរនោះមក ៤ ព្រះ‌អង្គមានព្រះ‌បន្ទូលទៅគាត់ថា៖ «ចូរដើរកាត់ក្រុងយេរូ‌សាឡឹម ហើយគូសសញ្ញាជើងក្អែកលើថ្ងាសអស់អ្នកដែលស្រែកថ្ងូរ និងព្រួយចិត្ត ដោយឃើញអំពើគួរឲ្យស្អប់ខ្ពើមទាំងប៉ុន្មាន ដែលអ្នកក្រុងនេះប្រព្រឹត្ត»។ ៥ បន្ទាប់មក ខ្ញុំឮព្រះ‌អង្គមានព្រះ‌បន្ទូលទៅអ្នកឯទៀតៗថា៖ «ចូរដើរតាមក្រោយគាត់ ហើយប្រហារអ្នកក្រុងនេះទៅ កុំអាណិតមេត្តា និងត្រាប្រណីពួកគេឡើយ! ៦ ចូរសម្លាប់ពួកគេទាំងអស់គ្នាឲ្យផុតពូជ គឺទាំងចាស់ ទាំងកំលោះ ទាំងក្រមុំ ទាំងក្មេង ទាំងស្ត្រី តែកុំប៉ះ‌ពាល់អស់អ្នកដែលមានសញ្ញាជើងក្អែកឡើយ។ ចូរចាប់ផ្តើមពីទី‌សក្ការៈរបស់យើងទៅ!»។ អ្នកទាំងនោះក៏ចាប់ផ្តើមសម្លាប់ពួកព្រឹទ្ធា‌ចារ្យ* ដែលនៅខាងមុខព្រះ‌ដំណាក់។ ៧ ព្រះ‌អង្គមានព្រះ‌បន្ទូលទៅគេទៀតថា៖ «ចូរធ្វើឲ្យព្រះ‌ដំណាក់ទៅជាសៅហ្មង ដោយទុកសាក‌សពចោលពាស‌ពេញទី‌លាន រួចនាំគ្នាចេញទៅចុះ!»។ ពួកគេក៏ចេញទៅវាយប្រហារជីវិតប្រជាជននៅក្នុងទីក្រុង។

៨ ពេលអ្នកទាំងនោះប្រហារជីវិតប្រជាជន ខ្ញុំនៅតែម្នាក់ឯង ខ្ញុំក៏ក្រាបចុះ ឱនមុខដល់ដី ហើយស្រែកឡើងថា៖ «ព្រះ‌ជា‌អម្ចាស់អើយ តើព្រះ‌អង្គជះព្រះ‌ពិរោធ មកលើក្រុងយេរូ‌សាឡឹម ដោយប្រល័យជីវិតជនជាតិអ៊ីស្រា‌អែលទាំងប៉ុន្មានដែលនៅសេស‌សល់ឬ?»។ ៩ ព្រះ‌អង្គមានព្រះ‌បន្ទូលមកខ្ញុំថា៖ «ពូជ‌ពង្សអ៊ីស្រា‌អែល និងពូជ‌ពង្សយូដា មានកំហុសធ្ងន់ណាស់។ ពួកគេសម្លាប់គ្នាពាស‌ពេញស្រុក ហើយអំពើទុច្ចរិតក៏មានពាស‌ពេញទីក្រុងដែរ។ ពួកគេពោលថា “ព្រះ‌អម្ចាស់បោះបង់ចោលស្រុកនេះហើយ ព្រះ‌អម្ចាស់ទតអ្វីពុំឃើញទេ”។ ១០ ហេតុនេះ យើងមិនអាណិត‌អាសូរ និងត្រាប្រណីពួកគេឡើយ គឺយើងនឹងដាក់ទោសពួកគេតាមអំពើដែលខ្លួនប្រព្រឹត្ត»។ ១១ ពេលនោះ បុរសដែលពាក់អាវទេស‌ឯកសុទ្ធ និងស្ពាយប្រដាប់‌ប្រដាសម្រាប់សរសេរ ទូលព្រះ‌អង្គថា៖ «ទូល‌បង្គំបានធ្វើតាមបង្គាប់របស់ព្រះ‌អង្គសព្វគ្រប់ហើយ»។

លោកអេសេ‌គីអែលនិមិត្តឃើញព្រះ‌អម្ចាស់សាជាថ្មី

(សូមអាន ១.១-២៨)

១ ខ្ញុំក្រឡេកមើលទៅ ឃើញមានលំហអាកាសនៅពីលើក្បាលរបស់ពួកខេរូប៊ីម*។ ក្នុងលំហអាកាសនោះ មានដូចជាបល្ល័ង្កមួយធ្វើពីត្បូងកណ្ដៀង។ ២ ព្រះ‌អម្ចាស់មានព្រះ‌បន្ទូលទៅកាន់បុរសដែលពាក់អាវទេស‌ឯកសុទ្ធនោះថា៖ «ចូរចូលទៅខាងក្នុងកង់ ដែលស្ថិតនៅពីក្រោមពួកខេរូប៊ីម ហើយយករងើកភ្លើង ដែលកំពុងតែឆេះនៅចន្លោះពួកខេរូប៊ីមពេញមួយក្បង់ដៃ រួចជះទៅលើទីក្រុងទៅ!»។

ខ្ញុំក៏ឃើញបុរសនោះចូលទៅ។ ៣ ពេលគាត់ទៅដល់ ពួកខេរូប៊ីមស្ថិតនៅខាងស្តាំព្រះ‌ដំណាក់ ហើយមានពពកពាស‌ពេញទី‌លានខាងក្នុង។ ៤ សិរី‌រុងរឿងរបស់ព្រះ‌អម្ចាស់អណ្ដែតឡើងពីលើពួកខេរូប៊ីម ឆ្ពោះកាន់មាត់ទ្វារព្រះ‌ដំណាក់។ មានពពកនៅពេញព្រះ‌ដំណាក់ ហើយទី‌លានក៏ពេញទៅដោយរស្មីនៃសិរី‌រុងរឿងរបស់ព្រះ‌អម្ចាស់។ ៥ សន្ធឹកស្លាបរបស់ពួកខេរូប៊ីម លាន់ឮរហូតទៅដល់ទី‌លានខាងក្រៅ មានសូរ‌ស័ព្ទដូចព្រះ‌សូរសៀងរបស់ព្រះដ៏មានឫទ្ធា‌នុភាពខ្ពង់‌ខ្ពស់បំផុត។ ៦ ព្រះ‌អម្ចាស់បង្គាប់ទៅបុរសដែលពាក់អាវទេស‌ឯកសុទ្ធដូចតទៅ៖ «ចូរយកភ្លើងពីក្នុងកង់ នៅចន្លោះពួកខេរូប៊ីមមក!»។ បុរសនោះក៏ទៅឈរក្បែរកង់។ ៧ ពេលនោះ ខេរូប៊ីមមួយលូកដៃទៅកាន់ភ្លើង ដែលកំពុងឆេះនៅចន្លោះពួកខេរូប៊ីម ហើយយកភ្លើងហុចទៅឲ្យបុរសនោះ។ គាត់ក៏ទទួលយក រួចចេញទៅ។ ៨ នៅក្រោមស្លាបរបស់ពួកខេរូប៊ីម មានហាក់ដូចជាដៃរបស់មនុស្សលេចចេញមក។

៩ ខ្ញុំក្រឡេកមើលទៅ ឃើញមានកង់បួននៅក្បែរពួកខេរូប៊ីម គឺនៅក្បែរខេរូប៊ីមនីមួយៗមានកង់មួយ។ កង់ទាំងនោះភ្លឺចាំងដូចត្បូងពេជ្រ។ ១០ កង់ទាំងបួនមានទ្រង់‌ទ្រាយ និងមានសណ្ឋានដូចៗគ្នាទាំងអស់ គឺភ្លឺចាំងដូចត្បូងពេជ្រ។ ដោយកង់ទាំងនោះមានទ្រង់‌ទ្រាយ និងមានរាងដូចៗគ្នា មើលទៅហាក់ដូចជាកង់មួយស្ថិតនៅក្នុងកង់មួយទៀត។ ១១ ពេលកង់ទាំងនោះវិលទៅមុខ វាអាចវិលទៅទិសទាំងបួន ដោយឥតងាករេ គឺវាវិលទៅមុខ តាមទិសដែលមុខរបស់ខេរូប៊ីមបែរទៅគេ ដោយឥតងាករេឡើយ។ ១២ រូបកាយរបស់ខេរូប៊ីមទាំងមូល គឺខ្នង ដៃ ស្លាប មានផ្កាភ្លើងពាស‌ពេញ ហើយតាមរង្វង់កង់របស់ខេរូប៊ីមទាំងបួនក៏មានផ្កាភ្លើងពាស‌ពេញដែរ។ ១៣ ខ្ញុំឮគេហៅកង់ទាំងនោះថា “ខ្យល់កួច”។ ១៤ ខេរូប៊ីមនីមួយៗមានមុខបួន។ មុខទីមួយដូចមុខខេរូប៊ីម មុខទីពីរដូចមុខមនុស្ស មុខទីបីដូចមុខសិង្ហ មុខទីបួនដូចមុខឥន្ទ្រី។ ១៥ ពួកខេរូប៊ីមទាំងនោះក៏ហោះឡើង គឺសត្វលោកដែលខ្ញុំបានឃើញក្បែរទន្លេកេបារ។ ១៦ ពេលខេរូប៊ីមទៅមុខ កង់ក៏វិលទៅមុខជាមួយ ពេលខេរូប៊ីមទទះស្លាបហោះឡើងផុតពីដី កង់ក៏នៅជាប់ជាមួយដែរ។ ១៧ ពេលខេរូប៊ីមឈប់ កង់ក៏ឈប់ ពេលខេរូប៊ីមឡើង កង់ក៏ឡើងទៅជាមួយ ដ្បិតវិញ្ញាណរបស់សត្វលោកទាំងនោះស្ថិតនៅក្នុងកង់។

១៨ សិរី‌រុងរឿងរបស់ព្រះ‌អម្ចាស់អណ្ដែតឡើងពីមាត់ទ្វារព្រះ‌ដំណាក់ ទៅសណ្ឋិតលើពួកខេរូប៊ីម។ ១៩ ខ្ញុំឃើញខេរូប៊ីមទាំងនោះទទះស្លាបហោះឡើង ហើយកង់ក៏ទៅជាមួយដែរ។ សិរី‌រុងរឿងរបស់ព្រះនៃជនជាតិអ៊ីស្រា‌អែលសណ្ឋិតនៅលើខេរូប៊ីម ហើយឈប់នៅមាត់ទ្វារកំពែងខាងកើតនៃព្រះ‌ដំណាក់របស់ព្រះ‌អម្ចាស់។ ២០ ពេលនោះ ខ្ញុំដឹងថា សត្វលោកដែលខ្ញុំបានឃើញនៅក្រោមព្រះនៃជនជាតិអ៊ីស្រា‌អែល ក្បែរទន្លេកេបារ គឺខេរូប៊ីមនេះឯង។ ២១ ខេរូប៊ីមនីមួយៗមានមុខបួន មានស្លាបបួន ហើយនៅពីក្រោមស្លាប មានទ្រង់‌ទ្រាយដូចដៃមនុស្ស។ ២២ ខេរូប៊ីមទាំងនោះ មានមុខដូចសត្វលោក ដែលខ្ញុំបានឃើញក្បែរទន្លេកេបារ បេះបិទ។ ខេរូប៊ីមនីមួយៗហើរទៅមុខយ៉ាងត្រង់។

ព្រះ‌អម្ចាស់ដាក់ទោសមេដឹកនាំអ៊ីស្រា‌អែល

១ ព្រះ‌វិញ្ញាណលើកខ្ញុំឡើង ហើយនាំខ្ញុំឆ្ពោះទៅទ្វារខាងកើតនៃព្រះ‌ដំណាក់របស់ព្រះ‌អម្ចាស់។ មានមនុស្សម្ភៃ‌ប្រាំនាក់អង្គុយនៅមាត់ទ្វារនោះ។ ខ្ញុំឃើញមេដឹកនាំពីរនាក់របស់ប្រជាជន ស្ថិតនៅកណ្ដាលចំណោមពួកគេ គឺលោកយ៉ាសា‌នីយ៉ា ជាកូនរបស់លោកអស្សួរ និងលោកពេឡា‌ទីយ៉ា ជាកូនរបស់លោកបេណា‌យ៉ា។ ២ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ ពួកនេះជាមនុស្សរៀប‌ចំគម្រោង‌ការប្រព្រឹត្តអំពើទុច្ចរិត ហើយផ្តល់យោបល់អាក្រក់ដល់ក្រុងនេះ។ ៣ ពួកគេពោលថា “គ្មាននរណាសង់ផ្ទះក្នុងពេលឆាប់ៗខាងមុខទេ។ ក្រុងនេះប្រៀបបាននឹងឆ្នាំង រីឯពួកយើង ពួកយើងជាសាច់នៅក្នុងឆ្នាំង”។ ៤ ដូច្នេះ កូនមនុស្សអើយ ចូរថ្លែងព្រះ‌បន្ទូល ចូរប្រកាសប្រឆាំងនឹងពួកគេទៅ!»។

៥ ពេលនោះ ព្រះ‌វិញ្ញាណរបស់ព្រះ‌អម្ចាស់មកសណ្ឋិតលើខ្ញុំ ព្រះ‌អង្គមានព្រះ‌បន្ទូលមកខ្ញុំថា៖ «ចូរប្រកាសថា ព្រះ‌អម្ចាស់មានព្រះ‌បន្ទូលដូចតទៅ: ពូជ‌ពង្សអ៊ីស្រា‌អែលអើយ អ្វីៗដែលអ្នករាល់គ្នានិយាយ អ្វីៗដែលអ្នករាល់គ្នាគិត យើងដឹងទាំងអស់។ ៦ អ្នករាល់គ្នាបានសម្លាប់មនុស្សជាច្រើននៅក្នុងទីក្រុង អ្នករាល់គ្នាបានធ្វើឲ្យមានសាក‌សពពាស‌ពេញផ្លូវ។ ៧ ហេតុនេះ ព្រះ‌ជា‌អម្ចាស់មានព្រះ‌បន្ទូលថា សាក‌សពដែលអ្នករាល់គ្នាបានសម្លាប់នៅក្នុងទីក្រុង ប្រៀបបាននឹងសាច់មែន ហើយទីក្រុងជាឆ្នាំង។ រីឯអ្នករាល់គ្នាវិញ យើងនឹងដេញអ្នករាល់គ្នាចេញពីក្រុងនេះ។ ៨ អ្នករាល់គ្នាខ្លាចសង្គ្រាម តែយើងនឹងធ្វើឲ្យសង្គ្រាមកើតមានដល់អ្នករាល់គ្នា -នេះជាព្រះ‌បន្ទូលរបស់ព្រះ‌ជា‌អម្ចាស់។ ៩ យើងនឹងដេញអ្នករាល់គ្នាចេញពីទីក្រុង យើងនឹងប្រគល់អ្នករាល់គ្នាទៅក្នុងកណ្ដាប់ដៃរបស់ជនបរទេស យើងនឹងប្រព្រឹត្តចំពោះអ្នករាល់គ្នា តាមការវិនិច្ឆ័យរបស់យើង។ ១០ អ្នករាល់គ្នានឹងដួលស្លាប់ដោយមុខដាវ។ យើងនឹងដាក់ទោសអ្នករាល់គ្នា ក្នុងទឹកដីអ៊ីស្រា‌អែល ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន។ ១១ ក្រុងនេះមិនមែនជាឆ្នាំងសម្រាប់អ្នករាល់គ្នាទេ អ្នករាល់គ្នាក៏មិនមែនជាសាច់នៅក្នុងក្រុងនេះដែរ។ យើងនឹងដាក់ទោសអ្នករាល់គ្នានៅក្នុងទឹកដីអ៊ីស្រា‌អែល។ ១២ នៅពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន។ អ្នករាល់គ្នាពុំបានប្រព្រឹត្តតាមវិន័យរបស់យើងទេ ហើយអ្នករាល់គ្នាក៏ពុំបានធ្វើតាមបញ្ញត្តិរបស់យើងដែរ តែអ្នករាល់គ្នាបែរជាយកតម្រាប់តាមប្រជា‌ជាតិនានា ដែលនៅជុំ‌វិញ»។

១៣ ពេលខ្ញុំកំពុងថ្លែងព្រះ‌បន្ទូលទាំងនេះ លោកពេឡា‌ទីយ៉ា ជាកូនរបស់លោកបេណា‌យ៉ា ក៏ស្លាប់មួយរំពេច។ ខ្ញុំក្រាបចុះឱនមុខដល់ដី ហើយស្រែកយ៉ាងខ្លាំងៗថា៖ «ឱព្រះ‌ជា‌អម្ចាស់អើយ! ព្រះ‌អង្គមុខជាប្រល័យជនជាតិអ៊ីស្រា‌អែល ដែលនៅសេស‌សល់ ឲ្យវិនាសសូន្យមិនខាន!»។

ព្រះ‌បន្ទូលសន្យាចំពោះប្រជាជនដែលជាប់ជាឈ្លើយ

១៤ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ១៥ «កូនមនុស្សអើយ ប្រជាជននៅក្រុងយេរូ‌សាឡឹមនាំគ្នាពោលទៅកាន់បង‌ប្អូន និងសាច់‌ញាតិរបស់អ្នក ព្រមទាំងជនជាតិអ៊ីស្រា‌អែលទាំងមូលថា “ចូរស្ថិតនៅឲ្យឆ្ងាយពីព្រះ‌អម្ចាស់ ដ្បិតព្រះ‌អង្គប្រគល់ទឹកដីនេះឲ្យតែពួកយើងប៉ុណ្ណោះ”។ ១៦ ចូរប្រាប់បង‌ប្អូនរបស់អ្នកថា “ព្រះ‌ជា‌អម្ចាស់មានព្រះ‌បន្ទូលដូចតទៅ: ទោះបីយើងបណ្តេញអ្នករាល់គ្នាទៅក្នុងចំណោមប្រជា‌ជាតិនានា ដែលនៅឆ្ងាយៗ ទោះបីយើងកម្ចាត់‌កម្ចាយអ្នករាល់គ្នាទៅតាមស្រុកផ្សេងៗក្តី ក៏យើងនឹងធ្វើជាទី‌សក្ការៈសម្រាប់អ្នករាល់គ្នានៅក្នុងស្រុកទាំងនោះដែរ”។ ១៧ ចូរប្រាប់ពួកគេទៀតថា “ព្រះ‌ជា‌អម្ចាស់មានព្រះ‌បន្ទូលដូចតទៅ: យើងនឹងនាំអ្នករាល់គ្នាចេញពីកណ្ដាលចំណោមជាតិសាសន៍នានាមកវិញ យើងនឹងប្រមូលអ្នករាល់គ្នាពីស្រុកទាំង‌ឡាយ ដែលអ្នករាល់គ្នាខ្ចាត់‌ខ្ចាយទៅ ហើយយើងនឹងប្រគល់ទឹកដីអ៊ីស្រា‌អែលឲ្យអ្នករាល់គ្នា”។ ១៨ ពួកគេនឹងនាំគ្នាត្រឡប់មកវិញ ហើយដកព្រះក្លែង‌ក្លាយដ៏ចង្រៃគួរឲ្យស្អប់ខ្ពើមទាំងប៉ុន្មាន ចេញពីទឹកដីនេះ។ ១៩ យើងនឹងឲ្យពួកគេមានចិត្តតែមួយ យើងនឹងដាក់វិញ្ញាណថ្មីនៅក្នុងពួកគេ យើងដកចិត្តរឹងដូចថ្មចេញពីពួកគេ ហើយឲ្យពួកគេមានចិត្តចេះស្ដាប់បង្គាប់វិញ ២០ ដើម្បីឲ្យពួកគេធ្វើតាមវិន័យរបស់យើង ហើយយកចិត្តទុកដាក់ប្រតិបត្តិតាមបញ្ញត្តិរបស់យើង។ ពួកគេនឹងទៅជាប្រជា‌រាស្ដ្ររបស់យើង យើងក៏ទៅជាព្រះរបស់ពួកគេ។ ២១ រីឯអស់អ្នកដែលជាប់ចិត្តនឹងព្រះក្លែង‌ក្លាយដ៏ចង្រៃគួរឲ្យស្អប់ខ្ពើមវិញ យើងនឹងដាក់ទោសពួកគេតាមអំពើដែលខ្លួនប្រព្រឹត្ត» -នេះជាព្រះ‌បន្ទូលរបស់ព្រះ‌ជា‌អម្ចាស់។

សិរី‌រុងរឿងរបស់ព្រះ‌អម្ចាស់ចាកចេញពីក្រុងយេរូ‌សាឡឹម

២២ ពួកខេរូប៊ីម*ទទះស្លាបហោះ ហើយកង់ក៏ឡើងទៅជាមួយដែរ សិរី‌រុងរឿងរបស់ព្រះនៃជនជាតិអ៊ីស្រា‌អែលស្ថិតនៅពីលើខេរូប៊ីមទាំងនោះ។ ២៣ សិរី‌រុងរឿងរបស់ព្រះ‌អម្ចាស់ក៏អណ្ដែតឡើងពីទីក្រុង ហើយស្ថិតនៅលើភ្នំខាងកើតទីក្រុង។ ២៤ ព្រះ‌វិញ្ញាណលើកខ្ញុំឡើង ហើយនាំខ្ញុំឆ្ពោះទៅស្រុកខាល់ដេ ឲ្យនៅជាមួយប្រជាជនដែលជាប់ជាឈ្លើយ។ បន្ទាប់មក និមិត្ត‌ហេតុអស្ចារ្យដែលព្រះ‌វិញ្ញាណរបស់ព្រះ‌អម្ចាស់សម្ដែងឲ្យខ្ញុំឃើញនោះ ក៏រលាយបាត់ទៅ។ ២៥ ខ្ញុំក៏និយាយប្រាប់ប្រជាជនជាប់ជាឈ្លើយនូវអ្វីៗទាំងប៉ុន្មាន ដែលព្រះ‌អម្ចាស់សម្ដែងឲ្យខ្ញុំឃើញ។

ប្រផ្នូលអំពីអ៊ីស្រា‌អែលត្រូវខ្ចាត់‌ខ្ចាយ

១ ព្រះ‌អម្ចាស់មានព្រះ‌បន្ទូលមកខ្ញុំថា៖ ២ «កូនមនុស្សអើយ! អ្នករស់នៅក្នុងចំណោមពូជអ្នកបះ‌បោរ។ ពួកគេមានភ្នែក តែមើលមិនឃើញ មានត្រចៀក តែស្ដាប់មិនឮ ដ្បិតពួកគេជាពូជអ្នកបះ‌បោរ។ ៣ កូនមនុស្សអើយ ចូររៀប‌ចំបង្វេច ដូចជនដែលត្រូវខ្មាំងកៀរ ហើយចេញពីផ្ទះទាំងថ្ងៃឲ្យពួកគេឃើញគ្រប់ៗគ្នា។ ធ្វើដូច្នេះប្រហែលជាពួកគេដឹងខ្លួនថា ពួកគេជាពូជអ្នកបះ‌បោរ។ ៤ អ្នកត្រូវរៀប‌ចំអីវ៉ាន់ វេចបង្វេចទាំងថ្ងៃ ដូចជនដែលត្រូវខ្មាំងកៀរ ឲ្យគេឃើញគ្រប់គ្នា។ ដល់ពេល ល្ងាចត្រូវចេញដំណើរទៅដូចជនដែលត្រូវខ្មាំងកៀរ។ ៥ ចូរទម្លុះកំពែងឲ្យគេឃើញ រួចបញ្ចេញបង្វេចតាមប្រឡោះនោះ។ ៦ ត្រូវលើកបង្វេចនោះស្ពាយឲ្យពួកគេឃើញ ហើយចេញដំណើរទៅ ទាំងងងឹត ព្រមទាំងបិទមុខ ដើម្បីកុំឲ្យអ្នកឃើញថាអ្នកទៅទីណា ដ្បិតយើងចង់ឲ្យអ្នកធ្វើដូច្នេះ ជាប្រផ្នូលសម្រាប់ពូជ‌ពង្សអ៊ីស្រា‌អែល»។

៧ ខ្ញុំធ្វើតាមបញ្ជារបស់ព្រះ‌អម្ចាស់ គឺនៅពេលថ្ងៃ ខ្ញុំរៀប‌ចំអីវ៉ាន់ វេចបង្វេច ដូចជនដែលត្រូវខ្មាំងកៀរ។ នៅពេលល្ងាច ខ្ញុំទម្លុះកំពែងក្រុងដោយដៃរបស់ខ្ញុំផ្ទាល់ ហើយចេញដំណើរទៅនៅពេលងងឹត ទាំងស្ពាយបង្វេចឲ្យពួកគេឃើញទាំងអស់គ្នា។

៨ លុះព្រឹកឡើង ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ៩ «កូនមនុស្សអើយ! ពូជ‌ពង្សអ៊ីស្រា‌អែលដែលជាពូជបះ‌បោរនេះ មុខជាសួរអ្នកថា “តើលោកធ្វើអ្វី?” ១០ ត្រូវតបទៅពួកគេថា “ព្រះ‌ជា‌អម្ចាស់មានព្រះ‌បន្ទូលថា នេះជាការព្រមានដល់ស្តេចនៅក្រុងយេរូ‌សាឡឹម និងពូជ‌ពង្សអ៊ីស្រា‌អែលទាំងមូល ដែលស្ថិតនៅក្រុងនេះ”។ ១១ ចូរប្រាប់ពួកគេថា “ខ្ញុំធ្វើដូច្នេះ ជាប្រផ្នូលសម្រាប់អ្នករាល់គ្នា។ ខ្ញុំធ្វើយ៉ាងណា អ្នករាល់គ្នាក៏ធ្វើយ៉ាងនោះដែរ គឺអ្នករាល់គ្នានឹងត្រូវខ្មាំងកៀរយកទៅជាឈ្លើយ។ ១២ រីឯស្តេចដែលគ្រប់‌គ្រងអ្នករាល់គ្នា ក៏នឹងស្ពាយបង្វេចចាកចេញពីក្រុងទៅ ក្នុងពេលងងឹតដែរ។ គេនឹងទម្លុះកំពែងក្រុងឲ្យស្តេចចេញ ទាំងបិទមុខ មិនឲ្យឃើញថាទៅទីណា។ ១៣ យើងនឹងបោះសំណាញ់ទៅលើស្តេច ហើយស្តេចនោះនឹងជាប់អន្ទាក់របស់យើង។ យើងនឹងនាំគេទៅស្រុកបាប៊ីឡូន គឺស្រុករបស់ជនជាតិខាល់ដេ គេនឹងស្លាប់នៅស្រុកនោះ តែឥតបានឃើញស្រុកនោះឡើយ។ ១៤ យើងនឹងកម្ចាត់‌កម្ចាយអស់អ្នកដែលនៅជាមួយស្តេច គឺទាំងអង្គ‌រក្ស និងទាហានទាំងប៉ុន្មានរបស់ស្តេច ឲ្យទៅគ្រប់ទីកន្លែង ព្រមទាំងយកដាវដេញតាមប្រហារពួកគេពីក្រោយផង។ ១៥ ពេលណាយើងបំបែកពួកគេឲ្យទៅនៅក្នុងចំណោមប្រជា‌ជាតិនានា ពេលណាយើងកម្ចាត់‌កម្ចាយពួកគេទៅនៅតាមស្រុកទាំង‌ឡាយ ពួកគេនឹងទទួលស្គាល់ថា យើងពិតជាព្រះ‌អម្ចាស់មែន។ ១៦ ប៉ុន្តែ យើងទុកឲ្យពួកគេមួយចំនួននៅសេស‌សល់ គឺគេចផុតពីមុខដាវ ពីទុរ្ភិក្ស និងជំងឺរាត‌ត្បាត ដើម្បីឲ្យរៀបរាប់អំពីការប្រព្រឹត្តគួរស្អប់ខ្ពើមទាំងនេះប្រាប់ប្រជា‌ជាតិនានា។ ពេលនោះ ពួកគេនឹងទទួលស្គាល់ថា យើងពិតជាព្រះ‌អម្ចាស់មែន”»។

១៧ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ១៨ «កូនមនុស្សអើយ ចូរបរិភោគអាហារ ទាំងញាប់‌ញ័រ ចូរផឹកទឹកទាំងស្លន់‌ស្លោ និងភ័យរន្ធត់។ ១៩ ចូរថ្លែងប្រាប់ប្រជាជននៅស្រុកនេះដូចតទៅ: ព្រះ‌ជា‌អម្ចាស់មានព្រះ‌បន្ទូលស្តីអំពីអ្នកក្រុងយេរូ‌សាឡឹម ដែលរស់នៅលើទឹកដីអ៊ីស្រា‌អែលថា ពួកគេនឹងបរិភោគអាហារ ទាំងភ័យរន្ធត់ ពួកគេនឹងផឹកទឹកទាំងតក់‌ស្លុត ដ្បិតស្រុករបស់គេក្លាយទៅជាទីស្មសាន បាត់បង់អ្វីៗទាំងអស់ ព្រោះតែអំពើឃោរ‌ឃៅដែលអ្នកស្រុកនេះប្រព្រឹត្ត។ ២០ ក្រុងដែលធ្លាប់តែមានប្រជាជនកុះ‌ករ នឹងក្លាយទៅជាគំនរបាក់បែក ហើយស្រុករបស់ពួកគេក្លាយទៅជាទីស្មសាន។ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន»។

២១ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ២២ «កូនមនុស្សអើយ នៅស្រុកអ៊ីស្រា‌អែល អ្នករាល់គ្នាមានសុភាសិតមួយចែងថា “ពេលវេលាចេះតែបោះជំហានទៅមុខ តែគ្មាននិមិត្ត‌ហេតុណាមួយសម្រេចជារូបរាងសោះ!”។ ២៣ ដូច្នេះ ចូរប្រាប់ពួកគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: យើងនឹងលុបបំបាត់សុភាសិតនេះ គឺគេនឹងលែងនិយាយពីសុភាសិតនេះ នៅស្រុកអ៊ីស្រា‌អែលទៀតហើយ។ ផ្ទុយទៅវិញ ចូរប្រាប់ពួកគេថា “ពេលវេលាចេះតែបោះជំហានទៅមុខ និមិត្ត‌ហេតុទាំងប៉ុន្មាននឹងសម្រេចជារូបរាងមិនខាន” ២៤ ដ្បិតនៅស្រុកអ៊ីស្រា‌អែល លែងមាននិមិត្ត‌ហេតុឥតបានការ ឬការទស្សន៍‌ទាយ បញ្ជោរទៀតហើយ។ ២៥ យើងជាព្រះ‌អម្ចាស់ ការអ្វីដែលយើងថ្លែងតែងតែសម្រេចជារូបរាង ឥតបង្អង់ឡើយ។ ពិតមែនហើយ យើងនឹងសម្រេចតាមពាក្យរបស់យើង ក្នុងពេលអ្នករាល់គ្នាដែលជាពូជអ្នកបះ‌បោរ នៅមានជីវិតនៅឡើយ» -នេះជាព្រះ‌បន្ទូលរបស់ព្រះ‌ជា‌អម្ចាស់។

២៦ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២៧ «កូនមនុស្សអើយ កូនចៅអ៊ីស្រា‌អែលពោលថា “និមិត្ត‌ហេតុអស្ចារ្យដែលអ្នកឃើញនេះ គឺសម្រាប់អនាគត‌កាលដ៏យូរ‌លង់ ហើយសេចក្ដីដែលគាត់ថ្លែងក៏សម្រាប់ពេលដ៏ឆ្ងាយខាងមុខដែរ”។ ២៨ ហេតុនេះ ចូរប្រាប់ពួកគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: អ្វីៗដែលយើងថ្លែងតែងតែសម្រេចជារូបរាង ឥតបង្អង់ឡើយ» - នេះជាព្រះ‌បន្ទូលរបស់ព្រះ‌ជា‌អម្ចាស់។

ព្រះ‌បន្ទូលប្រឆាំងនឹងព្យាការីក្លែង‌ក្លាយ

១ ព្រះ‌អម្ចាស់មានព្រះ‌បន្ទូលមកខ្ញុំថា៖ ២ «កូនមនុស្សអើយ! ចូរថ្លែងព្រះ‌បន្ទូល ប្រឆាំងនឹងពួកព្យាការីរបស់ជនជាតិអ៊ីស្រា‌អែល។ ចូរប្រាប់ពួកព្យាការីដែលបានទស្សន៍‌ទាយតាមអំពើចិត្តរបស់ខ្លួនថា: ចូរស្ដាប់ព្រះ‌បន្ទូលរបស់ព្រះ‌អម្ចាស់!។ ៣ ព្រះ‌ជា‌អម្ចាស់មានព្រះ‌បន្ទូលថា: ព្យាការីល្ងី‌ល្ងើអើយ អ្នករាល់គ្នាត្រូវវេទនាហើយ! អ្នករាល់គ្នាទស្សន៍‌ទាយតាមការនឹកឃើញរបស់ខ្លួន គឺឥតបានឃើញនិមិត្ត‌ហេតុពីព្រះ‌ជាម្ចាស់ឡើយ។ ៤ ឱអ៊ីស្រា‌អែលអើយ ព្យាការីរបស់អ្នកប្រៀបបាននឹងកញ្ជ្រោង ដែលរស់នៅតាមគំនរបាក់បែក! ៥ ព្យាការីក្លែង‌ក្លាយអើយ អ្នករាល់គ្នាពុំបានឡើងទៅជួស‌ជុលកំពែងធ្លុះ‌ធ្លាយ អ្នករាល់គ្នាពុំបានធ្វើរបង ដើម្បីឲ្យពូជ‌ពង្សអ៊ីស្រា‌អែលការ‌ពារខ្លួនក្នុងពេលមានសង្គ្រាម នៅថ្ងៃដែលព្រះ‌អម្ចាស់ព្រះ‌ពិរោធទេ។ ៦ អ្នករាល់គ្នារៀបរាប់ពីនិមិត្ត‌ហេតុឥតបានការ និងពាក្យទស្សន៍‌ទាយបោកប្រាស់។ អ្នករាល់គ្នាតែងពោលថា “នេះជាព្រះ‌បន្ទូលរបស់ព្រះ‌អម្ចាស់” តែព្រះ‌អម្ចាស់ពុំបានចាត់អ្នករាល់គ្នាមកទេ។ អ្នករាល់គ្នាសង្ឃឹមថា ពាក្យរបស់ខ្លួននឹងសម្រេចជារូបរាង។ ៧ និមិត្ត‌ហេតុដែលអ្នករាល់គ្នារៀបរាប់នោះ សុទ្ធតែឥតបានការ ហើយពាក្យដែលអ្នករាល់គ្នាទស្សន៍‌ទាយសុទ្ធតែកុហក! អ្នករាល់គ្នាតែងពោលថា “នេះជាព្រះ‌បន្ទូលរបស់ព្រះ‌អម្ចាស់!” តែយើងពុំបាននិយាយឡើយ»។ ៨ ហេតុនេះ ព្រះ‌ជា‌អម្ចាស់មានព្រះ‌បន្ទូលដូចតទៅ៖ «ដោយអ្នករាល់គ្នាពោលតែពាក្យឥតបានការ ហើយរៀបរាប់អំពីនិមិត្ត‌ហេតុកុហក យើងនឹងដាក់ទោសអ្នករាល់គ្នា -នេះជាព្រះ‌បន្ទូលរបស់ព្រះ‌ជា‌អម្ចាស់។ ៩ ពួកព្យាការីក្លែង‌ក្លាយអើយ យើងនឹងប្រហារអ្នករាល់គ្នា ព្រោះអ្នករាល់គ្នារៀបរាប់អំពីនិមិត្ត‌ហេតុឥតបានការ និងទស្សន៍‌ទាយបោកប្រាស់។ អ្នករាល់គ្នាមិនស្ថិតនៅក្នុងចំណោមប្រជាជនរបស់យើង ហើយក៏គ្មានឈ្មោះក្នុងបញ្ជីរបស់ពូជ‌ពង្សអ៊ីស្រា‌អែលដែរ អ្នករាល់គ្នានឹងមិនវិលត្រឡប់ទៅកាន់ទឹកដីអ៊ីស្រា‌អែលវិញឡើយ។ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌ជា‌អម្ចាស់មែន។

១០ ព្យាការីទាំងនោះបាននាំប្រជាជនរបស់យើងឲ្យវង្វេង ដោយពោលថា មានសន្តិ‌ភាពហើយ! តែគ្មានសន្តិ‌ភាពទាល់តែសោះ។ ប្រជាជនរបស់យើងសង់ជញ្ជាំង ហើយព្យាការីទាំងនោះនាំគ្នាបូកបាយ‌អពីលើ។ ១១ ចូរប្រកាសប្រាប់អ្នកបូកបាយអទាំងនោះថា: ជញ្ជាំងនេះមុខជារលំមិនខាន! ភ្លៀងនឹងបង្អុរមកយ៉ាងខ្លាំង ព្រឹលក៏ធ្លាក់មក ហើយខ្យល់ព្យុះក៏កើតមានដែរ ពេលនោះ ជញ្ជាំងនឹងរលំបាក់បែកអស់។ ១២ ពេលជញ្ជាំងរលំ គេនឹងសួរអ្នករាល់គ្នា តើបាយ‌អដែលអ្នករាល់គ្នាបូកនោះទៅណាបាត់ហើយ?»។ ១៣ ហេតុនេះ ព្រះ‌ជា‌អម្ចាស់មានព្រះ‌បន្ទូលដូចតទៅ៖ «យើងនឹងធ្វើឲ្យមានព្យុះបក់បោកមក តាមកំហឹងដ៏ខ្លាំងក្លារបស់យើង ហើយនឹងមានភ្លៀងបង្អុរមកយ៉ាងខ្លាំង តាមកំហឹងរបស់យើង ព្រឹលនឹងធ្លាក់ចុះមកយ៉ាងសាហាវ ធ្វើឲ្យជញ្ជាំងរលំ។ ១៤ យើងនឹងកម្ទេចជញ្ជាំងដែលអ្នករាល់គ្នាបូកបាយ‌អពីលើ យើងនឹងធ្វើឲ្យជញ្ជាំងនោះរលំដល់ដី គ្រឹះរបស់វានឹងរលើង ហើយជញ្ជាំងរលំសង្កត់លើអ្នករាល់គ្នា។ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន។ ១៥ យើងនឹងប្រព្រឹត្តចំពោះជញ្ជាំងនោះ ព្រមទាំងអស់អ្នកដែលបូកបាយ‌អ តាមកំហឹងរបស់យើង រហូតដល់ចប់ចុងចប់ដើម។ គេនឹងពោលថា: គ្មានជញ្ជាំង គ្មានអ្នកបូកបាយ‌អ ១៦ គ្មានព្យាការីរបស់ជនជាតិអ៊ីស្រា‌អែលទស្សន៍‌ទាយអំពីក្រុងយេរូ‌សាឡឹម និងរៀបរាប់អំពីនិមិត្ត‌ហេតុ ដែលថាក្រុងនេះនឹងមានសន្តិ‌ភាព តែគ្មានសន្តិ‌ភាពសោះ! -នេះជាព្រះ‌បន្ទូលរបស់ព្រះ‌ជា‌អម្ចាស់។

ព្រះ‌បន្ទូលប្រឆាំងនឹងព្យាកា‌រិនីក្លែង‌ក្លាយ

១៧ កូនមនុស្សអើយ ចូរបែរមុខទៅរកស្រីៗនៃប្រជាជនរបស់អ្នក ដែលទស្សន៍‌ទាយតាមអំពើចិត្តរបស់ខ្លួន។ ចូរថ្លែងព្រះ‌បន្ទូលប្រឆាំងនឹងស្រីទាំងនោះទៅ! ១៨ ចូរពោលទៅពួកគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: វេទនាហើយស្រីៗ ដែលវេញអំបោះឲ្យប្រជាជនទាំងអស់ពាក់នៅកដៃ និងដេរឆ្នួតឲ្យប្រជាជនគ្រប់អាយុពាក់នៅលើក្បាល ដើម្បីខាបព្រលឹង! ពួកនាងខាបព្រលឹងប្រជាជនរបស់យើង ហើយនឹកស្មានថាអាចរក្សាជីវិតរបស់ខ្លួនបានឬ? ១៩ ពួកនាងបន្ថោកយើងនៅចំពោះមុខប្រជាជនរបស់យើង ព្រោះចង់បានអង្ករពីរបីក្តាប់ និងនំបុ័ងពីរបីដុំ។ ពួកនាងបោកប្រាស់ប្រជាជនរបស់យើង ដ្បិតគេឆាប់ជឿពាក្យកុហករបស់ពួកនាង ធ្វើដូច្នេះ ពួកនាងសម្លាប់អស់អ្នកដែលមិនត្រូវស្លាប់ តែទុកជីវិតឲ្យអស់អ្នកដែលមិនត្រូវរស់»។

២០ ហេតុនេះ ព្រះ‌ជា‌អម្ចាស់មានព្រះ‌បន្ទូលថា៖ «យើងប្រឆាំងនឹងអំបោះ ដែលពួកនាងប្រើសម្រាប់ខាបព្រលឹង។ យើងនឹងយកអំបោះទាំងនោះចេញពីដៃរបស់ពួកនាង ហើយដោះលែងព្រលឹងដែលពួកនាងចាប់យកមកឃុំ‌ឃាំង។ ២១ យើងនឹងហែកឆ្នួតរបស់ពួកនាង ព្រមទាំងដោះលែងប្រជាជនរបស់យើងពីកណ្ដាប់ដៃពួកនាង ហើយពួកនាងមិនអាចចាប់ពួកគេ ទុកជារំពាក្នុងកណ្ដាប់ដៃរបស់ខ្លួនបានឡើយ។ ពេលនោះ ពួកនាងនឹងទទួលស្គាល់ថា យើងពិតជាព្រះ‌អម្ចាស់មែន។ ២២ ដោយ‌សារពាក្យកុហក ពួកនាងបំបាក់ទឹកចិត្តរបស់មនុស្សសុចរិត ដែលយើងពុំបានធ្វើឲ្យពិបាកចិត្ត។ ពួកនាងលើកទឹកចិត្តមនុស្សអាក្រក់ ឲ្យដើរក្នុងផ្លូវអាក្រក់តទៅទៀត មិនឲ្យគេងាកចេញពីផ្លូវរបស់ខ្លួន ដើម្បីទទួលជីវិតឡើយ។ ២៣ ពួកនាងនឹងលែងប្រឌិតនិមិត្ត‌ហេតុដ៏ឥតបានការ ហើយក៏លែងទស្សន៍‌ទាយទៀតដែរ។ យើងនឹងដោះលែងប្រជា‌រាស្ដ្ររបស់យើងពីកណ្ដាប់ដៃរបស់ពួកនាង។ ពេលនោះ ពួកនាងនឹងទទួលស្គាល់ថា យើងពិតជាព្រះ‌អម្ចាស់មែន»។

អ៊ីស្រា‌អែលត្រូវតែបោះបង់ចោលព្រះក្លែង‌ក្លាយ

១ មានព្រឹទ្ធា‌ចារ្យអ៊ីស្រា‌អែលខ្លះមកជួបខ្ញុំ ហើយនាំគ្នាអង្គុយនៅមុខខ្ញុំ។ ២ ពេលនោះ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖

៣ «កូនមនុស្សអើយ អ្នកទាំងនោះជំពាក់ចិត្តនឹងព្រះក្លែង‌ក្លាយ ហើយនាំគ្នាគោរពអ្វីៗដែលនាំឲ្យខ្លួនប្រព្រឹត្តអំពើបាប។ តើពួកគេនឹកស្មានថា យើងនឹងផ្តល់ចម្លើយឲ្យឬ? ៤ ចូរនាំពាក្យទៅប្រាប់ពួកគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: ក្នុងចំណោមពូជ‌ពង្សអ៊ីស្រា‌អែល អ្នកណាជំពាក់ចិត្តនឹងព្រះក្លែង‌ក្លាយ ហើយគោរពអ្វីៗដែលនាំឲ្យខ្លួនប្រព្រឹត្តអំពើបាប រួចមករកព្យាការី យើងជាព្រះ‌អម្ចាស់ យើងនឹងឆ្លើយតបទៅអ្នកនោះវិញ ដោយផ្ទាល់តែម្ដង។ យើងនឹងឆ្លើយទៅគេវិញ តាមចំនួនព្រះក្លែង‌ក្លាយដែលគេគោរព។ ៥ ចម្លើយរបស់យើងនឹងធ្វើឲ្យជនជាតិអ៊ីស្រា‌អែលរំជួលចិត្ត ដ្បិតពួកគេបានងាកចេញឆ្ងាយពីយើង ទៅគោរពព្រះក្លែង‌ក្លាយទាំងអស់គ្នា។ ៦ ហេតុនេះ ចូរប្រាប់ពូជ‌ពង្សអ៊ីស្រា‌អែលថា ព្រះ‌ជា‌អម្ចាស់មានព្រះ‌បន្ទូលដូចតទៅ: “ចូរវិលត្រឡប់មកវិញ ចូរលះ‌បង់ព្រះក្លែង‌ក្លាយ ហើយងាកចេញពីអំពើគួរស្អប់ខ្ពើមទាំងប៉ុន្មានដែលអ្នករាល់គ្នាប្រព្រឹត្ត!

៧ ប្រសិនបើជនជាតិអ៊ីស្រា‌អែល ឬជនបរទេសណាម្នាក់ដែលរស់នៅក្នុងស្រុកអ៊ីស្រា‌អែល ងាកចេញឆ្ងាយពីយើង ព្រមទាំងជំពាក់ចិត្តនឹងព្រះក្លែង‌ក្លាយ ហើយនាំគ្នាគោរពអ្វីៗដែលនាំឲ្យខ្លួនប្រព្រឹត្តអំពើបាប រួចមករកព្យាការីទស្សន៍‌ទាយ យើងដែលជាព្រះ‌អម្ចាស់យើងនឹងឆ្លើយតបទៅអ្នកនោះវិញ ដោយផ្ទាល់តែម្ដង។ ៨ យើងនឹងដាក់ទោសអ្នកនោះ យើងនឹងធ្វើឲ្យអ្នកនោះក្លាយទៅជាគំរូអាក្រក់ និងជាមេរៀនសម្រាប់ព្រមានអ្នកឯទៀតៗ យើងនឹងដកអ្នកនោះចេញពីចំណោមប្រជា‌រាស្ដ្ររបស់យើង។ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន។

៩ ប្រសិនបើព្យាការីចាញ់ការល្បួងរបស់គេ ហើយឆ្លើយតបទៅគេវិញ គឺយើងជាព្រះ‌អម្ចាស់បានបណ្តោយឲ្យព្យាការីនោះចាញ់ការល្បួង។ យើងនឹងដាក់ទោសគាត់ ហើយដកគាត់ចេញពីចំណោមអ៊ីស្រា‌អែលជាប្រជា‌រាស្ដ្ររបស់យើង។ ១០ ព្យាការី និងអ្នកទៅរកព្យាការីទស្សន៍‌ទាយត្រូវទទួលទោសដូចគ្នា ព្រោះគេប្រព្រឹត្តអំពើបាបតែមួយ។ ១១ ដូច្នេះ ជនជាតិអ៊ីស្រា‌អែលលែងវង្វេងចេញឆ្ងាយពីយើង ហើយលែងសៅហ្មងដោយអំពើទុច្ចរិតទាំងប៉ុន្មានទៀតហើយ។ ពេលនោះ គេនឹងធ្វើជាប្រជា‌រាស្ដ្ររបស់យើង ហើយយើងធ្វើជាព្រះរបស់ពួកគេ”» - នេះជាព្រះ‌បន្ទូលរបស់ព្រះ‌ជា‌អម្ចាស់។

ទោសដែលអ៊ីស្រា‌អែលត្រូវតែទទួល

១២ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ១៣ «កូនមនុស្សអើយ ប្រសិនបើប្រជាជននៅក្នុងស្រុកទាំងមូលប្រព្រឹត្តអំពើបាប ដោយក្បត់យើង យើងនឹងដាក់ទោសពួកគេឲ្យខ្វះស្បៀង និងកើតទុរ្ភិក្ស ហើយដកជីវិតទាំងមនុស្សទាំងសត្វនៅស្រុកនោះផង។ ១៤ ទោះបីនៅស្រុកនោះ មានណូអេ ដានីអែល និងយ៉ូបក្តី ក៏សេចក្ដីសុចរិតរបស់អ្នកទាំងបី រក្សាបានត្រឹមតែជីវិតរបស់ខ្លួនគេផ្ទាល់ប៉ុណ្ណោះ - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៥ ប្រសិនបើយើងឲ្យសត្វសាហាវចូលមកក្នុងស្រុក ប្រល័យជីវិតអ្នកស្រុក និងធ្វើឲ្យស្រុកនោះក្លាយទៅជាទីស្មសាន គ្មាននរណាដើរកាត់ ព្រោះខ្លាចសត្វទាំងនោះ ១៦ ទោះបីមានអ្នកទាំងបីរស់នៅក្នុងស្រុកក្តី យើងសុំប្រកាសក្នុងនាមយើងជាព្រះដែលមានជីវិតគង់នៅថា អ្នកទាំងបីរំដោះបានតែជីវិតរបស់ខ្លួនប៉ុណ្ណោះ គឺសូម្បីតែកូនប្រុសកូនស្រីរបស់គេផ្ទាល់ ក៏គេពុំអាចរំដោះបានដែរ ហើយស្រុកនោះនឹងក្លាយទៅជាទីស្មសាន - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៧ ប្រសិនបើយើងធ្វើឲ្យសង្គ្រាមកើតមានដល់ស្រុក ប្រសិនបើយើងបញ្ជាឲ្យកង‌ទ័ពមួយវាយលុកស្រុកនោះ ប្រល័យជីវិតទាំងមនុស្សទាំងសត្វ ១៨ ទោះបីមានអ្នកទាំងបីរស់នៅក្នុងស្រុកក្តី យើងសុំប្រកាសក្នុងនាមយើងជាព្រះដែលមានជីវិតគង់នៅថា អ្នកទាំងបីរំដោះបានតែជីវិតរបស់ខ្លួនប៉ុណ្ណោះ គឺសូម្បីតែកូនប្រុសកូនស្រីរបស់គេផ្ទាល់ ក៏គេពុំអាចរំដោះបានដែរ - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៩ ប្រសិនបើយើងធ្វើឲ្យជំងឺរាត‌ត្បាតកើតមានក្នុងស្រុកនេះ ដើម្បីដាក់ទោសពួកគេ ដោយប្រល័យជីវិតទាំងមនុស្សទាំងសត្វ ២០ ទោះបីមានណូអេ ដានីអែល និងយ៉ូបរស់នៅក្នុងស្រុកក្តី យើងសុំប្រកាសក្នុងនាមយើងជាព្រះដែលមានជីវិតគង់នៅថា សេចក្ដីសុចរិតរបស់អ្នកទាំងបីរំដោះបានតែជីវិតរបស់ខ្លួនប៉ុណ្ណោះ គឺសូម្បីតែកូនប្រុសកូនស្រីរបស់គេផ្ទាល់ ក៏គេពុំអាចរំដោះបានដែរ» - នេះជាព្រះ‌បន្ទូលរបស់ព្រះ‌ជា‌អម្ចាស់ -។

២១ ពិតមែនហើយ ព្រះ‌ជា‌អម្ចាស់មានព្រះ‌បន្ទូលថា៖ «ទោះបីយើងដាក់ទោសក្រុងយេរូ‌សាឡឹម ដោយគ្រោះកាចទាំងបួនយ៉ាង គឺសង្គ្រាម ទុរ្ភិក្ស សត្វសាហាវ និងជំងឺរាត‌ត្បាត ដើម្បីប្រល័យជីវិតពួកគេទាំងមនុស្សទាំងសត្វក្តី ២២ ក៏មានមនុស្សប្រុសស្រីមួយចំនួននៅសេស‌សល់ដែរ។ ខ្មាំងនឹងកៀរអ្នកទាំងនោះឲ្យចេញមកនៅជាមួយអ្នករាល់គ្នា។ អ្នករាល់គ្នានឹងឃើញរបៀបដែលគេរស់នៅ ព្រមទាំងរបៀបដែលគេប្រព្រឹត្ត ហើយអ្នករាល់គ្នានឹងធូរស្រាលក្នុងចិត្ត ចំពោះទុក្ខវេទនាដែលយើងបានធ្វើឲ្យកើតមានដល់ក្រុងយេរូ‌សាឡឹម។ ២៣ អ្នកទាំងនោះនឹងសម្រាលទុក្ខអ្នករាល់គ្នា តាមរបៀបដែលគេរស់នៅ និងរបៀបដែលគេប្រព្រឹត្ត ហើយអ្នករាល់គ្នានឹងយល់ថា អ្វីៗទាំងអស់ដែលយើងប្រព្រឹត្តចំពោះក្រុងនេះមិនមែនឥតមូលហេតុទេ» - នេះជាព្រះ‌បន្ទូលរបស់ព្រះ‌ជា‌អម្ចាស់។

អ៊ីស្រា‌អែលប្រៀបបាននឹងអុសដែលគេដុត

១ ព្រះ‌ជា‌អម្ចាស់មានព្រះ‌បន្ទូលមកខ្ញុំដូចតទៅនេះ៖ ២ «កូនមនុស្សអើយ តើដើមទំពាំង‌បាយ‌ជូរជាអុសល្អជាងអុសឯទៀតៗឬ? តើមែកទំពាំង‌បាយ‌ជូរល្អជាងមែកឈើឯទៀតៗឬ?។ ៣ តើគេអាចយកដើមទំពាំង‌បាយ‌ជូរនេះទៅឆ្លាក់ធ្វើវត្ថុអ្វីមួយ ឬក៏យកទៅប្រើសម្រាប់ព្យួរអ្វីមួយបានឬ?។ ៤ គេប្រើអុសនេះបានត្រឹមតែដុតប៉ុណ្ណោះ។ ពេលណាភ្លើងឆេះកន្ទុយអុសទាំងសងខាង និងឆេះផ្នែកកណ្ដាលអស់ហើយ តើគេអាចយកទៅប្រើការអ្វីបានទៀត?។ ៥ កាលវានៅទាំងមូល គេយកទៅប្រើការអ្វីមិនបានផង ចុះទម្រាំបើត្រូវភ្លើងឆេះអស់ នោះវារឹង‌រឹតតែលែងបានការ!»។

៦ ហេតុនេះហើយបានជាព្រះ‌អម្ចាស់មានព្រះ‌បន្ទូលថា៖ «គេយកអុសទំពាំង‌បាយ‌ជូរពីចំណោមឈើឯទៀតៗនៅក្នុងព្រៃទៅដុតយ៉ាងណា យើងក៏ដាក់ទោសអ្នកក្រុងយេរូ‌សាឡឹមយ៉ាងនោះដែរ។ ៧ យើងនឹងដាក់ទោសពួកគេ ទោះបីពួកគេខំប្រឹងរត់ចេញពីភ្លើងក្តី ក៏ភ្លើងនៅតែឆេះបំផ្លាញពួកគេមិនខាន។ ពេលឃើញយើងដាក់ទោសពួកគេ នោះអ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន! ៨ យើងនឹងធ្វើឲ្យស្រុករបស់គេក្លាយទៅជាទីស្មសាន ព្រោះពួកគេបាននាំគ្នាក្បត់យើង»-នេះជាព្រះ‌បន្ទូលរបស់ព្រះ‌ជា‌អម្ចាស់។

យេរូ‌សាឡឹមប្រៀបបាននឹងស្ត្រីផិតក្បត់

១ ព្រះ‌អម្ចាស់មានព្រះ‌បន្ទូលមកខ្ញុំថា៖ ២ «កូនមនុស្សអើយ! ចូរប្រាប់អ្នកក្រុងយេរូ‌សាឡឹមឲ្យដឹង ពីអំពើដ៏គួរឲ្យស្អប់ខ្ពើម ដែលពួកគេប្រព្រឹត្ត។ ៣ ចូរប្រាប់ពួកគេថា ព្រះ‌ជា‌អម្ចាស់មានព្រះ‌បន្ទូលមកកាន់ក្រុងយេរូ‌សាឡឹមដូចតទៅ: នាងមានកំណើតនៅស្រុកកាណាន។ ឪពុករបស់នាងជាសាសន៍អាម៉ូរី ម្ដាយរបស់នាងជាសាសន៍ហេត។ ៤ នៅថ្ងៃដែលនាងកើត គេមិនបានកាត់ផ្ចិតនាងទេ គេមិនបានយកទឹកមកលាងសំអាតនាង គេមិនបានយកអំបិលមកលាបនាង ហើយគេក៏មិនបានយកសំពត់មករុំនាងដែរ។ ៥ គ្មាននរណាយកភ្នែកមើលនាងទេ ហើយក៏គ្មាននរណាថែទាំនាងដែរ។ ផ្ទុយទៅវិញ នៅថ្ងៃនាងកើត គេស្អប់ខ្ពើមនាង ហើយយកនាងទៅបោះចោលនៅវាលស្រែ។ ៦ យើងបានដើរកាត់តាមនោះ ឃើញនាងកំពុងតែបម្រះក្នុងថ្លុកឈាម យើងក៏ប្រាប់នាងថា ចូរមានជីវិតឡើង! ទោះបីនាងស្ថិតនៅក្នុងឈាមក៏ដោយ ចូរមានជីវិតឡើង! ៧ យើងបានធ្វើឲ្យនាងចម្រើនឡើង ដូចដំណាំលូតលាស់នៅតាមចម្ការ។ នាងក៏បានចម្រើនធំឡើងពេញរូបពេញរាង មានរូបឆោមល្អឥតខ្ចោះ។ ប៉ុន្តែ នាងគ្មានសម្លៀក‌បំពាក់បិទ‌បាំងកាយទេ។ ៨ យើងបានដើរកាត់តាមនោះ ឃើញនាងពេញវ័យ ដល់ពេលមានគូ‌ស្រករហើយ យើងក៏លាតអាវធំរបស់យើងបិទ‌បាំងរូបកាយនាង។ យើងបានសន្យាយ៉ាងឱឡា‌រិក ហើយចងសម្ពន្ធ‌មេត្រីជាមួយនាង ដើម្បីឲ្យនាងបានទៅជាភរិយារបស់យើង -នេះជាព្រះ‌បន្ទូលរបស់ព្រះ‌ជា‌អម្ចាស់។

៩ យើងបានយកទឹកមកលាងនាង ហើយជម្រះឈាមដែលប្រឡាក់រូបកាយនាង រួចចាក់ប្រេងក្រអូបលាបនាងទៀតផង។ ១០ យើងបានឲ្យសម្លៀក‌បំពាក់ធ្វើពីក្រណាត់ប៉ាក់មកនាង យើងយកស្បែកជើងដ៏ល្អវិសេសមកពាក់ឲ្យនាង ហើយក៏យកស្បៃដ៏ល្អប្រណីត និងអាវធំធ្វើពីសូត្រមកពាក់ឲ្យនាងដែរ។ ១១ យើងយកគ្រឿងអលង្ការមកពាក់ឲ្យនាង គឺមានខ្សែដៃ ខ្សែក ១២ ក្រវិល ទំហូ និងមកុដដ៏ភ្លឺផ្លេក។ ១៣ នាងពាក់សុទ្ធតែមាស និងប្រាក់ ស្លៀកសម្លៀក‌បំពាក់ដ៏ល្អប្រណីត ធ្វើអំពីសូត្រ និងក្រណាត់ប៉ាក់ដ៏មានតម្លៃ។ នាងបរិភោគសុទ្ធតែម្ហូបអាហារឆ្ងាញ់ពិសេស គឺម្ហូបធ្វើពីម្សៅម៉ដ្ត ទឹកឃ្មុំ និងប្រេងដ៏មានតម្លៃ។ នាងមានរូបឆោមលោមពណ៌កាន់តែស្អាតឡើងៗ ហើយទទួលឋានៈជាព្រះ‌មហាក្សត្រិ‌យានី។ ១៤ កេរ្តិ៍ឈ្មោះរបស់នាងល្បីរន្ទឺសុស‌សាយ ក្នុងចំណោមប្រជា‌ជាតិទាំង‌ឡាយ ព្រោះនាងមានសម្ផស្សល្អឥតខ្ចោះ និងតែងខ្លួនដោយគ្រឿងអលង្ការដែលយើងប្រគល់ឲ្យ - នេះជាព្រះ‌បន្ទូលរបស់ព្រះ‌ជា‌អម្ចាស់។

១៥ ប៉ុន្តែ នាងអួត‌អាងលើរូបសម្បត្តិ និងកេរ្តិ៍ឈ្មោះ ហើយក្លាយទៅជាស្រីពេស្យា ដោយប្រគល់ខ្លួនឲ្យអស់អ្នកដែលដើរកាត់មុខនាង។ ១៦ នាងយកសម្លៀក‌បំពាក់របស់នាង ជាសម្លៀក‌បំពាក់ធ្វើពីក្រណាត់ចម្រុះពណ៌ ទៅតាក់តែងទី‌សក្ការៈនៅតាមទួលខ្ពស់ៗ ហើយប្រព្រឹត្តអំពើពេស្យា‌ចារនៅទីនោះ - ពីមុនក្តី នៅពេលខាងមុខក្តី មិនដែលមានរឿងដូច្នេះកើតឡើងទេ -។ ១៧ នាងយកគ្រឿងអលង្ការមាសប្រាក់ដែលយើងឲ្យ ទៅសូនធ្វើជារូបបដិមាប្រុសៗ រួចប្រព្រឹត្តអំពើពេស្យា‌ចារជាមួយរូបទាំងនោះ។ ១៨ នាងយកអាវប៉ាក់របស់នាងទៅដណ្តប់រូបទាំងនោះ ព្រមទាំងយកប្រេង និងគ្រឿងក្រអូបរបស់យើង ទៅលាបឲ្យផង។ ១៩ រីឯអាហារ ម្សៅដ៏ម៉ដ្ត ប្រេង និងទឹកឃ្មុំ ដែលយើងចែកឲ្យនាងបរិភោគ នាងបែរជាយកទៅធ្វើជាគ្រឿងសក្ការ‌បូជាផ្គាប់ចិត្តរូបទាំងនោះទៅវិញ - នេះជាព្រះ‌បន្ទូលរបស់ព្រះ‌ជា‌អម្ចាស់។ ២០ នាងពុំស្កប់ចិត្តនឹងអំពើពេស្យា‌ចារទេ គឺនាងបានយកកូនប្រុសកូនស្រីដែលនាងបានបង្កើតឲ្យយើង ទៅធ្វើយញ្ញ‌បូជាដល់រូបទាំងនោះទៀតផង! ២១ នាងបានអារ ក កូនប្រុសរបស់យើង ហើយដុតថ្វាយរូបទាំងនោះ។ ២២ ក្នុងពេលដែលនាងឈ្លក់នឹងអំពើពេស្យា‌ចារដ៏គួរឲ្យស្អប់ខ្ពើមទាំងនេះ នាងពុំបាននឹកឃើញគ្រាដែលនាងនៅពីក្មេង គ្មានសម្លៀក‌បំពាក់បិទ‌បាំងកាយ ហើយបម្រះនៅក្នុងថ្លុកឈាមនោះទេ។

២៣ នាងនឹងត្រូវវេទនា ព្រោះតែអំពើអាក្រក់ទាំងប៉ុន្មានដែលនាងប្រព្រឹត្ត គឺនាងពិតជាត្រូវវេទនាមិនខាន - នេះជាព្រះ‌បន្ទូលរបស់ព្រះ‌ជា‌អម្ចាស់។ ២៤ នាងបានសង់ខ្ទម សម្រាប់ប្រព្រឹត្តអំពើពេស្យា‌ចារគ្រប់ទីកន្លែង ២៥ គឺនាងសង់នៅគ្រប់ច្រកផ្លូវ ហើយប្រើសម្រស់របស់ខ្លួនប្រព្រឹត្តអំពើគួរស្អប់ខ្ពើម។ នាងប្រគល់ខ្លួនទៅឲ្យអស់អ្នកដើរកាត់តាមនោះ នាងប្រព្រឹត្តអំពើពេស្យា‌ចារកាន់តែច្រើនឡើងៗ។ ២៦ នាងប្រព្រឹត្តអំពើពេស្យា‌ចារជាមួយជនជាតិអេស៊ីប ជាអ្នកជិតខាងដែលមានកម្លាំងមាំ‌មួន។ នាងប្រព្រឹត្តអំពើពេស្យា‌ចារកាន់តែច្រើនឡើងៗ រហូតដល់ធ្វើឲ្យយើងខឹង។ ២៧ ហេតុនេះបានជាយើងសម្ដែងបារមីប្រឆាំងនឹងនាង យើងកាត់បន្ថយទឹកដីរបស់នាង ហើយប្រគល់នាងទៅក្នុងកណ្ដាប់ដៃរបស់ខ្មាំងសត្រូវ គឺពួកភីលី‌ស្ទីនដែលនឹកខ្មាសចំពោះអំពើថោកទាបរបស់នាង។ ២៨ ដោយនាងពុំស្កប់ចិត្ត នាងក៏ប្រព្រឹត្តអំពើពេស្យា‌ចារជាមួយជនជាតិអាស្ស៊ីរី។ ប៉ុន្តែ ទោះបីនាងបានប្រព្រឹត្តអំពើពេស្យា‌ចារជាមួយអ្នកទាំងនោះក្តី ក៏នាងនៅតែពុំស្កប់ដដែល។ ២៩ នាងប្រព្រឹត្តអំពើពេស្យា‌ចារកាន់តែច្រើនឡើងៗជាមួយជនជាតិបាប៊ីឡូនជាអ្នកជំនួញ ប៉ុន្តែ នាងនៅតែពុំស្កប់ចិត្តដដែល។ ៣០ នាងមានចិត្តសាវ៉ាណាស់ នាងប្រព្រឹត្តអំពើទាំងនេះដែលជាអំពើរបស់មេបនពេស្យា! - នេះជាព្រះ‌បន្ទូលរបស់ព្រះ‌ជា‌អម្ចាស់។ ៣១ រៀងរាល់ពេលដែលនាងសង់ខ្ទមនៅតាមច្រកផ្លូវ ហើយរៀប‌ចំកន្លែងប្រព្រឹត្តអំពើពេស្យា‌ចារគ្រប់ទិស‌ទី នាងពុំបានទារប្រាក់ដែលស្រីពេស្យាធ្លាប់ទារនោះទេ។ ៣២ នាងជាស្ត្រីផិតប្ដី ទៅស្រឡាញ់ប្រុសដទៃ។ ៣៣ ធម្មតា ស្រីពេស្យាតែងតែទទួលជំនូន រីឯនាង នាងបែរជាយកជំនូនទៅឲ្យសហាយរបស់ខ្លួនទៅវិញ។ នាងយកជំនូនទៅទាក់‌ទាញពួកគេពីគ្រប់ទីកន្លែង មករួមផិតក្បត់ជាមួយនាង។ ៣៤ នាងប្រព្រឹត្តផ្ទុយពីស្រីពេស្យាឯទៀតៗ គ្មាននរណាស្វែងរកនាង គ្មាននរណាបង់ប្រាក់នាងទេ ផ្ទុយទៅវិញ នាងបែរជាបង់ប្រាក់ឲ្យគេ គឺនាងធ្វើផ្ទុយពីអ្នកដទៃ។

៣៥ ឥឡូវនេះ ស្រីពេស្យាអើយ ចូរស្ដាប់ព្រះ‌បន្ទូលរបស់ព្រះ‌អម្ចាស់!។ ៣៦ ព្រះ‌ជា‌អម្ចាស់មានព្រះ‌បន្ទូលដូចតទៅ: នាងបើកកេរ្ដិ៍‌ខ្មាស យករូបកាយរបស់ខ្លួនទៅប្រព្រឹត្តអំពើពេស្យា‌ចារជាមួយពួកសហាយរបស់នាង និងព្រះដ៏គួរស្អប់ខ្ពើមទាំងប៉ុន្មានរបស់នាង ហើយយកឈាមកូនរបស់ខ្លួនទៅសែនព្រះទាំងនោះ។ ៣៧ ហេតុនេះ យើងនឹងប្រមូលសហាយទាំងអស់ដែលពេញចិត្តនាង គឺទាំងអ្នកដែលនាងស្រឡាញ់ ទាំងអ្នកដែលនាងស្អប់ យើងនឹងប្រមូលពួកគេពីគ្រប់ទីកន្លែងឲ្យមកប្រឆាំងនឹងនាង។ យើងនឹងយកសម្លៀក‌បំពាក់ចេញពីនាង ហើយបើកកេរ្ដិ៍‌ខ្មាសរបស់នាងឲ្យពួកគេឃើញ។ ៣៨ យើងនឹងដាក់ទោសនាង ដូចគេដាក់ទោសស្រីផិតប្ដី និងស្រីឃាតក យើងនឹងឲ្យគេបង្ហូរឈាមនាង តាមកំហឹង និងចិត្តប្រច័ណ្ឌរបស់យើង។ ៣៩ យើងនឹងប្រគល់នាងទៅក្នុងកណ្ដាប់ដៃសហាយរបស់នាង។ ពួកគេនឹងកម្ទេចខ្ទម ព្រមទាំងកន្លែងដែលនាងប្រព្រឹត្តអំពើពេស្យា‌ចារ ពួកគេនឹងយកសម្លៀក‌បំពាក់ និងគ្រឿងអលង្ការចេញពីនាង ទុកឲ្យនាងនៅខ្លួនទទេ។ ៤០ ពួកគេនឹងប្រមូលបណ្តា‌ជនមក ហើយយកដុំថ្មគប់នាង និងយកដាវចាក់ទម្លុះនាង។ ៤១ ពួកគេនឹងដុតផ្ទះរបស់នាង ពួកគេនឹងកាត់ទោសនាងឲ្យស្រីជាច្រើនឃើញ។ យើងនឹងបញ្ឈប់អំពើពេស្យា‌ចាររបស់នាង នាងលែងបង់ប្រាក់ឲ្យសហាយរបស់នាងទៀតហើយ។ ៤២ ពេលដាក់ទោសនាងរួចហើយ យើងនឹងរសាយកំហឹង។ យើងលែងប្រច័ណ្ឌ យើងស្ងប់ចិត្ត លែងខឹង‌សម្បារនឹងនាងទៀត។ ៤៣ ដោយនាងពុំបាននឹកឃើញគ្រានាងនៅពីក្មេង ហើយប្រព្រឹត្តអំពើផ្សេងៗធ្វើឲ្យយើងខឹង នោះយើងនឹងដាក់ទោសនាងតាមអំពើដែលនាងប្រព្រឹត្ត គឺនាងបានប្រព្រឹត្តអំពើដ៏គួរឲ្យស្អប់ខ្ពើម ថែមពីលើអំពើដ៏ថោកទាប - នេះជាព្រះ‌បន្ទូលរបស់ព្រះ‌ជា‌អម្ចាស់។

ក្រុងយេរូ‌សាឡឹមអាក្រក់ជាងក្រុងឯទៀតៗ

៤៤ អ្នកចងក្រងសុភាសិតមុខជាយកសុភាសិតមួយនេះ មកនិយាយអំពីនាងថា “ម្ដាយយ៉ាងណា កូនស្រីក៏យ៉ាងនោះដែរ!”។ ៤៥ នាងពិតជាកូនដែលកាត់ទៅម្ដាយ ម្ដាយរបស់នាងស្អប់ប្ដី និងកូនរបស់ខ្លួន។ នាងក៏កាត់ទៅបងស្រី និងប្អូនស្រីរបស់នាងដែរ អ្នកទាំងនោះស្អប់ប្ដី និងកូនរបស់ខ្លួន។ ម្ដាយរបស់នាងជាសាសន៍ហេត រីឯឪពុករបស់នាងជាសាសន៍អាម៉ូរី។ ៤៦ បងស្រីរបស់នាង គឺសាម៉ារី ដែលស្ថិតនៅខាងជើង ព្រមទាំងស្រុកភូមិជុំ‌វិញ។ ប្អូនស្រីរបស់នាង គឺសូដុម ដែលស្ថិតនៅខាងត្បូង ព្រមទាំងស្រុកភូមិជុំ‌វិញ។ ៤៧ នាងមិនត្រឹមតែយកតម្រាប់តាមពួកគេ និងប្រព្រឹត្តអំពើគួរស្អប់ខ្ពើមដូចពួកគេប៉ុណ្ណោះទេ គឺនាងប្រព្រឹត្តអំពើគ្រប់យ៉ាង អាក្រក់លើសពួកគេទៅទៀត។ ៤៨ យើងប្រកាសក្នុងនាមយើង ជាព្រះដែលមានជីវិតគង់នៅថា សូដុមជាប្អូនស្រីរបស់នាង ព្រមទាំងស្រុកភូមិជុំ‌វិញ ពុំបានប្រព្រឹត្តដូចនាង និងស្រុកភូមិរបស់នាងទេ -នេះជាព្រះ‌បន្ទូលរបស់ព្រះ‌ជា‌អម្ចាស់។ ៤៩ សូដុមជាប្អូនស្រីរបស់នាង មានកំហុសដូចតទៅនេះ គឺសូដុម និងស្រុកភូមិមានអំនួត គេមានអាហារបរិភោគហូរ‌ហៀរ គេសំងំយកសុខតែឯង គឺឥតរវី‌រវល់ជួយមនុស្សទុរគត និងជនក្រីក្រឡើយ។ ៥០ សូដុម និងស្រុកភូមិវាយឫកខ្ពស់ ហើយនាំគ្នាប្រព្រឹត្តអំពើគួរស្អប់ខ្ពើមនៅចំពោះមុខយើង។ ដូច្នេះ យើងបានលុបបំបាត់ពួកគេពីទឹកដីនេះដូចនាងឃើញស្រាប់។ ៥១ រីឯអំពើបាបដែលសាម៉ារីប្រព្រឹត្ត ពុំបានពាក់កណ្ដាលនៃអំពើបាបរបស់នាងទេ។ អំពើអាក្រក់ដែលនាងប្រព្រឹត្ត មានចំនួនច្រើនលើសអំពើអាក្រក់របស់សាម៉ារីទៅទៀត។ បើប្រៀបផ្ទឹមនឹងអំពើអាក្រក់ទាំងប៉ុន្មានដែលនាងប្រព្រឹត្ត បង និងប្អូនស្រីរបស់នាង ហាក់ដូចជាគ្មានធ្វើអ្វីខុសសោះ។ ៥២ ដោយនាងបានបណ្តាលឲ្យបង និងប្អូនស្រីរបស់ខ្លួនហាក់ដូចជាគ្មានទោសដូច្នេះ នាងត្រូវបាក់មុខហើយ ដ្បិតនាងប្រព្រឹត្តអំពើអាក្រក់លើសនាងទាំងពីរទៅទៀត គឺនាងទាំងពីរហាក់ដូចជាគ្មានធ្វើអ្វីខុសសោះ។ ដូច្នេះ ចូរអាម៉ាស់ ហើយទ្រាំ‌ទ្រនឹងការបាក់មុខនេះទៅ ដ្បិតនាងបណ្តាលឲ្យបង និងប្អូនស្រីរបស់នាង ហាក់ដូចជាគ្មានកំហុសសោះ។

៥៣ យើងនឹងធ្វើឲ្យក្រុងសូដុម និងស្រុកភូមិនៅជុំ‌វិញ ព្រមទាំងក្រុងសាម៉ារី និងស្រុកភូមិនៅជុំ‌វិញបានចម្រុង‌ចម្រើនដូចមុន។ រីឯនាង យើងក៏ធ្វើឲ្យនាងបានចម្រុងចម្រើនឡើងវិញដែរ។ ៥៤ បងស្រី និងប្អូនស្រីរបស់នាងនឹងបានធូរស្រាល ដោយឃើញនាងត្រូវបាក់មុខ ព្រោះតែអំពើទាំងប៉ុន្មានដែលនាងបានធ្វើ។ ៥៥ ក្រុងសូដុម និងស្រុកភូមិដែលនៅជុំ‌វិញ នឹងបានដូចដើម ក្រុងសាម៉ារី និងស្រុកភូមិដែលនៅជុំ‌វិញ នឹងបានដូចដើម ហើយនាង និងស្រុកភូមិរបស់នាង ក៏បានដូចដើមឡើងវិញដែរ។ ៥៦ កាលនាងនៅមានអំនួត នាងតែងតែមាក់‌ងាយសូដុម។ ៥៧ គ្រានោះ អំពើអាក្រក់របស់នាងមិនទាន់បើកមុខនៅឡើយទេ។ ឥឡូវនេះ ដល់វេនដែលក្រុងនានានៃស្រុកអារ៉ាម និងស្រុកភូមិនៅជុំ‌វិញ ប្រមាថមើល‌ងាយនាងហើយ។ ក្រុងទាំង‌ឡាយនៃស្រុកភីលី‌ស្ទីន ដែលនៅជិតខាងនាង ក៏នាំគ្នាមើល‌ងាយនាងដែរ។ ៥៨ នាងត្រូវរងនូវអំពើថោកទាប និងអំពើគួរស្អប់ខ្ពើមដែលខ្លួនបានប្រព្រឹត្ត - នេះជាព្រះ‌បន្ទូលរបស់ព្រះ‌អម្ចាស់។

៥៩ ដូច្នេះ យើងជាព្រះ‌ជា‌អម្ចាស់ យើងនឹងប្រព្រឹត្តចំពោះនាងតាមអំពើដែលនាងបានប្រព្រឹត្ត គឺនាងបានបំភ្លេចពាក្យសម្បថ ដោយផ្ដាច់សម្ពន្ធ‌មេត្រីរបស់យើង។ ៦០ ប៉ុន្តែ យើងនៅនឹកដល់សម្ពន្ធ‌មេត្រី ដែលយើងបានចងជាមួយនាង កាលពីនាងនៅក្មេង ហើយយើងនឹងចងសម្ពន្ធ‌មេត្រីដែលនៅស្ថិត‌ស្ថេរអស់កល្ប‌ជានិច្ចជាមួយនាង។ ៦១ នាងនឹងនឹកឃើញពីកិរិយា‌មារយាទដ៏អាក្រក់របស់ខ្លួន ហើយនៅពេលនាងទទួលបងស្រី និងប្អូនស្រីឲ្យនៅជាមួយ នោះនាងនឹងនឹកខ្មាស។ យើងនឹងឲ្យនាងត្រួត‌ត្រាលើបងស្រី និងប្អូនស្រី តែពួកគេមិនចូលរួមក្នុងសម្ពន្ធ‌មេត្រីដែលយើងចងជាមួយនាងទេ។ ៦២ យើងនឹងចងសម្ពន្ធ‌មេត្រីជាមួយនាង។ ពេលនោះ នាងនឹងទទួលស្គាល់ថា យើងពិតជាព្រះ‌អម្ចាស់មែន។ ៦៣ នាងនឹងនឹកឃើញពីកិរិយា‌មារយាទដ៏អាក្រក់របស់ខ្លួន ហើយនឹកខ្មាស។ យើងនឹងលើក‌លែងទោសចំពោះកំហុសទាំងប៉ុន្មានដែលនាងបានប្រព្រឹត្ត ពេលនោះ នាងនឹកស្តាយរកអ្វីថ្លែងពុំបាន» - នេះជាព្រះ‌បន្ទូលរបស់ព្រះ‌ជា‌អម្ចាស់។

ប្រស្នាអំពីដើមតាត្រៅ និងសត្វឥន្ទ្រី

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរនិទានរឿងមួយចោទជាប្រស្នាដល់ពូជ‌ពង្សអ៊ីស្រា‌អែលទៅ! ៣ ចូរប្រាប់ពួកគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: មានសត្វឥន្ទ្រីមួយយ៉ាងធំ ផ្ទាំងស្លាបវាវែង ស្លាបវាក្រាស់ ហើយចម្រុះពណ៌។ ឥន្ទ្រីនោះហើរទៅដល់ភ្នំលីបង់ រួចកាច់ចុងតាត្រៅ។ ៤ ឥន្ទ្រីក៏កាច់មែកខ្ពស់ជាងគេ ពាំយកទៅស្រុករបស់អ្នកលក់ដូរ ដាក់នៅក្នុងក្រុងរបស់អ្នកជំនួញ។ ៥ បន្ទាប់មក ឥន្ទ្រីពាំគ្រាប់ពូជមួយពីស្រុកនោះ យកទៅដាក់លើថ្នាលមួយ។ ឥន្ទ្រីដាំគ្រាប់នោះដូចដាំដើមចាក នៅកន្លែងដែលមានទឹកបរិបូណ៌។ ៦ គ្រាប់ពូជនោះក៏ដុះឡើង ក្លាយទៅជាដើមទំពាំង‌បាយ‌ជូរបែកមែកសាខា វារនៅលើដី។ មែករបស់វាបែរទៅរកឥន្ទ្រី រីឯឫសស្ថិតនៅពីក្រោមវា។ ដើមទំពាំង‌បាយ‌ជូរនោះលូតលាស់ ចេញពន្លក បង្កើតមែកធាង។

៧ បន្ទាប់មក មានឥន្ទ្រីដ៏ធំមួយទៀតដែលមានផ្ទាំងស្លាបវែង និងមានស្លាបក្រាស់។ ទំពាំង‌បាយ‌ជូរលូតផុតពីដី ហើយបែរទាំងឫស ទាំងមែកទៅរកឥន្ទ្រីថ្មី ដើម្បីទទួលទឹកពីឥន្ទ្រីនោះ។ ៨ ទំពាំង‌បាយ‌ជូរដុះនៅលើដីមានជីជាតិល្អ មានទឹកបរិបូណ៌ ហើយបែកមែកសាខា បង្កើតផលផ្លែ ក្លាយទៅជាដើមទំពាំង‌បាយ‌ជូរដ៏ល្អប្រណីត»។

៩ ព្រះ‌ជា‌អម្ចាស់មានព្រះ‌បន្ទូលថា៖ «តើដើមទំពាំង‌បាយ‌ជូរនេះអាចចម្រើនលូតលាស់បានឬ? ឥន្ទ្រីទីមួយនឹងដកឫស ព្រមទាំងជម្រុះផ្លែរបស់វា ទុកឲ្យដើមវាក្រៀមស្ងួត ហើយស្លឹកដែលទើបនឹងដុះក៏ក្រៀមស្ងួតអស់ដែរ។ ដើម្បីដកឫសរបស់វា មិនចាំ‌បាច់ប្រើកម្លាំងខ្លាំង ឬកង‌ទ័ពច្រើនឡើយ។ ១០ ទោះបីទំពាំង‌បាយ‌ជូរនេះដុះយ៉ាងមាំក្តី ក៏វាពុំអាចលូតលាស់ដែរ។ ពេលមានខ្យល់បក់ពីទិសខាងកើត វាមុខជាក្រៀមស្ងួតមិនខាន គឺវានឹងក្រៀមនៅលើដីដែលវាដុះនោះ»។

១១ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ១២ «ចូរសួរពូជបះ‌បោរថា តើអ្នករាល់គ្នាយល់អត្ថ‌ន័យប្រស្នានេះឬទេ? ចូរប្រាប់ពួកគេថា ស្តេចស្រុកបាប៊ីឡូនបានទៅក្រុងយេរូ‌សាឡឹម ហើយចាប់ស្តេចស្រុកយូដា និងពួកនាម៉ឺន នាំយកមកស្រុកបាប៊ីឡូន។ ១៣ ស្តេចស្រុកបាប៊ីឡូនជ្រើស‌រើសពូជស្តេចស្រុកយូដាមួយរូបមក ហើយចងសម្ពន្ធ‌មេត្រីជាមួយ ព្រមទាំងឲ្យពូជស្តេចនោះធ្វើសច្ចា‌ប្រណិ‌ធានផង។ ស្តេចស្រុកបាប៊ីឡូនយកពួកមេដឹកនាំចេញពីស្រុក ១៤ ដើម្បីឲ្យនគរនោះនៅទន់ខ្សោយ មិនអាចបះ‌បោរ ហើយគោរពសម្ពន្ធ‌មេត្រីយ៉ាងម៉ត់‌ចត់។ ១៥ ប៉ុន្តែ ស្តេចយូដាបះ‌បោរប្រឆាំងនឹងស្តេចស្រុកបាប៊ីឡូន ដោយចាត់អ្នកនាំសារទៅស្រុកអេស៊ីប សុំជំនួយទ័ព‌សេះ និងពល‌ទាហានយ៉ាងច្រើន។ តើស្តេចធ្វើដូច្នេះអាចសម្រេចគម្រោង‌ការ និងរំដោះខ្លួនបានឬទេ?។ ស្តេចនោះផ្ដាច់សម្ពន្ធ‌មេត្រី ហើយពិតជាពុំអាចរំដោះខ្លួនបានឡើយ! ១៦ យើងជាព្រះដ៏មានជីវិតគង់នៅ! -នេះជាព្រះ‌បន្ទូលរបស់ព្រះ‌ជា‌អម្ចាស់ - ស្តេចនោះមុខជាស្លាប់នៅក្នុងស្រុក នៅក្បែរស្តេចដែលបានតែង‌តាំងខ្លួនឲ្យគ្រងរាជ្យ និងនៅកណ្ដាលក្រុងបាប៊ីឡូន ព្រោះស្តេចនោះបានក្បត់ពាក្យសច្ចា‌ប្រណិ‌ធាន និងផ្ដាច់សម្ពន្ធ‌មេត្រីទៀតផង។ ១៧ ពេលកង‌ទ័ពបាប៊ីឡូនសង់ប៉ម និងលើកទួលឡើង ដើម្បីប្រល័យជីវិតប្រជាជនដ៏ច្រើនកុះ‌ករ ទោះបីស្តេចផារ៉ោនមានទ័ពជាច្រើន និងខ្លាំងពូកែយ៉ាងណាក្តី ក៏ពុំអាចជួយស្តេចនោះដែរ។ ១៨ ស្តេចនោះបានក្បត់ពាក្យសច្ចា‌ប្រណិ‌ធាន និងផ្ដាច់សម្ពន្ធ‌មេត្រី គឺស្តេចបានព្រមព្រៀងជាមួយគេ ហើយបែរជាប្រព្រឹត្តអំពើទាំងនេះទៅវិញ ដូច្នេះ ស្តេចពុំអាចរំដោះខ្លួនឡើយ!»។

១៩ ហេតុនេះ ព្រះ‌ជា‌អម្ចាស់មានព្រះ‌បន្ទូលថា៖ «យើងជាព្រះដ៏មានជីវិតគង់នៅ! ស្តេចស្រុកអ៊ីស្រា‌អែលក្បត់នឹងពាក្យសច្ចា‌ប្រណិ‌ធាន ដែលគេបានស្បថជាមួយយើង ហើយក៏ផ្ដាច់សម្ពន្ធ‌មេត្រីដែលគេបានចងជាមួយយើងដែរ។ យើងនឹងដាក់ទោសគេ តាមពាក្យដែលគេស្បថ។ ២០ យើងនឹងបោះសំណាញ់ទៅលើស្តេច ហើយស្តេចនោះនឹងជាប់ក្នុងសំណាញ់របស់យើង។ យើងនឹងនាំគេទៅស្រុកបាប៊ីឡូន ហើយនៅទីនោះ យើងនឹងកាត់ទោសគេ ព្រោះគេបានក្បត់យើង។ ២១ ទាហានដ៏ចំណានរបស់គេនឹងស្លាប់ដោយមុខដាវ រីឯអ្នកដែលរួចពីស្លាប់ នឹងត្រូវខ្ចាត់‌ខ្ចាយរត់ទៅគ្រប់ទិស‌ទី។ ពេលនោះ អ្នករាល់គ្នានឹងទទួលស្គាល់ថា នេះពិតជាពាក្យរបស់យើង ដែលជាព្រះ‌អម្ចាស់មែន»។

ព្រះ‌បន្ទូលសន្យា

២២ ព្រះ‌ជា‌អម្ចាស់មានព្រះ‌បន្ទូលថា៖ «យើងនឹងកាច់ពន្លកមួយពីចុងតាត្រៅ យកមកដាំនៅលើភ្នំដ៏ខ្ពស់សន្លឹម។ ២៣ យើងនឹងដាំពន្លកនោះនៅលើភ្នំដ៏ខ្ពស់ក្នុងស្រុកអ៊ីស្រា‌អែល ពន្លកនោះនឹងបែកមែកសាខា បង្កើតផ្លែផ្កា ក្លាយទៅជាដើមតាត្រៅដ៏ល្អប្រណីត។ បក្សា‌បក្សីគ្រប់ប្រភេទនឹងនាំគ្នាមកធ្វើសំបុកអាស្រ័យនៅ តាមមែកតាត្រៅនោះ។ ២៤ ពេលនោះ ដើមឈើទាំងប៉ុន្មាននៅតាមព្រៃនឹងទទួលស្គាល់ថា គឺយើងនេះហើយជាព្រះ‌អម្ចាស់។ យើងរំលំដើមឈើខ្ពស់ៗ ហើយលើកដើមឈើតូចៗឲ្យលូតខ្ពស់ឡើង។ យើងធ្វើឲ្យដើមឈើដែលមានស្លឹកខៀវខ្ចី ប្រែជាក្រៀមស្ងួត ហើយធ្វើឲ្យដើមឈើក្រៀមស្ងួត ត្រឡប់ជាមានស្លឹកខៀវខ្ចីវិញ។ យើងជាព្រះ‌អម្ចាស់ យើងនិយាយយ៉ាងណា យើងក៏នឹងធ្វើយ៉ាងនោះដែរ»។

ព្រះ‌អម្ចាស់ដាក់ទោសម្នាក់ៗតាមអំពើដែលខ្លួនប្រព្រឹត្ត

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «ហេតុអ្វីបានជាអ្នករាល់គ្នាចេះតែសូត្រសុភាសិតនេះ នៅលើទឹកដីអ៊ីស្រា‌អែលថា “ឪពុកបរិភោគក្តឹបទំពាំង‌បាយ‌ជូរ ហើយកូនបែរជាឈឺធ្មេញ” ដូច្នេះ?។ ៣ យើងជាព្រះដែលមានជីវិតគង់នៅ - នេះជាព្រះ‌បន្ទូលរបស់ព្រះ‌ជា‌អម្ចាស់ - អ្នករាល់គ្នានឹងលែងសូត្រសុភាសិតនេះ នៅស្រុកអ៊ីស្រា‌អែលទៀតហើយ!។ ៤ ដ្បិតយើងជាម្ចាស់លើជីវិតរបស់មនុស្សទាំងអស់ គឺទាំងជីវិតរបស់ឪពុក ទាំងជីវិតរបស់កូន។ អ្នកណាប្រព្រឹត្តអំពើបាប អ្នកនោះនឹងបាត់បង់ជីវិត។

៥ ឧបមាថាមានមនុស្សសុចរិតម្នាក់ ដែលប្រព្រឹត្តអំពើត្រឹមត្រូវ និងសុចរិត ៦ គឺគេមិនចូលរួមបរិភោគសំណែននៅលើភ្នំ មិនជំពាក់ចិត្តនឹងព្រះក្លែង‌ក្លាយរបស់ជនជាតិអ៊ីស្រា‌អែល មិនប្រព្រឹត្តអំពើសៅ‌ហ្មងជាមួយប្រពន្ធគេ មិនរួមបវេណីជាមួយប្រពន្ធក្នុងពេលនាងមានរដូវ ៧ មិនជិះ‌ជាន់ ឬលួចទ្រព្យ‌សម្បត្តិអ្នកដទៃ ប្រគល់របស់បញ្ចាំទៅម្ចាស់ដើម ចែកអាហារឲ្យអ្នកដែលឃ្លាន និងចែកសម្លៀក‌បំពាក់ដល់អ្នកដែលគ្មានអ្វីបិទ‌បាំងកាយ ៨ ឲ្យប្រាក់គេខ្ចីដោយឥតយកការ ឬទារកម្រៃហួសហេតុ មិនឃុប‌ឃិតនឹងអំពើអយុត្តិ‌ធម៌ ហើយវិនិច្ឆ័យគូបដិ‌បក្សយ៉ាងត្រឹមត្រូវ ៩ ប្រព្រឹត្តតាមក្រឹត្យ‌វិន័យ និងពាក្យបង្គាប់របស់យើង ស្របតាមសេចក្ដីពិត។ អ្នកប្រព្រឹត្តដូច្នេះពិតជាមនុស្សសុចរិត ហើយគេនឹងរស់រានមានជីវិតជាក់ជាមិនខាន - នេះជាព្រះ‌បន្ទូលរបស់ព្រះ‌ជា‌អម្ចាស់។

១០ ប៉ុន្តែ ប្រសិនបើមនុស្សសុចរិតនោះមានកូនប្រុសម្នាក់លួចប្លន់ កាប់សម្លាប់ និងប្រព្រឹត្តអំពើអាក្រក់បែបនេះ ១១ គឺប្រព្រឹត្តផ្ទុយពីឪពុក ដោយចូលរួមបរិភោគសំណែននៅលើភ្នំ ប្រព្រឹត្តអំពើសៅហ្មងជាមួយប្រពន្ធគេ ជិះ‌ជាន់មនុស្សក្រីក្រទុរគត លួចទ្រព្យ‌សម្បត្តិគេ ១២ មិនប្រគល់របស់បញ្ចាំទៅម្ចាស់ដើម ជំពាក់ចិត្តនឹងព្រះក្លែង‌ក្លាយ ហើយប្រព្រឹត្តអំពើគួរស្អប់ខ្ពើមគ្រប់យ៉ាង ១៣ ឲ្យប្រាក់គេខ្ចី ដើម្បីយកការ និងទារកម្រៃហួសហេតុ។ តើកូនរបៀបនេះអាចរស់បានឬ? ទេ កូននោះមិនអាចរស់បានឡើយ។ គេត្រូវតែស្លាប់ ព្រោះតែអំពើគួរស្អប់ខ្ពើមទាំងនោះ គេទទួលខុសត្រូវលើការស្លាប់របស់ខ្លួន។

១៤ ប្រសិនបើមនុស្សអាក្រក់នោះមានកូនប្រុសម្នាក់ កូនប្រុសនោះឃើញអំពើបាបទាំងប៉ុន្មានដែលឪពុកប្រព្រឹត្ត តែមិនយកតម្រាប់តាមឪពុក ១៥ គឺមិនចូលរួមបរិភោគសំណែននៅលើភ្នំ មិនជំពាក់ចិត្តនឹងព្រះក្លែង‌ក្លាយរបស់ជនជាតិអ៊ីស្រា‌អែល មិនប្រព្រឹត្តអំពើសៅហ្មងជាមួយប្រពន្ធគេ ១៦ មិនជិះ‌ជាន់គេ មិនរកស៊ីបញ្ចាំ មិនលួចទ្រព្យ‌សម្បត្តិអ្នកដទៃ ចែកអាហារឲ្យអ្នកដែលឃ្លាន និងចែកសម្លៀក‌បំពាក់ដល់អ្នកដែលគ្មានអ្វីបិទ‌បាំងកាយ ១៧ មិនឃុប‌ឃិតនឹងអំពើអយុត្តិ‌ធម៌ មិនចងការប្រាក់ ឬស្វែងរកកម្រៃហួសហេតុ តែប្រតិបត្តិតាមពាក្យបង្គាប់ និងក្រឹត្យ‌វិន័យរបស់យើង។ អ្នកនោះនឹងមិនស្លាប់ ព្រោះតែកំហុសរបស់ឪពុកឡើយ គឺគេនឹងរស់រានមានជីវិតជាក់ជាមិនខាន។ ១៨ ឪពុករបស់អ្នកនោះជាមនុស្សជិះ‌ជាន់ លួចទ្រព្យ‌សម្បត្តិបង‌ប្អូន ព្រមទាំងប្រព្រឹត្តអំពើមិនគួរគប្បី ក្នុងចំណោមប្រជាជនរបស់ខ្លួនដូច្នេះ គឺឪពុកនោះហើយដែលត្រូវស្លាប់ ព្រោះតែកំហុសរបស់ខ្លួនផ្ទាល់។

១៩ អ្នករាល់គ្នាសួរថា “ហេតុអ្វីបានជាកូនមិនទទួលទោសជំនួសឪពុក?” គឺមកពីកូននោះប្រព្រឹត្តតាមសេចក្ដីសុចរិត និងយុត្តិធម៌ កូននោះគោរព និងប្រតិបត្តិតាមក្រឹត្យ‌វិន័យទាំងប៉ុន្មានរបស់យើង ដូច្នេះ គេត្រូវរស់រានមានជីវិត។ ២០ អ្នកណាប្រព្រឹត្តអំពើបាប អ្នកនោះត្រូវស្លាប់។ កូនមិនត្រូវទទួលទោសជំនួសឪពុកទេ ឪពុកក៏មិនត្រូវទទួលទោសជំនួសកូនដែរ។ មនុស្សសុចរិតនឹងទទួលរង្វាន់តាមអំពើសុចរិតដែលខ្លួនប្រព្រឹត្ត រីឯមនុស្សទុច្ចរិតក៏នឹងទទួលទោសតាមអំពើទុច្ចរិតដែលខ្លួនប្រព្រឹត្តដែរ។

២១ ប្រសិនបើមនុស្សទុច្ចរិតលះ‌បង់អំពើបាបទាំងអស់ដែលខ្លួនប្រព្រឹត្ត ហើយបែរមកប្រតិបត្តិតាមក្រឹត្យ‌វិន័យទាំងប៉ុន្មានរបស់យើង ព្រមទាំងប្រតិបត្តិតាមសេចក្ដីសុចរិត និងយុត្តិធម៌ អ្នកនោះនឹងរស់រានមានជីវិតជាក់ជាមិនខាន គឺគេមិនត្រូវស្លាប់ឡើយ។ ២២ យើងនឹងបំភ្លេចបទល្មើសទាំងប៉ុន្មានដែលគេបានប្រព្រឹត្ត គឺអ្នកនោះនឹងរស់រានមានជីវិត ព្រោះតែអំពើសុចរិតដែលគេបានធ្វើ។ ២៣ តើអ្នករាល់គ្នាស្មានថា យើងចង់ឃើញមនុស្សទុច្ចរិតស្លាប់ឬ? ទេ! ផ្ទុយទៅវិញ យើងចង់ឃើញគេលះ‌បង់មារយាទអាក្រក់របស់ខ្លួន ដើម្បីឲ្យរស់រានមានជីវិត - នេះជាព្រះ‌បន្ទូលរបស់ព្រះ‌ជា‌អម្ចាស់។ ២៤ រីឯមនុស្សសុចរិតវិញ ប្រសិនបើគេលះ‌បង់អំពើសុចរិត ហើយបែរទៅប្រព្រឹត្តអំពើអាក្រក់គួរស្អប់ខ្ពើមទាំងប៉ុន្មាន ដែលមនុស្សទុច្ចរិតធ្លាប់ប្រព្រឹត្ត តើគេអាចមានជីវិតតទៅមុខទៀតបានឬ? យើងនឹងបំភ្លេចអំពើសុចរិតទាំងប៉ុន្មានដែលគេបានប្រព្រឹត្ត អ្នកនោះត្រូវតែស្លាប់ ព្រោះតែចិត្តមិនស្មោះ‌ត្រង់ និងអំពើបាបដែលគេបានប្រព្រឹត្ត។

២៥ អ្នករាល់គ្នាពោលថា “ព្រះ‌អម្ចាស់ប្រព្រឹត្តដូច្នេះ មិនត្រឹមត្រូវទេ!”។ ជនជាតិអ៊ីស្រា‌អែលអើយ ចូរស្ដាប់! តើយើងប្រព្រឹត្តមិនត្រឹមត្រូវមែនឬ? គឺអ្នករាល់គ្នាវិញទេដែលប្រព្រឹត្តមិនត្រឹមត្រូវ។ ២៦ ប្រសិនបើមនុស្សសុចរិត លែងប្រព្រឹត្តអំពើសុចរិត ហើយបែរទៅប្រព្រឹត្តអំពើទុច្ចរិត គេពិតជាត្រូវស្លាប់ គឺគេស្លាប់ ព្រោះតែអំពើទុច្ចរិតដែលខ្លួនបានប្រព្រឹត្ត។ ២៧ ផ្ទុយទៅវិញ ប្រសិនបើមនុស្សទុច្ចរិតលះ‌បង់ចោលអំពើអាក្រក់ដែលខ្លួនប្រព្រឹត្ត ហើយបែរទៅប្រតិបត្តិតាមសេចក្ដីសុចរិត និងយុត្តិធម៌ គេនឹងរក្សាជីវិតខ្លួនឲ្យគង់‌វង្ស។ ២៨ ប្រសិនបើអ្នកនោះភ្ញាក់ស្មារតី ហើយលះ‌បង់អំពើអាក្រក់ទាំងប៉ុន្មាន គេពិតជារស់រានមានជីវិត គឺគេមិនត្រូវស្លាប់ឡើយ។

២៩ ជនជាតិអ៊ីស្រា‌អែលពោលថា “ព្រះ‌អម្ចាស់ប្រព្រឹត្តដូច្នេះ មិនត្រឹមត្រូវទេ!”។ ជនជាតិអ៊ីស្រា‌អែលអើយ យើងប្រព្រឹត្តមិនត្រឹមត្រូវមែនឬ? គឺអ្នករាល់គ្នាវិញទេដែលប្រព្រឹត្តមិនត្រឹមត្រូវ។ ៣០ ហេតុនេះ ជនជាតិអ៊ីស្រា‌អែលអើយ យើងនឹងវិនិច្ឆ័យអ្នករាល់គ្នា តាមអំពើដែលម្នាក់ៗបានប្រព្រឹត្ត ចូរវិលត្រឡប់មកវិញ ហើយលះ‌បង់អំពើទុច្ចរិតទាំងអស់ កុំបណ្តោយឲ្យកំហុសរបស់អ្នករាល់គ្នា បំផ្លាញជីវិតអ្នករាល់គ្នាឡើយ - នេះជាព្រះ‌បន្ទូលរបស់ព្រះ‌ជា‌អម្ចាស់។ ៣១ ចូរបោះបង់ចោលអំពើទុច្ចរិតទាំងអស់ ដែលអ្នករាល់គ្នាបានប្រព្រឹត្ត។ ចូរមានចិត្តគំនិតថ្មី និងវិញ្ញាណថ្មី! ជនជាតិអ៊ីស្រា‌អែលអើយ អ្នករាល់គ្នាមិនគួរស្លាប់ឡើយ ៣២ ដ្បិតយើងមិនសប្បាយចិត្តនឹងឲ្យនរណាម្នាក់ស្លាប់ទេ ចូរវិលមករកយើងវិញ នោះអ្នករាល់គ្នានឹងរស់រានមានជីវិត» -នេះជាព្រះ‌បន្ទូលរបស់ព្រះ‌ជា‌អម្ចាស់ -។

ទំនួញរបស់មេដឹកនាំអ៊ីស្រា‌អែល

១ ព្រះ‌អម្ចាស់បង្គាប់ខ្ញុំឲ្យស្មូត្រទំនួញមួយបទ ស្តីអំពីមេដឹកនាំរបស់ជនជាតិអ៊ីស្រា‌អែល ដូចតទៅ៖

២ «ម្ដាយរបស់អ្នកជាសិង្ហញី

ដេកនៅក្នុងចំណោមសិង្ហឈ្មោល

ហើយបំបៅកូននៅក្នុងចំណោមសិង្ហស្ទាវ។

៣ សិង្ហញីនេះបានបង្ហាត់កូនមួយ

ឲ្យរៀនហែកសត្វស៊ី

លុះកូនសិង្ហនោះក្លាយទៅជាសិង្ហស្ទាវ

វាស៊ីមនុស្ស។

៤ ប្រជា‌ជាតិនានាឮគេនិយាយអំពីសិង្ហស្ទាវនេះ

ក៏នាំគ្នាដាក់អន្ទាក់ចាប់វា

ហើយដាក់កន្លុះនាំយកទៅស្រុកអេស៊ីប។

៥ សិង្ហញីរង់‌ចាំ តែមិនឃើញកូនមកវិញ

ក៏អស់សង្ឃឹម

ហើយយកកូនមួយទៀតមកបង្ហាត់

ឲ្យក្លាយទៅជាសិង្ហស្ទាវដែរ។

៦ កូនសិង្ហនោះរកស៊ីជាមួយសិង្ហឈ្មោលឯទៀតៗ

វាក្លាយទៅជាសិង្ហស្ទាវមួយ

វារៀនហែកសត្វស៊ី ហើយហែកមនុស្សស៊ី។

៧ វាកម្ទេចកំពែងក្រុង

ហើយបំផ្លិច‌បំផ្លាញទីក្រុង។

ប្រជាជននៅក្នុងស្រុកភ័យតក់‌ស្លុត

នៅពេលឮសូរវាគ្រហឹម។

៨ ប្រជា‌ជាតិនានាលើកទ័ពពីគ្រប់ទិស‌ទី

ពីគ្រប់អាណា‌ខេត្ត

នាំគ្នាដាក់អន្ទាក់ចាប់សិង្ហស្ទាវនោះ

ហើយវាធ្លាក់ទៅក្នុងកណ្ដាប់ដៃរបស់ពួកគេ។

៩ ពួកគេដាក់វានៅក្នុងទ្រុងមួយ ខ្ទាស់យ៉ាងជិត

រួចនាំយកទៅប្រគល់ឲ្យស្តេចស្រុកបាប៊ីឡូន

គេយកវាទៅឃុំទុក

ដើម្បីកុំឲ្យឮសំឡេងវាគ្រហឹម

នៅតាមភ្នំនៃស្រុកអ៊ីស្រា‌អែលទៀត។

ដើមទំពាំង‌បាយ‌ជូរ និងមែក

១០ ម្ដាយរបស់អ្នកប្រៀបបាននឹង

ដើមទំពាំង‌បាយ‌ជូរដុះនៅក្បែរមាត់ទឹក

ទំពាំង‌បាយ‌ជូរនោះមានផ្លែផ្កា បែកមែកសាខា

ព្រោះសម្បូណ៌ទឹក។

១១ ទំពាំង‌បាយ‌ជូរនោះមានមែកធំៗ

ដែលក្លាយទៅជាដំបងរាជ្យ

ដើមវាលូតឡើងខ្ពស់ជាងដើមឈើឯទៀតៗ

គេកោតសរសើរទំពាំង‌បាយ‌ជូរនោះ

ព្រោះតែកម្ពស់ និងមានមែកច្រើន។

១២ ប៉ុន្តែ ដើមទំពាំង‌បាយ‌ជូរនោះត្រូវគេរំលើង

យ៉ាងកំរោល ហើយរលំទៅលើដី។

ខ្យល់ពីទិសខាងកើតបក់មក

ធ្វើឲ្យផ្លែវាស្វិតក្រៀម

រីឯមែកធំៗ ក៏ដាច់ចេញពីដើម ក្រៀមស្ងួត

ហើយត្រូវភ្លើងឆេះអស់ទៅ។

១៣ ឥឡូវនេះ គេយកទំពាំង‌បាយ‌ជូរនោះ

ទៅដាំនៅវាលរហោ‌ស្ថាន

នៅលើដីហួត‌ហែងគ្មានទឹក។

១៤ មានភ្លើងចេញពីដើមរបស់វា

ឆាប‌ឆេះមែក និងផ្លែ។

ទំពាំង‌បាយ‌ជូរនោះលែងមានមែកធំៗ

ដែលក្លាយទៅដំបងរាជ្យទៀតហើយ។

ទំនុកនេះត្រូវស្មូត្រជាទំនួញ»។

ទោះបីជនជាតិអ៊ីស្រា‌អែលបះ‌បោរ ព្រះ‌ជាម្ចាស់នៅតែដឹកនាំពួកគេ

១ នៅឆ្នាំទីប្រាំពីរ ថ្ងៃទីដប់នៃខែទីប្រាំ មានអ្នកខ្លះក្នុងចំណោមព្រឹទ្ធា‌ចារ្យរបស់ជនជាតិអ៊ីស្រា‌អែល នាំគ្នាមកសួរព្រះ‌អម្ចាស់ ពួកគេអង្គុយនៅមុខខ្ញុំ។ ២ ពេលនោះ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖

៣ «កូនមនុស្សអើយ ចូរប្រាប់ព្រឹទ្ធា‌ចារ្យរបស់ជនជាតិអ៊ីស្រា‌អែលថា ព្រះ‌ជា‌អម្ចាស់មានព្រះ‌បន្ទូលដូចតទៅ: “តើអ្នករាល់គ្នាមកនេះ ដើម្បីរកយើងទស្សន៍‌ទាយឲ្យឬ? អ្នករាល់គ្នានឹកស្មានថា យើងនឹងផ្តល់ចម្លើយឲ្យអ្នករាល់គ្នាឬ? យើងជាព្រះដែលមានជីវិតគង់នៅ យើងនឹងមិនផ្តល់ចម្លើយឲ្យអ្នករាល់គ្នាជាដាច់ខាត”- នេះជាព្រះ‌បន្ទូលរបស់ព្រះ‌ជា‌អម្ចាស់។ ៤ កូនមនុស្សអើយ ចូរវិនិច្ឆ័យពួកគេ ចូរវិនិច្ឆ័យពួកគេទៅ! ចូរប្រាប់ពួកគេឲ្យដឹងនូវអំពើគួរស្អប់ខ្ពើម ដែលដូន‌តារបស់ពួកគេបានប្រព្រឹត្ត។ ៥ ចូរប្រាប់ពួកគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: នៅថ្ងៃយើងជ្រើស‌រើសជនជាតិអ៊ីស្រា‌អែល យើងបានលើកដៃសច្ចាចំពោះពូជ‌ពង្សរបស់លោកយ៉ាកុប ព្រមទាំងសម្ដែងឲ្យពួកគេស្គាល់យើងនៅស្រុកអេស៊ីប។ យើងបានលើកដៃសច្ចាថា “យើងជាព្រះ‌អម្ចាស់ ជាព្រះរបស់អ្នករាល់គ្នា”។ ៦ នៅថ្ងៃនោះ យើងបានលើកដៃសច្ចាចំពោះពួកគេថា យើងនឹងនាំពួកគេចាកចេញពីស្រុកអេស៊ីប ឆ្ពោះទៅកាន់ស្រុកមួយ ដែលយើងជ្រើស‌រើសសម្រាប់ពួកគេ គឺជាស្រុកដ៏សម្បូណ៌សប្បាយ និងស្រុកដែលល្អស្អាតជាងគេទាំងអស់។ ៧ យើងបានប្រាប់ពួកគេថា “ម្នាក់ៗត្រូវបោះបង់ចោលព្រះដ៏គួរស្អប់ខ្ពើម ដែលទាក់‌ទាញចិត្តអ្នករាល់គ្នា។ មិនត្រូវឲ្យខ្លួនទៅជាសៅហ្មង ដោយថ្វាយ‌បង្គំព្រះរបស់ស្រុកអេស៊ីបឡើយ។ យើងជាព្រះ‌អម្ចាស់ ជាព្រះរបស់អ្នករាល់គ្នា”។

៨ ប៉ុន្តែ ពួកគេបះ‌បោរប្រឆាំងនឹងយើង មិនព្រមស្ដាប់បង្គាប់យើងទេ គឺគ្មាននរណាម្នាក់លះ‌បង់ចោលព្រះដ៏គួរស្អប់ខ្ពើម ដែលទាក់‌ទាញចិត្តពួកគេនោះឡើយ ហើយពួកគេក៏មិនព្រមបោះបង់ព្រះក្លែង‌ក្លាយនៃស្រុកអេស៊ីបដែរ។ នៅស្រុកអេស៊ីបនោះ យើងមានបំណងដាក់ទោសពួកគេតាមកំហឹងរបស់យើង រហូតទាល់តែចប់ចុងចប់ដើម។ ៩ ប៉ុន្តែ យើងមិនបានបំផ្លាញពួកគេទេ ដើម្បីកុំឲ្យអាប់កេរ្តិ៍ឈ្មោះរបស់យើង នៅចំពោះមុខប្រជា‌ជាតិទាំង‌ឡាយ ដែលពួកគេរស់នៅជាមួយ។ យើងបានសម្ដែងឲ្យជនជាតិអ៊ីស្រា‌អែលស្គាល់យើង នៅចំពោះមុខប្រជា‌ជាតិទាំងនោះ ដោយនាំអ៊ីស្រា‌អែលចាកចេញពីស្រុកអេស៊ីប។ ១០ យើងនាំជនជាតិអ៊ីស្រា‌អែលចេញពីស្រុកអេស៊ីប ព្រមទាំងដឹកនាំពួកគេនៅវាលរហោ‌ស្ថានទៀតផង។ ១១ យើងបានប្រគល់ក្រឹត្យ‌វិន័យឲ្យពួកគេ និងនាំពួកគេឲ្យស្គាល់បញ្ញត្តិរបស់យើង។ អ្នកណាប្រតិបត្តិតាម អ្នកនោះនឹងមានជីវិត។ ១២ យើងក៏តាំងឲ្យមានថ្ងៃសប្ប័ទ*ទុកជាទីសម្គាល់សម្រាប់យើង និងពួកគេ ដើម្បីឲ្យពួកគេទទួលស្គាល់ថា យើងជាព្រះ‌អម្ចាស់ដែលប្រោសពួកគេឲ្យវិសុទ្ធ*។

១៣ នៅវាលរហោ‌ស្ថាន ប្រជាជនអ៊ីស្រា‌អែលនាំគ្នាបះ‌បោរប្រឆាំងនឹងយើង។ ពួកគេពុំបានប្រតិបត្តិតាមក្រឹត្យ‌វិន័យរបស់យើង ហើយក៏បដិសេធធ្វើតាមបញ្ញត្តិរបស់យើង ដែលផ្តល់ជីវិតឲ្យអស់អ្នកដែលប្រតិបត្តិតាម។ ពួកគេចេះតែរំលោភលើថ្ងៃសប្ប័ទរបស់យើងជា‌និច្ច។ យើងមានបំណងដាក់ទោសពួកគេ ដោយប្រល័យជីវិតពួកគេឲ្យវិនាសសូន្យ នៅវាលរហោ‌ស្ថាន តាមកំហឹងរបស់យើង។ ១៤ ប៉ុន្តែ យើងមិនបានបំផ្លាញពួកគេទេ ដើម្បីកុំឲ្យអាប់កេរ្តិ៍ឈ្មោះរបស់យើងនៅចំពោះមុខប្រជា‌ជាតិទាំង‌ឡាយ ដែលបានឃើញយើងនាំអ៊ីស្រា‌អែលចាកចេញពីស្រុកអេស៊ីប។ ១៥ នៅវាលរហោ‌ស្ថាន យើងក៏លើកដៃសច្ចាចំពោះពួកគេថា យើងនឹងមិននាំពួកគេចូលទៅក្នុងស្រុកដែលយើងបានប្រគល់ឲ្យពួកគេនោះឡើយ គឺស្រុកដ៏សម្បូណ៌សប្បាយ និងស្រុកដែលល្អស្អាតជាងគេទាំងអស់។ ១៦ យើងធ្វើដូច្នេះ មកពីពួកគេមើល‌ងាយពាក្យបង្គាប់របស់យើង មិនធ្វើតាមក្រឹត្យ‌វិន័យរបស់យើង ព្រមទាំងរំលោភលើថ្ងៃសប្ប័ទរបស់យើងទៀតផង ពួកគេជំពាក់ចិត្តនឹងព្រះក្លែង‌ក្លាយរបស់ខ្លួនជា‌និច្ច។ ១៧ ប៉ុន្តែ យើងមានចិត្តអាណិតមេត្តាពួកគេ យើងពុំបានកម្ទេច និងប្រល័យជីវិតពួកគេ ឲ្យវិនាសសូន្យនៅវាលរហោ‌ស្ថានទេ។ ១៨ យើងបានប្រាប់កូនចៅរបស់ពួកគេ នៅវាលរហោ‌ស្ថានថា “កុំធ្វើតាមក្រឹត្យ‌វិន័យ និងគោរពតាមបញ្ញត្តិរបស់ដូន‌តាអ្នករាល់គ្នា ហើយក៏មិនត្រូវបណ្តោយឲ្យខ្លួនសៅហ្មង ព្រោះតែព្រះក្លែង‌ក្លាយរបស់ពួកគេដែរ។ ១៩ យើងជាព្រះ‌អម្ចាស់ ជាព្រះរបស់អ្នករាល់គ្នា ចូរធ្វើតាមក្រឹត្យ‌វិន័យ និងគោរពពាក្យបង្គាប់របស់យើង គឺត្រូវប្រតិបត្តិតាមជា‌និច្ច។ ២០ ចូរចាត់ទុកថ្ងៃសប្ប័ទ*របស់យើងជាថ្ងៃដ៏‌វិសុទ្ធ ដ្បិតថ្ងៃសប្ប័ទនេះជាទីសម្គាល់សម្រាប់យើង និងអ្នករាល់គ្នា ដើម្បីរំឭកឲ្យដឹងថា យើងជាព្រះ‌អម្ចាស់ ជាព្រះរបស់អ្នករាល់គ្នា”។

២១ ប៉ុន្តែ អ្នកទាំងនោះបានបះ‌បោរប្រឆាំងនឹងយើងដែរ។ ពួកគេពុំធ្វើតាមក្រឹត្យ‌វិន័យរបស់យើងទេ ពួកគេក៏ពុំបានគោរព និងប្រតិបត្តិតាមបញ្ញត្តិរបស់យើង ដើម្បីឲ្យមានជីវិតដែរ។ ពួកគេរំលោភលើថ្ងៃសប្ប័ទរបស់យើង។ យើងមានបំណងដាក់ទោសពួកគេនៅវាលរហោ‌ស្ថាន តាមកំហឹងរបស់យើងទាល់តែអស់ចិត្ត។ ២២ ផ្ទុយទៅវិញ យើងបានដូរគំនិត គឺយើងមិនដាក់ទោសពួកគេទេ ដើម្បីកុំឲ្យអាប់កេរ្តិ៍‌ឈ្មោះរបស់យើង នៅចំពោះមុខប្រជា‌ជាតិទាំង‌ឡាយដែលបានឃើញយើងនាំអ៊ីស្រា‌អែលចាកចេញពីស្រុកអេស៊ីប។ ២៣ នៅក្នុងវាលរហោ‌ស្ថាននោះ យើងក៏បានលើកដៃសច្ចាថា យើងនឹងបំបែកពួកគេទៅក្នុងចំណោមប្រជា‌ជាតិទាំង‌ឡាយ ព្រមទាំងកម្ចាត់‌កម្ចាយពួកគេឲ្យទៅរស់នៅតាមស្រុកនានាទៀតផង ២៤ ព្រោះពួកគេពុំបានធ្វើតាមបង្គាប់របស់យើង ហើយបោះបង់ចោលក្រឹត្យ‌វិន័យ និងរំលោភលើថ្ងៃសប្ប័ទរបស់យើង ព្រមទាំងជំពាក់ចិត្តនឹងព្រះក្លែង‌ក្លាយរបស់ដូន‌តាខ្លួន។ ២៥ ហេតុនេះ យើងក៏ប្រគល់ក្រឹត្យ‌វិន័យមិនល្អដល់ពួកគេ ហើយឲ្យពួកគេធ្វើតាមពាក្យបង្គាប់ ដែលពុំផ្តល់ឲ្យពួកគេមានជីវិត។ ២៦ យើងធ្វើឲ្យពួកគេទៅជាសៅហ្មង ដោយ‌សារតង្វាយរបស់ខ្លួន គឺនៅពេលគេយកកូនច្បងរបស់ខ្លួនទៅដុតជាយញ្ញ‌បូជា។ យើងចង់ឲ្យពួកគេវិនាសហិន‌ហោច ដើម្បីឲ្យពួកគេទទួលស្គាល់ ថាយើងពិតជាព្រះ‌អម្ចាស់មែន។

២៧ ហេតុនេះ កូនមនុស្សអើយ ចូរប្រាប់ជនជាតិអ៊ីស្រា‌អែលថា “ព្រះ‌ជា‌អម្ចាស់មានព្រះ‌បន្ទូលដូចតទៅ: ដូន‌តារបស់អ្នករាល់គ្នាចេះតែនាំគ្នាប្រមាថយើង ដោយក្បត់ចិត្តយើង។ ២៨ យើងនាំពួកគេចូលទៅក្នុងទឹកដី ដែលយើងបានលើកដៃសច្ចាថា ប្រគល់ឲ្យពួកគេ។ ប៉ុន្តែ ពួកគេបែរជាផ្តោតចិត្តទៅរកទួលខ្ពស់ៗ ព្រមទាំងដើមឈើទាំងប៉ុន្មានដែលមានស្លឹកពាស‌ពេញ។ ពួកគេនាំគ្នាធ្វើយញ្ញ‌បូជានៅទីនោះ ព្រមទាំងច្រួច‌ស្រាបណ្តាលឲ្យយើងខឹង។ ពួកគេសែនសំណែនដ៏មានក្លិនឈ្ងុយ‌ឈ្ងប់ និងច្រួច‌ស្រាសែនព្រះក្លែង‌ក្លាយ។ ២៩ យើងបានសួរពួកគេថា តើទួលខ្ពស់ៗជាអ្វី បានជាអ្នករាល់គ្នាធ្វើដំណើរកាត់ពីឆ្ងាយទៅរកកន្លែងនោះ?”។ គេដាក់ឈ្មោះកន្លែងនោះថា “ទី‌សក្ការៈនៅតាមទួលខ្ពស់ៗ” រហូតមកទល់សព្វថ្ងៃ។

៣០ ចូរថ្លែងប្រាប់ជនជាតិអ៊ីស្រា‌អែលថា ព្រះ‌ជា‌អម្ចាស់មានព្រះ‌បន្ទូលដូចតទៅ: ហេតុអ្វីបានជាអ្នករាល់គ្នាធ្វើឲ្យខ្លួនសៅហ្មង ដោយប្រព្រឹត្តអំពើផិតក្បត់ជាមួយព្រះដ៏គួរស្អប់ខ្ពើម ដូចដូន‌តារបស់អ្នករាល់គ្នាយ៉ាងនេះ? ៣១ អ្នករាល់គ្នាធ្វើឲ្យខ្លួនសៅហ្មង ដោយគោរពព្រះក្លែង‌ក្លាយរបស់អ្នករាល់គ្នារហូតមកទល់សព្វថ្ងៃ។ អ្នករាល់គ្នាយកសំណែន និងយកកូនរបស់ខ្លួនទៅដុតជាយញ្ញ‌បូជាសែនព្រះទាំងនោះ។ អ៊ីស្រា‌អែលអើយ តើអ្នករាល់គ្នាស្មានថា យើងផ្តល់ចម្លើយឲ្យអ្នករាល់គ្នាឬ? ទេ យើងមិនផ្តល់ចម្លើយឲ្យអ្នករាល់គ្នាឡើយ។ យើងជាព្រះដែលមានជីវិតគង់នៅ! - នេះជាព្រះ‌បន្ទូលរបស់ព្រះ‌ជា‌អម្ចាស់។ ៣២ អ្នករាល់គ្នានឹកស្មានថាខ្លួនអាចគោរពថ្វាយ‌បង្គំព្រះដែលធ្វើពីឈើ និងពីថ្ម ដូចប្រជា‌ជាតិ និងជាតិសាសន៍នៅតាមស្រុកនានានោះឬ? ទេ ធ្វើដូច្នេះ មិនបានជាដាច់ខាត! ៣៣ យើងជាព្រះដែលមានជីវិតគង់នៅ -នេះជាព្រះ‌បន្ទូលរបស់ព្រះ‌ជា‌អម្ចាស់ - យើងនឹងគ្រងរាជ្យលើអ្នករាល់គ្នា យើងនឹងដាក់ទោសអ្នករាល់គ្នា ដោយឫទ្ធិ‌បារមីដ៏ខ្លាំង‌ក្លារបស់យើង។ ៣៤ យើងនឹងនាំអ្នករាល់គ្នាចេញពីក្នុងចំណោមជាតិសាសន៍ទាំង‌ឡាយ យើងនឹងប្រមូលអ្នករាល់គ្នាពីស្រុកដែលយើងកម្ចាត់‌កម្ចាយអ្នករាល់គ្នាឲ្យទៅនោះ ហើយយើងនឹងដាក់ទោសអ្នករាល់គ្នា ដោយឫទ្ធិ‌បារមីដ៏ខ្លាំង‌ក្លារបស់យើង។ ៣៥ យើងនឹងនាំអ្នករាល់គ្នាទៅវាលរហោ‌ស្ថានដាច់ឡែកពីជាតិសាសន៍នានា នៅទីនោះ យើងនឹងវិនិច្ឆ័យទោសអ្នករាល់គ្នា មុខទល់នឹងមុខ។ ៣៦ យើងនឹងវិនិច្ឆ័យទោសអ្នករាល់គ្នា ដូចយើងធ្លាប់វិនិច្ឆ័យទោសដូន‌តារបស់អ្នករាល់គ្នានៅវាលរហោ‌ស្ថានស្រុកអេស៊ីបដែរ - នេះជាព្រះ‌បន្ទូលរបស់ព្រះ‌ជា‌អម្ចាស់។ ៣៧ យើងនឹងដាក់អ្នករាល់គ្នានៅក្រោមអំណាចរបស់យើង ហើយបង្ខំអ្នករាល់គ្នាឲ្យគោរពតាមសម្ពន្ធ‌មេត្រី។ ៣៨ យើងនឹងដកជនបះ‌បោរ ព្រមទាំងអស់អ្នកដែលប្រព្រឹត្តអំពើទុច្ចរិតប្រឆាំងនឹងយើង ចេញពីចំណោមអ្នករាល់គ្នា។ យើងនឹងយកពួកគេចេញពីស្រុកដែលពួកគេទៅរស់នៅ តែពួកគេមិនវិលត្រឡប់ទៅកាន់ទឹកដីអ៊ីស្រា‌អែលវិញឡើយ។ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន»។

៣៩ រីឯអ្នករាល់គ្នាវិញ ជនជាតិអ៊ីស្រា‌អែលអើយ ព្រះ‌ជា‌អម្ចាស់មានព្រះ‌បន្ទូលថា: «ទៅ! នាំគ្នាថ្វាយ‌បង្គំព្រះក្លែង‌ក្លាយរបស់អ្នករាល់គ្នារៀងៗខ្លួនទៅ!។ នៅពេលក្រោយ អ្នករាល់គ្នាត្រូវតែស្ដាប់បង្គាប់យើង អ្នករាល់គ្នានឹងលែងប្រមាថនាមរបស់យើង ដោយការសែន‌ព្រេនព្រះក្លែង‌ក្លាយទៀតហើយ ៤០ ដ្បិតជនជាតិអ៊ីស្រា‌អែលទាំងមូលដែលរស់នៅក្នុងស្រុក នឹងគោរពបម្រើយើងនៅលើភ្នំដ៏‌វិសុទ្ធរបស់យើង គឺភ្នំដ៏ខ្ពស់នៅស្រុកអ៊ីស្រា‌អែល - នេះជាព្រះ‌បន្ទូលរបស់ព្រះ‌ជា‌អម្ចាស់។ យើងពេញចិត្តនឹងទទួលអ្នករាល់គ្នានៅលើភ្នំនោះ ព្រមទាំងទទួលតង្វាយផលដំបូង និងអ្វីៗផ្សេងទៀតដែលអ្នករាល់គ្នាញែកទុកសម្រាប់យើង។ ៤១ កាលយើងនាំអ្នករាល់គ្នាចេញពីចំណោមជាតិសាសន៍ទាំង‌ឡាយ កាលយើងប្រមូលអ្នករាល់គ្នាចេញពីស្រុក ដែលយើងបំបែកអ្នករាល់គ្នាឲ្យទៅនៅនោះមកវិញ យើងពេញចិត្តនឹងទទួលអ្នករាល់គ្នា ព្រមទាំងទទួលយញ្ញ‌បូជាដ៏មានក្លិនឈ្ងុយ‌ឈ្ងប់។ ពេលនោះ យើងនឹងសម្ដែងឲ្យប្រជា‌ជាតិនានាឃើញថា យើងជាព្រះដ៏‌វិសុទ្ធ ដោយយើងប្រណីសន្ដោសអ្នករាល់គ្នា។ ៤២ ពេលយើងនាំអ្នករាល់គ្នាវិលត្រឡប់ទៅកាន់ទឹកដីអ៊ីស្រា‌អែលវិញ គឺទឹកដីដែលយើងបានលើកដៃសច្ចាថា ប្រគល់ឲ្យដូន‌តារបស់អ្នករាល់គ្នា នោះអ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន។ ៤៣ នៅទីនោះ អ្នករាល់គ្នានឹងនឹកឃើញអំពីកិរិយាមារយាទ និងអំពើទាំងប៉ុន្មានដែលអ្នករាល់គ្នាបានធ្វើឲ្យខ្លួនសៅហ្មង អ្នករាល់គ្នានឹកខ្មាសខ្លួនឯង ព្រោះតែអំពើទុច្ចរិតដែលអ្នករាល់គ្នាបានប្រព្រឹត្ត។ ៤៤ ជនជាតិអ៊ីស្រា‌អែលអើយ យើងនឹងប្រព្រឹត្តចំពោះអ្នករាល់គ្នា ដោយយល់ដល់នាមយើងផ្ទាល់ គឺយើងមិនប្រព្រឹត្តតាមអំពើទុច្ចរិត និងអំពើអាក្រក់របស់អ្នករាល់គ្នាទេ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន» -នេះជាព្រះ‌បន្ទូលរបស់ព្រះ‌ជា‌អម្ចាស់។

ភ្លើងនៅស្រុកខាងត្បូង

១ (២០.៤៥) ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ២ (៤៦) «កូនមនុស្សអើយ ចូរបែរមុខទៅខាងត្បូង ហើយប្រកាសប្រឆាំងនឹងស្រុកខាងត្បូងទៅ! ចូរថ្លែងពាក្យក្នុងនាមយើងប្រឆាំងនឹងព្រៃនៅស្រុកខាងត្បូង! ៣ (៤៧) ត្រូវប្រាប់ព្រៃនៅស្រុកខាងត្បូងថា: ចូរស្ដាប់ព្រះ‌បន្ទូលរបស់ព្រះ‌អម្ចាស់! ព្រះ‌ជា‌អម្ចាស់មានព្រះ‌បន្ទូលថា “យើងនឹងបង្កាត់ភ្លើងនៅក្នុងអ្នក ភ្លើងនេះឆាប‌ឆេះដើមឈើស្រស់ និងដើមឈើងាប់ទាំងប៉ុន្មាន។ ភ្លើងនេះមិនរលត់ឡើយ មនុស្សទាំងអស់នឹងត្រូវរលាកភ្លើង តាំងពីអ្នកស្រុកខាងត្បូងរហូតដល់អ្នកស្រុកខាងជើង។ ៤ (៤៨) មនុស្សលោកទាំងអស់នឹងឃើញថា គឺយើងជាព្រះ‌អម្ចាស់ដែលបានបង្កាត់ភ្លើងនេះ ហើយវានឹងមិនរលត់ឡើយ”»។

៥ (៤៩) ខ្ញុំទូលព្រះ‌អង្គថា៖ «បពិត្រព្រះ‌ជា‌អម្ចាស់ អ្នកទាំងនោះតែងតែពោលថា ទូល‌បង្គំជាអ្នកនិយាយពាក្យប្រស្នា»។

ដាវរបស់ព្រះ‌អម្ចាស់

៦ (១) ព្រះ‌អម្ចាស់មានព្រះ‌បន្ទូលមកខ្ញុំថា៖ ៧ (២) «កូនមនុស្សអើយ ចូរបែរមុខទៅរកក្រុងយេរូ‌សាឡឹម ហើយប្រកាសប្រឆាំងនឹងកន្លែងសក្ការៈទាំង‌ឡាយ ចូរថ្លែងពាក្យក្នុងនាមយើងប្រឆាំងនឹងទឹកដីអ៊ីស្រា‌អែល! ៨ (៣) ចូរប្រាប់ទឹកដីអ៊ីស្រា‌អែលថា ព្រះ‌អម្ចាស់មានព្រះ‌បន្ទូលដូចតទៅ: យើងប្រឆាំងនឹងអ្នកហើយ! យើងនឹងដកដាវចេញពីស្រោម ប្រហារជីវិតប្រជាជនរបស់អ្នក ទាំងមនុស្សសុចរិត ទាំងមនុស្សទុច្ចរិត។ ៩ (៤) ដាវរបស់យើងនឹងចេញពីស្រោម ប្រហារជីវិតមនុស្សលោកទាំងអស់ តាំងពីទិសខាងត្បូងរហូតដល់ទិសខាងជើង ដ្បិតយើងចង់ដកជីវិតទាំងមនុស្សសុចរិត ទាំងមនុស្សទុច្ចរិត។ ១០ (៥) ពេលនោះ មនុស្សលោកទាំងអស់នឹងទទួលស្គាល់ថា គឺយើងជាព្រះ‌អម្ចាស់ ដែលបានដកដាវចេញពីស្រោម ហើយដាវនេះនឹងមិនចូលទៅក្នុងស្រោមវិញឡើយ។ ១១ (៦) កូនមនុស្សអើយ ចូរស្រែកថ្ងូរ ទាំងឈឺចាប់ខ្លោច‌ផ្សា ចូរស្រែកថ្ងូរ នៅចំពោះមុខពួកគេ។ ១២ (៧) ពេលពួកគេសួរអ្នកថា ហេតុអ្វីបានជាលោកស្រែកថ្ងូរដូច្នេះ? ត្រូវឆ្លើយទៅពួកគេវិញថា: ខ្ញុំស្រែកថ្ងូរ ព្រោះខ្ញុំបានទទួលដំណឹងមួយ មនុស្សទាំងអស់នឹងភ័យស្លន់‌ស្លោ គេបាក់ទឹកចិត្ត ហើយទន់ដៃទន់ជើងទាំងអស់គ្នា ដ្បិតហេតុ‌ការណ៍នោះមកដល់ហើយ» - នេះជាព្រះ‌បន្ទូលរបស់ព្រះ‌ជា‌អម្ចាស់។

១៣ (៨) ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ១៤ (៩) កូនមនុស្សអើយ ចូរថ្លែងពាក្យក្នុងនាមយើង! ចូរពោលថា

ព្រះ‌អម្ចាស់មានព្រះ‌បន្ទូលដូចតទៅ:

មើលនែ៎ ដាវ!

គឺដាវដែលគេសំលៀង និងខាត់យ៉ាងរលោង។

១៥ (១០) គេសំលៀងដាវនេះ សម្រាប់ប្រហារជីវិត

គេខាត់វាយ៉ាងរលោង ចាំងដូចផ្លេកបន្ទោរ។

១៦ (១១) គេខាត់ដាវយ៉ាងរលោងដូច្នេះ

ដើម្បីប្រុងប្រៀបប្រហារ។

ដាវនេះត្រូវបានសំលៀង និងខាត់យ៉ាងរលោង

សម្រាប់ឲ្យពេជ្ឈ‌ឃាតប្រើ‌ប្រាស់

១៧ (១២) កូនមនុស្សអើយ ចូរស្រែកទ្រហោយំទៅ!

ដ្បិតគេដកដាវនោះ

សម្រាប់ប្រហារប្រជាជនរបស់យើង

និងមេដឹកនាំទាំងអស់នៃជនជាតិអ៊ីស្រា‌អែល។

ពួកគេនឹងត្រូវស្លាប់ជាមួយប្រជាជនរបស់យើង

ដូច្នេះ ចូរគក់ទ្រូងទៅ!

១៨ (១៣) ប្រជាជនរបស់យើង

ត្រូវរងទុក្ខវេទនាជាពុំ‌ខាន

ប្រសិនបើអំណាចត្រូវរលាយបាត់ទៅហើយ

នោះតើនៅសល់អ្វីទៀត?

- នេះជាព្រះ‌បន្ទូលរបស់ព្រះ‌ជា‌អម្ចាស់។

១៩ (១៤) «កូនមនុស្សអើយ

ចូរថ្លែងពាក្យក្នុងនាមយើងចុះ!

ចូរទះដៃជាសញ្ញាប្រកាសថា

សត្រូវនឹងលើកដាវកាប់ផ្ទួនៗគ្នាពីរបីដង

ដាវនេះជាដាវប្រល័យជីវិត ដាវសម្លាប់រង្គាល

និងដេញតាមពីក្រោយប្រជាជនរបស់យើង

២០ (១៥) ធ្វើឲ្យពួកគេបាក់ទឹកចិត្ត

ហើយដួលស្លាប់បន្តបន្ទាប់គ្នា។

យើងដាក់ដាវនេះនៅមាត់ទ្វារផ្ទះទាំងអស់

ដើម្បីសម្លាប់ពួកគេ។

ដាវនេះភ្លឺរលោង ចាំងដូចផ្លេកបន្ទោរ

សម្រាប់សម្លាប់រង្គាលពួកគេ។

២១ (១៦) ដាវអើយ ចូរប្រើមុខដ៏មុតរបស់ឯង!

ចូរវាត់ទៅខាងស្តាំ វាត់ទៅខាងឆ្វេង!

តម្រង់ទៅគ្រប់ទិស‌ទី!

២២ (១៧) ចំណែកឯយើងវិញ យើងក៏នឹងទះដៃដែរ

រហូតទាល់តែស្ងប់កំហឹងរបស់យើង

នេះជាពាក្យរបស់យើង ដែលជាព្រះ‌អម្ចាស់»។

ដាវរបស់ស្តេចស្រុកបាប៊ីឡូន

២៣ (១៨) ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ២៤ (១៩) «កូនមនុស្សអើយ ចូរគូរផ្លូវពីរសម្រាប់ដាវរបស់ស្តេចស្រុកបាប៊ីឡូន ផ្លូវទាំងពីរនេះចេញពីស្រុកតែមួយ។ ចូរដាក់សញ្ញាសម្គាល់នៅមាត់ផ្លូវ ដែលនាំទៅកាន់ទីក្រុងនីមួយៗ។ ២៥ (២០) ចូរគូរផ្លូវមួយ នាំមុខដាវឆ្ពោះទៅក្រុងរ៉ាបា ក្នុងស្រុកអាំម៉ូន និងមួយទៀតនាំទៅក្រុងយេរូ‌សាឡឹម ក្នុងស្រុកយូដា ជាក្រុងដែលមានកំពែងរឹង‌មាំ។ ២៦ (២១) ពេលស្តេចស្រុកបាប៊ីឡូនមកដល់ត្រង់ផ្លូវបំបែក ហើយគន់‌គូរចង់ដឹងផ្លូវដែលត្រូវទៅ ដោយអង្រួនព្រួញផ្សង និងសួរគ្រូ។ ២៧ (២២) ដៃស្តាំរបស់ស្តេចចាប់ប៉ះចំលើព្រួញតំណាងក្រុងយេរូ‌សាឡឹម ស្តេចក៏បញ្ជាឲ្យគេរៀប‌ចំទ័ព ចូលទៅសម្លាប់រង្គាល ទាំងស្រែកហ៊ោ។ គេតំរៀបគ្រឿងសាស្ត្រា‌វុធ ដើម្បីទម្លុះទ្វារក្រុង គេលើកទួលសម្រាប់វាយលុក ព្រមទាំងសង់លេណ‌ដ្ឋានទៀតផង។ ២៨ (២៣) ប្រជាជនក្រុងយេរូ‌សាឡឹមមិនចង់ជឿប្រផ្នូលនេះទេ ព្រោះពួកគេពឹងផ្អែកលើកិច្ចសន្យា។ ប៉ុន្តែ ស្តេចស្រុកបាប៊ីឡូនរំឭកពួកគេអំពីកំហុសរបស់ខ្លួន ហើយកៀរពួកគេទៅជាឈ្លើយសឹក»។ ២៩ (២៤) ហេតុនេះហើយបានជាព្រះ‌ជា‌អម្ចាស់មានព្រះ‌បន្ទូលថា៖ «អ្នករាល់គ្នានឹកឃើញកំហុសរបស់ខ្លួន ហើយនៅតែប្រព្រឹត្តអំពើទុច្ចរិត និងអំពើបាបក្នុងគ្រប់កិច្ច‌ការដែលអ្នករាល់គ្នាធ្វើ អ្នករាល់គ្នាមុខជាធ្លាក់ទៅក្នុងកណ្ដាប់ដៃរបស់សត្រូវមិនខាន។

៣០ (២៥) ចំណែកឯអ្នកដែលជាមេដឹកនាំពាល និងទុច្ចរិតរបស់ជនជាតិអ៊ីស្រា‌អែលវិញ ថ្ងៃដែលអ្នកត្រូវទទួលទោសមកដល់ហើយ ពេលនោះ អ្នកលែងប្រព្រឹត្តអំពើទុច្ចរិតទៀត!»។ ៣១ (២៦) ព្រះ‌ជា‌អម្ចាស់មានព្រះ‌បន្ទូលថា៖ «គេនឹងយកឆ្នួតចេញពីក្បាលអ្នក គេនឹងដកមកុដរាជ្យចេញពីអ្នក។ សភាព‌ការណ៍នឹងផ្លាស់ប្រែ គឺមនុស្សទន់‌ទាបនឹងត្រូវគេលើកតម្កើង រីឯអ្នកខ្ពង់‌ខ្ពស់នឹងត្រូវគេបន្ទាបចុះវិញ។ ៣២ (២៧) ការវិនាសនឹងកើតមានផ្ទួនៗគ្នា គឺយើងនឹងធ្វើឲ្យក្រុងនេះវិនាស។ ប៉ុន្តែ មិនមែនមុនការមកដល់របស់អ្នក ដែលយើងប្រគល់អំណាចឲ្យដាក់ទោសក្រុងនេះឡើយ។

ដាវនឹងប្រហារជនជាតិអាំម៉ូន

៣៣ (២៨) កូនមនុស្សអើយ ចូរថ្លែងពាក្យក្នុងនាមយើងទៅ! ចូរពោលថា ព្រះ‌ជា‌អម្ចាស់មានព្រះ‌បន្ទូលស្តីអំពីជនជាតិអាំម៉ូន ដែលបានប្រមាថជនជាតិអ៊ីស្រា‌អែល ដូចតទៅ: “ដាវ! ដាវដកចេញពីស្រោម ហើយខាត់យ៉ាងរលោង ចាំងពន្លឺដូចផ្លេកបន្ទោរ សម្រាប់សម្លាប់រង្គាល និងផ្ដាច់ជីវិត។ ៣៤ (២៩) ពេលអ្នកអះ‌អាងលើនិមិត្ត‌ហេតុបោកប្រាស់ និងការទស្សន៍‌ទាយបោកបញ្ឆោត គេនឹងត្រៀមដាវកាត់កអ្នកដែលជាមនុស្សទុច្ចរិត និងជាមនុស្សអាក្រក់ ព្រោះថ្ងៃដែលអ្នកត្រូវទទួលទោសមកដល់ហើយ ពេលនោះ អ្នកលែងប្រព្រឹត្តអំពើទុច្ចរិតទៀត!។

៣៥ (៣០) ចូរស៊កដាវក្នុងស្រោមវិញទៅ។ យើងនឹងវិនិច្ឆ័យទោសអ្នក នៅកន្លែងដែលអ្នកកើត គឺស្រុកកំណើតរបស់អ្នក។ ៣៦ (៣១) យើងនឹងជះកំហឹងរបស់យើងលើអ្នក យើងនឹងផ្លុំភ្លើងនៃកំហឹងរបស់យើងទៅលើអ្នក ហើយប្រគល់អ្នកទៅក្នុងកណ្ដាប់ដៃរបស់មនុស្សកំរោល ដែលប៉ិន‌ប្រសប់ខាងបំផ្លាញ។ ៣៧ (៣២) អ្នកនឹងវិនាសនៅក្នុងភ្លើង ឈាមរបស់អ្នកនឹងដក់នៅក្នុងស្រុក ហើយក៏គ្មាននរណានឹកដល់អ្នកទៀតដែរ”។ នេះជាពាក្យរបស់យើង ដែលជាព្រះ‌អម្ចាស់»។

ទោសរបស់ក្រុងយេរូ‌សាឡឹម

១ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖

២ «កូនមនុស្សអើយ ចូរវិនិច្ឆ័យទោស! ចូរវិនិច្ឆ័យទោសក្រុងដែលពោរ‌ពេញដោយឃាត‌កម្មនេះទៅ! ចូរប្រាប់ពួកគេឲ្យស្គាល់អំពើគួរស្អប់ខ្ពើមទាំងប៉ុន្មានរបស់ខ្លួន។ ៣ ចូរពោលថា ព្រះ‌ជា‌អម្ចាស់មានព្រះ‌បន្ទូលដូចតទៅ: ដោយប្រជាជននៅក្រុងនេះកាប់សម្លាប់គ្នា និងធ្វើឲ្យខ្លួនសៅហ្មង ព្រោះតែគោរពព្រះក្លែង‌ក្លាយដែលពួកគេបានសូន ថ្ងៃកំណត់របស់ពួកគេមកដល់ហើយ។ ៤ យេរូ‌សាឡឹមអើយ អ្នកមានទោស ព្រោះតែការកាប់សម្លាប់គ្នា និងធ្វើឲ្យខ្លួនសៅហ្មង ព្រោះតែគោរពព្រះក្លែង‌ក្លាយដែលអ្នកបានសូន។ អ្នកធ្វើឲ្យខ្លួនមានអាយុខ្លី ជីវិតអ្នកជិតដល់ទីបញ្ចប់ហើយ។ ហេតុនេះ យើងនឹងប្រគល់អ្នកទៅឲ្យប្រជា‌ជាតិទាំង‌ឡាយបន្ទាបបន្ថោក ហើយមនុស្ស‌ម្នាគ្រប់ស្រុកនឹងមើល‌ងាយអ្នក។ ៥ សាសន៍ដទៃទាំងជិតទាំងឆ្ងាយនាំគ្នាមើល‌ងាយអ្នក ដ្បិតអ្នកបន្ថោកកេរ្តិ៍ឈ្មោះខ្លួនឯង និងបំពានលើវិន័យយ៉ាងធ្ងន់‌ធ្ងរ។ ៦ មេដឹកនាំអ៊ីស្រា‌អែលប្រើកម្លាំងរបស់ខ្លួនបង្ហូរឈាមគេនៅក្នុងក្រុងនេះ។ ៧ ប្រជាជននៅក្រុងយេរូ‌សាឡឹមមាក់‌ងាយឪពុក‌ម្ដាយ ប្រព្រឹត្តអំពើឃោរ‌ឃៅទៅលើជនបរទេស ព្រមទាំងកេង‌ប្រវ័ញ្ចក្មេងកំព្រា និងស្ត្រី‌មេម៉ាយ។ ៨ ពួកគេមើល‌ងាយទី‌សក្ការៈ និងរំលោភលើថ្ងៃសប្ប័ទ*របស់យើង។ ៩ នៅក្រុងនេះមានមនុស្សនិយាយមួលបង្កាច់ ដើម្បីរកលេសសម្លាប់គ្នា។ ពួកគេបរិភោគសំណែនដែលគេសែនព្រះក្លែង‌ក្លាយនៅតាមភ្នំនានា ព្រមទាំងប្រព្រឹត្តអំពើដ៏ថោកទាបទៀតផង។ ១០ អ្នកខ្លះរួមដំណេកជាមួយប្រពន្ធចុងរបស់ឪពុកខ្លួន ពួកគេបង្ខំស្ត្រីដែលកំពុងមានរដូវឲ្យរួមដំណេកជាមួយខ្លួន។ ១១ អ្នកខ្លះរួមដំណេកជាមួយប្រពន្ធគេ អ្នកខ្លះរួមដំណេកជាមួយកូនប្រសារបស់ខ្លួន អ្នកខ្លះទៀតរំលោភលើប្អូនស្រីរបស់ខ្លួន គឺកូនកើតពីម្ដាយទី‌ទៃ។ ១២ អ្នកខ្លះទទួលសំណូក ដើម្បីធ្វើឃាតគេ ពួកគេទារការប្រាក់ហួសកម្រិត សង្កត់‌សង្កិន ជំរិតយកប្រាក់គ្នា។ យេរូ‌សាឡឹមអើយ អ្នកបានបំភ្លេចយើងចោលហើយ - នេះជាព្រះ‌បន្ទូលរបស់ព្រះ‌ជា‌អម្ចាស់។

១៣ យើងនឹងទះដៃដោយកំហឹងដាក់ក្រុងនេះ ព្រោះតែពួកគេជំរិតជិះ‌ជាន់ និងប្រហារជីវិតគ្នា។ ១៤ យេរូ‌សាឡឹមអើយ នៅគ្រាយើងដាក់ទោសអ្នក តើអ្នកមានកម្លាំងកាយ កម្លាំងចិត្តទ្រាំ‌ទ្របានឬទេ? យើងជាព្រះ‌អម្ចាស់ យើងនិយាយយ៉ាងណា យើងសម្រេចយ៉ាងនោះ។ ១៥ យើងនឹងបំបែកប្រជាជនរបស់អ្នក ទៅក្នុងចំណោមប្រជា‌ជាតិទាំង‌ឡាយ យើងនឹងកម្ចាត់‌កម្ចាយប្រជាជនរបស់អ្នកឲ្យទៅនៅតាមស្រុកនានា យើងនឹងធ្វើឲ្យអ្នកលែងប្រព្រឹត្តអំពើសៅហ្មងទៀត។ ១៦ អ្នកបង្អាប់‌បង្អោនកិត្តិយសខ្លួនឯង នៅចំពោះមុខប្រជា‌ជាតិទាំង‌ឡាយ។ ពេលនោះ អ្នកនឹងទទួលស្គាល់ថា យើងពិតជាព្រះ‌អម្ចាស់មែន»។

១៧ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ១៨ «កូនមនុស្សអើយ ពូជ‌ពង្សអ៊ីស្រា‌អែលលែងមានតម្លៃអ្វីសម្រាប់យើងទៀតហើយ ពួកគេប្រៀបដូចជាលោហ‌ធាតុដែលមិនសុទ្ធ គឺប្រាក់ លង្ហិន ស្ពាន់ ដែក និងសំណ ដែលត្រូវដាក់ក្នុងឡ»។ ១៩ ហេតុនេះ ព្រះ‌ជា‌អម្ចាស់មានព្រះ‌បន្ទូលថា៖ «ដោយអ្នកទាំងអស់គ្នាប្រៀបដូចជាលោហ‌ធាតុមិនសុទ្ធ យើងនឹងប្រមូលអ្នករាល់គ្នាមកដាក់នៅកណ្ដាលក្រុងយេរូ‌សាឡឹម។ ២០ យើងនឹងគរអ្នករាល់គ្នាដុត តាមកំហឹងដ៏ខ្លាំង‌ក្លារបស់យើង ដូចគេប្រមូលប្រាក់ លង្ហិន ដែក សំណ និងស្ពាន់ មកដាក់ជាគំនរ ដុតរំលាយនៅក្នុងភ្លើងយ៉ាងនោះដែរ។ ២១ យើងនឹងដាក់អ្នករាល់គ្នាជាគំនរ រួចផ្លុំភ្លើងនៃកំហឹងរបស់យើង ដុតអ្នករាល់គ្នា ឲ្យរលាយនៅកណ្ដាលក្រុងយេរូ‌សាឡឹម។ ២២ អ្នករាល់គ្នានឹងរលាយនៅកណ្ដាលក្រុងយេរូ‌សាឡឹម ដូចប្រាក់រលាយនៅក្នុងឡ។ ពេលនោះ អ្នករាល់គ្នានឹងទទួលស្គាល់ថា យើងជាព្រះ‌អម្ចាស់ យើងបានជះកំហឹងរបស់យើងលើអ្នករាល់គ្នា»។

២៣ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២៤ «កូនមនុស្សអើយ ចូរប្រាប់ក្រុងយេរូ‌សាឡឹមទៀតថា: អ្នកជាទឹកដីមិនបរិសុទ្ធ ជាដីដែលគ្មានភ្លៀងស្រោចស្រព នៅថ្ងៃយើងខឹង។ ២៥ ព្យាការីរបស់អ្នកឃុប‌ឃិតគ្នានៅក្នុងក្រុងនេះ ដូចសិង្ហគ្រហឹមបម្រុងហែករំពាស៊ី។ ពួកគេប្រហារជីវិតមនុស្ស ដើម្បីរឹបអូសយកទ្រព្យ‌សម្បត្តិ និងរបស់របរដ៏មានតម្លៃ ពួកគេធ្វើឲ្យស្ត្រី‌មេម៉ាយកើនចំនួនច្រើនឡើងៗនៅក្នុងទីក្រុង។ ២៦ បូជា‌ចារ្យរបស់អ្នក នាំគ្នាបំពានលើវិន័យរបស់យើង និងបន្ថោកទី‌សក្ការៈរបស់យើង។ ពួកគេមិនចេះសម្គាល់មើលថា អ្វីវិសុទ្ធ*ឬមិនវិសុទ្ធ ហើយក៏មិនបង្រៀនប្រជាជនឲ្យស្គាល់អ្វីបរិសុទ្ធ* និងអ្វីមិនបរិសុទ្ធដែរ។ ពួកគេមិនរវី‌រវល់នឹងថ្ងៃសប្ប័ទ*របស់យើងទេ ដូច្នេះ នៅក្រុងយេរូ‌សាឡឹមគ្មាននរណាគោរពយើងទៀតឡើយ។ ២៧ មេដឹកនាំរបស់ក្រុងនេះ ប្រៀបបាននឹងចចកដែលហែករំពាស៊ី គឺពួកគេនាំគ្នាបង្ហូរឈាម និងប្រហារជីវិតមនុស្សដណ្ដើមយកទ្រព្យ‌សម្បត្តិ។ ២៨ ព្យាការីរបស់គេជាមនុស្សលាក់ពុត គឺប្រកាសអំពីនិមិត្ត‌ហេតុក្លែង‌ក្លាយ និងការទស្សន៍‌ទាយបោកប្រាស់។ ពួកគេពោលថា “ព្រះ‌ជា‌អម្ចាស់មានព្រះ‌បន្ទូលដូចតទៅ” តែព្រះ‌អម្ចាស់ឥតមានព្រះ‌បន្ទូលតាម‌រយៈពួកគេឡើយ។ ២៩ ប្រជាជននៅក្នុងស្រុកនេះនាំគ្នាប្រព្រឹត្តអំពើឃោរ‌ឃៅ លួចប្លន់ និងកេង‌ប្រវ័ញ្ចជនកំសត់ទុរគត ជិះ‌ជាន់សង្កត់‌សង្កិនជនបរទេស ដោយអយុត្តិ‌ធម៌។ ៣០ យើងស្វែងរកក្នុងចំណោមពួកគេ ក្រែងលោឃើញនរណាម្នាក់មានគំនិតសង់កំពែងការ‌ពារក្រុង ហើយឈរនៅចំពោះមុខយើងត្រង់កន្លែងបាក់បែក ដើម្បីការ‌ពារស្រុកទេសកុំឲ្យវិនាស តែយើងរកពុំបានសោះ។ ៣១ ដូច្នេះ យើងនឹងជះកំហឹងរបស់យើងទៅលើពួកគេ ភ្លើងនៃកំហឹងរបស់យើងផ្តន្ទាទោសពួកគេ។ យើងដាក់ទោសពួកគេតាមអំពើដែលខ្លួនបានប្រព្រឹត្ត» -នេះជាព្រះ‌បន្ទូលរបស់ព្រះ‌ជា‌អម្ចាស់។

អំពើបាបរបស់ក្រុងសាម៉ារី និងក្រុងយេរូ‌សាឡឹម

១ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ២ «កូនមនុស្សអើយ មានស្ត្រីពីរនាក់ជាបង‌ប្អូនបង្កើត។ ៣ កាលនៅពីក្មេង នាងទាំងពីររស់នៅក្នុងស្រុកអេស៊ីប ហើយបានខូចខ្លួនដោយប្រព្រឹត្តអំពើពេស្យា‌ចារ។ ៤ នាងបងឈ្មោះ អូហូ‌ឡា នាងប្អូនឈ្មោះ អូហូ‌លីបា។ ពីមុន នាងទាំងពីរជាភរិយារបស់យើង នាងបង្កើតបានកូនប្រុសកូនស្រី។ អូហូ‌ឡាគឺក្រុងសាម៉ារី រីឯអូហូ‌លីបាគឺក្រុងយេរូ‌សាឡឹម។ ៥ អូហូ‌ឡាបានក្បត់ចិត្តយើងទៅប្រព្រឹត្តពេស្យា‌ចារ ហើយបែរទៅសហាយ‌ស្មន់ជាមួយពួកអាស្ស៊ីរីជាទាហាន ៦ ដែលស្លៀកពាក់ក្រណាត់ពណ៌ស្វាយ ជាទេសា‌ភិបាល និងចៅ‌ក្រម។ អ្នកទាំងនោះមានវ័យក្មេង និងរូបរាងសង្ហា ហើយសុទ្ធ‌សឹងជាអ្នកជិះសេះដ៏ចំណាន។ ៧ នាងប្រគល់ខ្លួនទៅឲ្យវីរ‌បុរសអាស្ស៊ីរីទាំងនោះ។ ពេលនាងខូចខ្លួនជាមួយសហាយទាំងប៉ុន្មានរបស់នាង នាងបានធ្វើឲ្យខ្លួនទៅជាសៅហ្មង ដោយគោរពព្រះក្លែង‌ក្លាយទាំងប៉ុន្មានរបស់ពួកគេ។ ៨ នាងពុំបានលះ‌បង់អំពើពេស្យា‌ចារដែលខ្លួនធ្លាប់ប្រព្រឹត្ត តាំងពីនៅស្រុកអេស៊ីបនោះឡើយ កាលនៅពីក្មេង នាងប្រគល់ខ្លួនទៅឲ្យប្រុសៗ ពួកគេបង្ខូចព្រហ្មចារីរបស់នាង ធ្វើឲ្យនាងក្លាយទៅជាស្រីពេស្យា។ ៩ ហេតុនេះហើយបានជាយើងប្រគល់នាងទៅក្នុងកណ្ដាប់ដៃរបស់សហាយនាង គឺជនជាតិអាស្ស៊ីរីដែលនាងឈ្លក់ចិត្តជាខ្លាំងនោះ។ ១០ ពួកគេធ្វើឲ្យនាងនៅខ្លួនទទេ ពួកគេចាប់កូនប្រុសកូនស្រីរបស់នាង ហើយប្រហារជីវិតនាងដោយមុខដាវ។ ពួកគេដាក់ទោសនាង ទុកជាមេរៀនដល់ស្ត្រីឯទៀតៗ។

១១ ពេលអូហូ‌លីបាជាប្អូនឃើញដូច្នេះ នាងមានតណ្ហាអាក្រក់ខ្លាំងជាងបងទៅទៀត។ នាងប្រព្រឹត្តអំពើពេស្យា‌ចារអាក្រក់លើសបងរបស់ខ្លួន។ ១២ នាងឈ្លក់ចិត្តនឹងជនជាតិអាស្ស៊ីរី ជាទាហាន ទេសា‌ភិបាល និងចៅ‌ក្រម។ អ្នកទាំងនោះស្លៀកពាក់យ៉ាងស្អាត ជាអ្នកជិះសេះដ៏ចំណានមានវ័យក្មេង និងរូបរាងសង្ហា។ ១៣ យើងឃើញនាងខូចខ្លួន ទាំងបងទាំងប្អូន ដើរតាមផ្លូវតែមួយ។ ១៤ នាងប្រព្រឹត្តអំពើពេស្យា‌ចារបែបនេះហើយ នៅតែមិនអស់ចិត្តទៀត។ នាងឃើញរូបប្រុសៗដែលគេឆ្លាក់នៅតាមជញ្ជាំង គឺរូបចម្លាក់របស់ជនជាតិខាល់ដេ គូរដោយពណ៌ក្រហម ១៥ មានខ្សែក្រវាត់នៅជុំ‌វិញចង្កេះ មានឆ្នួតដ៏ឆើត‌ឆាយរុំជុំ‌វិញក្បាល។ រូបទាំងនោះមានទំនងជាមេដឹកនាំ និងមានទ្រង់‌ទ្រាយជាជនជាតិបាប៊ីឡូននៅស្រុកខាល់ដេ ដែលជាមាតុ‌ភូមិរបស់ពួកគេ។ ១៦ ពេលឃើញរូបទាំងនោះ នាងចាប់ចិត្តស្នេហាភ្លាម ហើយចាត់អ្នកនាំសារទៅស្រុកខាល់ដេ។ ១៧ ជនជាតិបាប៊ីឡូននាំគ្នាមករកនាង ដើម្បីរួមដំណេកជាមួយនាង ហើយបង្ខូចនាងឲ្យក្លាយទៅជាស្រីពេស្យា។ នាងបានខូចខ្លួនជាមួយពួកគេ រហូតដល់នាងស្អប់ខ្ពើមពួកគេ។ ១៨ នាងបង្ហាញឲ្យគ្រប់គ្នាឃើញថា ខ្លួនជាស្រីពេស្យា នាងបើកកេរ្ដិ៍‌ខ្មាសឲ្យគេឃើញ។ ហេតុនេះ យើងស្អប់ខ្ពើមនាងដូចយើងស្អប់ខ្ពើមបងស្រីរបស់នាងដែរ។ ១៩ កាលនាងនឹកឃើញគ្រាដែលនាងនៅក្មេង គឺគ្រាដែលនាងធ្វើជាស្រីពេស្យានៅស្រុកអេស៊ីប នាងរឹតតែប្រព្រឹត្តអំពើពេស្យា‌ចារកាន់តែច្រើនឡើងៗ។ ២០ នាងឈ្លក់ចិត្តនឹងពួកសហាយរបស់នាង ដែលមានសាច់ឈាមដូចសត្វលា និងពូកែចែ‌ចង់ដូចសេះឈ្មោល។ ២១ នាងចង់ប្រព្រឹត្តអំពើថោកទាប ដូចនាងធ្លាប់ប្រព្រឹត្តកាលនៅពីក្មេង គឺនៅគ្រាដែលពួកអេស៊ីបប៉ះ‌ពាល់ដើមទ្រូងរបស់នាង និងធ្វើឲ្យនាងខូចព្រហ្មចារី»។

២២ ហេតុនេះ អូហូ‌លីបាអើយ ព្រះ‌ជា‌អម្ចាស់មានព្រះ‌បន្ទូលដូចតទៅ៖ «យើងនឹងនាំសហាយរបស់នាង គឺអស់អ្នកដែលនាងស្អប់ខ្ពើមនោះឲ្យមកប្រឆាំងនឹងនាង។ យើងនឹងនាំពួកគេមកវាយប្រហារនាងពីគ្រប់ទិស‌ទី។ ២៣ ជនជាតិបាប៊ីឡូន និងជនជាតិខាល់ដេទាំងអស់ អ្នកស្រុកពេកុដ សូអា និងកូអា ព្រមទាំងជនជាតិអាស្ស៊ីរីទាំងប៉ុន្មានក៏លើកគ្នាមកដែរ អ្នកទាំងនោះមានវ័យក្មេង និងរូបរាងសង្ហា ពួកគេសុទ្ធតែជាទេសា‌ភិបាល និងមេដឹកនាំ ជានាយទាហានដ៏ខ្ពង់‌ខ្ពស់ ហើយសុទ្ធតែជាអ្នកជិះសេះដ៏ចំណាន។ ២៤ ពួកគេលើកគ្នាពីទិសខាងជើងមកវាយប្រហារនាង ដោយមានរទេះសេះ រទេះចម្បាំង និងពល‌ទាហានដ៏ច្រើន។ ពួកគេឡោម‌ព័ទ្ធនាងគ្រប់ទិស‌ទី ដោយមានខែលតូចធំ និងមួកដែក។ យើងនឹងប្រគល់សំណុំរឿងរបស់នាង ទៅឲ្យពួកគេ ហើយពួកគេនឹងវិនិច្ឆ័យទោសនាង តាមច្បាប់របស់ពួកគេ។ ២៥ ដោយយើងមានចិត្តប្រច័ណ្ឌ យើងនឹងបណ្តោយឲ្យពួកគេធ្វើបាបនាងយ៉ាងឃោរ‌ឃៅ ពួកគេកាត់ច្រមុះ និងកាត់ត្រចៀកនាង ព្រមទាំងសម្លាប់កូនចៅរបស់នាង ដោយមុខដាវ ពួកគេនឹងយកកូនប្រុសកូនស្រីរបស់នាងទៅដុតទាំងរស់។ ២៦ ពួកគេនឹងយកសម្លៀក‌បំពាក់ ព្រមទាំងគ្រឿងអលង្ការចេញពីនាង។ ២៧ យើងនឹងបញ្ឈប់នាង លែងឲ្យប្រព្រឹត្តអំពើថោកទាប និងអំពើពេស្យា‌ចារ ដែលនាងធ្លាប់ប្រព្រឹត្ត តាំងពីនៅស្រុកអេស៊ីបរហូតតរៀងមក។ នាងលែងជំពាក់ចិត្តលើសហាយរបស់នាង ហើយក៏លែងនឹកនាដល់ស្រុកអេស៊ីបទៀតដែរ។

២៨ យើងជាព្រះ‌ជា‌អម្ចាស់ យើងប្រាប់ឲ្យនាងដឹងថា យើងនឹងប្រគល់នាងទៅក្នុងកណ្ដាប់ដៃរបស់អស់អ្នកដែលនាងស្អប់ គឺអស់អ្នកដែលនាងជិន‌ណាយ។ ២៩ ពួកគេនឹងប្រព្រឹត្តចំពោះនាងដោយចិត្តស្អប់ ពួកគេនឹងរឹបអូសយកអ្វីៗទាំងអស់ដែលនាងខំប្រឹងរក ហើយទុកឲ្យនាងនៅខ្លួនទទេ។ មនុស្ស‌ម្នានឹងឃើញកេរ្ដិ៍‌ខ្មាសរបស់នាង គេនឹងដឹងថានាងជាស្រីពេស្យា។ ៣០ គេប្រព្រឹត្តចំពោះនាងដូច្នេះ មកពីនាងប្រព្រឹត្តអំពើថោកទាប និងអំពើពេស្យា‌ចារ តាមប្រជា‌ជាតិនានា ព្រមទាំងធ្វើឲ្យខ្លួនសៅហ្មង ដោយគោរពព្រះក្លែង‌ក្លាយរបស់ពួកគេ។ ៣១ នាងបានដើរតាមផ្លូវរបស់បងស្រីនាង ហេតុនេះ យើងនឹងឲ្យពែងនៃទុក្ខទោសដល់នាង ដូចបងស្រីរបស់នាងដែរ»។

៣២ ព្រះ‌ជា‌អម្ចាស់មានព្រះ‌បន្ទូលដូចតទៅ៖

«នាងនឹងផឹកពីពែងនៃទុក្ខទោស

ដូចបងស្រីរបស់នាង

ពែងនេះធំ ហើយជ្រៅថែមទៀតផង។

មនុស្ស‌ម្នានឹងសើចចំអកមើល‌ងាយនាង

ព្រោះពែងនោះពេញបរិបូណ៌។

៣៣ នាងនឹងវង្វេងស្មារតីដោយរងទុក្ខជាខ្លាំង

ដ្បិតពែងនោះជាពែងនៃការភ័យខ្លាច

និងការវិនាសហិន‌ហោច

គឺពែងរបស់សាម៉ារី ជាបងស្រីនាង។

៣៤ នាងនឹងផឹក រហូតទាល់តែអស់ពីពែង

រួចនាងខាំបំបែកពែងនោះជាច្រើនបំណែក

ហើយយកអំបែងមកឆូតសាច់ខ្លួនឯង

ដូចយើងបាននិយាយទុកមែន»

- នេះជាព្រះ‌បន្ទូលរបស់ព្រះ‌ជា‌អម្ចាស់។

៣៥ ព្រះ‌ជា‌អម្ចាស់មានព្រះ‌បន្ទូលដូចតទៅ៖

«ដោយនាងបានបំភ្លេចយើង

ដោយនាងបែរខ្នងដាក់យើង

នាងនឹងត្រូវរងទុក្ខទោស

ព្រោះតែអំពើថោកទាប

និងអំពើពេស្យា‌ចាររបស់ខ្លួន»។

ការវិនិច្ឆ័យទោសក្រុងសាម៉ារី និងក្រុងយេរូ‌សាឡឹម

៣៦ ព្រះ‌អម្ចាស់មានព្រះ‌បន្ទូលមកខ្ញុំថា៖ «កូនមនុស្សអើយ ចូរវិនិច្ឆ័យទោសអូហូ‌ឡា និងអូហូ‌លីបាទៅ! ចូររៀបរាប់ឲ្យនាងទាំងពីរស្គាល់អំពើគួរស្អប់ខ្ពើមរបស់ខ្លួន ៣៧ ដ្បិតនាងទាំងពីរបានប្រព្រឹត្តអំពើផិតក្បត់ ហើយដៃប្រឡាក់ទៅដោយឈាម។ ពួកនាងបានប្រព្រឹត្តអំពើផិតក្បត់ជាមួយព្រះក្លែង‌ក្លាយ ព្រមទាំងយកកូនដែលនាងបានបង្កើតឲ្យយើងទៅដុត សែនព្រះទាំងនោះទៀតផង។ ៣៨ មិនតែប៉ុណ្ណោះសោត នៅថ្ងៃដដែលនោះ ពួកនាងប្រព្រឹត្តអាក្រក់ចំពោះយើងថែមទៀត គឺធ្វើឲ្យទី‌សក្ការៈរបស់យើងទៅជាសៅហ្មង និងរំលោភលើថ្ងៃសប្ប័ទ*របស់យើង។ ៣៩ ក្នុងថ្ងៃតែមួយ ពួកនាងសម្លាប់កូនរបស់ខ្លួនសែនព្រះក្លែង‌ក្លាយ រួចចូលទៅប្រមាថទី‌សក្ការៈរបស់យើង។ នេះហើយជាអំពើដែលពួកនាងប្រព្រឹត្តនៅក្នុងដំណាក់របស់យើង។

៤០ លើសពីនេះ ពួកនាងបានចាត់អ្នកនាំសារទៅរកប្រុសៗនៅស្រុកឆ្ងាយ និងហៅគេឲ្យមក។ អ្នកទាំងនោះក៏នាំគ្នាមក។ នាងងូតទឹក ដើម្បីទទួលពួកគេ ដោយផាត់ម្សៅ និងពាក់គ្រឿងអលង្ការទៀតផង។ ៤១ នាងអង្គុយនៅលើគ្រែតាក់តែងយ៉ាងស្អាត នៅមុខមានតុមួយដែលនាងយកគ្រឿងក្រអូប និងប្រេងរបស់យើងមកដាក់ទទួលពួកគេ។ ៤២ សម្រែករបស់មនុស្សដ៏ច្រើនកុះ‌ករ ដែលគ្មានកង្វល់អ្វី បានលាន់ឮឡើង ក្នុងចំណោមអ្នកទាំងនោះ មានមនុស្សមួយចំនួនដែលមកពីគ្រប់ទិសតំបន់នៃវាលរហោ‌ស្ថាន គេបានពាក់កង‌ដៃឲ្យនាងទាំងពីរ និងពាក់មកុដដ៏ល្អប្រណីតនៅលើក្បាលផង។ ៤៣ ពេលនោះ យើងក៏ឧទានឡើងថា “មើលចុះ សូម្បីស្រីដែលបាត់បង់សម្ផស្សដោយ‌សារអំពើពេស្យា‌ចារ ក៏នៅតែប្រព្រឹត្តអំពើប្រាសចាកសីល‌ធម៌ដែរ!”។ ៤៤ ពួកគេទៅរកនាង ដូចទៅរកស្រីពេស្យា គឺពួកគេទៅរកនាងអូហូ‌ឡា និងនាងអូហូ‌លីបា ជាស្រីថោកទាប។ ៤៥ ប៉ុន្តែ មនុស្សសុចរិតនឹងវិនិច្ឆ័យទោសស្រីទាំងពីរនោះ ដូចគេវិនិច្ឆ័យទោសស្រីផិតក្បត់ និងស្រីដែលសម្លាប់គេ ដ្បិតនាងទាំងពីរជាស្រីផិតក្បត់ ហើយដៃប្រឡាក់ដោយឈាម»។

៤៦ ហេតុនេះ ព្រះ‌ជា‌អម្ចាស់មានព្រះ‌បន្ទូលថា៖ «ចូរកោះហៅមនុស្ស‌ម្នាឲ្យមកជួប‌ជុំគ្នាប្រឆាំងនឹងនាងទាំងពីរ។ យើងនឹងធ្វើឲ្យនាងភ័យតក់‌ស្លុត ហើយឲ្យគេរឹបអូសយកទ្រព្យ‌សម្បត្តិរបស់នាង។ ៤៧ ចូរយកដុំថ្មគប់នាងទាំងពីរ ចូរសម្លាប់នាងទាំងពីរ ដោយមុខដាវ ចូរសម្លាប់កូនប្រុសកូនស្រីរបស់នាង ព្រមទាំងដុតកម្ទេចផ្ទះរបស់នាងទៀតផង។ ៤៨ យើងនឹងបំបាត់អំពើប្រាសចាកសីល‌ធម៌ឲ្យអស់ពីក្នុងស្រុក។ ស្ត្រីទាំងអស់នឹងយករឿងនេះទុកជាមេរៀន ហើយមិនប្រព្រឹត្តអំពើប្រាសចាកសីល‌ធម៌ដូចនាងទៀតឡើយ។ ៤៩ នាងទាំងពីរនឹងទទួលទោស តាមអំពើប្រាសចាកសីល‌ធម៌ និងអំពើបាបដែលនាងប្រព្រឹត្តដោយគោរពព្រះក្លែង‌ក្លាយ។ ពេលនោះ នាងនឹងទទួលស្គាល់ថា យើងពិតជាព្រះ‌ជា‌អម្ចាស់មែន»។

ទីសម្គាល់អំពីថ្លាង

១ នៅឆ្នាំទីប្រាំបួន ខែទីដប់ ថ្ងៃទីដប់ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរកត់‌ត្រាថ្ងៃនេះទុក ដ្បិតថ្ងៃនេះហើយដែលស្តេចស្រុកបាប៊ីឡូនឡោម‌ព័ទ្ធក្រុងយេរូ‌សាឡឹម។ ៣ ចូរចោទប្រស្នាមួយដល់ពូជអ្នកបះ‌បោរនេះថា ព្រះ‌ជា‌អម្ចាស់មានព្រះ‌បន្ទូលដូចតទៅ:

ចូររៀប‌ចំថ្លាងមួយដាក់នៅលើភ្លើង

រួចចាក់ទឹកទៅក្នុងថ្លាងនោះ។

៤ បន្ទាប់មក ចូរដាក់សាច់ទៅក្នុងថ្លាង

គឺសាច់ល្អៗ សាច់ភ្លៅ សាច់ស្មា

រួចដាក់ឆ្អឹងល្អៗបំពេញថ្លាងនោះដែរ។

៥ ចូរយកសាច់ចៀមដ៏ល្អៗមក

ហើយយកឆ្អឹងរបស់វាដាក់ពីក្រោម។

ចូរស្ងោរសាច់នៅក្នុងថ្លាងឲ្យផុយ

សូម្បីតែឆ្អឹងក៏ត្រូវឲ្យឆ្អិនល្អដែរ។

៦ ព្រះ‌ជា‌អម្ចាស់មានព្រះ‌បន្ទូលដូចតទៅ:

ក្រុងដែលប្រឡាក់ទៅដោយឈាម

មុខជាត្រូវវេទនាពុំ‌ខាន!

ក្រុងនេះប្រៀបបាននឹងថ្លាងដុះស្នឹម

ហើយស្នឹមនេះដុសមិនជ្រះទេ។

ចូរស្រង់ដុំសាច់ចេញបន្តបន្ទាប់គ្នា

គ្មានដុំណាមួយនៅសល់ឡើយ។

៧ នៅក្នុងក្រុង គេសម្លាប់គ្នា

គេបង្ហូរឈាមនៅលើផ្ទាំងថ្ម

គឺមិនទុកឲ្យឈាមនោះស្រោចលើដី

ហើយយកដីលុបទេ។

៨ ដូច្នេះ ដើម្បីសម្រេចតាមកំហឹង

និងតាមការសង‌សឹករបស់យើង

យើងនឹងទុកឈាមគេនៅលើផ្ទាំងថ្ម

ឥតយកដីលុបឡើយ។

៩ ព្រះ‌ជា‌អម្ចាស់មានព្រះ‌បន្ទូលដូចតទៅ:

ក្រុងដែលប្រឡាក់ទៅដោយឈាម

មុខជាត្រូវវេទនាពុំ‌ខាន!

ដ្បិតយើងនឹងបង្កាត់ភ្លើងដ៏សន្ធោ‌សន្ធៅដែរ។

១០ ចូរយកអុសយ៉ាងច្រើនមកគរលើគ្នា!

ចូរបង្កាត់ភ្លើង! ចូរចម្អិនសាច់!

ចូរដាក់គ្រឿង ហើយដុតបន្សុសឆ្អឹងទៅ!

១១ បន្ទាប់មក ចូរដាក់ថ្លាងទទេលើភ្លើង

ទុកឲ្យក្ដៅរហូតទាល់តែស្ពាន់ឡើងក្រហម

អ្វីៗដែលកខ្វក់នៅក្នុងនោះ ត្រូវរលាយ

រីឯស្នឹមក៏ត្រូវរលាយអស់ដែរ។

១២ ទោះបីគេខំប្រឹងយ៉ាងណាក៏ដុសស្នឹមមិនជ្រះដែរ គឺមានតែភ្លើងទេដែលអាចជម្រះស្នឹមបាន!។ ១៣ យេរូ‌សាឡឹមអើយ នាងប្រឡាក់ដោយអំពើប្រាសចាកសីល‌ធម៌។ ទោះបីយើងខំជម្រះនាងឲ្យបរិសុទ្ធក្តី ក៏នាងនៅតែមិនបរិសុទ្ធដដែល។ ដូច្នេះ នាងនៅសៅហ្មង រហូតដល់យើងសម្រេចតាមកំហឹងរបស់យើងចប់សព្វគ្រប់។ ១៤ យើងជាព្រះ‌អម្ចាស់ យើងនិយាយយ៉ាងណា នឹងកើតមានយ៉ាងនោះ។ យើងសម្រេចតាមពាក្យរបស់យើង ឥតដូរគំនិតឡើយ។ យើងក៏មិនអាណិត‌អាសូរ ឬស្តាយក្រោយដែរ។ នាងនឹងត្រូវទទួលទោសតាមកិរិយា‌មារយាទ និងអំពើទាំង‌ឡាយដែលនាងបានប្រព្រឹត្ត»-នេះជាព្រះ‌បន្ទូលរបស់ព្រះ‌ជា‌អម្ចាស់។

ទីសម្គាល់អំពីមរណ‌ភាពនៃភរិយារបស់ព្យាការី

១៥ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ១៦ «កូនមនុស្សអើយ! យើងនឹងដកជីវិតប្រពន្ធដ៏ជាទីគាប់ចិត្តរបស់អ្នក ក្នុងមួយប៉ប្រិចភ្នែក។ អ្នកមិនត្រូវកាន់ទុក្ខ មិនត្រូវសោកសង្រេង មិនត្រូវបង្ហូរទឹកភ្នែកឡើយ។ ១៧ ចូរខ្សឹក‌ខ្សួលយ៉ាងស្ងាត់ស្ងៀម តែកុំកាន់ទុក្ខឲ្យសោះ។ ត្រូវជួតក្បាល ពាក់ស្បែកជើងធ្វើដូចធម្មតា កុំបាំងមុខ ឬបរិភោគអាហារសម្រាប់អ្នកកាន់ទុក្ខឡើយ»។

១៨ នៅពេលព្រឹក ខ្ញុំនិយាយជាមួយប្រជាជន លុះដល់ពេលល្ងាច ប្រពន្ធខ្ញុំបាត់បង់ជីវិត។ ស្អែកឡើង ខ្ញុំធ្វើតាមព្រះ‌បន្ទូលដែលព្រះ‌អម្ចាស់បានបង្គាប់មកខ្ញុំ។ ១៩ ប្រជាជនសួរខ្ញុំថា៖ «សូមពន្យល់ប្រាប់យើងខ្ញុំផង លោកធ្វើដូច្នេះមានន័យដូចម្ដេចសម្រាប់យើងខ្ញុំ?»។ ២០ ខ្ញុំឆ្លើយទៅគេវិញថា៖ «ព្រះ‌អម្ចាស់មានព្រះ‌បន្ទូលមកខ្ញុំដូចតទៅ: ២១ “ចូរប្រាប់ជនជាតិអ៊ីស្រា‌អែលថា ព្រះ‌ជា‌អម្ចាស់មានព្រះ‌បន្ទូលដូចតទៅ បន្តិចទៀត យើងនឹងបន្ទាប‌បន្ថោកទី‌សក្ការៈរបស់យើង ដែលជាទីអួត‌អាង ជាកម្លាំង ជាទីគាប់ចិត្ត និងជាទីសង្ឃឹមរបស់អ្នករាល់គ្នា។ កូនប្រុសកូនស្រីដែលអ្នករាល់គ្នាទុកនៅក្រុងយេរូ‌សាឡឹម នឹងត្រូវស្លាប់ដោយមុខដាវ។ ២២ ពេលនោះ អ្នករាល់គ្នានឹងធ្វើដូចខ្ញុំធ្វើនេះដែរ គឺអ្នករាល់គ្នាមិនបាំងមុខ មិនបរិភោគអាហារសម្រាប់អ្នកកាន់ទុក្ខទេ។ ២៣ អ្នករាល់គ្នានឹងជួតក្បាល ពាក់ស្បែកជើងធ្វើដូចធម្មតា គឺអ្នករាល់គ្នាមិនកាន់ទុក្ខ ឬសោកសង្រេងឡើយ។ ប៉ុន្តែ អ្នករាល់គ្នាកាន់តែរីង‌រៃទៅៗ ព្រោះតែអំពើបាបរបស់ខ្លួន ហើយម្នាក់ៗស្រណោះ‌ស្រណោកគ្នាទៅវិញទៅមក។ ២៤ អេសេ‌គីអែលធ្វើដូច្នេះ ជាប្រផ្នូលសម្រាប់អ្នករាល់គ្នា។ អ្នករាល់គ្នានឹងធ្វើសព្វគ្រប់ទាំងអស់ដូចគាត់បានធ្វើដែរ។ ពេលហេតុ‌ការណ៍នោះកើតឡើង អ្នករាល់គ្នានឹងទទួលស្គាល់ថា យើងជាព្រះ‌ជា‌អម្ចាស់មែន”។

២៥ កូនមនុស្សអើយ យើងនឹងដកទី‌សក្ការៈដែលជាកម្លាំង អំណរ ភាពរុង‌រឿង និងជាទីគាប់ចិត្ត ជាទីស្រឡាញ់របស់ពួកគេ យើងក៏នឹងដកកូនប្រុសកូនស្រីចេញពីពួកគេដែរ ២៦ នៅថ្ងៃនោះ មានមនុស្សរត់នាំដំណឹងមកប្រាប់អ្នក ២៧ នៅថ្ងៃនោះ អ្នកនឹងលែងនៅស្ងៀមទៀតហើយ គឺអ្នកនឹងហាមាត់និយាយជាមួយមនុស្សដែលរត់មក។ អ្នកនឹងធ្វើជាប្រផ្នូលសម្រាប់ពួកគេ ហើយពួកគេនឹងទទួលស្គាល់ថា យើងពិតជាព្រះ‌អម្ចាស់មែន»។

ព្រះ‌បន្ទូលស្តីអំពីប្រជា‌ជាតិនានា

ព្រះ‌បន្ទូលប្រឆាំងនឹងជនជាតិអាំម៉ូន

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរបែរមុខទៅរកជនជាតិអាំម៉ូន ហើយថ្លែងពាក្យក្នុងនាមយើង ប្រឆាំងនឹងពួកគេ។ ៣ ត្រូវប្រាប់ជនជាតិអាំម៉ូនដូចតទៅ: ចូរស្ដាប់ព្រះ‌បន្ទូលរបស់ព្រះ‌ជា‌អម្ចាស់! ព្រះ‌ជា‌អម្ចាស់មានព្រះ‌បន្ទូលថា ដោយអ្នកសើចចំអក នៅពេលឃើញទី‌សក្ការៈរបស់យើងត្រូវខ្មាំងបន្ថោក ឃើញទឹកដីអ៊ីស្រា‌អែលត្រូវខ្មាំងបំផ្លាញ ហើយជនជាតិយូដាត្រូវខ្មាំងកៀរយកទៅជាឈ្លើយ ៤ យើងនឹងប្រគល់អ្នកទៅក្នុងកណ្ដាប់ដៃរបស់កុល‌សម្ព័ន្ធ*ដែលមកពីទិសខាងកើត។ ពួកគេនឹងនាំគ្នាបោះជំរំ តាំងទីលំ‌នៅលើទឹកដីរបស់អ្នក ពួកគេនឹងបរិភោគផ្លែឈើដែលអ្នកបានដាំ ហើយផឹកទឹកដោះពីហ្វូងសត្វរបស់អ្នក។ ៥ យើងនឹងធ្វើឲ្យក្រុងរ៉ាបា ក្លាយទៅជាវាលស្មៅសម្រាប់អូដ្ឋរបស់ពួកគេ ស្រុកអាំម៉ូននឹងទៅជាក្រោលហ្វូងចៀមរបស់ពួកគេ។ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន»។ ៦ ព្រះ‌ជា‌អម្ចាស់មានព្រះ‌បន្ទូលទៀតថា៖ «ដោយអ្នកទះដៃ លោតកព្ឆោងយ៉ាងសប្បាយអស់ពីចិត្ត អ្នកត្រេកអរ ព្រោះឃើញទឹកដីអ៊ីស្រា‌អែលហិន‌ហោច ហើយមើល‌ងាយពួកគេទៀតផង ៧ យើងនឹងលើកដៃប្រហារអ្នក យើងប្រគល់អ្នកទៅឲ្យប្រជា‌ជាតិនានាត្របាក់លេប យើងនឹងដកអ្នកចេញពីចំណោមជាតិសាសន៍នានា យើងនឹងលុបបំបាត់អ្នកពីស្រុក យើងនឹងកម្ទេចអ្នក។ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន»។

ព្រះ‌បន្ទូលប្រឆាំងនឹងជនជាតិម៉ូអាប់

៨ ព្រះ‌ជា‌អម្ចាស់មានព្រះ‌បន្ទូលថា៖ «ដោយអ្នកស្រុកម៉ូអាប់ និងអ្នកស្រុកភ្នំសៀរនាំគ្នាពោលថា “មើលចុះ ជនជាតិយូដាមិនខុសពីប្រជា‌ជាតិឯទៀតៗទេ!”។ ៩ យើងនឹងបើកឲ្យខ្មាំងចូលវាយក្រុងដែលនៅតាមព្រំ‌ប្រទល់ស្រុកម៉ូអាប់ជាបន្តបន្ទាប់ សូម្បីតែក្រុងដ៏ល្អជាងគេ ដូចជាក្រុងបេត‌យេស៊ី‌ម៉ូត បាល-‌ម៉េអូន និងគីរីយ៉ា‌តាអ៊ីមក៏ត្រូវខ្មាំងវាយប្រហារដែរ។ ១០ កុល‌សម្ព័ន្ធពីទិសខាងកើត ដែលបានវាយជនជាតិអាំម៉ូន ក៏មករឹបអូសយកស្រុកនេះដែរ។ យើងនឹងប្រគល់ស្រុកនេះឲ្យពួកគេកាន់កាប់ រហូតដល់លែងមាននរណានឹកនាដល់ជនជាតិនេះ ក្នុងចំណោមប្រជា‌ជាតិទាំង‌ឡាយទៀត។ ១១ យើងនឹងដាក់ទោសជនជាតិម៉ូអាប់ ហើយពួកគេនឹងទទួលស្គាល់ថា យើងពិតជាព្រះ‌អម្ចាស់មែន»។

ព្រះ‌បន្ទូលប្រឆាំងនឹងជនជាតិអេដុម

១២ ព្រះ‌ជា‌អម្ចាស់មានព្រះ‌បន្ទូលថា៖ «ដោយជនជាតិអេដុមសង‌សឹកជនជាតិយូដាយ៉ាងឃោរ‌ឃៅ ពួកគេបានធ្វើឲ្យខ្លួនឯងមានទោស»។ ១៣ ហេតុនេះ ព្រះ‌ជា‌អម្ចាស់មានព្រះ‌បន្ទូលថា៖ «យើងនឹងប្រហារស្រុកអេដុម យើងនឹងដកជីវិតពួកគេ ទាំងមនុស្ស ទាំងសត្វ យើងនឹងបំផ្លាញស្រុកគេតាំងពីតេម៉ន រហូតដល់ដេដាន់ ពួកគេនឹងស្លាប់ដោយមុខដាវ។ ១៤ យើងនឹងសង‌សឹកស្រុកអេដុម ដោយដៃអ៊ីស្រា‌អែល ជាប្រជា‌រាស្ដ្ររបស់យើង ពួកគេនឹងប្រព្រឹត្តចំពោះជនជាតិអេដុម តាមកំហឹងដ៏ខ្លាំង‌ក្លារបស់យើង។ ពេលនោះ អេដុមនឹងទទួលស្គាល់ថា ការប្រព្រឹត្តល្មើសចំពោះយើងត្រូវទទួលទោសយ៉ាងណា» - នេះជាព្រះ‌បន្ទូលរបស់ព្រះ‌ជា‌អម្ចាស់។

ព្រះ‌បន្ទូលប្រឆាំងនឹងជនជាតិភីលី‌ស្ទីន

១៥ ព្រះ‌ជា‌អម្ចាស់មានព្រះ‌បន្ទូលថា៖ «ជនជាតិភីលី‌ស្ទីនបានសង‌សឹកជនជាតិយូដា ដោយប្រមាថមាក់‌ងាយយ៉ាងព្រៃ‌ផ្សៃ ចង់តែបំផ្លាញគេ ហើយតាំងខ្លួនជាសត្រូវសួរពូជរបស់គេ»។ ហេតុនេះ ព្រះ‌ជា‌អម្ចាស់មានព្រះ‌បន្ទូលថា៖ ១៦ «យើងនឹងប្រហារស្រុកភីលី‌ស្ទីន យើងនឹងដកជីវិតពួកកេរេទី យើងនឹងលុបបំបាត់ប្រជាជនដែលរស់នៅតាមឆ្នេរសមុទ្រ។ ១៧ យើងនឹងសង‌សឹកពួកគេ តាមកំហឹងដ៏ខ្លាំង‌ក្លារបស់យើង។ នៅពេលយើងសង‌សឹកនោះ ពួកគេនឹងទទួលស្គាល់ថា យើងពិតជាព្រះ‌ជា‌អម្ចាស់មែន»។

ព្រះ‌បន្ទូលប្រឆាំងនឹងក្រុងទីរ៉ុស

១ នៅឆ្នាំទីដប់មួយ ថ្ងៃទីមួយ ក្នុងខែនោះ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖

២ «កូនមនុស្សអើយ អ្នកក្រុងទីរ៉ុសបានសើចចំអកឲ្យក្រុងយេរូ‌សាឡឹមថា “ក្រុងដែលមានអំណាចលើជាតិសាសន៍នានារលំហើយ! តំណែងរបស់វានឹងធ្លាក់មកលើយើងម្ដង ក្រុងយេរូ‌សាឡឹមក្លាយទៅជាវាលរហោ‌ស្ថានហើយ!”។ ៣ ហេតុនេះ ព្រះ‌ជា‌អម្ចាស់មានព្រះ‌បន្ទូលថា: ទីរ៉ុសអើយ យើងនឹងប្រហារអ្នក យើងនឹងនាំប្រជា‌ជាតិយ៉ាងច្រើន ដូចរលកសមុទ្រមកវាយអ្នក។ ៤ ពួកគេនឹងកម្ទេចកំពែងក្រុងទីរ៉ុស ព្រមទាំងរំលំប៉ម យើងនឹងបោសធូលីដីឲ្យរលីង ទុកតែផ្ទាំងថ្មមួយឲ្យនៅសល់ប៉ុណ្ណោះ។ ៥ ក្រុងទីរ៉ុសនឹងក្លាយទៅជាកូនកោះមួយ ដែលគេប្រើសម្រាប់ហាលសំណាញ់ ហើយប្រជា‌ជាតិនានានឹងត្របាក់លេបក្រុងនេះ ដ្បិតយើងជាព្រះ‌ជា‌អម្ចាស់បានប្រកាសសេចក្ដីទាំងនេះ។ ៦ រីឯប្រជាជនក្នុងស្រុកភូមិនានានៅជុំ‌វិញក្រុងទីរ៉ុស នឹងត្រូវស្លាប់ដោយមុខដាវ។ ពេលនោះ គេនឹងទទួលស្គាល់ថា យើងពិតជាព្រះ‌អម្ចាស់មែន»។

៧ ព្រះ‌ជា‌អម្ចាស់មានព្រះ‌បន្ទូលថា៖ «ក្រុងទីរ៉ុសអើយ យើងនឹងហៅស្តេចនេប៊ូ‌កានេសារ ជាមហា‌ក្សត្រលើក្សត្រនានា ឲ្យមកវាយប្រហារអ្នក នេប៊ូ‌កានេសារនឹងលើកទ័ពពីទិសខាងជើងមក គឺមានកង‌ពល‌សេះ រទេះចម្បាំង ព្រមទាំងទាហានដ៏ច្រើនផង។ ៨ សត្រូវនឹងសម្លាប់ប្រជាជន តាមស្រុកភូមិដែលនៅជុំ‌វិញអ្នក ព្រមទាំងលើកទួលសម្រាប់វាយលុក សង់លេណ‌ដ្ឋាន និងលើកកំពែងការ‌ពារខ្លួន។ ៩ សត្រូវនឹងយករនុកដែកមកបុកទម្លុះកំពែងរបស់អ្នក ព្រមទាំងប្រើអាវុធកម្ទេចប៉មរបស់អ្នកទៀតផង។ ១០ ទ័ព‌សេះដ៏ច្រើនរបស់ពួកគេនឹងសម្រុកចូលមក ធ្វើឲ្យដីហុយជុំជិតលើអ្នក ហើយកំពែងរបស់អ្នកនឹងរញ្ជួយញាប់‌ញ័រដោយសន្ធឹកទ័ព‌សេះ កង់រទេះចម្បាំង នៅពេលសត្រូវសម្រុកចូលមកតាមទ្វាររបស់អ្នក ដូចគេចូលទៅក្នុងក្រុងដែលគេវាយយកបាន។ ១១ ជើងសេះរបស់ពួកគេ នឹងជាន់កម្ទេចផ្លូវទាំងប៉ុន្មានរបស់អ្នក គេនឹងប្រហារជីវិតប្រជាជនរបស់អ្នក ហើយរំលំស្តូបដែលជាតំណាងឫទ្ធិអំណាចរបស់អ្នកដែរ។ ១២ សត្រូវនឹងដណ្ដើមយកទ្រព្យ‌សម្បត្តិរបស់អ្នក គេរឹបអូសយកទំនិញរបស់អ្នក ទុកជារបស់ជ័យ‌ភ័ណ្ឌ គេនឹងរំលំកំពែងរបស់អ្នក បំផ្លាញវិមានរបស់អ្នក ហើយយកថ្ម ឈើ និងអ្វីៗដែលនៅសេស‌សល់បោះទៅក្នុងសមុទ្រ។ ១៣ យើងនឹងបំបាត់ស្នូរចម្រៀងរបស់អ្នក ហើយសំឡេងពិណរបស់អ្នកក៏នឹងលែងឮទៀតដែរ។ ១៤ យើងនឹងទុកឲ្យអ្នកនៅសល់តែផ្ទាំងថ្មមួយ ដែលគេប្រើសម្រាប់ហាលសំណាញ់ ហើយគ្មាននរណាសង់អ្នកឡើងវិញឡើយ ដ្បិតយើងជាព្រះ‌ជា‌អម្ចាស់បានប្រកាសសេចក្ដីទាំងនេះ»។

១៥ ព្រះ‌ជា‌អម្ចាស់មានព្រះ‌បន្ទូលទៅកាន់ក្រុងទីរ៉ុសដូចតទៅ៖ «ប្រជាជននៅតាមកោះនានានឹងញ័ររន្ធត់ នៅពេលឮដំណឹងថា សត្រូវវាយយកអ្នកបាន ហើយឮសម្រែកថ្ងូររបស់អ្នករបួស និងការសម្លាប់រង្គាលនៅក្នុងអ្នក។ ១៦ ស្តេចរបស់ស្រុកនានានៅតាមឆ្នេរសមុទ្រនឹងនាំគ្នាចុះពីបល្ល័ង្ក ដោះសម្លៀក‌បំពាក់ និងអាវប៉ាក់ចេញ រួចយកការភ័យខ្លាចមកពាក់ជំនួស ហើយអង្គុយផ្ទាល់ដី ទាំងភ័យញាប់‌ញ័រឥតឈប់‌ឈរ ព្រោះឃើញអ្នកធ្លាក់ខ្លួនបែបនេះ។ ១៧ ពួកគេស្មូត្រទំនួញមួយបទស្រណោះអ្នក ដោយពោលថា “ទីក្រុងដ៏ល្បី‌ល្បាញអើយ អ្នកជាជម្រករបស់ប្រជាជនដែលធ្វើដំណើរតាមសមុទ្រ អ្នក និងប្រជាជនរបស់អ្នកជាមហាអំណាចនៅដែនសមុទ្រ ហើយធ្លាប់តែធ្វើឲ្យជាតិសាសន៍នៅជុំ‌វិញព្រឺ‌ខ្លាច ឥឡូវនេះ ម្ដេចក៏អ្នកវិនាសបាត់បង់ដូច្នេះ?”។ ១៨ នៅថ្ងៃដែលខ្មាំងវាយយកអ្នកបាន ប្រជាជននៅតាមកោះភ័យញាប់‌ញ័រ ប្រជាជននៅតាមឆ្នេរសមុទ្ររន្ធត់ចិត្ត ព្រោះឃើញអ្នកវិនាសបាត់បង់»។

១៩ ព្រះ‌ជា‌អម្ចាស់មានព្រះ‌បន្ទូលថា៖ «ពេលណាយើងធ្វើឲ្យអ្នកក្លាយទៅជាក្រុងដែលនៅសល់តែសំណល់បាក់បែក គឺដូចក្រុងដែលគ្មានមនុស្សរស់នៅ ពេលណាយើងធ្វើឲ្យទឹកពីទីជម្រៅ និងមហាសាគរជន់ឡើងគ្របពីលើអ្នក ២០ យើងនឹងទម្លាក់អ្នកចុះទៅជាមួយអស់អ្នកដែលធ្លាក់ក្នុងរណ្ដៅមុនអ្នក។ យើងនឹងឲ្យអ្នករស់នៅក្នុងទីជម្រៅនៃផែន‌ដី ជាមួយអស់អ្នកដែលធ្លាក់ក្នុងរណ្ដៅ ជាកន្លែងវិនាសបង់អស់កល្ប‌ជានិច្ច។ អ្នកនឹងមិនវិលត្រឡប់មកផែន‌ដី ទទួលកន្លែងក្នុងពិភពរបស់អស់អ្នកដែលមានជីវិតឡើយ។ ២១ យើងនឹងធ្វើឲ្យមនុស្សតក់‌ស្លុត នៅពេលឃើញអ្នកវេទនាដូច្នេះ គេនឹងស្វែងរកអ្នក តែរកមិនឃើញទៀតឡើយ» -នេះជាព្រះ‌បន្ទូលរបស់ព្រះ‌ជា‌អម្ចាស់។

ទំនួញស្តីអំពីក្រុងទីរ៉ុស

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរស្មូត្រទំនួញមួយបទ ស្តីអំពីក្រុងទីរ៉ុស! ៣ ចូរពោលទៅកាន់ក្រុងទីរ៉ុស ដែលស្ថិតនៅមាត់សមុទ្រ ហើយធ្វើជំនួញជាមួយជាតិសាសន៍នៅតាមកោះនានាថា ព្រះ‌ជា‌អម្ចាស់មានព្រះ‌បន្ទូលដូចតទៅ:

ក្រុងទីរ៉ុសអើយ អ្នកពោលថា

“ខ្ញុំមានសម្រស់យ៉ាងល្អឥតខ្ចោះ”

៤ ព្រំ‌ប្រទល់របស់អ្នកលាតសន្ធឹងរហូត

ដល់កណ្ដាលសមុទ្រ

អស់អ្នកដែលសង់អ្នក បានផ្តល់ឲ្យអ្នក

មានសម្រស់យ៉ាងល្អឥតខ្ចោះ។

៥ ពួកគេបានយកឈើដ៏មានតម្លៃពីភ្នំសេនៀរ

មកធ្វើជាជញ្ជាំងរបស់អ្នក

ហើយយកឈើតាត្រៅពីព្រៃលីបង់

មកធ្វើជាដងក្តោងរបស់អ្នក។

៦ ពួកគេយកឈើម៉ៃ‌សាក់ពីស្រុកបាសាន

មកធ្វើជាច្រវា

យកឈើគ្រញូងពីកោះគីទីម

មកក្រាលជាមួយភ្លុក ធ្វើកន្លែងអង្គុយ។

៧ ក្តោងរបស់អ្នកធ្វើពីក្រណាត់ប៉ាក់ដ៏ល្អ

មកពីស្រុកអេស៊ីប

សម្រាប់ឲ្យអ្នកប្រើជាទង់ផង។

ដំបូលរបស់អ្នកធ្វើពីក្រណាត់ពណ៌ក្រហម

និងពណ៌ស្វាយមកពីកោះគីប្រុស។

៨ អ្នកក្រុងស៊ីដូន និងអ្នកក្រុងអាវ៉ាដ ជាអ្នកចែវ

អ្នកឯក‌ទេសនៃក្រុងទីរ៉ុសជានាយសំពៅ។

៩ ពួកចាស់ទុំពីស្រុកកេបាល

និងអ្នកឯក‌ទេសរបស់ពួកគេជាជាងជួស‌ជុល។

សំពៅសមុទ្រទាំងប៉ុន្មាន និងអ្នកដើរសំពៅ

បានចូលមកឈប់សំចតនៅក្នុងអ្នក

ដើម្បីលក់ដូរទំនិញ។

១០ អ្នកស្រុកពែរ្ស អ្នកស្រុកលូដ និងអ្នកស្រុកពូត

នាំគ្នាមកបម្រើក្នុងជួរកង‌ទ័ពរបស់អ្នក

ពួកគេជាអ្នកចម្បាំងរបស់អ្នក

ពួកគេព្យួរខែល និងមួកដែកនៅក្នុងអ្នក

ព្រមទាំងផ្តល់ឲ្យអ្នកបានរុង‌រឿង។

១១ កូនចៅអាវ៉ាដ និងពួកចម្បាំងរបស់អ្នក ស្ថិតនៅជុំ‌វិញកំពែងរបស់អ្នក ហើយក៏មានទាហានយាម‌ល្បាតនៅតាមទីតាំងទ័ពរបស់អ្នកដែរ។ ពួកគេព្យួរខែលនៅជុំ‌វិញកំពែងរបស់អ្នក ធ្វើឲ្យសម្រស់របស់អ្នកបានល្អឥតខ្ចោះ។

ទីរ៉ុសជាក្រុងពាណិជ្ជ‌កម្ម

១២ ស្រុកតារស៊ីសនាំគ្នាធ្វើជំនួញជាមួយអ្នក ពួកគេទិញរបស់របរដ៏សម្បូណ៌របស់អ្នក ពួកគេនាំប្រាក់ ដែក ស្ពាន់ និងសំណមកលក់ក្នុងផ្សាររបស់អ្នក។ ១៣ ស្រុកយ៉ាវ៉ន ទូបាល និងមេសេក រកស៊ីជាមួយអ្នក ពួកគេយកទាសករ និងវត្ថុធ្វើពីលង្ហិន មកដូរយកទំនិញរបស់អ្នក។ ១៤ អ្នកស្រុកតូការ‌ម៉ាយកសេះសម្រាប់ទឹម សេះចម្បាំង និងលាកាត់ មកលក់ក្នុងផ្សាររបស់អ្នក។ ១៥ ប្រជាជននៅស្រុកដេដនរកស៊ីជាមួយអ្នក ជំនួញរវាងកោះនានាស្ថិតនៅក្រោមការគ្រប់‌គ្រងរបស់អ្នក គេយកភ្លុក និងឈើគ្រញូង មកដូរទំនិញរបស់អ្នក។ ១៦ ស្រុកស៊ីរីរកស៊ីជាមួយអ្នក ដោយទិញផលិតផលរបស់អ្នកមួយចំនួនធំ ហើយពួកគេក៏យកកែវ‌មរកត ក្រណាត់ពណ៌ស្វាយ ក្រណាត់ប៉ាក់ ក្រណាត់ទេស‌ឯកដ៏ម៉ដ្ត ផ្កាថ្ម និងត្បូង មកលក់ក្នុងផ្សាររបស់អ្នកដែរ។ ១៧ ស្រុកយូដា និងស្រុក អ៊ីស្រា‌អែល រកស៊ីជាមួយអ្នក ពួកគេយកស្រូវពីស្រុកមីនីត ម្សៅធ្វើនំ ទឹកឃ្មុំ ប្រេង និងជ័រ មកលក់ឲ្យអ្នក។ ១៨ ក្រុងដាម៉ាសរកស៊ីជាមួយអ្នក ដោយទិញផលិត‌ផលរបស់អ្នកមួយចំនួនធំ ពួកគេទិញរបស់របរដ៏សម្បូណ៌របស់អ្នក ហើយពួកគេក៏យកស្រាពីស្រុកហេល‌បូន និងរោមចៀមពណ៌ស មកលក់ឲ្យអ្នកដែរ។ ១៩ ស្រុកវេដន និងស្រុកយ៉ាវ៉ន ចាប់តាំងពីស្រុកអូសាល់ រកស៊ីជាមួយអ្នក ពួកគេយកដែក‌ថែប ព្រមទាំងកំញាន និងខ្លឹមចន្ទន៍មកលក់ឲ្យអ្នក។ ២០ ស្រុកដេដនធ្វើជំនួញជាមួយអ្នក ដោយយកប្រដាប់ប្រដាសម្រាប់សេះចម្បាំងមកលក់ឲ្យអ្នក។ ២១ ស្រុកអារ៉ាប៊ី និងមេដឹកនាំទាំងប៉ុន្មាន នៅស្រុកកេដារ នាំគ្នាលក់ដូរជាមួយអ្នក។ ឈ្មួញពីស្រុកអ្នកយកកូនចៀម ចៀមឈ្មោល និងពពែឈ្មោល ទៅលក់នៅស្រុករបស់ពួកគេ។ ២២ អ្នកជំនួញពីស្រុកសេបា និងស្រុករេម៉ា រកស៊ីជាមួយអ្នក ពួកគេយកគ្រឿងក្រអូបដ៏មានតម្លៃ ព្រមទាំងត្បូង និងមាសគ្រប់ប្រភេទ មកលក់ឲ្យអ្នក។ ២៣ ស្រុកហារ៉ន កាណេ និងអេដែន អ្នកជំនួញពីស្រុកសេបា អាស្ស៊ីរី និងគីលម៉ាដ នាំគ្នារកស៊ីជាមួយអ្នក ២៤ ពួកគេលក់ដូររបស់ដ៏មានតម្លៃជាមួយអ្នក គឺមានអាវពណ៌ស្វាយ ក្រណាត់ប៉ាក់ ក្រណាត់គ្រប់ប្រភេទ និងខ្សែក្រង។

ទំនួញស្តីអំពីក្រុងទីរ៉ុស (ត)

២៥ សំពៅពីស្រុកតារស៊ីសដឹកជញ្ជូនទំនិញរបស់អ្នក

អ្នកមានទ្រព្យ‌សម្បត្តិយ៉ាងច្រើនលើស‌លប់

ដូចសំពៅពេញទៅដោយទំនិញ

នៅកណ្ដាលសមុទ្រ។

២៦ ពួកអ្នកចែវនាំអ្នកឲ្យធ្វើដំណើរ

នៅកណ្ដាលសមុទ្រ ស្រាប់តែមាន

ខ្យល់ពីទិសខាងកើត បក់មកកម្ទេចអ្នក។

២៧ ទ្រព្យ‌សម្បត្តិ ទំនិញ និងអីវ៉ាន់របស់អ្នក

ព្រមទាំងអ្នកដើរសំពៅ កម្មករសំពៅ

អ្នកជួស‌ជុលសំពៅ អ្នកលក់ដូរ

និងទាហានចម្បាំងដែលនៅជាមួយអ្នក

គឺនៅថ្ងៃដែលអ្នកវិនាស

មនុស្សទាំងអស់ដែលស្ថិតនៅក្នុងអ្នក

ក៏នឹងត្រូវលិចលង់ទៅក្នុងសមុទ្រដែរ។

២៨ ពេលឮសម្រែកស្លន់‌ស្លោរបស់កម្មករសំពៅ

ប្រជាជននៅតាមឆ្នេរសមុទ្រនាំគ្នាញ័ររន្ធត់

២៩ អ្នកចែវសំពៅផ្សេងទៀត

នាំគ្នាចុះចេញពីសំពៅរបស់ខ្លួន

អ្នកដើរសំពៅ និងកម្មករសំពៅទាំងប៉ុន្មាន

នាំគ្នាឈរនៅលើគោក។

៣០ ពួកគេនឹងបន្លឺសំឡេងស្រណោះអ្នក

ពួកគេសោយសោកយ៉ាងជូរចត់

ពួកគេរោយធូលីដីលើក្បាលរបស់ខ្លួន

ហើយដេកននៀលនៅក្នុងផេះ។

៣១ ពួកគេកោរសក់កាន់ទុក្ខអ្នក ពួកគេស្លៀកបាវ

ហើយនាំគ្នាសោកសង្រេងយ៉ាងខ្លោច‌ផ្សា

ដោយឈឺចាប់ក្នុងចិត្ត កើតទុក្ខស្រណោះអ្នក។

៣២ ទុក្ខលំបាកជំរុញពួកគេឲ្យស្មូត្រទំនួញ

និងយំអាឡោះ‌អាល័យអ្នក ទាំងពោលថា:

គ្មានក្រុងណាដូចក្រុងទីរ៉ុសទេ

គឺក្រុងនេះត្រូវវិនាសនៅកណ្ដាលសមុទ្រ!

៣៣ ពេលអ្នកដឹកទំនិញនៅតាមសមុទ្រ

ប្រជាជនជាច្រើនបានឆ្អែត។

ទ្រព្យ‌សម្បត្តិ និងទំនិញដ៏បរិបូណ៌របស់អ្នក

បានធ្វើឲ្យស្តេចជាច្រើននៅផែន‌ដី

ក្លាយទៅជាអ្នកមាន។

៣៤ តែឥឡូវនេះ អ្នកវិនាសក្នុងសមុទ្រ

ទំនិញរបស់អ្នក ព្រមទាំងអស់អ្នកដែល

នៅក្នុងសំពៅជាមួយអ្នក

ក៏លិចលង់ដល់បាតសមុទ្រជាមួយអ្នកដែរ។

៣៥ ប្រជាជនទាំងអស់ដែលរស់នៅតាមកោះនានា

នឹងនាំគ្នាសោយសោក ព្រោះតែអ្នក

ស្តេចរបស់ពួកគេនឹងភ័យញ័ររន្ធត់

ផ្ទៃមុខរបស់គេស្លេក‌ស្លាំងអស់។

៣៦ អ្នកលក់ដូរក្នុងចំណោមប្រជា‌ជាតិទាំង‌ឡាយ

នាំគ្នាចំអកឲ្យអ្នក។

ពេលមនុស្ស‌ម្នាឃើញអ្នក គេភ័យតក់‌ស្លុត

ហើយអ្នកនឹងវិនាសបាត់បង់រហូតតទៅ!»។

ស្តេចក្រុងទីរ៉ុសអស់រាជ្យ

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរប្រាប់ស្តេចក្រុងទីរ៉ុសថា ព្រះ‌ជា‌អម្ចាស់មានព្រះ‌បន្ទូលដូចតទៅ: អ្នកមានចិត្តព្រហើនណាស់ អ្នកហ៊ានថ្លែងថា “ខ្ញុំជាព្រះ! ខ្ញុំគង់លើបល្ល័ង្ករបស់ព្រះដែលស្ថិតនៅកណ្ដាលសមុទ្រ!”។ តាមពិត អ្នកជាមនុស្សសោះ គឺមិនមែនជាព្រះទេ តែអ្នកលើកខ្លួនឯងស្មើនឹងព្រះ‌ជាម្ចាស់។ ៣ អ្នកអួតខ្លួនថា មានប្រាជ្ញាជាងដានីអែល ហើយថាគ្មានការអ្វីលាក់កំបាំងចំពោះអ្នកឡើយ។ ៤ ដោយ‌សារប្រាជ្ញា និងតម្រិះវៃឆ្លាត អ្នកប្រមូលទ្រព្យ‌សម្បត្តិ មាស និងប្រាក់ យកមកទុកក្នុងឃ្លាំងរបស់ខ្លួន។ ៥ ដោយ‌សារការប៉ិន‌ប្រសប់ខាងធ្វើជំនួញ អ្នកបានបង្កើនទ្រព្យ‌សម្បត្តិយ៉ាងសន្ធឹក‌សន្ធាប់ ហើយទ្រព្យ‌សម្បត្តិទាំងនេះជំរុញឲ្យអ្នកអួតបំប៉ោង! ៦ ហេតុនេះហើយបានជាព្រះ‌ជា‌អម្ចាស់មានព្រះ‌បន្ទូលថា: ដោយអ្នកលើកខ្លួនស្មើនឹងព្រះដូច្នេះ ៧ យើងនឹងនាំជនបរទេស ដែលកាចសាហាវក្នុងចំណោមប្រជា‌ជាតិនានាមក ពួកគេនឹងហូតដាវបំផ្លាញស្នាដៃនៃប្រាជ្ញាដ៏វាង‌វៃរបស់អ្នក គេនឹងបន្ទាបបន្ថោក ព្រមទាំងបំផ្លាញភាពរុង‌រឿងរបស់អ្នកទៀតផង។ ៨ ពួកគេនឹងវាយទម្លាក់អ្នកទៅក្នុងរណ្ដៅ អ្នកនឹងត្រូវស្លាប់ ដោយគេចាក់ទម្លុះនៅកណ្ដាលសមុទ្រ។ ៩ នៅចំពោះមុខសត្រូវដែលប្រហារជីវិតអ្នក តើអ្នកនៅតែពោលថា “ខ្ញុំជាព្រះ” ទៀតបានឬ? ពេលអ្នកស្ថិតនៅក្នុងកណ្ដាប់ដៃរបស់ពេជ្ឈ‌ឃាត អ្នកនៅតែជាមនុស្សដដែល គឺមិនមែនជាព្រះទេ។ ១០ អ្នកនឹងត្រូវស្លាប់ដោយដៃជនបរទេស ដូចជនមិនស្គាល់ព្រះ‌ជាម្ចាស់ ដ្បិតយើងហើយដែលប្រកាសការនេះ» -នេះជាព្រះ‌បន្ទូលរបស់ព្រះ‌ជា‌អម្ចាស់។

១១ ព្រះ‌អម្ចាស់មានព្រះ‌បន្ទូលមកខ្ញុំថា៖

១២ «កូនមនុស្សអើយ ចូរលើកបទទំនួញអំពីស្តេចក្រុងទីរ៉ុស! ចូរប្រាប់ស្តេចនោះថា ព្រះ‌ជា‌អម្ចាស់មានព្រះ‌បន្ទូលដូចតទៅ: អ្នកជាគំរូពេញលក្ខណៈ អ្នកពោរ‌ពេញទៅដោយប្រាជ្ញាវាង‌វៃ ព្រមទាំងមានសម្ផស្សយ៉ាងល្អឥតខ្ចោះ។ ១៣ អ្នកស្ថិតនៅស្រុកអេដែន ក្នុងឧទ្យានរបស់ព្រះ‌ជាម្ចាស់ដែលមានត្បូងគ្រប់មុខជាជញ្ជាំង គឺត្បូងទទឹម ត្បូងជម្ពូ‌រ័ត្ន ត្បូងពេជ្រ ត្បូងប៊ុត‌លឿង ត្បូងដៃ‌រគៀម ត្បូងមណី‌រ័ត្ន ត្បូងកណ្ដៀង ត្បូងនិល‌រ័ត្ន មរកត និងមាស។ មានស្គរ និងខ្លុយ នៅចាំលេងកំដរអ្នកជាស្រេច តាំងតែពីថ្ងៃដែលអ្នកកើតម៉្លេះ។ ១៤ អ្នកជាខេរូប៊ីម*ត្រដាងស្លាប ដែលយើងបានតែង‌តាំងឲ្យការ‌ពារ យើងបានដាក់អ្នកនៅលើភ្នំរបស់យើង អ្នកដើរនៅកណ្ដាលថ្មដ៏ភ្លឺផ្លេក។ ១៥ ចាប់តាំងពីថ្ងៃដែលយើងបង្កើតអ្នក រហូតមកដល់ថ្ងៃដែលគេឃើញភាពទុច្ចរិតនៅក្នុងអ្នក អ្នកធ្លាប់តែមានកិរិយា‌មារយាទល្អឥតខ្ចោះ។ ១៦ ការរីកចម្រើននៃជំនួញរបស់អ្នក នាំឲ្យអ្នកពោរ‌ពេញដោយអំពើឃោរ‌ឃៅ និងអំពើបាប។ ហេតុនេះ យើងដេញអ្នកចុះពីភ្នំរបស់យើង ឲ្យអ្នកក្លាយទៅជាមនុស្សសាមញ្ញ។ ខេរូប៊ីមដែលជាអ្នកការ‌ពារអើយ យើងដេញអ្នកចេញពីចំណោមថ្មដ៏ភ្លឺផ្លេក។ ១៧ អ្នកមានចិត្តព្រហើន ព្រោះតែរូបសម្បត្តិដ៏ល្អស្អាតរបស់ខ្លួន។ អ្នកបានធ្វើឲ្យខ្លួនអាប់ប្រាជ្ញា ព្រោះតែភាពរុង‌រឿងរបស់អ្នក។ យើងបោះអ្នកទៅដី យើងធ្វើទោសអ្នកឲ្យស្តេចនានាឃើញ។ ១៨ អ្នកបានបង្អាប់ទី‌សក្ការៈរបស់យើង ដោយ‌សារអំពើបាបដ៏ច្រើនឥតគណនា និងដោយ‌សារជំនួញដ៏ទុច្ចរិតរបស់អ្នក។ យើងនឹងធ្វើឲ្យមានភ្លើងចេញពីអ្នក ឆេះបន្សុសអ្នក យើងនឹងកម្ទេចអ្នកឲ្យទៅជាផេះនៅលើផែន‌ដី ដើម្បីឲ្យមនុស្ស‌ម្នាបានឃើញ។ ១៩ ជាតិសាសន៍នានាដែលស្គាល់អ្នកនឹងងឿង‌ឆ្ងល់ ដោយឃើញអ្នកធ្លាក់ខ្លួនដូច្នេះ ពួកគេភ័យតក់‌ស្លុត ហើយអ្នកនឹងវិនាសបាត់បង់រហូតតទៅ!»។

ព្រះ‌បន្ទូលស្តីអំពីក្រុងស៊ីដូន

២០ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២១ «កូនមនុស្សអើយ ចូរបែរមុខទៅរកក្រុងស៊ីដូន ហើយថ្លែងពាក្យក្នុងនាមយើង ប្រឆាំងនឹងក្រុងនោះទៅ! ២២ ត្រូវពោលថា “ព្រះ‌ជា‌អម្ចាស់មានព្រះ‌បន្ទូលដូចតទៅ: ក្រុងស៊ីដូនអើយ យើងប្រឆាំងនឹងអ្នកហើយ! យើងនឹងទទួលសិរី‌រុងរឿងនៅក្នុងអ្នក។ ពេលណាយើងសម្រេចការវិនិច្ឆ័យទោសក្រុងនេះហើយ មនុស្ស‌ម្នានឹងទទួលស្គាល់ថា យើងពិតជាព្រះ‌អម្ចាស់ ហើយយើងនឹងសម្ដែងឲ្យអ្នកក្រុងនេះឃើញថា យើងជាព្រះដ៏‌វិសុទ្ធ។ ២៣ យើងនឹងធ្វើឲ្យជំងឺរាត‌ត្បាតកើតមាននៅក្នុងទីក្រុង យើងនឹងធ្វើឲ្យឈាមហូរដាបនៅតាមដងផ្លូវ ខ្មាំងសត្រូវវាយប្រហារពីគ្រប់ទិស‌ទី ធ្វើឲ្យពួកគេបរា‌ជ័យ ដួលស្លាប់នៅក្នុងទីក្រុង ពេលនោះ គេនឹងទទួលស្គាល់ថា យើងពិតជាព្រះ‌អម្ចាស់”។

អ៊ីស្រា‌អែលនឹងទទួលព្រះ‌ពរ

២៤ ក្នុងចំណោមប្រជា‌ជាតិនានាដែលនៅជុំ‌វិញ គ្មាននរណាមាក់‌ងាយកូនចៅអ៊ីស្រា‌អែល គឺគ្មាននរណាធ្វើបាបពួកគេឲ្យឈឺចាប់ ដូចមុតបន្លាទៀតឡើយ។ ពេលនោះ មនុស្ស‌ម្នានឹងទទួលស្គាល់ថា យើងពិតជាព្រះ‌ជា‌អម្ចាស់»។

២៥ ព្រះ‌ជា‌អម្ចាស់មានព្រះ‌បន្ទូលថា៖ «នៅពេលយើងប្រមូលជនជាតិអ៊ីស្រា‌អែល ដែលយើងបានកម្ចាត់‌កម្ចាយ ទៅក្នុងចំណោមសាសន៍ទាំង‌ឡាយនោះមកវិញ យើងនឹងសម្ដែងឲ្យប្រជា‌ជាតិនានាឃើញថា យើងជាព្រះដ៏‌វិសុទ្ធ។ ពួកគេនឹងរស់នៅលើទឹកដីរបស់ខ្លួន គឺទឹកដីដែលយើងបានប្រគល់ឲ្យយ៉ាកុប ជាអ្នកបម្រើរបស់យើង។ ២៦ ពួកគេនឹងរស់នៅយ៉ាងសុខ‌សាន្តលើទឹកដីនេះ ពួកគេនឹងសង់ផ្ទះ ហើយដាំទំពាំង‌បាយ‌ជូរ។ កាលណាយើងដាក់ទោសសាសន៍ទាំងប៉ុន្មាននៅជុំ‌វិញ ដែលបានមាក់‌ងាយពួកគេរួចហើយ ពួកគេនឹងរស់នៅយ៉ាងសុខ‌សាន្ត។ ពេលនោះ ពួកគេនឹងទទួលស្គាល់ថា យើងពិតជាព្រះ‌អម្ចាស់ ជាព្រះរបស់ពួកគេ»។

ព្រះ‌បន្ទូលប្រឆាំងនឹងស្រុកអេស៊ីប

១ នៅឆ្នាំទីដប់ ថ្ងៃទីដប់‌ពីរ ខែទីដប់ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរបែរមុខទៅរកផារ៉ោន ស្តេចស្រុកអេស៊ីប ហើយថ្លែងពាក្យក្នុងនាមយើងប្រឆាំងនឹងស្តេចនោះ ព្រមទាំងប្រជាជនអេស៊ីបទាំងមូលទៅ!។ ៣ ចូរប្រកាសថា ព្រះ‌ជា‌អម្ចាស់មានព្រះ‌បន្ទូលដូចតទៅ: ផារ៉ោនជាស្តេចស្រុកអេស៊ីបអើយ យើងប្រឆាំងនឹងអ្នកហើយ! អ្នកជាក្រពើដ៏ធំសម្បើម ដេកនៅតាមដៃទន្លេ ហើយពោលថា ទន្លេនីលជារបស់អ្នក អ្នកបានបង្កើតទន្លេនេះ។ ៤ យើងនឹងឃ្លុំមាត់អ្នក យើងយកត្រីនៅតាមទន្លេមកដាក់ជាប់នឹងស្រការបស់អ្នក យើងនឹងអូសអ្នកចេញពីទន្លេ ដោយមានត្រីនៅជាប់នឹងស្រកាអ្នកផង។ ៥ យើងនឹងបោះអ្នកជាមួយត្រីទាំងប៉ុន្មាននៅទន្លេនីល ទៅវាលរហោ‌ស្ថាន។ អ្នកនឹងធ្លាក់ទៅលើដីនៅទីវាល គ្មាននរណារវី‌រវល់នឹងសាក‌សពអ្នកឡើយ។ យើងនឹងប្រគល់អ្នកទៅឲ្យសត្វព្រៃ និងត្មាតធ្វើជាអាហារ។ ៦ ប្រជាជនទាំងអស់នៅស្រុកអេស៊ីបនឹងទទួលស្គាល់ថា យើងជាព្រះ‌អម្ចាស់ ដ្បិតពួកគេប្រៀបដូចជាដើមត្រែង ដែលកូនចៅអ៊ីស្រា‌អែលយកធ្វើជាបង្អែក។ ៧ នៅពេលពួកគេតោងអ្នក ស្រាប់តែអ្នកបាក់ ហើយធ្វើឲ្យពួកគេមុតដៃ ដាច់រហូតដល់ស្មា។ នៅពេលពួកគេផ្អែកលើអ្នក ស្រាប់តែអ្នករលំ ហើយធ្វើឲ្យពួកគេថ្លោះចង្កេះ»។

៨ ព្រះ‌ជា‌អម្ចាស់មានព្រះ‌បន្ទូលទៀតថា៖ «មើល៍យើងនឹងធ្វើឲ្យស្រុកអ្នកកើតសង្គ្រាម យើងនឹងដកជីវិតទាំងមនុស្ស ទាំងសត្វ នៅក្នុងស្រុកអ្នក។ ៩ ស្រុកអេស៊ីបនឹងត្រូវហិន‌ហោច ក្លាយជាគំនរបាក់បែក ហើយគេនឹងទទួលស្គាល់ថា យើងជាព្រះ‌អម្ចាស់។ ដោយអ្នកពោលថា ទន្លេនីលជារបស់អ្នក អ្នកបានបង្កើតទន្លេនេះ ១០ យើងនឹងដាក់ទោសអ្នក ព្រមទាំងទន្លេរបស់អ្នក។ យើងនឹងបំផ្លាញស្រុកអេស៊ីប ឲ្យក្លាយទៅជាគំនរបាក់បែក និងជាទីស្មសាន ចាប់តាំងពីក្រុងមីគដូល រហូតដល់ក្រុងអាស្វាន់ និងព្រំ‌ប្រទល់ស្រុកអេត្យូ‌ពី។ ១១ គ្មានដានជើងមនុស្ស ឬដានជើងសត្វណាមួយដើរកាត់ស្រុកនោះទៀតឡើយ ហើយទឹកដីនោះនឹងគ្មាននរណារស់នៅក្នុងអំឡុងពេលសែ‌សិបឆ្នាំ។ ១២ ក្នុង‌រយៈពេលសែ‌សិបឆ្នាំ យើងនឹងធ្វើឲ្យស្រុកអេស៊ីបក្លាយទៅជាទីស្មសាន ស្ងាត់ជាងវាលរហោ‌ស្ថានទៅទៀត។ ក្រុងរបស់គេក៏ត្រូវហិន‌ហោចលើសក្រុងឯទៀតៗ។ យើងនឹងរំលាយជនជាតិអេស៊ីបក្នុងចំណោមប្រជា‌ជាតិនានា យើងនឹងកម្ចាត់‌កម្ចាយពួកគេឲ្យទៅប្រទេសនានា»។ ១៣ ព្រះ‌ជា‌អម្ចាស់មានព្រះ‌បន្ទូលថា៖ «លុះអំឡុងពេលសែ‌សិបឆ្នាំនោះកន្លងផុតទៅ យើងនឹងប្រមូលជនជាតិអេស៊ីបពីក្នុងចំណោមជាតិសាសន៍នានា ដែលយើងបណ្តេញពួកគេទៅនោះ ឲ្យត្រឡប់មកវិញ។ ១៤ យើងនឹងស្តារស្រុកអេស៊ីបឡើងវិញ យើងនឹងនាំពួកគេមកនៅស្រុកប៉ាត្រុស ជាស្រុកកំណើតរបស់ខ្លួន ហើយពួកគេនឹងប្រមូលផ្តុំគ្នាជានគរមួយដ៏ទន់ខ្សោយ។ ១៥ ស្រុកអេស៊ីបនឹងក្លាយទៅជានគរមួយទន់ខ្សោយជាងនគរឯទៀតៗ គេនឹងលែងត្រួត‌ត្រាលើប្រជា‌ជាតិនានា គឺយើងនឹងធ្វើឲ្យគេចុះអន់‌ថយ ដើម្បីកុំឲ្យគេត្រួត‌ត្រាលើប្រជា‌ជាតិនានាទៀត។ ១៦ ដូច្នេះ ជនជាតិអ៊ីស្រា‌អែលនឹងលែងមានបង្អែក ដែលទាក់‌ទាញពួកគេឲ្យប្រព្រឹត្តអំពើបាប ដោយបែរទៅរកស្រុកអេស៊ីបមកជួយ ហើយពួកគេនឹងទទួលស្គាល់ថា យើងពិតជាព្រះ‌ជា‌អម្ចាស់»។

ស្តេចនេប៊ូ‌កានេសារមកវាយលុកស្រុកអេស៊ីប

១៧ នៅឆ្នាំទីម្ភៃ‌ប្រាំពីរ ថ្ងៃទីមួយ ក្នុងខែទីមួយ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖

១៨ «កូនមនុស្សអើយ នេប៊ូ‌កានេសារ ជាស្តេចស្រុកបាប៊ីឡូន បានប្រើកង‌ទ័ពរបស់ខ្លួនឲ្យប្រឹង‌ប្រែងវាយយកក្រុងទីរ៉ុស។ ទាហានបាប៊ីឡូនទាំងអស់ខំប្រឹងរហូតដល់ជ្រុះសក់ និងមានស្នាមរបួសពេញស្មា តែស្តេចស្រុកបាប៊ីឡូន និងកង‌ទ័ព ពុំបានទទួលជ័យ‌ជម្នះ ពីការវាយលុកក្រុងទីរ៉ុសឡើយ។ ១៩ ហេតុនេះ យើងប្រកាសក្នុងនាមយើងជាព្រះ‌ជា‌អម្ចាស់ថា យើងប្រគល់ស្រុកអេស៊ីបឲ្យនេប៊ូ‌កានេសារ ជាស្តេចស្រុកបាប៊ីឡូន។ នេប៊ូ‌កានេសារនឹងនាំយកទ្រព្យ‌សម្បត្តិស្រុកអេស៊ីបទៅស្រុករបស់ខ្លួន ស្តេចនេះនឹងរឹបអូសយកទាំងអស់ ឥតទុកឲ្យនៅសល់អ្វីឡើយ។ ស្តេចនឹងយកជ័យ‌ភ័ណ្ឌធ្វើជាបៀវត្សរ៍ចែកឲ្យកង‌ទ័ពរបស់ខ្លួន។ ២០ យើងប្រគល់ស្រុកអេស៊ីបឲ្យនេប៊ូ‌កានេសារ ទុកជាកម្រៃចំពោះកិច្ច‌ការដែលគេបានធ្វើ ដ្បិតពួកទាហានរបស់ស្តេចនេះបានធ្វើការឲ្យយើង -នេះជាព្រះ‌បន្ទូលរបស់ព្រះ‌ជា‌អម្ចាស់។

២១ នៅថ្ងៃនោះ យើងនឹងពង្រឹងកម្លាំងជនជាតិអ៊ីស្រា‌អែល។ រីឯអ្នកវិញ កូនមនុស្សអើយ យើងនឹងឲ្យអ្នកនិយាយបាន ពួកគេនឹងឮពាក្យអ្នក ហើយទទួលស្គាល់ថា យើងពិតជាព្រះ‌អម្ចាស់មែន»។

ព្រះ‌អម្ចាស់ដាក់ទោសស្រុកអេស៊ីប

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរថ្លែងពាក្យក្នុងនាមយើង! ចូរពោលថា ព្រះ‌ជា‌អម្ចាស់មានព្រះ‌បន្ទូលដូចតទៅ: ចូរនាំគ្នាសោកសង្រេង ដ្បិតថ្ងៃនោះវេទនាណាស់! ៣ ថ្ងៃនោះនៅជិតបង្កើយហើយ គឺជាថ្ងៃរបស់ព្រះ‌អម្ចាស់ ថ្ងៃដែលមានពពក ថ្ងៃដែលប្រជា‌ជាតិនានាវាយប្រហារគ្នា។ ៤ សង្គ្រាមនឹងមកដល់ស្រុកអេស៊ីប ទុក្ខវេទនានឹងកើតមាននៅស្រុកអេត្យូ‌ពី។ ជនជាតិអេស៊ីបនឹងត្រូវគេសម្លាប់រង្គាល សត្រូវរឹបអូសយកសម្បត្តិរបស់ស្រុកអេស៊ីប ព្រមទាំងកម្ទេចស្រុកនេះផង។ ៥ អ្នកស្រុកអេត្យូ‌ពី អ្នកស្រុកពូត អ្នកស្រុកលូដ ពួកកូនកាត់ទាំងប៉ុន្មាន និងអ្នកស្រុកគូប ព្រមទាំងប្រជាជនរបស់យើងផ្ទាល់ ក៏នឹងត្រូវស្លាប់ដោយមុខដាវជាមួយជនជាតិអេស៊ីបដែរ»។

៦ ព្រះ‌អម្ចាស់មានព្រះ‌បន្ទូលថា៖ «ពួកអ្នកដែលគាំ‌ទ្រស្រុកអេស៊ីបនឹងត្រូវវិនាស ហើយអំណាចអួត‌អាងរបស់អេស៊ីបក៏ត្រូវរលាយសូន្យទៅដែរ។ ពួកគេនឹងស្លាប់ដោយមុខដាវ ចាប់តាំងពីក្រុងមីគដូល រហូតដល់ក្រុងអាស្វាន់ - នេះជាព្រះ‌បន្ទូលរបស់ព្រះ‌ជា‌អម្ចាស់។ ៧ ស្រុករបស់ពួកគេនឹងក្លាយទៅជាទីស្មសាន ស្ងាត់ជាងវាលរហោ‌ស្ថានទៅទៀត។ ក្រុងរបស់គេក៏ត្រូវហិន‌ហោចលើសក្រុងឯទៀតៗដែរ។ ៨ ពេលណាយើងដុតស្រុកអេស៊ីប និងកម្ទេចបក្ស‌សម្ពន្ធរបស់ពួកគេអស់ហើយ នោះពួកគេនឹងទទួលស្គាល់ថា យើងពិតជាព្រះ‌អម្ចាស់មែន។ ៩ នៅថ្ងៃយើងដាក់ទោសស្រុកអេស៊ីប យើងនឹងចាត់មនុស្សឲ្យធ្វើដំណើរតាមសំពៅ នាំដំណឹងទៅប្រាប់អ្នកស្រុកអេត្យូ‌ពី ដែលកំពុងតែរស់នៅដោយសុខ‌សាន្ត ធ្វើឲ្យពួកគេភ័យតក់‌ស្លុត ដ្បិតថ្ងៃដែលពួកគេរងទុក្ខវេទនាជិតមកដល់ហើយ!»។

១០ ព្រះ‌ជា‌អម្ចាស់មានព្រះ‌បន្ទូលថា៖ «យើងនឹងប្រើនេប៊ូ‌កានេសារ ជាស្តេចស្រុកបាប៊ីឡូន ឲ្យបំបាត់ពូជសាសន៍អេស៊ីបដ៏ច្រើននោះ។ ១១ យើងនឹងនាំស្តេចនេប៊ូ‌កានេសារ និងកង‌ទ័ពបាប៊ីឡូនដ៏សាហាវបំផុត មកកម្ទេចស្រុកអេស៊ីប។ ពួកគេនឹងសម្លាប់រង្គាលប្រជាជន ទុកសាក‌សពនៅពាស‌ពេញក្នុងស្រុក។ ១២ យើងនឹងធ្វើឲ្យដៃទន្លេនីលរីងស្ងួត យើងប្រគល់ស្រុកនោះទៅក្នុងកណ្ដាប់ដៃរបស់មនុស្សកំណាច យើងនឹងបំផ្លាញស្រុក ព្រមទាំងអ្វីៗដែលមាននៅក្នុងស្រុកនោះ ដោយដៃរបស់ជនបរទេស។ នេះជាពាក្យរបស់យើងដែលជាព្រះ‌អម្ចាស់»។

១៣ ព្រះ‌ជា‌អម្ចាស់មានព្រះ‌បន្ទូលថា៖ «យើងនឹងកម្ទេចរូបបដិមា យើងនឹងបំបាត់រូបព្រះក្លែង‌ក្លាយពីក្រុងណូប។ ពេលនោះ ស្រុកអេស៊ីបនឹងលែងមានអ្នកដឹកនាំ ហើយយើងនឹងធ្វើឲ្យមានការភ័យខ្លាចនៅស្រុកអេស៊ីប។ ១៤ យើងនឹងបំផ្លាញក្រុងប៉ាត្រុស យើងនឹងដុតកម្ទេចក្រុងសូអាន ហើយដាក់ទោសក្រុងណូ។ ១៥ យើងនឹងជះកំហឹងរបស់យើងលើក្រុងស៊ីន ជាក្រុងដែលមានកំពែងរឹង‌មាំរបស់ស្រុកអេស៊ីប យើងនឹងដកជីវិតប្រជាជនដ៏ច្រើននៅក្រុងណូ។ ១៦ យើងនឹងដុតស្រុកអេស៊ីប ក្រុងស៊ីននឹងភ័យតក់‌ស្លុត ក្រុងនរនឹងត្រូវខ្មាំងឡោម‌ព័ទ្ធ ហើយក្រុងណូបនឹងត្រូវខ្មាំងវាយយកបានទាំងកណ្ដាលថ្ងៃត្រង់។ ១៧ ពួកយុវជននៅក្រុងអុន និងក្រុងពីបេសេត ដួលស្លាប់ដោយមុខដាវ ហើយអ្នកក្រុងទាំងនោះនឹងត្រូវខ្មាំងកៀរយកទៅជាឈ្លើយ។ ១៨ ពេលយើងបំបាក់នឹមរបស់ស្រុកអេស៊ីប ហើយពេលដែលអំណាចអួត‌អាងរបស់ពួកគេរលាយសូន្យ នោះនៅក្រុងតាប៉ាណែស ថ្ងៃប្រែជាងងឹត ពពកអាប់‌អួគ្របដណ្តប់ពាស‌ពេញក្រុង ហើយប្រជាជនរបស់គេនឹងត្រូវខ្មាំងកៀរយកទៅជាឈ្លើយ។ ១៩ យើងនឹងធ្វើទោសស្រុកអេស៊ីប ពេលនោះ ពួកគេនឹងទទួលស្គាល់ថា យើងពិតជាព្រះ‌អម្ចាស់មែន»។

២០ នៅឆ្នាំទីដប់មួយ ថ្ងៃទីប្រាំពីរ ក្នុងខែទីមួយ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖

២១ «កូនមនុស្សអើយ យើងបានកាច់បំបាក់ដៃម្ខាងរបស់ផារ៉ោន ជាស្តេចស្រុកអេស៊ីប។ គ្មាននរណារុំរបួស ឬដាក់ថ្នាំឲ្យ ហើយក៏គ្មាននរណាយកក្រណាត់មកចងអប ដើម្បីឲ្យស្តេចនេះអាចកាន់ដាវបានទៀតដែរ»។ ២២ ហេតុនេះ ព្រះ‌ជា‌អម្ចាស់មានព្រះ‌បន្ទូលថា៖ «យើងនឹងប្រហារផារ៉ោន ជាស្តេចស្រុកអេស៊ីប យើងនឹងបំបាក់ដៃទាំងសងខាងរបស់ស្តេចនេះ គឺទាំងដៃល្អ ទាំងដៃបាក់ ហើយយើងនឹងជម្រុះដាវចេញពីដៃរបស់គេដែរ។ ២៣ យើងនឹងរំលាយជនជាតិអេស៊ីបក្នុងចំណោមប្រជា‌ជាតិនានា យើងនឹងកម្ចាត់‌កម្ចាយពួកគេឲ្យទៅប្រទេសនានា។ ២៤ យើងនឹងពង្រឹងកម្លាំងរបស់ស្តេចស្រុកបាប៊ីឡូន ហើយប្រគល់ដាវរបស់យើងឲ្យស្តេចនេះ យើងនឹងកាច់បំបាក់ដៃរបស់ស្តេចស្រុកអេស៊ីប ហើយស្តេចស្រុកអេស៊ីបនឹងស្រែកថ្ងូរនៅចំពោះមុខស្តេចស្រុកបាប៊ីឡូន ព្រោះតែរបួសជិតស្លាប់។ ២៥ យើងនឹងពង្រឹងកម្លាំងរបស់ស្តេចស្រុកបាប៊ីឡូន ហើយបំបាក់កម្លាំងរបស់ស្តេចផារ៉ោន។ ពេលណាយើងប្រគល់ដាវរបស់យើងឲ្យស្តេចស្រុកបាប៊ីឡូន ហើយពេលស្តេចនេះលើកដាវតម្រង់ទៅរកស្រុកអេស៊ីប នោះគេនឹងទទួលស្គាល់ថា យើងពិតជាព្រះ‌អម្ចាស់មែន។ ២៦ យើងនឹងរំលាយជនជាតិអេស៊ីបក្នុងចំណោមប្រជា‌ជាតិនានា យើងនឹងកម្ចាត់‌កម្ចាយពួកគេឲ្យទៅប្រទេសនានា នោះពួកគេនឹងទទួលស្គាល់ថា យើងពិតជាព្រះ‌អម្ចាស់មែន»។

ប្រស្នាអំពីដើមតាត្រៅដែលគេកាប់

១ នៅឆ្នាំទីដប់មួយ ថ្ងៃទីមួយ ក្នុងខែទីបី ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរប្រាប់ផារ៉ោន ជាស្តេចស្រុកអេស៊ីប និងប្រជាជនដ៏ច្រើនរបស់គេថា:

តើភាពរុង‌រឿងរបស់អ្នកប្រៀបបាននឹងអ្វី?

៣ អ្នកប្រៀបដូចជាដើមតាត្រៅនៅលើភ្នំលីបង់

ដែលបែកមែកសាខា និងមានម្លប់ដ៏ត្រជាក់។

ដើមតាត្រៅនោះលូតឡើង

ចុងវាខ្ពស់កប់ពពក។

៤ ទឹកទន្លេធ្វើឲ្យវាដុះធំឡើង

ទឹកនៅទីជម្រៅធ្វើឲ្យវាលូតឡើងយ៉ាងខ្ពស់

ហើយហូរជុំ‌វិញដើមនោះ

រួចបែកជាដៃទន្លេ ហូរទៅស្រោចស្រព

ដើមឈើទាំងប៉ុន្មាននៅក្នុងព្រៃ។

៥ ដើមតាត្រៅនោះលូតឡើងខ្ពស់

លើសដើមឈើទាំងប៉ុន្មាននៅក្នុងព្រៃ

បែកមែកសាខា ហើយលាតសន្ធឹង

ព្រោះឫសវាសម្បូណ៌ទឹក។

៦ បក្សា‌បក្សីនាំគ្នាមកធ្វើសំបុក

នៅតាមមែករបស់វា

រីឯសត្វព្រៃទាំងប៉ុន្មាន

ក៏មកបង្កើតកូនចៅនៅក្រោមមែករបស់វា

ហើយប្រជា‌ជាតិទាំងអស់ក៏ជ្រកក្រោម

ម្លប់របស់វាដែរ។

៧ ដើមតាត្រៅនោះល្អណាស់

ព្រោះវាខ្ពស់មានមែកលាតសន្ធឹងយ៉ាងវែង

ហើយឫសរបស់វាចាក់ទៅរកកន្លែងសម្បូណ៌ទឹក។

៨ ដើមតាត្រៅនៅក្នុងឧទ្យានរបស់ព្រះ‌ជាម្ចាស់

មិនអាចប្រៀបផ្ទឹមនឹងវាបានទេ

រីឯដើមគគីរ ឬដើមកកោះ

ក៏មិនអាចផ្ទឹមស្មើនឹងវាដែរ

គ្មានដើមឈើណាក្នុងឧទ្យានរបស់ព្រះ‌ជាម្ចាស់

ល្អដូចដើមតាត្រៅនេះឡើយ។

៩ យើងបានតុប‌តែងវាឲ្យមានមែកជាច្រើន

ដើមឈើទាំងប៉ុន្មាននៅអេដែន

ដែលជាឧទ្យានរបស់ព្រះ‌ជាម្ចាស់

នាំគ្នាច្រណែននឹងវា។

១០ យើងជាព្រះ‌ជា‌អម្ចាស់ យើងប្រាប់ឲ្យដឹងថា ដើមតាត្រៅនេះមានកម្ពស់ខ្ពស់ណាស់ ចុងរបស់វាលូតឡើងកប់ពពក ហើយចិត្តរបស់វាក៏ព្រហើនដែរ។ ១១ ហេតុនេះហើយបានជាយើងប្រគល់វាទៅក្នុងកណ្ដាប់ដៃរបស់មេដឹកនាំនៃប្រជា‌ជាតិទាំង‌ឡាយ។ អ្នកនោះនឹងប្រព្រឹត្តចំពោះវា តាមអំពើអាក្រក់របស់វា ព្រោះយើងបានបោះបង់វាចោលហើយ។ ១២ ជនបរទេសដែលសាហាវជាងគេទាំងអស់ក្នុងចំណោមប្រជា‌ជាតិទាំង‌ឡាយ បានកាប់ដើមឈើនោះ រួចទុកចោល។ មែករបស់វារលំទៅលើតំបន់ភ្នំ និងជ្រលងភ្នំទាំងអស់។ រីឯមែកតូចៗរបស់វាបាក់ធ្លាក់ទៅតាមជ្រោះទាំង‌ឡាយនៅក្នុងស្រុកនោះ។ ជាតិសាសន៍ទាំងប៉ុន្មាននៅផែន‌ដីនាំគ្នាចាកចេញពីម្លប់របស់វា ហើយបោះបង់វាចោល។ ១៣ សត្វស្លាបទាំងប៉ុន្មាន នាំគ្នាមកទំនៅតាមមែកបាក់របស់វា ហើយសត្វសាហាវទាំងអស់ក៏មកស្នាក់អាស្រ័យនៅ តាមមែកតូចៗរបស់វាដែរ។ ១៤ ធ្វើដូច្នេះ កុំឲ្យដើមឈើដែលសម្បូណ៌ទឹកដុះខ្ពស់កប់ពពកឡើយ ហើយកុំឲ្យដើមឈើណាអួត‌អាងថា ខ្លួនខ្ពស់ជាងគេដែរ។ ដើមឈើទាំង‌ឡាយមិនខុសពីមនុស្សទេ វានឹងត្រូវស្លាប់ ធ្លាក់ទៅបាតដី រួមជាមួយអស់អ្នកដែលចុះទៅក្នុងរណ្ដៅ»។

១៥ ព្រះ‌ជា‌អម្ចាស់មានព្រះ‌បន្ទូលថា៖ «នៅថ្ងៃដែលដើមតាត្រៅចុះទៅស្ថានមច្ចុរាជ យើងបានឲ្យធម្ម‌ជាតិកាន់ទុក្ខ។ ដោយសារដើមតាត្រៅនោះងាប់ យើងបានបិទប្រភពទឹកនៅក្រោមដី និងទប់ទឹកទន្លេ រីឯទឹកសមុទ្រក៏លែងកម្រើកទៀតដែរ។ យើងបានធ្វើឲ្យមានភាពងងឹតគ្របដណ្តប់លើភ្នំលីបង់ និងធ្វើឲ្យព្រៃឈើទាំងប៉ុន្មានស្ងួតហួត‌ហែងអស់។ ១៦ យើងបានធ្វើឲ្យប្រជា‌ជាតិនានាញ័ររន្ធត់ នៅពេលឮដើមតាត្រៅនោះរលំ។ ពេលយើងទម្លាក់វាទៅស្ថានមច្ចុរាជជាមួយអស់អ្នកដែលធ្លាក់ក្នុងរណ្ដៅ នៅទីនោះ ដើមឈើទាំងប៉ុន្មាននៅអេដែន ព្រមទាំងដើមឈើដ៏ល្អបំផុត ដែលដុះនៅកន្លែងសម្បូណ៌ទឹក នៅភ្នំលីបង់ នាំគ្នាសប្បាយចិត្ត។ ១៧ ដើមឈើទាំងនោះក៏ចុះទៅស្ថានមច្ចុរាជជាមួយដើមតាត្រៅ និងជាមួយអស់អ្នកដែលស្លាប់ដោយមុខដាវដែរ ព្រោះដើមឈើទាំងនោះជាបក្ស‌សម្ពន្ធ ដែលស្ថិតនៅក្រោមម្លប់របស់ដើមតាត្រៅ ក្នុងចំណោមប្រជា‌ជាតិទាំង‌ឡាយ។

១៨ ក្នុងចំណោមដើមឈើនៅអេដែន តើមានដើមណារុង‌រឿងឧត្តុង្គ‌ឧត្ដមដូចអ្នក? ទោះបីយ៉ាងនេះក្តី ក៏អ្នកនឹងត្រូវគេទម្លាក់ទៅក្នុងរណ្ដៅដូចដើមឈើឯទៀតៗដែរ អ្នកនឹងវិនាសជាមួយពួកទមិឡ ជាមួយអស់អ្នកដែលស្លាប់ដោយមុខដាវ។ រីឯស្តេចផារ៉ោន និងប្រជាជនដ៏ច្រើនឥតគណនារបស់ខ្លួន ក៏នឹងត្រូវវិនាសដូច្នេះដែរ» - នេះជាព្រះ‌បន្ទូលរបស់ព្រះ‌ជា‌អម្ចាស់។

ទំនួញស្រណោះស្តេច និងប្រជាជនស្រុកអេស៊ីប

១ នៅឆ្នាំទីដប់‌ពីរ ខែទីដប់‌ពីរ ថ្ងៃទីមួយ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «ចូរស្មូត្រទំនួញបទមួយអំពីផារ៉ោន ជាស្តេចស្រុកអេស៊ីប! ចូរពោលថា:

អ្នកប្រៀបបាននឹងកូនសិង្ហ

ដែលស្ថិតនៅក្នុងចំណោមប្រជា‌ជាតិទាំង‌ឡាយ

អ្នកប្រៀបដូចជាក្រពើសមុទ្រដ៏ធំសម្បើម

អ្នកហែលនៅតាមទន្លេ

ជើងរបស់អ្នកកាយទឹក

ធ្វើឲ្យកក្រើក ហើយល្អក់។

៣ ព្រះ‌ជា‌អម្ចាស់មានព្រះ‌បន្ទូលថា: ជាតិសាសន៍ជាច្រើនប្រមូលផ្តុំគ្នា ពេលនោះ យើងនឹងបោះសំណាញ់របស់យើងទៅលើអ្នក ពួកគេនឹងអូសអ្នក ដែលជាប់ក្នុងសំណាញ់ ឡើងមកលើគោក។ ៤ យើងនឹងបោះអ្នកទៅលើដី ឲ្យនៅកណ្ដាលវាល យើងនឹងឲ្យត្មាតមកចោម‌រោមអ្នក ហើយឲ្យសត្វសាហាវទាំងអស់នៅលើផែន‌ដីស៊ីអ្នក។ ៥ យើងនឹងយកសាច់អ្នកទៅដាក់នៅលើភ្នំ ហើយយកឆ្អឹងរបស់អ្នកទៅចោលពាស‌ពេញជ្រលងភ្នំ។ ៦ យើងនឹងយកឈាមអ្នកទៅស្រោចលើដី លើភ្នំ និងតាមដងទន្លេ។ ៧ នៅពេលអ្នកផុតដង្ហើម យើងនឹងធ្វើឲ្យផ្ទៃមេឃស្រអាប់ ឲ្យផ្កាយប្រែជាងងឹត យើងនឹងឲ្យពពកបាំងពន្លឺព្រះ‌អាទិត្យ ហើយឲ្យព្រះ‌ច័ន្ទលែងមានពន្លឺទៀត។ ៨ ព្រោះតែអ្នកស្លាប់ យើងនឹងធ្វើឲ្យពន្លឺទាំងប៉ុន្មាននៅលើមេឃអាប់រស្មី ភាពងងឹតគ្របដណ្តប់លើស្រុកអ្នកទាំងមូល។ ៩ ពេលណាយើងនាំដំណឹងអំពីមហន្ត‌រាយរបស់អ្នក ទៅប្រាប់ប្រជា‌ជាតិនានា នៅក្នុងស្រុកដែលអ្នកពុំស្គាល់ យើងនឹងធ្វើឲ្យពួកគេរំជួលចិត្ត។ ១០ យើងនឹងធ្វើឲ្យជាតិសាសន៍ជាច្រើនភ័យតក់‌ស្លុត ព្រោះតែអ្នកស្លាប់។ នៅពេលដែលយើងគ្រវីដាវពីមុខពួកគេ ស្តេចរបស់ពួកគេនឹងញ័រ‌រន្ធត់។ នៅថ្ងៃដែលអ្នករលំ ពួកគេចេះតែភ័យញាប់‌ញ័រ ដោយគិតដល់អាយុជីវិតរបស់ខ្លួន។

១១ ព្រះ‌ជា‌អម្ចាស់មានព្រះ‌បន្ទូលថា: ដាវរបស់ស្តេចស្រុកបាប៊ីឡូននឹងប្រហារអ្នក។ ១២ យើងនឹងធ្វើឲ្យប្រជាជនដ៏ច្រើនរបស់អ្នក ស្លាប់ដោយមុខដាវរបស់ខ្មាំង ដែលសាហាវជាងគេបំផុត ក្នុងចំណោមប្រជា‌ជាតិនានា។ ពួកគេនឹងបំបាក់អំនួតរបស់ស្រុកអេស៊ីប ហើយប្រជាជនដ៏ច្រើនរបស់ស្រុកអេស៊ីបនឹងត្រូវវិនាស។ ១៣ យើងនឹងបំផ្លាញហ្វូងសត្វទាំងអស់របស់អ្នក នៅក្បែរទន្លេ ពេលនោះ លែងមានជើងមនុស្ស ឬជើងសត្វ ធ្វើឲ្យល្អក់ទឹកទៀតហើយ។ ១៤ យើងនឹងធ្វើឲ្យទឹកនៅស្ងប់‌ស្ងៀម ហើយឲ្យវាហូរដោយសម្រួលដូចប្រេង -នេះជាព្រះ‌បន្ទូលរបស់ព្រះ‌ជា‌អម្ចាស់។ ១៥ ពេលយើងធ្វើឲ្យស្រុកអេស៊ីបក្លាយទៅជាទីស្មសាន គ្មានសេស‌សល់អ្វីក្នុងស្រុក ហើយពេលយើងប្រហារអ្នកស្រុកអេស៊ីបវិនាសអស់ នោះពួកគេនឹងទទួលស្គាល់ថា យើងពិតជាព្រះ‌អម្ចាស់។

១៦ នេះជាបទទំនួញដែលគេត្រូវស្មូត្រនៅតាមក្រុងផ្សេងៗ ក្នុងចំណោមប្រជា‌ជាតិទាំង‌ឡាយ។ ពួកគេនឹងស្មូត្រទំនួញនេះស្រណោះស្រុកអេស៊ីប និងប្រជាជនដ៏ច្រើនឥតគណនារបស់ស្រុកនេះ»- នេះជាព្រះ‌បន្ទូលរបស់ព្រះ‌ជា‌អម្ចាស់។

១៧ នៅឆ្នាំទីដប់‌ពីរ ថ្ងៃទីដប់ប្រាំ ក្នុងខែទីមួយ ព្រះ‌ជា‌អម្ចាស់មានព្រះ‌បន្ទូលមកខ្ញុំ ដូចតទៅ៖

១៨ កូនមនុស្សអើយ ចូរយំសោកស្រណោះប្រជាជនដ៏ច្រើនឥតគណនានៅស្រុកអេស៊ីបទៅ! ចូរឲ្យបទទំនួញនេះរុញពួកគេទម្លាក់ទៅក្នុងទីជម្រៅ រួមជាមួយប្រជា‌ជាតិដ៏ខ្លាំងពូកែឯទៀតៗ គឺជាមួយអស់អ្នកដែលធ្លាក់រណ្ដៅ! ១៩ ចូរពោលទៅពួកគេថា “តើអ្នករាល់គ្នានឹកស្មានថា គួរឲ្យយើងប្រណីអ្នករាល់គ្នាជាងអ្នកដទៃឬ? ចូរធ្លាក់រណ្ដៅជាមួយពួកទមិឡ ២០ ក្នុងចំណោមអស់អ្នកដែលស្លាប់ដោយមុខដាវទៅ!”។ ឥឡូវនេះ ដាវហូតចេញពីស្រោមហើយ ចូរប្រហារស្រុកអេស៊ីប និងប្រជាជនដ៏ច្រើននៃស្រុកនេះឲ្យវិនាសទៅ! ២១ នៅស្ថានមច្ចុរាជ ពួកអ្នកចម្បាំងដ៏អង់‌អាច និងសម្ពន្ធ‌មិត្តរបស់ស្រុកអេស៊ីបកាលពីមុន នឹងពោលថា “ពួកទមិឡទាំងនេះដែលត្រូវគេចាក់ដោយមុខដាវ ក៏ចុះមកនៅជាមួយពួកយើងដែរហ្ន៎!”។

២២ ស្តេចស្រុកអាស្ស៊ីរី និងកង‌ទ័ពទាំងមូលដែលស្លាប់ដោយមុខដាវ ក៏នៅទីនោះទាំងអស់គ្នាដែរ ផ្នូរទាហាននៅព័ទ្ធជុំ‌វិញផ្នូររបស់ស្តេច។ ២៣ ផ្នូររបស់ពួកគេស្ថិតនៅក្នុងរណ្ដៅដ៏ជ្រៅ ផ្នូរទាហាននៅព័ទ្ធជុំ‌វិញផ្នូររបស់ស្តេច។ ពួកអ្នកដែលធ្លាប់តែធ្វើឲ្យពិភព‌លោកភ័យញ័រ បែរជាដួលស្លាប់ដោយមុខដាវទាំងអស់គ្នាដែរ។

២៤ ស្តេចស្រុកអេឡាំ និងកង‌ពលទាំងមូល ត្រូវដួលស្លាប់ដោយមុខដាវទាំងអស់គ្នា ផ្នូរទាហាននៅព័ទ្ធជុំ‌វិញផ្នូររបស់ស្តេច។ ពួកទមិឡដែលធ្លាប់តែធ្វើឲ្យពិភព‌លោកភ័យញ័របានធ្លាក់ទៅក្នុងទីជម្រៅ ពួកគេត្រូវអាម៉ាស់មុខជាមួយអស់អ្នកដែលធ្លាក់ក្នុងរណ្ដៅ។ ២៥ ស្តេចស្រុកអេឡាំ និងពល‌ទាហាន ស្ថិតនៅក្នុងចំណោមអ្នកឯទៀតៗដែលស្លាប់ ផ្នូរទាហានស្ថិតនៅជុំ‌វិញផ្នូររបស់ស្តេច។ ទោះបីពួកទមិឡទាំងនោះធ្លាប់ធ្វើឲ្យពិភព‌លោកភ័យញ័រក្តី ក៏ពួកគេស្លាប់ដោយមុខដាវទាំងអស់គ្នា។ ពួកគេត្រូវអាម៉ាស់មុខជាមួយអស់អ្នកដែលធ្លាក់ក្នុងរណ្ដៅ ពួកគេស្ថិតនៅជាមួយអស់អ្នកដែលស្លាប់។

២៦ ស្តេចស្រុកម៉េសេក និងស្រុកទូបាល ព្រមទាំងពល‌ទាហានរបស់គេក៏នៅទីនោះដែរ ផ្នូរទាហានស្ថិតនៅជុំ‌វិញផ្នូររបស់ស្តេច។ ពួកទមិឡទាំងនោះសុទ្ធតែស្លាប់ដោយមុខដាវ ដ្បិតពួកគេបានធ្វើឲ្យពិភព‌លោកភ័យញ័រ។ ២៧ ពួកគេមិនស្ថិតនៅជាមួយពួកវីរ‌បុរសពីជំនាន់ដើមទេ ដ្បិតពួកគេជាមនុស្សទមិឡ។ ពួកគេចុះទៅស្ថានមច្ចុរាជ ដោយមានទាំងគ្រឿងសាស្ត្រា‌វុធទៅជាមួយផង ដាវរបស់គេស្ថិតនៅពីក្រោមក្បាលដំណេក បាបរបស់ពួកគេស្ថិតនៅជាប់ជាមួយឆ្អឹងរបស់ខ្លួន ដ្បិតពួកគេបានធ្វើឲ្យពិភព‌លោកភ័យញ័រ។

២៨ ផារ៉ោនអើយ អ្នកត្រូវគេសម្លាប់ក្នុងចំណោមពួកទមិឡ អ្នកក៏នឹងស្ថិតនៅជាមួយពួកដែលស្លាប់ដោយមុខដាវដែរ!។

២៩ ជនជាតិអេដុម ទាំងស្តេច ទាំងមេដឹកនាំ ក៏នៅទីនោះដែរ។ ទោះបីពួកគេជាអ្នកចម្បាំងដ៏ពូកែក្តី ក៏ពួកគេស្ថិតនៅជាមួយអស់អ្នកដែលស្លាប់ដោយមុខដាវ។ ពួកគេស្ថិតនៅជាមួយពួកទមិឡ និងជាមួយពួកអ្នកដែលចុះទៅក្នុងរណ្ដៅ។

៣០ មេដឹកនាំទាំងប៉ុន្មាននៅស្រុកខាងជើង និងអ្នកស្រុកស៊ីដូនទាំងអស់ក៏នៅទីនោះដែរ។ ទោះបីពួកគេធ្លាប់ជាអ្នកចម្បាំងដ៏ពូកែ ហើយធ្វើឲ្យពិភព‌លោកភ័យញ័រក្តី ពួកគេចុះទៅជាមួយអស់អ្នកដែលស្លាប់ ទាំងអាម៉ាស់។ ពួកទមិឡទាំងនោះស្ថិតនៅជាមួយអស់អ្នកដែលស្លាប់ដោយមុខដាវ ពួកគេត្រូវអាម៉ាស់មុខជាមួយអស់អ្នកដែលធ្លាក់ក្នុងរណ្ដៅ។

៣១ ពេលផារ៉ោនឃើញអ្នកទាំងនេះ គាត់នឹងបានធូរស្បើយចំពោះការបាត់បង់ពល‌ទ័ពរបស់ខ្លួន គឺពល‌ទាហានអេស៊ីបទាំងមូល ដែលស្លាប់ដោយមុខដាវ នេះជាព្រះ‌បន្ទូលរបស់ព្រះ‌ជា‌អម្ចាស់។ ៣២ «យើងបណ្តោយឲ្យផារ៉ោនសាបព្រោះការភ័យញ័រក្នុងពិភព‌លោកទាំងមូល តែក្រោយមក គេនឹងបញ្ចុះសពផារ៉ោន និងកង‌ពល ក្នុងចំណោមពួកទមិឡ និងអស់អ្នកដែលបានស្លាប់ដោយមុខដាវ» - នេះជាព្រះ‌បន្ទូលរបស់ព្រះ‌ជា‌អម្ចាស់។

ព្រះ‌បន្ទូលសន្យាស្តារស្ថាន‌ភាពជនជាតិអ៊ីស្រា‌អែលឡើងវិញ

ព្រះ‌អម្ចាស់តែង‌តាំងព្យាការីជាអ្នកយាម‌ល្បាត

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖

២ «កូនមនុស្សអើយ ចូរថ្លែងប្រាប់ប្រជាជនរបស់អ្នកថា ពេលយើងនាំសង្គ្រាមមកប្រហារស្រុកណាមួយ ប្រជាជននៅស្រុកនោះជ្រើស‌រើសយកនរណាម្នាក់ក្នុងចំណោមពួកគេ ឲ្យធ្វើជាអ្នកយាម‌ល្បាត។ ៣ ពេលណាអ្នកយាមឃើញកង‌ទ័ពខ្មាំងចូលមកវាយប្រហារស្រុក គាត់ផ្លុំស្នែងប្រកាសអាសន្នឲ្យប្រជាជនដឹង ៤ ប្រសិនបើនរណាម្នាក់ឮសំឡេងស្នែង តែមិនអើពើ បើគេស្លាប់ដោយមុខដាវ នោះគេនឹងទទួលខុសត្រូវលើការស្លាប់របស់ខ្លួន។ ៥ គេបាត់បង់ជីវិត ព្រោះតែកំហុសរបស់ខ្លួន ដ្បិតគេបានឮសំឡេងស្នែង តែមិនអើពើ។ រីឯអ្នកដែលយកចិត្តទុកដាក់ចំពោះការប្រកាស នឹងបានរួចជីវិត។ ៦ ប្រសិនបើអ្នកយាមឃើញកង‌ទ័ពខ្មាំងចូលមកវាយប្រហារស្រុក តែមិនផ្លុំស្នែងប្រកាសអាសន្នឲ្យប្រជាជនដឹងទេ បើអ្នកណាម្នាក់ស្លាប់ដោយមុខដាវ អ្នកនោះស្លាប់ ព្រោះតែអំពើបាបរបស់ខ្លួន ប៉ុន្តែ យើងនឹងឲ្យអ្នកយាមទទួលទោសចំពោះការស្លាប់នេះ។

៧ ចំណែកឯអ្នកវិញ កូនមនុស្សអើយ យើងបានតែង‌តាំងអ្នកឲ្យធ្វើជាអ្នកយាម‌ល្បាត សម្រាប់ពូជ‌ពង្សអ៊ីស្រា‌អែល។ ចូរស្ដាប់ពាក្យដែលយើងនិយាយ ហើយយកទៅប្រកាសប្រាប់ពួកគេក្នុងនាមយើងផង។ ៨ ពេលណាយើងពោលទៅកាន់មនុស្សអាក្រក់ថា “នែ៎ មនុស្សអាក្រក់ អ្នកឯងនឹងត្រូវស្លាប់ជាមិនខាន!”។ ប្រសិនបើអ្នកមិនប្រាប់មនុស្សអាក្រក់នោះឲ្យលះ‌បង់កិរិយា‌មារយាទអាក្រក់ទេ មនុស្សអាក្រក់នោះនឹងស្លាប់ ព្រោះតែអំពើបាបរបស់ខ្លួន ក៏ប៉ុន្តែ យើងនឹងឲ្យអ្នកទទួលទោសចំពោះការស្លាប់នេះ។ ៩ ផ្ទុយទៅវិញ ប្រសិនបើអ្នកប្រាប់មនុស្សអាក្រក់ឲ្យលះ‌បង់ចោលកិរិយា‌មារយាទអាក្រក់របស់ខ្លួន តែគេមិនព្រមលះ‌បង់ទេនោះ គេពិតជាស្លាប់ ព្រោះតែអំពើបាបរបស់គេពុំ‌ខាន រីឯអ្នកវិញ អ្នកនឹងរួចជីវិត។

១០ កូនមនុស្សអើយ ចូរប្រកាសប្រាប់ពូជ‌ពង្សអ៊ីស្រា‌អែលដូចតទៅ: អ្នករាល់គ្នាតែងពោលថា “អំពើទុច្ចរិត និងអំពើបាបរបស់យើងខ្ញុំសង្កត់លើយើងខ្ញុំ ហេតុនេះហើយបានជាយើងខ្ញុំកាន់តែរីង‌រៃទៅៗ តើធ្វើម្ដេចឲ្យយើងខ្ញុំអាចរស់រានមានជីវិតបាន?”។ ១១ ចូរឆ្លើយទៅពួកគេវិញថា: យើងជាព្រះដែលមានជីវិតគង់នៅ! យើងមិនសប្បាយចិត្តនឹងឲ្យមនុស្សអាក្រក់ស្លាប់ទេ តែយើងចង់ឃើញគេកែប្រែកិរិយា‌មារយាទ ដើម្បីឲ្យបានរស់រានមានជីវិត។ ពូជ‌ពង្សអ៊ីស្រា‌អែលអើយ ចូរនាំគ្នាវិលត្រឡប់មកវិញ ចូរលះ‌បង់កិរិយា‌មារយាទអាក្រក់ទៅ អ្នករាល់គ្នាមិនគួរស្លាប់ឡើយ! - នេះជាព្រះ‌បន្ទូលរបស់ព្រះ‌ជា‌អម្ចាស់។

១២ កូនមនុស្សអើយ ចូរប្រកាសប្រាប់ប្រជាជនរបស់អ្នកថា: នៅថ្ងៃដែលមនុស្សសុចរិតប្រព្រឹត្តអំពើទុច្ចរិតណាមួយ អំពើសុចរិតដែលគេធ្លាប់ធ្វើកាលពីមុន ពុំអាចសង្គ្រោះគេឡើយ។ ហេតុនេះ នៅថ្ងៃដែលមនុស្សសុចរិតប្រព្រឹត្តអំពើបាប គេពុំអាចរស់ ដោយ‌សារអំពើសុចរិតរបស់ខ្លួនឡើយ។ រីឯមនុស្សអាក្រក់វិញ នៅថ្ងៃដែលគេលះ‌បង់ចោលអំពើអាក្រក់ នោះគេនឹងមិនទទួលទោស ព្រោះតែអំពើអាក្រក់ដែលខ្លួនបានប្រព្រឹត្តកាលពីមុននោះឡើយ។ ១៣ ប្រសិនបើយើងពោលទៅកាន់មនុស្សសុចរិតថា “អ្នកពិតជារស់!” បើអ្នកនោះពឹងផ្អែកលើសេចក្ដីសុចរិតរបស់ខ្លួន រួចបែរជាប្រព្រឹត្តអំពើអាក្រក់ណាមួយ នោះគេមុខជាស្លាប់ ព្រោះតែអំពើអាក្រក់ដែលខ្លួនបានប្រព្រឹត្ត យើងនឹងមិនគិត‌គូរដល់អំពើសុចរិតណាមួយរបស់អ្នកនោះឡើយ។ ១៤ ប្រសិនបើយើងពោលទៅកាន់មនុស្សអាក្រក់ថា “អ្នកពិតជាស្លាប់!” តែបើអ្នកនោះលះ‌បង់ចោលអំពើបាប បែរទៅប្រព្រឹត្តអំពើសុចរិត និងយុត្តិធម៌ ១៥ បើមនុស្សអាក្រក់សងរបស់បញ្ចាំ សងអ្វីៗដែលខ្លួនរឹបអូសទៅម្ចាស់ដើមវិញ ប្រសិនបើគេប្រតិបត្តិតាមវិន័យដែលផ្តល់ជីវិត ដោយឥតប្រព្រឹត្តអំពើអាក្រក់ទេនោះ គេមុខជារស់ គឺមិនស្លាប់ឡើយ។ ១៦ យើងនឹងមិនគិត‌គូរដល់អំពើអាក្រក់ដែលអ្នកនោះធ្លាប់ប្រព្រឹត្តទេ។ គេពិតជារស់មិនខាន ព្រោះគេប្រព្រឹត្តអំពើសុចរិត និងយុត្តិធម៌។ ១៧ ប្រជាជនរបស់អ្នកនាំគ្នាពោលថា “ព្រះ‌អម្ចាស់ប្រព្រឹត្តដូច្នេះមិនត្រឹមត្រូវទេ”។ តាមពិត គឺពួកគេវិញទេតើដែលប្រព្រឹត្តមិនត្រឹមត្រូវ!។ ១៨ ប្រសិនបើមនុស្សសុចរិតលះ‌បង់ចោលអំពើសុចរិត បែរទៅប្រព្រឹត្តអំពើអាក្រក់ គេមុខជាស្លាប់ពុំ‌ខាន។ ១៩ ប្រសិនបើមនុស្សអាក្រក់លះ‌បង់ចោលអំពើអាក្រក់ បែរមកប្រព្រឹត្តអំពើសុចរិត និងយុត្តិធម៌ គេមុខជារស់ ព្រោះតែធ្វើដូច្នេះ។ ២០ អ្នករាល់គ្នាតែងពោលថា “ព្រះ‌អម្ចាស់ ប្រព្រឹត្តដូច្នេះមិនត្រឹមត្រូវទេ”។ ពូជ‌ពង្សអ៊ីស្រា‌អែលអើយ យើងនឹងវិនិច្ឆ័យអ្នករាល់គ្នា តាមអំពើដែលម្នាក់ៗបានប្រព្រឹត្ត!»។

មូលហេតុដែលសត្រូវវាយយកបានក្រុងយេរូ‌សាឡឹម

២១ នៅឆ្នាំទីដប់‌ពីរ ថ្ងៃទីប្រាំ ក្នុងខែទីពីរ ក្រោយពេលដែលគេកៀរពួកយើងមកជាឈ្លើយ មានម្នាក់ដែលរត់រួចពីក្រុងយេរូ‌សាឡឹមមកជួបខ្ញុំ ប្រាប់ថា “សត្រូវវាយយកបានទីក្រុងហើយ!”។ ២២ មុនពេលអ្នកនោះមកដល់ នៅពេលល្ងាច ព្រះ‌អម្ចាស់ដាក់ព្រះ‌ហស្ដលើខ្ញុំ។ លុះព្រលឹមឡើង ពេលអ្នកនោះមកដល់ ព្រះ‌អម្ចាស់បើកឲ្យខ្ញុំនិយាយឡើងវិញបាន។ ព្រះ‌អង្គបើកមាត់ខ្ញុំឲ្យនិយាយស្តី គឺខ្ញុំលែងគទៀតហើយ។

២៣ ពេលនោះ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖

២៤ «កូនមនុស្សអើយ អស់អ្នកដែលរស់លើគំនរបាក់បែក ក្នុងទឹកដីអ៊ីស្រា‌អែល នាំគ្នាពោលថា: “កាលលោកអប្រា‌ហាំនៅតែម្នាក់ឯង លោកកាន់កាប់ស្រុកនេះបានទៅហើយ ចុះចំណង់បើពួកយើងដែលមានគ្នាច្រើន តើពួកយើងទទួលស្រុកនេះមកកាន់កាប់មិនបានឬ!”។ ២៥ ចូរប្រាប់ពួកគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: អ្នករាល់គ្នាបរិភោគសាច់ដែលមានជាប់ឈាម អ្នករាល់គ្នាគោរពព្រះក្លែង‌ក្លាយ ហើយបង្ហូរឈាមមនុស្ស តើអ្នករាល់គ្នាស្មានថា ខ្លួនកាន់កាប់ស្រុកនេះបានឬ?។ ២៦ អ្នករាល់គ្នាពឹងផ្អែកលើអាវុធរបស់ខ្លួន ហើយប្រព្រឹត្តអំពើគួរស្អប់ខ្ពើម ម្នាក់ៗប្រព្រឹត្តអំពើផិតក្បត់ជាមួយប្រពន្ធគេ តើអ្នករាល់គ្នាស្មានថា ខ្លួនកាន់កាប់ស្រុកនេះបានឬ?។

២៧ ចូរប្រាប់ពួកគេថា ព្រះ‌ជា‌អម្ចាស់ជាព្រះដ៏មានព្រះ‌ជន្មគង់នៅ មានព្រះ‌បន្ទូលដូចតទៅ: អ្នកដែលនៅសល់ក្នុងទីក្រុងបាក់បែក នឹងត្រូវស្លាប់ដោយមុខដាវ រីឯអ្នករស់នៅតាមស្រុកស្រែ យើងនឹងប្រគល់គេទៅឲ្យសត្វសាហាវធ្វើជាអាហារ ហើយអ្នកដែលពួននៅតាមភ្នំ និងតាមក្រហែងថ្ម នឹងត្រូវស្លាប់ដោយជំងឺរាត‌ត្បាត។ ២៨ យើងនឹងធ្វើឲ្យស្រុកនោះក្លាយទៅជាទីស្មសានដ៏ស្ងាត់ជ្រងំ អំណាចអួត‌អាងរបស់ពួកគេនឹងរលាយសូន្យ ភ្នំទាំង‌ឡាយនៅស្រុកអ៊ីស្រា‌អែលក្លាយទៅជាទីស្ងាត់ជ្រងំ គ្មាននរណាដើរកាត់តាមនោះឡើយ។ ២៩ ពេលណាយើងធ្វើឲ្យស្រុកនេះក្លាយទៅជាទីស្មសានដ៏ស្ងាត់ជ្រងំ ព្រោះតែអំពើដ៏គួរស្អប់ខ្ពើមទាំងប៉ុន្មាន ដែលពួកគេបានប្រព្រឹត្ត ពួកគេនឹងទទួលស្គាល់ថា យើងពិតជាព្រះ‌អម្ចាស់មែន។

៣០ កូនមនុស្សអើយ ប្រជាជនរបស់អ្នកនាំគ្នានិយាយពីអ្នកនៅតាមកំពែងក្រុង និងតាមមាត់ទ្វារផ្ទះ ពួកគេបបួលគ្នាថា “មក! យើងទៅស្ដាប់សេចក្ដីដែលព្រះ‌អម្ចាស់មានព្រះ‌បន្ទូល”។ ៣១ ប្រជាជនរបស់យើងនឹងប្រមូលគ្នាមករកអ្នក ពួកគេអង្គុយនៅមុខអ្នក ស្ដាប់ពាក្យរបស់អ្នក តែមិនប្រតិបត្តិតាមទេ។ មាត់ពួកគេពោលថា គោរពពាក្យអ្នក តែពួកគេបែរជាធ្វើតាមចិត្តលោភ‌លន់របស់ខ្លួនទៅវិញ។ ៣២ ពួកគេចាត់ទុកពាក្យសម្ដីរបស់អ្នក ជាចម្រៀងកំដរអារម្មណ៍ ជាតូរ្យ‌តន្ដ្រីដ៏ពីរោះ ដែលមានសំឡេងគួរចាប់ចិត្ត។ ពួកគេស្ដាប់ពាក្យអ្នក តែមិនប្រតិបត្តិតាមឡើយ។ ៣៣ ពេលណាហេតុ‌ការណ៍កើតមាន ស្របតាមពាក្យរបស់អ្នក - គឺហេតុ‌ការណ៍ទាំងនោះកំពុងតែកើតមាន -ពួកគេនឹងដឹងថា មានព្យាការីមួយរូបនៅក្នុងចំណោមពួកគេមែន»។

ព្រះ‌បន្ទូលប្រឆាំងនឹងអ្នកដឹកនាំអ៊ីស្រា‌អែល

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ២ «កូនមនុស្សអើយ ចូរថ្លែងពាក្យក្នុងនាមយើងប្រឆាំងនឹងអ្នកដឹកនាំអ៊ីស្រា‌អែលទៅ! ចូរថ្លែងពាក្យក្នុងនាមយើងប្រាប់អ្នកដឹកនាំទាំងនោះថា ព្រះ‌ជា‌អម្ចាស់មានព្រះ‌បន្ទូលដូចតទៅ: អ្នកដឹកនាំអ៊ីស្រា‌អែលអើយ អ្នករាល់គ្នាត្រូវវេទនាហើយ ដ្បិតអ្នករាល់គ្នាគិតតែពីប្រយោជន៍ផ្ទាល់ខ្លួន។ ធម្មតា ពួកគង្វាលតែងតែមើលថែ‌រក្សាហ្វូងចៀម ៣ រីឯអ្នករាល់គ្នាវិញ អ្នករាល់គ្នាមិនបានមើលថែទាំហ្វូងចៀមទេ អ្នករាល់គ្នាគិតតែពីយកទឹកដោះមកផឹក កាត់រោមចៀមមកធ្វើជាសម្លៀក‌បំពាក់ ហើយសម្លាប់ចៀមធាត់ៗធ្វើជាអាហារ។ ៤ អ្នករាល់គ្នាពុំបានជួយចៀមដែលខ្សោយឲ្យមានកម្លាំង អ្នករាល់គ្នាពុំបានព្យាបាលចៀមឈឺ ឬរុំរបួសឲ្យចៀមរបួសទេ។ អ្នករាល់គ្នាពុំបាននាំចៀមវង្វេងឲ្យត្រឡប់មកវិញ ហើយក៏មិនដើររកចៀមដែលបាត់ដែរ។ ផ្ទុយទៅវិញ អ្នករាល់គ្នាបែរជាប្រើអំណាចជិះ‌ជាន់សង្កត់‌សង្កិនពួកគេ។ ៥ ចៀមទាំងនោះត្រូវខ្ចាត់‌ខ្ចាយ រត់បែក‌ខ្ញែកគ្នា ហើយត្រូវសត្វសាហាវដេញចាប់ស៊ី ព្រោះគ្មាននរណាឃ្វាល។ ៦ ហ្វូងចៀមរបស់យើងវង្វេងទៅគ្រប់ទីកន្លែង តាមភ្នំតូច ភ្នំធំ បែក‌ខ្ញែកគ្នាពាស‌ពេញស្រុក តែគ្មាននរណារវី‌រវល់ថែទាំ គ្មាននរណាដើររកវាឡើយ»។

៧ ហេតុនេះ អ្នកដឹកនាំអ៊ីស្រា‌អែលអើយ ចូរស្ដាប់ព្រះ‌បន្ទូលរបស់ព្រះ‌អម្ចាស់! ៨ ព្រះ‌ជា‌អម្ចាស់ជាព្រះដ៏មានព្រះ‌ជន្មគង់នៅ មានព្រះ‌បន្ទូលដូចតទៅ៖ «ហ្វូងចៀមរបស់យើងត្រូវគេលួចប្លន់ ត្រូវសត្វព្រៃចាប់ស៊ី ព្រោះតែគ្មាននរណាឃ្វាល រីឯពួកអ្នកដែលយើងប្រើឲ្យឃ្វាល មិនរវី‌រវល់ដើររកហ្វូងចៀមរបស់យើងទេ គឺពួកគេគិតតែពីរកប្រយោជន៍ផ្ទាល់ខ្លួន ឥតគិតឃ្វាលហ្វូងចៀមឡើយ»។ ៩ ហេតុនេះ អ្នកដឹកនាំអើយ ចូរស្ដាប់ព្រះ‌បន្ទូលរបស់ព្រះ‌អម្ចាស់! ១០ ព្រះ‌ជា‌អម្ចាស់មានព្រះ‌បន្ទូលថា៖ «យើងនឹងដាក់ទោសពួកគង្វាលទាំងនោះ យើងនឹងដកហ្វូងចៀមយើងចេញពីកណ្ដាប់ដៃរបស់គេមកវិញ។ យើងនឹងលែងឲ្យពួកគេឃ្វាលហ្វូងចៀមរបស់យើង ដើម្បីរកផលប្រយោជន៍ផ្ទាល់ខ្លួនទៀតហើយ យើងនឹងបេះហ្វូងចៀមរបស់យើងពីមាត់គេ លែងឲ្យគេស៊ីដូចមុនទៀត»។

ព្រះ‌អម្ចាស់នឹងឃ្វាលហ្វូងចៀមរបស់ព្រះ‌អង្គ

១១ ព្រះ‌ជា‌អម្ចាស់មានព្រះ‌បន្ទូលថា៖ «ចាប់ពីពេលនេះតទៅ យើងនឹងតាមរកហ្វូងចៀមរបស់យើង ហើយមើលថែទាំវាដោយផ្ទាល់។ ១២ យើងនឹងតាមរកហ្វូងចៀមរបស់យើង ដូចគង្វាលតាមរកហ្វូងចៀមរបស់ខ្លួនដែលបែក‌ខ្ញែកដែរ។ យើងនឹងប្រមូលចៀមរបស់យើងពីគ្រប់កន្លែងដែលវាខ្ចាត់‌ខ្ចាយទៅ នៅថ្ងៃមេឃងងឹត និងចុះអាប់។ ១៣ យើងនឹងនាំប្រជាជនរបស់យើងចេញពីចំណោមជាតិសាសន៍នានា យើងនឹងប្រមូលពួកគេពីគ្រប់ស្រុក ឲ្យមករស់នៅលើទឹកដីរបស់ខ្លួនវិញ។ យើងនឹងឃ្វាលពួកគេនៅតាមតំបន់ភ្នំនៃស្រុកអ៊ីស្រា‌អែល តាមជ្រលងដងអូរ និងគ្រប់ទីកន្លែងដែលអាចរស់នៅបាន។ ១៤ យើងនឹងឃ្វាលចៀមរបស់យើងនៅកន្លែងដែលសម្បូណ៌ស្មៅខៀវខ្ចី ពួកគេនឹងស្នាក់អាស្រ័យនៅតាមភ្នំខ្ពស់ៗនៃស្រុកអ៊ីស្រា‌អែល។ នៅទីនោះ ពួកគេនឹងសម្រាក ហើយរកស៊ីតាមវាលស្មៅដ៏ខៀវខ្ចី។ ១៥ យើងនឹងឃ្វាលហ្វូងចៀមរបស់យើង យើងនឹងឲ្យវាសម្រាក - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៦ យើងនឹងស្វែងរកចៀមដែលបាត់ យើងនឹងនាំចៀមវង្វេងឲ្យត្រឡប់មកវិញ យើងនឹងរុំរបួសឲ្យចៀមរបួស ហើយព្យាបាលចៀមឈឺឲ្យជាមានកម្លាំងឡើងវិញ។ រីឯចៀមធាត់ៗ មានកម្លាំងមាំ‌មួន យើងនឹងដកវាចេញ។ យើងនឹងឃ្វាលហ្វូងចៀមរបស់យើងដោយយុត្តិធម៌»។

១៧ ព្រះ‌ជា‌អម្ចាស់មានព្រះ‌បន្ទូលថា៖ «អ្នករាល់គ្នាជាចៀមរបស់យើងអើយ បន្តិចទៀត យើងវិនិច្ឆ័យរវាងចៀមនិងចៀម រវាងចៀមឈ្មោល និងពពែឈ្មោល។ ១៨ ហេតុអ្វីបានជាក្នុងចំណោមអ្នករាល់គ្នា មានអ្នកខ្លះមិនស្កប់ចិត្តនឹងរកស៊ីនៅកន្លែងរបស់ខ្លួនដែលសម្បូណ៌ស្មៅ តែបែរជាទៅជាន់ឈ្លីកន្លែងឯទៀតៗដូច្នេះ?។ ហេតុអ្វីបានជាអ្នករាល់គ្នាមិនស្កប់ចិត្តនឹងផឹកទឹកថ្លា តែបែរជាយកជើងកូរទឹកឲ្យល្អក់ដូច្នេះ?។ ១៩ ចៀមឯទៀតៗរបស់យើងស៊ីស្មៅដែលអ្នករាល់គ្នាជាន់ឈ្លី ហើយផឹកទឹកដែលអ្នករាល់គ្នាបានធ្វើឲ្យល្អក់!»។

២០ ហេតុនេះហើយបានជាព្រះ‌ជា‌អម្ចាស់មានព្រះ‌បន្ទូលថា៖ «យើងនឹងវិនិច្ឆ័យរវាងចៀមធាត់ និងចៀមស្គម ដោយខ្លួនយើងផ្ទាល់! ២១ អ្នករាល់គ្នាយកស្មា និងយកខ្លួនទៅបុកចៀមដែលខ្សោយ ហើយយកស្នែងវ័ធដេញពួកគេចេញទៅបាត់អស់។ ២២ យើងនឹងសង្គ្រោះចៀមរបស់យើង ដើម្បីកុំឲ្យគេលួចប្លន់ទៀត ហើយយើងវិនិច្ឆ័យរវាងចៀម និងចៀម។ ២៣ យើងនឹងធ្វើឲ្យមានគង្វាលតែមួយគត់ងើបឡើង ដើម្បីមើលថែទាំពួកគេ គឺដាវីឌជាអ្នកបម្រើរបស់យើង នឹងធ្វើជាគង្វាលមើលថែទាំពួកគេ។ ២៤ រីឯយើងជាព្រះ‌អម្ចាស់ យើងនឹងធ្វើជាព្រះរបស់ពួកគេ ដាវីឌជាអ្នកបម្រើរបស់យើង នឹងធ្វើជាមេដឹកនាំនៅក្នុងចំណោមពួកគេ។ នេះជាពាក្យរបស់យើងជាព្រះ‌អម្ចាស់។

២៥ យើងនឹងចងសម្ពន្ធ‌មេត្រី ដែលផ្តល់សេចក្ដីសុខ‌សាន្តដល់ពួកគេ យើងនឹងកម្ចាត់សត្វសាហាវចេញឲ្យអស់ពីទឹកដីនេះ។ ហ្វូងចៀមរបស់យើងនឹងស្នាក់នៅយ៉ាងសុខ‌សាន្តក្នុងវាលរហោ‌ស្ថាន ហើយដេកយ៉ាងសុខស្រួលនៅក្នុងព្រៃ។ ២៦ យើងនឹងឲ្យពរពួកគេ ព្រមទាំងស្រុកភូមិដែលនៅជុំ‌វិញភ្នំរបស់យើង ហើយធ្វើឲ្យភ្លៀងធ្លាក់ចុះមកតាមរដូវកាល ជាភ្លៀងដែលនាំពរមកជាមួយផង។ ២៧ ដើមឈើនៅតាមចម្ការនឹងបង្កើតផលផ្លែ ហើយទឹកដីនឹងផ្តល់ភោគ‌ផល។ ពួកគេនឹងរស់យ៉ាងសុខ‌សាន្តនៅលើទឹកដីរបស់ខ្លួន។ ពេលណាយើងយកនឹមចេញពីពួកគេ ហើយរំដោះពួកគេឲ្យរួចផុតពីកណ្ដាប់ដៃរបស់អស់អ្នកដែលចាប់ពួកគេធ្វើជាទាសករ ពេលនោះ ពួកគេនឹងទទួលស្គាល់ថា យើងពិតជាព្រះ‌អម្ចាស់។ ២៨ ប្រជា‌ជាតិនានានឹងលែងបំផ្លិច‌បំផ្លាញពួកគេទៀតហើយ សត្វព្រៃក៏នឹងលែងហែកពួកគេស៊ីទៀតដែរ ពួកគេនឹងរស់នៅយ៉ាងសុខ‌សាន្តនៅក្នុងស្រុក ឥតមាននរណាបំភ័យពួកគេឡើយ។ ២៩ យើងនឹងប្រគល់ចម្ការដែលមានជីជាតិល្អបំផុតឲ្យពួកគេ ពួកគេនឹងលែងជួបទុរ្ភិក្សនៅក្នុងស្រុក ហើយក៏លែងត្រូវអាម៉ាស់នៅចំពោះមុខប្រជា‌ជាតិនានាទៀតដែរ។ ៣០ ពួកគេនឹងទទួលស្គាល់ថា យើងជាព្រះ‌អម្ចាស់ ជាព្រះរបស់ពួកគេ យើងស្ថិតនៅជាមួយពួកគេ ហើយពួកគេគឺពូជ‌ពង្សអ៊ីស្រា‌អែលជាប្រជា‌រាស្ដ្ររបស់យើង - នេះជាព្រះ‌បន្ទូលរបស់ព្រះ‌ជា‌អម្ចាស់។ ៣១ អ្នករាល់គ្នាជាចៀមនៅក្នុងវាលស្មៅរបស់យើង អ្នករាល់គ្នាជាមនុស្សដែលយើងថែ‌រក្សា ហើយយើងជាព្រះរបស់អ្នករាល់គ្នា» - នេះជាព្រះ‌បន្ទូលរបស់ព្រះ‌ជា‌អម្ចាស់។

ព្រះ‌បន្ទូលប្រឆាំងនឹងស្រុកអេដុម

១ ព្រះ‌អម្ចាស់មានព្រះ‌បន្ទូលមកខ្ញុំ ដូចតទៅ៖ ២ «កូនមនុស្សអើយ ចូរបែរមុខទៅរកភ្នំសៀរ ហើយថ្លែងពាក្យក្នុងនាមយើងប្រឆាំងនឹងភ្នំនោះទៅ! ៣ ចូរពោលទៅគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: ភ្នំសៀរអើយ យើងប្រឆាំងនឹងអ្នកហើយ យើងដាក់ទោសអ្នក ធ្វើឲ្យអ្នកក្លាយទៅជាទីស្មសានដ៏ស្ងាត់ជ្រងំ។ ៤ យើងនឹងកម្ទេចក្រុងទាំង‌ឡាយរបស់អ្នក អ្នកនឹងក្លាយទៅជាទីស្មសាន។ ពេលនោះ អ្នកនឹងទទួលស្គាល់ថា យើងពិតជាព្រះ‌អម្ចាស់មែន។ ៥ ដោយអ្នកចេះតែចាត់ទុកអ៊ីស្រា‌អែលថាជាសត្រូវសួរពូជ ហើយបង្ហូរឈាមពួកគេដោយមុខដាវ ក្នុងពេលពួកគេត្រូវអន្តរាយ និងពេលដែលអំពើបាបរបស់ពួកគេកើនដល់កម្រិតនោះ ៦ យើងជាព្រះដ៏មានជីវិតគង់នៅ! យើងនឹងបង្ហូរឈាមអ្នក ហើយឈាមនឹងតាមអ្នកជាប់ជា‌និច្ច។ ដោយអ្នកចូលចិត្តបង្ហូរឈាម ឈាមនឹងតាមអ្នកជាប់ជា‌និច្ច - នេះជាព្រះ‌បន្ទូលរបស់ព្រះ‌ជា‌អម្ចាស់។ ៧ យើងនឹងធ្វើឲ្យភ្នំសៀរក្លាយទៅជាទីស្មសានដ៏ស្ងាត់ជ្រងំ លែងឲ្យមាននរណាធ្វើដំណើរទៅមកកាត់តាមនោះទៀតហើយ។ ៨ យើងនឹងរាយសាក‌សពពាស‌ពេញភ្នំ។ អស់អ្នកដែលស្លាប់ដោយមុខដាវនឹងស្ថិតនៅពាស‌ពេញភ្នំ តាមជ្រលងភ្នំ និងតាមជ្រោះទាំងប៉ុន្មាន។ ៩ យើងនឹងធ្វើឲ្យអ្នកក្លាយទៅជាទីស្ងាត់ជ្រងំរហូតតទៅ គ្មាននរណារស់នៅក្នុងក្រុងរបស់អ្នកទៀតទេ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន។ ១០ អ្នកបានពោលថា “ប្រជា‌ជាតិទាំងពីរ និងស្រុកទាំងពីរនេះនឹងទៅជាកម្ម‌សិទ្ធិរបស់ខ្ញុំ ដូច្នេះ ពួកយើងត្រូវទៅចាប់យក!”។ ប៉ុន្តែ ព្រះ‌អម្ចាស់គង់នៅក្នុងស្រុកនោះ។ ១១ យើងជាព្រះដ៏មានជីវិតគង់នៅ! យើងដាក់ទោសអ្នកតាមកំហឹង ចិត្តច្រណែន និងចិត្តស្អប់ ដែលអ្នកសម្ដែងចំពោះពួកគេ។ នៅពេលយើងវិនិច្ឆ័យទោសអ្នក យើងនឹងសម្ដែងឲ្យពួកគេស្គាល់យើង - នេះជាព្រះ‌បន្ទូលរបស់ព្រះ‌ជា‌អម្ចាស់។ ១២ អ្នកនឹងទទួលស្គាល់ថា យើងជាព្រះ‌អម្ចាស់ យើងឮពាក្យទាំងប៉ុន្មានដែលអ្នកជេរប្រមាថអ៊ីស្រា‌អែល គឺអ្នកពោលថា “ពួកវាវិនាសអន្តរាយអស់ហើយ! ពួកយើងចាប់យកស្រុករបស់ពួកវាបាន!”។ ១៣ អ្នករាល់គ្នាអួតបំប៉ោងពោលពាក្យព្រហើនកោង‌កាចដាក់យើង គឺយើងបានឮផ្ទាល់នឹងត្រចៀក។ ១៤ ហេតុនេះ យើងដែលជាព្រះ‌ជា‌អម្ចាស់ យើងប្រាប់អ្នកថា នៅពេលនគរទាំងប៉ុន្មានសប្បាយរីក‌រាយ យើងនឹងធ្វើឲ្យអ្នកសោកសង្រេង។ ១៥ ដោយអ្នកសប្បាយរីក‌រាយ នៅពេលឃើញពូជ‌ពង្សអ៊ីស្រា‌អែល ជាប្រជា‌រាស្ដ្ររបស់យើង សោកសង្រេង យើងក៏នឹងធ្វើឲ្យអ្នកធ្លាក់ខ្លួនវេទនាយ៉ាងនោះដែរ។ ភ្នំសៀរអើយ អ្នក និងស្រុកអេដុមទាំងមូល មុខជាត្រូវវិនាស។ ពេលនោះ គេនឹងទទួលស្គាល់ថា យើងពិតជាព្រះ‌អម្ចាស់។

អ៊ីស្រា‌អែលនឹងកាន់កាប់ស្រុករបស់ខ្លួនវិញ

១ កូនមនុស្សអើយ ចូរថ្លែងពាក្យក្នុងនាមយើង ស្តីអំពីភ្នំទាំង‌ឡាយនៅស្រុកអ៊ីស្រា‌អែល ដូចតទៅ:

ភ្នំទាំង‌ឡាយនៅស្រុកអ៊ីស្រា‌អែលអើយ ចូរស្ដាប់ព្រះ‌បន្ទូលរបស់ព្រះ‌អម្ចាស់! ២ ព្រះ‌ជា‌អម្ចាស់មានព្រះ‌បន្ទូលដូចតទៅ: ខ្មាំងសត្រូវបានចំអកឲ្យអ្នក គេពោលថា “ភ្នំដ៏ស្ថិត‌ស្ថេរអស់កល្ប‌ជានិច្ចនេះបានមកជាកម្ម‌សិទ្ធិរបស់យើងហើយ!”។ ៣ ហេតុនេះ ចូរថ្លែងពាក្យក្នុងនាមយើងចុះ! ចូរពោលថា ព្រះ‌ជា‌អម្ចាស់មានព្រះ‌បន្ទូលដូចតទៅ: ខ្មាំងសត្រូវបានបំផ្លាញ និងត្របាក់លេបអ្នករាល់គ្នាពីគ្រប់ទិស‌ទី អ្នករាល់គ្នាក្លាយទៅជាកម្ម‌សិទ្ធិរបស់ប្រជា‌ជាតិនានា ពួកគេយករឿងអ្នកទៅនិយាយលេងសើចជាមួយគ្នា។ ៤ ហេតុនេះ ភ្នំទាំង‌ឡាយនៅស្រុកអ៊ីស្រា‌អែលអើយ ចូរស្ដាប់ព្រះ‌បន្ទូលរបស់ព្រះ‌ជា‌អម្ចាស់! ព្រះ‌ជា‌អម្ចាស់មានព្រះ‌បន្ទូលថា: ភ្នំតូច ភ្នំធំ ជ្រលងដងអូរ ហើយក្រុងដែលនៅសល់តែគំនរបាក់បែក និងក្រុងដែលគេបោះបង់ចោលអើយ ប្រជា‌ជាតិនានានៅជុំ‌វិញនាំគ្នាប្លន់កម្ទេច និងចំអកឡក‌ឡឺយឲ្យអ្នក។ ៥ ព្រះ‌ជា‌អម្ចាស់មានព្រះ‌បន្ទូលថា: ដោយយើងស្រឡាញ់អ្នករាល់គ្នាយ៉ាងខ្លាំងបំផុតនោះ យើងនិយាយប្រឆាំងនឹងប្រជា‌ជាតិឯទៀតៗ ជាពិសេសប្រឆាំងនឹងស្រុកអេដុមទាំងមូល ព្រោះពួកគេបានចាប់យកទឹកដីយើងទៅធ្វើជាកម្ម‌សិទ្ធិរបស់ខ្លួន។ ពួកគេសប្បាយចិត្តរឹបអូស និងបំផ្លាញស្រុកនេះឥតត្រាប្រណីឡើយ។ ៦ ហេតុនេះ ចូរថ្លែងពាក្យក្នុងនាមយើងស្តីអំពីទឹកដីអ៊ីស្រា‌អែល! ចូរប្រាប់ភ្នំតូច ភ្នំធំ និងជ្រលងដងអូរថា ព្រះ‌ជា‌អម្ចាស់មានព្រះ‌បន្ទូលដូចតទៅ: យើងនិយាយដោយចិត្តស្រឡាញ់ដ៏លើស‌លប់ចំពោះអ្នក ហើយដោយកំហឹងដ៏ខ្លាំងដែរ ព្រោះប្រជា‌ជាតិនានាបានធ្វើឲ្យអ្នករាល់គ្នាអាម៉ាស់។ ៧ ហេតុនេះ យើងជាព្រះ‌ជា‌អម្ចាស់ យើងលើកដៃសន្យាយ៉ាងឱឡា‌រិកថា ប្រជា‌ជាតិដែលនៅជុំ‌វិញអ្នករាល់គ្នា មុខជាទទួលយកការអាម៉ាស់នោះមិនខាន! ៨ រីឯភ្នំទាំង‌ឡាយនៅស្រុកអ៊ីស្រា‌អែលអើយ ដើមឈើរបស់អ្នករាល់គ្នានឹងបែកមែកសាខា បង្កើតផលផ្លែសម្រាប់អ៊ីស្រា‌អែលជាប្រជា‌រាស្ដ្ររបស់យើង ដ្បិតពួកគេជិតត្រឡប់មកវិញហើយ។ ៩ យើងបែរមករកអ្នករាល់គ្នា យើងកាន់ខាងអ្នករាល់គ្នា។ មានគេភ្ជួររាស់អ្នក និងសាបព្រោះឡើងវិញ។ ១០ យើងនឹងធ្វើឲ្យចំនួនមនុស្សនៅលើភ្នំនេះកើនឡើង គឺកូនចៅអ៊ីស្រា‌អែលទាំងមូល។ ក្រុងទាំង‌ឡាយនឹងមានមនុស្សរស់នៅ ហើយកន្លែងបាក់បែកទាំង‌ឡាយ ក៏នឹងត្រូវសង់ឡើងវិញដែរ។ ១១ យើងនឹងធ្វើឲ្យចំនួនមនុស្ស និងហ្វូងសត្វនៅលើភ្នំនេះកើនឡើង ហើយបង្កើតកូនពូនជាចៅ។ យើងនឹងធ្វើឲ្យប្រជាជនមានចំនួនច្រើន ដូចកាលពីមុន យើងនឹងឲ្យអ្នករាល់គ្នាបានចម្រុងចម្រើនលើសពីមុនទៅទៀត។ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌ជា‌អម្ចាស់មែន។ ១២ អ៊ីស្រា‌អែលជាប្រជា‌រាស្ដ្ររបស់យើងអើយ យើងនឹងនាំអ្នករាល់គ្នាឲ្យដើរនៅលើភ្នំនេះវិញ។ អ្នករាល់គ្នានឹងយកទឹកដីនេះធ្វើជាកម្ម‌សិទ្ធិ និងជាកេរ‌មត៌ក ទឹកដីនេះនឹងលែងធ្វើឲ្យអ្នករាល់គ្នាបាត់បង់កូនចៅទៀតហើយ»។

១៣ ព្រះ‌ជា‌អម្ចាស់មានព្រះ‌បន្ទូលដូចតទៅ៖ «គេតែងពោលថា “ស្រុកនេះបំផ្លាញជីវិតមនុស្ស ស្រុកនេះធ្វើឲ្យប្រជា‌ជាតិរបស់ខ្លួនបាត់បង់កូនចៅ”។ ១៤ ប៉ុន្តែ ពីពេលនេះទៅមុខ អ្នកលែងបំផ្លាញជីវិតមនុស្ស អ្នកលែងធ្វើឲ្យប្រជា‌ជាតិរបស់អ្នកបាត់បង់កូនចៅទៀតហើយ - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៥ យើងនឹងលែងឲ្យប្រជា‌ជាតិនានាប្រមាថមាក់‌ងាយអ្នក ជាតិសាសន៍ដទៃនឹងលែងធ្វើឲ្យអ្នកអាម៉ាស់មុខ អ្នកនឹងលែងធ្វើឲ្យប្រជា‌ជាតិរបស់អ្នកវិនាសទៀតដែរ»។

១៦ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ១៧ «កូនមនុស្សអើយ ពេលកូនចៅអ៊ីស្រា‌អែលរស់នៅលើទឹកដីរបស់ខ្លួននៅឡើយ ពួកគេធ្វើឲ្យទឹកដីនេះទៅជាសៅហ្មង ដោយ‌សារអំពើអាក្រក់ និងមារយាទថោកទាបរបស់ពួកគេ។ យើងចាត់ទុកមារយាទរបស់ពួកគេថាមិនបរិសុទ្ធ ដូចស្ត្រីក្នុងគ្រាមានសៅហ្មងដែរ។ ១៨ ពួកគេធ្វើឲ្យទឹកដីនេះទៅជាសៅហ្មង ដោយការបង្ហូរឈាម និងការថ្វាយ‌បង្គំព្រះក្លែង‌ក្លាយ ហេតុនេះហើយបានជាយើងជះកំហឹងរបស់យើងទៅលើពួកគេ។ ១៩ យើងបានកម្ចាត់‌កម្ចាយពួកគេ ឲ្យទៅនៅក្នុងចំណោមប្រជា‌ជាតិទាំង‌ឡាយ យើងបំបែកពួកគេ ឲ្យទៅរស់នៅតាមស្រុកនានា។ យើងដាក់ទោសពួកគេតាមអំពើអាក្រក់ និងតាមមារយាទថោកទាបរបស់ខ្លួន។ ២០ ពេលទៅដល់ស្រុករបស់ប្រជា‌ជាតិទាំង‌ឡាយ ពួកគេបានបង្អាប់‌បង្អោននាមដ៏‌វិសុទ្ធរបស់យើង ហើយម្ចាស់ស្រុកនិយាយអំពីពួកគេថា “ពួកនេះជាប្រជា‌រាស្ដ្ររបស់ព្រះ‌អម្ចាស់ ពួកគេចាកចេញពីស្រុករបស់ព្រះ‌អង្គមក”។ ២១ យើងចង់រក្សានាមដ៏‌វិសុទ្ធរបស់យើង ដែលកូនចៅអ៊ីស្រា‌អែលបានបង្អាប់‌បង្អោននៅក្នុងចំណោមប្រជា‌ជាតិទាំង‌ឡាយ ដែលពួកគេស្នាក់អាស្រ័យនៅជាមួយ។

២២ ហេតុនេះ ចូរប្រាប់ពូជ‌ពង្សអ៊ីស្រា‌អែលថា: ព្រះ‌ជា‌អម្ចាស់មានព្រះ‌បន្ទូលដូចតទៅ “ពូជ‌ពង្សអ៊ីស្រា‌អែលអើយ! យើងធ្វើដូច្នេះមិនមែនដោយយល់ដល់អ្នករាល់គ្នា គឺយល់ដល់នាមដ៏‌វិសុទ្ធរបស់យើង ដែលអ្នករាល់គ្នាបានបង្អាប់‌បង្អោន ក្នុងចំណោមប្រជា‌ជាតិទាំង‌ឡាយ ដែលអ្នករាល់គ្នាអាស្រ័យនៅជាមួយ។ ២៣ យើងនឹងសម្ដែងបារមីឲ្យប្រជា‌ជាតិនានាស្គាល់នាមដ៏‌វិសុទ្ធ*របស់យើង គឺនាមដែលអ្នករាល់គ្នាបានបង្អាប់‌បង្អោនក្នុងចំណោមប្រជា‌ជាតិទាំងនោះ។ ពេលណាយើងសម្ដែងភាពវិសុទ្ធរបស់យើង ក្នុងចំណោមអ្នករាល់គ្នាឲ្យប្រជា‌ជាតិទាំងនោះឃើញ ពេលនោះ ពួកគេនឹងទទួលស្គាល់ថា យើងពិតជាព្រះ‌អម្ចាស់ - នេះជាព្រះ‌បន្ទូលរបស់ព្រះ‌ជា‌អម្ចាស់។ ២៤ យើងនឹងយកអ្នករាល់គ្នាចេញពីចំណោមប្រជា‌ជាតិទាំង‌ឡាយ យើងនឹងប្រមូលអ្នករាល់គ្នាពីគ្រប់ស្រុកនាំត្រឡប់មកមាតុ‌ភូមិវិញ។ ២៥ យើងនឹងប្រោះទឹកដ៏បរិសុទ្ធលើអ្នករាល់គ្នា នោះអ្នករាល់គ្នានឹងបានបរិសុទ្ធ។ យើងនឹងជម្រះអ្នករាល់គ្នាឲ្យបានស្អាតបរិសុទ្ធ* ផុតពីអំពើសៅហ្មងទាំង‌ឡាយ លែងឲ្យអ្នករាល់គ្នាជាប់ចិត្តនឹងព្រះក្លែង‌ក្លាយទាំងប៉ុន្មាន។ ២៦ យើងនឹងប្រគល់ចិត្តគំនិតថ្មីឲ្យអ្នករាល់គ្នា ហើយដាក់វិញ្ញាណថ្មីក្នុងអ្នករាល់គ្នា។ យើងនឹងដកចិត្តរឹងដូចថ្មចេញពីអ្នករាល់គ្នា រួចឲ្យអ្នករាល់គ្នាមានចិត្តអាណិត‌អាសូរវិញ។ ២៧ យើងនឹងដាក់វិញ្ញាណរបស់យើងក្នុងអ្នករាល់គ្នា ដើម្បីឲ្យអ្នករាល់គ្នាអាចធ្វើតាមដំបូន្មាន ហើយកាន់តាមវិន័យរបស់យើង។ ២៨ អ្នករាល់គ្នានឹងរស់នៅក្នុងស្រុកដែលយើងបានប្រគល់ឲ្យដូន‌តាអ្នករាល់គ្នា អ្នករាល់គ្នានឹងធ្វើជាប្រជា‌រាស្ដ្ររបស់យើង ហើយយើងជាព្រះរបស់អ្នករាល់គ្នា។ ២៩ យើងនឹងសង្គ្រោះអ្នករាល់គ្នាឲ្យរួចផុតពីអំពើសៅហ្មងគ្រប់យ៉ាង យើងនឹងឲ្យអ្នករាល់គ្នាមានស្រូវយ៉ាងច្រើនបរិបូណ៌ គឺមិនឲ្យមានទុរ្ភិក្សទៀតទេ។ ៣០ យើងនឹងធ្វើឲ្យដើមឈើ និងស្រែចម្ការបង្កើតផលផ្លែជាច្រើន ដើម្បីកុំឲ្យអ្នករាល់គ្នារងគ្រោះដោយទុរ្ភិក្ស និងត្រូវអាម៉ាស់នៅចំពោះមុខប្រជា‌ជាតិនានា។ ៣១ ពេលនោះ អ្នករាល់គ្នានឹងនឹកឃើញអំពីកិរិយា‌មារយាទអាក្រក់ និងអំពើមិនគួរគប្បី ដែលអ្នករាល់គ្នាធ្លាប់ប្រព្រឹត្តកាលពីមុន ហើយអ្នករាល់គ្នានឹងនឹកខ្មាសខ្លួនឯង ព្រោះតែអំពើបាប និងអំពើគួរស្អប់ខ្ពើម ដែលអ្នករាល់គ្នាបានប្រព្រឹត្ត។ ៣២ តោងដឹងថា យើងធ្វើដូច្នេះមិនមែនមកពីយល់ដល់អ្នករាល់គ្នាទេ! ពូជ‌ពង្សអ៊ីស្រា‌អែលអើយ ចូរនឹកខ្មាស និងអៀនខ្លួនចំពោះកិរិយា‌មារយាទរបស់ខ្លួនទៅ!” - នេះជាព្រះ‌បន្ទូលរបស់ព្រះ‌ជា‌អម្ចាស់»។

៣៣ ព្រះ‌ជា‌អម្ចាស់មានព្រះ‌បន្ទូលថា៖ «នៅថ្ងៃដែលយើងជម្រះអ្នករាល់គ្នាឲ្យបានបរិសុទ្ធ រួចផុតពីអំពើបាបទាំងប៉ុន្មានរបស់ខ្លួនហើយ យើងនឹងឲ្យមានប្រជាជនរស់នៅសាជាថ្មីក្នុងក្រុងនានា ហើយគេនឹងសង់ផ្ទះនៅត្រង់កន្លែងបាក់បែកនោះឡើងវិញ។ ៣៤ ដីដែលគេបោះបង់ចោលនឹងមានដំណាំដុះសាជាថ្មី អស់អ្នកដើរកាត់តាមនោះនឹងលែងឃើញដីដែលគេបោះបង់ចោលទៀតហើយ។ ៣៥ ពួកគេនឹងពោលថា ស្រុកដែលគេបោះបង់ចោលនេះ ត្រឡប់ជាមានសោភ័ណ‌ភាពដូចសួនឧទ្យានអេដែន ក្រុងដែលបាក់បែក ហើយស្ងាត់ជ្រងំនេះនឹងត្រូវសង់ឡើងវិញ ដោយមានកំពែងរឹង‌មាំ ព្រមទាំងមានប្រជាជនរស់នៅផង។ ៣៦ ប្រជា‌ជាតិនានាដែលនៅជុំ‌វិញអ្នករាល់គ្នានឹងទទួលស្គាល់ថា យើងជាព្រះ‌អម្ចាស់ អ្វីៗដែលបាក់បែក យើងនឹងសង់ឡើងវិញ ហើយយើងក៏ដាំដំណាំសាជាថ្មី នៅលើដីដែលគេបោះបង់ដែរ»។ យើងជាព្រះ‌អម្ចាស់ យើងនិយាយយ៉ាងណា យើងនឹងធ្វើយ៉ាងនោះ។

៣៧ ព្រះ‌ជា‌អម្ចាស់មានព្រះ‌បន្ទូលថា៖ «យើងនឹងទុកឲ្យពូជ‌ពង្សអ៊ីស្រា‌អែលហៅរកយើងតទៅទៀត យើងនឹងជួយពួកគេ ដោយធ្វើឲ្យពួកគេកើនចំនួនច្រើនឡើង។ ៣៨ ក្រុងនានាដែលនៅសល់តែគំនរបាក់បែក នឹងមានមនុស្សរស់នៅយ៉ាងច្រើន ដូចចំនួនសត្វដែលគេនាំយកទៅធ្វើយញ្ញ‌បូជានៅក្រុងយេរូ‌សាឡឹម ក្នុងពិធីបុណ្យដ៏សំខាន់ៗកាលពីដើម។ ពេលនោះ គេនឹងទទួលស្គាល់ថា យើងពិតជាព្រះ‌អម្ចាស់មែន»។

និមិត្តហេតុអស្ចារ្យអំពីឆ្អឹងខ្មោចដែលរស់ឡើងវិញ

១ ព្រះ‌អម្ចាស់ដាក់ព្រះ‌ហស្ដលើខ្ញុំ ព្រះ‌វិញ្ញាណរបស់ព្រះ‌អង្គនាំខ្ញុំទៅដាក់កណ្ដាលជ្រលងភ្នំមួយ ដែលមានឆ្អឹងខ្មោចពាស‌ពេញ។ ២ ព្រះ‌អង្គនាំខ្ញុំដើរចុះឡើងក្បែរឆ្អឹងទាំងនោះ។ ក្នុងជ្រលងភ្នំមានឆ្អឹងច្រើនណាស់ ហើយសុទ្ធតែស្ងួតហួត‌ហែងទាំងអស់។ ៣ ព្រះ‌អម្ចាស់មានព្រះ‌បន្ទូលមកខ្ញុំថា៖ «កូនមនុស្សអើយ! តើឆ្អឹងទាំងនេះអាចរស់មកជាមនុស្សវិញបានឬទេ?»។ ខ្ញុំទូលតបថា៖ «បពិត្រព្រះ‌ជា‌អម្ចាស់មានតែព្រះ‌អង្គទេដែលជ្រាប»។ ៤ ព្រះ‌អង្គមានព្រះ‌បន្ទូលមកខ្ញុំថា៖ «ចូរថ្លែងពាក្យក្នុងនាមយើងប្រាប់ឆ្អឹងទាំងនេះថា: ឆ្អឹងដ៏ស្ងួតអើយ ចូរស្ដាប់ព្រះ‌បន្ទូលរបស់ព្រះ‌អម្ចាស់! ៥ ព្រះ‌ជា‌អម្ចាស់មានព្រះ‌បន្ទូលថា “យើងនឹងបញ្ចូលខ្យល់ដង្ហើមក្នុងអ្នករាល់គ្នា នោះអ្នករាល់គ្នានឹងរស់ឡើង។ ៦ យើងនឹងឲ្យអ្នករាល់គ្នាមានសរសៃត‌ភ្ជាប់គ្នា ហើយមានសាច់ដុះពីលើ ព្រមទាំងមានស្បែករុំពីក្រៅផង។ យើងនឹងដាក់ខ្យល់ដង្ហើមក្នុងអ្នករាល់គ្នា ដើម្បីឲ្យអ្នករាល់គ្នាមានជីវិត ហើយពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់”»។

៧ ខ្ញុំក៏ថ្លែងព្រះ‌បន្ទូលតាមបញ្ជារបស់ព្រះ‌អង្គ។ ក្នុងពេលដែលខ្ញុំកំពុងនិយាយនោះ ស្រាប់តែមានឮស្នូរសំឡេង គឺឆ្អឹងទាំងអស់កម្រើកចូលជិតគ្នាទៅវិញទៅមក។ ៨ ខ្ញុំសង្កេតឃើញមានសរសៃនៅលើឆ្អឹង ហើយសាច់ដុះពីលើ រួចមានស្បែករុំស្រោបផង ប៉ុន្តែ មិនទាន់មានខ្យល់ដង្ហើមនៅឡើយទេ។ ៩ ព្រះ‌អម្ចាស់មានព្រះ‌បន្ទូលមកខ្ញុំថា៖ «កូនមនុស្សអើយ! ចូរថ្លែងពាក្យក្នុងនាមយើងប្រាប់ខ្យល់ដង្ហើម! ចូរប្រាប់ខ្យល់ដង្ហើមថា ព្រះ‌ជា‌អម្ចាស់មានព្រះ‌បន្ទូលដូចតទៅ: ខ្យល់ដង្ហើមអើយ! សូមបក់មកពីទិសទាំងបួន! ហើយផ្លុំលើសាក‌សពទាំងនេះឲ្យមានជីវិតរស់ឡើង»។ ១០ ខ្ញុំថ្លែងព្រះ‌បន្ទូលតាមបញ្ជារបស់ព្រះ‌អម្ចាស់។ ខ្យល់ដង្ហើមក៏ចូលមកក្នុងពួកគេ ពួកគេក៏មានជីវិត ហើយក្រោកឈរឡើង ទៅជាកង‌ទ័ពមួយដែលមានចំនួនយ៉ាងច្រើនឥតគណនា។

១១ ព្រះ‌អង្គមានព្រះ‌បន្ទូលមកខ្ញុំថា៖ «កូនមនុស្សអើយ! ឆ្អឹងទាំងអស់នេះជាពូជ‌ពង្សអ៊ីស្រា‌អែលទាំងមូល។ ពួកគេតែងពោលថា “ឆ្អឹងរបស់យើងស្ងួតហួត‌ហែងអស់ យើងផុតសង្ឃឹមហើយ! យើងវិនាសហើយ!” ១២ ហេតុនេះ ចូរថ្លែងពាក្យក្នុងនាមយើងប្រាប់គេថា ព្រះ‌ជា‌អម្ចាស់មានព្រះ‌បន្ទូលដូចតទៅ: ប្រជា‌រាស្ដ្ររបស់យើងអើយ! យើងនឹងបើកផ្នូររបស់អ្នករាល់គ្នា ហើយនាំអ្នករាល់គ្នាឡើងពីផ្នូរនោះ បន្ទាប់មក យើងនឹងនាំអ្នករាល់គ្នាត្រឡប់ទៅកាន់ទឹកដីអ៊ីស្រា‌អែលវិញ។ ១៣ ប្រជា‌រាស្ដ្ររបស់យើងអើយ! ពេលយើងបើកផ្នូរ ហើយនាំអ្នករាល់គ្នាឡើងមក នោះអ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន។ ១៤ យើងនឹងដាក់វិញ្ញាណរបស់យើងក្នុងអ្នករាល់គ្នា ដើម្បីឲ្យអ្នករាល់គ្នាមានជីវិត។ យើងនឹងនាំអ្នករាល់គ្នាទៅតាំងទីលំ‌នៅលើទឹកដីរបស់ខ្លួនវិញ ពេលនោះ អ្នករាល់គ្នានឹងទទួលស្គាល់ថា យើងពិតជាព្រះ‌អម្ចាស់មែន។ យើងនិយាយយ៉ាងណាយើងនឹងធ្វើយ៉ាងនោះ» -នេះជាព្រះ‌បន្ទូលរបស់ព្រះ‌អម្ចាស់។

ព្រះ‌អម្ចាស់នឹងបង្រួប‌បង្រួមអ៊ីស្រា‌អែល និងយូដា ជានគរតែមួយ

១៥ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖ ១៦ «កូនមនុស្សអើយ! ចូរយកក្តារមួយបន្ទះមកសរសេរពីលើថា “កុល‌សម្ព័ន្ធយូដា និងកូនចៅអ៊ីស្រា‌អែល ជាដៃគូនឹងគ្នា”។ ចូរយកក្តារមួយបន្ទះទៀតមកសរសេរពីលើថា “យ៉ូសែប (គឺអេប្រា‌អ៊ីម) និងពូជ‌ពង្សអ៊ីស្រា‌អែលទាំងមូលជាដៃគូនឹងគ្នា”។ ១៧ បន្ទាប់មក ចូរយកក្តារទាំងពីរនោះមកដាក់ភ្ជាប់គ្នាជាបន្ទះតែមួយ នៅក្នុងដៃរបស់អ្នក។ ១៨ កាលណាប្រជាជនរបស់អ្នកសួរថា “សូមពន្យល់យើងខ្ញុំផង លោកធ្វើដូច្នេះមានន័យដូចម្ដេច?” ១៩ ត្រូវប្រាប់ពួកគេវិញថា “ព្រះ‌ជា‌អម្ចាស់មានព្រះ‌បន្ទូលថា បន្តិចទៀត យើងនឹងយកក្តារជាតំណាងយ៉ូសែប(គឺអេប្រា‌អ៊ីម) ព្រមទាំងកុល‌សម្ព័ន្ធអ៊ីស្រា‌អែលដែលនៅជាមួយគេ ទៅដាក់ភ្ជាប់នឹងក្តារជាតំណាងយូដា ហើយយើងនឹងផ្គុំក្តារទាំងពីរឲ្យទៅជាបន្ទះតែមួយ នៅក្នុងដៃរបស់យើង។ ២០ បន្ទះក្តារទាំងពីរដែលអ្នកសរសេរនោះ នឹងស្ថិតក្នុងដៃរបស់អ្នកនៅចំពោះមុខប្រជាជនទាំងអស់”។ ២១ ចូរប្រាប់ពួកគេថា ព្រះ‌ជា‌អម្ចាស់មានព្រះ‌បន្ទូលដូចតទៅ: យើងនឹងយកជនជាតិអ៊ីស្រា‌អែលចេញពីចំណោមប្រជា‌ជាតិនានាដែលពួកគេទៅរស់នៅ។ យើងនឹងប្រមូលពួកគេពីគ្រប់ទិស‌ទី ហើយនាំពួកគេវិលត្រឡប់មកទឹកដីរបស់ខ្លួនវិញ។ ២២ យើងនឹងបង្រួប‌បង្រួមពួកគេជាប្រជា‌ជាតិតែមួយ នៅក្នុងស្រុក និងនៅលើភ្នំនៃស្រុកអ៊ីស្រា‌អែល។ ពេលនោះ ពួកគេទាំងអស់គ្នានឹងមានស្តេចតែមួយ គឺពួកគេលែងជាប្រជា‌ជាតិពីរ ហើយបាក់បែកគ្នាជារាជាណាចក្រពីរទៀតដែរ។ ២៣ ពួកគេនឹងលែងប្រព្រឹត្តអំពើសៅហ្មង ដោយគោរពព្រះក្លែង‌ក្លាយគួរស្អប់ខ្ពើម និងលែងបះ‌បោរប្រឆាំងនឹងយើងទៀតហើយ។ យើងនឹងរំដោះពួកគេឲ្យចេញផុតពីគ្រប់កន្លែងដែលពួកគេរស់នៅ និងជាកន្លែងដែលពួកគេបានប្រព្រឹត្តអំពើបាប។ យើងនឹងជម្រះពួកគេឲ្យបរិសុទ្ធ ពួកគេនឹងទៅជាប្រជា‌រាស្ដ្ររបស់យើង ហើយយើងនឹងទៅជាព្រះរបស់ពួកគេ។ ២៤ ពេលនោះ ដាវីឌជាអ្នកបម្រើរបស់យើងនឹងគ្រងរាជ្យលើពួកគេ ហើយពួកគេនឹងមានគង្វាលតែមួយគត់។ ពួកគេនឹងប្រព្រឹត្តតាមវិន័យរបស់យើង ពួកគេនឹងគោរព ហើយប្រតិបត្តិតាមដំបូន្មានរបស់យើងទៀតផង។ ២៥ ពួកគេនឹងរស់នៅក្នុងស្រុកដែលយើងបានប្រគល់ឲ្យយ៉ាកុប ជាអ្នកបម្រើរបស់យើង គឺជាស្រុកដែលដូន‌តារបស់ពួកគេធ្លាប់រស់នៅកាលពីដើម។ ពួកគេ ព្រមទាំងកូនចៅរបស់ពួកគេនឹងរស់នៅក្នុងស្រុកនោះរហូត ហើយដាវីឌជាអ្នកបម្រើរបស់យើង នឹងគ្រប់‌គ្រងលើពួកគេតរៀងទៅ។ ២៦ យើងនឹងចងសម្ពន្ធ‌មេត្រី ដែលផ្តល់សេចក្ដីសុខ‌សាន្តជាមួយពួកគេ គឺជាសម្ពន្ធ‌មេត្រីស្ថិត‌ស្ថេរអស់កល្ប‌ជានិច្ច។ យើងនឹងឲ្យពួកគេរស់នៅក្នុងស្រុករបស់ខ្លួនវិញ ឲ្យពួកគេកើនចំនួនច្រើនឡើង ហើយយើងនឹងតាំងទី‌សក្ការៈរបស់យើងនៅក្នុងចំណោមពួកគេរហូតតទៅ។ ២៧ ដំណាក់របស់យើងនឹងស្ថិតនៅជាមួយពួកគេ យើងនឹងទៅជាព្រះរបស់ពួកគេ ហើយពួកគេទៅជាប្រជា‌រាស្ដ្ររបស់យើង។ ២៨ ពេលដែលទី‌សក្ការៈរបស់យើង ស្ថិតនៅជាមួយពួកគេរហូតតទៅនោះ ប្រជា‌ជាតិនានានឹងទទួលស្គាល់ថា យើងជាព្រះ‌អម្ចាស់ដែលបានប្រោសជនជាតិអ៊ីស្រា‌អែលឲ្យទៅជាប្រជាជនដ៏‌វិសុទ្ធ*»។

ព្រះ‌បន្ទូលប្រឆាំងនឹងស្តេចកូក

១ ព្រះ‌អម្ចាស់មានព្រះ‌បន្ទូលមកខ្ញុំដូចតទៅ៖

២ «កូនមនុស្សអើយ ចូរបែរមុខទៅរកស្តេចកូកនៅស្រុកម៉ាកូក ជាមេគ្រប់‌គ្រងលើទឹកដីមេសេក និងទូបាល ហើយថ្លែងប្រាប់ស្តេចនោះក្នុងនាមយើងថា: ៣ ព្រះ‌ជា‌អម្ចាស់មានព្រះ‌បន្ទូលដូចតទៅ: កូកដែលជាមេគ្រប់‌គ្រងលើទឹកដីមេសេក និងទូបាលអើយ យើងប្រឆាំងនឹងអ្នកហើយ! ៤ យើងនឹងបង្ខំអ្នក យកបង្ហៀរមកដាក់ក្នុងមាត់អ្នក យើងនឹងនាំអ្នក កង‌ទ័ពទាំងមូលរបស់អ្នក សេះ និងទ័ព‌សេះដែលប្រដាប់ខ្លួនយ៉ាងល្អឥតខ្ចោះ ព្រមទាំងទាហានយ៉ាងច្រើនដែលកាន់ខែលតូចធំ ហើយប្រសប់ប្រើដាវទាំងអស់គ្នា។ ៥ សាសន៍ពែរ្ស អេត្យូ‌ពី និងពូថ ដែលប្រដាប់ខ្លួនដោយខែល និងមួកដែក ក៏មកជាមួយដែរ។ ៦ សាសន៍កូមែរ និងកង‌ពលរបស់គេទាំងមូល ព្រមទាំងសាសន៍បេត-តូកា‌ម៉ា ដែលនៅទីដាច់ស្រយាលនាទិសខាងជើង និងកង‌ពលរបស់គេទាំងមូល គឺមានកង‌ទ័ពរបស់ប្រជា‌ជាតិយ៉ាងច្រើនមកជាមួយអ្នក។ ៧ ចូរអ្នក និងទាហានដែលនៅជាមួយអ្នក រៀប‌ចំខ្លួនប្រុងប្រៀបជាស្រេច ក្រោមបញ្ជារបស់អ្នក។ ៨ នៅពេលអនាគត គឺនៅគ្រាចុងក្រោយបំផុត យើងនឹងចាត់អ្នកឲ្យចេញទៅច្បាំងយកស្រុកអ៊ីស្រា‌អែល។ ប្រជាជននៅស្រុកនោះបានគេចផុតពីមុខដាវ ហើយចាកចេញពីចំណោមប្រជា‌ជាតិជាច្រើន មកប្រមូលផ្តុំគ្នានៅលើភ្នំនានានៃស្រុកអ៊ីស្រា‌អែល ជាកន្លែងដ៏ស្ងាត់ជ្រងំយូរឆ្នាំមកហើយ។ ក្រោយពេលចាកចេញពីចំណោមជាតិសាសន៍នានាមក ពួកគេរស់នៅយ៉ាងសុខ‌សាន្តទាំងអស់គ្នា ក្នុងស្រុករបស់ខ្លួន។ ៩ អ្នកនឹងឡើងទៅវាយលុកស្រុកនោះដូចខ្យល់ព្យុះសង្ឃរា អ្នក និងកង‌ពលទាំងមូលរបស់អ្នក ព្រមទាំងជាតិសាសន៍ជាច្រើនដែលនៅជាមួយអ្នក នឹងប្រៀបបីដូចជាពពកគ្របបាំងពីលើស្រុក»។

១០ ព្រះ‌ជា‌អម្ចាស់មានព្រះ‌បន្ទូលទៀតថា៖ «នៅគ្រានោះ អ្នកនឹងមានចិត្តអួតបំប៉ោង ហើយរៀប‌ចំផែន‌ការអាក្រក់។ ១១ អ្នកពោលថា “ខ្ញុំនឹងឡើងទៅវាយយកស្រុកដែលគ្មាននរណាការ‌ពារ ខ្ញុំនឹងវាយប្រហារអ្នកស្រុកដែលរស់នៅដោយឥតភ័យបារម្ភ ហើយក្រុងរបស់គេគ្មានកំពែង គ្មានទ្វារ ឬរនុកឡើយ។ ១២ ខ្ញុំនឹងរឹបអូសយកជ័យ‌ភ័ណ្ឌរបស់ពួកគេ ខ្ញុំនឹងចាប់យកស្រុកដែលពីមុនជាគំនរបាក់បែក តែឥឡូវនេះ មានប្រជាជនរស់នៅ គឺប្រជាជនដែលចាកចេញពីចំណោមប្រជា‌ជាតិនានា ពួកគេមានហ្វូងសត្វ និងទ្រព្យ‌សម្បត្តិ ហើយរស់នៅចំកណ្ដាលផែន‌ដី”។ ១៣ ជនជាតិសេបា ជនជាតិដេដាន់ អ្នកជំនួញពីស្រុកតារស៊ីស និងមេដឹកនាំរបស់ពួកគេនឹងពោលមកអ្នកថា “តើព្រះ‌រាជាយាងមកចាប់យកជ័យ‌ភ័ណ្ឌឬ? តើព្រះ‌រាជាលើកកង‌ទ័ពមកយ៉ាងច្រើនដូច្នេះ ដើម្បីប្លន់ស្រុកនេះ រឹប‌អូសយកមាសប្រាក់ ហ្វូងសត្វ និងទ្រព្យ‌សម្បត្តិដែលជាជ័យ‌ភ័ណ្ឌដ៏ច្រើនឬ?”»។

១៤ កូនមនុស្សអើយ ចូរថ្លែងពាក្យក្នុងនាមយើង ប្រាប់ស្តេចកូកដូចតទៅ៖ «ព្រះ‌ជា‌អម្ចាស់មានព្រះ‌បន្ទូលថា: នៅថ្ងៃដែលអ៊ីស្រា‌អែល ជាប្រជា‌រាស្ដ្ររបស់យើង កំពុងរស់នៅយ៉ាងសុខ‌សាន្តនោះ អ្នកក៏បានទទួលដំណឹង ១៥ ហើយចាកចេញពីស្រុករបស់ខ្លួន ដែលស្ថិតនៅទីដាច់ស្រយាលនាទិសខាងជើង អ្នកនឹងនាំកង‌ទ័ពដ៏ច្រើនឥតគណនាជិះសេះមក ១៦ ដូចជាពពកគ្របបាំងពីលើស្រុកវាយប្រហារអ៊ីស្រា‌អែល ជាប្រជា‌រាស្ដ្ររបស់យើង ហេតុ‌ការណ៍ទាំងនេះនឹងកើតមាន នៅគ្រាអវសាន‌កាលនៃពិភព‌លោក។ កូកអើយ យើងនឹងនាំអ្នកមកវាយលុកស្រុករបស់យើង។ ពេលណាយើងបង្ហាញភាពដ៏‌វិសុទ្ធរបស់យើង តាម‌រយៈអ្នក នៅចំពោះមុខប្រជា‌ជាតិទាំង‌ឡាយ នោះពួកគេនឹងស្គាល់យើង»។

១៧ ព្រះ‌ជា‌អម្ចាស់មានព្រះ‌បន្ទូលថា៖ «ពីដើម យើងបាននិយាយអំពីអ្នក តាម‌រយៈអ្នកបម្រើរបស់យើង គឺពួកព្យាការីរបស់ជនជាតិអ៊ីស្រា‌អែល។ នៅគ្រានោះ ពួកគេបានថ្លែងពាក្យក្នុងនាមយើងជាច្រើនឆ្នាំថា យើងនឹងនាំអ្នកមកវាយប្រហារប្រជា‌រាស្ដ្ររបស់យើង។ ១៨ ក៏ប៉ុន្តែ នៅថ្ងៃនោះ គឺថ្ងៃដែលកូកមកវាយលុកទឹកដីអ៊ីស្រា‌អែល យើងក្ដៅចិត្តជាខ្លាំង - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៩ ដោយចិត្តប្រច័ណ្ឌ និងដោយចិត្តឆេះ‌ឆួល យើងក៏ប្រកាសថា នៅថ្ងៃនោះមុខជាមានរញ្ជួយផែន‌ដីយ៉ាងខ្លាំងនៅស្រុកអ៊ីស្រា‌អែល។ ២០ ត្រីនៅក្នុងសមុទ្រ បក្សា‌បក្សីដែលហើរនៅលើមេឃ សត្វព្រៃ សត្វលូនវារ និងមនុស្សទាំងអស់ដែលរស់នៅលើផែន‌ដី នឹងភ័យញាប់‌ញ័រនៅចំពោះមុខយើង។ ភ្នំទាំង‌ឡាយនឹងត្រូវរលាយ រីឯផ្ទាំងថ្ម ព្រមទាំងកំពែងទាំងប៉ុន្មាន ក៏នឹងត្រូវរលំដែរ។ ២១ យើងនឹងធ្វើឲ្យមានការកាប់សម្លាប់គ្នា ក្នុងជួរទ័ពរបស់ស្តេចកូក នៅលើភ្នំទាំងប៉ុន្មានរបស់យើង - នេះជាព្រះ‌បន្ទូលរបស់ព្រះ‌ជា‌អម្ចាស់។ ពេលនោះ ម្នាក់ៗនឹងលើកដាវកាប់បង‌ប្អូនរបស់ខ្លួន។ ២២ យើងនឹងប្រើជំងឺរាត‌ត្បាត និងការបង្ហូរឈាមដាក់ទោសស្តេចនេះ។ យើងធ្វើឲ្យមានព្រឹល និងភ្លៀងធ្លាក់ចុះមកយ៉ាងខ្លាំង ហើយធ្វើឲ្យមានភ្លើង និងស្ពាន់ធ័រធ្លាក់មកលើស្តេចនោះ ព្រមទាំងកង‌ទ័ព និងជាតិសាសន៍ដ៏ច្រើនដែលនៅជាមួយ។ ២៣ យើងនឹងសម្ដែងឲ្យប្រជា‌ជាតិទាំង‌ឡាយឃើញថា យើងជាព្រះដ៏ឧត្តុង្គ‌ឧត្ដម និងជាព្រះដ៏‌វិសុទ្ធ។ ដូច្នេះ ពួកគេនឹងទទួលស្គាល់ថា យើងពិតជាព្រះ‌អម្ចាស់មែន»។

បរា‌ជ័យរបស់ស្តេចកូក

១ «កូនមនុស្សអើយ ចូរថ្លែងពាក្យក្នុងនាមយើង ប្រឆាំងនឹងស្តេចកូកថា ព្រះ‌ជា‌អម្ចាស់មានព្រះ‌បន្ទូលដូចតទៅ: កូកជាមេគ្រប់‌គ្រងលើទឹកដីមេសេក និងទូបាលអើយ យើងប្រឆាំងនឹងអ្នកហើយ! ២ យើងនឹងបង្ខំអ្នក ហើយនាំអ្នកចាកចេញពីទីដាច់ស្រយាលនាទិសខាងជើង ឆ្ពោះមកភ្នំនៃស្រុកអ៊ីស្រា‌អែល។ ៣ យើងនឹងវាយបំបាក់ធ្នូដែលអ្នកកាន់នៅដៃឆ្វេង ហើយជម្រុះព្រួញពីដៃស្តាំរបស់អ្នក។ ៤ អ្នក និងទាហាន ព្រមទាំងជាតិសាសន៍ទាំង‌ឡាយដែលនៅជាមួយអ្នក នឹងដួលស្លាប់នៅលើភ្នំអ៊ីស្រា‌អែល ក្លាយទៅជាចំណីរបស់សត្វសាហាវ ត្មាត និងសត្វព្រៃគ្រប់ប្រភេទ។ ៥ អ្នកនឹងដួលស្លាប់នៅតាមទីវាល ដូចយើងបានថ្លែងទុកស្រាប់ - នេះជាព្រះ‌បន្ទូលរបស់ព្រះ‌ជា‌អម្ចាស់។ ៦ យើងនឹងបញ្ជូនភ្លើងទៅបញ្ឆេះស្រុកម៉ាកូក និងនៅក្នុងចំណោមអស់អ្នកដែលរស់នៅដោយឥតភ័យបារម្ភតាមកោះនានា ហើយពួកគេនឹងទទួលស្គាល់ថាយើងជាព្រះ‌អម្ចាស់។ ៧ យើងនឹងធ្វើឲ្យអ៊ីស្រា‌អែល ជាប្រជា‌រាស្ដ្រយើង ស្គាល់នាមដ៏‌វិសុទ្ធរបស់យើង ហើយយើងមិនបណ្តោយឲ្យពួកគេប្រមាថនាមដ៏‌វិសុទ្ធរបស់យើងទៀតហើយ។ ប្រជា‌ជាតិនានានឹងទទួលស្គាល់ថា យើងជាព្រះ‌អម្ចាស់ ជាព្រះដ៏‌វិសុទ្ធរបស់ជនជាតិអ៊ីស្រា‌អែល។

៨ មើល៍ ហេតុ‌ការណ៍ទាំងនោះ គឺថ្ងៃដែលយើងបានប្រកាសទុក កំពុងតែសម្រេចជារូបរាងហើយ - នេះជាព្រះ‌បន្ទូលរបស់ព្រះ‌ជា‌អម្ចាស់។ ៩ ពេលនោះ ប្រជាជនរបស់ក្រុងនានានៃស្រុកអ៊ីស្រា‌អែលនឹងនាំគ្នាចេញទៅដុតកម្ទេចគ្រឿងអាវុធ និងខែលតូចធំ ព្រមទាំងស្ន និងលំពែង។ ពួកគេប្រើគ្រឿងសាស្ត្រា‌វុធទាំងនោះសម្រាប់ដុតអស់‌រយៈពេលប្រាំពីរឆ្នាំ ១០ គឺពួកគេមិនយកឈើពីទីវាល ឬកាប់ដើមឈើពីព្រៃ មកធ្វើជាអុសឡើយ ដ្បិតពួកគេប្រើគ្រឿងសាស្ត្រា‌វុធទាំងនោះ ដើម្បីដុត។ ពួកគេនឹងចាប់អស់អ្នកដែលបានចាប់ពួកគេទៅជាឈ្លើយ យកមកធ្វើជាឈ្លើយ ហើយរឹបអូសយកទ្រព្យ‌សម្បត្តិ ពីអស់អ្នក ដែលបានរឹបអូសយកទ្រព្យ‌សម្បត្តិរបស់ពួកគេនោះមកវិញដែរ -នេះជាព្រះ‌បន្ទូលរបស់ព្រះ‌ជា‌អម្ចាស់។

១១ នៅថ្ងៃនោះ យើងនឹងប្រគល់កន្លែងមួយក្នុងស្រុកអ៊ីស្រា‌អែល សម្រាប់បញ្ចុះសពស្តេចកូក គឺនៅជ្រលងភ្នំ អ្នកដំណើរដែលស្ថិតនៅខាងកើតសមុទ្រ។ គេនឹងបញ្ចុះសពស្តេចកូក និងពល‌ទ័ពដ៏ច្រើនរបស់ខ្លួននៅទីនោះ ហើយឃាំងផ្លូវអ្នកដំណើរមិនឲ្យឆ្លងកាត់តាមនោះទៀត។ គេនឹងដាក់ឈ្មោះជ្រលងភ្នំនោះថា “ជ្រលងភ្នំកង‌ពលស្តេចកូក”។ ១២ កូនចៅអ៊ីស្រា‌អែលនឹងចំណាយពេលប្រាំពីរខែ សម្រាប់បញ្ចុះសពពួកគេ ដើម្បីជម្រះស្រុកឲ្យបរិសុទ្ធ។ ១៣ ប្រជាជនទាំងមូលនៅក្នុងស្រុកនឹងបញ្ចុះសពពួកគេ ហើយនៅថ្ងៃយើងសម្ដែងសិរី‌រុងរឿង ប្រជាជនទាំងនោះនឹងខ្ពស់មុខ - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៤ គេនឹងយកមនុស្សមួយចំនួនទុកដោយឡែក សម្រាប់ចំណាយពេលទាំងស្រុងធ្វើដំណើរឆ្លងកាត់ស្រុក។ អ្នកទាំងនោះប្រមូលសាក‌សពដែលនៅសល់ក្នុងស្រុកយកទៅបញ្ចុះ ដោយមានអ្នកដំណើរជួយផង។ ពួកគេចំណាយពេលប្រាំពីរខែ ប្រមូលសាក‌សព ដើម្បីជម្រះទឹកដីឲ្យបរិសុទ្ធ។ ១៥ ពេលអ្នកទាំងនោះធ្វើដំណើរឆ្លងកាត់ស្រុក បើមាននរណាម្នាក់ឃើញឆ្អឹងខ្មោច គេដាក់ថ្មចំណាំនៅក្បែរនោះ ទុកឲ្យពួកអ្នកជីករណ្ដៅមកប្រមូលទៅកប់នៅ “ជ្រលងភ្នំកង‌ពលស្តេចកូក”។ ១៦ “កង‌ពល”ក៏ជាឈ្មោះរបស់ក្រុងមួយដែរ។ នេះជារបៀបដែលគេជម្រះស្រុក។ ១៧ ចំណែកឯអ្នកវិញ កូនមនុស្សអើយ តោងប្រាប់សត្វស្លាបគ្រប់ប្រភេទ និងសត្វព្រៃទាំងអស់ថា “ចូរប្រមូលគ្នាមកពីគ្រប់ទីកន្លែង ដើម្បីចូលរួមក្នុងពិធីយញ្ញ‌បូជារបស់យើង គឺពិធីយញ្ញ‌បូជាយ៉ាងធំ ដែលយើងរៀប‌ចំនៅលើភ្នំនៃស្រុកអ៊ីស្រា‌អែលសម្រាប់អ្នករាល់គ្នា។ អ្នករាល់គ្នានឹងស៊ីសាច់ ហើយផឹកឈាម - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៨ អ្នករាល់គ្នានឹងស៊ីសាច់របស់ទាហានដ៏អង់‌អាច ហើយផឹកឈាមរបស់មេដឹកនាំទាំង‌ឡាយនៅលើផែន‌ដី ដែលយើងធ្វើយញ្ញ‌បូជាជំនួសចៀមឈ្មោល កូនចៀម ពពែឈ្មោល និងគោបាបំប៉ននៅស្រុកបាសាន។ ១៩ ក្នុងពេលយើងធ្វើយញ្ញ‌បូជា សម្រាប់អ្នករាល់គ្នា អ្នករាល់គ្នានឹងបរិភោគសាច់ដ៏ល្អៗរហូតដល់ឆ្អែត‌ឆ្អន់ អ្នករាល់គ្នាផឹកឈាមរហូតដល់ស្រវឹង។ ២០ ក្នុងពិធីជប់‌លៀងរបស់យើង អ្នករាល់គ្នានឹងស៊ីសាច់សេះ ស៊ីសាច់ទាហាន ទ័ព‌សេះ ទាហានដ៏អង់‌អាច និងអ្នកចម្បាំងទាំងប៉ុន្មាន”- នេះជាព្រះ‌បន្ទូលរបស់ព្រះ‌ជា‌អម្ចាស់។

២១ យើងនឹងសម្ដែងសិរី‌រុងរឿងរបស់យើងក្នុងចំណោមប្រជា‌ជាតិនានា ហើយប្រជា‌ជាតិទាំងអស់នឹងឃើញថា យើងវិនិច្ឆ័យទោសពួកគេ ដោយដៃរបស់យើងផ្ទាល់។ ២២ ចាប់ពីថ្ងៃនោះតទៅអនាគត កូនចៅអ៊ីស្រា‌អែលនឹងទទួលស្គាល់ថា យើងជាព្រះ‌អម្ចាស់ ជាព្រះរបស់ពួកគេ។ ២៣ ប្រជា‌ជាតិទាំង‌ឡាយនឹងទទួលស្គាល់ថា កូនចៅអ៊ីស្រា‌អែលត្រូវខ្មាំងកៀរទៅជាឈ្លើយដូច្នេះ ព្រោះតែពួកគេបានប្រព្រឹត្តអំពើបាប និងក្បត់ចិត្តយើង។ ហេតុនេះហើយបានជាយើងលែងរវី‌រវល់នឹងពួកគេ យើងបានប្រគល់ពួកគេទៅក្នុងកណ្ដាប់ដៃរបស់បច្ចា‌មិត្ត ដើម្បីឲ្យអ្នកទាំងនោះប្រហារជីវិតពួកគេទាំងអស់ ដោយមុខដាវ។ 24 យើងបានប្រព្រឹត្តចំពោះពួកគេ តាមអំពើសៅហ្មង និងអំពើទុច្ចរិតរបស់ពួកគេ យើងលែងរវី‌រវល់នឹងពួកគេទៀតហើយ»។

២៤ ព្រះ‌ជា‌អម្ចាស់ មានព្រះ‌បន្ទូលថា៖ «ឥឡូវនេះ យើងនឹងស្តារស្រុកយូដាឡើងវិញ យើងនឹងមានចិត្តអាណិត‌អាសូរដល់កូនចៅអ៊ីស្រា‌អែលទាំងមូល ហើយយើងមិនទុកឲ្យនាមដ៏‌វិសុទ្ធរបស់យើងនៅអាប់‌ឱនដូច្នេះឡើយ។ ២៥ ពេលនោះ ពួកគេនឹងលែងនឹកឃើញភាពអាម៉ាស់ និងការមិនស្មោះ‌ត្រង់ទាំងប៉ុន្មានដែលពួកគេប្រព្រឹត្តចំពោះយើង ហើយពួកគេនឹងរស់នៅក្នុងស្រុកដោយសុខ‌សាន្ត ឥតមាននរណាធ្វើទុក្ខពួកគេឡើយ។ ២៦ យើងនឹងសម្ដែងភាពវិសុទ្ធរបស់យើងតាម‌រយៈពួកគេ នៅចំពោះមុខប្រជា‌ជាតិទាំងអស់ ដោយនាំពួកគេចាកចេញពីចំណោមជាតិសាសន៍នានា និងប្រមូលពួកគេពីស្រុករបស់ខ្មាំងសត្រូវមកវិញ។ ២៧ ពេលនោះ មនុស្ស‌ម្នានឹងដឹងថា យើងជាព្រះ‌អម្ចាស់ ជាព្រះរបស់ពួកគេ យើងបានបំបរ‌បង់ពួកគេ ទៅក្នុងចំណោមប្រជា‌ជាតិទាំង‌ឡាយ ហើយយើងក៏បានប្រមូលផ្តុំពួកគេ ឲ្យមកនៅលើទឹកដីរបស់ខ្លួនវិញដែរ គឺយើងមិនបោះបង់ចោលនរណាម្នាក់ក្នុងស្រុកដទៃឡើយ។ ២៨ យើងមិនលាក់មុខនឹងពួកគេទៀតទេ ដ្បិតយើងនឹងចាក់បង្ហូរវិញ្ញាណរបស់យើងលើកូនចៅអ៊ីស្រា‌អែល» -នេះជាព្រះ‌បន្ទូលរបស់ព្រះ‌ជា‌អម្ចាស់។

និមិត្ត‌ហេតុស្តីអំពីព្រះ‌វិហារ នៅអនាគត‌កាល

លោកអេសេ‌គីអែលនិមិត្តឃើញក្រុងយេរូ‌សាឡឹម

១ នៅឆ្នាំទីម្ភៃ‌ប្រាំ ដែលគេកៀរយើងមកជាឈ្លើយ គឺដប់‌បួនឆ្នាំក្រោយពេលក្រុងយេរូ‌សាឡឹមរលំ នៅថ្ងៃទីដប់ ក្នុងខែដើមឆ្នាំនោះ ព្រះ‌អម្ចាស់បានដាក់ព្រះ‌ហស្ដលើខ្ញុំ ហើយលើកខ្ញុំទៅ។ ២ ខ្ញុំនិមិត្តឃើញហេតុដ៏អស្ចារ្យពីព្រះ‌ជាម្ចាស់ គឺព្រះ‌អង្គនាំខ្ញុំទៅស្រុកអ៊ីស្រា‌អែល ហើយដាក់ខ្ញុំនៅលើភ្នំមួយយ៉ាងខ្ពស់។ ខ្ញុំមើលទៅខាងត្បូងឃើញមានហាក់ដូចជាអាគាររបស់ទីក្រុងមួយ។ ៣ ព្រះ‌អង្គនាំខ្ញុំទៅទីនោះ ឃើញមនុស្សម្នាក់មានភាពដូចលង្ហិន ឈរនៅក្បែរខ្លោងទ្វារទាំងកាន់ខ្សែវេញពីធ្មៃ និងឈើរង្វាស់មួយ។ ៤ បុរសនោះពោលមកខ្ញុំថា៖ «កូនមនុស្សអើយ ចូរខំប្រឹងមើល ចូរប្រុងត្រចៀកស្ដាប់ ចូរយកចិត្តទុកដាក់ចំពោះហេតុ‌ការណ៍ដែលខ្ញុំបង្ហាញឲ្យអ្នកឃើញ ដ្បិតព្រះ‌អម្ចាស់នាំអ្នកមកទីនេះ ដើម្បីឲ្យអ្នកឃើញ។ បន្ទាប់មក ចូរយកហេតុ‌ការណ៍ទាំងអស់ដែលអ្នកឃើញ ទៅពន្យល់ប្រាប់កូនចៅអ៊ីស្រា‌អែល»។

ទី‌លាន និងទ្វារខាងក្រៅ

៥ ខ្ញុំមើលទៅឃើញមានកំពែងព័ទ្ធជុំ‌វិញព្រះ‌ដំណាក់។ បុរសនោះកាន់ឈើរង្វាស់ ដែលមានបណ្តោយប្រាំមួយហត្ថ (ក្នុងមួយហត្ថៗមានប្រវែងលើសពីខ្នាតធម្មតាមួយទះ) ទៅវាស់កំពែងនោះឃើញមានបណ្តោយមួយឈើរង្វាស់ និងទទឹងមួយឈើរង្វាស់។ ៦ បន្ទាប់មក បុរសនោះទៅខ្លោងទ្វារដែលបែរមុខទៅទិសខាងកើត ហើយឡើងតាមជណ្ដើរ។ លោកវាស់ក្របខ្លោងទ្វារ ឃើញមានកម្រាស់មួយឈើរង្វាស់។ ៧ បន្ទប់តូចៗមានបណ្តោយមួយឈើរង្វាស់ ទទឹងមួយឈើរង្វាស់។ ពីបន្ទប់មួយទៅបន្ទប់មួយ មានចន្លោះប្រាំហត្ថ។ ក្របទ្វារដែលនៅក្បែរច្រកខ្លោងទ្វារខាងក្នុង ក៏មានកម្រាស់មួយឈើរង្វាស់ដែរ។ ៨ លោកវាស់បន្ទប់ល្វែង ដែលនៅជាប់នឹងខ្លោងទ្វារខាងក្នុង ឃើញមានទទឹងមួយឈើរង្វាស់។ ៩ រីឯបណ្តោយបន្ទប់ល្វែងនោះ លោកវាស់ទៅឃើញមានប្រវែងប្រាំ‌បីហត្ថ ហើយសសរនីមួយៗមានកម្រាស់ពីរហត្ថ។ បន្ទប់ល្វែងនៃខ្លោងទ្វារនោះស្ថិតនៅខាងក្នុង។ ១០ ចំនួនបន្ទប់តូចៗនៅខ្លោងទ្វារខាងកើតមានម្ខាងបី និងមានទំហំដូចៗគ្នា រីឯសសរដែលនៅសងខាងក៏មានទំហំដូចគ្នាដែរ។ ១១ លោកវាស់ទទឹងខ្លោងទ្វារ ឃើញមានប្រវែងដប់ហត្ថ ហើយបណ្តោយមានដប់បីហត្ថ។ ១២ នៅពីមុខបន្ទប់តូចៗមានប្រឡោះមួយ ដែលជ្រុងនីមួយៗមានប្រវែងមួយហត្ថ។ រីឯជ្រុងនីមួយៗរបស់បន្ទប់តូចៗមានប្រវែងប្រាំមួយហត្ថ។ ១៣ លោកវាស់ចុងជញ្ជាំងម្ខាងនៃបន្ទប់ រហូតដល់ចុងជញ្ជាំងម្ខាងនៃបន្ទប់មួយទៀតដែលនៅទល់មុខគ្នា ឃើញមានប្រវែងម្ភៃ‌ប្រាំហត្ថ។ ១៤ លោកវាស់បន្ទប់ឃើញមានបណ្តោយម្ភៃហត្ថ។ មានទី‌លាននៅជុំ‌វិញបន្ទប់នោះ។ ១៥ ពីខ្លោងទ្វារចូលរហូតដល់បន្ទប់ល្វែងនៅជាប់នឹងខ្លោងទ្វារខាងក្នុង មានប្រវែងហា‌សិបហត្ថ។ ១៦ នៅតាមបន្ទប់តូចៗមានបង្អួចព័ទ្ធជុំ‌វិញ បង្អួចនោះធ្វើពីចម្រឹងដែក ហើយក៏មានសសរព័ទ្ធជុំ‌វិញដែរ។ នៅតាមបន្ទប់ល្វែងខាងក្នុង ក៏មានបង្អួចធ្វើពីចម្រឹងដែកព័ទ្ធជុំ‌វិញដែរ។ នៅលើជញ្ជាំងមានឆ្លាក់ក្បាច់ដើមចាកជាលំអផង។

១៧ លោកបាននាំខ្ញុំទៅទី‌លានខាងក្រៅ ដែលមានក្រាលថ្ម នៅជុំ‌វិញទី‌លាននោះ មានបន្ទប់សាម‌សិប។ ១៨ កម្រាលថ្មស្ថិតនៅជាប់ខ្លោងទ្វារ ហើយមានបណ្តោយស្មើនឹងបណ្តោយរបស់ខ្លោងទ្វារ។ កម្រាលថ្មនោះជាកម្រាលថ្មខាងក្រោម។ ១៩ លោកវាស់ពីមុខខ្លោងទ្វារខាងក្រោមរហូតដល់ទី‌លានខាងក្នុង គឺពីទិសខាងកើត រហូតដល់ទិសខាងជើង មានប្រវែងមួយ‌រយហត្ថ។

២០ លោកវាស់បណ្តោយ និងទទឹងរបស់ខ្លោងទ្វារ ដែលបែរមុខទៅរកទី‌លានខាងក្រៅ គឺនៅខាងជើងទី‌លាន។ ២១ ខ្លោងទ្វារនោះមានបន្ទប់តូចៗម្ខាងបីៗ រីឯជញ្ជាំង និងបន្ទប់ល្វែង ក៏មានទំហំដូចខ្លោងទ្វារទីមួយដែរ គឺបណ្តោយហា‌សិបហត្ថ និងទទឹងម្ភៃ‌ប្រាំហត្ថ។ ២២ រីឯបង្អួច បន្ទប់ល្វែង និងក្បាច់ដើមចាក មានទំហំដូចខ្លោងទ្វារដែលបែរមុខទៅទិសខាងកើតដែរ។ ជណ្ដើរដែលឡើងទៅខ្លោងទ្វារមានប្រាំពីរកាំ ហើយបន្ទប់ល្វែងស្ថិតនៅពីមុខកាំជណ្ដើរនោះ។ ២៣ នៅទី‌លានខាងក្នុងមានខ្លោងទ្វារមួយទៀត ដែលនៅទល់មុខខ្លោងទ្វារខាងជើង និងខ្លោងទ្វារខាងកើត។ លោកវាស់ពីខ្លោងទ្វារមួយទៅខ្លោងទ្វារមួយទៀត ឃើញមានប្រវែងមួយ‌រយហត្ថ។

២៤ បន្ទាប់មក លោកនាំខ្ញុំទៅទិសខាងត្បូង ដែលមានខ្លោងទ្វារមួយបែរទៅខាងត្បូង លោកវាស់ជញ្ជាំង និងបន្ទប់ល្វែង ឃើញមានទំហំដូចគ្នា។ ២៥ នៅជុំ‌វិញខ្លោងទ្វារនេះ ព្រមទាំងបន្ទប់ល្វែង មានបង្អួច ដូចបង្អួចឯទៀតៗ។ ខ្លោងទ្វារ និងបន្ទប់ល្វែងនេះមានបណ្តោយហា‌សិបហត្ថ និងទទឹងម្ភៃ‌ប្រាំហត្ថ។ ២៦ ជណ្ដើរដែលឡើងទៅខ្លោងទ្វារមានប្រាំពីរកាំ ហើយបន្ទប់ល្វែងស្ថិតនៅពីមុខកាំជណ្ដើរនោះ។ នៅសងខាងមានឆ្លាក់ក្បាច់ដើមចាកលើសសរ។ ២៧ ទី‌លានខាងក្នុងមានទ្វារមួយនៅខាងត្បូង។ លោកវាស់ពីខ្លោងទ្វារមួយទៅខ្លោងទ្វារមួយទៀត នៅខាងត្បូង មានប្រវែងមួយ‌រយហត្ថ។

២៨ បន្ទាប់មក លោកនាំខ្ញុំចូលទៅទី‌លានខាងក្នុង តាមទ្វារខាងត្បូង។ លោកវាស់ទ្វារខាងត្បូងមានទំហំដូចទ្វារឯទៀតៗ។ ២៩ បន្ទប់តូចៗ ជញ្ជាំង និងបន្ទប់ល្វែង ក៏មានទំហំដូចគ្នាដែរ។ ខ្លោងទ្វារ និងបន្ទប់ល្វែងនេះមានបង្អួចជុំ‌វិញ ហើយមានបណ្តោយហា‌សិបហត្ថ ទទឹងម្ភៃ‌ប្រាំហត្ថ។ ៣០ ជុំ‌វិញបន្ទប់ល្វែង មានបណ្តោយម្ភៃ‌ប្រាំហត្ថ និងទទឹងប្រាំហត្ថ។ ៣១ បន្ទប់ល្វែងទាំងនោះនៅជាប់នឹងទី‌លានខាងក្រៅ។ លើជញ្ជាំងមានឆ្លាក់ក្បាច់ដើមចាក ហើយជណ្ដើរដែលឡើងទៅខ្លោងទ្វារមានប្រាំ‌បីកាំ។

៣២ លោកបាននាំខ្ញុំចូលទៅទី‌លានខាងក្នុង តាមខ្លោងទ្វារខាងកើត។ លោកវាស់ខ្លោងទ្វារមានទំហំដូចគ្នា។ ៣៣ បន្ទប់តូចៗ ជញ្ជាំង និងបន្ទប់ល្វែង ក៏មានទំហំដូចគ្នាដែរ។ ខ្លោងទ្វារ និងបន្ទប់ល្វែងនេះ មានបង្អួចជុំ‌វិញ ហើយមានបណ្តោយហា‌សិបហត្ថ ទទឹងម្ភៃ‌ប្រាំហត្ថ។ ៣៤ បន្ទប់ល្វែងទាំងនោះនៅជាប់នឹងទី‌លានខាងក្រៅ។ នៅសងខាង មានឆ្លាក់ក្បាច់ដើមចាកលើជញ្ជាំង ហើយជណ្ដើរដែលឡើងទៅខ្លោងទ្វារមាន ប្រាំ‌បីកាំ។

៣៥ លោកនាំខ្ញុំទៅខ្លោងទ្វារខាងជើង ហើយវាស់ខ្លោងទ្វារឃើញមានទំហំដូចគ្នា ៣៦ រីឯបន្ទប់តូចៗ ជញ្ជាំង និងបន្ទប់ល្វែង ក៏មានទំហំដូចគ្នា។ មានបង្អួចជុំ‌វិញ ហើយមានបណ្តោយហា‌សិបហត្ថ ទទឹងម្ភៃ‌ប្រាំហត្ថ។ ៣៧ ជញ្ជាំងនៅជាប់នឹងទី‌លានខាងក្រៅ។ នៅសងខាង មានឆ្លាក់ក្បាច់ដើមចាកលើជញ្ជាំង ហើយជណ្ដើរដែលឡើងទៅខ្លោងទ្វារ មានប្រាំ‌បីកាំ។

៣៨ នៅក្បែរជញ្ជាំងទាំងនោះមានបន្ទប់មួយ ជាកន្លែងដែលគេលាងតង្វាយដុត។ ៣៩ ក្នុងបន្ទប់ល្វែងនៃខ្លោងទ្វារ មានតុពីរនៅម្ខាង និងតុពីរនៅម្ខាងទៀត។ គេអារ ក សត្វនៅលើតុទាំងនោះ សម្រាប់ថ្វាយជាតង្វាយដុត យញ្ញ‌បូជាសុំឲ្យរួចពីបាប និងយញ្ញ‌បូជាសុំលើក‌លែងទោស។ ៤០ ត្រង់កន្លែងមួយ ដែលស្ថិតនៅខាងក្រៅនៃច្រកចូលតាមខ្លោងទ្វារខាងជើង មានតុពីរ ហើយនៅម្ខាងទៀត គឺនៅក្បែរបន្ទប់ល្វែង ក៏មានតុពីរដែរ។ ៤១ នៅត្រង់បន្ទប់ល្វែង មានតុប្រាំ‌បី គឺម្ខាងបួនៗ ដែលគេអារ ក សត្វពីលើ។ ៤២ មានតុបួនទៀតដែលធ្វើពីផ្ទាំងថ្ម សម្រាប់ធ្វើពិធីយញ្ញ‌បូជា។ តុនីមួយៗមានបណ្តោយមួយហត្ថកន្លះ ទទឹងមួយហត្ថកន្លះ និងកម្ពស់មួយហត្ថ។ គេដាក់ឧបករណ៍សម្រាប់អារ ក សត្វថ្វាយតង្វាយដុត និងថ្វាយយញ្ញ‌បូជាផ្សេងៗទៀតនៅលើតុនោះ។ ៤៣ នៅតាមគែមតុ មានចង្អូរព័ទ្ធជុំ‌វិញ ចង្អូរនោះមានទទឹងមួយចង្អាម រីឯសាច់សម្រាប់ធ្វើយញ្ញ‌បូជា គេដាក់នៅលើតុ។

៤៤ នៅមុខខ្លោងទ្វារខាងក្នុង គឺនៅទី‌លានខាងក្នុង មានបន្ទប់ផ្សេងៗសម្រាប់អ្នកចម្រៀង។ បន្ទប់មួយស្ថិតជិតខ្លោងទ្វារខាងជើង ហើយបែរមុខទៅទិសខាងត្បូង មួយទៀតនៅជិតខ្លោងទ្វារខាងកើត ហើយបែរមុខទៅទិសខាងជើង។ ៤៥ លោកពោលមកខ្ញុំថា៖ «បន្ទប់បែរមុខទៅទិសខាងត្បូង ជាបន្ទប់របស់ពួកបូជា‌ចារ្យដែលបំពេញការ‌ងារក្នុងព្រះ‌ដំណាក់។ ៤៦ រីឯបន្ទប់បែរមុខទៅទិសខាងជើង ជាបន្ទប់របស់ពួកបូជា‌ចារ្យ ដែលបំពេញការ‌ងារនៅទីអាសនៈ។ អ្នកទាំងនោះជាកូនចៅរបស់លោកសាដុក ក្នុងកុល‌សម្ព័ន្ធលេវី ដែលមានភារ‌កិច្ចចូលមកបម្រើព្រះ‌អម្ចាស់»។

៤៧ លោកវាស់ទី‌លានដែលមានរាងបួនជ្រុងស្មើ ជ្រុងនីមួយៗមានប្រវែងមួយ‌រយហត្ថ។ រីឯអាសនៈស្ថិតនៅមុខទី‌សក្ការៈ។

ទី‌សក្ការៈ

៤៨ លោកនាំខ្ញុំចូលទៅក្នុងបន្ទប់ល្វែងនៃព្រះ‌ដំណាក់។ លោកវាស់សសរបន្ទប់នោះ ម្ខាងៗមានប្រវែងប្រាំហត្ថ។ រីឯទទឹងខ្លោងទ្វារ ម្ខាងៗមានប្រវែងបីហត្ថ។ ៤៩ បន្ទប់ល្វែងនោះមានបណ្តោយម្ភៃហត្ថ និងទទឹងដប់មួយហត្ថ។ មានជណ្ដើរឡើងទៅកាន់បន្ទប់ល្វែងនោះ ហើយមានបង្គោលនៅក្បែរសសរ គឺម្ខាងៗមានបង្គោលមួយ។

១ បន្ទាប់មក លោកនាំខ្ញុំចូលទៅក្នុងទី‌សក្ការៈ លោកវាស់សសរម្ខាងៗមានទទឹងប្រាំមួយហត្ថ ស្មើនឹងទទឹងរបស់ព្រះ‌ពន្លា*។ ២ ក្របទ្វារមានទទឹងដប់ហត្ថ រីឯទ្វារវិញ ម្ខាងៗមានទទឹងប្រាំហត្ថ។ លោកវាស់ទី‌សក្ការៈមានបណ្តោយសែ‌សិបហត្ថ ហើយទទឹងម្ភៃហត្ថ។ ៣ បន្ទាប់មក លោកចូលទៅខាងក្នុងវាស់សសរមាត់ទ្វារ ឃើញមានកម្រាស់ពីរហត្ថ រីឯទ្វារកម្រាស់ប្រាំមួយហត្ថ ទទឹងប្រាំពីរហត្ថ។ ៤ លោកវាស់ផ្នែកខាងក្នុងទី‌សក្ការៈ មានបណ្តោយម្ភៃហត្ថ ទទឹងម្ភៃហត្ថ រួចលោកប្រាប់ខ្ញុំថា នេះជាទី‌សក្ការៈបំផុត។

៥ លោកវាស់ជញ្ជាំងខណ្ឌព្រះ‌ដំណាក់ ឃើញមានកម្រាស់ប្រាំមួយហត្ថ។ រីឯបន្ទប់អមជុំ‌វិញព្រះ‌ដំណាក់មានទទឹងបួនហត្ថ។ ៦ បន្ទប់អមជុំ‌វិញទាំងនោះមានបីជាន់ ក្នុងមួយជាន់មានសាម‌សិបបន្ទប់។ បន្ទប់នីមួយៗស្ថិតនៅតាមជញ្ជាំងខាងក្រៅដែលព័ទ្ធជុំ‌វិញព្រះ‌ដំណាក់ គឺមិននៅតាមជញ្ជាំងទី‌សក្ការៈទេ។ ៧ បន្ទប់ជាន់ខាងលើទូលាយជាងបន្ទប់នៅជាន់ក្រោម ព្រោះផ្នែកខាងលើ កម្រាស់ជញ្ជាំងដែលព័ទ្ធជុំ‌វិញព្រះ‌វិហារតូចជាងកម្រាស់ផ្នែកខាងក្រោម។ ហេតុនេះហើយបានជាកាលណាគេឡើងទៅខាងលើកាន់តែខ្ពស់ នោះកាន់តែមានកន្លែងទូលាយជាង។ គេអាចឡើងពីជាន់ក្រោមទៅជាន់កណ្ដាល រួចទៅជាន់ខាងលើ។

៨ ខ្ញុំសង្កេតមើលជុំ‌វិញព្រះ‌ដំណាក់ ឃើញថាបន្ទប់ដែលនៅអមតាមជញ្ជាំងមានកម្ពស់ពេញមួយឈើរង្វាស់ គឺប្រាំមួយហត្ថ។ ៩ ជញ្ជាំងដែលនៅខាងក្រៅបន្ទប់អម មានកម្រាស់ប្រាំហត្ថ។ រីឯធ្លានៅចន្លោះបន្ទប់អមដែលនៅជាប់នឹងជញ្ជាំង ១០ និងបន្ទប់ដែលនៅជុំ‌វិញទី‌សក្ការៈ មានប្រវែងម្ភៃហត្ថ។ ១១ បន្ទប់អមទាំងនោះមានច្រកចេញចូលតាមធ្លា ច្រកមួយនៅខាងជើង ច្រកមួយទៀតនៅខាងត្បូង។ ធ្លានោះមានជ្រុងនីមួយៗប្រវែងប្រាំហត្ថ។

១២ នៅខាងលិច មានអាគារមួយនៅជាប់នឹងធ្លាធំ មានទទឹងចិត‌សិបហត្ថ បណ្តោយកៅ‌សិបហត្ថ រីឯជញ្ជាំងមានកម្រាស់ប្រាំហត្ថ។ ១៣ បុរសនោះវាស់ព្រះ‌ដំណាក់ ឃើញមានបណ្តោយមួយ‌រយហត្ថ។ ចំណែកឯធ្លាធំ អាគារ និងជញ្ជាំង ក៏មានបណ្តោយមួយ‌រយហត្ថដែរ។ ១៤ ជញ្ជាំងខាងមុខព្រះ‌ដំណាក់ និងធ្លាធំដែលនៅខាងកើត មានប្រវែងមួយ‌រយហត្ថ។ ១៥ បុរសនោះបានវាស់បណ្តោយរបស់អាគារ ដែលស្ថិតនៅខាងក្រោយព្រះ‌ដំណាក់ រួមទាំងថែវនៅសងខាងផង ឃើញមានប្រវែងមួយ‌រយហត្ថ។ ទី‌សក្ការៈ បន្ទប់ល្វែងនៅទី‌លានខាងក្នុង ១៦ ក្របទ្វារ បង្អួចចម្រឹងដែក ថែវតាមជាន់ទាំងបីនៅទល់មុខនឹងក្របទ្វារ សុទ្ធតែមានបន្ទះឈើពាសជុំ‌វិញ គឺចាប់ពីក្រោមរហូតដល់បង្អួច ហើយបង្អួចក៏មានពាសឈើដែរ។ ១៧ ចាប់ពីលើទ្វាររហូតដល់ក្នុងទី‌សក្ការៈ* មានក្បាច់លំអទាំងខាងក្រៅ ទាំងខាងក្នុង ១៨ គឺក្បាច់ខេរូប៊ីម និងក្បាច់ដើមចាក។ រូបដើមចាកមួយ រូបខេរូប៊ីម*ពីរ នៅឆ្លាស់គ្នា។ ១៩ ខេរូប៊ីមនីមួយៗមានមុខពីរ មុខមនុស្សបែរទៅរកដើមចាកម្ខាង មុខសិង្ហបែរទៅរកដើមចាកម្ខាងទៀត ជាបន្តបន្ទាប់គ្នាព័ទ្ធជុំ‌វិញព្រះ‌ដំណាក់។ ២០ ក្បាច់ខេរូប៊ីម និងដើមចាកនេះ មានឆ្លាក់ពាស‌ពេញជញ្ជាំងព្រះ‌វិហារ ចាប់តាំងពីក្រោមរហូតដល់ខាងលើទ្វារ។ ២១ ប្រអប់ទ្វារព្រះ‌វិហារមានរាងបួនជ្រុង។ នៅខាងមុខទី‌សក្ការៈបំផុត ២២ មានអាសនៈធ្វើអំពីឈើ កម្ពស់បីហត្ថ និងបណ្តោយពីរហត្ថ ជ្រុង និងគែម ក៏ធ្វើពីឈើដែរ។ បុរសនោះពោលមកខ្ញុំថា៖ «នេះជាតុតម្កល់នៅចំពោះព្រះ‌ភ័ក្ត្រព្រះ‌អម្ចាស់»។ ២៣ ទី‌សក្ការៈ និងទី‌សក្ការៈបំផុត មានច្រកចូលពីរ។ ២៤ ច្រកនីមួយៗមានសន្លឹកទ្វារពីរ ដែលអាចបិទបើកបាន។ ២៥ នៅលើទ្វារទី‌សក្ការៈមានឆ្លាក់ក្បាច់ខេរូប៊ីម និងដើមចាក ដូចនៅតាមជញ្ជាំងដែរ។ នៅខាងមុខបន្ទប់ល្វែងដែលនៅខាងក្រៅ មានបាំងសាចធ្វើពីឈើ។ ២៦ នៅតាមបន្ទប់ល្វែង និងបន្ទប់អមជញ្ជាំងព្រះ‌ដំណាក់ ព្រមទាំងបាំងសាច មានបង្អួចចម្រឹងដែក និងក្បាច់ដើមចាកទាំងសងខាង។

បន្ទប់អមព្រះ‌វិហារ

១ បន្ទាប់មក លោកនាំខ្ញុំចេញទៅទី‌លានខាងក្រៅ ផ្នែកខាងជើង ហើយនាំខ្ញុំទៅបន្ទប់ផ្សេងៗ ដែលនៅជាប់ធ្លាធំ និងអាគារខាងក្រោយព្រះ‌វិហារ។ ២ អាគារដែលមានទ្វារនៅទិសខាងជើង មានបណ្តោយមួយ‌រយហត្ថ ទទឹងហា‌សិបហត្ថ។ ៣ មួយផ្នែកនៃអាគារនោះ នៅទល់មុខនឹងទី‌លានខាងក្នុងដែលមានប្រវែងម្ភៃហត្ថ មួយផ្នែកទៀតនៅទល់មុខនឹងកម្រាលថ្មនៃទីធ្លាខាងក្រៅ។ អាគារនោះមានថែវបីជាន់។ ៤ នៅពីមុខបន្ទប់ទាំងនោះមានច្រកមួយ ទទឹងដប់ហត្ថ និងបណ្តោយមួយ‌រយហត្ថ។ ទ្វារបន្ទប់ទាំងនោះបែរមុខទៅទិសខាងជើង។ ៥ បន្ទប់ជាន់ខាងលើចង្អៀតជាងបន្ទប់ជាន់ខាងក្រោម និងជាន់កណ្ដាលនៃអាគារ ព្រោះមានថែវកាត់តាមនោះ។ ៦ បន្ទប់ទាំងនោះមានបីជាន់ តែគ្មានសសរដូចសសរនៅក្នុងទី‌លានទេ។ ហេតុនេះហើយបានជាពេលឡើងពីក្រោមទៅឃើញថា បន្ទប់នៅជាន់លើចង្អៀតជាងបន្ទប់នៅជាន់ក្រោម និងជាន់កណ្ដាល។ ៧ នៅទី‌លានខាងក្រៅជញ្ជាំងខណ្ឌតាមបណ្តោយបន្ទប់ មានប្រវែងហា‌សិបហត្ថ ៨ ដ្បិតបន្ទប់ដែលនៅជាប់នឹងទី‌លានខាងក្រៅនោះ មានប្រវែងហា‌សិបហត្ថដែរ។ រីឯជ្រុងដែលបែរមុខទៅរកព្រះ‌វិហារ មានប្រវែងមួយ‌រយហត្ថ។ ៩ នៅក្រោមបន្ទប់ទាំងនោះ មានទ្វារចូលពីទី‌លានខាងក្រៅ តាមទិសខាងកើត។

១០ តាមជញ្ជាំងខណ្ឌទី‌លានប៉ែកខាងកើត ដែលនៅទល់មុខធ្លាធំ និងអាគារ ក៏មានបន្ទប់ជាច្រើនដែរ។ ១១ នៅមុខបន្ទប់ទាំងនោះ មានច្រកមួយដូចនៅមុខបន្ទប់ជួរខាងជើង គឺមានបណ្តោយ មានទទឹងដូចគ្នា ហើយមានផ្លូវចេញចូល មានទ្រង់‌ទ្រាយ និងមានទ្វារដូចគ្នា ១២ រីឯទ្វារនៃបន្ទប់នៅជួរខាងត្បូងក៏ដូចគ្នាដែរ។ នៅច្រកចូលតាមជញ្ជាំងខណ្ឌខាងកើត មានទ្វារមួយសម្រាប់ចេញចូល។ ១៣ បុរសនោះប្រាប់ខ្ញុំថា៖ «បន្ទប់ជួរខាងជើង និងបន្ទប់ជួរខាងត្បូង ដែលនៅទល់មុខនឹងធ្លាធំ ជាបន្ទប់ដ៏សក្ការៈ ជាកន្លែងដែលពួកបូជា‌ចារ្យចូលទៅថ្វាយ‌បង្គំព្រះ‌អម្ចាស់ ពួកគេបរិភោគអាហារដ៏សក្ការៈបំផុត។ ក្នុងបន្ទប់ទាំងនោះ មានដាក់ឧបករណ៍ដ៏សក្ការៈ តង្វាយផ្សេងៗ សត្វសម្រាប់ថ្វាយជាយញ្ញ‌បូជាសុំឲ្យរួចពីបាប និងយញ្ញ‌បូជាសុំលើក‌លែងទោស ដ្បិតកន្លែងនោះជាកន្លែងសក្ការៈ។ ១៤ ពេលណាពួកបូជា‌ចារ្យចូលទៅហើយ គេពុំអាចចេញមកទី‌លានខាងក្រៅបានភ្លាមៗទេ គឺត្រូវទុកសម្លៀក‌បំពាក់ដែលគេស្លៀកពាក់ សម្រាប់បំពេញមុខ‌ងារនោះ ក្នុងបន្ទប់ដ៏សក្ការៈជាមុនសិន ដ្បិតសម្លៀក‌បំពាក់នោះក៏សក្ការៈដែរ។ ដើម្បីចូលទៅជិតប្រជាជន គេមានសម្លៀក‌បំពាក់ផ្សេងទៀត»។

១៥ ពេលលោកវាស់ព្រះ‌ដំណាក់ខាងក្នុងរួចរាល់ហើយ លោកនាំខ្ញុំចេញទៅក្រៅតាមខ្លោងទ្វារខាងកើត ហើយលោកវាស់បរិវេណដែលនៅជុំ‌វិញ។ ១៦ លោកយកឈើរង្វាស់ វាស់ជ្រុងខាងកើត ឃើញមានប្រវែងប្រាំ‌រយឈើរង្វាស់។ ១៧ លោកវាស់ជ្រុងខាងជើង ឃើញមានប្រវែងប្រាំ‌រយឈើរង្វាស់។ ១៨ លោកវាស់ជ្រុងខាងត្បូង ឃើញមានប្រវែងប្រាំ‌រយឈើរង្វាស់។ ១៩ លោកបែរទៅជ្រុងខាងលិច ហើយវាស់ ឃើញមានប្រវែងប្រាំ‌រយឈើរង្វាស់។ ២០ លោកវាស់ជញ្ជាំងទាំងបួនជ្រុង មួយជ្រុងៗមានប្រវែងប្រាំ‌រយឈើរង្វាស់។ ជញ្ជាំងនោះខណ្ឌអ្វីៗដែលសក្ការៈ ឲ្យនៅដាច់ពីអ្វីៗដែលមិនសក្ការៈ។

ព្រះ‌អម្ចាស់វិលត្រឡប់មកទី‌សក្ការៈរបស់ព្រះ‌អង្គវិញ

១ បន្ទាប់មក លោកនាំខ្ញុំទៅកាន់ខ្លោងទ្វារខាងកើត។ ២ ពេលនោះ សិរី‌រុងរឿងរបស់ព្រះនៃជនជាតិអ៊ីស្រា‌អែលអណ្ដែតមកពីទិសខាងកើត មានសន្ធឹកដូចមហា‌សាគរ ហើយផែន‌ដីភ្លឺដោយសិរី‌រុងរឿងរបស់ព្រះ‌អង្គ។ ៣ និមិត្ត‌ហេតុអស្ចារ្យដែលខ្ញុំបានឃើញនៅពេលនោះ ក៏ដូចនិមិត្ត‌ហេតុអស្ចារ្យដែលខ្ញុំបានឃើញ នៅពេលព្រះ‌អង្គយាងមកកម្ទេចក្រុងយេរូ‌សាឡឹម។ និមិត្ត‌ហេតុអស្ចារ្យទាំងពីរនេះ ក៏ដូចជានិមិត្ត‌ហេតុអស្ចារ្យ ដែលខ្ញុំបានឃើញនៅមាត់ទន្លេកេបារដែរ។ ពេលនោះ ខ្ញុំក្រាបចុះឱនមុខដល់ដី។

៤ សិរី‌រុងរឿងរបស់ព្រះ‌អម្ចាស់អណ្ដែតចូលមកក្នុងព្រះ‌ដំណាក់តាមទ្វារខាងកើត។ ៥ ព្រះ‌វិញ្ញាណក៏លើកខ្ញុំឡើង ហើយនាំខ្ញុំទៅដាក់កណ្ដាលទី‌លានខាងក្នុង។ សិរី‌រុងរឿងរបស់ព្រះ‌អម្ចាស់ស្ថិតនៅពេញព្រះ‌ដំណាក់។ ៦ ពេលបុរសនោះនៅក្បែរខ្ញុំ ខ្ញុំឮព្រះ‌សូរសៀងចេញពីព្រះ‌ដំណាក់មកកាន់ខ្ញុំថា៖ ៧ «កូនមនុស្សអើយ! កន្លែងនេះជាបល្ល័ង្ករបស់យើង និងជាកន្លែងដាក់ជើងរបស់យើងផង។ យើងនឹងស្ថិតនៅកន្លែងនេះជាមួយជនជាតិអ៊ីស្រា‌អែលរហូតតទៅ។ ពូជ‌ពង្សអ៊ីស្រា‌អែល និងស្តេចរបស់គេ លែងធ្វើឲ្យនាមយើងទៅជាសៅ‌ហ្មង ដោយអំពើផិតក្បត់ និងដោយយកសាក‌សពស្តេចមកតម្កល់ទុកនៅទីនេះទៀតហើយ។ ៨ ពីមុន ពួកគេបានសង់ទ្វាររបស់គេនៅជាប់នឹងទ្វាររបស់យើង ក្របទ្វាររបស់គេនៅជាប់នឹងក្របទ្វាររបស់យើង គឺមានតែជញ្ជាំងមួយគត់ដែលខណ្ឌគេពីយើង។ ពួកគេបានធ្វើឲ្យនាមរបស់យើងទៅជាសៅហ្មង ដោយ‌សារអំពើគួរស្អប់ខ្ពើមដែលពួកគេប្រព្រឹត្ត។ ហេតុនេះហើយបានជាយើងបំផ្លាញពួកគេឲ្យវិនាស តាមកំហឹងរបស់យើង។ ៩ ឥឡូវនេះ ពួកគេលែងប្រព្រឹត្តអំពើផិតក្បត់ ពួកគេយកសពស្តេចរបស់ខ្លួនចេញឆ្ងាយពីយើង។ យើងនឹងនៅក្នុងចំណោមពួកគេរហូតតទៅ។

១០ ចំណែកឯអ្នកវិញ កូនមនុស្សអើយ ចូររៀបរាប់អំពីព្រះ‌ដំណាក់នេះប្រាប់កូនចៅអ៊ីស្រា‌អែល ដើម្បីឲ្យពួកគេពិនិត្យមើលគម្រោងរបស់ព្រះ‌ដំណាក់ ហើយឲ្យពួកគេនឹកខ្មាស ដោយបានប្រព្រឹត្តខុស។ ១១ ប្រសិនបើពួកគេនឹកខ្មាស ព្រោះតែអំពើអាក្រក់ដែលខ្លួនបានប្រព្រឹត្ត នោះចូរប្រាប់ពួកគេឲ្យដឹងពីគំរូរបស់ព្រះ‌ដំណាក់ ទ្រង់‌ទ្រាយ ច្រកចេញចូល របៀបតុប‌តែង ព្រមទាំងរបៀបចាត់ចែង និងក្បួនតម្រាសព្វបែបយ៉ាង។ ចូរកត់‌ត្រាទុក ដើម្បីឲ្យពួកគេឃើញ និងធ្វើតាម។ ១២ រីឯវិន័យដ៏សំខាន់របស់ព្រះ‌ដំណាក់ដែលគេត្រូវគោរពនោះ គឺកំពូលភ្នំ និងបរិវេណជុំ‌វិញ ត្រូវញែកទុកជាទី‌សក្ការៈបំផុត»។

អំពីអាសនៈ

១៣ ទំហំរបស់អាសនៈគិតជាហត្ថ ហើយខ្នាតមួយហត្ថនេះវែងជាងខ្នាតមួយហត្ថធម្មតាមួយទះ។ ចង្អូរនៅជុំ‌វិញអាសនៈមានជម្រៅមួយហត្ថ ទទឹងមួយហត្ថ រីឯគែមព័ទ្ធជុំ‌វិញមានកម្រាស់មួយតឹក។ ១៤ ពីចង្អូរដែលនៅផ្ទាល់នឹងដី ឡើងទៅដល់គន្លាក់ខាងក្រោម មានកម្ពស់ពីរហត្ថ ទទឹងមួយហត្ថ។ ពីគន្លាក់តូចរហូតដល់គន្លាក់ធំ មានកម្ពស់បួនហត្ថ ទទឹងមួយហត្ថ។ ១៥ នៅផ្នែកខាងលើជាកន្លែងដុតយញ្ញ‌បូជា មានកម្ពស់បួនហត្ថ ហើយមានស្នែងបួនឡើងទៅលើ។ ១៦ កន្លែងដុតនេះមានបណ្តោយដប់‌ពីរហត្ថ ទទឹងដប់‌ពីរហត្ថ គឺមានរាងបួនជ្រុងស្មើ។ ១៧ រីឯផ្នែកកណ្ដាលមានបណ្តោយដប់‌បួនហត្ថ និងទទឹងដប់‌បួនហត្ថ គែមដែលព័ទ្ធជុំ‌វិញ មានកម្រាស់កន្លះហត្ថ ចង្អូរទាំងបួនជ្រុងមានកម្ពស់មួយហត្ថ។ ជណ្ដើររបស់អាសនៈបែរទៅរកទិសខាងកើត។

១៨ ព្រះ‌ជា‌អម្ចាស់មានព្រះ‌បន្ទូលមកខ្ញុំថា៖ «កូនមនុស្សអើយ ចូរកត់‌ត្រាទុកនូវក្បួនតម្រាដែលត្រូវអនុវត្ត នៅថ្ងៃគេកសាងអាសនៈ សម្រាប់ធ្វើយញ្ញ‌បូជា និងពិធីច្រួចឈាម។ ១៩ ចូរប្រគល់គោបាមួយឲ្យពួកបូជា‌ចារ្យលេវី ជាកូនចៅរបស់លោកសាដុក ដែលមានមុខ‌ងារចូលមកបម្រើយើង ដើម្បីឲ្យគេធ្វើយញ្ញ‌បូជារំដោះបាប -នេះជាព្រះ‌បន្ទូលរបស់ព្រះ‌ជា‌អម្ចាស់។ ២០ ចូរយកឈាមទៅលាបលើស្នែងទាំងបួននៃអាសនៈ និងលាបផ្នែកកណ្ដាលទាំងបួនជ្រុង ព្រមទាំងលាបគែមដែលនៅជុំ‌វិញ។ ធ្វើដូច្នេះ មានន័យថា អ្នកធ្វើឲ្យអាសនៈបានបរិសុទ្ធ និងសក្ការៈ។ ២១ បន្ទាប់មក ចូរយកគោបាសម្រាប់ធ្វើយញ្ញ‌បូជា ទៅឲ្យគេដុតនៅកន្លែងបម្រុងទុក ខាងក្រៅទី‌សក្ការៈនៃព្រះ‌ដំណាក់។ ២២ នៅថ្ងៃទីពីរ អ្នកត្រូវយកពពែឈ្មោលដ៏ល្អឥតខ្ចោះមួយ មកថ្វាយជាតង្វាយរំដោះបាប ដើម្បីដកបាបចេញពីអាសនៈ ដូចបានថ្វាយគោបា ដើម្បីដកបាបដែរ។ ២៣ កាលអ្នកធ្វើពិធីយញ្ញ‌បូជារំដោះបាបរួចហើយ ចូរនាំគោស្ទាវឈ្មោលមួយ និងចៀមឈ្មោលមួយដ៏ល្អឥតខ្ចោះពីហ្វូងសត្វ ២៤ យកមកថ្វាយព្រះ‌អម្ចាស់ ពួកបូជា‌ចារ្យត្រូវបាចអំបិលលើសត្វទាំងពីរ ហើយថ្វាយជាតង្វាយដុតទាំងមូលដល់ព្រះ‌អម្ចាស់។ ២៥ ក្នុងអំឡុងពេលប្រាំពីរថ្ងៃ អ្នកត្រូវយកពពែឈ្មោលមួយ គោស្ទាវឈ្មោលមួយ និងចៀមឈ្មោល មួយមកថ្វាយរៀងរាល់ថ្ងៃ ជាតង្វាយរំដោះបាប សត្វទាំងនោះត្រូវតែល្អឥតខ្ចោះ។ ២៦ ក្នុងអំឡុងពេលប្រាំពីរថ្ងៃ ត្រូវធ្វើពិធីជម្រះអាសនៈឲ្យបរិសុទ្ធ និងសក្ការៈ។ ២៧ លុះថ្ងៃកំណត់នោះបានចប់សព្វគ្រប់ហើយ ចាប់ពីថ្ងៃទីប្រាំ‌បីតទៅ ពួកបូជា‌ចារ្យត្រូវថ្វាយតង្វាយដុតទាំងមូល និងយញ្ញ‌បូជាមេត្រី‌ភាពនៅលើអាសនៈ។ ធ្វើដូច្នេះ ទើបយើងគាប់ចិត្តនឹងអ្នករាល់គ្នា» - នេះជាព្រះ‌បន្ទូលរបស់ព្រះ‌ជា‌អម្ចាស់។

ការថ្វាយ‌បង្គំព្រះ‌អម្ចាស់នៅក្នុងព្រះ‌វិហារថ្មី

១ បន្ទាប់មក លោកនាំខ្ញុំត្រឡប់ទៅខ្លោងទ្វារខាងក្រៅទី‌សក្ការៈវិញ គឺទ្វារដែលបែរមុខទៅទិសខាងកើត។ ទ្វារនោះនៅបិទ។ ២ ព្រះ‌អម្ចាស់មានព្រះ‌បន្ទូលមកខ្ញុំថា៖ «ទ្វារនេះនឹងនៅបិទជិត គឺមិនត្រូវបើកឡើយ ហើយក៏គ្មាននរណាចេញចូលតាមនេះដែរ ដ្បិតយើងជាព្រះ‌អម្ចាស់ ជាព្រះនៃជនជាតិអ៊ីស្រា‌អែល យើងបានចូលមកតាមទ្វារនេះ ដូច្នេះ ទ្វារនេះត្រូវបិទរហូត!។ ៣ ចំណែកឯមេដឹកនាំវិញ ក្នុងឋានៈជាអ្នកគ្រប់‌គ្រង គេអាចអង្គុយបរិភោគពិធីជប់‌លៀងនៅចំពោះមុខយើងបាន។ គេចូលមកតាមបន្ទប់ល្វែងនៃខ្លោងទ្វារ ហើយចេញទៅវិញតាមច្រកដដែល»។

៤ បន្ទាប់មក លោកនាំខ្ញុំទៅខ្លោងទ្វារខាងជើង គឺខាងមុខព្រះ‌ដំណាក់។ ខ្ញុំក្រឡេកមើលទៅឃើញសិរី‌រុងរឿងរបស់ព្រះ‌អម្ចាស់ នៅពាស‌ពេញក្នុងព្រះ‌ដំណាក់របស់ព្រះ‌អង្គ ខ្ញុំក៏ក្រាបចុះ ឱនមុខដល់ដី។ ៥ ព្រះ‌អម្ចាស់មានព្រះ‌បន្ទូលមកខ្ញុំថា៖ «កូនមនុស្សអើយ ចូរយកចិត្តទុកដាក់មើល និងផ្ទៀងត្រចៀកស្ដាប់សេចក្ដី ដែលយើងប្រាប់អ្នកស្តីអំពីវិន័យ និងក្បួនតម្រាទាំងប៉ុន្មាន ដែលត្រូវអនុវត្តនៅក្នុងព្រះ‌ដំណាក់នេះ។ ចូរពិនិត្យមើលច្រកចូលទៅក្នុងព្រះ‌ដំណាក់ និងទ្វារទាំងប៉ុន្មានរបស់ទី‌សក្ការៈ។ ៦ បន្ទាប់មក ចូរប្រាប់កូនចៅអ៊ីស្រា‌អែល ជាអ្នកបះ‌បោរថា ព្រះ‌ជា‌អម្ចាស់មានព្រះ‌បន្ទូលដូចតទៅ: កូនចៅអ៊ីស្រា‌អែលអើយ អ្នករាល់គ្នាប្រព្រឹត្តអំពើគួរឲ្យស្អប់ខ្ពើមច្រើនពេកហើយ!។ ៧ ពេលអ្នករាល់គ្នាយកអាហារ គឺខ្លាញ់ និងឈាម មកថ្វាយយើង អ្នករាល់គ្នានាំជនបរទេសដែលជាសាសន៍មិនកាត់ស្បែក និងជាសាសន៍មិនគោរពយើងចូលមក ធ្វើឲ្យដំណាក់របស់យើងទៅជាសៅហ្មង។ អ្នករាល់គ្នាផ្ដាច់សម្ពន្ធ‌មេត្រីជាមួយយើង ដោយប្រព្រឹត្តអំពើគួរឲ្យស្អប់ខ្ពើមគ្រប់យ៉ាង។ ៨ អ្នករាល់គ្នាពុំបានយកចិត្តទុកដាក់បំពេញការ‌ងារបម្រើយើង ដោយខ្លួនឯងផ្ទាល់ទេ គឺអ្នករាល់គ្នាបានឲ្យសាសន៍ដទៃមកបំពេញការ‌ងារក្នុងទី‌សក្ការៈ ជំនួសអ្នករាល់គ្នាទៅវិញ»។ ៩ ព្រះ‌ជា‌អម្ចាស់មានព្រះ‌បន្ទូលទៀតថា៖ «មិនត្រូវឲ្យជនបរទេស ដែលជាសាសន៍មិនកាត់ស្បែក និងជាសាសន៍មិនគោរពយើង ចូលមកក្នុងទី‌សក្ការៈរបស់យើងឡើយ ទោះបីអ្នកនោះរស់នៅក្នុងចំណោមជនជាតិអ៊ីស្រា‌អែលក៏ដោយ។

មុខ‌ងាររបស់ក្រុមលេវី

១០ ក្នុងគ្រាដែលជនជាតិអ៊ីស្រា‌អែលវង្វេងចេញឆ្ងាយពីយើង ទៅតាមព្រះក្លែង‌ក្លាយ ពួកលេវីក៏បានបោះបង់ចោលយើងដែរ ហេតុនេះ ពួកគេនឹងទទួលផលវិបាក ព្រោះតែកំហុសរបស់ខ្លួន។ ១១ ដូច្នេះ ពួកគេគ្រាន់តែមានមុខ‌ងារជាអ្នកជំនួយការក្នុងព្រះ‌ដំណាក់ គឺត្រូវប្រើគេឲ្យយាមខ្លោងទ្វារបម្រើប្រជាជន ដោយសម្លាប់សត្វដែលត្រូវថ្វាយជាតង្វាយដុតទាំងមូល និងយញ្ញ‌បូជាផ្សេងៗ។ ១២ ដោយពួកគេបានជួយជ្រោម‌ជ្រែងប្រជាជន ក្នុងការគោរពបម្រើព្រះក្លែង‌ក្លាយ និងនាំប្រជាជនឲ្យប្រព្រឹត្តអំពើបាប យើងសុំប្រកាសយ៉ាងម៉ឺង‌ម៉ាត់ថា ពួកគេនឹងទទួលផលវិបាក ព្រោះតែកំហុសរបស់ខ្លួនមិនខាន - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៣ ពួកគេពុំអាចចូលមកជិតយើង ដើម្បីបំពេញមុខ‌ងារជាបូជា‌ចារ្យទេ ពួកគេក៏មិនអាចចូលមកក្នុងទី‌សក្ការៈ ឬទី‌សក្ការៈបំផុតរបស់យើងដែរ។ ពួកគេត្រូវទទួលផលវិបាក ព្រោះតែអំពើដ៏អាម៉ាស់ និងអំពើគួរស្អប់ខ្ពើមដែលខ្លួនបានប្រព្រឹត្ត។ ១៤ យើងនឹងឲ្យពួកគេមើលថែទាំ និងបំពេញកិច្ច‌ការបន្ទាប់‌បន្សំទាំងប៉ុន្មាននៅក្នុងព្រះ‌ដំណាក់។

មុខ‌ងាររបស់ក្រុមបូជា‌ចារ្យ

១៥ រីឯក្រុមបូជា‌ចារ្យលេវី ជាកូនចៅរបស់លោកសាដុកវិញ ក្នុងពេលដែលជនជាតិអ៊ីស្រា‌អែលវង្វេងចេញឆ្ងាយពីយើងនោះ ពួកគេនៅតែបម្រើយើងក្នុងទី‌សក្ការៈ។ ដូច្នេះ ពួកគេនឹងចូលមកបម្រើយើង ពួកគេនឹងស្ថិតនៅក្បែរយើង ដើម្បីថ្វាយខ្លាញ់ និងឈាម -នេះជាព្រះ‌បន្ទូលរបស់ព្រះ‌ជា‌អម្ចាស់។ ១៦ អ្នកទាំងនោះនឹងចូលមកក្នុងទី‌សក្ការៈរបស់យើង ពួកគេចូលមកក្បែរតុរបស់យើង ដើម្បីបម្រើយើង និងធ្វើតាមសេចក្ដីដែលយើងបង្គាប់។ ១៧ ពេលចូលមកដល់ខ្លោងទ្វារនៃទី‌លានខាងក្នុង ពួកគេត្រូវស្លៀកសម្លៀក‌បំពាក់ធ្វើពីក្រណាត់ទេស‌ឯក។ ពេលពួកគេបំពេញមុខ‌ងារនៅខ្លោងទ្វារនៃទី‌លានខាងក្នុង មិនត្រូវស្លៀកពាក់សម្លៀក‌បំពាក់ធ្វើពីរោមចៀមទេ។ ១៨ ពួកគេត្រូវពាក់ឆ្នួតធ្វើពីក្រណាត់ទេស‌ឯកនៅលើក្បាល ហើយស្លៀកខោខ្លី តែមិនត្រូវយកអ្វីមកក្រវាត់ចង្កេះ នាំឲ្យបែកញើសឡើយ។ ១៩ ពេលពួកគេចេញទៅរកប្រជាជននៅទី‌លានខាងក្រៅ ត្រូវផ្លាស់សម្លៀក‌បំពាក់សម្រាប់បំពេញមុខ‌ងារចេញ រួចទុកសម្លៀក‌បំពាក់នោះនៅក្នុងបន្ទប់នៃទី‌សក្ការៈ។ ពួកគេត្រូវស្លៀកសម្លៀក‌បំពាក់ផ្សេងទៀត ដើម្បីកុំឲ្យប្រជាជនប៉ះ‌ពាល់សម្លៀក‌បំពាក់ដ៏សក្ការៈនោះ។ ២០ មិនត្រូវឲ្យបូជា‌ចារ្យទាំងនោះកោរសក់ ឬក៏ទុកឲ្យសក់ដុះវែងពេកឡើយ គឺត្រូវកាត់សក់យ៉ាងសមរម្យ។ ២១ ពេលចូលទៅទី‌លានខាងក្នុង បូជា‌ចារ្យមិនត្រូវសេពសុរាឡើយ។ ២២ បូជា‌ចារ្យមិនត្រូវរៀប‌ការជាមួយស្ត្រី‌មេម៉ាយ ឬស្ត្រីប្ដីលែងទេ គឺរៀប‌ការបានតែជាមួយស្ត្រីក្រមុំព្រហ្មចារីក្នុងវង្សត្រកូលនៃកូនចៅអ៊ីស្រា‌អែល ឬស្ត្រី‌មេម៉ាយពីបូជា‌ចារ្យម្នាក់ទៀត។ ២៣ បូជា‌ចារ្យទាំងនោះត្រូវអប់រំប្រជាជនរបស់យើង ឲ្យស្គាល់ការខុសគ្នារវាងអ្វីដែលសក្ការៈ និងអ្វីដែលមិនសក្ការៈ ព្រមទាំងការខុសគ្នារវាងអ្វីដែលមិនបរិសុទ្ធ និងអ្វីដែលបរិសុទ្ធ។ ២៤ ពួកគេធ្វើជាចៅ‌ក្រមកាត់ក្តី នៅពេលប្រជាជនមានរឿង‌រ៉ាវនឹងគ្នា ហើយវិនិច្ឆ័យទោស ស្របតាមច្បាប់របស់យើង។ ពួកគេចាត់ចែងធ្វើពិធីបុណ្យផ្សេងៗតាមវិន័យ និងក្បួនតម្រា ដែលយើងបានបង្គាប់ទុក ព្រមទាំងញែកថ្ងៃសប្ប័ទទុកជាថ្ងៃដ៏‌វិសុទ្ធ។ ២៥ បូជា‌ចារ្យមិនត្រូវចូលទៅជិតសាក‌សព ដែលបណ្តាលឲ្យខ្លួនទៅជាសៅហ្មងឡើយ លើក‌លែងតែសពឪពុក‌ម្ដាយ កូនប្រុសកូនស្រី បង‌ប្អូនប្រុស និងបង‌ប្អូនស្រីដែលពុំទាន់រៀប‌ការ។ ២៦ ក្នុងករណីនេះ ក្រោយធ្វើពិធីជម្រះកាយឲ្យបរិសុទ្ធ*រួចហើយ គេត្រូវនៅរង់‌ចាំប្រាំពីរថ្ងៃ មុននឹងបំពេញមុខ‌ងារសាជាថ្មី។ ២៧ នៅថ្ងៃគេចូលទៅទី‌លានខាងក្នុង ដើម្បីបំពេញមុខ‌ងារក្នុងទី‌សក្ការៈ*ឡើងវិញ គេត្រូវថ្វាយយញ្ញ‌បូជារំដោះបាប - នេះជាព្រះ‌បន្ទូលរបស់ព្រះ‌ជា‌អម្ចាស់។

២៨ ចំណែកឯកេរ‌មត៌កដែលពួកបូជា‌ចារ្យត្រូវទទួលនោះ គឺយើងផ្ទាល់។ មិនបាច់ចែកទឹកដីក្នុងស្រុកអ៊ីស្រា‌អែលជាមត៌កឲ្យពួកគេទេ ដ្បិតយើងផ្ទាល់ជាមត៌ករបស់ពួកគេ។ ២៩ ពួកគេបរិភោគសាច់ ដែលជាតង្វាយ និងយញ្ញ‌បូជារំដោះបាប ឬយញ្ញ‌បូជាសុំលើក‌លែងទោសដែលប្រជាជនយើងយកមកថ្វាយ។ អ្វីៗដែលជនជាតិអ៊ីស្រា‌អែលទុកសម្រាប់យើង ពួកបូជា‌ចារ្យអាចយកបាន។ ៣០ ផលដំបូងបង្អស់នៃដំណាំទាំង‌ឡាយ និងអ្វីៗគ្រប់យ៉ាងដែលអ្នករាល់គ្នាញែកទុកដោយឡែកនោះ ជាចំណែករបស់ពួកបូជា‌ចារ្យ។ ត្រូវយកម្សៅដំបូងបង្អស់មកជូនពួកបូជា‌ចារ្យ ដើម្បីឲ្យផ្ទះរបស់អ្នកបានទទួលពរ។ ៣១ បូជា‌ចារ្យមិនត្រូវបរិភោគសាច់សត្វចតុប្បាទ ឬសត្វស្លាបដែលងាប់ដោយជំងឺ ឬដោយសត្វសាហាវខាំនោះឡើយ»។

ការបែងចែងទឹកដី

១ «ពេលណាអ្នករាល់គ្នាចាប់ឆ្នោតបែងចែកទឹកដីជាមត៌ក ត្រូវញែកដីមួយចំណែកទុកជាដីសក្ការៈ ថ្វាយព្រះ‌អម្ចាស់។ ដីនោះមានបណ្តោយពីរ‌ម៉ឺនប្រាំ‌ពាន់ហត្ថ និងទទឹងមួយ‌ម៉ឺនហត្ថ ត្រូវចាត់ទុកថាជាកន្លែងដ៏‌វិសុទ្ធ។ ២ ក្នុងបរិវេណដីនោះ ត្រូវមានកន្លែងសម្រាប់ទី‌សក្ការៈ ដែលមានទំហំប្រាំ‌រយហត្ថបួនជ្រុង និងទីធ្លាព័ទ្ធជុំ‌វិញដែលមានទទឹងប្រាំ‌រយហត្ថ។ ៣ នៅលើផ្ទៃដីដែលមានបណ្តោយពីរ‌ម៉ឺនប្រាំ‌ពាន់ហត្ថ និងទទឹងមួយ‌ម៉ឺនហត្ថនេះ អ្នកត្រូវវាស់កន្លែងមួយទុកជាទី‌សក្ការៈដ៏‌វិសុទ្ធបំផុត។ ៤ ដីនោះជាកន្លែងដ៏សក្ការៈនៅក្នុងស្រុក ជាកម្ម‌សិទ្ធិរបស់ពួកបូជា‌ចារ្យ ដែលបម្រើព្រះ‌អម្ចាស់នៅក្នុងទី‌សក្ការៈ។ ពួកបូជា‌ចារ្យនឹងសង់ផ្ទះនៅលើដីនោះ ហើយទី‌សក្ការៈក៏ស្ថិតនៅលើដីនោះដែរ។

៥ ត្រូវទុកដីដែលមានបណ្តោយពីរ‌ម៉ឺនប្រាំ‌ពាន់ហត្ថ និងទទឹងមួយ‌ម៉ឺនហត្ថទៀត សម្រាប់ឲ្យពួកលេវីដែលធ្វើការនៅក្នុងព្រះ‌ដំណាក់ សង់ក្រុងរស់នៅ។

៦ ត្រូវវាស់ដីមួយចំណែកទៀត នៅទន្ទឹមគ្នានឹងដីសក្ការៈ ដែលមានទទឹងប្រាំ‌ពាន់ហត្ថ បណ្តោយពីរ‌ម៉ឺនប្រាំ‌ពាន់ហត្ថ ទុកសម្រាប់ឲ្យកូនចៅអ៊ីស្រា‌អែលសង់ក្រុងរស់នៅ។ ៧ ត្រូវទុកដីដែលនៅសងខាងដីសក្ការៈ និងដីក្រុង គឺដីដែលនៅទន្ទឹមដីសក្ការៈ និងដីក្រុង ទាំងខាងលិច ទាំងខាងកើត ឲ្យមេដឹកនាំ។ ដីរបស់មេដឹកនាំមានទំហំស្មើនឹងចំណែកដីរបស់កុល‌សម្ព័ន្ធនីមួយៗ។ ៨ ដីនោះជាចំណែកមត៌ករបស់មេដឹកនាំ នៅក្នុងស្រុកអ៊ីស្រា‌អែល។ មេដឹកនាំដែលយើងតែង‌តាំង នឹងលែងកេង‌ប្រវ័ញ្ចប្រជាជនរបស់យើងទៀតហើយ ពួកគេនឹងប្រគល់ទឹកដីឲ្យកូនចៅអ៊ីស្រា‌អែលតាមកុល‌សម្ព័ន្ធរបស់ខ្លួន»។

ភារ‌កិច្ចរបស់មេដឹកនាំ

៩ ព្រះ‌ជា‌អម្ចាស់មានព្រះ‌បន្ទូលទៀតថា៖ «មេដឹកនាំអ៊ីស្រា‌អែលអើយ អ្នករាល់គ្នាប្រព្រឹត្តអំពើឃោរ‌ឃៅ លួចប្លន់ប្រជា‌រាស្ដ្រជ្រុលពេកហើយ ល្មមឈប់ទៅ! ចូរនាំគ្នាប្រព្រឹត្តតាមសុចរិតយុត្តិធម៌ កុំរឹបអូសយកដីពីប្រជាជនរបស់យើងទៀត! - នេះជាព្រះ‌បន្ទូលរបស់ព្រះ‌ជា‌អម្ចាស់។

១០ កុំបំបាត់ភ្នែកជញ្ជីងឡើយ ចូរប្រើអេផា* ប្រើបាថ*ឲ្យបានត្រឹមត្រូវ។ ១១ អេផាសម្រាប់វាល់ស្រូវ និងបាថ សម្រាប់វាល់វត្ថុរាវ ត្រូវមានចំណុះដូចគ្នា គឺស្មើមួយភាគដប់នៃហូមែរ* ដែលជាមូល‌ដ្ឋាននៃរង្វាល់។ ១២ រីឯទម្ងន់វិញ ក្នុងមួយស៊ីគ* មានម្ភៃកេរ៉ា* ហើយមួយមីន* មានហុក‌សិបស៊ីគ។

១៣ ភោគផលដែលអ្នករាល់គ្នាត្រូវញែកទុកជាតង្វាយនោះ គឺស្រូវមួយភាគហុក‌សិប ពោតមួយភាគហុក‌សិប។ ១៤ ចំណែកឯប្រេងវិញ ត្រូវវាល់មួយភាគ‌រយទុកជាតង្វាយ ដោយយកបាថ មកវាល់។ មួយហូមែរ មានដប់បាថ ហើយមួយគរ*ក៏មានដប់បាថ ដែរ។ ១៥ រីឯហ្វូងសត្វនៅតាមវាលស្មៅនៃស្រុកអ៊ីស្រា‌អែល ក្នុងហ្វូងចៀមដែលមានចំនួនពីរ‌រយក្បាល ត្រូវយកមួយក្បាលមកថ្វាយជាតង្វាយដុត*ទាំងមូល ជាយញ្ញ‌បូជាមេត្រី‌ភាព និងធ្វើពិធីរំដោះបាប - នេះជាព្រះ‌បន្ទូលរបស់ព្រះ‌ជា‌អម្ចាស់។ ១៦ ប្រជាជនទាំងមូលនៅក្នុងស្រុកត្រូវប្រមូលតង្វាយទាំងនោះ យកទៅឲ្យមេដឹកនាំស្រុកអ៊ីស្រា‌អែល។ ១៧ មេដឹកនាំមានភារ‌កិច្ចចាត់ចែងតង្វាយដុតទាំងមូល តង្វាយផ្សេងៗ និងពិធីច្រួច‌ស្រា ព្រមទាំងពិធីបុណ្យផ្សេងៗ បុណ្យចូលខែថ្មី ថ្ងៃសប្ប័ទ និងបុណ្យដ៏សំខាន់ឯទៀតៗដែលកូនចៅអ៊ីស្រា‌អែលប្រារព្ធធ្វើ។ គេនឹងថ្វាយយញ្ញ‌បូជាលោះបាប តង្វាយម្សៅ តង្វាយដុតទាំងមូល យញ្ញ‌បូជានៃមេត្រី‌ភាព និងធ្វើពិធីរំដោះបាបកូនចៅអ៊ីស្រា‌អែល»។

ពិធីជម្រះទី‌សក្ការៈឲ្យបរិសុទ្ធ

១៨ ព្រះ‌ជា‌អម្ចាស់មានព្រះ‌បន្ទូលថា៖ «នៅថ្ងៃទីមួយនៃខែទីមួយ ត្រូវយកគោស្ទាវឈ្មោលមួយល្អឥតខ្ចោះ មកធ្វើយញ្ញ‌បូជា ដើម្បីជម្រះទី‌សក្ការៈឲ្យបរិសុទ្ធ។ ១៩ បូជា‌ចារ្យត្រូវយកឈាមរបស់សត្វ ដែលគេបូជារំដោះបាបនោះ លាបនៅលើក្របទ្វារនៃព្រះ‌ដំណាក់ លើគែមទាំងបួនជ្រុងរបស់អាសនៈ ព្រមទាំងលើក្របខ្លោងទ្វារខាងក្នុងផង។ ២០ នៅថ្ងៃទីប្រាំពីរក្នុងខែដដែលក៏ត្រូវធ្វើដូច្នេះដែរ ដើម្បីលោះបាបអ្នកដែលប្រព្រឹត្តអំពើបាប ដោយអចេតនា ឬដោយធ្វេស‌ប្រហែស។ អ្នករាល់គ្នាធ្វើបែបនេះ ដើម្បីជម្រះព្រះ‌ដំណាក់ឲ្យបរិសុទ្ធ។

២១ នៅថ្ងៃទីដប់‌បួននៃខែទីមួយ អ្នករាល់គ្នាត្រូវប្រារព្ធធ្វើពិធីបុណ្យចម្លង*។ បុណ្យនេះមាន‌រយៈពេលប្រាំពីរថ្ងៃ ហើយក្នុងអំឡុងពេលនោះ អ្នករាល់គ្នាត្រូវបរិភោគនំបុ័ងឥតមេ។ ២២ នៅថ្ងៃនោះ មេដឹកនាំត្រូវយកគោបាមួយមកធ្វើជាយញ្ញ‌បូជារំដោះបាបខ្លួនឯងផ្ទាល់ និងបាបរបស់ប្រជាជនទាំងមូល។ ២៣ ក្នុងអំឡុងពេលបុណ្យប្រាំពីរថ្ងៃនោះ មេដឹកនាំត្រូវយកគោបាប្រាំពីរ និងចៀមឈ្មោលប្រាំពីរដ៏ល្អឥតខ្ចោះ មកថ្វាយរៀងរាល់ថ្ងៃ ជាតង្វាយដុតទាំងមូល ហើយរៀងរាល់ថ្ងៃ ត្រូវថ្វាយពពែឈ្មោលមួយជាយញ្ញ‌បូជាលោះបាបផង។ ២៤ សម្រាប់គោមួយ ត្រូវយកតង្វាយម្សៅមួយថាំងមកថ្វាយជាមួយ រីឯចៀមឈ្មោលមួយក៏ត្រូវយកតង្វាយម្សៅមួយថាំងមកថ្វាយជាមួយដែរ ហើយម្សៅមួយថាំងត្រូវលាយប្រេងប្រាំមួយលីត្រ។

២៥ នៅថ្ងៃទីដប់ប្រាំ ក្នុងខែទីប្រាំពីរ នៅពេលបុណ្យ ត្រូវថ្វាយយញ្ញ‌បូជាលោះបាប ក្នុងអំឡុងពេលប្រាំពីរថ្ងៃ ព្រមទាំងតង្វាយដុត និងតង្វាយម្សៅលាយជាមួយប្រេងដូចមុនដែរ»។

ថ្ងៃសប្ប័ទ បុណ្យចូលខែថ្មី និងពិធីផ្សេងៗ

១ ព្រះ‌ជា‌អម្ចាស់មានព្រះ‌បន្ទូលដូចតទៅ៖ «ត្រូវបិទខ្លោងទ្វារទីធ្លាខាងក្នុង គឺខ្លោងទ្វារខាងកើតចំនួនប្រាំមួយថ្ងៃ ដែលប្រជាជនធ្វើការ តែត្រូវបើកទ្វារនោះនៅថ្ងៃសប្ប័ទ និងថ្ងៃបុណ្យចូលខែថ្មី។ ២ មេដឹកនាំត្រូវចូលមកតាមច្រកបន្ទប់ល្វែងនៃខ្លោងទ្វារខាងក្រៅ ហើយឈប់នៅចំមាត់ទ្វារ។ គាត់ប្រគល់សត្វឲ្យពួកបូជា‌ចារ្យ ដើម្បីថ្វាយតង្វាយដុត និងយញ្ញ‌បូជានៃមេត្រី‌ភាព។ មេដឹកនាំត្រូវក្រាបថ្វាយ‌បង្គំ នៅត្រង់ខ្លោងទ្វារ រួចចេញទៅវិញ។ ត្រូវទុកខ្លោងទ្វារចំហរហូតដល់ល្ងាច។ ៣ នៅថ្ងៃសប្ប័ទ និងថ្ងៃបុណ្យចូលខែថ្មី ប្រជាជន ត្រូវនាំគ្នាក្រាបថ្វាយ‌បង្គំព្រះ‌អម្ចាស់ នៅមុខខ្លោងទ្វារនេះ។

៤ មេដឹកនាំត្រូវយកកូនចៀមដ៏ល្អឥតខ្ចោះប្រាំមួយក្បាល និងចៀមឈ្មោលដ៏ល្អឥតខ្ចោះមួយក្បាល មកថ្វាយព្រះ‌អម្ចាស់ ជាតង្វាយដុតទាំងមូល។ ៥ ត្រូវថ្វាយម្សៅមួយថាំងជាមួយចៀមឈ្មោលនោះ ហើយប្រសិនបើធ្វើបាន ត្រូវថ្វាយម្សៅមួយថាំងជាមួយកូនចៀម ដោយលាយប្រេងប្រាំមួយលីត្រផង។ ៦ នៅថ្ងៃបុណ្យចូលខែថ្មី មេដឹកនាំត្រូវថ្វាយគោស្ទាវឈ្មោលមួយក្បាល កូនចៀមប្រាំមួយក្បាល និងចៀមឈ្មោលមួយក្បាលដែលសុទ្ធតែល្អឥតខ្ចោះ។ ៧ ត្រូវយកម្សៅមួយថាំងមកថ្វាយជាមួយគោនោះ មួយថាំងទៀតថ្វាយជាមួយចៀមឈ្មោល ហើយប្រសិនបើធ្វើបាន ត្រូវថ្វាយម្សៅមួយថាំងទៀតជាមួយកូនចៀម ដោយលាយប្រេងប្រាំមួយលីត្រផង។

៨ មេដឹកនាំចូលតាមច្រកបន្ទប់ល្វែងនៃខ្លោងទ្វារ រួចចេញទៅវិញតាមច្រកដដែល។ ៩ ពេលប្រជាជននាំគ្នាមកថ្វាយ‌បង្គំព្រះ‌អម្ចាស់ក្នុងពិធីបុណ្យដ៏សំខាន់ៗ អ្នកណាចូលតាមខ្លោងទ្វារខាងជើង ដើម្បីមកថ្វាយ‌បង្គំ ត្រូវចេញទៅវិញតាមខ្លោងទ្វារខាងត្បូង។ អ្នកណាចូលតាមខ្លោងទ្វារខាងត្បូង ត្រូវចេញទៅវិញ តាមខ្លោងទ្វារខាងជើង។ មិនត្រូវចេញតាមខ្លោងទ្វារដែលខ្លួនចូលមកនោះឡើយ គឺត្រូវចេញតាមខ្លោងទ្វារដែលនៅទល់មុខ។ ១០ ពេលប្រជាជនចូល មេដឹកនាំក៏ចូលមកជាមួយ ហើយពេលពួកគេចេញទៅវិញ គាត់ក៏ត្រូវចេញទៅវិញជាមួយដែរ។

១១ នៅថ្ងៃបុណ្យធម្មតា ឬក្នុងឱកាសពិធីបុណ្យសំខាន់ៗ ត្រូវថ្វាយតង្វាយម្សៅមួយថាំងជាមួយគោបា មួយថាំងទៀតជាមួយចៀមឈ្មោល ហើយប្រសិនបើធ្វើបាន ត្រូវថ្វាយម្សៅមួយថាំងទៀតជាមួយកូនចៀម ដោយលាយប្រេងប្រាំមួយលីត្រផង។ ១២ ប្រសិនបើមេដឹកនាំស្ម័គ្រចិត្តយកតង្វាយដុត ឬយញ្ញ‌បូជាមេត្រី‌ភាពពិសេស មកថ្វាយព្រះ‌អម្ចាស់ គេត្រូវបើកទ្វារខាងកើតឲ្យគាត់ចូល។ គាត់ថ្វាយតង្វាយដុត និងយញ្ញ‌បូជាមេត្រី‌ភាព ដូចគាត់ធ្លាប់ថ្វាយនៅថ្ងៃសប្ប័ទដែរ។ បន្ទាប់មក គាត់ចេញទៅវិញ រួចគេត្រូវបិទទ្វារពីក្រោយគាត់។

១៣ រៀងរាល់ថ្ងៃ អ្នកត្រូវថ្វាយកូនចៀមដ៏ល្អឥតខ្ចោះមួយក្បាល អាយុមួយខួប ជាតង្វាយដុតដល់ព្រះ‌អម្ចាស់។ អ្នកត្រូវថ្វាយកូនចៀមនេះរៀងរាល់ព្រឹក។ ១៤ ចូរយកតង្វាយម្សៅប្រាំគីឡូ‌ក្រាម និងប្រេងពីរលីត្រមកលាយគ្នា ថ្វាយជាតង្វាយដល់ព្រះ‌អម្ចាស់ ជាមួយតង្វាយដុតនោះដែរ។ ត្រូវធ្វើតាមសេចក្ដីដែលមានបង្គាប់ទុកនេះរហូតតទៅ។ ១៥ រាល់ព្រឹក ត្រូវថ្វាយកូនចៀម តង្វាយម្សៅ និងប្រេង ជាតង្វាយដុត រហូតតរៀងទៅ»។

១៦ ព្រះ‌ជា‌អម្ចាស់មានព្រះ‌បន្ទូលថា៖ «ប្រសិនបើមេដឹកនាំចែកដីមួយកន្លែង ជាអំណោយដល់កូនរបស់ខ្លួន អំណោយនោះត្រូវចាត់ទុកជាចំណែកមត៌ក ជាកេរ‌អាករ ដែលកូននោះអាចចែកតកូនចៅរបស់ខ្លួន។ ១៧ ប៉ុន្តែ ប្រសិនបើគាត់យកដីដែលជាមត៌ករបស់ខ្លួន ប្រគល់ជាអំណោយដល់អ្នកបម្រើ ដីនោះនៅជាកម្ម‌សិទ្ធិរបស់អ្នកបម្រើ រហូតដល់ឆ្នាំដែលគេបានរួចទៅជាអ្នកជា បន្ទាប់មក ត្រូវបង្វិលដីនោះមកមេដឹកនាំវិញ ដ្បិតមានតែកូនរបស់គាត់ទេ ដែលមានសិទ្ធិទទួលដីនោះជាកេរ‌មត៌ក។ ១៨ មេដឹកនាំមិនត្រូវប៉ះ‌ពាល់ដី‌ធ្លីរបស់ប្រជាជនទេ គឺមិនត្រូវរឹបអូសយកដីរបស់ពួកគេឡើយ។ មេដឹកនាំត្រូវយកដីរបស់ខ្លួនផ្ទាល់ ចែកជាកេរ‌មត៌កដល់កូនៗរបស់ខ្លួន ដើម្បីកុំឲ្យមាននរណាម្នាក់ ក្នុងចំណោមប្រជាជន បាត់បង់ដី‌ធ្លីរបស់ខ្លួន»។

១៩ បន្ទាប់មក បុរសនោះនាំខ្ញុំចូលតាមច្រកមួយនៅក្បែរខ្លោងទ្វារ ក្នុងបន្ទប់ដ៏សក្ការៈដែលបម្រុងទុកសម្រាប់ពួកបូជា‌ចារ្យ គឺបន្ទប់ដែលបែរមុខទៅរកទិសខាងជើង។ ខ្ញុំឃើញកន្លែងមួយនៅកៀនខាងក្នុង គឺនៅខាងលិច។ ២០ លោកមានប្រសាសន៍មកខ្ញុំថា៖ «នេះជាកន្លែងពួកបូជា‌ចារ្យស្ងោរសាច់ ដែលគេយកមកថ្វាយជាយញ្ញ‌បូជាសុំលើក‌លែងទោស និងយញ្ញ‌បូជារំដោះបាប។ គេក៏ចម្អិនតង្វាយម្សៅនៅទីនេះដែរ ដើម្បីចៀស‌វាងសែងទៅខាងក្រៅ ក្រែងលោប្រជាជនប៉ះ‌ពាល់របស់សក្ការៈ»។ ២១ លោកនាំខ្ញុំចេញទៅទី‌លានខាងក្រៅ ឲ្យខ្ញុំដើរកាត់ជ្រុងទាំងបួននៃទី‌លាន។ តាមជ្រុងនីមួយៗនៃទី‌លាននោះ មានទីធ្លាមួយ។ ២២ ទីធ្លាទាំងបួនមានទំហំតូចប៉ុនៗគ្នា គឺបណ្តោយសែ‌សិបហត្ថ និងទទឹងសាម‌សិបហត្ថ។ ២៣ មានរបងមួយព័ទ្ធជុំ‌វិញទីធ្លាទាំងបួន ហើយមានកន្លែងធ្វើម្ហូប នៅជាប់នឹងរបងដែលព័ទ្ធជុំ‌វិញនោះផង។ ២៤ បុរសនោះមានប្រសាសន៍មកខ្ញុំថា៖ «នេះជាកន្លែងដែលពួកជំនួយការក្នុងព្រះ‌ដំណាក់ចម្អិនសាច់ ដែលប្រជាជនយកមកថ្វាយជាយញ្ញ‌បូជា»។

ទឹកស្ទឹងហូរចេញពីព្រះ‌វិហារ

១ បុរសនោះនាំខ្ញុំឆ្ពោះទៅកាន់ទ្វារព្រះ‌ដំណាក់វិញ។ នៅទីនោះ ខ្ញុំឃើញទឹកផុសចេញពីក្រោមមាត់ទ្វារ ហូរទៅទិសខាងកើត ព្រោះព្រះ‌ដំណាក់បែរមុខទៅខាងកើត។ ទឹកហូរចុះទៅខាងស្តាំព្រះ‌ដំណាក់ កាត់តាមខាងត្បូងអាសនៈ។ ២ បុរសនោះនាំខ្ញុំចេញពីទី‌លានតាមខ្លោងទ្វារខាងជើង ហើយនាំខ្ញុំដើរវាងព្រះ‌ដំណាក់ រហូតដល់ខាងក្រៅទ្វារខាងកើត។ នៅទីនោះ ទឹកក៏ហូរចេញពីខាងស្តាំមកដែរ។

៣ កាលបុរសនោះចេញទៅខាងកើត ទាំងកាន់ខ្សែរង្វាស់ លោកវាស់មួយពាន់ហត្ថ រួចឲ្យខ្ញុំដើរលុយទឹក ទឹកឡើងដល់ត្រឹមភ្នែកគោល។ ៤ លោកវាស់មួយពាន់ហត្ថទៀត ហើយឲ្យខ្ញុំដើរលុយទឹក ទឹកឡើងដល់ត្រឹមក្បាលជង្គង់។ លោកវាស់មួយពាន់ហត្ថសាជាថ្មីទៀត រួចឲ្យខ្ញុំលុយទឹក លើកនេះ ទឹកឡើងដល់ត្រឹមចង្កេះ។ ៥ លោកវាស់ថែមមួយពាន់ហត្ថទៀត ពេលនោះ ទឹកហូរខ្លាំងដូចទឹកស្ទឹង ខ្ញុំលុយលែងកើតត្រូវតែហែល ព្រោះទឹកឡើងខ្លាំងពេក ហើយជ្រៅផង។ ៦ លោកប្រាប់ខ្ញុំថា៖ «កូនមនុស្សអើយ! តើអ្នកឃើញឬទេ?» លោកក៏នាំខ្ញុំទៅមាត់ស្ទឹងវិញ។ ៧ កាលខ្ញុំមកដល់មាត់ស្ទឹង ឃើញមានដើមឈើជាច្រើនដុះទាំងសងខាង។ ៨ លោកប្រាប់ខ្ញុំថា៖ «ទឹកនេះហូរទៅស្រុកខាងកើត ចុះទៅដល់តំបន់ទន្លេយ័រដាន់ រួចហូរចាក់ទៅសមុទ្រ ធ្វើឲ្យទឹកសមុទ្រប្រែជាទឹកសាប។ ៩ ស្ទឹងនេះហូរកាត់កន្លែងណា កន្លែងនោះមានសត្វគ្រប់ប្រភេទរស់នៅរវើក‌រវ័ណ្ឌ ហើយមានត្រីដ៏ច្រើនឥតគណនា ដ្បិតទឹកនេះហូរចូលសមុទ្រ ធ្វើឲ្យទឹកសមុទ្រនោះប្រែទៅជាទឹកសាប។ ទឹកនេះហូរទៅកន្លែងណា ជីវិតនឹងកើតមាននៅកន្លែងនោះ។ ១០ ពេលនោះ មានអ្នកនេសាទរាយអួនរបស់ខ្លួនចាប់ពីអេន-‌កេឌី រហូតដល់អេន-‌អេក្លា‌អ៊ីម។ ត្រីនៅក្នុងនោះ មានពូជច្រើនប្រភេទ ដូចពូជត្រីនៅក្នុងមហា‌សាគរ។ ១១ រីឯទឹកនៅតាមព្រៃល្បប់ និងព្រៃរនាមជាប់នឹងសមុទ្រនោះ នៅតែប្រៃដដែល ព្រោះជាកន្លែងបម្រុងទុកសម្រាប់ធ្វើអំបិល។ ១២ នៅតាមមាត់ស្ទឹងទាំងសងខាង មានដើមឈើស៊ីផ្លែគ្រប់មុខដុះ ស្លឹកវាមិនចេះស្រពោនឡើយ ហើយផ្លែក៏មិនចេះអស់ដែរ។ រៀងរាល់ខែ ដើមឈើទាំងនោះផ្តល់ផ្លែថ្មីមិនដាច់ ដ្បិតវាទទួលទឹកដែលហូរចេញពីទី‌សក្ការៈមក។ គេបេះផ្លែឈើនេះធ្វើជាអាហារ ហើយយកស្លឹកវាធ្វើជាថ្នាំសង្កូវសម្រាប់កែរោគផង»។

ការបែងចែកទឹកដីស្រុកអ៊ីស្រា‌អែល

១៣ ព្រះ‌ជា‌អម្ចាស់មានព្រះ‌បន្ទូលថា៖ «អ្នករាល់គ្នាត្រូវបែងចែកទឹកដីឲ្យកុល‌សម្ព័ន្ធទាំងដប់‌ពីរនៃជនជាតិអ៊ីស្រា‌អែល ដូចតទៅ: កូនចៅយ៉ូសែបទទួលពីរចំណែក។ ១៤ ក្រៅពីនោះ អ្នករាល់គ្នាត្រូវបែងចែកឲ្យស្មើ គឺស្របតាមពាក្យដែលយើងបានសន្យាយ៉ាងឱឡា‌រិកថា នឹងប្រគល់ឲ្យដូន‌តារបស់អ្នករាល់គ្នា។ ដូច្នេះ ទឹកដីនេះត្រូវបានជាកេរ‌មត៌ករបស់អ្នករាល់គ្នា។ ១៥ ព្រំស្រុករបស់អ្នករាល់គ្នាមានដូចតទៅ: ខាងជើងត្រូវគិតពីសមុទ្រមេឌី‌ទែរ៉ា‌ណេ ផ្លូវទៅហេត‌ឡូនរហូតដល់ច្រកចូលសេដាត ១៦ ហាម៉ាត់ បេរ៉ូតា ស៊ីប្រា‌អ៊ីម ដែលនៅចន្លោះព្រំ‌ដែនដាម៉ាស់ និងព្រំ‌ដែនហា‌ម៉ាត់ ហាស៊ែរ-‌ហាត់ទី‌កូន នៅព្រំ‌ដែនហាវរ៉ន។ ១៧ ដូច្នេះ ព្រំ‌ដែនខាងជើងត្រូវលាតសន្ធឹងចាប់ពីសមុទ្រ កាត់តាមហាត់សារ-‌អេណូន ព្រំ‌ប្រទល់ដាម៉ាស សាផូនខាងជើង និងព្រំ‌ប្រទល់ស្រុកហាម៉ាត់។ ១៨ ព្រំ‌ដែនខាងកើត គឺទន្លេយ័រដាន់ នៅចន្លោះហាវរ៉ុន ដាម៉ាស់ និងកាឡាដ ព្រមទាំងស្រុកអ៊ីស្រា‌អែល។ ព្រំ‌ដែនខាងកើតនេះ ត្រូវវាស់ចាប់ពីព្រំ‌ប្រទល់ខាងជើង រហូតដល់សមុទ្រខាងកើត។ ១៩ ព្រំ‌ប្រទល់ខាងត្បូងលាតសន្ធឹងចាប់ពីតាម៉ារ រហូតដល់ប្រភពទឹកមេរី‌បា នៅវាលរហោ‌ស្ថានកាដែស និងរហូតដល់ទឹកអូដែលហូរចាក់ទៅក្នុងសមុទ្រមេឌី‌ទែរ៉ា‌ណេ។ ២០ ព្រំ‌ដែនខាងលិច គឺសមុទ្រមេឌី‌ទែរ៉ា‌ណេ ដោយគិតចាប់តាំងពីព្រំ‌ប្រទល់ខាងត្បូង រហូតទៅដល់ច្រកចូលហា‌ម៉ាត់។

២១ ត្រូវចែកទឹកដីគ្នាតាមកុល‌សម្ព័ន្ធនៃជនជាតិអ៊ីស្រា‌អែល។ ២២ ត្រូវបែងចែកដីនេះជាចំណែកមត៌ក ដោយចាប់ឆ្នោតក្នុងចំណោមអ្នករាល់គ្នា។ រីឯជនបរទេសដែលរស់នៅជាមួយ ហើយបង្កើតកូនចៅក្នុងចំណោមអ្នករាល់គ្នា ត្រូវរាប់ជាម្ចាស់ស្រុកដូចជនជាតិអ៊ីស្រា‌អែលដែរ គឺឲ្យគេចាប់ឆ្នោតទទួលដីជាចំណែកមត៌ក ជាមួយកុល‌សម្ព័ន្ធទាំង‌ឡាយនៃជនជាតិអ៊ីស្រា‌អែលដែរ។ ២៣ ដូច្នេះ ជនបរទេសស្នាក់ជាមួយកុល‌សម្ព័ន្ធណា ត្រូវចែកដីឲ្យគេក្នុងកុល‌សម្ព័ន្ធនោះ ទុកជាចំណែកមត៌កផង - នេះជាព្រះ‌បន្ទូលរបស់ព្រះ‌ជា‌អម្ចាស់»។

១ តទៅនេះជាឈ្មោះកុល‌សម្ព័ន្ធ និងចំណែកមត៌ករបស់គេ។ ទឹកដីរបស់កុល‌សម្ព័ន្ធដាន់ស្ថិតនៅចុងខាងជើងបំផុត គឺនៅតាមបណ្តោយផ្លូវពីហាត់ឡូនទៅហាម៉ាត់ ហាត់សារ-‌អេណូន ព្រំ‌ប្រទល់ដាម៉ាស គឺទៅដល់ខាងជើងហាម៉ាត់ លាតសន្ធឹងចាប់ពីទិសខាងកើត ទៅទិសខាងលិច។ ២ ទឹកដីរបស់កុល‌សម្ព័ន្ធអស៊ែរស្ថិតនៅជាប់នឹងទឹកដីដាន់ ចាប់ពីខាងកើតទៅខាងលិច។ ៣ ទឹកដីរបស់កុល‌សម្ព័ន្ធណែបថា‌លីនៅជាប់នឹងទឹកដីអស៊ែរ ចាប់ពីខាងកើតទៅខាងលិច។ ៤ ទឹកដីរបស់កុល‌សម្ព័ន្ធម៉ាណា‌សេនៅជាប់នឹងទឹកដីណែបថា‌លី ចាប់ពីខាងកើតទៅខាងលិច។ ៥ ទឹកដីរបស់កុល‌សម្ព័ន្ធអេប្រា‌អ៊ីមនៅជាប់នឹងទឹកដីម៉ាណា‌សេ ចាប់ពីខាងកើតទៅខាងលិច។ ៦ ទឹកដីរបស់កុល‌សម្ព័ន្ធរូបេននៅជាប់នឹងទឹកដីអេប្រា‌អ៊ីម ចាប់ពីខាងកើតទៅខាងលិច។ ៧ ទឹកដីរបស់កុល‌សម្ព័ន្ធយូដានៅជាប់នឹងទឹកដីរូបេន ចាប់ពីខាងកើតទៅខាងលិច។

៨ នៅជាប់នឹងទឹកដីរបស់កុល‌សម្ព័ន្ធយូដា ចាប់ពីខាងកើតទៅខាងលិច ត្រូវញែកដីមួយចំណែកដែលមានទទឹងពីរ‌ម៉ឺនប្រាំ‌ពាន់ហត្ថ ហើយមានបណ្តោយស្មើនឹងចំណែកទឹកដីរបស់កុល‌សម្ព័ន្ធនីមួយៗ ដែលរាប់ពីខាងកើតទៅខាងលិច។ ទី‌សក្ការៈត្រូវនៅចំកណ្ដាលដីនោះ។ ៩ ដីដែលអ្នករាល់គ្នាញែកថ្វាយព្រះ‌អម្ចាស់ ត្រូវមានបណ្តោយពីរ‌ម៉ឺនប្រាំ‌ពាន់ហត្ថ ទទឹងមួយ‌ម៉ឺនហត្ថ។ ១០ ដីដ៏សក្ការៈនេះ ត្រូវចែកឲ្យពួកបូជា‌ចារ្យទុកជាកម្ម‌សិទ្ធិ គឺខាងជើងមានប្រវែងពីរ‌ម៉ឺនប្រាំ‌ពាន់ហត្ថ ខាងលិចមានប្រវែងមួយ‌ម៉ឺនហត្ថ ខាងកើតមានប្រវែងមួយ‌ម៉ឺនហត្ថ ខាងត្បូងមានប្រវែងពីរ‌ម៉ឺនប្រាំ‌ពាន់ហត្ថ។ ទី‌សក្ការៈរបស់ព្រះ‌អម្ចាស់ត្រូវនៅចំកណ្ដាល។ ១១ ដីនេះត្រូវបានជាកម្ម‌សិទ្ធិកូនចៅរបស់លោកសាដុក ដែលបានទទួលមុខ‌ងារជាបូជា‌ចារ្យ។ អ្នកទាំងនោះប្ដូរផ្ដាច់បម្រើយើង គឺនៅគ្រាដែល ជនជាតិអ៊ីស្រា‌អែលវង្វេងឆ្ងាយពីយើង បូជា‌ចារ្យទាំងនោះពុំបានវង្វេងដូចពួកលេវីទេ។ ១២ ដូច្នេះ ពួកគេត្រូវទទួលដីដ៏សក្ការៈបំផុតនេះ ជាដីញែកថ្វាយព្រះ‌អម្ចាស់ នៅជាប់នឹងដីរបស់ពួកលេវី។ ១៣ ពួកលេវីនឹងទទួលដី ដែលនៅតាមបណ្តោយព្រំ‌ប្រទល់ដីរបស់ពួកបូជា‌ចារ្យ គឺបណ្តោយពីរ‌ម៉ឺនប្រាំ‌ពាន់ហត្ថ ទទឹងមួយ‌ម៉ឺនហត្ថដូចទំហំដីរបស់បូជា‌ចារ្យដែរ។ ១៤ ពួកគេមិនអាចលក់ដូរ ឬបង្វិលដីទាំងនេះទេ ព្រោះជាចំណែកល្អជាងគេដែលបានញែកថ្វាយព្រះ‌អម្ចាស់។

១៥ ចំណែកឯដីដែលនៅសល់ មានទទឹងប្រាំ‌ពាន់ហត្ថ និងបណ្តោយពីរ‌ម៉ឺនប្រាំ‌ពាន់ហត្ថ ត្រូវចាត់ទុកជាដីសាមញ្ញធម្មតា សម្រាប់សង់ក្រុង ផ្ទះ និងវាលស្មៅ ទីក្រុងស្ថិតនៅចំកណ្ដាល។ ១៦ ទីក្រុងនេះមានទំហំដូចតទៅ: ខាងជើងប្រវែងបួន‌ពាន់ប្រាំ‌រយហត្ថ ខាងត្បូងប្រវែងបួន‌ពាន់ប្រាំ‌រយហត្ថ ខាងកើតប្រវែងបួន‌ពាន់ប្រាំ‌រយហត្ថ ខាងលិចប្រវែងបួន‌ពាន់ប្រាំ‌រយហត្ថ។ ១៧ ទីក្រុងនេះត្រូវមានវាលស្មៅពីរ‌រយហា‌សិបហត្ថខាងជើង ពីរ‌រយហា‌សិបហត្ថខាងត្បូង ពីរ‌រយហា‌សិបហត្ថខាងកើត ពីរ‌រយហា‌សិបហត្ថខាងលិច។ ១៨ ដីដែលនៅសល់តាមបណ្តោយដីសក្ការៈមានប្រវែងមួយ‌ម៉ឺនហត្ថខាងកើត មួយ‌ម៉ឺនហត្ថខាងលិច។ ដីនោះទុកសម្រាប់ដាំដំណាំ ជាអាហាររបស់អស់អ្នកដែលធ្វើការនៅក្នុងទីក្រុង។ ១៩ អ្នកធ្វើការក្នុងទីក្រុង ទោះបីគេមកពីកុល‌សម្ព័ន្ធណាក្តី ក៏គេអាចដាំដំណាំលើដីនោះបានដែរ។ ២០ សរុបមក ដីដែលត្រូវញែកទុកថ្វាយព្រះ‌អម្ចាស់ មានប្រវែងពីរ‌ម៉ឺនប្រាំ‌ពាន់ហត្ថបួនជ្រុង។ ត្រូវទុកដីសក្ការៈនោះមួយភាគបួន ជាកម្ម‌សិទ្ធិរបស់ទីក្រុង។

២១ ដីដែលនៅសល់ ត្រូវបានជាកម្ម‌សិទ្ធិរបស់មេដឹកនាំ គឺដីដែលនៅសងខាងដីសក្ការៈ និងដីរបស់ទីក្រុង មានបណ្តោយពីរ‌ម៉ឺនប្រាំ‌ពាន់ហត្ថ ហើយទទឹងគិតចាប់ពីព្រំ‌ប្រទល់ខាងកើត និងព្រំ‌ប្រទល់ខាងលិច។ ដីសក្ការៈ និងទី‌សក្ការៈក្នុងព្រះ‌ដំណាក់ស្ថិតនៅចំកណ្ដាល។ ២២ ដីរបស់មេដឹកនាំមានដីរបស់ពួកលេវី និងដីរបស់ទីក្រុងនៅចំពាក់កណ្ដាល ដីនោះស្ថិតនៅចន្លោះដីរបស់កុល‌សម្ព័ន្ធយូដា និងកុល‌សម្ព័ន្ធបេន‌យ៉ាមីន។ ២៣ កុល‌សម្ព័ន្ធឯទៀតៗដែលត្រូវទទួលដីជាចំណែកមត៌កនោះ គឺកុល‌សម្ព័ន្ធបេន‌យ៉ាមីន ចាប់ពីខាងកើតទៅខាងលិច។ ២៤ ទឹកដីរបស់កុល‌សម្ព័ន្ធស៊ីម៉ូននៅជាប់នឹងទឹកដីបេន‌យ៉ាមីន ចាប់ពីខាងកើតទៅខាងលិច។ ២៥ ទឹកដីរបស់កុល‌សម្ព័ន្ធអ៊ីសាកានៅជាប់នឹងទឹកដីស៊ីម៉ូន ចាប់ពីខាងកើតទៅខាងលិច។ ២៦ ទឹកដីរបស់កុល‌សម្ព័ន្ធសាប៊ូ‌ឡូននៅជាប់នឹងទឹកដីអ៊ីសាកា ចាប់ពីខាងកើតទៅខាងលិច។ ២៧ ទឹកដីរបស់កុល‌សម្ព័ន្ធកាដនៅជាប់នឹងទឹកដីសាប៊ូ‌ឡូន ចាប់ពីខាងកើតទៅខាងលិច។ ២៨ ទឹកដីរបស់កុល‌សម្ព័ន្ធកាដ ជាព្រំ‌ដែនខាងត្បូងរបស់ស្រុក លាតសន្ធឹងចាប់ពីតាម៉ាររហូតដល់មេរី‌បានៅវាលរហោ‌ស្ថានកាដែស និងរហូតដល់ទឹកអូរ ដែលហូរចាក់ទៅក្នុងសមុទ្រមេឌី‌ទែរ៉ា‌ណេ។ ២៩ នេះហើយជាទឹកដីដែលអ្នករាល់គ្នាត្រូវបែងចែក ដល់កុល‌សម្ព័ន្ធនានានៃជនជាតិអ៊ីស្រា‌អែល ដោយចាប់ឆ្នោតយកជាចំណែកមត៌ករបស់ពួកគេ -នេះជាព្រះ‌បន្ទូលរបស់ព្រះ‌ជា‌អម្ចាស់។

៣០ រីឯច្រកចូលទីក្រុងមានដូចតទៅ: កំពែងខាងជើងមានបណ្តោយបួន‌ពាន់ប្រាំ‌រយហត្ថ។ ៣១ នៅកំពែងនេះមានទ្វារក្រុងបី ដាក់ឈ្មោះតាមកុល‌សម្ព័ន្ធនៃជនជាតិអ៊ីស្រា‌អែល គឺទ្វាររូបេន ទ្វារយូដា និងទ្វារលេវី។ ៣២ កំពែងខាងកើតមានបណ្តោយបួន‌ពាន់ប្រាំ‌រយហត្ថ មានទ្វារក្រុងបី គឺទ្វារយ៉ូសែប ទ្វារបេន‌យ៉ាមីន និងទ្វារដាន់។ ៣៣ កំពែងខាងត្បូងមានបណ្តោយបួន‌ពាន់ប្រាំ‌រយហត្ថ មានទ្វារក្រុងបី គឺទ្វារស៊ីម៉ូន ទ្វារអ៊ីសាកា និងទ្វារសាប៊ូ‌ឡូន។ ៣៤ កំពែងខាងលិចមានបណ្តោយបួន‌ពាន់ប្រាំ‌រយហត្ថ មានទ្វារក្រុងបី គឺទ្វារកាដ ទ្វារអស៊ែរ និងទ្វារណែបថា‌លី។ ៣៥ ប្រវែងជុំ‌វិញមានទាំងអស់មួយ‌ម៉ឺនប្រាំ‌បីពាន់ហត្ថ។ ចាប់ពីថ្ងៃនេះតទៅ ទីក្រុងនឹងមានឈ្មោះថា «ព្រះ‌អម្ចាស់គង់នៅទីនេះ»។

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

កណ្ឌគម្ពីរព្យាការីអេសេគីអែល

ព្យាការី​អេសេ‌គីអែល

(អេសេ‌គាល)

ពាក្យ​លំនាំ

យើង​អាច​បែង​ចែក​កណ្ឌ​គម្ពីរ​អេសេ‌គីអែល​ជា​បួន​ផ្នែក​សំខាន់ៗ:

ព្យាការី​អេសេ‌គីអែល

ព្រះ‌បន្ទូល​ស្ដី​អំពី​ក្រុង​យេរូ‌សាឡឹម

លោក​អេសេ‌គីអែល​និមិត្ត​ឃើញ​សិរី‌រុង​រឿង​ព្រះ‌អម្ចាស់

ព្រះ‌អម្ចាស់​ត្រាស់​ហៅ​លោក​អេសេ‌គីអែល

ព្រះ‌អម្ចាស់​ឲ្យ​លោក​អេសេ‌គីអែល​នៅ​ស្ងៀម​ស្ងាត់

ការ​ឡោម‌ព័ទ្ធ​ក្រុង​យេរូ‌សាឡឹម

ព្រះ‌ជាម្ចាស់​ដាក់​ទោស​អ៊ីស្រា‌អែល

ព្រះ‌បន្ទូល​ប្រឆាំង​នឹង​ស្រុក​អ៊ីស្រា‌អែល

ចុង​បញ្ចប់​របស់​ស្រុក​អ៊ីស្រា‌អែល

ការ​ដាក់​ទោស​ជន​ជាតិ​អ៊ីស្រា‌អែល

ការ​ថ្វាយ‌បង្គំ​ព្រះ​ក្លែង‌ក្លាយ​នៅ​ក្រុង​យេរូ‌សាឡឹម

ការ​ដាក់​ទោស​ក្រុង​យេរូ‌សាឡឹម

លោក​អេសេ‌គីអែល​និមិត្ត​ឃើញ​ព្រះ‌អម្ចាស់​សា​ជា​ថ្មី

ព្រះ‌អម្ចាស់​ដាក់​ទោស​មេ​ដឹក​នាំ​អ៊ីស្រា‌អែល

ព្រះ‌បន្ទូល​សន្យា​ចំពោះ​ប្រជាជន​ដែល​ជាប់​ជា​ឈ្លើយ

សិរី‌រុង​រឿង​របស់​ព្រះ‌អម្ចាស់​ចាក​ចេញ​ពី​ក្រុង​យេរូ‌សាឡឹម

ប្រផ្នូល​អំពី​អ៊ីស្រា‌អែល​ត្រូវ​ខ្ចាត់‌ខ្ចាយ

ព្រះ‌បន្ទូល​ប្រឆាំង​នឹង​ព្យាការី​ក្លែង‌ក្លាយ

ព្រះ‌បន្ទូល​ប្រឆាំង​នឹង​ព្យាកា‌រិនី​ក្លែង‌ក្លាយ

អ៊ីស្រា‌អែល​ត្រូវ​តែ​បោះ​បង់​ចោល​ព្រះ​ក្លែង‌ក្លាយ

ទោស​ដែល​អ៊ីស្រា‌អែល​ត្រូវ​តែ​ទទួល

អ៊ីស្រា‌អែល​ប្រៀប​បាន​នឹង​អុស​ដែល​គេ​ដុត

យេរូ‌សាឡឹម​ប្រៀប​បាន​នឹង​ស្ត្រី​ផិត​ក្បត់

ក្រុង​យេរូ‌សាឡឹម​អាក្រក់​ជាង​ក្រុង​ឯ​ទៀតៗ

ប្រស្នា​អំពី​ដើម​តាត្រៅ និង​សត្វ​ឥន្ទ្រី

ព្រះ‌បន្ទូល​សន្យា

ព្រះ‌អម្ចាស់​ដាក់​ទោស​ម្នាក់ៗ​តាម​អំពើ​ដែល​ខ្លួន​ប្រព្រឹត្ត

ទំនួញ​របស់​មេ​ដឹក​នាំ​អ៊ីស្រា‌អែល

ដើម​ទំពាំង‌បាយ‌ជូរ និង​មែក

ទោះ​បី​ជន​ជាតិ​អ៊ីស្រា‌អែល​បះ‌បោរ ព្រះ‌ជាម្ចាស់​នៅ​តែ​ដឹក​នាំ​ពួក​គេ

ភ្លើង​នៅ​ស្រុក​ខាង​ត្បូង

ដាវ​របស់​ព្រះ‌អម្ចាស់

ដាវ​របស់​ស្តេច​ស្រុក​បាប៊ីឡូន

ដាវ​នឹង​ប្រហារ​ជន​ជាតិ​អាំម៉ូន

ទោស​របស់​ក្រុង​យេរូ‌សាឡឹម

អំពើ​បាប​របស់​ក្រុង​សាម៉ារី និង​ក្រុង​យេរូ‌សាឡឹម

ការ​វិនិច្ឆ័យ​ទោស​ក្រុង​សាម៉ារី និង​ក្រុង​យេរូ‌សាឡឹម

ទី​សម្គាល់​អំពី​ថ្លាង

ទី​សម្គាល់​អំពី​មរណ‌ភាព​នៃ​ភរិយា​របស់​ព្យាការី

ព្រះ‌បន្ទូល​ស្តី​អំពី​ប្រជា‌ជាតិ​នានា

ព្រះ‌បន្ទូល​ប្រឆាំង​នឹង​ជន​ជាតិ​អាំម៉ូន

ព្រះ‌បន្ទូល​ប្រឆាំង​នឹង​ជន​ជាតិ​ម៉ូអាប់

ព្រះ‌បន្ទូល​ប្រឆាំង​នឹង​ជន​ជាតិ​អេដុម

ព្រះ‌បន្ទូល​ប្រឆាំង​នឹង​ជន​ជាតិ​ភីលី‌ស្ទីន

ព្រះ‌បន្ទូល​ប្រឆាំង​នឹង​ក្រុង​ទីរ៉ុស

ទំនួញ​ស្តី​អំពី​ក្រុង​ទីរ៉ុស

ទីរ៉ុស​ជា​ក្រុង​ពាណិជ្ជ‌កម្ម

ទំនួញ​ស្តី​អំពី​ក្រុង​ទីរ៉ុស (ត)

ស្តេច​ក្រុង​ទីរ៉ុស​អស់​រាជ្យ

ព្រះ‌បន្ទូល​ស្តី​អំពី​ក្រុង​ស៊ីដូន

អ៊ីស្រា‌អែល​នឹង​ទទួល​ព្រះ‌ពរ

ព្រះ‌បន្ទូល​ប្រឆាំង​នឹង​ស្រុក​អេស៊ីប

ស្តេច​នេប៊ូ‌កានេសារ​មក​វាយ​លុក​ស្រុក​អេស៊ីប

ព្រះ‌អម្ចាស់​ដាក់​ទោស​ស្រុក​អេស៊ីប

ប្រស្នា​អំពី​ដើម​តាត្រៅ​ដែល​គេ​កាប់

ទំនួញ​ស្រណោះ​ស្តេច និង​ប្រជាជន​ស្រុក​អេស៊ីប

ព្រះ‌បន្ទូល​សន្យា​ស្តារ​ស្ថាន‌ភាព​ជន​ជាតិ​អ៊ីស្រា‌អែល​ឡើង​វិញ

ព្រះ‌អម្ចាស់​តែង‌តាំង​ព្យាការី​ជា​អ្នក​យាម‌ល្បាត

មូល​ហេតុ​ដែល​សត្រូវ​វាយ​យក​បាន​ក្រុង​យេរូ‌សាឡឹម

ព្រះ‌បន្ទូល​ប្រឆាំង​នឹង​អ្នក​ដឹក​នាំ​អ៊ីស្រា‌អែល

ព្រះ‌អម្ចាស់​នឹង​ឃ្វាល​ហ្វូង​ចៀម​របស់​ព្រះ‌អង្គ

ព្រះ‌បន្ទូល​ប្រឆាំង​នឹង​ស្រុក​អេដុម

អ៊ីស្រា‌អែល​នឹង​កាន់​កាប់​ស្រុក​របស់​ខ្លួន​វិញ

និមិត្ត​ហេតុ​អស្ចារ្យ​អំពី​ឆ្អឹង​ខ្មោច​ដែល​រស់​ឡើង​វិញ

ព្រះ‌អម្ចាស់​នឹង​បង្រួប‌បង្រួម​អ៊ីស្រា‌អែល និង​យូដា ជា​នគរ​តែ​មួយ

ព្រះ‌បន្ទូល​ប្រឆាំង​នឹង​ស្តេច​កូក

^{កណ្ឌគម្ពីរ}
ព្យាការីអេសេគីអែល

ព្យាការីអេសេ‌គីអែល

ពាក្យលំនាំ

យើងអាចបែងចែកកណ្ឌគម្ពីរអេសេ‌គីអែលជាបួនផ្នែកសំខាន់ៗ:

ព្យាការីអេសេ‌គីអែល

ព្រះ‌បន្ទូលស្ដីអំពីក្រុងយេរូ‌សាឡឹម

លោកអេសេ‌គីអែលនិមិត្តឃើញសិរី‌រុងរឿងព្រះ‌អម្ចាស់

ព្រះ‌អម្ចាស់ត្រាស់ហៅលោកអេសេ‌គីអែល

ព្រះ‌អម្ចាស់ឲ្យលោកអេសេ‌គីអែលនៅស្ងៀមស្ងាត់

ការឡោម‌ព័ទ្ធក្រុងយេរូ‌សាឡឹម

ព្រះ‌ជាម្ចាស់ដាក់ទោសអ៊ីស្រា‌អែល

ព្រះ‌បន្ទូលប្រឆាំងនឹងស្រុកអ៊ីស្រា‌អែល

ចុងបញ្ចប់របស់ស្រុកអ៊ីស្រា‌អែល

ការដាក់ទោសជនជាតិអ៊ីស្រា‌អែល

ការថ្វាយ‌បង្គំព្រះក្លែង‌ក្លាយនៅក្រុងយេរូ‌សាឡឹម

ការដាក់ទោសក្រុងយេរូ‌សាឡឹម

លោកអេសេ‌គីអែលនិមិត្តឃើញព្រះ‌អម្ចាស់សាជាថ្មី

ព្រះ‌អម្ចាស់ដាក់ទោសមេដឹកនាំអ៊ីស្រា‌អែល

ព្រះ‌បន្ទូលសន្យាចំពោះប្រជាជនដែលជាប់ជាឈ្លើយ

សិរី‌រុងរឿងរបស់ព្រះ‌អម្ចាស់ចាកចេញពីក្រុងយេរូ‌សាឡឹម

ប្រផ្នូលអំពីអ៊ីស្រា‌អែលត្រូវខ្ចាត់‌ខ្ចាយ

ព្រះ‌បន្ទូលប្រឆាំងនឹងព្យាការីក្លែង‌ក្លាយ

ព្រះ‌បន្ទូលប្រឆាំងនឹងព្យាកា‌រិនីក្លែង‌ក្លាយ

អ៊ីស្រា‌អែលត្រូវតែបោះបង់ចោលព្រះក្លែង‌ក្លាយ

ទោសដែលអ៊ីស្រា‌អែលត្រូវតែទទួល

អ៊ីស្រា‌អែលប្រៀបបាននឹងអុសដែលគេដុត

យេរូ‌សាឡឹមប្រៀបបាននឹងស្ត្រីផិតក្បត់

ក្រុងយេរូ‌សាឡឹមអាក្រក់ជាងក្រុងឯទៀតៗ

ប្រស្នាអំពីដើមតាត្រៅ និងសត្វឥន្ទ្រី

ព្រះ‌បន្ទូលសន្យា

ព្រះ‌អម្ចាស់ដាក់ទោសម្នាក់ៗតាមអំពើដែលខ្លួនប្រព្រឹត្ត

ទំនួញរបស់មេដឹកនាំអ៊ីស្រា‌អែល

ដើមទំពាំង‌បាយ‌ជូរ និងមែក

ទោះបីជនជាតិអ៊ីស្រា‌អែលបះ‌បោរ ព្រះ‌ជាម្ចាស់នៅតែដឹកនាំពួកគេ

ភ្លើងនៅស្រុកខាងត្បូង

ដាវរបស់ព្រះ‌អម្ចាស់

ដាវរបស់ស្តេចស្រុកបាប៊ីឡូន

ដាវនឹងប្រហារជនជាតិអាំម៉ូន

ទោសរបស់ក្រុងយេរូ‌សាឡឹម

អំពើបាបរបស់ក្រុងសាម៉ារី និងក្រុងយេរូ‌សាឡឹម

ការវិនិច្ឆ័យទោសក្រុងសាម៉ារី និងក្រុងយេរូ‌សាឡឹម

ទីសម្គាល់អំពីថ្លាង

ទីសម្គាល់អំពីមរណ‌ភាពនៃភរិយារបស់ព្យាការី

ព្រះ‌បន្ទូលស្តីអំពីប្រជា‌ជាតិនានា

ព្រះ‌បន្ទូលប្រឆាំងនឹងជនជាតិអាំម៉ូន

ព្រះ‌បន្ទូលប្រឆាំងនឹងជនជាតិម៉ូអាប់

ព្រះ‌បន្ទូលប្រឆាំងនឹងជនជាតិអេដុម

ព្រះ‌បន្ទូលប្រឆាំងនឹងជនជាតិភីលី‌ស្ទីន

ព្រះ‌បន្ទូលប្រឆាំងនឹងក្រុងទីរ៉ុស

ទំនួញស្តីអំពីក្រុងទីរ៉ុស

ទីរ៉ុសជាក្រុងពាណិជ្ជ‌កម្ម

ទំនួញស្តីអំពីក្រុងទីរ៉ុស (ត)

ស្តេចក្រុងទីរ៉ុសអស់រាជ្យ

ព្រះ‌បន្ទូលស្តីអំពីក្រុងស៊ីដូន

អ៊ីស្រា‌អែលនឹងទទួលព្រះ‌ពរ

ព្រះ‌បន្ទូលប្រឆាំងនឹងស្រុកអេស៊ីប

ស្តេចនេប៊ូ‌កានេសារមកវាយលុកស្រុកអេស៊ីប

ព្រះ‌អម្ចាស់ដាក់ទោសស្រុកអេស៊ីប

ប្រស្នាអំពីដើមតាត្រៅដែលគេកាប់

ទំនួញស្រណោះស្តេច និងប្រជាជនស្រុកអេស៊ីប

ព្រះ‌បន្ទូលសន្យាស្តារស្ថាន‌ភាពជនជាតិអ៊ីស្រា‌អែលឡើងវិញ

ព្រះ‌អម្ចាស់តែង‌តាំងព្យាការីជាអ្នកយាម‌ល្បាត

មូលហេតុដែលសត្រូវវាយយកបានក្រុងយេរូ‌សាឡឹម

ព្រះ‌បន្ទូលប្រឆាំងនឹងអ្នកដឹកនាំអ៊ីស្រា‌អែល

ព្រះ‌អម្ចាស់នឹងឃ្វាលហ្វូងចៀមរបស់ព្រះ‌អង្គ

ព្រះ‌បន្ទូលប្រឆាំងនឹងស្រុកអេដុម

អ៊ីស្រា‌អែលនឹងកាន់កាប់ស្រុករបស់ខ្លួនវិញ

និមិត្តហេតុអស្ចារ្យអំពីឆ្អឹងខ្មោចដែលរស់ឡើងវិញ

ព្រះ‌អម្ចាស់នឹងបង្រួប‌បង្រួមអ៊ីស្រា‌អែល និងយូដា ជានគរតែមួយ

ព្រះ‌បន្ទូលប្រឆាំងនឹងស្តេចកូក

បរា‌ជ័យរបស់ស្តេចកូក

និមិត្ត‌ហេតុស្តីអំពីព្រះ‌វិហារ នៅអនាគត‌កាល

លោកអេសេ‌គីអែលនិមិត្តឃើញក្រុងយេរូ‌សាឡឹម

ទី‌លាន និងទ្វារខាងក្រៅ

បន្ទប់អមព្រះ‌វិហារ

ព្រះ‌អម្ចាស់វិលត្រឡប់មកទី‌សក្ការៈរបស់ព្រះ‌អង្គវិញ

អំពីអាសនៈ

ការថ្វាយ‌បង្គំព្រះ‌អម្ចាស់នៅក្នុងព្រះ‌វិហារថ្មី

មុខ‌ងាររបស់ក្រុមលេវី

មុខ‌ងាររបស់ក្រុមបូជា‌ចារ្យ