រដូវសែសិបថ្ងៃ សប្តាហ៍ទី៣ ថ្ងៃចន្ទ

Posted on 24 ខែមីនា 202521 ខែកុម្ភៈ 2025 by Siya Khim

រដូវសែសិបថ្ងៃ

ថ្ងៃចន្ទ អាទិត្យទី៣
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១២៣

ព្រះជាម្ចាស់ជាសេចក្តីសង្ឃឹមរបស់ប្រជារាស្រ្តព្រះអង្គ

ពេលនោះ មានមនុស្សខ្វាក់ពីរនាក់អង្គុយនៅក្បែរផ្លូវ។ អ្នកទាំងពីរឮថា ព្រះ‌យេស៊ូយាងមក ក៏ស្រែកឡើងថា៖
«ឱព្រះ‌អម្ចាស់ជាព្រះ‌រាជ‌វង្សព្រះ‌បាទដាវីឌអើយ! សូមអាណិតមេត្តាយើងខ្ញុំផង!» (មថ ២០,៣០)។

បន្ទរទី១ ៖ យើងខ្ញុំសម្លឹងមើលព្រះជាអម្ចាស់នៃយើង ហើយទន្ទឹងរង់ចាំព្រះអង្គប្រណីសន្តោស។

^១	ឱព្រះអម្ចាស់ដែលគង់នៅស្ថានបរមសុខអើយ! ទូលបង្គំងើបមុខឡើងសម្លឹងទៅរកព្រះអង្គ។
^២	យើងខ្ញុំក៏សម្លឹងមើលព្រះ‌ជា‌អម្ចាស់នៃយើង ហើយទន្ទឹងរង់‌ចាំព្រះ‌អង្គប្រណី‌សន្ដោស ដូចអ្នកបម្រើសម្លឹងមើលទៅដៃម្ចាស់របស់ខ្លួន និងដូចស្ត្រីបម្រើសម្លឹងមើលទៅដៃម្ចាស់ស្រីរបស់ខ្លួនយ៉ាងនោះដែរ។
^៣	ឱព្រះអម្ចាស់អើយ! សូមអាណិតមេត្តាយើងខ្ញុំ សូមអាណិតមេត្តាយើងខ្ញុំផង ដ្បិតយើងខ្ញុំត្រូវគេមើលងាយខ្លាំងណាស់។
^៤	យើងខ្ញុំពុំអាចទ្រាំទ្រនឹងការមើលងាយពីសំណាក់មនុស្សព្រហើន ព្រមទាំងការជេរប្រមាថពីសំណាក់មនុស្សវាយឫកខ្ពស់បានទៀតឡើយ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ យើងខ្ញុំសម្លឹងមើលព្រះជាអម្ចាស់នៃយើង ហើយទន្ទឹងរង់ចាំព្រះអង្គប្រណីសន្តោស។

ទំនុកតម្កើងលេខ ១២៤

ព្រះអម្ចាស់ផ្ទាល់បានជួយយើង ដោយព្រះនាមព្រះអង្គ

លោកប៉ូលនិមិត្តឃើញព្រះអម្ចាស់មានព្រះបន្ទូលមកលោកថាៈ “កុំខ្លាចអី! ត្រូវនិយាយតទៅទៀត កុំនៅស្ងៀមឡើយ ដ្បិតយើងស្ថិតនៅជាមួយអ្នកហើយ” (កក ១៨,៩-១០)។

បន្ទរទី២ ៖ ព្រះអម្ចាស់ផ្ទាល់បានជួយយើង ដោយព្រះនាមព្រះអង្គ គឺព្រះអង្គដែលបានបង្កើតផ្ទៃមេឃ និងផែនដី។

(បទពាក្យ ៧)

^១-	ប្រសិនបើគ្មានព្រះអម្ចាស់	មិនជួយសន្តោសគាំទ្រទេ
	សូមអ៊ីស្រាអែលពោលហូរហែរ	ពោលកុំទំនេរតាមយើងថា	។
^២-	ប្រសិនបើគ្មានព្រះអម្ចាស់	នៅខាងយើងនោះគ្រប់វេលា
	ពេលណាសត្រូវលើកគ្នីគ្នា	សម្រុកពុះពារវាយលើយើង	។
^៣-	ពេលណាគេមានកំហឹងខ្លាំង	គេមកប្រឆាំងយើងនឹងប៉ើង
	គេនឹងត្របាក់លេបពួកយើង	មិនឱ្យរស់បានសុខសាន្តឡើយ	។
^៤-	យើងនឹងលិចលង់ក្នុងសមុទ្រ	ភិតភ័យតក់ស្លុតឥតមានស្បើយ
	ទឹកហូរនាំយើងគ្មានកោះត្រើយ	ទៅកាន់ទីឆ្ងាយគ្មានគោលដៅ	។
^៥-	ពេលយើងកំពុងអស់កម្លាំង	មានទឹកកួចខ្លាំងពន្លិចទៅ
	ដល់បាតជលសាដ៏សែនជ្រៅ	ជីវិតយើងត្រូវលង់ក្សិណក្ស័យ	។
^៦-	សូមលើកតម្កើងព្រះអម្ចាស់	ដ្បិតទ្រង់ជាព្រះមានបារមី
	ទ្រង់ពុំប្រគល់យើងក្នុងដៃ	ធ្វើរំពានៃពួកនោះឡើយ	។
^៧-	យើងរួចជីវិតដូចបក្សី	គេចផុតពីដៃព្រានព្រៃហើយ
	គឺលប់ធ្លុះធ្លាយគ្មានសល់ឡើយ	យើងបានធូរស្បើយរស់ជីវ៉ា	។
^៨-	ព្រះអម្ចាស់បានសង្គ្រោះយើង	ដោយព្រះនាមថ្កើងមានចេស្តា
	គឺព្រះអង្គដែលមានមេត្តា	បង្កើតមេឃានិងផែនដី	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ ព្រះអម្ចាស់ផ្ទាល់បានជួយយើង ដោយព្រះនាមព្រះអង្គ គឺព្រះអង្គដែលបានបង្កើតផ្ទៃមេឃ និងផែនដី។

បទលើកតម្កើងតាមលិខិតអេភេសូ (អភ ១,៣-១០)

ព្រះជាម្ចាស់ជាព្រះសង្រ្គោះរបស់យើង

បន្ទរទី៣ ៖ ព្រះជាម្ចាស់បានតម្រូវយើងទុកជាមុន ឲ្យធ្វើជាបុត្រធីតារបស់ព្រះអង្គ ដោយសារព្រះបុត្រាព្រះអង្គ។

^៣	សូមលើកតម្កើងព្រះជាម្ចាស់ ជាព្រះបិតារបស់ព្រះយេស៊ូគ្រីស្ត ជាព្រះអម្ចាស់នៃយើង ដែលបានប្រោសប្រទានព្រះពរគ្រប់យ៉ាង ផ្នែកខាងវិញ្ញាណពីស្ថានបរមសុខមកយើង ក្នុងអង្គព្រះគ្រីស្ត។
^៤	ព្រះអង្គបានជ្រើសរើសយើងក្នុងអង្គព្រះគ្រីស្ត តាំងពីមុនកំណើតពិភពលោកមកម៉្លេះ ដើម្បីឱ្យយើងបានវិសុទ្ធ និងឥតសៅហ្មង នៅចំពោះព្រះភក្ត្រព្រះអង្គ ព្រោះព្រះអង្គមានព្រះហឫទ័យស្រឡាញ់យើង។
^៥	ព្រះអង្គបានតម្រូវយើងទុកជាមុន ឱ្យធ្វើជាបុត្រធីតារបស់ព្រះអង្គ ដោយសារព្រះយេស៊ូគ្រីស្ត ស្របនឹងបំណងដ៏សប្បុរសរបស់ព្រះអង្គ
^៦	ដើម្បីឱ្យយើងលើកតម្កើងសិរីរុងរឿងនៃព្រះហឫទ័យប្រណីសន្តោស ដែលទ្រង់បានប្រោសប្រទានមកយើង ក្នុងអង្គព្រះបុត្រាដ៏ជាទីស្រឡាញ់របស់ព្រះអង្គ។
^៧	ដោយយើងរួមក្នុងអង្គព្រះគ្រីស្តនេះ ព្រះជាម្ចាស់បានលោះយើង ដោយព្រះលោហិតរបស់ព្រះអង្គ និងលើកលែងទោសឱ្យយើងបានរួចពីបាប តាមព្រះហឫទ័យប្រណីសន្តោសដ៏លើសលប់របស់ព្រះអង្គ។
^៨	ព្រះជាម្ចាស់ប្រណីសន្តោសយើងយ៉ាងខ្លាំងបំផុត គឺទ្រង់ប្រទានឱ្យយើងមានតំរិះ និងមានប្រាជ្ញាដ៏វាងវៃគ្រប់យ៉ាង។
^៩	ព្រះអង្គបានប្រោសឱ្យយើងស្គាល់ពីគម្រោងការដ៏លាក់កំបាំង នៃព្រះហឫទ័យរបស់ព្រះអង្គ តាមព្រះបំណងដ៏សប្បុរស ដែលទ្រង់បានសម្រេចទុកជាមុន ដោយព្រះអង្គផ្ទាល់។
^១០	ព្រះអង្គចាត់ចែងគម្រោងការនេះឱ្យបានសម្រេច នៅគ្រាចុងក្រោយបំផុត គឺប្រមូលអ្វីៗទាំងអស់ ដែលនៅស្ថានបរមសុខ និងនៅលើផែនដី ឱ្យរួមគ្នានៅក្នុងអង្គព្រះគ្រីស្ត ជាម្ចាស់តែមួយ។

បន្ទរ ៖ ព្រះជាម្ចាស់បានតម្រូវយើងទុកជាមុន ឲ្យធ្វើជាបុត្រធីតារបស់ព្រះអង្គ ដោយសារព្រះបុត្រាព្រះអង្គ។

ព្រះបន្ទូលរបស់ព្រះជាម្ចាស់ (រ៉ូម ១២,១-២)

ហេតុនេះ បង‌ប្អូនអើយ ខ្ញុំសូមដាស់‌តឿនបង‌ប្អូនថា ដោយព្រះ‌ជាម្ចាស់ មានព្រះ‌ហឫទ័យអាណិត‌អាសូរបង‌ប្អូន ចូរថ្វាយខ្លួនទៅព្រះ‌អង្គ ទុកជាយញ្ញ‌បូជាដ៏មានជីវិតដ៏‌វិសុទ្ធ ហើយជាទីគាប់ព្រះ‌ហឫទ័យរបស់ព្រះ‌ជាម្ចាស់។ បើបង‌ប្អូនធ្វើដូច្នេះ ទើបហៅថាគោរពបម្រើព្រះ‌អង្គតាមរបៀបត្រឹមត្រូវមែន។ មិនត្រូវយកតម្រាប់តាមលោកីយ៍នេះឡើយ ត្រូវទុកឲ្យព្រះ‌ជាម្ចាស់ កែប្រែចិត្តគំនិតបង‌ប្អូន ឲ្យទៅជាថ្មីទាំងស្រុងវិញ ដើម្បីឲ្យបង‌ប្អូនចេះពិចារណាមើលថា ព្រះ‌ជាម្ចាស់សព្វព្រះ‌ហឫទ័យនឹងអ្វីខ្លះ គឺអ្វីដែលល្អ ដែលគាប់ព្រះ‌ហឫទ័យព្រះ‌អង្គ និងគ្រប់លក្ខណៈ។

បន្ទរ៖ ខ្ញុំទូលព្រះ‌អម្ចាស់ថា *ព្រះ‌អង្គអើយសូមប្រណីមេត្តាទូល‌បង្គំ។ បន្ទរឡើងវិញ៖…
-សូមប្រោសទូល‌បង្គំឲ្យជាឡើងវិញផង ដ្បិតយើងខ្ញុំបានប្រព្រឹត្តអំពើបាប ទាស់នឹងព្រះ‌ហប្ញទ័យរបស់ព្រះ‌អង្គ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ ព្រះ‌អង្គយាងចេញពីកណ្ដាលចំណោមគេបាត់ទៅ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ព្រះ‌អង្គយាងចេញពីកណ្ដាលចំណោមគេបាត់ទៅ។

ពាក្យអង្វរសកល

ព្រះអម្ចាស់យេស៊ូគ្រីស្តបានសង្រ្គោះយើងឱ្យរួចផុតពីបាប។ ដោយយើងជាប្រជារាស្រ្តព្រះអង្គ យើងទូលព្រះអង្គថា ៖

បន្ទរ ៖ ឱព្រះយេស៊ូជាព្រះរាជវង្សព្រះបាទដាវីឌអើយ ! សូមអាណិតមេត្តាយើងខ្ញុំផង !

បពិត្រព្រះគ្រីស្តជាអម្ចាស់ ! យើងខ្ញុំសូមទូលអង្វរព្រះអង្គសម្រាប់ព្រះសហគមន៍ដ៏វិសុទ្ធ ដែលព្រះអង្គបានប្រទានរូបកាយរបស់ព្រះអង្គ ដើម្បីធ្វើឱ្យព្រះសហគមន៍បានវិសុទ្ធ ដោយការលាងជម្រះនឹងទឹក និងព្រះបន្ទូលដែលផ្តល់ជីវិត
—សូមព្រះអង្គបន្តជម្រះព្រះសហគមន៍ឱ្យបានវិសុទ្ធ ដោយការសោកស្តាយនូវកំំហុសដែលខ្លួនបានប្រព្រឹត្ត។ (បន្ទរ)

ឱព្រះគ្រូដ៏សប្បុរសអើយ ! សូមព្រះអង្គបង្ហាញផ្លូវដល់មនុស្សវ័យក្មេង ដែលព្រះអង្គបានជ្រើសរើសសម្រាប់ពួកគេម្នាក់ៗ
—សូមឱ្យពួកគេដើរតាមមាគ៌ានោះ និងស្វែងរកធ្វើតាមព្រះហឫទ័យព្រះអង្គ។ (បន្ទរ)

ដោយព្រះហឫទ័យមេត្តាករុណារបស់ព្រះអង្គ ទ្រង់បានព្យាបាលជំងឺគ្រប់ប្រភេទឱ្យបានជាសះស្បើយ សូមព្រះអង្គនាំសេចក្តីសង្ឃឹមដល់អ្នកជំងឺ និងលើកពួកគេឱ្យក្រោកឈរឡើងវិញ
—សូមបង្រៀនយើងខ្ញុំឱ្យចេះស្រឡាញ់ និងយកចិត្តទុកដាក់ថែរក្សាពួកគេផង។ (បន្ទរ)

សូមព្រះអង្គប្រោសឱ្យយើងខ្ញុំចេះគិតអំពីតម្លៃនៃសេចក្តីថ្លៃថ្នូរ ដែលព្រះអង្គបានប្រទានឱ្យយើងខ្ញុំក្នុងអគ្គសញ្ញាជ្រមុជទឹក
—សូមឱ្យយើងខ្ញុំរស់នៅសម្រាប់ព្រះអង្គគ្រប់វិនាទី។ (បន្ទរ)

សូមឱ្យមរណបុគ្គលរស់ឡើងវិញប្រកបដោយសិរីរុងរឿង ក្នុងសេចក្តីសុខសាន្តរបស់ព្រះអង្គ
—សូមប្រទានឱ្យយើងខ្ញុំបានចូលរួមជាមួយពួកគេ ក្នុងព្រះរាជ្យព្រះអង្គផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះអម្ចាស់អើយ ! ប្រសិនបើព្រះអង្គមិនជួយការពារទេនោះ ព្រះសហគមន៍គ្មានសេចក្តីសុខសាន្តឡើយ។ សូមព្រះអង្គមេត្តាសម្តែងធម៌មេត្តាករុណារបស់ព្រះអង្គចំពោះយើងខ្ញុំ ដោយជម្រះឲ្យយើងខ្ញុំបានស្អាតបរិសុទ្ធ ព្រមទាំងថែរក្សា និងណែនាំព្រះសហគមន៍របស់ព្រះអង្គគ្រប់ពេលវេលា។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

17 Views

Post Views: 17