សូមថ្លែងព្រះគម្ពីរព្យាការីអេសេគីអែល អគ ៤៣,១-៧ក

បុរសដែលព្រះជាម្ចាស់ចាត់ឱ្យមក នាំខ្ញុំទៅកាន់ខ្លោងទ្វារខាងកើត។ ពេលនោះ សិរីរុងរឿងរបស់ព្រះនៃជនជាតិអ៊ីស្រាអែលបណ្តែតមក ពីទិសខាងកើត មានសន្ធឹកដូច​មហាសាគរ ហើយផែនដីភ្លឺដោយសិរីរុងរឿងរបស់ព្រះអង្គ។ និមិត្តហេតុដែលខ្ញុំឃើញ​នៅពេលនោះ ក៏ដូចនិមិត្តហេតុដែលខ្ញុំបានឃើញនៅពេលព្រះអង្គយាងមកកម្ទេចក្រុងយេរូសាឡឹម។ និមិត្តហេតុទាំងពីរនេះ ក៏ដូចជានិមិត្តហេតុដែលខ្ញុំបានឃើញនៅមាត់ទន្លេកេបារដែរ។ ពេលនោះខ្ញុំក្រាបចុះឱនមុខដល់ដី។ សិរីរុងរឿងរបស់ព្រះអម្ចាស់អណ្តែតចូលមកក្នុងព្រះដំណាក់តាមទ្វារខាងកើត។ ព្រះវិញ្ញាណក៏លើកខ្ញុំឡើង ហើយយកខ្ញុំទៅដាក់កណ្តាលទីលានខាងក្នុង។ សិរីរុងរឿងរបស់ព្រះអម្ចាស់ស្ថិតនៅពេញព្រះដំណាក់។ ពេលបុរសនោះនៅក្បែរខ្ញុំ ខ្ញុំឮព្រះសូរសៀងចេញពីព្រះដំណាក់មកកាន់ខ្ញុំថា៖«កូនមនុស្សអើយ! កន្លែងនេះជាបល្ល័ង្ករបស់​យើង និងជាកន្លែងដាក់ជើងរបស់យើងផង។ យើងនឹងស្ថិតនៅកន្លែងនេះជាមួយ​ជនជាតិអ៊ីស្រាអែលរហូតតទៅ»។

ទំនុកតម្កើងលេខ ៨៥ (៨៤),៩កខ,១០-១៤ បទកាកគតិ

ពិធីអបអរសាទរព្រះគម្ពីរដំណឹងល្អតាម មថ ២៣,៩.១០

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ២៣,១-១២

ពេលនោះ ព្រះយេស៊ូមានព្រះបន្ទូលទៅកាន់មហាជន និងក្រុមសាវ័កថា៖«ពួក​ធម្មចារ្យ និងពួកខាងគណៈផារីស៊ីមានភារកិច្ចបង្រៀនធម្មវិន័យរបស់លោកម៉ូសេ។ អ្វីៗដែលគេបង្រៀនអ្នករាល់គ្នាចូរស្តាប់ ហើយយកទៅប្រតិបត្តិតាមទៅ តែកុំយកតម្រាប់តាមអំពើដែលគេប្រព្រឹត្តឡើយ ដ្បិតគេមិនប្រតិបត្តិតាមសេចក្តីដែលគេ​បង្រៀននោះទេ។ អ្នកទាំងនោះបានបង្កើតវិន័យយ៉ាងតឹងរ៉ឹងយកមកផ្ទុកលើមនុស្ស ហើយមិនជួយសម្រាលបន្ទុកនោះទេ សូម្បីតែបន្តិចក៏មិនជួយផង។ គេធ្វើកិច្ចផ្សេងៗដើម្បីឱ្យមនុស្សម្នាកោតសរសើរ គឺគេធ្វើក្លាក់កាន់តែធំឡើងៗ និងធ្វើខ្សែរំយោលនៅជាយអាវកាន់តែវែងឡើងៗដែរ។ ពួកគេចូលចិត្តកន្លែងកិត្តិយសក្នុងពិធីជប់លៀង ហើយ​រើសកន្លែងអង្គុយនៅមុខគេក្នុងធម្មសាលា។ ពួកនេះចូលចិត្តឱ្យគេឱនកាយគោរពនៅតាមផ្សារ និងឱ្យគេហៅខ្លួនថា “លោកគ្រូ”។ រីឯអ្នករាល់គ្នាវិញ កុំបង្គាប់គេ​ឱ្យហៅខ្លួនថា “លោកគ្រូ”សោះឡើយ ដ្បិតអ្នករាល់គ្នាមាន “ព្រះបរមគ្រូ”តែមួយគត់ ហើយអ្នករាល់គ្នាសុទ្ធតែជាបងប្អូននឹងគ្នា។ កុំហៅនរណាម្នាក់នៅលើផែនដីនេះថា “លោកឪពុក”ឱ្យសោះ ដ្បិតអ្នករាល់គ្នាមាន “ឪពុក” តែមួយគត់ គឺព្រះបិតាដែលគង់​នៅស្ថានបរមសុខ។ កុំឱ្យគេហៅអ្នករាល់គ្នាថា “អ្នកណែនាំ” ឡើយ ដ្បិតមានព្រះគ្រីស្តតែមួយព្រះអង្គប៉ុណ្ណោះដែលណែនាំអ្នករាល់គ្នា។ ក្នុងចំណោមអ្នករាល់គ្នា អ្នក​ណាមានឋានៈធំជាងគេ ត្រូវឱ្យអ្នកនោះបម្រើអ្នករាល់គ្នា អ្នកណាលើកតម្កើងខ្លួន អ្នកនោះនឹងត្រូវគេបន្ទាបចុះ។ រីឯអ្នកដែលបន្ទាបខ្លួននឹងត្រូវគេលើកតម្កើងវិញ»។