រដូវសែសិបថ្ងៃ សប្តាហ៍ទី៤ ថ្ងៃសៅរ៍

Posted on 29 ខែមីនា 202525 ខែកុម្ភៈ 2025 by Siya Khim

រដូវសែសិបថ្ងៃ

ថ្ងៃអាទិត្យ អាទិត្យទី៤
_{(ថ្ងៃសៅរ៍ ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១២២

ក្រុងយេរូសាឡឹមដ៏វិសុទ្ធ

បងប្អូនចូលមកជិតភ្នំស៊ីយ៉ូន មកជិតក្រុងរបស់ព្រះដ៏មានព្រះ‌ជន្មរស់ គឺក្រុងយេរូ‌សាឡឹមនៅស្ថានបរម‌សុខ (ហប ១២,២២)។

បន្ទរទី១ ៖ ចូរយើងនាំគ្នាទៅព្រះដំណាក់របស់ព្រះអម្ចាស់ ដោយអំណរសប្បាយ !

^១	នៅពេលគេប្រាប់ខ្ញុំថា ៖ យើងនាំគ្នាទៅព្រះដំណាក់របស់ព្រះអម្ចាស់! ខ្ញុំមានអំណរខ្លាំងណាស់។
^២	ឱក្រុងយេរូសាឡឹមអើយ! យើងនាំគ្នាឈានជើងចូលមកដល់មាត់ទ្វាររបស់អ្នកហើយ!
^៣	យេរូសាឡឹមអើយ! អ្នកជាក្រុងមួយដែលសង់ឡើងយ៉ាងរឹងមាំ មានកំពែងដ៏ល្អប្រណីតព័ទ្ធជុំវិញ។
^៤	កុលសម្ពន្ធនានារបស់ព្រះអម្ចាស់នាំគ្នាឡើងមកទីនេះ ដើម្បីលើកតម្កើងព្រះនាមព្រះអម្ចាស់ តាមច្បាប់របស់ជនជាតិអ៊ីស្រាអែល។
^៥	នៅទីនេះ ក៏មានបល្ល័ង្កនៃព្រះរាជវង្សរបស់ស្តេចដាវីឌ ដើម្បីគ្រប់គ្រងប្រជារាស្ត្រដោយយុត្តិធម៌ដែរ។
^៦	ចូរនាំគ្នាទូលសូមព្រះអម្ចាស់ប្រទានសន្តិភាពមកក្រុងយេរូសាឡឹម សូមឱ្យអស់អ្នកដែលស្រឡាញ់ក្រុងនេះ អាចរស់នៅយ៉ាងសុខសាន្ត!
^៧	សូមឱ្យអស់អ្នកដែលរស់នៅខាងក្នុងកំពែងក្រុង បានប្រកបដោយសេចក្តីសុខ សូមឱ្យវិមាននានានៅក្នុងក្រុងបានសុខក្សេមក្សាន្ត។
^៨	ដោយយល់ដល់បងប្អូន និងញាតិមិត្តរបស់ខ្ញុំ ខ្ញុំពោលថា ៖ សូមឱ្យក្រុងយេរូសាឡឹមបានប្រកបដោយសេចក្តីសុខសាន្ត!
^៩	ដោយយល់ដល់ព្រះដំណាក់របស់ព្រះអម្ចាស់ជាព្រះនៃយើង ខ្ញុំសូមឱ្យអ្នកបានប្រកបដោយសុភមង្គល!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ចូរយើងនាំគ្នាទៅព្រះដំណាក់របស់ព្រះអម្ចាស់ ដោយអំណរសប្បាយ !

ទំនុកតម្កើងលេខ ១៣០

ពីក្នុងរណ្ដៅដ៏ជ្រៅ ទូល‌បង្គំស្រែកអង្វរព្រះ‌អង្គ

“បុត្រនោះនឹងសង្គ្រោះប្រជារាស្ត្ររបស់ព្រះអង្គឱ្យរួចពីបាបរបស់គេ” (មថ ១,២១)។

បន្ទរទី២ ៖ «អ្នកដេកលក់អើយ ចូរភ្ញាក់ឡើង ចូរក្រោកឡើងចេញពីចំណោមមនុស្សស្លាប់ ព្រះ‌គ្រីស្តនឹងភ្លឺចាំងមកលើអ្នក» ។

(បទពាក្យ ៧)

^១-	បពិត្រព្រះជាអម្ចាស់អើយ	ទូលបង្គំស្រែកហើយរកព្រះអង្គ
	ពីក្នុងរណ្តៅជ្រៅកន្លង	មេត្តាជួយផងផុតពីស្លាប់	។
^២-	សំឡេងខ្ញុំឮដូចចម្រៀង	សូមព្រះអង្គផ្ទៀងព្រះកាណ៌ស្តាប់
	ពាក្យខ្ញុំអង្វរទទូចប្រាប់	រៀបរាប់រ៉ាយរ៉ាប់សូមសន្តោស	។
^៣-	បពិត្រព្រះម្ចាស់ដ៏ឧត្តម	បើព្រះអង្គចាំពីកំហុស
	អំពើបាបកម្មមនុស្សស្រីប្រុស	គ្មានម្នាក់ណាសោះរួចខ្លួនឡើយ	។
^៤-	ប៉ុន្តែព្រះអង្គតែងអត់ទោស	ប្រណីសន្តោសខ្ញុំធូរស្បើយ
	រួចផុតទុក្ខទោសបានល្ហែល្ហើយ	គឺព្រះអង្គហើយខ្ញុំគោរព	។
^៥-	ខ្ញុំទុកចិត្តលើព្រះអម្ចាស់	ជីវិតខ្ញុំនេះផ្ញើសព្វគ្រប់
	សង្ឃឹមលើព្រះបន្ទូលគាប់	មិនឈរមិនឈប់ទេព្រះអង្គ	។
^៦-	ខ្ញុំទន្ទឹងចាំព្រះអម្ចាស់	ជាងអ្នកយាមផ្ទះទៅទៀតផង
	ពេលឃើញថ្ងៃរះស្រស់បំព្រង	រួចផុតទុក្ខផងមួយរាត្រី	។
^៧-	ឱអ៊ីស្រាអែលសូមទុកចិត្ត	ព្រះល្អវិសុទ្ធដោយព្រះទ័យ
	មេត្តាករុណាត្រាប្រណី	ទ្រង់សព្វព្រះទ័យជួយជានិច្ច	។
^៨-	ព្រះអង្គរំដោះអ៊ីស្រាអែល	ពីកំហុសដែលមានច្រើនតិច
	គេបានប្រព្រឹត្តជាប់ជានិច្ច	ព្រះអង្គសម្រេចបានសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ «អ្នកដេកលក់អើយ ចូរភ្ញាក់ឡើង ចូរក្រោកឡើងចេញពីចំណោមមនុស្សស្លាប់ ព្រះ‌គ្រីស្តនឹងភ្លឺចាំងមកលើអ្នក» ។

បទលើកតម្កើងតាមលិខិតភីលីព (ភីល ២,៦-១១)

ព្រះគ្រីស្តជាអ្នកបម្រើដ៏វិសុទ្ធរបស់ព្រះជាម្ចាស់

បន្ទរទី៣ ៖ ព្រះជាម្ចាស់ដែលតែងតែមានព្រះហឫទ័យអាណិតមេត្តាដ៏ច្រើនពន់ប្រមាណនោះ ព្រះ‌អង្គមានព្រះ‌ហឫទ័យស្រឡាញ់យើងខ្លាំងបំផុត គឺទោះបីយើងស្លាប់ដោយសារអំពើបាបរបស់យើងហើយក៏ដោយ ក៏ព្រះអង្គបានប្រោសប្រទានឲ្យយើងមានជីវិតរស់ រួមជាមួយព្រះគ្រីស្តវិញដែរ។

^៦	ទោះបីព្រះអង្គមានឋានៈជាព្រះជាម្ចាស់ក៏ដោយ ក៏ព្រះអង្គពុំបានក្តោបក្តាប់ឋានៈដែលស្មើនឹងព្រះជាម្ចាស់នេះ ទុកជាកម្មសិទ្ធិដាច់មុខរបស់ព្រះអង្គឡើយ។
^៧	ផ្ទុយទៅវិញ ព្រះអង្គបានលះបង់អ្វីៗទាំងអស់មកយកឋានៈជាទាសករ ព្រះអង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។
^៨	ព្រះអង្គបានដាក់ខ្លួនធ្វើតាមព្រះបញ្ជារហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។
^៩	ហេតុនេះហើយបានជាព្រះជាម្ចាស់ លើកតម្កើងព្រះអង្គឡើងយ៉ាងខ្ពង់ខ្ពស់បំផុត ព្រមទាំងប្រោសប្រទានឱ្យព្រះអង្គមានព្រះនាមប្រសើរលើសអ្វីៗទាំងអស់
^១០	ដើម្បីឱ្យអ្វីៗទាំងអស់ ទាំងនៅស្ថានបរមសុខ ទាំងនៅលើផែនដី ទាំងនៅក្រោមដី នាំគ្នាក្រាបថ្វាយបង្គំ នៅពេលណាឮព្រះនាមព្រះយេស៊ូ
^១១	និងឱ្យមនុស្សគ្រប់ភាសាប្រកាសឡើងថា ព្រះយេស៊ូគ្រីស្តជាព្រះអម្ចាស់ ដើម្បីលើកតម្កើងសិរីរុងរឿងព្រះជាម្ចាស់ ជាព្រះបិតា។

បន្ទរ ៖ ព្រះជាម្ចាស់ដែលតែងតែមានព្រះហឫទ័យអាណិតមេត្តាដ៏ច្រើនពន់ប្រមាណនោះ ព្រះ‌អង្គមានព្រះ‌ហឫទ័យស្រឡាញ់យើងខ្លាំងបំផុត គឺទោះបីយើងស្លាប់ដោយសារអំពើបាបរបស់យើងហើយក៏ដោយ ក៏ព្រះអង្គបានប្រោសប្រទានឲ្យយើងមានជីវិតរស់ រួមជាមួយព្រះគ្រីស្តវិញដែរ។

ព្រះបន្ទូលរបស់ព្រះជាម្ចាស់ (២ករ ៦,១-៤^ក)

ដោយយើងធ្វើការរួមជាមួយព្រះ‌ជាម្ចាស់ យើងសូមទូន្មានបង‌ប្អូនថា កុំទទួលការប្រណី‌សន្ដោសរបស់ព្រះ‌អង្គ យកមកទុកចោលជាអសារឥតការឡើយ ដ្បិតព្រះ‌ជាម្ចាស់មានព្រះ‌បន្ទូលថា: «យើងបានឆ្លើយតបមកអ្នកនៅគ្រាណាដែលយើងគាប់ចិត្ត យើងបានជួយអ្នកនៅថ្ងៃណាដែលយើងសង្គ្រោះមនុស្សលោក»។ គ្រាដែលព្រះ‌ជាម្ចាស់គាប់ព្រះ‌ហឫទ័យ គឺឥឡូវនេះហើយ! គឺឥឡូវនេះហើយ ជាថ្ងៃដែលព្រះ‌ជាម្ចាស់សង្គ្រោះមនុស្សលោក!។ យើងមិនចង់ឲ្យកើតមានរឿងអ្វីមួយ ដែលបណ្ដាលឲ្យនរណាម្នាក់ជំពប់ចិត្ត បាត់ជំនឿឡើយ ដើម្បីកុំឲ្យគេបន្ទោសមុខ‌ងាររបស់យើង។ ផ្ទុយទៅវិញ យើងតាំងខ្លួនជាអ្នកបម្រើរបស់ព្រះ‌ជាម្ចាស់ ក្នុងគ្រប់កាលៈ‌ទេសៈទាំងអស់។

បន្ទរ៖ ឱព្រះ‌អម្ចាស់អើយ ! សូមព្រះសណ្តាប់ និងអាណិត‌អាសូរយើងខ្ញុំផង! *ដ្បិតយើងខ្ញុំបានប្រព្រឹត្តអំពើបាប ទាស់នឹងព្រះ‌ហប្ញទ័យរបស់ព្រះ‌អង្គ។ បន្ទរឡើងវិញ៖…
-សូមព្រះគ្រីស្តយេស៊ូសណ្តាប់ពាក្យអង្វររបស់យើងខ្ញុំ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ ព្រះ‌ជាម្ចាស់ស្រឡាញ់មនុស្សលោកខ្លាំងណាស់ ហេតុនេះហើយបានជាព្រះ‌អង្គប្រទានព្រះ‌បុត្រាតែមួយរបស់ព្រះ‌អង្គមក ដើម្បីឲ្យអស់អ្នកដែលជឿលើព្រះ‌បុត្រា មានជីវិតអស់កល្ប‌ជានិច្ច គឺមិនឲ្យគេវិនាសឡើយ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ ព្រះ‌ជាម្ចាស់ស្រឡាញ់មនុស្សលោកខ្លាំងណាស់ ហេតុនេះហើយបានជាព្រះ‌អង្គប្រទានព្រះ‌បុត្រាតែមួយរបស់ព្រះ‌អង្គមក ដើម្បីឲ្យអស់អ្នកដែលជឿលើព្រះ‌បុត្រា មានជីវិតអស់កល្ប‌ជានិច្ច គឺមិនឲ្យគេវិនាសឡើយ។

ពាក្យអង្វរសកល

ចូរយើងលើកតម្កើងសិរីរុងរឿងរបស់ព្រះជាម្ចាស់ ដែលបានខ្វល់ខ្វាយពីយើងរាល់គ្នា។ ចូរយើងហៅរកព្រះអង្គ ហើយទូលថា ៖

បន្ទរ៖ បពិត្រព្រះអម្ចាស់ ! សូមសង្រ្គោះប្រជារាស្រ្តដែលព្រះអង្គបានលោះ !

បពិត្រព្រះអម្ចាស់ដែលប្រទានអំណោយ និងជាប្រភពនៃសេចក្តីពិតគ្រប់យ៉ាង! សូមព្រះអង្គប្រទានព្រះពរយ៉ាងបរិបូណ៍ដល់លោកអភិបាល
—និងថែរក្សាអស់អ្នកដែលជឿទុកចិត្តលើភាពស្មោះត្រង់របស់អស់លោក ក្នុងសេចក្តីបង្រៀនរបស់ក្រុមគ្រីស្តទូត។ (បន្ទរ)

សូមព្រះអង្គចាក់បង្ហូរសេចក្តីស្រឡាញ់របស់ព្រះអង្គ មកក្នុងដួងចិត្តនៃអស់អ្នកដែលបានរួមចំណែកទទួលនំប៉័ងនៃជីវិត
—ដើម្បីឱ្យពួកគេអាចរួមគ្នាជាអង្គតែមួយ ក្នុងព្រះកាយរបស់ព្រះបុត្រាព្រះអង្គ។ (បន្ទរ)

សូមព្រះអង្គជួយយើងខ្ញុំឱ្យចេះដកខ្លួនចេញពីអំពើបាប
—ហើយសូមបំពាក់ព្រះគ្រីស្តជាព្រះបុត្រាព្រះអង្គ គឺលោកអដាំថ្មីឱ្យយើងខ្ញុំផង។ (បន្ទរ)

សូមព្រះអង្គប្រោសឱ្យមនុស្សទាំងអស់ដែលដឹងខ្លួនខុស និងស្វែងរកការលើកលែងទោស
—អាចរួមចំណែកក្នុងផលផ្លែនៃការសង្រ្គោះ ដែលព្រះគ្រីស្តបានសោយទិវង្គត។ (បន្ទរ)

សូមឱ្យអស់អ្នកដែលបានទទួលមរណភាព ក្នុងសេចក្តីសុខសាន្តរបស់ព្រះអង្គ លើកតម្កើងសិរីរុងរឿងរបស់ព្រះអង្គឯស្ថានបរមសុខ
—គឺស្ថានដែលយើងខ្ញុំសង្ឃឹមថា នឹងបានកោតសរសើរព្រះអង្គ អស់កល្បជាអង្វែងតរៀងទៅ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះជាម្ចាស់ដ៏មានធម៌មេត្តាករុណាអើយ ! ព្រះអង្គចាត់ព្រះបុត្រាឲ្យយាងមកផ្សះផ្សាមនុស្សលោកនឹងព្រះអង្គ។ សូមព្រះអង្គមេត្តាពង្រឹងជំនឿ និងបំភ្លឺចិត្តគំនិតគ្រីស្តបរិស័ទទាំងអស់
ឲ្យស្គាល់ពីព្រះហឫទ័យស្រឡាញ់របស់ព្រះអង្គគ្រប់ពេលវេលា ជាពិសេស អស់អ្នកដែលត្រៀមខ្លួនទទួលអគ្គសញ្ញាជ្រមុជទឹក ក្នុងឱកាសបុណ្យចម្លងខាងមុខនេះ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

13 Views

Post Views: 13