សូមថ្លែងព្រះគម្ពីរព្យាការីសាមូអែល ១សម ១៨;៦-៩,១៩,១-៧

ក្រោយពេលលោកដាវីឌបានប្រហារកូលីយ៉ាតហើយ ស្រ្តីៗនៅគ្រប់ក្រុង ក្នុងស្រុង​អ៊ីស្រាអែល ចេញទៅទទួលព្រះបាទសាអ៊ូល ទាំងស្រែកច្រៀង និងរាំតាមចង្វាក់ស្គរ​ និងភ្លេង ហើយស្រែកហ៊ោដោយអំណរសប្បាយយ៉ាងខ្លាំង។ ស្រ្តីទាំងនោះច្រៀង​ឆ្លើយឆ្លងគ្នាទៅវិញទៅមកថា៖ «ព្រះបាទសាអ៊ូលប្រហារបានរាប់ពាន់នាក់ រីឯលោក​ដាវីឌប្រហារបានរាប់ម៉ឺននាក់»។ ពាក្យទាំងនោះ ធ្វើឱ្យព្រះបាទសាអ៊ូលខ្ញាល់ជាខ្លាំង ទ្រង់នឹកថា៖ «គេសរសើរដាវីឌថា ប្រហារបានរាប់ម៉ឺននាក់ រីឯអញវិញ ត្រឹមតែរាប់
ពាន់នាក់។ ដូច្នេះ ដាវីឌនៅខ្វះតែរាជសម្បត្តិប៉ុណ្ណោះ»។ ចាប់តាំងពីថ្ងៃនោះមក​​ព្រះបាទសាអ៊ូលស្អប់លោកដាវីឌយ៉ាងខ្លាំង។

ព្រះបាទសាអ៊ូលប្រាប់សម្តេចយ៉ូណាថានជាបុត្រ ព្រមទាំងនាម៉ឺនមន្រ្តីពីបំណងដែលទ្រង់ចង់សម្លាប់លោកដាវីឌ។ ប៉ុន្តែ សម្តេចយ៉ូណាថានស្រឡាញ់លោកដាវីឌណាស់។ សម្តេច​​យ៉ូណាថានក៏នាំដំណឹងទៅប្រាប់លោកដាវីឌថា៖«ព្រះបាទសាអ៊ូលជាបិតារបស់ខ្ញុំមានបំណងចង់សម្លាប់លោកប្អូន។ ដូច្នេះ ព្រឹកស្អែកនេះ ចូរប្រុងប្រយ័ត្ន ហើយរក​កន្លែងលាក់ខ្លួនទៅ។ ខ្ញុំនឹចេញមកជាមួយបិតាខ្ញុំ ជិតកន្លែងដែលលោកប្អូនលាក់​ខ្លួន។ ខ្ញុំនឹងទូលបិតាអំពីរឿងលោកប្អូន ពេលណាខ្ញុំដឹងពីគោលបំណងបិតាហើយ​ ខ្ញុំនឹងប្រាប់ឱ្យលោកប្អូនដឹងដែរ»។ សម្តេចយ៉ូណាថានទូលព្រះបាទសាអ៊ូលជាបិតា​អំពីគុណសម្បត្តិរបស់លោកដាវីឌថា៖ «សូមបិតាកុំធ្វើបាបលោកដាវីឌ ជាអ្នកបម្រើ​របស់ព្រះអង្គអី ដ្បិតគ្នាពុំបានប្រព្រឹត្តអំពើខុសឆ្គងចំពោះបិតាទេ ផ្ទុយទៅវិញ ស្នាដៃ​អស្ចារ្យដែលដាវីឌធ្វើសុទ្ធតែមានផលប្រយោជន៍យ៉ាងខ្លាំងដល់បិតា។ ដាវីឌបាន​ប្រថុយជីវិតទៅសម្លាប់ជនជាតិភីលីស្ទីន គឺនៅថ្ងៃនោះ ព្រះអម្ចាស់បានប្រោសប្រទាន​ជ័យជំនះដ៏ធំធេងបំផុត ដល់ប្រជាជនអ៊ីស្រាអែលទាំងមូល ដូចបិតាបានទតឃើញ​និងសប្បាយព្រះហប្ញទ័យស្រាប់ហើយ។ ហេតុអ្វីបានជាបិតាចង់ប្រព្រឹត្តអំពើបាបដោយបង្ហូរឈាមមនុស្សម្នាក់ដែលគ្មានទោសពៃរ៍ គឺចង់សម្លាប់ដាវីឌដោយគ្មាន​មូលហេតុដូច្នេះ?»។ ព្រះបាទសាអ៊ូលទ្រង់ព្រះសណ្តាប់ពាក្យរបស់សម្តេចយ៉ូណាថាន ហើយមានរាជឱង្ការថា៖ «បិតាសូមស្បថក្នុងនាមព្រះអម្ចាស់ដែលមានព្រះជន្មគង់នៅថា​ដាវីឌមិនត្រូវស្លាប់ឡើយ!»។ បន្ទាប់មក សម្តេចយ៉ូណាថានទៅហៅលោកដាវីឌមកហើយរៀបរាប់សេចក្តីទាំងនោះប្រាប់លោក នាំលោកចូលមកគាល់ព្រះបាទសាអ៊ូល។ លោកដាវីឌក៏នៅបម្រើព្រះបាទសាអ៊ូលដូចពីដើម។

ទំនុកតម្កើងលេខ ៥៦ (៥៥),២-៣.៧.៩-១២.១៤ បទព្រហ្មគីតិ

ពិធីអបអរសាទរព្រះគម្ពីរដំណឹងល្អតាម ២ធម ១,១០

អលេលូយ៉ា! អាលេលូយ៉ា!

ព្រះយេស៊ូគ្រីស្តជាព្រះអម្ចាស់នៃយើង​បានបំបាត់អំណាចនៃសេចក្តីស្លាប់ ព្រមទាំងបំភ្លឺយើងឱ្យស្គាល់ជីវិត​ដោយសារដំណឹងល្អរបស់ព្រះអង្គ ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ៣,៧-១២

ព្រះយេស៊ូយាងចេញទៅតាមឆ្នេរសមុទ្រកាលីឡេជាមួយក្រុមសាវ័ក។ មានបណ្តា​ជនជាច្រើននាំគ្នាទៅតាមព្រះអង្គ អ្នកទាំងនោះមកពីស្រុកាលីឡេ ស្រុកយូដា ក្រុង​យេរូសាឡឹម ស្រុកអ៊ីឌូមេ តំបន់ត្រើយខាងនាយទន្លេយ័រដាន់ និងតំបន់ជុំវិញក្រុងទីរ៉ូស និងក្រុងស៊ីដូន។ បណ្តាជនមកតាមព្រះយេស៊ូជាច្រើនយ៉ាងនេះ ព្រោះបានឮគេនិយាយអំពីកិច្ចការទាំងប៉ុន្មានដែលព្រះអង្គធ្វើ។ ព្រះយេស៊ូប្រាប់ក្រុមសាវ័កឱ្យរៀបចំទូក​មួយថ្វាយព្រះអង្គ ក្រែងបណ្តាជនប្រជ្រៀតគ្នាចោមរោមព្រះអង្គ ដ្បិតមានអ្នកជំងឺ​ជាច្រើន ខំប្រឹងសំរុកចូលមកជិតដើម្បីពាល់ព្រះអង្គ ព្រោះព្រះអង្គបានប្រោសមនុស្សជាច្រើនឱ្យបានជា។ ម៉្យាងទៀត ពេលខ្មោចឃើញព្រះអង្គ វាក្រាបចុះនៅទៀប​ព្រះបាទាព្រះអង្គ ហើយស្រែកឡើងថា៖ «ព្រះអង្គជាព្រះបុត្រារបស់ព្រះជាម្ចាស់»។ ប៉ុន្តែ ព្រះយេស៊ូបានគំរាមកំហែងវាយ៉ាងម៉ឺងម៉ាត់ មិនឱ្យនិយាយប្រាប់គេអំពីឋានៈ​របស់ព្រះអង្គឡើយ។