ថ្ងៃចន្ទ ទី១៨ ខែឧសភា ឆ្នាំ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គបានប្រោសឱ្យយើងខ្ញុំទៅជាបុត្រធីតារបស់ព្រះអង្គ សូមទ្រង់​ព្រះមេត្តា​ប្រទានព្រះវិញ្ញាណព្រះអង្គឱ្យយើងខ្ញុំយ៉ាងបរិបូណ៌ សូមព្រះវិញ្ញាណបំភ្លឺចិត្តគំនិតយើងខ្ញុំឱ្យស្គាល់​ព្រះហឫទ័យ​ព្រះ​អង្គ និងឱ្យប្រព្រឹត្តតាមក្នុងគ្រប់កិច្ចការប្រចាំជីវិតផង។

សូមថ្លែងព្រះគម្ពីរកិច្ចការរបស់គ្រីស្តទូត កក ១៩,១-៨

នៅពេលលោកអប៉ូឡូសនៅក្រុងកូរិនថូស លោកប៉ូលឆ្លងកាត់តំបន់ខ្ពង់រាប ធ្វើដំណើរមក​ដល់​ក្រុង​អេ​ភេ​សូ​។ ​លោកជួបសាវ័កខ្លះ ហើយសួរគេថា៖ «កាលបងប្អូនចាប់ផ្តើមជឿនោះ តើបងប្អូន​បាន​ទទួល​ព្រះវិញ្ញាណ​ដ៏វិសុទ្ធ​ហើយ​ឬនៅ?»។ គេតបមកលោកវិញថា៖ «យើងខ្ញុំមិនដែលទាំងឮថា មានព្រះវិញ្ញាណដ៏វិសុទ្ធផង!»។ លោកសួរគេ​ទៀត​ថា​៖ ​«ដូច្នេះ តើបងប្អូនបានទទួលពិធីជ្រមុជទឹកណា?»​។ គេតបថា៖ «ពិធីជ្រមុជទឹករបស់លោកយ៉ូហាន»។ លោក​ប៉ូល​​ក៏មានប្រសាសន៍ថា៖ «លោកយ៉ូហានបានធ្វើពិធីជ្រមុជទឹកឱ្យអស់អ្នកដែលកែប្រែចិត្តគំនិត ទាំងមាន​ប្រសាសន៍​ប្រាប់ប្រជាជនឱ្យជឿលើព្រះអង្គដែលនឹងយាងមកក្រោយលោក គឺព្រះយេស៊ូហ្នឹងហើយ»។ ក្រោយពីបានឮលោកប៉ូលមា​ន​ប្រសាសន៍ដូច្នោះ ក្រុមសាវ័កក៏ទទួលពិធីជ្រមុជទឹកក្នុងព្រះនាមព្រះអម្ចាស់យេស៊ូ។ លោក​ប៉ូល​ដាក់ដៃ​លើ​គេ ព្រះ​វិញ្ញាណដ៏វិសុទ្ធក៏យាងមកសណ្ឋិតលើគេ ហើយគេនាំគ្នានិយាយភាសាចម្លែកអស្ចារ្យ និងថ្លែង​ព្រះបន្ទូល​ផង​។ អ្នកទាំងនោះមានគ្នាទាំងអស់ប្រមាណដប់ពីរនាក់។ លោកប៉ូលបានចូលទៅធម្មសាលា ហើយមានប្រសាសន៍ដោយចិត្តអង់អាចក្នុងអំឡុងពេលបីខែ។ លោក​សន្ទ​នាជាមួយពួកគេអំពីព្រះរាជ្យរបស់ព្រះជាម្ចាស់ និងខិតខំណែនាំពួកគេឱ្យជឿ។

ទំនុកតម្កើងលេខ ៦៨ (៦៧), ២-៧.៣៦ បទព្រហ្មគីតិ

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៦,២៩-៣៣

នៅពេលកំណត់ដែលព្រះយេស៊ូត្រូវឆ្លងពីលោកនេះ ឆ្ពោះទៅព្រះបិតា ព្រះអង្គមានព្រះបន្ទូល​សន្ទនា​ជាមួយ​ក្រុមសាវ័ក។ ក្រុមសាវ័កទូលព្រះអង្គថា៖ «ឥឡូវនេះ ព្រះអង្គមានព្រះបន្ទូល​យ៉ាងច្បាស់ៗមក​យើង​ខ្ញុំ ព្រះអង្គ​មិនប្រើ​ប្រ​ស្នា​ទៀតទេ។ ឥឡូវនេះ យើងខ្ញុំដឹងថា ព្រះ​អង្គឈ្វេងយល់គ្រប់សេចក្តីទាំងអស់ មិនបាច់មាននរណាទូលសួរព្រះអង្គ​ឡើយ​។ ហេតុនេះហើយ បានជាយើងខ្ញុំជឿថា ព្រះអង្គចេញមក​ពីព្រះជាម្ចាស់មែន»។ ព្រះយេស៊ូមាន​ព្រះបន្ទូល​តប​ទៅ​​គេថា៖ «ឥឡូវនេះ អ្នករាល់គ្នាជឿមែនឬ! ប៉ុន្តែ ពេលកំណត់មកដល់ គឺពេលនេះហើយ អ្នករាល់​គ្នានឹង​ត្រូវខ្ចាត់​ខ្ចាយ​ ម្នាក់ៗទៅតាមផ្លូវរៀងៗខ្លួន បោះបង់ចោលខ្ញុំឱ្យនៅម្នាក់ឯង។ តាមពិត ខ្ញុំមិននៅម្នាក់​ឯងទេ មាន​ព្រះបិតា​គង់​នៅ​ជា​មួយខ្ញុំ។ ខ្ញុំនិយាយប្រាប់ដូច្នេះ ដើម្បីឱ្យអ្នករាល់គ្នាបានប្រកបដោយសេចក្តីសុខសាន្តរួមជាមួយ​ខ្ញុំ។ អ្នក​រាល់​គ្នា​ជួប​នឹង​ទុក្ខ​វេទនានៅក្នុងលោក ប៉ុន្តែ ចូរមានសង្ឃឹមឡើង! ខ្ញុំបានឈ្នះលោកនេះហើយ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ពេលយើងខ្ញុំនាំគ្នាថ្វាយអភិបូជា យើងខ្ញុំប្រកាសថា ព្រះយេស៊ូជា​ព្រះបុត្រា​ព្រះ​អង្គ​បានឈ្នះមារ និងសេចក្តីអាក្រក់គ្រប់យ៉ាង ទ្រង់គង់នៅជាមួយព្រះអង្គ និងជាមួយយើងខ្ញុំជានិច្ចដែរ។ សូម​ទ្រង់​ព្រះមេត្តាប្រោសឱ្យយើងខ្ញុំថ្វាយខ្លួនទៅព្រះអង្គ ដោយចូលរួមក្នុងសក្ការបូជារបស់ព្រះយេស៊ូដែលមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គប្រោសព្រះយេស៊ូឱ្យទទួលសិរីរុងរឿងគង់នៅជាមួយព្រះបិតា ហើយ​គង់​នៅជាមួយយើងខ្ញុំផង។ សូមទ្រង់ព្រះមេត្តាពង្រឹងជំនឿ ពង្រឹងសេចក្តីសង្ឃឹម និងពង្រឹង​សេចក្តី​ស្រឡាញ់​របស់​យើងខ្ញុំ។ សូមកុំបណ្តោយឱ្យយើងខ្ញុំឱ្យលះបង់ ចោលព្រះអង្គឡើយ។