លោកស្តេផានពោរពេញដោយព្រះវិញ្ញាណដ៏វិសុទ្ធ ដែលប្រោសឱ្យលោកមានប្រាជ្ញាវាងវៃ និងចិត្តក្លាហាន។ ហេតុនេះហើយ បានជាព្រះសហគមន៍ដើមដំបូងបានជ្រើសរើសលោកស្តេផានឱ្យចែកអំណោយយ៉ាងត្រឹមត្រូវឱ្យអ្នកក្រីក្រ។ លោកក៏ដាស់តឿនជនជាតិយូដាដែលបានឆ្កាង​ព្រះ​យេស៊ូឱ្យទទួលស្គាល់សិរីរុងរឿងរបស់ព្រះអង្គ នៅពេលលោកទទួលមរណភាព លោកពោលព្រះបន្ទូលដែលព្រះយេស៊ូបានថ្លែងទុកពេលដែលព្រះអង្គជាប់លើឈើឆ្កាង។

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គបានប្រោសសន្តស្ទេផានឱ្យបង្ហាញនូវសេចក្តីស្រឡាញ់ចំពោះអ្នកដែលប្រហារជីវិតលោក រហូតដល់អត់ទោសឱ្យគេផង។ សូមទ្រង់ព្រះមេត្តាប្រោសយើងខ្ញុំឱ្យមានជំនឿមាំមួនដូចលោក ហើយសុខចិត្តអត់ទោសដល់អ្នកដែលធ្វើបាបយើងខ្ញុំសព្វថ្ងៃនេះផង។

អត្ថបទទី១៖ សូមថ្លែងព្រះគម្ពីរកិច្ចការគ្រីស្តទូត កក ៦,៨-១០; ៧,៥៤-៦០

ព្រះជាម្ចាស់គាប់ព្រះហឫទ័យនឹងលោកស្តេផានណាស់ ហើយព្រះអង្គប្រទានឫទ្ធានុភាពឱ្យលោកសម្តែងឫទ្ធិបាដិហារិយ៍ និងទីសម្គាល់ធំៗ ក្នុងចំណោមប្រជាជន។ មានអ្នកខ្លះ ជាសមាជិកធម្មសាលាដែលគេហៅថា “ធម្មសាលាពួកអ្នកងារពីរដើម” និងអ្នកខ្លះក្នុងចំណោមអ្នកស្រុកគីរេន អ្នកស្រុកអាឡិចសន់ឌ្រី និងអ្នកខ្លះទៀតក្នុងចំណោមអ្នកស្រុកស៊ីលីស៊ី និងអ្នកស្រុកអាស៊ី នាំគ្នាជជែកជាមួយលោកស្តេផាន ប៉ុន្តែ ពួកគេពុំអាចជជែកឈ្នះលោកស្តេផានបានឡើយ ព្រោះលោកមានប្រសាសន៍ប្រកបដោយប្រាជ្ញាមកពីព្រះវិញ្ញាណ។ កាលពួកគេឮដូច្នោះ គេក្រេវក្រោធជាខ្លាំង គេសង្កៀតធ្មេញដាក់លោកស្តេផាន រីឯលោកស្តេផានវិញ លោកបានពោរពេញដោព្រះវិញ្ញាណដ៏វិសុទ្ធ លោកសម្លឹងមើលទៅលើមេឃ ឃើញសិរីរុងរឿងរបស់ព្រះជាម្ចាស់ និងឃើញព្រះយេស៊ូឈរនៅខាងស្តាំព្រះអង្គ។ លោកមានប្រសាសន៍​ថា៖ «មើលហ្ន៎៎! ខ្ញុំឃើញផ្ទៃមេឃបើកចំហ ហើយឃើញបុត្រមនុស្សឈរនៅខាងស្តាំព្រះជាម្ចាស់»។ ពួកគេស្រែកឡើងយ៉ាងខ្លាំង ទាំងយកដៃខ្ទប់ត្រចៀក ហើយនាំគ្នាស្ទុះចាប់លោក។ គេបណ្តេញលោកចេញពីទីក្រុង រួចយកដុំថ្មគប់សម្លាប់លោក។ ពួកអ្នកដែលជាសាក្សីបានយកសម្លៀកបំពាក់របស់ខ្លួនទៅទុកក្បែរជើងយុវជនម្នាក់ឈ្មោះសូល។ នៅពេលគេគប់ដុំថ្មសម្លាប់នោះ លោកស្តេផានទូលអង្វរថា៖​ «ព្រះអម្ចាស់អើយ! សូមទទួលព្រះវិញ្ញាណរបស់ទូលបង្គំផង!»។ បន្ទាប់មក លោកលុតជង្គង់ចុះ ហើយបន្លឺសំឡេងខ្លាំងៗថា៖ «ព្រះអម្ចាស់​អើយ! សូមកុំប្រកាន់ទោសគេ ព្រោះតែអំពើបាបនេះធ្វើអ្វី»។ កាលបានទូលដូច្នោះហើយ លោកក៏ផុតដង្ហើមទៅ។

ទំនុកតម្កើងលេខ ៣១ (៣០), ៣-៤.៦.៨-៩.១៧.២០ បទកាកគតិ

ពិធីអបអរសាទរព្រះគម្ពីរដំណឹងល្អ

អាលេលូយ៉ា! អាលេលូយ៉ា!
លោកស្តេផានពោរពេញដោយព្រះវិញ្ញាណដ៏វិសុទ្ធ បានឃើញផ្ទៃមេឃបើលចំហ ហើយព្រះយេស៊ូឈរនៅខាងស្តាំព្រះបិតា។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១០,១៧-២២

ព្រះយេស៊ូមានព្រះបន្ទូលទៅកាន់ក្រុមសាវ័កថា៖ «ចូរប្រយ័ត្ន! កុំទុកចិត្តមនុស្សលោកឱ្យសោះ ដ្បិតគេនឹងចាប់បញ្ជូនអ្នករាល់គ្នាទៅតុលាការ គេនឹងយករំពាត់ខ្សែតីមក វាយអ្នករាល់គ្នានៅក្នុងធម្មសាលារបស់គេ។ គេនឹងបញ្ជូនអ្នករាល់គ្នាទៅឱ្យលោកទេសាភិបាល និងឱ្យស្តេចនានាកាត់ទោស ព្រោះតែអ្នករាល់គ្នាតាមខ្ញុំ។ ប៉ុន្តែ ពេលនោះ ជាឱកាសសម្រាប់ឱ្យអ្នករាល់គ្នាផ្តល់សក្ខីភាពឱ្យពួកលោក និងឱ្យសាសន៍ដទៃដឹង ឮទៅវិញ។ ពេលគេចាប់បញ្ជូនអ្នករាល់គ្នាទៅកាត់ទោស ចូរកុំភ័យបារម្ភនឹងរកពាក្យ ដែលអ្នករាល់គ្នាត្រូវនិយាយយ៉ាងណាៗនោះឡើយ ដ្បិតព្រះជាម្ចាស់នឹងប្រទានពាក្យដែលអ្នករាល់គ្នាត្រូវនិយាយនៅពេលនោះតែម្តង។ មិនមែនអ្នករាល់គ្នាទេដែលនិយាយ គឺព្រះវិញ្ញាណនៃព្រះបិតារបស់អ្នករាល់គ្នានឹងមានព្រះបន្ទូលនៅក្នុងចិត្តអ្នករាល់គ្នា។ បងប្អូននឹងចាប់បញ្ជូនគ្នាឯងទៅឱ្យគេសម្លាប់ ឪពុកនឹងចាប់បញ្ជូនកូនទៅឱ្យគេសម្លាប់ ហើយកូនៗលើកគ្នាប្រឆាំងនឹងឪពុកម្តាយ ព្រមទាំងបញ្ជូនទៅឱ្យគេសម្លាប់ទៀតផង។ មនុស្សគ្រប់ៗរូបនឹងស្អប់អ្នករាល់គ្នាព្រោះតែនាមខ្ញុំ។ ប៉ុន្តែ អ្នកណាស៊ូទ្រាំរហូតដល់ចុង​បញ្ចាប់ ព្រះជាម្ចាស់នឹងសង្គ្រោះអ្នកនោះ»។

ពាក្យថ្វាយតង្វាយ

បពិត្រព្រះអម្ចាស់ដ៏មានតេជានុភាពសព្វប្រការ! សូមទ្រង់ព្រះមេត្តាទទួលតង្វាយដែលយើងខ្ញុំសូមថ្វាយព្រះអង្គនៅថ្ងៃគោរពសន្តស្ទេផានដោយអនុគ្រោះ។ សូមទ្រង់ព្រះមេត្តាប្រោសយើងខ្ញុំឱ្យសុខចិត្តថ្វាយកាយ វាចា ចិត្ត រួមនឹងព្រះយេស៊ូដែលបានបូជាព្រះជន្ម ផង។ ព្រះអង្គមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! យើងខ្ញុំសូមអរព្រះគុណព្រះអង្គដែលបានប្រោសប្រទានព្រះអំណោយទានយ៉ាងបរិបូណ៌ឱ្យយើងខ្ញុំ។ ដោយព្រះបុត្រាព្រះអង្គយាងមកចាប់កំណើតជាមនុស្ស ព្រះអង្គសង្គ្រោះយើងខ្ញុំ។ ដោយសន្តស្ទេផានសុខចិត្តបូជាជីវិត ព្រះអង្គក៏បង្ហាញឥទ្ធិពលនៃការសង្គ្រោះនេះដែរ។ សូមទ្រង់ព្រះមេត្តាពង្រឹងសេចក្តីក្លាហានរបស់យើងខ្ញុំ ដើម្បីហ៊ានប្រកាសជំនឿរបស់ខ្លួនផង។