ពាក្យអធិដ្ឋានពេលចូល

បពិត្រព្រះជាម្ចាស់ជាព្រះបិតា! ព្រះអង្គប្រោសប្រទានឱ្យសន្តឡូរ៉ង់មានចិត្តស្រឡាញ់ព្រះអង្គយ៉ាងខ្លាំង ក្នុងការបម្រើព្រះសហគមន៍ រហូតដល់សុខចិត្តបូជាជិវិតថ្វាយព្រះអង្គ។ ព្រះអង្គក៏ប្រោសឱ្យលោកទទួលសិរីរុងរឿងនៅស្ថានបរមសុខដែរ។ សូមទ្រង់ព្រះមេត្តាប្រោសប្រទានឱ្យយើងខ្ញុំមានចិត្តស្រឡាញ់ព្រះអង្គ និងអ្នកក្រីក្រដូចលោកផង។

សូមថ្លែងលិខិតទី២ របស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូរិនថូស ២ករ ៩,៦-១០

បងប្អូនជាទីស្រឡាញ់!
សូមចងចាំថា អ្នកណាព្រោះតិច អ្នកនោះក៏ច្រូតបានផលតិចដែរ រីឯអ្នកដែលព្រោះច្រើនបរិបូណ៍ ក៏ច្រូតបានផលច្រើនបរិបូរណ៍ដែរ។ ហេតុនេះ ម្នាក់ៗត្រូវតែចូលប្រាក់តាមតែខ្លួនសម្រេចចិត្តដោយមិននឹកស្តាយ ឬដោយទើសទ័លឡើយ ដ្បិតព្រះម្ចាស់សព្វព្រះហឫទ័យនឹងអ្នកដែលធ្វើអំណោយដោយចិត្តរីករាយ។ ព្រះអង្គអាចនឹងប្រទានពរដ៏ហូរហៀរគ្រប់យ៉ាងដល់បងប្អូន ដើម្បីឱ្យបងប្អូនមានអ្វីៗទាំង អស់ដែលបងប្អូនត្រូវការដ៏ចាំបាច់នោះជានិច្ច ហើយថែមទាំងនៅសល់បរិបូរណ៍សម្រាប់ចែកទានផង ដូចបានចែកទុកមកថា៖ “មនុស្ស​សុចរិតចែកឱ្យអ្នកក្រីក្រ សេចក្តីសុចរិតរបស់គេនៅស្ថិតស្ថេររហូតរៀងទៅ”។ ព្រះអង្គ “ប្រទានគ្រាប់ពូជដល់អ្នកសាបព្រោះ ទ្រង់នឹងប្រទានចំណីអាហារឱ្យគេផង”។ ព្រះអង្គក៏ផ្គត់ផ្គង់គ្រាប់ពូជឱ្យបងប្អូន និងឱ្យគ្រាប់ពូជនោះកើនចំនួនឡើងដែរ ហើយព្រះអង្គនឹងធ្វើឱ្យ​សេចក្តីសុចរិតរបស់បងប្អូនបង្កើតផលបានច្រើនឡើងថែមទៀត។

ទំនុកតម្កើងលេខ ១១២ (១១១),១-២.៥-៩ បទពាក្យ ៧

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១២,២៤-២៦

មុនថ្ងៃបុណ្យចម្លង ព្រះយេស៊ូមានព្រះបន្ទូលទៅកាន់សាវ័កថា៖ «ខ្ញុំសុំបា្រប់អ្នករាល់គ្នាដឹងច្បាស់ថា គ្រាប់ស្រូវធ្លាក់ដល់ដីហើយ បើមិនងាប់ទេ គ្រាប់នោះនៅតែមួយដដែល។ ផ្ទុយទៅវិញ បើគ្រាប់ស្រូវនោះងាប់ វានឹងបង្កើតបានផលច្រើន។ អ្នកណាស្រឡាញ់ជិវិតរបស់ខ្លួន អ្នកនោះនឹងបាត់បង់ជិវិតទៅ រីឯអ្នកដែលមិនជំពាក់ចិត្តនឹងជិវិតរបស់ខ្លួនក្នុងពិភពលោកនេះទេ អ្នកនោះនឹងរក្សាជិវិតខ្លួនឱ្យនៅស្ថិតស្ថេរអស់កល្បជានិច្ច។ បើអ្នកណាចង់បម្រើខ្ញុំ អ្នកនោះត្រូវមកតាមខ្ញុំ ខ្ញុំនៅទីណា អ្នកបម្រើរបស់ខ្ញុំក៏នឹងនៅទីនោះដែរ។ បើអ្នកណាបម្រើខ្ញុំ ព្រះបិតានឹងលើកកិត្តិយសអ្នកនោះ»។

ពាក្យថ្វាយតង្វាយ

បពិត្រព្រះជាម្ចាស់ជាព្រះបិតា! សូមទ្រង់ព្រះមេត្តាទទួលតង្វាយរបស់យើងខ្ញុំដោយអនុគ្រោះ នៅថ្ងៃដែលយើងខ្ញុំនាំអ្នកគោរពសន្ត​ឡូរ៉ង់។ ព្រះអង្គបានប្រទានសន្តឡូរ៉ង់មានចិត្តស្រឡាញ់ខ្លាំងយ៉ាងណា សូមទ្រង់ព្រះមេត្តាប្រោសប្រទានឱ្យយើងខ្ញុំមានចិត្តស្រឡាញ់ខ្លាំងយ៉ាងនោះដែរ។

ពាក្យអរព្រះគុណ

បពិត្រព្រះជាម្ចាស់ជាព្រះបិតាយើងខ្ញុំ! យើងខ្ញុំសូមអរព្រះគុណព្រះអង្គដែលបានប្រទានព្រះកាយព្រះគ្រីស្តនៅថ្ងៃគោរពសន្តឡូរ៉ង់។ សូមទ្រង់ព្រះមេត្តាប្រោសឱ្យយើងខ្ញុំមានចិត្តក្លាហានហ៊ានប្រកាសជំនឿ  ដោយរស់នៅរបៀបយើងខ្ញុំសព្វថ្ងៃនេះផង។