រដូវសែសិបថ្ងៃ សប្តាហ៍ទី៤ ថ្ងៃព្រហស្បតិ៍

Posted on 3 ខែមេសា 202527 ខែកុម្ភៈ 2025 by Siya Khim

រដូវសែសិបថ្ងៃ

ថ្ងៃព្រហស្បតិ៍ អាទិត្យទី៤
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១៤៤

ពាក្យអធិដ្ឋានសម្រាប់ជ័យជម្នះ និងសន្តិភាព

ព្រះគ្រីស្តបានរៀនអំពីសិល្បៈនៃសង្រ្គាម នៅពេលព្រះអង្គមានជ័យជម្នះលើលោកិយ ដូចព្រះអង្គមានព្រះបន្ទូលថា៖ «ខ្ញុំបានឈ្នះលោកិយនេះហើយ» (សន្តហ៊ីលឡារី)។

បន្ទរទី១ ៖ ព្រះអម្ចាស់សម្ដែងព្រះហឫទ័យមេត្តាករុណាចំពោះខ្ញុំ ព្រះអង្គជាបន្ទាយការពារខ្ញុំ។ ខ្ញុំផ្ញើជីវិតលើព្រះអង្គ។

(ក)

^១	សូមលើកតម្កើងព្រះ‌អម្ចាស់ដែលជាថ្ម‌ដារបស់ខ្ញុំ ព្រះ‌អង្គបង្រៀនខ្ញុំអំពីយុទ្ធ‌សាស្ត្រ ហើយហ្វឹក‌ហ្វឺនខ្ញុំដើម្បីធ្វើសឹក។
^២	ព្រះ‌អង្គសម្ដែងព្រះ‌ហឫទ័យមេត្តា‌ករុណាចំពោះខ្ញុំ ព្រះ‌អង្គជួយការ‌ពារខ្ញុំ ព្រះ‌អង្គជាទីជម្រកដ៏រឹង‌មាំរបស់ខ្ញុំ ព្រះ‌អង្គរំដោះខ្ញុំ ព្រះ‌អង្គជាខែលការ‌ពារខ្ញុំ ខ្ញុំតែងមកជ្រកកោននឹងព្រះ‌អង្គជា‌និច្ច ព្រះ‌អង្គប្រគល់ប្រជា‌ជាតិនានាមកក្រោមអំណាចរបស់ខ្ញុំ
^៣	ឱព្រះ‌អម្ចាស់អើយ តើមនុស្សជាអ្វី បានជាព្រះ‌អង្គយកព្រះ‌ហឫទ័យទុកដាក់នឹងគេដូច្នេះ? តើមនុស្សលោកជាអ្វីបានជាព្រះ‌អង្គនឹកគិតដល់គេដូច្នេះ?
^៤	មនុស្សលោកប្រៀបបាននឹងមួយដង្ហើមប៉ុណ្ណោះ អាយុជីវិតរបស់គេប្រៀបបាននឹងស្រមោល ដែលតែង‌តែរសាត់បាត់ទៅ។
^៥	ឱព្រះ‌អម្ចាស់អើយ សូមផ្អៀងផ្ទៃមេឃរបស់ព្រះ‌អង្គ ហើយយាងចុះមក! សូមពាល់ភ្នំ ដើម្បីឱ្យមានផ្សែងហុយឡើង។
^៦	សូមព្រះ‌អង្គធ្វើឱ្យមានផ្លេកបន្ទោរ កម្ចាត់‌កម្ចាយខ្មាំងសត្រូវ សូមបាញ់ព្រួញរបស់ព្រះ‌អង្គបំបាក់ទ័ពពួកគេ។
^៧	សូមលាតព្រះ‌ហស្ដពីស្ថានលើមករំដោះទូល‌បង្គំ សូមស្រង់ទូល‌បង្គំឱ្យចេញផុតពីទឹកសមុទ្រ សូមរំដោះទូល‌បង្គំឱ្យរួចពីអំណាចរបស់ជនបរទេសទាំងនេះផង។
^៨	ពួកគេមិនដែលនិយាយពាក្យពិតទេ ហើយក៏មិនដែលគោរពពាក្យសម្បថរបស់ខ្លួនដែរ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះអម្ចាស់សម្ដែងព្រះហឫទ័យមេត្តាករុណាចំពោះខ្ញុំ ព្រះអង្គជាបន្ទាយការពារខ្ញុំ។ ខ្ញុំផ្ញើជីវិតលើព្រះអង្គ។

បន្ទរទី២ ៖ ប្រជាជាតិណាគោរពព្រះ‌អម្ចាស់ទុកជាព្រះរបស់ខ្លួន ប្រជាជាតិនោះមានសុភមង្គលហើយ !

(ខ)

(បទព្រហ្មគីតិ)

^៩-	បពិត្រព្រះម្ចាស់អើយ	ខ្ញុំច្រៀងថ្វាយនូវបទថ្មី
	និងប្រគុំតន្ត្រី	ពីរោះក្រៃថ្វាយព្រះម្ចាស់	។
^១០-	ព្រះអង្គបានប្រទាន	ឱ្យស្តេចមានជ័យជម្នះ
	ព្រះអង្គបានសង្គ្រោះ	ដាវីឌរស់មានសិរី	។
^១១-	សូមសង្គ្រោះរំដោះ	ខ្ញុំឱ្យរស់ផុតពីដៃ
	ជនបរទេសអប្រីយ៍	ដែលនិយាយពាក្យមិនពិត	។
^១២-	សូមឱ្យកូនប្រុសៗ	យើងទាំងអស់ស្រស់ប្រណីត
	លូតលាស់ល្អម៉ងម៉ត់	ដូចរុក្ខជាតិស្រស់ខៀវខ្ចី	។
	ឯកូនស្រីសំណព្វ	ល្អគួរគាប់ស្រស់ប្រិមប្រីយ៍
	ដូចទេពអប្សរស្រី	ល្អប្រពៃស្រស់ផូរផង់	។
^១៣-	សូមឱ្យក្នុងជង្រុក	យើងមានផ្ទុកភោគផលផង
	ចៀមក្នុងហ្វូងត្រសង	កើនច្រើនដងរាប់ម៉ឺនពាន់	។
^១៤-	ហ្វូងគោក៏ចម្រើន	មានកូនច្រើនមិនថយអន់
	គ្មានបាត់គ្មានគេប្លន់	គ្មានអាសន្នតាមទីផ្សារ	។
^១៥-	ប្រជាណាទទួល	ពរនិមលដូច្នេះណា
	កើតមានក្តីសុខា	មង្គលថ្លាល្អត្រចះ	។
	ប្រជាណាគោរព	ព្រះម្ចាស់ទុកធ្វើជាព្រះ
	នោះគេនឹងឃើញច្បាស់	ជួបប្រទះតែមង្គល	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ប្រជាជាតិណាគោរពព្រះ‌អម្ចាស់ទុកជាព្រះរបស់ខ្លួន ប្រជាជាតិនោះមានសុភមង្គលហើយ !

បទលើកតម្កើងតាមគម្ពីរវិវរណៈ (វវ ១១,១៧-១៨.១២,១០ខ-១២ក)

ការវិនិច្ឆ័យទោសរបស់ព្រះជាម្ចាស់

បន្ទរទី៣ ៖ ដ្បិតព្រះជាអម្ចាស់ជាព្រះដ៏មានព្រះចេស្ដាលើអ្វីៗទាំងអស់ ព្រះអង្គបានតាំងព្រះរាជ្យរបស់ព្រះអង្គហើយ។

^១៧	“បពិត្រព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ព្រះអង្គមានព្រះជន្មគង់នៅសព្វថ្ងៃនេះ ហើយក៏មានព្រះជន្មគង់នៅតាំងពីដើមរៀងមកដែរ ! យើងខ្ញុំសូមអរព្រះគុណព្រះអង្គ ព្រោះទ្រង់បានយកឫទ្ធានុភាពដ៏ខ្លាំងក្លារបស់ព្រះអង្គ មកតាំងព្រះរាជ្យរបស់ព្រះអង្គឡើង។
^១៨	ជាតិសាសន៍នានាបាននាំគ្នាខឹង ហើយពេលដែលព្រះអង្គសម្តែងព្រះពិរោធក៏មកដល់ដែរ គឺជាពេលកំណត់ដែលព្រះអង្គវិនិច្ឆ័យទោសមនុស្សស្លាប់។ នៅពេលនោះ ព្រះអង្គនឹងប្រទានរង្វាន់ដល់ពួកព្យាការី ជាអ្នកបម្រើរបស់ព្រះអង្គ ដល់ប្រជាជនដ៏វិសុទ្ធ និងដល់អស់អ្នកដែលគោរពកោតខ្លាចព្រះនាមព្រះអង្គ ទាំងអ្នកតូច ទាំងអ្នកធំ ហើយក៏ជាពេលដែលព្រះអង្គត្រូវបំផ្លាញ អស់អ្នកដែលបានបំផ្លាញផែនដីដែរ” ។
^១០	ពេលនោះ ខ្ញុំបានឮសំឡេងមួយបន្លឺយ៉ាងខ្លាំង នៅលើមេឃថា ៖ “ឥឡូវនេះ ដល់ពេលព្រះជាម្ចាស់សង្គ្រោះមនុស្សលោកហើយ ហើយឫទ្ធានុភាព និងព្រះរាជ្យព្រះជាម្ចាស់របស់យើង ព្រមទាំងអំណាចព្រះគ្រីស្តរបស់ព្រះអង្គក៏បានមកដល់ដែរ ដ្បិតអ្នកចោទប្រកាន់ទោសបងប្អូនយើង ត្រូវគេទម្លាក់ចោលហើយ គឺអ្នកនោះឯង ដែលចោទប្រកាន់បងប្អូនយើង ទាំងថ្ងៃ ទាំងយប់ នៅមុខព្រះភក្ត្រនៃព្រះរបស់យើង។
^១១	បងប្អូនយើងបានឈ្នះវា ដោយសារព្រះលោហិតរបស់កូនចៀម និងសក្ខីភាពរបស់ពួកគេ ហើយបងប្អូនទាំងនោះ បានស៊ូប្តូរជីវិតឥតស្តាយសោះឡើយ។
^១២	ហេតុនេះ ស្ថានបរមសុខ និងអស់អ្នកដែលរស់នៅក្នុងស្ថានបរមសុខអើយ! ចូរមានអំណរសប្បាយឡើង!

បន្ទរ ៖ ដ្បិតព្រះជាអម្ចាស់ជាព្រះដ៏មានព្រះចេស្ដាលើអ្វីៗទាំងអស់ ព្រះអង្គបានតាំងព្រះរាជ្យរបស់ព្រះអង្គហើយ។

ព្រះបន្ទូលរបស់ព្រះជាម្ចាស់ (យក ៤,៧-៨.១០)

ដូច្នេះ សូមបង‌ប្អូនគោរពចុះចូលព្រះ‌ជាម្ចាស់ ហើយប្រឆាំងនឹងមារនោះវាមុខជារត់ចេញឆ្ងាយពីបង‌ប្អូនមិនខាន។ សូមចូលទៅជិតព្រះជាម្ចាស់ នោះព្រះ‌អង្គនឹងយាងមកជិតបង‌ប្អូនវិញដែរ។ មនុស្សបាបអើយ ចូរជម្រះខ្លួនឲ្យបានបរិសុទ្ធទៅ! មនុស្សមានចិត្តពីរអើយ ចូរជម្រះចិត្តគំនិតឲ្យបានស្អាតឡើង!។ ចូរបន្ទាបខ្លួននៅចំពោះព្រះភក្ត្រព្រះ‌ជាម្ចាស់ នោះព្រះ‌អង្គនឹងលើកតម្កើងអ្នករាល់គ្នាជាមិនខាន។

បន្ទរ៖ ខ្ញុំទូលព្រះ‌អម្ចាស់ថា *ព្រះ‌អង្គអើយសូមប្រណីមេត្តាទូល‌បង្គំ។ បន្ទរឡើងវិញ៖…
-សូមប្រោសទូល‌បង្គំឲ្យជាឡើងវិញផង ដ្បិតយើងខ្ញុំបានប្រព្រឹត្តអំពើបាប ទាស់នឹងព្រះ‌ហប្ញទ័យរបស់ព្រះ‌អង្គ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ ពាក្យដែលខ្ញុំបាននិយាយនេះ មិន‌មែនចេញមកពីខ្ញុំទេ គឺព្រះ‌បិតាដែលបានចាត់ខ្ញុំឲ្យមក។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ពាក្យដែលខ្ញុំបាននិយាយនេះ មិន‌មែនចេញមកពីខ្ញុំទេ គឺព្រះ‌បិតាដែលបានចាត់ខ្ញុំឲ្យមក។

ពាក្យអង្វរសកល

នៅក្នុងធម៌មេត្តាករុណារបស់ព្រះជាម្ចាស់ ព្រះអង្គបានចាត់ព្រះវិញ្ញាណដ៏វិសុទ្ធឱ្យមកបំភ្លឺយើងខ្ញុំ ដើម្បីឱ្យការរស់នៅរបស់យើងខ្ញុំអាចបញ្ចេញភាពដ៏វិសុទ្ធ និងជំនឿ។ ចូរយើងបន្លឺសម្លេងឡើងទូលព្រះអង្គថា ៖

បន្ទរ ៖ ឱព្រះជាអម្ចាស់អើយ ! សូមប្រទានជីវិតដល់ប្រជារាស្រ្តរបស់ព្រះអង្គ ដែលព្រះគ្រីស្តបានលោះនោះផង !

បពិត្រព្រះអម្ចាស់! ព្រះអង្គជាប្រភពនៃភាពដ៏វិសុទ្ធគ្រប់យ៉ាង សូមព្រះអង្គនាំលោកអភិបាល លោកបូជាចារ្យ និងលោកឧបដ្ឋាកទាំងអស់ឱ្យទៅជិតព្រះគ្រីស្ត តាមរយៈការអាថ៌កំបាំងនៃអគ្គសញ្ញាអរព្រះគុណ
—សូមឱ្យអស់លោកលូតលាស់ជាប្រចាំ ក្នុងព្រះអំណោយទាននៃអគ្គសញ្ញាតែងតាំងរបស់អស់លោកផង។ (បន្ទរ)

សូមព្រះអង្គប្រៀនប្រដៅប្រជាជនរបស់ព្រះគ្រីស្ត ឱ្យចេះស្រឡាញ់ និងចូលរួមក្នុងតុព្រះបន្ទូល និងរូបកាយរបស់ព្រះអង្គ
—ដើម្បីពួកគេអាចនាំមកនូវព្រះហឫទ័យប្រណីសន្តោសមកក្នុងជីវិតប្រចាំថ្ងៃ ដែលគេបានទទួលដោយសារជំនឿ និងតាមរយៈអគ្គសញ្ញានានា។ (បន្ទរ)

បពិត្រព្រះអម្ចាស់! សូមព្រះអង្គប្រោសឱ្យយើងខ្ញុំអាចមើលឃើញតម្លៃថ្លៃថ្នូររបស់មនុស្សម្នាក់ៗ ដែលព្រះអង្គបានលោះដោយព្រះលោហិតរបស់ព្រះបុត្រា
—ដើម្បីឱ្យយើងខ្ញុំគោរពសេរីភាព និងមនសិការរបស់មនុស្សទាំងអស់។ (បន្ទរ)

សូមបង្រៀនយើងខ្ញុំឱ្យចេះទប់ចិត្តលោភលន់របស់យើងខ្ញុំ ពីសម្បត្តិលោកីយ៍
—ហើយឱ្យយើងខ្ញុំចេះខ្វល់ខ្វាយពីសេចក្តីត្រូវការរបស់អ្នកដទៃផង។ (បន្ទរ)

សូមព្រះអង្គអាណិតអាសូរដល់ប្រជារាស្រ្តព្រះអង្គ ដែលព្រះអង្គបានត្រាស់ហៅពួកគេនៅថ្ងៃនេះ
—សូមប្រោសប្រទានឱ្យពួកគេនូវរង្វាន់នៃសុភមង្គលអស់កល្បជានិច្ច។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះអម្ចាស់ដ៏មានព្រះហឫទ័យសប្បុរសអើយ ! សូមព្រះអង្គប្រណីសន្តោសយើងខ្ញុំជាអ្នកបម្រើរបស់ព្រះអង្គ ដែលបានខិតខំផ្តន្ទាខ្លួន និងព្យាយាមធ្វើអំពើល្អ ដើម្បីប្រព្រឹត្តតាមវិន័យរបស់ព្រះអង្គ ហើយត្រៀមខ្លួនប្រារព្ធពិធីបុណ្យចម្លងខាងមុខនេះ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

8 Views

Post Views: 8