ថ្ងៃសុក្រ ទី១៩ ខែធ្នូ ឆ្នាំ២០២៥

ពាក្យអធិដ្ឋានពេលចូល

បពិត្រព្រះអម្ចាស់ដ៏មានតេជានុភាពសព្វប្រការ! ព្រះអង្គបានសម្តែងសិរីរុងរឿងដ៏អស្ចារ្យរបស់ព្រះអង្គ ដោយប្រោសប្រទានស្ត្រីព្រហ្មចារីម្នាក់អាចបង្កើតកូនបាន។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំ ឱ្យមានជំនឿកាន់តែមាំមួនឡើងៗ និងសុខចិត្តធ្វើតាមព្រះហឫទ័យព្រះអង្គដោយចិត្តស្រឡាញ់ផង។

អត្ថបទទី១៖ សូមថ្លែងព្រះគម្ពីរវីរបុរស វប ១៣,២-៧.២៤-២៥

នៅជំនាន់នោះក្នុងភូមិសូរេអាមានបុរសម្នាក់ឈ្មោះម៉ាណូអា ក្នុងពូជអំបូរលោកដាន។ ភរិយារបស់គាត់ជាស្ត្រីអារមិនអាចបង្កើតកូនឡើយ។ ថ្ងៃមួយទេវទូតរបស់ព្រះអម្ចាស់បង្ហាញខ្លួនឱ្យស្ត្រីនោះឃើញ ហើយមានប្រសាសន៍ថា៖«អ្នកជាស្ត្រីអារ មិនអាចបង្កើតកូនបាន​ទេ! ក៏ប៉ុន្តែ បន្តិចទៀត អ្នកនឹងមានផ្ទៃពោះ ហើយបង្កើតបានកូនប្រុសម្នាក់។ តែ​ចូរប្រយ័ត្ន ចាប់តាំងពីពេលនេះទៅ កុំពិសាស្រាឬគ្រឿងស្រវឹងឡើយ! កុំបរិភោគអ្វីដែល​មិនបរិសុទ្ធឱ្យសោះ! ព្រោះអ្នកនឹងមានផ្ទៃពោះ ហើយនឹងបង្កើតបានកូនប្រុសម្នាក់។ កុំកោរ​ ឬកាត់សក់វាឡើយ ដ្បិតព្រះអម្ចាស់បានញែកកូននោះទុកសម្រាប់ព្រះអង្គតាំងពី​ក្នុងផ្ទៃម្តាយមកម្ល៉េះ គឺកូននោះហើយដែលនឹងសង្គ្រោះជនជាតិអ៊ីស្រាអែលឱ្យរួចពីកណ្តាប់ដៃរបស់ជនជាតិភីលីស្ទីន»។ ស្ត្រីនោះក៏ទៅជម្រាបប្តីថា៖«មានអ្នកបម្រើរបស់ព្រះជា​ម្ចាស់​​ម្នាក់មកជួបខ្ញុំ លោក​នោះមានទ្រង់ទ្រាយជាទេវទូតរបស់ព្រះជាម្ចាស់ គួរស្ញែងខ្លាចក្រៃ​លែង។ ខ្ញុំមិនបានសួរថាលោកមកពីណាទេ ហើយលោកក៏មិនបានប្រាប់ឈ្មោះឱ្យខ្ញុំស្គាល់​ដែរ។ តែលោកប្រាប់ខ្ញុំថា បន្តិចទៀតខ្ញុំនឹងមានផ្ទៃពោះ ហើយបង្កើតបាន​កូនប្រុសម្នាក់។ លោកហាមខ្ញុំមិន​ឱ្យផឹកស្រា ឬគ្រឿងស្រវឹងណាឡើយ ហើយក៏មិនឱ្យបរិភោគ​អ្វីដែលមិន​បរិសុទ្ធដែរ! ដ្បិតព្រះជាមា្ចស់បានញែកកូននោះទុកសម្រាប់ព្រះ​អង្គតាំងពីរក្នុងផ្ទៃម្តាយ​រហូតអស់មួយជីវិត»។ ប៉ុន្មានខែក្រោយមក ស្រ្តីនោះបង្កើតបានកូនប្រុសម្នាក់ដែលគាត់​ដាក់ឈ្មោះថា​“សាំសុន”។ កូននោះមានវ័យចម្រើនធំឡើង ហើយព្រះអម្ចាស់​ប្រទាន​ពរ​ឱ្យគេ។ ព្រះវិញ្ញាណរបស់ព្រះអម្ចាស់ក៏ចាប់ផ្តើមណែនាំគេដែរ។

ទំនុកតម្កើងលេខ ៧១ (៧០) ,១-៣.៥-៦.១៦-១៧ បទពាក្យ ៧

ពិធីអបអរសាទរព្រះគម្ពីរដំណឹងល្អ

អាលេលូយ៉ា! អាលេលូយ៉ា!
ឱ! ខ្នែងដែលដុះចេញពីគល់របស់លោកយេសាយ ទុកសម្រាប់ប្រជាជនទាំងឡាយអើយ! សូមយាងមករំដោះយើងខ្ញុំ! សូមកុំបង្អង់ឡើយ!។​​ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ១,៥-២៥

នៅជំនាន់ព្រះបាទហេរ៉ូដគ្រងរាជ្យនៅស្រុកយូដា មានបូជាចារ្យម្នាក់ឈ្មោះសាការីជាសមាជិតក្រុមបូជាចារ្យអប៊ីយ៉ា។ ភរិយាលោកឈ្មោះអេលីសាបិត កើតក្នុងត្រកូលរបស់លោកមហាបូជាចារ្យអរ៉ុន។ ស្វាមីភរិយាទាំងពីរនាក់នេះជាមនុស្សសុចរិត ជាទីគាប់ព្រះ ហឫទ័យព្រះជាម្ចាស់ ហើយគាត់គោរពតាមវិន័យ និងបញ្ញត្តិទាំងប៉ុន្មានរបស់ព្រះអម្ចាស់ឥតមានទាស់ត្រង់ណាឡើយ។ អ្នកទាំងពីរគ្មានកូនទេ ព្រោះនាងអេលីសាបិតជាស្ត្រីអារ ហើយម្យ៉ាងទៀត អ្នកទាំងពីរក៏មានវ័យចាស់ណាស់ទៅហើយផង។ ថ្ងៃមួយលោកសាការី បំពេញមុខងារជាបូជាចារ្យតាមវេនក្រុមរបស់លោក។ គេបានជ្រើសរើសលោកដោយចាប់ឆ្នោត តាមទំនៀមទម្លាប់របស់ក្រុមបូជាចារ្យ ឱ្យលោកចូលទៅដុតគ្រឿងក្រអូបនៅ​​ក្នុងទីសក្ការៈរបស់ព្រះជាម្ចាស់។ ពេលលោកដុតគ្រឿងក្រអូប មានប្រជាជនច្រើនកុះករ​នៅ​ខាងក្រៅកំពុងអធិដ្ឋាន។ រំពេចនោះ លោកសាការីឃើញទេវទូតរបស់ព្រះអម្ចាស់​មួយរូបឈរនៅខាងស្តាំអាសនៈសម្រាប់ដុតគ្រឿងក្រអូប។ ឃើញដូច្នោះ លោករន្ធត់ចិត្ត ហើយភ័យខ្លាចទៀតផង។ ទេវទូតក៏មានប្រសាសន៍ទៅកាន់លោកថា៖ «កុំខ្លាចអីលោកសា​ការី​អើយ! ព្រះអម្ចាស់យល់ព្រមតាមពាក្យទូលអង្វររបស់លោកហើយ! នាងអេលី​សាបិត​ជាភរិយារបស់លោកនឹងបង្កើតកូនប្រុសមួយ លោកត្រូវដាក់ឈ្មោះកូននោះថា “យ៉ូហាន”។ កូននោះនឹងធ្វើឱ្យលោកមានចិត្តសប្បាយរីករាយ ហើយមនុស្សជាច្រើនក៏អបអរសាទរនឹងកំណើតកុមានោះដែរ។ កូនរបស់លោកនឹងមានឋានៈដ៏ប្រសើរឧត្តមនៅចំពោះព្រះភក្ត្រព្រះអម្ចាស់ មិនសេពសុរា ឬគ្រឿងស្រវឹងណា​មួយឡើយ។ កូននោះបានពោរពេញដោយព្រះវិញ្ញាណដ៏វិសុទ្ធតាំងពីក្នុងផ្ទៃម្តាយមក។ កូននោះនឹងមក​មុន​ព្រះអង្គ ហើយមានវិញ្ញាណប្រកបដោយឫទ្ធានុភាពដូចដែលលោកអេលីបានទទួលដើម្បី​បង្វែរចិត្តឪពុកទៅរកកូន ព្រមទាំងបំបែរចិត្តមនុស្សរឹងទទឹងឱ្យត្រឡប់មក​ជា​មនុស្ស​សុចរិត​វិញ ហើយនឹងរៀបចំប្រជារាស្ត្រមួយជាស្រេច ទុកសម្រាប់ទទួលព្រះអម្ចាស់»។
លោកសាការីសួរទៅទេវទូតថា៖ «តើធ្វើម្តេចឱ្យខ្ញុំដឹងថា ការនោះពិតជានឹងកើតមាន​ឡើងមែន? ព្រោះរូបខ្ញុំនេះចាស់ហើយ ឯប្រពន្ធខ្ញុំសោតក៏មានអាយុច្រើនទៀតផង»។ ទេវទូតតបវិញថា៖ «ខ្ញុំឈ្មោះកាព្រីអែល ជាអ្នកបម្រើព្រះជាម្ចាស់ ព្រះអង្គចាត់ខ្ញុំឱ្យនាំដំណឹងល្អនេះមកប្រាប់លោក។ ប៉ុន្តែ ដោយលោកពុំព្រមជឿពាក្យខ្ញុំ លោកនឹងទៅជា​មនុស្សគនិយាយពុំកើត រហូតដល់ថ្ងៃដែលហេតុការណ៍ទាំងនោះបានសម្រេចតាមពេល​កំណត់»។ ក្នុងពេលជាមួយគ្នានោះ ប្រជាជនទន្ទឹងរង់ចាំលោកសាការី ហើយងឿងឆ្ងល់ណាស់ ព្រោះលោកចូលទៅក្នុងទីសក្ការៈយ៉ាងយូរដូច្នេះ។ កាលលោកចេញមកវិញ លោកពុំអាច​និយាយទៅគេបានឡើយ។ ប្រជាជនទាំងនោះយល់ថា ប្រាកដជាលោកបានឃើញការអស្ចារ្យអ្វីមួយនៅក្នុងទីសក្ការៈជាមិនខាន។ លោកសាការីធ្វើតែកាយវិការឱ្យគេយល់ព្រោះ​​លោកនៅគ និយាយមិនកើត។ លុះលោកសាការីបំពេញការងារតាមវេនចប់សព្វគ្រប់ហើយ លោកក៏វិលត្រឡប់ទៅផ្ទះវិញ។ ក្រោយមកនាងអេលីសាបិតជាភរិយារបស់លោកក៏ចាប់មានផ្ទៃពោះ នាងលាក់ខ្លួនអស់រយៈពេលប្រាំខែ។ នាងនឹកគិតថា៖ ​«ឥឡូវនេះ​​ព្រះអម្ចាស់បានប្រោសប្រណីដល់រូបខ្ញុំ ព្រះអង្គសព្វព្រះហឫទ័យឱ្យខ្ញុំលែងខ្មាសមនុស្សលោក​​ទៀតហើយ!»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គបានសង្គ្រោះប្រជារាស្ត្រព្រះអង្គយ៉ាងអស្ចារ្យ។ ក្រៅពីផ្ញើជីវិតទាំងស្រុងទៅលើព្រះអង្គ យើងខ្ញុំគ្មានអ្វីមកតបស្នងសងគុណព្រះអង្គឡើយ។ សូមទ្រង់ព្រះមេត្តាប្រោសឱ្យយើងខ្ញុំអាចចូលរួមជាមួយព្រះយេស៊ូ ដែលអរព្រះគុណ ព្រះអង្គក្នុងអភិបូជានេះផង គឺព្រះយេស៊ូដែលមានព្រះជន្មគង់នៅ និងសោយរាជ្យរួមជាមួយព្រះអង្គ អស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ដ៏មានតេជានុភាពសព្វប្រការ! ព្រះអង្គបានប្រោសប្រទានអំណោយទានដ៏ច្រើនឥតគណនាឱ្យយើងខ្ញុំ។ សូមទ្រង់ព្រះមេត្តាបំភ្លឺចិត្តគំនិតយើងខ្ញុំ ឱ្យយល់កាន់តែច្បាស់អំពីព្រះអំណោយទានដ៏អស្ចារ្យលើសលប់ ដែលព្រះអង្គបានប្រទានដល់មនុស្សលោក នៅពេលព្រះអង្គចាត់ព្រះបុត្រាឱ្យប្រសូតជាមនុស្សដូចយើងខ្ញុំ។