រដូវសែសិបថ្ងៃ សប្តាហ៍ទី៤ ថ្ងៃអង្គារ

Posted on 1 ខែមេសា 202526 ខែកុម្ភៈ 2025 by Siya Khim

រដូវសែសិបថ្ងៃ

ថ្ងៃអង្គារ អាទិត្យទី៤
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១៣៧,១-៦

ទន្លេនៃស្រុកបាប៊ីឡូន

ការជាប់ឃុំឃាំងនៅស្រុកបាប៊ីឡូន គឺជាប្រភេទនៃការជាប់ឃុំឃាំងខាងវិញ្ញាណរបស់យើង (សន្តហ៊ីលឡារី)។

បន្ទរទី១ ៖ ឱក្រុងយេរូសាឡឹមអើយ ! បើខ្ញុំភ្លេចអ្នក សូមឱ្យដៃស្តាំរបស់ខ្ញុំស្ពឹកចុះ។

^១	យើងអង្គុយនៅមាត់ទន្លេស្រុកបាប៊ីឡូន នាំគ្នាយំស្រណោះក្រុងស៊ីយ៉ូន។
^២	យើងភ្ជួរពិណរបស់យើងនឹងដើមឈើ នៅជិតមាត់ទន្លេ។
^៣	ពេលនោះ ពួកអ្នកដែលចាប់យើងមកជាឈ្លើយសឹក បានសុំឱ្យយើងច្រៀង ពួកអ្នកធ្វើទោសយើង បានសុំឱ្យយើងច្រៀងបទសប្បាយ គេពោលថា: «ចូរនាំគ្នាច្រៀងបទខ្លះពីក្រុងស៊ីយ៉ូនឱ្យយើងស្ដាប់ផង!» ។
^៤	តើឱ្យយើងច្រៀងបទតម្កើងថ្វាយព្រះអម្ចាស់ នៅលើទឹកដីបរទេសដូចម្តេចកើត?
^៥	ឱក្រុងយេរូសាឡឹមអើយ ! បើខ្ញុំភ្លេចអ្នក សូមឱ្យដៃស្តាំរបស់ខ្ញុំស្ពឹកចុះ !
^៦	ប្រសិនបើខ្ញុំមិននឹកដល់អ្នកទេ ហើយប្រសិនបើខ្ញុំមិនចាត់ទុកអ្នក ជាអំណរដ៏ខ្លាំងក្លាបំផុតរបស់ខ្ញុំទេនោះ សូមឱ្យអណ្ដាតខ្ញុំរឹងទៅចុះ !

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ឱក្រុងយេរូសាឡឹមអើយ ! បើខ្ញុំភ្លេចអ្នក សូមឱ្យដៃស្តាំរបស់ខ្ញុំស្ពឹកចុះ។

ទំនុកតម្កើងលេខ ១៣៨

ពាក្យអរព្រះគុណ

ជាតិសាសន៍នានា នឹងដើរក្នុងពន្លឺរបស់ក្រុងនោះ ហើយស្តេចនានានឹងនាំរាជទ្រព្យចូលមកក្នុងក្រុងនោះដែរ (វវ ២១,២៤)។

បន្ទរទី២ ៖ ទូលបង្គំស្មូតទំនុកតម្កើងថ្វាយព្រះអង្គ នៅចំពោះមុខពពួកទេវទូត។

(បទកាកគតិ)

^១-	ខ្ញុំសូមតម្កើង	ព្រះម្ចាស់ខ្ពស់ឡើង	អស់ពីដួងចិត្ត
	នៅមុខទេវតា	ទូលបង្គំស្មូតបទ	តម្កើងថ្វាយថ្វាត់
		ដល់ព្រះអង្គថ្លៃ	។
^២-	ខ្ញុំក្រាបបែរមុខ	តម្រង់ទៅរក	វិហារប្រពៃ
	ខ្ញុំលើកតម្កើង	ព្រះនាមថ្លាថ្លៃ	ដោយព្រះហឫទ័យ
		ស្មោះស្ម័គ្រឥតស្បើយ	។
^៣-	នៅថ្ងៃដែលខ្ញុំ	ស្រែកអង្វរសុំ	ព្រះអង្គតបឆ្លើយ
	ព្រះអង្គប្រទាន	ឥតមានកន្តើយ	ឱ្យខ្ញុំបានស្បើយ
		ក្នុងចិត្តក្លាហាន	។
^៤-	ឱព្រះម្ចាស់អើយ	សូមទ្រង់ផ្តល់ឱ្យ	ស្តេចទាំងប៉ុន្មាន
	នៅលើផែនដី	នាំគ្នាគ្រប់ប្រាណ	តម្កើងពេលបាន
		ឮទ្រង់សន្យា	។
^៥-	សូមឱ្យគេនាំ	គ្នីគ្នាច្រៀងរាំ	តម្កើងកិច្ចការ
	ថាព្រះអម្ចាស់	រុងរឿងអស្ចារ្យ	ឧត្តមថ្លៃថ្លា
		បំផុតគ្មានពីរ	។
^៦-	ទោះបីព្រះម្ចាស់	ខ្ពង់ខ្ពស់ពេកណាស់	ក៏ទ្រង់សំភី
	គិតមនុស្សលោក	គ្រប់វិនាទី	មនុស្សកាចយាយី
		ទ្រង់ស្គាល់ពីឆ្ងាយ	។
^៧-	ពេលទូលបង្គំ	ជួបអាសន្នធំ	ទ្រង់ឥតជិនណាយ
	ជួយការពារខ្ញុំ	វាយខ្មាំងខ្ចាត់ខ្ចាយ	សង្គ្រោះខ្ញុំដោយ
		ឫទ្ធីបារមី	។
^៨-	បពិត្រព្រះម្ចាស់	ការគ្រប់យ៉ាងនេះ	ពិតជាប្រពៃ
	ព្រះអង្គប្រកប	ដោយព្រះហឫទ័យ	ករុណាក្រៃ
		ឥតបីបោះបង់	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ ៖ ទូលបង្គំស្មូតទំនុកតម្កើងថ្វាយព្រះអង្គ នៅចំពោះមុខពពួកទេវទូត។

បទលើកតម្កើងតាមគម្ពីរវិវរណៈ (វវ ៤,១១.៥,៩-១០.១២)

ទំនុកតម្កើងការប្រោសលោះ

បន្ទរទី៣ ៖ កូនចៀមដែលគេសម្លាប់ធ្វើយញ្ញ‌បូជា ព្រះអង្គសមនឹងទទួលព្រះកិត្តិនាម សិរី‌រុងរឿង និងការសរសើរតម្កើង។

^១១	“បពិត្រព្រះអម្ចាស់ជាព្រះនៃយើងខ្ញុំ ព្រះអង្គសមនឹងទទួលសិរីរុងរឿង ព្រះកិត្តិនាម និងឫទ្ធានុភាព ដ្បិតព្រះអង្គបានបង្កើតរបស់សព្វសារពើមក អ្វីៗទាំងអស់សុទ្ធតែកើតមាន ហើយនៅស្ថិតស្ថេរ ដោយសារព្រះហឫទ័យរបស់ព្រះអង្គ” ។
^៩	គេនាំគ្នាច្រៀងបទចម្រៀងថ្មីថា ៖ “ព្រះអង្គសមនឹងទទួលក្រាំង ហើយបកត្រាផង ព្រោះទ្រង់ត្រូវគេសម្លាប់ធ្វើយញ្ញបូជា ព្រះអង្គបានលោះមនុស្សពីគ្រប់ពូជ គ្រប់ភាសា គ្រប់ប្រជាជន និងពីគ្រប់ជាតិសាសន៍ យកមកថ្វាយព្រះជាម្ចាស់ ដោយសារព្រះលោហិតរបស់ព្រះអង្គ។
^១០	ព្រះអង្គបានធ្វើឱ្យគេទៅជារាជាណាចក្រ និងជាក្រុមបូជាចារ្យ បម្រើព្រះជាម្ចាស់របស់យើង ហើយអ្នកទាំងនោះនឹងគ្រងរាជ្យលើផែនដី” ។
^១២	នាំគ្នាបន្លឺសំឡេងយ៉ាងខ្លាំងៗថា៖ កូនចៀមដែលគេសម្លាប់ធ្វើយញ្ញបូជា ទ្រង់សមនឹងទទួលឫទ្ធានុភាព រាជសម្បត្តិ ព្រះប្រាជ្ញាញាណ ឥទ្ធិឫទ្ធិ ព្រះកិត្តិនាម សិរីរុងរឿង និងការសរសើរតម្កើង” ។

បន្ទរ ៖ កូនចៀមដែលគេសម្លាប់ធ្វើយញ្ញ‌បូជា ព្រះអង្គសមនឹងទទួលព្រះកិត្តិនាម សិរី‌រុងរឿង និងការសរសើរតម្កើង។

ព្រះបន្ទូលរបស់ព្រះជាម្ចាស់ (យក ២,១៤.១៧.១៨^ខ)

បង‌ប្អូនអើយ ប្រសិនបើមានម្នាក់ពោលថា ខ្លួនមានជំនឿ តែមិនប្រព្រឹត្តអំពើល្អទេ តើមានប្រយោជន៍អ្វី? តើជំនឿនេះអាចធ្វើឲ្យគេទទួលការសង្គ្រោះបានឬ? រីឯជំនឿវិញក៏ដូច្នោះដែរ ប្រសិនបើគ្មានការប្រព្រឹត្តអំពើល្អទេ ជំនឿនោះស្លាប់តែម្ដង!។ សូមបង្ហាញជំនឿរបស់អ្នកដែលឥតមានការប្រព្រឹត្តអំពើល្អឲ្យខ្ញុំមើលមើល៍ នោះខ្ញុំនឹងបង្ហាញឲ្យអ្នកឃើញជំនឿរបស់ខ្ញុំ ដោយអំពើល្អដែលខ្ញុំបានប្រព្រឹត្ត។

បន្ទរ ៖ ខ្ញុំទូលព្រះ‌អម្ចាស់ថា *ព្រះ‌អង្គអើយសូមប្រណីមេត្តាទូល‌បង្គំ។ បន្ទរឡើងវិញ៖…
-សូមប្រោសទូល‌បង្គំឲ្យជាឡើងវិញផង ដ្បិតយើងខ្ញុំបានប្រព្រឹត្តអំពើបាប ទាស់នឹងព្រះ‌ហប្ញទ័យរបស់ព្រះ‌អង្គ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ «ឥឡូវនេះ អ្នកបានជាហើយ កុំប្រព្រឹត្តអំពើបាបទៀតឲ្យសោះ ក្រែងលោកើតការអាក្រក់ដល់អ្នក លើសមុនទៅទៀត» ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ «ឥឡូវនេះ អ្នកបានជាហើយ កុំប្រព្រឹត្តអំពើបាបទៀតឲ្យសោះ ក្រែងលោកើតការអាក្រក់ដល់អ្នក លើសមុនទៅទៀត» ។

ពាក្យអង្វរសកល

ចូរយើងកោតសរសើរព្រះអម្ចាស់យេស៊ូ ដែលត្រូវគេឆ្កាងនៅលើឈើឆ្កាង ហើយព្រះអង្គបានទាញយកអ្វីៗទាំងអស់មកឯព្រះអង្គ។ ដោយសេចក្តីស្រឡាញ់ យើងសូមទូលព្រះអង្គថា ៖

បន្ទរ ៖ បពិត្រព្រះអម្ចាស់ ! សូមព្រះអង្គទាញយកអ្វីៗទាំងអស់មកឯព្រះអង្គ !

បពិត្រព្រះអម្ចាស់! សូមឱ្យការអាថ៌កំបាំងនៃព្រះឈើឆ្កាងបំភ្លឺមនុស្សគ្រប់ជាតិសាសន៍
—ដើម្បីឱ្យមនុស្សទាំងអស់បានឃើញព្រះអង្គ ដែលជាផ្លូវ ជាសេចក្តីពិត និងជាជីវិត។ (បន្ទរ)

ព្រះអង្គដែលជាប្រភពទឹកផ្តល់ជីវិត
—សូមព្រះអង្គប្រទានឱ្យអស់អ្នកស្រេកឃ្លានព្រះអង្គបានឆ្អែតជារៀងរហូត។ (បន្ទរ)

សូមព្រះអង្គជម្រុញលោកគ្រូអ្នកគ្រូ និងសិល្បករទាំងអស់
—ឱ្យរៀបចំមនុស្សជាតិសម្រាប់ព្រះរាជ្យរបស់ព្រះអង្គ។ (បន្ទរ)

សូមព្រះអង្គណែនាំអស់អ្នកដែលឃ្លាតឆ្ងាយពីព្រះអង្គ ដោយសារអំពើបាប ឬរឿងអាស្រូវផ្សេងៗ
—ដូច្នេះ ពួកគេអាចត្រឡប់មករកព្រះអង្គវិញ ហើយស្ថិតនៅជាប់នឹងសេចក្តីស្រឡាញ់របស់ព្រះអង្គជានិច្ច។ (បន្ទរ)

សូមព្រះអង្គទទួលអស់បងប្អូនយើងខ្ញុំ ដែលបានលាចាកលោកនេះ ទៅឯព្រះអង្គនៅស្ថានបរមសុខ
—សូមឱ្យពួកគេទាំងនោះចូលរួមចំណែកក្នុងអំណរសប្បាយរួមជាមួយព្រះនាងព្រហ្មចារិនីម៉ារី និងសន្តបុគ្គលទាំងឡាយផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះអម្ចាស់ដ៏មានធម៌មេត្តាករុណាអើយ ! ព្រះអង្គសង្គ្រោះមនុស្សលោក ដោយសារព្រះយេស៊ូជាព្រះបុត្រាព្រះអង្គដែលសោយទិវង្គត និងមានព្រះជន្មរស់ឡើងវិញ។ ក្នុងរដូវសែសិបថ្ងៃនេះ សូមប្រោសឲ្យយើងខ្ញុំហ៊ានប្រកាសដំណឹងល្អដល់មនុស្សលោកថា ព្រះអង្គពិតជាព្រះសង្គ្រោះមែន។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

93 Views

Post Views: 94