ថ្ងៃពុធ ទី០៨ ខែឧសភា ឆ្នាំ២០២៤

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យលាក់ការអស្ចារ្យនៃព្រះរាជ្យមិន​ឱ្យអ្នក​ប្រាជ្ញយល់​ដឹង​​ តែទ្រង់​បានសម្តែងព្រះអង្គឱ្យអ្នកសុភាពរាបសាស្គាល់ព្រះអង្គវិញ។ សូមទ្រង់ព្រះ​មេត្តាប្រោស​ប្រទាន​ឱ្យយើង​ខ្ញុំ​ស្គាល់​ព្រះអង្គកាន់តែច្បាស់ឡើងៗផង។

សូមថ្លែងព្រះគម្ពីរកិច្ចការរបស់គ្រីស្តទូត កក ១៧,១៥.២២-១៨,១

បងប្អូនគ្រីស្តបរិស័ទជូនដំណើរលោកប៉ូល រហូតដល់ក្រុងអាថែនទើបត្រឡប់ទៅវិញ ទាំងនាំពាក្យ​ផ្តែផ្តាំ​ពី​លោក​ប៉ូលទៅជម្រាបលោកស៊ីឡាស និងលោកធីម៉ូថេឱ្យមកតាមលោកយ៉ាងប្រញាប់បំផុត។ នៅក្រុងអាថែននោះ មាន​ទស្សនវិទូខ្លះនាំលោកប៉ូលទៅមុខសភាក្រុង នៅទួលអារ៉ែស។ លោកប៉ូលក្រោកឈរឡើង​នៅកណ្តាល​អង្គ​ប្រជុំ​ ហើយមានប្រសាសន៍ថា៖ «អស់លោកជាអ្នកក្រុងអាថែន​អើយ! ខ្ញុំសង្កេតឃើញថា អស់លោកនិយមសាស​នា​ខ្លាំង​ណាស់​! ពេលខ្ញុំដើរទៅមកក្នុងទីក្រុង ខ្ញុំឃើញមាន​បូជនីយ​ដ្ឋានទាំងប៉ុន្មានដែលអស់លោកគោរព​​បូជា ហើយខ្ញុំក៏បានឃើញអាសនៈមួយដែលមានចារឹក​អក្សរថា “សូមឧទ្ទិស​ដល់​ព្រះដែល​យើងពុំស្គាល់”។ ខ្ញុំនាំដំណឹងមកប្រាប់អស់លោក អំពី​ព្រះដែល​អស់លោក​ថ្វាយ​បង្គំ​ទាំង​ពុំស្គាល់​ហ្នឹង​ហើយ​ ជាម្ចាស់ដែលបានបង្កើតពិភពលោក និងបង្កើតអ្វីៗស​ព្វ​សារពើ​នៅ​ក្នុង​ពិភព​លោក​នេះ ព្រះអង្គ​ជាអម្ចា​ស់​នៃ​ផ្ទៃមេឃ និងផែនដី ព្រះអង្គមិនគង់នៅក្នុងព្រះវិហារដែលមនុស្ស​សង់នោះឡើយ ហើយព្រះអង្គក៏មិន​ត្រូវ​ការ​ឱ្យ​មនុស្ស​​បីបាច់ថែរក្សាព្រះអង្គដែរ ព្រោះព្រះអង្គទេតើដែលបានប្រទានជីវិត ប្រទានដង្ហើម និងប្រទាន​របស់​សព្វ​គ្រប់​ទាំង​អស់មកមនុស្ស។ ព្រះអង្គប្រទានឱ្យប្រជាជាតិនានាកើតចេញមកពីមនុស្សតែម្នាក់ ហើយឱ្យគេរស់​នៅពាស​ពេញ​​​លើផែនដីទាំងមូល។ ព្រះអង្គបានកំណត់រដូវកាល និងកំណត់ព្រំដែនឱ្យមនុស្សរស់នៅ។ ព្រះជាម្ចាស់​ធ្វើ​ដូច្នេះ​ ដើម្បីឱ្យគេស្វែងរកព្រះអង្គ ហើយបើគេខ្នះខ្នែង​រកព្រះអង្គមែននោះ ប្រហែលជាគេនឹងរកព្រះអង្គឃើញ។ តាមពិត ព្រះជាម្ចាស់មិនគង់នៅឆ្ងាយពីយើងម្នាក់ៗទេ ដ្បិតយើងមានជីវិតមានចលនា និងមានជាតិជាមនុស្សដោយសារ​ព្រះ​​​អង្គ​។ អ្នកកវីខ្លះរបស់អស់លោកតែងពោលថា៖ “យើងក៏ជាពូជរបស់ព្រះអង្គដែរ”។ ហេតុនេះ ប្រសិន​បើ​យើង​ពិតជា​ពូ​ជ​របស់ព្រះជាម្ចាស់មែន យើងមិនត្រូវគិតថា ព្រះអង្គ​មាន​សណ្ឋានដូចរូបសំណាកធ្វើពីមាសប្រាក់ ឬថ្មដែលជាក្បាច់​រចនា​កើតឡើងតាម​ការនឹក​ឃើញរបស់​មនុស្ស​នោះ​ឡើយ​។ ព្រះជាម្ចាស់មិនប្រកាន់ទោសមនុស្សលោកក្នុង​គ្រា​ដែល​គេមិនទាន់ស្គាល់ព្រះអង្គនៅសម័យមុនៗនោះទេ តែឥឡូវនេះ ព្រះអង្គប្រទានដំណឹងដល់មនុស្សទាំងអស់ដែលរ​ស់នៅគ្រប់ទីកន្លែង ឱ្យគេកែប្រែចិត្តគំនិត ដ្បិតព្រះអង្គបានកំណត់ថ្ងៃមួយទុក ដើម្បីវិនិច្ឆ័យទោសមនុស្ស​តាម​សេចក្តី​សុចរិត ដោយសារបុរសម្នាក់ដែលព្រះអង្គបាន​តែងតាំង។ ព្រះអង្គបានប្រោសបុរសនោះ​ឱ្យភ្ញាក់ពីចំណោម​មនុស្ស​ស្លាប់ ទុកជាភស្តុតាងសម្រាប់មនុស្សទាំងអស់»។ កាលពួកគេបានឮសូរពាក្យ “តើនឱ្យភ្ញាក់ឡើងពីចំណោមមនុស្សស្លាប់” ដូច្នេះ អ្នកខ្លះចំអកឱ្យ អ្នកខ្លះ​ទៀត​ពោល​ថា៖ «ចាំលើកក្រោយ យើងនឹងស្តាប់លោកមានប្រសាសន៍អំពីរឿងនេះទៀត»។ ហេតុនេះ លោកប៉ូលចាក​ចេញ​ពីចំណោមពួកគេទៅ។ ក៏ប៉ុន្តែ មានអ្នកខ្លះមកចូលរួមជាមួយលោក ហើយជឿ។ ក្នុងចំណោមអ្នកទាំងនោះ មានលោក​ដឺនីសជាសមាជិកក្រុងនៅទួលអារ៉ែស និងមានស្ត្រីម្នាក់ឈ្មោះនាងដាម៉ារីស ព្រមទាំងអ្នកឯទៀតៗផង។ ក្រោយនោះមក លោកប៉ូលចាកចេញពីក្រុងអាថែន ធ្វើដំណើរឆ្ពោះទៅក្រុងកូរិនថូស។

ទំនុកតម្កើងលេខ ១៤៨, ១-២.១១-១៤ បទពាក្យ ៧

ពិធីអបអរសាទរព្រះគម្ពីរដំណឹងល្អតាម យហ ១៦,១៣

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៦,១២-១៥

នៅពេលកំណត់ដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា ព្រះអង្គមានព្រះបន្ទូលទៅកាន់ក្រុម​សា​​វ័ក​​ថា៖ «ខ្ញុំមានសេចក្តីឯទៀតៗជាច្រើនដែលត្រូវនិយាយប្រាប់អ្នករាល់គ្នា តែអ្នករាល់គ្នាពុំអាចទទួលនៅពេលនេះបានទេ។ កាលណាព្រះវិញ្ញាណនៃសេចក្តី​ពិត​យាង​មក​ដល់​ ព្រះអង្គនឹងណែនាំអ្នករាល់គ្នាឱ្យស្គាល់សេចក្តីពិតគ្រប់ជំពូក ដ្បិតសេចក្តីផ្សេងៗដែលព្រះអង្គថ្លែង មិនចេញ​មក​ពី​ព្រះ​អង្គផ្ទាល់ទេ គឺព្រះអង្គថ្លែងតែសេចក្តីណាដែលទ្រង់ព្រះសណ្តាប់ឮ ព្រមទាំងមាន​ព្រះបន្ទូល​ប្រាប់​ឱ្យអ្នក​រាល់​គ្នា​ដឹង​អំពីហេតុការណ៍ដែលត្រូវកើតមាននៅថ្ងៃមុខផង។ ព្រះអង្គនឹងសម្តែងសិរីរុងរឿងរបស់ខ្ញុំ ព្រោះព្រះអង្គទទួល​សេច​ក្តី​ទាំង​អស់ពីខ្ញុំ យកមកប្រាប់អ្នករាល់គ្នា។ អ្វីៗដែលព្រះបិតាមានទាំងប៉ុន្មាន សុទ្ធតែជារបស់ខ្ញុំទាំងអស់។ ហេតុនេះ​ហើយ បានជាខ្ញុំពោលថា ព្រះអង្គទទួលសេចក្តីទាំងអស់ពីខ្ញុំយកមកប្រាប់អ្នករាល់គ្នា»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គចាត់ព្រះវិញ្ញាណយាងមកណែនាំយើងខ្ញុំឱ្យ ស្គាល់សេចក្តី​ពិតគ្រប់​ជំពូក។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំឱ្យយល់ពីធម៌មេត្តាករុណាហួសកម្រិត ដែលព្រះអង្គ​សម្តែង​ក្នុង​អភិ​បូ​ជានេះផង។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានព្រះបន្ទូល និងព្រះកាយព្រះគ្រីស្តធ្វើជាអាហារ​សម្រាប់​យើងខ្ញុំ។ យើងខ្ញុំសូមអរព្រះគុណព្រះអង្គ។ សូមទ្រង់ព្រះមេត្តាចាត់ព្រះវិញ្ញាណ​យាង​មកណែនាំយើង​ខ្ញុំឱ្យស្គាល់​សេចក្តី​ពិតកាន់តែច្បាស់ឡើងៗ តាមព្រះ​បន្ទូលសន្យារបស់ព្រះគ្រីស្ត ដែលមានព្រះជន្មគង់នៅ និងសោយរាជ្យ​អស់​កល្បជាអង្វែងតរៀងទៅ។