សន្តអំប្រូស ជាអភិបាល
និងជាគ្រូបាធ្យាយនៃព្រះសហគមន៍
លោក អំប្រូស កើតប្រហែលនៅឆ្នាំ៣៤០ នៅក្រុងត្រែវ (នៅប្រទេសអាឡឺម៉ង់សព្វថ្ងៃ)។ លោកកាន់មុខតំណែងជាមេកងនគរបាលនៅក្រុងមីឡង់ ប្រទេសអ៊ីតាលី។ ថ្ងៃទី៧ ខែធ្នូ ឆ្នាំ៣៧៤ លោកទៅការពារសន្តិសុខក្នុងពេលបោះឆ្នោតជ្រើសរើសអភិបាលព្រះសហគមន៍ក្រុងមីឡង់ ព្រោះរដ្ឋអំណាចខ្លាចកើតចលាចល។ ពេលនោះ ស្រាប់តែមានក្មេងម្នាក់ស្រែកឡើងថា៖ “សូមរើសលោកអំប្រូសធ្វើជាអភិបាល!”។ បណ្តាជនក៏នាំគ្នាស្រែកតាមក្មេងនោះ ហើយគេជ្រើសរើសលោកធ្វើជាអភិបាលព្រះសហគមន៍ក្រុងមីឡង់ ទោះបីលោកមិនទាន់ទទួលអគ្គសញ្ញាជ្រមុជទឹកនៅឡើយក៏ដោយ។ លោកណែនាំព្រះសហគមន៍យ៉ាងល្អបំផុត ដោយស៊ូប្តូរជីវិតសម្រាប់ប្រជាជន។ លោកឧស្សាហ៍ពន្យល់គម្ពីរដោយមិនខ្លាចនឿយហត់ឡើយ។ ជួនកាល លោកត្រូវជំទាស់នឹងព្រះចៅអធិរាជរ៉ូម៉ាំង ដែលជិះជាន់ប្រជាជន និងប្រព្រឹត្តអំពើឃោឃៅយ៉ាងព្រៃផ្សៃ។ លោកតែងបទសម្រាប់ឱ្យគ្រីស្តបរិស័ទច្រៀងក្នុងពិធីផ្សេងៗ ទាំងមានបំណងពន្យល់លទ្ធិត្រឹមត្រូវ អំពីឋានៈព្រះយេស៊ូដែលពិតជាមនុស្សផង ពិតជាព្រះជាម្ចាស់ផង។ លោក អូគូស្តាំង ប្រែចិត្តគំនិតដោយសារលោក ហើយទទួលអគ្គសញ្ញាជ្រមុជទឹកពីលោកផងដែរ។ លោកទទួលមរណភាពនៅថ្ងៃសុក្រពិសិដ្ឋ ឆ្នាំ៣៩៧។
អត្ថបទទី១ សូមថ្លែងលិខិត១របស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូរិនថូស ១ករ ៤,១-៦
ហេតុនេះ សូមបងប្អូនចាត់ទុកយើងថា ជាអ្នកបម្រើរបស់ព្រះគ្រីស្ត និងជាអ្នកមើលខុសត្រូវលើគម្រោងការដ៏លាក់កំបាំងរបស់ព្រះជាម្ចាស់។ រីឯអ្នកមើលខុសត្រូវគួរតែមានចិត្តស្មោះត្រង់។ ចំពោះរូបខ្ញុំ ទោះបីបងប្អូនក្តី ឬមនុស្សលោកក្តី វាយតម្លៃខ្ញុំថាជាមនុស្សបែបណាក៏ដោយ ខ្ញុំមិនអំពល់អ្វីទេ ហើយរូបខ្ញុំផ្ទាល់ ក៏ខ្ញុំមិនវាយតម្លៃខ្លួនឯងដែរ ដ្បិតក្នុងចិត្តខ្ញុំ ខ្ញុំយល់ឃើញថា ខ្ញុំគ្មានធ្វើអ្វីខុសឡើយ។ ប៉ុន្តែ មិនមែនការយល់ឃើញរបស់ខ្ញុំនេះទេ ដែលធ្វើឱ្យខ្ញុំបានសុចរិត មានតែព្រះអម្ចាស់ប៉ុណ្ណោះដែលវិនិច្ឆ័យខ្ញុំ។ ហេតុនេះ សូមបងប្អូនកុំវិនិច្ឆ័យទោសនរណាមុនពេលកំណត់ឡើយ ត្រូវរង់ចាំព្រះអម្ចាស់យាងមកដល់សិន គឺព្រះអង្គនឹងយកអ្វីៗដែលមនុស្សបង្កប់ទុកក្នុងទីងងឹត មកដាក់នៅទីភ្លឺ ហើយព្រះអង្គនឹងបង្ហាញបំណងដែលលាក់ទុកក្នុងចិត្តមនុស្ស។ នៅពេលនោះ ព្រះជាម្ចាស់នឹងសរសើរមនុស្សម្នាក់ៗទៅតាមការដែលខ្លួនបានប្រព្រឹត្ត។
បងប្អូនអើយ ព្រោះតែបងប្អូនហើយ បានជាខ្ញុំលើកយករឿងលោកអប៉ូឡូស និងខ្លួនខ្ញុំផ្ទាល់មកនិយាយជាឧទាហរណ៍ ដើម្បីឱ្យបងប្អូនយល់ថា មិនត្រូវធ្វើអ្វីហួសពីសេចក្ដីដែលមានសរសេរក្នុងសំបុត្រនេះឡើយ។ ក្នុងចំណោមបងប្អូន ក៏មិនត្រូវឱ្យមាននរណាអួតខ្លួនដោយកាន់ជើងម្នាក់ ហើយប្រឆាំងនឹងម្នាក់ទៀតដែរ។
ទំនុកតម្កើងលេខ ៨៩,២-៥.២១-២២.២៥.២៧ បទកាកគតិ
| ២. | ឱ! ព្រះជាម្ចាស់ | ខ្ញុំមិនគេចប្រាស | នឹងច្រៀងតម្កើង |
| បង្គំព្រះអង្គ | ព្រះទ័យខ្ពស់ថ្កើង | អស់កល្បយូរលង់ | |
| អង្វែងតទៅ ។ | |||
| ៣. | ខ្ញុំប្រកាសថា | ព្រះទ័យមេត្តា | ករុណាត្រឹមត្រូវ |
| របស់ព្រះអង្គ | ស្ថិតស្ថេរគង់នៅ | មាំមិនអាស្រូវ | |
| ដូចផ្ទៃមេឃា ។ | |||
| ៤. | យើងចងសម្ពន្ធ | មេត្រីបន្ទាន់ | ចុះខសន្យា |
| ជ្រើសលោកដាវីឌ | ហើយតែងតាំងជា | បម្រើការពារ | |
| ឥតមានប្រែប្រួល ។ | |||
| ៥. | យើងនឹងតាំងពង្ស | ពូជអ្នកឱ្យគង់ | នៅជុំត្រកូល |
| តាំងរាជ្យឱ្យអ្នក | នៅបានសុខស្រួល | គ្មានអ្វីប្រែប្រួល | |
| អង្វែងដរាប ។ | |||
| ២១. | យើងឃើញដាវីឌ | ជាអ្នកប្រណិប័តន៍ | ឥតមានឆ្មៃឆ្មើង |
| យើងក៏ចាក់ប្រេង | អភិសេកគេឡើង | ជាស្តេចថ្កុំថ្កើង | |
| គ្រងរាជ្យរហូត ។ | |||
| ២២. | ហើយយើងនឹងជួយ | ជ្រែងជាជំនួយ | មិនឱ្យរបូត |
| ទាំងផ្តល់កម្លាំង | រៀងរៀបមិនស្ងួត | ពូកែរហូត | |
| អំណាចពេញប្រៀប ។ | |||
| ២៥. | យើងនឹងបញ្ចេញ | ហឫទ័យពោរពេញ | ករុណាអាណិត |
| ចំពោះរូបគេ | នឹងបាននែបនិត្យ | ថ្កើងរុងរឿងពិត | |
| ដោយសារនាមយើង ។ | |||
| ២៧. | ដាវីឌហៅយើង | បិតាមិនឆ្មើង | ថាថ្មខែងហំ |
| ដែលបានសង្គ្រោះ | រំដោះរូបខ្ញុំ | បានឡើងឧត្តម | |
| ខ្ពង់ខ្ពស់សង្ហារ ។ |
ពិធីអបអរសាទរព្រះគម្ពីរដំណឹងល្អ
អាលេលូយ៉ា! អាលេលូយ៉ា!
ថ្ងៃព្រះអម្ចាស់មកជិតបង្កើយ! ព្រះអង្គយាងមកសង្គ្រោះយើង។ អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តលូកា លក ២២,២៤-៣០
ខណៈនោះ ពួកសាវ័កជជែកទាស់ទែងគ្នាចង់ដឹងថា ក្នុងចំណោមពួកគេ នរណាមានឋានៈធំជាងគេ។ ព្រះយេស៊ូមានព្រះបន្ទូលទៅគេថា៖ «ស្ដេចទាំងឡាយតែងតែត្រួតត្រាលើប្រជារាស្ដ្រ ហើយអ្នកកាន់អំណាចតែងឱ្យគេហៅខ្លួនថា អ្នកមានគុណ។ រីឯអ្នករាល់គ្នាវិញ មិនត្រូវធ្វើដូច្នោះឡើយ។ ក្នុងចំណោមអ្នករាល់គ្នា អ្នកដែលធំជាងគេ ត្រូវធ្វើតូចជាងគេ ហើយអ្នកដែលដឹកនាំគេ ត្រូវបម្រើគេវិញ។ អ្នកដែលអង្គុយនៅតុ និងអ្នកបម្រើតុ តើអ្នកណាធំជាង? ធម្មតា អ្នកអង្គុយនៅតុធំជាងអ្នកបម្រើតុ។ រីឯខ្ញុំ ខ្ញុំនៅកណ្ដាលចំណោមអ្នករាល់គ្នា ខ្ញុំធ្វើជាអ្នកបម្រើទៅវិញ។ គ្រប់ពេលខ្ញុំជួបទុក្ខលំបាក អ្នករាល់គ្នាស៊ូទ្រាំនៅជាមួយខ្ញុំជានិច្ច។ ហេតុនេះហើយ បានជាខ្ញុំប្រគល់ព្រះរាជ្យឱ្យអ្នករាល់គ្នា ដូចព្រះបិតាបានប្រគល់មកឱ្យខ្ញុំដែរ។ ក្នុងព្រះរាជ្យរបស់ខ្ញុំ អ្នករាល់គ្នានឹងបរិភោគរួមតុជាមួយខ្ញុំ ហើយអ្នករាល់គ្នានឹងអង្គុយលើបល្ល័ង្ក ដើម្បីគ្រប់គ្រងលើកុលសម្ព័ន្ធទាំងដប់ពីរនៃជនជាតិអ៊ីស្រាអែល»។
