ថ្ងៃទី១១ ខែកក្កដា
សន្ដបេណេឌិកតូ ជាចៅអធិការ
បុណ្យរម្លឹក
ពណ៌ស
លោកបេណេឌិកតូ (៤៨០-៥៤៧) កើតនៅភូមិនូរស៊ី ក្នុងប្រទេសអ៊ីតាលី។ កាលលោកទៅរៀននៅទីក្រុងរ៉ូម លោកសម្រេចចិត្តទៅរស់នៅក្នុងកន្លែងស្ងាត់ដូចឥសីម្នាក់ ដើម្បីឱ្យបានស្គាល់ព្រះជាម្ចាស់។ យូរៗទៅ មានគ្រីស្តបរិស័ទទៅរស់នៅជាមួយ។ លោកតែងតាំងអារាមនៅភ្នំការស៊ីណូ ហើយចែងធម្មវិន័យសម្រាប់អ្នកទាំងនោះ ដែលជាព្រះសង្ឈនៃគ្រីស្តសាសនា។ ក្នុងធម្មវិន័យនោះ លោកខិតខំអប់រំព្រះសង្ឈឱ្យរម្ងាប់តណ្ហា និងស្ងប់ចិត្ត ដោយអធិដ្ឋាន ដោយធ្វើការផ្ទាល់ដៃ និងដោយរស់នៅជាក្រុមគ្រួសារបុព្វជិត ក្រោយការណែនាំរបស់ចៅអធិការ។ សន្តបេណេឌិកតូពិតជាអ្នកបង្កើតក្រុមព្រះសង្ឈនៃគ្រីស្តសាសនាមែននៅទ្វីបអឺរ៉ុបខាងលិខ។ សន្តបេណេឌិកតូជាឧបការីទ្វីបអឺរ៉ុប។
ពាក្យអធិដ្ឋានពេលចូល
បពិត្រព្រះជាម្ចាស់ជាព្រះបិតា! ព្រះអង្គបានប្រោសប្រទានឱ្យសន្តបេណេឌិកតូ ធ្វើជាគ្រូខាងព្រះវិញ្ញាណសម្រាប់ណែនាំអស់អ្នកដែលមានចំណងចង់ស្វែងរក និងបម្រើព្រះអង្គ។ សូមទ្រង់ព្រះមេត្តាប្រោសប្រទានឱ្យយើងខ្ញុំយកចិត្តទុកដាក់ប្រព្រឹត្តតាមវិន័យរបស់ព្រះអង្គដោយចិត្តស្មោះដែរ ដោយស្រឡាញ់ព្រះអង្គលើសអ្វីៗទាំងអស់។
សូមថ្លែងព្រះគម្ពីរសុភាសិត សភ ២,១-៩
កូនអើយ ចូរចងចាំដំបូន្មានរបស់ឪពុក កុំភ្លេចសេចក្ដីដែលឪពុកផ្តែផ្តាំនេះឡើយ ចូរផ្ទៀងត្រចៀកស្ដាប់ប្រាជ្ញា ហើយផ្ចង់ចិត្តពិចារណាឱ្យយល់។ ចូរយកតម្រិះមកធ្វើជាជំនួយ ហើយយកការដឹងខុសត្រូវមកធ្វើជាទីពឹង។ ចូរខំប្រឹងស្វែងរកប្រាជ្ញា ដូចស្វែងរកប្រាក់ និងដូចជីកដីរកកំណប់។ ធ្វើដូច្នេះ ទើបកូនយល់អំពីការគោរពកោតខ្លាចព្រះអម្ចាស់ ព្រមទាំងអាចស្គាល់ព្រះអង្គបានទៀតផង។ មានតែព្រះអម្ចាស់ទេដែលប្រទានប្រាជ្ញា។ ចំណេះវិជ្ជា និងការដឹងខុសត្រូវសុទ្ធតែមកពីព្រះអង្គទាំងអស់។ ព្រះអង្គជួយមនុស្សទៀងត្រង់ ហើយធ្វើជាខែលការពារអស់អ្នកដែលដើរតាមមាគ៌ាដ៏ត្រឹមត្រូវ។ ព្រះអង្គជួយការពារអស់អ្នកដែលដើរតាមគន្លងធម៌ ហើយថែរក្សាអស់អ្នកដែលផ្ញើជីវិតលើព្រះអង្គ។ ប្រសិនបើកូនស្ដាប់ឪពុក កូននឹងយល់អំពីមាគ៌ាដ៏សុចរិតទៀងត្រង់ និងត្រឹមត្រូវ ពោលគឺអ្វីៗទាំងអស់ដែលនាំមកនូវសុភមង្គល។
ទំនុកតម្កើងលេខ ៣៤ (៣៣),២-៤.៦.៩.១២.១៤-១៥ បទកាកគតិ
| ២ | ខ្ញុំអរព្រះគុណ | អម្ចាស់ពេកពន់ | គ្រប់ពេលវេលា |
| សូមលើកតម្កើង | ព្រះអង្គគ្រប់គ្រា | ឥតមានរួញរា | |
| ឈប់ឈរសោះឡើយ | ។ | ||
| ៣ | ខ្ញុំខ្ពស់មុខព្រោះ | ព្រះម្ចាស់សង្គ្រោះ | ខ្ញុំមិនកន្តើយ |
| ចូរអ្នកទន់ទាប | ស្តាប់កុំព្រងើយ | នឹងបានធូរស្បើយ | |
| អំណរខ្លាំងក្លា | ។ | ||
| ៤ | សូមមកប្រកាស | នឹងខ្ញុំឱ្យច្បាស់ | ដោយពោលឡើងថា |
| ព្រះម្ចាស់ថ្កុំថ្កើង | រុងរឿងក្រៃណា | យើងនាំគ្នីគ្នា | |
| តម្កើងព្រះអង្គ | ។ | ||
| ៦ | អ្នកដែលសម្លឹង | ឆ្ពោះទៅព្រះអង្គ | បានសុខឥតមោះ |
| ផុតអស់ទុក្ខសោក | វិយោគរងគ្រោះ | ពួកគេទាំងនោះ | |
| មិនខកចិត្តឡើយ | ។ | ||
| ៩ | ចូរអ្នកផ្អែកពឹង | ពិសោធន៍ឱ្យដឹង | ថាព្រះម្ចាស់ថ្លៃ |
| ទ្រង់មានមេត្តា | សប្បុរសពេកក្រៃ | អស់ជនប្រុសស្រី | |
| មានជ័យមង្គល | ។ | ||
| ១២ | ឱកូនចៅអើយ | កុំនៅព្រងើយ | ស្តាប់ខ្ញុំប្រដៅ |
| ឱ្យចេះគោរព | ដរាបតទៅ | កុំធ្វើល្ងង់ខ្លៅ | |
| ត្រូវកោតខ្លាចព្រះ | ។ | ||
| ១៤ | ចូរទប់អណ្តាត | កាន់ចិត្តឱ្យស្អាត | កុំពោលវៀចវេរ |
| និយាយកុហក | បោកបញ្ឆោតគេ | ឬក៏ដៀលជេរ | |
| នាំឱ្យអាស្រូវ | ។ | ||
| ១៥ | ចូរងាកចេញឆ្ងាយ | អំពើអន្តរាយ | អាក្រក់ជាផ្លូវ |
| សាងអំពើល្អ | ខំស្វែងរកទៅ | សុខសាន្តទុកនៅ | |
| យ៉ាងអស់ពីចិត្ត | ។ |
ពិធីអបអរសាទរព្រះគម្ពីរដំណឹងល្អ
អាលេលូយ៉ា! អាលេលូយ៉ា!
អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១៩, ២៧-២៩
ពេលនោះ លោកសិលាទូលព្រះអង្គថា៖«ព្រះអង្គទតឃើញស្រាប់ហើយ យើងខ្ញុំបានលះបង់អ្វីៗទាំងអស់ ដើម្បីមកតាមព្រះអង្គ។ តើយើងខ្ញុំនឹងទៅជាយ៉ាងណា?»។ ព្រះយេស៊ូមានព្រះបន្ទូលទៅពួកសាវ័កថា៖«ខ្ញុំសុំប្រាប់ឱ្យអ្នករាល់គ្នាដឹងច្បាស់ថា នៅក្នុងពិភពថ្មី ពេលបុត្រមនុស្សគង់លើបល្ល័ង្កប្រកបដោយសិរីរុងរឿង អ្នករាល់គ្នាដែលមកតាមខ្ញុំនេះ ក៏នឹងអង្គុយលើបល្ល័ង្កទាំងដប់ពីរ ហើយគ្រប់គ្រងលើកុលសម្ព័ន្ធទាំងដប់ពីរនៃជនជាតិអ៊ីស្រាអែលទៀតផង។ អ្នកណាលះបង់ផ្ទះសំបែង បងប្អូនប្រុសស្រី ឪពុកម្ដាយ កូន ឬស្រែចម្ការព្រោះតែខ្ញុំ អ្នកនោះនឹងបានទទួលវិញមួយជាមួយរយ ព្រមទាំងមានជីវិតអស់កល្បជានិច្ច។ មានមនុស្សជាច្រើនដែលនៅខាងមុខ នឹងត្រឡប់ទៅនៅខាងក្រោយ រីឯអ្នកដែលនៅខាងក្រោយ នឹងត្រឡប់ទៅនៅខាងមុខវិញ»។
ពាក្យថ្វាយតង្វាយ
បពិត្រព្រះជាម្ចាស់ជាព្រះបិតា! សូមទ្រង់ព្រះមេត្តាទទួលកាយ វាចា ចិត្ត ដែលយើងខ្ញុំសូមថ្វាយព្រះអង្គនៅថ្ងៃគោរពសន្ត បេណេឌិក។ សូមទ្រង់ព្រះមេត្តាប្រោសឱ្យយើងខ្ញុំមានចិត្តចង់ស្វែងរកព្រះជាម្ចាស់តែមួយព្រះអង្គគត់ក្នុងគ្រប់កិច្ចការដែលយើងខ្ញុំប្រព្រឹត្ត។ សូមប្រោសឱ្យយើងខ្ញុំរួបរួមគ្នាជាធ្លុងតែមួយ និងបានសេចក្តីសុខសាន្តផង។
ពាក្យអរព្រះគុណ
បពិត្រព្រះជាម្ចាស់ជាព្រះបិតា! ព្រះអង្គបានប្រោសប្រទានព្រះកាយព្រះគ្រីស្តដែលផ្តល់ជិវិតរស់នៅអស់កល្បជានិច្ចឱ្យយើងខ្ញុំ។ សូមទ្រង់ព្រះមេត្តាប្រោសឱ្យយើងខ្ញុំបម្រើព្រះអង្គដោយចិត្តស្មោះ ទាំងយកចិត្តទុកដាក់ ទាំងការអធិដ្ឋាន ព្រមទាំងស្រឡាញ់អ្នកដ៏ទៃទុកជាបងប្អូនផង។
