ថ្ងៃទី០១-ខែមិថុនា-សន្ដយូស្ដាំង-ជាមរណសាក្សី

លោកយូស្តាំងជាទស្សនវិទូជាតិរ៉ូមាំងមួយរូប។ លោកសិក្សាទស្សនវិជ្ជាគ្រប់មុខ ដោយមានបំណងចង់ស្គាល់សេចក្តីពិត តែរកមិនឃើញសោះ។ តាមការទូន្មានរបស់តាចាស់ម្នាក់ លោកចាប់អានគម្ពីរទាំងនឹកសញ្ជឹងអត្ថន័យ ទើបលោកស្គាល់ព្រះគ្រីស្តដែលជាព្រះប្រាជ្ញាញាណដ៏ពិតប្រាកដ។ លោកបង្កើតសាលាមួយនៅក្រុងរ៉ូមដើម្បីពន្យល់លទ្ធិគ្រីស្តសាសនា និងដោះសាគ្រីស្តសាសនាទុកជាព្រះប្រាជ្ញាញ្ញាណ។ លោកនិពន្ធសៀវភៅពីរច្បាប់ដើម្បីពន្យល់លទ្ធិគ្រីស្តសាសនា និងដោះសាគ្រីស្តសាសនាពីសំណាក់អស់អ្នកដែលមួលបង្កាច់។ នៅឆ្នាំ ១៦៥ អាជ្ញាធររ៉ូមាំងប្រហារជីវិតលោក ព្រោះលោកកាន់គ្រីស្តសាសនា។ មុនផុតដង្ហើម លោកមានប្រសាសន៍ថា៖ «អ្នកមានប្រាជ្ញាសាមញ្ញធម្មតា មិនដែលលះបង់សេចក្តីពិតចោលដើម្បីទៅរកសេចក្តីពិត»។

ពាក្យអធិដ្ខានពេលចូល

បពិត្រព្រះអម្ចាស់ជាព្រះបិតា! ព្រះអង្គប្រោសសន្តយូស្តាំង ជាមរណសាក្សីឱ្យស្គាល់សេចក្តីពិត ដោយរិះគិតពីព្រះគ្រីស្តដែលគេឆ្កាង ជាព្រះប្រាជ្ញាញ្ញាណរបស់ព្រះជាម្ចាស់ ប្រសើរលើសប្រាជ្ញារបស់មនុស្សលោកទៅទៀត។ សូមទ្រង់ព្រះមេត្តាប្រោសយើងខ្ញុំឱ្យលះបង់អ្វីៗដែលមិនស្របនឹងជំនឿ និងស្វែងរកសេចក្តីពិតជានិច្ច។

សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូរិនថូស ១ករ ១,១៨-២៥

បងប្អូនជាទីស្រលាញ់!
អ្នកដែលត្រូវវិនាសអន្តរាយ ចាត់ទុកដំណឹងអំពីព្រះ‌គ្រីស្តសោយទិវង្គតនៅលើឈើឆ្កាងថាលេលា រីឯយើងដែលកំពុងតែទទួលការសង្គ្រោះវិញ យើងជឿថា ដំណឹងនេះជាឫទ្ធា‌នុភាពរបស់ព្រះ‌ជាម្ចាស់ ដ្បិតមានចែងទុកមកថា៖ «យើងនឹងរំលាយប្រាជ្ញារបស់ពួកអ្នកប្រាជ្ញ ហើយធ្វើឱ្យតម្រិះរបស់ពួកអ្នកចេះដឹងរលាយសាប‌សូន្យទៅដែរ»។ ដូច្នេះ អ្នកប្រាជ្ញ‌ បណ្ឌិត និងអ្នកដេញដោលនាសម័យនេះ
ធ្វើអ្វីកើត បើព្រះ‌ជាម្ចាស់បានធ្វើឱ្យប្រាជ្ញារបស់លោកីយ៍នេះទៅជាលេលាវិញនោះ!។ ដោយប្រាជ្ញារបស់ខ្លួន មនុស្សលោកពុំបានស្គាល់ព្រះ‌ជាម្ចាស់ តាមអ្វីៗដែលព្រះ‌ប្រាជ្ញា‌ញាណរបស់ព្រះ‌អង្គសម្ដែងឱ្យគេស្គាល់នោះឡើយ ហេតុនេះហើយបានជាព្រះ‌ជាម្ចាស់សព្វព្រះ‌ហឫទ័យសង្គ្រោះអ្នកជឿ ដោយពាក្យប្រកាសដែលមនុស្សលោកចាត់ទុកថាលេលានោះ។ សាសន៍យូដាសុំមើលទីសម្គាល់
ដ៏អស្ចារ្យ សាសន៍ក្រិកចង់ឃើញភស្តុតាងតាមប្រាជ្ញា រីឯយើងវិញ យើងប្រកាសអំពីព្រះ‌គ្រីស្តដែលសោយទិវង្គតនៅលើឈើឆ្កាង។ សាសន៍យូដាយល់ឃើញថា ពាក្យប្រកាសនេះរារាំងគេមិនឱ្យជឿ ហើយសាសន៍ដទៃយល់ឃើញថាជារឿងលេលា។ ប៉ុន្តែ ចំពោះអស់អ្នកដែលព្រះ‌ជាម្ចាស់បានត្រាស់ហៅ ទាំងសាសន៍យូដា ទាំងសាសន៍ក្រិក គេចាត់ទុកព្រះ‌គ្រីស្តថាជាឫទ្ធា‌នុភាព និងជាព្រះ‌ប្រាជ្ញា‌ញាណរបស់ព្រះ‌ជាម្ចាស់វិញ។ អ្វីៗដែលមនុស្សលោកយល់ថាជាគំនិតលេលារបស់ព្រះ‌ជាម្ចាស់នោះ ប្រសើរលើសប្រាជ្ញារបស់មនុស្សទៅទៀត ហើយអ្វីៗដែលមនុស្សលោកយល់ថាជាការទន់ខ្សោយរបស់ព្រះ‌ជាម្ចាស់ ក៏ប្រសើរលើសកម្លាំងរបស់មនុស្សដែរ។

ទំនុកតម្កើងលេខ ៣៤ (៣៣),២-៩ បទកាកគតិ

២	ខ្ញុំអរព្រះគុណ	អម្ចាស់ពេកពន់	គ្រប់ពេលវេលា
	សូមលើកតម្កើង	ព្រះអង្គគ្រប់គ្រា	ឥតមានរួញរា
		ឈប់ឈរសោះឡើយ	។
៣	ខ្ញុំខ្ពស់មុខព្រោះ	ព្រះម្ចាស់សង្គ្រោះ	ខ្ញុំមិនកន្តើយ
	ចូរអ្នកទន់ទាប	ស្តាប់កុំព្រងើយ	នឹងបានធូរស្បើយ
		អំណរខ្លាំងក្លា	។
៤	សូមមកប្រកាស	នឹងខ្ញុំឱ្យច្បាស់	ដោយពោលឡើងថា
	ព្រះម្ចាស់ថ្កុំថ្កើង	រុងរឿងក្រៃណា	យើងនាំគ្នីគ្នា
		តម្កើងព្រះអង្គ	។
៥	ខ្ញុំបានស្វែងរក	ព្រះម្ចាស់តបមក	ឥតមានបង្អង់
	ទ្រង់បានរំដោះ	ខ្ញុំអស់ទុក្ខផង	តក់ស្លុតមួហ្មង
		ឆ្លងផុតទាំងអស់	។
៦	អ្នកដែលសម្លឹង	ឆ្ពោះទៅព្រះអង្គ	បានសុខឥតមោះ
	ផុតអស់ទុក្ខសោក	វិយោគរងគ្រោះ	ពួកគេទាំងនោះ
		មិនខកចិត្តឡើយ	។
៧	អស់អ្នកកម្សត់	និងមនុស្សទុរគត	គេស្រែកដង្ហោយ
	ហៅរកព្រះម្ចាស់	ទ្រង់សណ្តាប់ហើយ	សង្គ្រោះគេឱ្យ
		ផុតពីគ្រោះកាច	។
៨	ទេវទូតរបស់	ព្រះម្ចាស់ទាំងអស់	ថែទាំអ្នកខ្លាច
	រក្សាការពារ	គេក្រោមអំណាច	រំដោះឱ្យរួច
		ផុតពីទុក្ខភ័យ	។
៩	ចូរអ្នកផ្អែកពឹង	ពិសោធន៍ឱ្យដឹង	ថាព្រះម្ចាស់ថ្លៃ
	ទ្រង់មានមេត្តា	សប្បុរសពេកក្រៃ	អស់ជនប្រុសស្រី
		មានជ័យមង្គល	។

ពិធីអបអរសាទរព្រះគម្ពីរដំណឹងល្អតាម មថ ៥,១៦

អាលេលូយ៉ា! អាលេលូយ៉ា!
ចូរឱ្យពន្លឺរបស់អ្នករាល់គ្នា បំភ្លឺមនុស្សទាំង‌ឡាយដូច្នោះដែរ គេនឹងឃើញអំពើល្អដែលអ្នករាល់គ្នាប្រព្រឹត្ត ហើយលើកតម្កើងសិរី‌រុងរឿងព្រះ‌បិតារបស់អ្នករាល់គ្នា ដែលគង់នៅស្ថានបរម‌សុខ»។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៥,១៣-១៩

«អ្នករាល់គ្នាជាអំបិលសម្រាប់មនុស្សលោក ប៉ុន្តែ បើអំបិលបាត់ជាតិប្រៃហើយ តើគេនឹងយកអ្វីមកធ្វើឱ្យប្រៃឡើងវិញបាន?។ អំបិលនោះគ្មានប្រយោជន៍អ្វីទៀតទេ គឺមានតែបោះចោលទៅខាងក្រៅ ឱ្យមនុស្សដើរជាន់ប៉ុណ្ណោះ។ អ្នករាល់គ្នាជាពន្លឺសម្រាប់បំភ្លឺមនុស្សលោក។ គេមិនអាចលាក់បំបាំងក្រុងណាដែលសង់នៅលើភ្នំបានឡើយ។ គេមិនដែលអុជចង្កៀង ហើយយកធុងគ្របពីលើនោះទេ គឺគេតែងយកចង្កៀងទៅដាក់លើជើងចង្កៀងវិញ ហើយចង្កៀងនោះបំភ្លឺអស់អ្នកដែលនៅក្នុងផ្ទះ។ ចូរឱ្យពន្លឺរបស់អ្នករាល់គ្នា បំភ្លឺមនុស្សទាំង‌ឡាយដូច្នោះដែរ គេនឹងឃើញអំពើល្អដែលអ្នករាល់គ្នាប្រព្រឹត្ត ហើយលើកតម្កើងសិរី‌រុងរឿងព្រះ‌បិតារបស់អ្នករាល់គ្នា ដែលគង់នៅស្ថានបរម‌សុខ»។ «សុំកុំនឹកស្មានថាខ្ញុំមកលុបបំបាត់គម្ពីរ‌វិន័យ ឬគម្ពីរព្យាការីចោលឡើយ។ ខ្ញុំមិន‌មែនមកលុបបំបាត់ទេ គឺខ្ញុំមកធ្វើឱ្យគម្ពីរមានអត្ថ‌ន័យពេញលក្ខណៈទៅវិញ។ ខ្ញុំសុំប្រាប់ឱ្យអ្នករាល់គ្នាបានដឹងច្បាស់ថា ដរាបណាផ្ទៃមេឃ និងផែន‌ដីនៅស្ថិត‌ស្ថេរ ដរាបនោះ គ្មានក្បៀស ឬបន្ដក់ណាមួយក្នុងគម្ពីរ‌វិន័យត្រូវរលុបបាត់ឡើយ គឺគម្ពីរទាំងមូលនឹងនៅស្ថិត‌ស្ថេររហូតដល់ទីបំផុត។ អ្នកណាល្មើសបញ្ញាត្តិតូចមួយនេះ ហើយបង្រៀនអ្នកផ្សេងឱ្យធ្វើតាម អ្នកនោះនឹងមានឋានៈតូចជាងគេ ក្នុងព្រះ‌រាជ្យនៃស្ថានបរម‌សុខ។ ផ្ទុយទៅវិញ អ្នកណាប្រតិ‌បត្តិតាមវិន័យ ហើយបង្រៀនអ្នកផ្សេងឱ្យប្រតិ‌បត្តិតាម អ្នកនោះនឹងមានឋានៈធំក្នុងព្រះ‌រាជ្យនៃស្ថានបរម‌សុខ។ ខ្ញុំសុំប្រាប់ឱ្យអ្នករាល់គ្នាដឹងច្បាស់ថា បើសេចក្ដីសុចរិតរបស់អ្នករាល់គ្នាមិនប្រសើរជាងសេចក្ដីសុចរិតរបស់ពួកបណ្ឌិតខាងវិន័យ និងពួកផារីស៊ីទេ អ្នករាល់គ្នាពុំអាចចូលទៅក្នុងព្រះ‌រាជ្យនៃស្ថានបរម‌សុខឡើយ»។

ពាក្យថ្វាយថង្វាយ

បពិត្រព្រះជាម្ចាស់ជាព្រះបិតា! សូមព្រះអង្គទ្រង់មេត្តាប្រោសយើងខ្ញុំឱ្យចូលរួមក្នុងសក្ការបូជារបស់ព្រះយេស៊ូគ្រីស្ត ដូចសន្តយូស្តាំងដែលបានបូជាជីវិតដើម្បីការពារជំនឿនៃគ្រីស្តសាសនាផង។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានព្រះកាយព្រះគ្រីស្តឱ្យយើងខ្ញុំទទួលទាន។ សូមទ្រង់ព្រះមេត្តាពង្រឹងជំនឿរបស់យើងខ្ញុំ ឱ្យបានមាំមួនដូចជំនឿរបស់សន្តយូស្តាំងជាមរណសាក្សីផង។

823 Views

Post Views: 782

ថ្ងៃទី០១ ខែមិថុនាសន្តយូស្តាំង ជាមរណសាក្សីបុណ្យរម្លឹកពណ៌ក្រហម