ថ្ងៃទី១៤ ខែកញ្ញា
បុណ្យលើកតម្កើងព្រះឈើឆ្កាង
បុណ្យគោរព
ពណ៌ក្រហម
ពាក្យអធិដ្ឋានពេលចូល
បពិត្រព្រះជាម្ចាស់ជាព្រះបិតា! ព្រះអង្គសព្វព្រះហឫទ័យសង្គ្រោះមនុស្សទាំងអស់ ដោយព្រះយេស៊ូជាព្រះបុត្រាព្រះអង្គបូជាព្រះជន្មនៅលើឈើឆ្កាង។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំឱ្យយល់ការអាថ៌កំបាំងអស្ចារ្យនេះ សូមពង្រឹងជំនឿ សេចក្តីស្រឡាញ់ និងសេចក្តីសង្ឈឹមរបស់យើងខ្ញុំផង។
ឈើឆ្កាងជាសញ្ញាសម្គាល់បង្ហាញពីជ័យជម្នះរបស់ព្រះគ្រីស្តលើសេចក្តីស្លាប់ និងលើចិត្តឃោរឃៅរបស់មនុស្សលោក។ ព្រះគ្រីស្តជាអ្នកឈ្នះមារដែលជា “អម្ចាស់នៃពិភពលោកនេះ”។ ពីលើឈើឆ្កាងព្រះយេស៊ូទាក់ទាញមនុស្សទាំងអស់មកព្រះអង្គ ព្រះអង្គក៏ថ្វាយសក្ការបូជាដែលរំដោះមនុស្សលោកដែរ។ ថ្ងៃ ១៤ កញ្ញា ៣៣៥ គ្រីស្តបរិស័ទនាំគ្នាធ្វើពិធីបុណ្យឆ្លងព្រះវិហារសាងនៅលើផ្នូរព្រះយេស៊ូ គឺនៅក្បែរកន្លែងគេឆ្កាងព្រះយេស៊ូ។ ព្រះវិហារនេះមានឈ្មោះថា “ព្រះគ្រីស្តរស់ឡើងវិញ”។ តាំងពីសតវត្សទី ៤ រៀងមក គ្រីស្តបរិស័ទ នាំគ្នាធ្វើពិធីគោរពឈើឆ្កាងព្រះគ្រីស្តនៅថ្ងៃ ១៤ កញ្ញា។
សូមថ្លែងព្រះគម្ពីរជំរឿនប្រជាជន ជរ ២១,៤ខ-៩
ជនជាតិអ៊ីស្រាអែលចេញដំណើរពីភ្នំហ៊រ តាមផ្លូវសមុទ្រកក់ ដើម្បីវាងស្រុកអេដុម។ តាមផ្លូវប្រជាជនបាក់ទឹកចិត្ត ហើយនាំគ្នាពោលពាក្យប្រឆាំងនឹងព្រះអម្ចាស់ ព្រមទាំងលោកម៉ូសេថា៖ «ហេតុអ្វីបានជាព្រះអង្គ និងលោកនាំពួកយើងចេញមកពីស្រុកអេស៊ីប ដើម្បីឱ្យពួកយើងស្លាប់ក្នុងវាលរហោស្ថានដូច្នេះ? ដ្បិតនៅទីនេះ គ្មានអាហារ គ្មានទឹកទាល់តែសោះ ហើយពួកយើងក៏ធុញទ្រាន់នឹងនំម៉ាណាដ៏គម្រក់នេះដែរ!»។ ពេលនោះ ព្រះអម្ចាស់ក៏ធ្វើឱ្យមានពស់ភ្លើងមកចឹកពួកគេ បណ្តាលឱ្យបាត់បង់ជីវិតមនុស្សជាច្រើន ក្នុងចំណោមជនជាតិអ៊ីស្រាអែល។ ប្រជាជននាំគ្នាទៅជួបលោកម៉ូសេជម្រាបថា៖ «យើងខ្ញុំបានប្រព្រឹត្តអំពើបាប ដោយពោលពាក្យប្រឆាំងនឹងព្រះអម្ចាស់ ព្រមទាំងរូបលោកផ្ទាល់។ សូមលោកមេត្តាទូលអង្វរព្រះអម្ចាស់ សូមព្រះអង្គបណ្តេញពស់ទាំងនេះចេញឱ្យឆ្ងាយពីយើងខ្ញុំផង»។ លោកម៉ូសេក៏ទូលអង្វរព្រះអង្គឱ្យប្រជាជន។ ព្រះអម្ចាស់មានព្រះបន្ទូលមកកាន់លោកម៉ូសេថា៖ «ចូរធ្វើរូបពស់ភ្លើង ព្យួរលើបង្គោលមួយ។ អ្នកណាត្រូវពស់ចឹក ហើយសម្លឹងមើលទៅរូបពស់ អ្នកនោះនឹងរួចជីវិត»។ លោកម៉ូសេយកលង្ហិនធ្វើរូបពស់មួយ ហើយព្យួរលើបង្គោល។ ពេលមាននរណាម្នាក់ត្រូវពស់ចឹក ហើយសម្លឹងមើលទៅពស់លង្ហិននោះគេបានរួចជីវិត។
ឬសូមថ្លែងលិខិតរបស់សន្ដប៉ូលផ្ញើជូនគ្រីស្ដបរិស័ទក្រុងភីលីព ២,៦-១១
ទោះបីព្រះគ្រីស្ដមានឋានៈជាព្រះជាម្ចាស់ក៏ដោយ ក៏ព្រះអង្គពុំបានក្ដោបក្តាប់ឋានៈដែលស្មើនឹងព្រះជាម្ចាស់នេះទុកជាកម្មសិទ្ធិដាច់មុខរបស់ព្រះអង្គឡើយ។ ផ្ទុយទៅវិញ ព្រះអង្គបានលះបង់អ្វីៗទាំងអស់មកយកឋានៈជាទាសករព្រះអង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។ ព្រះអង្គបានដាក់ខ្លួនធ្វើតាមព្រះបញ្ជារហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។ ហេតុនេះហើយ បានជាព្រះជាម្ចាស់លើកតម្កើងព្រះអង្គឡើងយ៉ាងខ្ពង់ខ្ពស់បំផុតព្រមទាំងប្រោសប្រទានឱ្យព្រះអង្គមានព្រះនាមប្រសើរលើសអ្វីៗទាំងអស់ ដើម្បីឱ្យអ្វីៗទាំងអស់ទាំងនៅស្ថានបរមសុខ ទាំងនៅលើផែនដី ទាំងនៅក្រោមដីនាំគ្នាក្រាបថ្វាយបង្គំ នៅពេលណាឮព្រះនាមព្រះយេស៊ូ និងឱ្យមនុស្សគ្រប់ភាសាប្រកាសឡើងថា ព្រះយេស៊ូគ្រីស្តជាព្រះអម្ចាស់ដើម្បីលើកតម្កើងសិរីរុងរឿងព្រះជាម្ចាស់ជាព្រះបិតា។
ទំនុកតម្កើងលេខ ៧៨ (៧៧), ៣-៤.៣៤-៣៩ បទព្រហ្មគីតិ
| ៣ | យើងបានឮគេប្រាប់ | ឱ្យយើងស្តាប់ជាដំណឹង | |
| ដូនតាលោកខំប្រឹង | តំណាលរឿងគ្រប់ទាំងអស់ | ។ | |
| ៤ | តំណាលពីឫទ្ធា | នុភាពជាស្នាព្រះហស្ត | |
| អស្ចារ្យគ្មានចន្លោះ | ល្អឥតខ្ចោះទ្រង់ប្រព្រឹត្ត | ។ | |
| យើងនឹងនិយាយប្រាប់ | កូនចៅស្តាប់តទៅពិត | ||
| កូនចៅត្រូវរិះគិត | មានគំនិតយល់មិនខាន | ។ | |
| ៣៤ | ពេលគេឃើញដូច្នេះ | គេរេរិះឈប់រួញរា | |
| ប្រែចិត្តគំនិតជា | នាំគ្នីគ្នារកព្រះអង្គ | ។ | |
| ៣៥ | ពួកគេនឹកឃើញថា | អង្គក្សត្រាមិនបោះបង់ | |
| ជាថ្មដាបិទបាំង | ការពារពាំងមាំមួនណាស់ | ។ | |
| ៣៦ | ប៉ុន្តែតាមការពិត | គេមានចិត្តចង់បោកប្រាស | |
| និយាយពាក្យផ្តេសផ្តាស | ឃើញជាក់ច្បាស់ពាក្យកុហក | ។ | |
| ៣៧ | គេមានចិត្តរៀចវេរ | មិនទៀងទេសែនអាក្រក់ | |
| គេភូតភរកុហក | ក្បត់នឹងសម្ពន្ធមេត្រី | ។ | |
| ៣៨ | រីឯព្រះអង្គវិញ | ទ្រង់បញ្ចេញព្រះហឫទ័យ | |
| មេត្តាករុណាក្រៃ | លើកទោសពៃរ៍ដោយយល់យោគ | ។ | |
| ៣៩ | ព្រះអង្គនៅចាំថា | គ្រប់អាត្មាជាមនុស្សលោក | |
| ជីវិតសែនសោយសោក | ដូចខ្យល់បោកមិនត្រឡប់ | ។ |
ពិធីអបអរសាទរព្រះគម្ពីរដំណឹងល្អ
អាលេលូយ៉ា! អាលេលូយ៉ា!
បពិត្រព្រះគ្រីស្ត! យើងខ្ញុំសូមក្រាបថ្វាយបង្គំព្រះអង្គ សូមលើកតម្កើងព្រះអង្គ ដ្បិតព្រះអង្គសង្គ្រោះមនុស្សលោក ដោយបានបូជាព្រះជន្មនៅលើឈើឆ្កាង! អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តយ៉ូហាន យហ ៣,១៣-១៧
ពុំដែលមាននរណាបានឡើងទៅស្ថានបរមសុខឡើយ គឺមានតែបុត្រមនុស្សប៉ុណ្ណោះ ដែលបានយាងចុះពីស្ថានបរមសុខមក។ កាលនៅវាលរហោស្ថាន លោកម៉ូសេបានលើកពស់ឡើងយ៉ាងណា បុត្រមនុស្សនឹងត្រូវគេលើកឡើងយ៉ាងនោះដែរ ដើម្បីឱ្យអស់អ្នកដែលជឿលើព្រះអង្គមានជីវិតអស់កល្បជានិច្ច។ ព្រះជាម្ចាស់ស្រឡាញ់មនុស្សលោកខ្លាំងណាស់ ហេតុនេះហើយ បានជាព្រះអង្គប្រទានព្រះបុត្រាតែមួយរបស់ព្រះអង្គមក ដើម្បីឱ្យអស់អ្នកដែលជឿលើព្រះបុត្រាមានជីវិតអស់កល្បជានិច្ច គឺមិនឱ្យគេវិនាសឡើយ។ ព្រះជាម្ចាស់បានចាត់ព្រះបុត្រារបស់ព្រះអង្គឱ្យយាងមកក្នុងលោកនេះ ពុំមែនដើម្បីដាក់ទោសមនុស្សលោកទេ គឺដើម្បីសង្គ្រោះមនុស្សលោក ដោយសារព្រះបុត្រាវិញ។
ពាក្យថ្វាយតង្វាយ
បពិត្រព្រះជាម្ចាស់ជាព្រះបិតា! នៅថ្ងៃនេះ យើងខ្ញុំនាំគ្នាគោរពព្រះគ្រីស្តដែលបូជាព្រះជន្មដើម្បីរំដោះយើងខ្ញុំ។ សូមទ្រង់មេត្តាប្រោសទទួលតង្វាយរបស់យើងខ្ញុំ រួមជាមួយនឹងសក្ការបូជារបស់ព្រះយេស៊ូគ្រីស្តដោយអនុគ្រោះ។ សូមព្រះអង្គលើកលែងទោសឱ្យយើងខ្ញុំផង។
ធម៌លើកតម្កើង
បពិត្រព្រះបិតាដ៏វិសុទ្ធបំផុត! ជាព្រះអម្ចាស់ដ៏មានតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច យើងខ្ញុំសូមលើកតម្កើងរិរីរុងរឿងរបស់ព្រះអង្គ និងសូមអរព្រះគុណព្រះអង្គ ព្រះអង្គសព្វព្រះហឫទ័យសង្គ្រោះមនុស្សលោក ដោយព្រះយេស៊ូជាព្រះបុត្រាសោយទិវង្គតយ៉ាងសែនអាម៉ាស់លើឈើឆ្កាង ព្រះអង្គសព្វព្រះហឫទ័យឱ្យជីវិតផុសឡើងសាជាថ្មីពីសេចក្តីស្លាប់ ដោយសារឈើឆ្កាង ព្រះបុត្រាឈ្នះមារដែលបណ្តាលឱ្យមនុស្សទាំងអស់ជាប់បាប។ អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយ ដើម្បីលើកតម្កើងសិរីរុងរឿងរបស់ព្រះអង្គ ហើយប្រកាសថា៖ “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”។
ពាក្យអរព្រះគុណ
បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែង! ព្រះអង្គបានប្រទានព្រះកាយនៃព្រះបុត្រាដ៏ជាទីស្រឡាញ់របស់ព្រះអង្គឱ្យយើងខ្ញុំនៅថ្ងៃគោរពព្រះឈើឆ្កាង។ យើងខ្ញុំមានជិវិតថ្មីដោយព្រះយេស៊ូគ្រីស្តបូជាព្រះជន្ម សូមទ្រង់ព្រះមេត្តាប្រោសយើងខ្ញុំឱ្យទទួលសិរីរុងរឿងរួមជាមួយព្រះយេស៊ូគ្រីស្តបូជាព្រះជន្មថ្មីដ៏រុងរឿងផង។
