ថ្ងៃព្រហស្បតិ៍ ទី២៣ ខែមេសា ឆ្នាំ២០២៦

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតាប្រកបដោយតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! ព្រះអង្គសព្វព្រះហឫទ័យឱ្យមនុស្សគ្រប់ជាតិសាសន៍ស្គាល់ព្រះអង្គ ដោយមិនរើសមុខនរណាឡើយ។ ព្រះអង្គក៏សព្វព្រះហឫទ័យសង្គ្រោះអស់អ្នកដែលជឿសង្ឃឹមលើព្រះអង្គដែរ។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំ ក្នុងពេលស្តាប់ព្រះបន្ទូល។

សូមថ្លែងព្រះគម្ពីរកិច្ចការរបស់គ្រីស្តទូត កក ៨,២៦-៤០

ទេវទូតរបស់ព្រះអម្ចាស់មានប្រសាសន៍មកកាន់លោកភីលីពថា៖ «សូមក្រោក​ឡើង ធ្វើដំណើរឆ្ពោះទៅទិសខាងត្បូង តាមផ្លូវចុះពីក្រុងយេរូសាឡឹមទៅក្រុង​កាសា ផ្លូវនោះស្ងាត់ទៅហើយ»។ លោកភីលីពក៏ក្រោកឡើងចេញដំណើរ​ទៅ។ នៅតាមផ្លូវមានជនជាតិអេត្យូពីម្នាក់ជាមនុស្សគម្រៀវ លោកជាមន្ត្រីជាន់ខ្ពស់​របស់ព្រះមហាក្សត្រិយានី​កន់ដាស ដែលគ្រងរាជ្យនៅស្រុកអេត្យូពី លោកក៏ជាអ្នកកាន់កាប់ព្រះរាជទ្រព្យទាំងប៉ុន្មានដែរ។ លោកមក​ថ្វាយបង្គំ​ព្រះជាម្ចាស់​នៅក្រុងយេរូសាឡឹម ហើយធ្វើដំណើរវិលត្រឡប់ទៅវិញដោយជិះរទេះសេះ ទាំងអាន​គម្ពីរព្យាការី​អេសា​យ​ផង។ ព្រះវិញ្ញាណមានព្រះបន្ទូលមកលោកភីលីពថា៖ «ចូរទៅមុខ រួចចូលទៅជិត​រទេះសេះនោះទៅ»។ លោកភីលីពក៏រត់​ទៅមុខ ហើយ​ឮមន្ត្រីអេត្យូពីអានគម្ពីរ​ព្យាការីអេសាយ។ លោកភីលីពសួរមន្ត្រីនោះថា៖ «តើលោកយល់សេចក្តីដែល​លោក​កំពុងតែអាននេះឬទេ?»។ លោកមន្ត្រីតបមកវិញថា៖ «ធ្វើដូចម្តេច​នឹង​ឱ្យខ្ញុំយល់បាន បើគ្មាននរណាពន្យល់​ណែនាំ​សោះនោះ!»។ លោកក៏អញ្ជើញលោកភីលីពឡើងជិះរទេះសេះជាមួយ។ រីឯអត្ថបទគម្ពីរដែល​លោកកំពុង​អាននោះគឺ “លោកត្រូវគេនាំយកទៅ ដូចជាចៀមដែលគេនាំទៅសម្លាប់។ លោកពុំ​បា​នហើបមាត់ទាល់តែសោះ គឺ​ប្រៀប​បីដូចជាកូនចៀមដែលស្ងៀម​​ស្ងាត់នៅមុខអ្នកកាត់រោមដែរ។ លោកត្រូវគេបន្ទាបបន្ថោក ហើយគេមិន​រកយុត្តិធម៌ជូន​លោក​ឡើយ។ គ្មាននរណាអាចតំណាលអំពីពូជពង្សរបស់លោក​បានទេ ព្រោះគេបានដកជីវិតរបស់លោកចេញ​ពី​ផែនដីនេះបាត់ទៅហើយ”។ មន្ត្រីនោះសួរលោកភីលីពថា៖ «សូមប្រាប់ខ្ញុំផង តើព្យាការីមានប្រសាសន៍​ដូច្នេះ សំដៅលើអ្នកណា? តើលោកមាន​ប្រសាសន៍អំពីខ្លួនលោកផ្ទាល់ ឬមាន​ប្រសាសន៍អំពីអ្នកណាម្នាក់ផ្សេងទៀត?»។ លោកភីលីព​ក៏ជម្រាប​ជូន​ដំណឹងល្អ​អំពីព្រះយេស៊ូប្រាប់លោក ដោយចាប់ផ្តើមពីអត្ថបទគម្ពីរនោះទៅ។ លោក​ទាំងពីរចេះតែបន្តដំណើរទៅមុខ។ លុះ​ដល់​កន្លែងមួយមានទឹក លោកមន្ត្រី​មានប្រសាសន៍ថា៖ «ទីនេះមានទឹក តើមានអ្វីឃាត់ខ្ញុំមិនឱ្យទទួលពិធីជ្រមុជទឹក!»។ លោកបញ្ជាឱ្យគេបញ្ឈប់រទេះសេះ។ លោកមន្ត្រី និងលោកភីលីពចុះទៅក្នុងទឹកទាំងពីរនាក់ ហើយលោកភីលីព​ក៏ធ្វើ​ពិធីជ្រមុជទឹក​ជូនលោក​មន្ត្រីនោះ។ កាលលោកទាំងពីរឡើងពីទឹកមកវិញ ព្រះវិញ្ញាណនៃព្រះអម្ចាស់​បាន​លើក​លោកភីលីពយកចេញបាត់ទៅ លោកមន្ត្រីលែងឃើញលោកភីលីពទៀតហើយ។ លោកមន្ត្រីបន្តដំណើរ​ទៅមុខ​ទៀត​ដោយចិត្តត្រេកអរសប្បាយ។ រីឯលោកភីលីព គេបែរជាឃើញលោកនៅ​ឯក្រុង​អាសូតឯណោះ។ បន្ទា​ប់​មក លោកធ្វើដំណើរពីក្រុងមួយទៅក្រុងមួយ ទាំងនាំដំណឹងល្អរហូតទៅដល់ក្រុង​សេសារ៉េ។

ទំនុកតម្កើងលេខ ៦៦ (៦៥),៨-៩.១៦-១៧.៤-៥.២០ បទកាកគតិ

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ៦,៤៤-៥១

ក្រោយពីពេលព្រះយេស៊ូប្រទាននំប៉័ងឱ្យបណ្តាជន ព្រះអង្គមានព្រះបន្ទូល​ទៅកាន់ពួកគេថា៖ «ប្រសិនបើព្រះបិតាដែលចាត់ខ្ញុំឱ្យមកមិនទាក់ទាញ​ចិត្ត​គេទេ គ្មាននរណាម្នាក់អាចមករកខ្ញុំបានឡើយ។ រីឯខ្ញុំ ខ្ញុំនឹងប្រោសអ្នកនោះ​ឱ្យមានជីវិតរស់ឡើងវិញនៅថ្ងៃចុងក្រោយបំផុត។ ក្នុងគម្ពីរព្យាការីមានចែងទុកមកថា “ព្រះជាម្ចាស់នឹងប្រៀនប្រដៅមនុស្សទាំងអស់”។ អស់អ្នកដែល​បានស្តាប់ព្រះបិតា ហើយទទួលយកការប្រៀនប្រដៅរបស់ព្រះអង្គ អ្នកនោះ​មុខជាមករកខ្ញុំពុំខាន។ គ្មាននរណាម្នាក់បានឃើញព្រះបិតាឡើយ លើកលែងតែអ្នកដែលមកពីព្រះជាម្ចាស់ប៉ុណ្ណោះ គឺអ្នកនោះហើយបានឃើញព្រះអង្គ ខ្ញុំសុំប្រាប់ឱ្យអ្នករាល់គ្នាដឹងច្បាស់ថា អ្នកណាជឿ អ្នកនោះមានជីវិតអស់កល្ប​ជានិច្ច។ ខ្ញុំនេះហើយជាអាហារដែលផ្តល់ជីវិត។ បុព្វបុរសរបស់អ្នករាល់គ្នា​បានបរិភោគនំម៉ាណានៅវាលរហោស្ថាន ហើយគាត់ទទួលមរណភាពអស់។ រីឯអាហារដែលចុះពីស្ថានបរមសុខមកនេះ អ្នកណាបរិភោគ អ្នកនោះមិនស្លាប់​ឡើយ។ ខ្ញុំនេះហើយជាអាហារដែលមានជីវិត ចុះពីស្ថានបរមសុខមក។ អ្នក​ណាបរិភោគអាហារនេះ នឹងរស់នៅអស់កល្បជានិច្ច។ អាហារដែលខ្ញុំនឹង​ឱ្យ​នោះ គឺខ្លួនខ្ញុំផ្ទាល់ដែលត្រូវបូជាសម្រាប់ឱ្យមនុស្សលោកមានជីវិត»។

ពាក្យថ្វាយតង្វាយ

បពិត្រព្រះបិតាប្រកបដោយព្រះប្រាជ្ញាញាណឈ្លាសវៃ! ព្រះអង្គតែងតែប្រៀនប្រដៅមនុស្សទាំងអស់ និងទាក់ទាញ​ចិត្តគេឱ្យស្គាល់ព្រះអង្គ។ ក្នុងអភិបូជានេះ ព្រះអង្គក៏ប្រោសយើងខ្ញុំជាបុត្រធីតាឱ្យចូលរួបរួមជាមួយព្រះ​យេស៊ូ​គ្រីស្ត​ដែល​បូជាព្រះជន្ម។ សូមទ្រង់ព្រះមេត្តាទាក់ទាញចិត្តយើងខ្ញុំ ឱ្យរស់នៅគ្រប់ពេលវេលាស្របតាមអគ្គសញ្ញាដែល​យើង​ខ្ញុំនាំគ្នាប្រារព្ធនៅពេលនេះផង។

ពាក្យអរព្រះគុណ

បពិត្រព្រះអម្ចាស់ជាព្រះបិតាប្រកបដោយធម៌មេត្តាករុណាយ៉ាងក្រៃលែង! ក្នុងអភិបូជានេះ ព្រះយេស៊ូបានប្រទានព្រះបន្ទូល និងព្រះកាយផ្ទាល់របស់ព្រះអង្គឱ្យយើងខ្ញុំ។ សូមទ្រង់ព្រះមេត្តាប្រោសយើងខ្ញុំឱ្យយកចិត្តទុកដាក់ទទួលការប្រៀនប្រដៅរបស់ព្រះអង្គ សូមឱ្យថ្ងៃណាមួយ យើងខ្ញុំរួបរួមជាមួយព្រះបុត្រានឹងឃើញព្រះបិតានៅស្ថានបរមសុខ បានរួមជាមួយព្រះវិញ្ញាណដ៏វិសុទ្ធអស់កល្បជាអង្វែង​តរៀងទៅ។