ថ្ងៃសុក្រ ទី២២ ខែមីនា ឆ្នាំ២០២៤

ពាក្យអធិដ្ឋានពេលចូល

បពិត្រព្រះអម្ចាស់ដ៏មានតេជានុភាពសព្វប្រការ សូមព្រះអង្គលើកលែងទោសឱ្យយើងខ្ញុំជាប្រជារាស្ត្រព្រះអង្គ។ យើងខ្ញុំជាមនុស្សទន់ខ្សោយ ដែលស្ថិតនៅក្រោមអំណាចនៃតណ្ហានៅឡើយ សូមទ្រង់ព្រះមេត្តារំដោះយើងខ្ញុំឱ្យមានសេរីភាពយ៉ាងពិតប្រាកដផង។

សូមថ្លែងព្រះគម្ពីរព្យាការីយេរេមី យរ ២០,១០-១៣

ខ្ញុំយេរេមី ឮមហាជននិយាយមួលបង្កាច់ខ្ញុំថា៖ ”អ្នកនេះដើរបំភ័យគេគ្រប់ទីកន្លែង ចូរប្តឹងវា! យើងនាំគ្នាទៅប្តឹងវា!”។ សូម្បីតែមិត្តសម្លាញ់ជិតដិតរបស់ខ្ញុំ ក៏ចាំតែចាប់កំហុសខ្ញុំដែរ។ គេនិយាយគ្នាថា៖ ”បើយើងលួងលោមបញ្ឆោតវា យើងនឹងចាប់វាបាន ហើយយក​វាមកធ្វើបាប សងសឹកតាមអំពើចិត្ត”។ ប៉ុន្តែ ព្រះអម្ចាស់គង់នៅជាមួយខ្ញុំ ព្រះអង្គចាំជួយខ្ញុំដូចវីរបុរសដ៏អង់អាច ហេតុនេះ អស់អ្នកដែលបៀតបៀនខ្ញុំមុខជានឹងដួល ហើយមិនអាចឈ្នះខ្ញុំបានទេ។ ពួកគេនឹងត្រូវអាម៉ាស់ជាខ្លាំង ព្រោះធ្វើអ្វីខ្ញុំមិនកើត ពួកគេនឹងបាក់មុខរហូតទៅគ្មាននរណាភ្លេចការអាម៉ាស់នេះបានឡើយ។ បពិត្រព្រះអម្ចាស់នៃពិភពទាំងមូល! ព្រះអង្គស្ទង់មើលចិត្តគំនិតរបស់មនុស្សសុចរិត ព្រះអង្គឈ្វេងយល់ចិត្តថ្លើមរបស់គេ។ ខ្ញុំនឹងឃើញព្រះអង្គសងសឹកពួកគេជំនួសខ្ញុំ ដ្បិតខ្ញុំផ្ញើជីវិតរបស់ខ្ញុំលើព្រះអង្គទាំងស្រុងហើយ!។ សូមច្រៀងបទថ្វាយព្រះអម្ចាស់! សូមសរសើរតម្កើងព្រះអម្ចាស់! ដ្បិតព្រះអង្គបានរំដោះជីវិតមនុស្សទុគ៌តឱ្យរួចពីកណ្តាប់ដៃរបស់មនុស្សអាក្រក់។

ទំនុកតម្កើងលេខ ១៨ (១៧),២-៣.៥-៧ បទព្រហ្មគីតិ

ពិធីអបអរសាទរព្រះគម្ពីរដំណឹងល្អតាម យហ ១២,៣២

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១០,៣១-៤២

ជនជាតិយូដានាំគ្នារើសដុំថ្មម្តងទៀត បម្រុងនឹងគប់សម្លាប់ព្រះយេស៊ូ។ ព្រះអង្គមានព្រះបន្ទូលទៅគេថា៖ «ខ្ញុំបានបង្ហាញឱ្យអ្នករាល់គ្នាឃើញកិច្ចការដ៏ល្អប្រសើរជាច្រើនដែលព្រះបិតាប្រទានឱ្យខ្ញុំធ្វើ។ ក្នុងបណ្តាកិច្ចការទាំងនោះ តើកិច្ចការណាមួយនាំឱ្យអ្នករាល់គ្នាយកដុំថ្មបម្រុងនឹងគប់សម្លាប់ខ្ញុំ?» ជនជាតិយូដាតបទៅព្រះអង្គថា៖ «យើងចង់សម្លាប់លោក មិនមែនមកពីលោកបានធ្វើកិច្ចការដ៏ល្អប្រសើរណាមួយនោះឡើយ គឺមកពីលោកបានពោលពាក្យប្រមាថព្រះជាម្ចាស់ ដ្បិតលោកជាមនុស្ស ហើយតាំងខ្លួនជាព្រះជាម្ចាស់»​។ ព្រះយេស៊ូមានព្រះបន្ទូលថា៖ «ក្នុងធម្មវិន័យរបស់អ្នករាល់គ្នាមានចែងទុកមកថា ព្រះជាម្ចាស់មានព្រះបន្ទូលថា “អ្នករាល់គ្នាជាព្រះ”។ យើងមិនអាចលុបបំបាត់គម្ពីរបានឡើយ។ បើធម្មវិន័យហៅអស់អ្នកដែលទទួលព្រះបន្ទូលថាជា “ព្រះ” ដូច្នេះ ចុះហេតុដូចម្តេចបានជាពេលខ្ញុំប្រាប់អ្នករាល់គ្នាថា “ខ្ញុំជាបុត្រារបស់ព្រះជាម្ចាស់” អ្នករាល់គ្នាបែរជាពោលថា “ខ្ញុំប្រមាថព្រះអង្គ” ទៅវិញ? ព្រះបិតាបានប្រោសខ្ញុំឱ្យវិសុទ្ធ ហើយចាត់ខ្ញុំឱ្យមកក្នុងពិភពលោកនេះទៀតផង។ ប្រសិនបើខ្ញុំមិនធ្វើការរបស់ព្រះបិតាទេ នោះសុំកុំជឿខ្ញុំឡើយ។ ប៉ុន្តែ បើខ្ញុំធ្វើកិច្ចការរបស់ព្រះអង្គ ទោះបីអ្នករាល់គ្នាមិនជឿខ្ញុំក៏ដោយ ក៏សុំជឿទៅលើកិច្ចការទាំងនោះចុះ ដើម្បីឱ្យដឹង ហើយរឹតតែដឹងទៀតថា ព្រះបិតាស្ថិតនៅក្នុងខ្ញុំ ហើយខ្ញុំក៏ស្ថិតនៅក្នុងព្រះបិតាដែរ»។ គេរកចាប់ព្រះយេស៊ូម្តងទៀត ប៉ុន្តែព្រះអង្គគេចផុតពីគេទៅ។
ព្រះយេស៊ូយាងទៅត្រើយខាងនាយទន្លេយ័រដាន់ជាថ្មីម្តងទៀត ត្រង់កន្លែងដែលលោកយ៉ូហានធ្លាប់ជ្រមុជទឹកឱ្យបណ្តាជនកាលពីមុន រួចព្រះអង្គគង់នៅទីនោះ មានមនុស្សជាច្រើននាំគ្នាមកគាល់ព្រះអង្គ គេពោលថា៖ «លោកយ៉ូហានពុំបានធ្វើទីសម្គាល់ណាមួយឡើយ ប៉ុន្តែពាក្យទាំងប៉ុន្មានដែលគាត់និយាយអំពីលោកនេះ សុទ្ធតែត្រូវទាំងអស់»​។ មនុស្សជាច្រើននៅទីនោះ បានជឿលើព្រះយេស៊ូ។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតាដ៏សប្បុរស! ព្រះអង្គសព្វព្រះហប្ញទ័យឱ្យយើងខ្ញុំមកគោរពបម្រើព្រះអង្គនៅទីនេះ។ យើងខ្ញុំសូមចូលរួមក្នុងសក្ការបូជារបស់ព្រះយេស៊ូគ្រីស្តដែលបានបូជាព្រះជន្ម។ សូមទ្រង់ព្រះមេត្តាសង្គ្រោះយើងខ្ញុំផង។

ពាក្យអរព្រះគុណ

បពិត្រព្រះអម្ចាស់ជាព្រះបិតា ព្រះអង្គបានប្រទានព្រះកាយ និងព្រះលោហិតព្រះគ្រីស្តឱ្យយើងខ្ញុំទុកជាអាហារផ្តល់ជីវិត។ យើងខ្ញុំសូមអរព្រះគុណព្រះអង្គ។ សូមទ្រង់ព្រះមេត្តាកុំលះបង់ចោលយើងខ្ញុំឡើយ សូមប្រោសការពារយើងខ្ញុំឱ្យជៀសវាងពីអ្វីៗដែលនាំឱ្យ អន្តរាយ និងបាត់បង់ជីវិតអស់កល្បជានិច្ចផង។