ថ្ងៃអង្គារ ទី១៦ ខែមិថុនា​ ឆ្នាំ២០២៦

សូមថ្លែងព្រះគម្ពីរពង្សាវតាក្សត្រភាគទី ១ ១ពង្ស ២១,១៧-២៩

ពេលនោះ ព្រះអម្ចាស់មានព្រះបន្ទូលមកកាន់ព្យាការីអេលីថា៖ «ចូរក្រោកឡើង! ទៅ​ជួបអខាប់ ជាស្តេចអ៊ីស្រាអែលនៅក្រុងសាម៉ារី។ ឥឡូវនេះ អខាប់ស្ថិតនៅក្នុងចម្ការ​ទំពាំងបាយជូររបស់ណាបុតដែលខ្លួនទើបចាប់យកបាន។ អ្នកត្រូវប្រាប់អខាប់ថាព្រះអម្ចាស់មានព្រះបន្ទូលដូចតទៅ៖ “ហេតុអ្វីបានជាអ្នកធ្វើឃាតគេ ហើយចាប់យកដីរបស់គេ​ថែមទៀតដូច្នេះ!។ អ្នកត្រូវពោលទៀតថា ព្រះអម្ចាស់មានព្រះបន្ទូលថា ឆ្កែបានលិទ្ធឈាមរបស់ណាបុតនៅកន្លែងណា ឆ្កែក៏នឹងលិទ្ធឈាមរបស់អ្នកនៅកន្លែងនោះដែរ”»។
ព្យាការីអេលីក៏ទៅគាល់ព្រះបាទអខាប់ ហើយស្តេចមានរាជឱង្ការមកលោកថា៖ «នែ៎សត្រូវអើយ! លោករកឃើញយើងហើយ!»។ ព្យាការីអេលីទូលថា៖ «ទូលបង្គំមកគាល់ព្រះករុណា ព្រោះព្រះករុណាលក់ខ្លួនទៅប្រព្រឹត្តអំពើអាក្រក់ដែលមិនគាប់ព្រះហឫទ័យព្រះអម្ចាស់​។ ព្រះអម្ចាស់មានព្រះបន្ទូលថា “យើងនឹងធ្វើឱ្យទុក្ខវេទនាកើតមានចំពោះអ្នក យើងនឹងលុបបំបាត់ពូជពង្សរបស់អ្នក យើងនឹងប្រហារប្រុសៗទាំងអស់ នៅក្នុងក្រុមគ្រួសាររបស់អខាប់ ទាំងអ្នកងារ ទាំងអ្នកជា ឱ្យអស់ពីស្រុកអ៊ីស្រាអែល។ យើងនឹងធ្វើឱ្យពូជពង្សអ្នកបានដូចពូជពង្សយេរ៉ូប៉ោម និងដូចពូជពង្សបាសា ព្រោះអ្នកបានធ្វើឱ្យយើងខឹង ព្រមទាំងនាំប្រជាជនអ៊ីស្រាអែលប្រព្រឹត្តអំពើបាបទៀតផង”​។ ព្រះអម្ចាស់មានព្រះបន្ទូលអំពីម្ចាស់ក្សត្រិយ៍យេសាបិលទៀតថា “ឆ្កែនឹងហែកស៊ីយេសាបិលនៅជើងកំពែងក្រុងយីសរេអែល។ កូនចៅរបស់អខាប់ដែលស្លាប់នៅក្នុងទីក្រុង នឹងត្រូវឆ្កែហែកស៊ី ហើយកូនចៅដែលស្លាប់នៅទីវាល ក៏នឹងត្រូវត្មាតចឹកស៊ីដែរ”។ មិនដែលមាននរណាដូចព្រះបាទអខាប់ទេ គឺទ្រង់លក់ខ្លួនទៅប្រព្រឹត្តអំពើអាក្រក់ ដែលមិនគាប់ព្រះហឫទ័យព្រះអម្ចាស់ ក្រោមការញុះញង់របស់ម្ចាស់ក្សត្រិយ៍យេសាបិលជាមហេសី។ ស្តេចបានប្រព្រឹត្តអំពើគួរឱ្យស្អប់ខ្ពើម គឺគោរពថ្វាយបង្គំព្រះក្លែងក្លាយដូចជនជាតិអាម៉ូរី ដែលព្រះអម្ចាស់បានបណ្តេញចេញពីមុខប្រជាជនអ៊ីស្រាអែល។ កាលព្រះបាទអខាប់ឮព្រះបន្ទូលទាំងនោះហើយ ទ្រង់ក៏ហែកព្រះពស្ត្រចោល រួចស្លៀកបាវ និងតមអាហារ។ ពេលផ្ទំក៏ស្តេចស្លៀកបាវដែរ ហើយយាងយឺតៗ។ ព្រះអម្ចាស់មានព្រះបន្ទូលមកកាន់ព្យាការីអេលីថា៖ «អ្នកឃើញទេ! អខាប់បន្ទាបខ្លួននៅចំពោះមុខយើងហើយ។ ដោយអខាប់បន្ទាបខ្លួនដូច្នេះ យើងនឹងមិនធ្វើឱ្យគេរងទុក្ខវេទនាក្នុងពេលដែលគេនៅមានជីវិតទេ។ តែយើងនឹងធ្វើឱ្យទុក្ខវេទនា កើតមានចំពោះពូជពង្សរបស់គេនៅជំនាន់ក្រោយ»។

ទំនុកតម្កើងលេខ ៥១ (៥០),៣-៦.១១.១៦ បទពាក្យ ៧

ពិធីអបអរសាទរព្រះគម្ពីរដំណឹងល្អតាម យហ ១៣,៣៤

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៥,៤៣-៤៨

ក្រុមសាវ័កជួបជុំជាមួយព្រះយេស៊ូនៅលើភ្នំ។ ព្រះអង្គមានព្រះបន្ទូលទៅកាន់ពួកគេថា៖ «អ្នករាល់គ្នាធ្លាប់ឮសេចក្តីថ្លែងទុកមកថា “ចូរស្រឡាញ់បងប្អូនឯទៀតៗ ហើយស្អប់​ខ្មាំងសត្រូវរបស់អ្នក”។ រីឯខ្ញុំវិញ ខ្ញុំសុំបញ្ជាក់ប្រាប់អ្នករាល់គ្នាថា ចូរស្រឡាញ់ខ្មាំងសត្រូវរបស់អ្នករាល់គ្នា ព្រមទាំងទូលអង្វរព្រះជាម្ចាស់ សូមព្រះអង្គប្រទានពរឱ្យ​អស់អ្នកដែលបៀតបៀនអ្នករាល់គ្នាផង។ ធ្វើដូច្នេះ អ្នករាល់គ្នានឹងទៅ​ជាបុត្រធីតា​របស់ព្រះបិតា ដែលគង់នៅស្ថានបរមសុខ ដ្បិតព្រះអង្គប្រទានឱ្យព្រះអាទិត្យរបស់​ព្រះអង្គរះបំភ្លឺ ទាំងមនុស្សអាក្រក់ ទាំងមនុស្សល្អ ហើយទ្រង់ប្រទានទឹកភ្លៀងឱ្យ​ទាំងមនុស្សសុចរិត ទាំងមនុស្សទុច្ចរិតផងដែរ។
ប្រសិនបើអ្នករាល់គ្នាស្រឡាញ់តែអ្នកដែលស្រឡាញ់អ្នករាល់គ្នា តើនឹងទទួលរង្វាន់​អ្វី? សូម្បីតែអ្នកទារពន្ធក៏ចេះស្រឡាញ់គ្នាគេដែរ។ បើអ្នករាល់គ្នារាប់រកតែបងប្អូន​របស់ខ្លួនប៉ុណ្ណោះ តើមានអ្វីដ៏អស្ចារ្យ? សូម្បីតែសាសន៍ដទៃក៏ប្រព្រឹត្តដូច្នោះដែរ។ ព្រះបិតារបស់អ្នករាល់គ្នាដែលគង់នៅស្ថានបរមសុខ ទ្រង់គ្រប់លក្ខណ៍យ៉ាងណា សុំ​ឱ្យអ្នករាល់គ្នាបានគ្រប់លក្ខណ៍យ៉ាងនោះដែរ»។