ថ្ងៃពុធ ទី០៥ ខែកក្ដដា ឆ្នាំ២០២៣

អត្ថបទទី១៖ សូមថ្លែងព្រះគម្ពីរកំណើត កណ ២១,៣.៨-២១

លោកស្រីសារ៉ាបង្កើតបានកូនប្រុសមួយជូនលោកអប្រាហាំ។ ពេលកូននេះកើតមក លោកអប្រាហាំដាក់ឈ្មោះវាថា «អ៊ីសាក»។ លុះកុមារអ៊ីសាកធំបន្តិច នៅថ្ងៃត្រូវផ្តាច់​ដោះ លោកអប្រាហាំបានរៀបពិធីជប់លៀងមួយយ៉ាងធំ។ ថ្ងៃនោះ លោកស្រីសារ៉ា​ឃើញអ៊ីស្មាអែលជាកូននាហាការ (គឺស្រ្តីជាតិអេស៊ីប ដែលបង្កើតកូនមួយជូនលោក​អប្រាហាំ) កំពុងសើចលេង។ គាត់ជម្រាបលោកអប្រាហាំថា៖ «សូមបណ្តេញស្រីបម្រើ​នេះ និងកូនវាចេញទៅ ដ្បិតមិនត្រូវឱ្យកូនរបស់ស្រីបម្រើនេះ ទទួលមត៌ករួមជាមួយ​អ៊ីសាក កូនរបស់ខ្ញុំឡើយ»។ ពាក្យនេះធ្វើឱ្យលោកអប្រាហាំពិបាកចិត្តយ៉ាងខ្លាំង ព្រោះអ៊ីស្មាអែលក៏ជាកូនរបស់លោកដែរ។ ប៉ុន្តែ ព្រះជាម្ចាស់មានព្រះបន្ទូលមកលោក​អប្រាហាំថា៖ «កុំពិបាកចិត្ត ព្រោះតែរឿងក្មេងនេះ និងអ្នកបម្រើរបស់អ្នកឱ្យសោះ។ ចូរប្រព្រឹត្តតាមពាក្យទាំងប៉ុន្មានដែលសារ៉ាសុំនោះទៅ ដ្បិតមានតែកូនចៅរបស់អ៊ីសាកប៉ុណ្ណោះដែលនឹងស្នងត្រកូលរបស់អ្នក។ រីឯកូនរបស់ស្រីបម្រើនោះវិញ យើងក៏នឹងធ្វើ​ឱ្យវាបង្កើតប្រជាជាតិមួយដ៏ធំ ព្រោះវាក៏ជាពូជពង្សអ្នកដែរ»។ ស្អែកឡើង លោកអប្រាហាំក្រោកពីព្រលឹម យកបាយសំណុំ និងបំពង់ទឹកមកប្រគល់​ឱ្យនាងហាការ ហើយលើកកូនដាក់លើករបស់នាង រួចប្រាប់ឱ្យចេញទៅ។ នាងហាការ​ក៏ចាកចេញពីទីនោះទៅ ហើយវិលវល់ក្នុងវាលរហោស្ថាន ជិតភូមិប៊ែរសេបា។ ពេល​អស់ទឹកពីបំពង់ហើយ នាងក៏ទុកកូនចោលនៅក្រោមដើមឈើតូចមួយ រួចនាងទៅ​អង្គុយនៅដាច់ដោយឡែកពីកូន ចម្ងាយប្រមាណមួយសន្ទុះព្រួញ ព្រោះនាងពោលថា៖ «ខ្ញុំមិនចង់ឃើញកូនស្លាប់នៅនឹងមុខខ្ញុំឡើយ!»។ ដូច្នេះ នាងក៏អង្គុយដាច់ដោយ​ឡែកពីកូន ហើយចាប់ផ្តើមទ្រហោយំ។ ព្រះជាម្ចាស់ទ្រង់ព្រះសណ្តាប់ឮសម្រែករបស់​ក្មេងនោះ ហើយទេវទូតរបស់ព្រះជាម្ចាស់ហៅនាងហាការពីលើមេឃមកថា៖ «ហាការអើយ! តើនាងកើតអ្វី? កុំខ្លាចអ្វីឡើយ! ដ្បិតព្រះជាម្ចាស់ទ្រង់ព្រះសណ្តាប់ឮសម្រែក​កូនរបស់នាងដែលនៅក្រោមដើមឈើហើយ។ ចូរក្រោកឡើង! ទៅយកកូន ហើយ​ចាប់ដៃវាលើកឡើង ដ្បិតយើងនឹងធ្វើឱ្យវាបង្កើតបានប្រជាជាតិមួយដ៏ធំ»។ ព្រះជាម្ចាស់ប្រោសឱ្យនាងហាការឃើញអណ្តូងមួយដែលមានទឹក នាងក៏ទៅដងទឹក​ដាក់ពេញបំពង់ រួចយកទៅឱ្យកូនផឹក។ ព្រះជាម្ចាស់គង់នៅជាមួយក្មេងនោះ។ ពេល​វាធំឡើង វារស់​នៅតាមវាលរហោស្ថាន ហើយទៅជាអ្នកពូកែបាញ់ធ្នូ។ អ៊ីស្មាអែល​រស់នៅក្នុងវាលរហោស្ថាន ប៉ារ៉នកា ហើយម្តាយក៏ដណ្តឹងកូនស្រីជាតិអេស៊ីបម្នាក់មកឱ្យ​គាត់ធ្វើជាភរិយា។

ទំនុកតម្កើងលេខ ៣៤ (៣៣),៧-៨.១០-១៣ បទកាកគតិ

ពិធីអបអរសាទរព្រះគម្ពីរដំណឹងល្អតាម យក ១.១៨

អាលេលូយ៉ា! អាលេលូយ៉ា!
បពិត្រព្រះជាម្ចាស់! ព្រះអង្គប្រទានជីវិតថ្មីឱ្យយើងខ្ញុំ ដោយសារព្រះបន្ទូលនៃសេចក្តីពិត។ ព្រះអង្គត្រាស់ហៅយើងខ្ញុំឱ្យទៅជាផលដំបូង មុនអ្វីៗទាំងអស់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៨,២៨-៣៤

ព្រះយេស៊ូ និងក្រុមសាវ័កទៅដល់ត្រើយម្ខាងនៃបឹងទិបេរីយ៉ាដ ក្នុងតំបន់កាដារ៉ា។ ពេលនោះ មានបុរសខ្មោចចូលពីរនាក់ ចេញពីទីបញ្ចុះសព ដើរតម្រង់មករកព្រះ​អង្គ។ បុរសទាំងពីរនេះកាច​ណាស់ គ្មាននរណាហ៊ានដើរកាត់តាមនោះឡើយ។ អ្នកទាំងពីរស្រែកឡើងថា៖ «ព្រះបុត្រារបស់ព្រះជាម្ចាស់អើយ! តើព្រះអង្គចង់ធ្វើអ្វី​យើងខ្ញុំ? ព្រះអង្គយាងមកទីនេះ ដើម្បីធ្វើទុក្ខទោសយើងខ្ញុំមុនពេលកំណត់ឬ?»។ នៅឆ្ងាយពីនោះបន្តិច មានជ្រូកមួយហ្វូងធំកំពុងរកស៊ី។ ពួកខ្មោចអង្វរព្រះយេស៊ូ​ថា៖ «បើព្រះអង្គចង់ដេញយើងខ្ញុំ សូមបញ្ជូនយើងខ្ញុំឱ្យទៅចូលក្នុងជ្រូកមួយហ្វូង​នេះទៅ»។ ព្រះយេស៊ូមានព្រះបន្ទូលទៅខ្មោចថា៖ «ទៅចុះ!»។ ពួកខ្មោចក៏ចេញពី​បុរសទាំងពីរ ហើយទៅចូលក្នុងជ្រូក។ ពេលនោះ ហ្វូងជ្រូកបោលចុះតាមជម្រាលភ្នំ​តម្រង់ទៅសមុទ្រ លង់ទឹកងាប់អស់។ អ្នកថែរក្សាហ្វូងជ្រូកនាំគ្នាយករឿងនេះរត់ទៅ​ប្រាប់អ្នកភូមិ ព្រមទាំងរៀបរាប់ហេតុការណ៍អំពីបុរសខ្មោចចូលទាំងពីរនាក់នោះផង។ អ្នកភូមិទាំងអស់ក៏នាំគ្នាចេញមកគាល់ព្រះយេស៊ូ លុះបានឃើញហើយ គេអង្វរ​ព្រះអង្គឱ្យចាកចេញពីស្រុកភូមិរបស់គេ។