រដូវសែសិបថ្ងៃ សប្តាហ៍ទី៣ ថ្ងៃអាទិត្យ

Posted on 23 ខែមីនា 202521 ខែកុម្ភៈ 2025 by Siya Khim

រដូវសែសិបថ្ងៃ

(សន្តទូរីប៉ីយូ ជាអភិបាលព្រះសហគមន៍ម៉ូហ្រ្កូវេយ៉ូ)

ថ្ងៃអាទិត្យ អាទិត្យទី៣
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១០,១-៥.៧

ព្រះមេស្ស៊ី ជាព្រះមហាក្សត្រ និងជាបូជាចារ្យ

ព្រះគ្រីស្តត្រូវតែគ្រងរាជ្យ ទម្រាំដល់ព្រះជាម្ចាស់បង្ក្រាបខ្មាំងសត្រូវទាំងប៉ុន្មាន មកដាក់ក្រោមព្រះបាទារបស់ព្រះអង្គ (១ករ ១៥,២៥)។

បន្ទរទី១៖ ឱព្រះជាអម្ចាស់អើយ សូមរំដោះយើងខ្ញុំដោយយល់ដល់ព្រះនាមព្រះអង្គ។ សូមប្រទានព្រះហឫទ័យប្រណីសន្តោសមកយើងខ្ញុំ ដើម្បីឱ្យយើងខ្ញុំវិលត្រឡប់មករកព្រះអង្គវិញ។

^១	ព្រះអម្ចាស់មានព្រះបន្ទូលមកកាន់ព្រះរាជា ជាអម្ចាស់របស់ខ្ញុំថា ៖ “សូមគង់នៅខាងស្តាំយើង ទម្រាំដល់យើងបង្រ្កាបខ្មាំងសត្រូវរបស់ព្រះអង្គ មកដាក់ក្រោមព្រះបាទារបស់ព្រះអង្គ!”។
^២	សូមព្រះអង្គប្រោសប្រទានឱ្យព្រះរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះករុណាបង្ក្រាបខ្មាំងសត្រូវដែលនៅជុំវិញ!
^៣	នៅថ្ងៃព្រះករុណាកេណ្ឌទ័ពទៅច្បាំង ប្រជារាស្ត្រចូលរួមដោយស្ម័គ្រចិត្ត ពួកយុវជននាំគ្នាចូលគាល់ព្រះករុណា នៅលើភ្នំដ៏វិសុទ្ធ ប្រៀបដូចជាទឹកសន្សើមនៅពេលព្រឹកព្រលឹម។
^៤	ព្រះអម្ចាស់មានព្រះបន្ទូលសន្យា ដោយឥតប្រែប្រួលថា ៖ “ព្រះអង្គជាបូជាចារ្យអស់កល្បតរៀងទៅ តាមរបៀបស្តេចមែលគីសេដែក”។
^៥	ព្រះអម្ចាស់គង់នៅខាងស្តាំព្រះករុណា នៅថ្ងៃដែលព្រះអង្គទ្រង់ព្រះពិរោធ ព្រះអង្គកម្ទេចស្តេចនានា។
^៧	នៅតាមផ្លូវ ព្រះរាជាសោយទឹកជ្រោះ រួចហើយ ព្រះអង្គងើបព្រះភក្ត្រប្រកបដោយជោគជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ឱព្រះជាអម្ចាស់អើយ សូមរំដោះយើងខ្ញុំដោយយល់ដល់ព្រះនាមព្រះអង្គ។ សូមប្រទានព្រះហឫទ័យប្រណីសន្តោសមកយើងខ្ញុំ ដើម្បីឱ្យយើងខ្ញុំវិលត្រឡប់មករកព្រះអង្គវិញ។

ទំនុកតម្កើងលេខ ១១១

ស្នាព្រះហស្ដដ៏អស្ចារ្យរបស់ព្រះ‌អម្ចាស់

ឱព្រះជាអម្ចាស់ដ៏មានព្រះចេស្តាលើអ្វីៗទាំងអស់អើយ ! ស្នាព្រះហស្តរបស់ព្រះអង្គប្រសើរឧត្តម គួរឱ្យស្ញប់ស្ញែងពន់ពេកណាស់ (វវ ១៥,៣)។

បន្ទរទី២៖ យើងបានទទួលការប្រោសលោះ ដោយសារព្រះលោហិតដ៏ថ្លៃវិសេសរបស់ព្រះគ្រីស្ត ដែលប្រៀបបាននឹងកូនចៀមដ៏ល្អឥតខ្ចោះ ឥតស្លាកស្នាម។

(បទពាក្យ ៧)

^១-	ចូរលើកតម្កើងព្រះជាម្ចាស់	ប្រសើរពេកណាស់លើលោកា
	ខ្ញុំថ្កើងព្រះអង្គហួសសិរសា	ក្នុងហ្វូងមនុស្សម្នាដែលទៀងត្រង់	។
^២-	គ្រប់ស្នាព្រះហស្តព្រះអម្ចាស់	ប្រសើរពេកណាស់ខ្ពស់ឧត្តុង
	អ្នកពេញចិត្តស្នាព្រះហស្តទ្រង់	ស្វះស្វែងយល់ផងកុំរារែក	។
^៣-	គ្រប់ស្នាព្រះហស្តបានបញ្ចោញ	រស្មីចិញ្ចែងភ្លឺអនេក
	សេចក្តីសុចរិតល្អពន់ពេក	មិនប្រេះបាក់បែកនៅរហូត	។
^៤-	ព្រះអង្គទ្រង់សព្វព្រះហឫទ័យ	ឱ្យយើងស្រមៃមិនរលត់
	ដល់ការអស្ចារ្យខ្ពស់បំផុត	ហឫទ័យអាណិតចិត្តអាសូរ	។
^៥-	ព្រះអង្គប្រទានទាំងអាហារ	ដល់អ្នកវេទនាស្រែកទ្រហោ
	អ្នកដែលកោតខ្លាចទ្រង់អាសូរ	សម្ពន្ធមានយូរធ្លាប់មេត្រី	។
^៦-	ព្រះអង្គសម្តែងអានុភាព	ឱ្យរាស្ត្រជ្រួតជ្រាបឥតសង្ស័យ
	គឺព្រះអង្គបានឱ្យទឹកដី	ប្រជាដទៃមកពួកគេ	។
^៧-	គ្រប់ស្នាព្រះហស្តព្រះអង្គធ្វើ	សុទ្ធតែអំពើល្អឥតរេ
	សុចរិតយុត្តិធម៌ឥតប្រួលប្រែ	ដូច្នេះគួរតែជឿទាំងស្រុង	។
^៨-	បញ្ហាទាំងនោះឥតចន្លោះ	មិនបាត់មួយសោះស្ថិតគង់វង្ស
	សុចរិតល្អល្អះភ្លឺត្រចង់	ក្តីពិតទៀងត្រង់យ៉ាងប្រពៃ	។
^៩-	ព្រះអង្គរំដោះប្រជារាស្ត្រ	ពួកគេទាំងអស់មានសិរី
	ទ្រង់បានចងសម្ពន្ធមេត្រី	នឹងរាស្ត្រប្រុសស្រីរហូតទៅ	។
	ព្រះនាមព្រះអង្គគង់ទីខ្ពស់	វិសុទ្ធឥតមោះឥតហ្មងសៅ
	បារមីគួរស្ញែងខ្លាចពេកកូវ	រាល់យប់ថ្ងៃត្រូវតែគោរព	។
^១០-	អ្នកណាដែលចង់មានប្រាជ្ញា	គួរតែគិតថាមានប្រភព
	ប្រាជ្ញានឹងកើតមានសព្វគ្រប់	បើអ្នកគោរពខ្លាចព្រះម្ចាស់	។
	អ្នកដែលធ្វើតាមប្រាជ្ញានេះ	គេអាចត្រិះរិះបានល្អល្អះ
	យើងសូមតម្កើងព្រះអម្ចាស់	ជាព្រះខ្ពង់ខ្ពស់រហូតទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ យើងបានទទួលការប្រោសលោះ ដោយសារព្រះលោហិតដ៏ថ្លៃវិសេសរបស់ព្រះគ្រីស្ត ដែលប្រៀបបាននឹងកូនចៀមដ៏ល្អឥតខ្ចោះ ឥតស្លាកស្នាម។

បទលើកតម្កើងតាមលិខិតរបស់លោកសិលា (១សល ២,២១-២៤)

ព្រះគ្រិស្តជាអ្នកបម្រើរបស់ព្រះជាម្ចាស់ ព្រះអង្គទទួលយកទុក្ខលំបាក ដោយមានសេរីភាព

បន្ទរទី៣ ៖ លោកបានរងទុក្ខវេទនាជំនួសយើង លោកទទួលយកការឈឺចាប់របស់យើងមកដាក់លើខ្លួនលោក។

^២១	ព្រះអង្គត្រាស់ហៅបងប្អូនមកឲ្យរងទុក្ខលំបាកយ៉ាងនេះ ព្រោះព្រះ‌គ្រីស្តក៏បានរងទុក្ខលំបាកសម្រាប់បងប្អូន ទុកជាគំរូឲ្យបងប្អូនដើរតាមគន្លងរបស់ព្រះអង្គដែរ។
^២២	ព្រះអង្គពុំដែលបានប្រព្រឹត្តអំពើបាបសោះ ហើយក៏ពុំដែលមានព្រះបន្ទូលវៀចវេរណា ចេញពីព្រះឱស្ឋរបស់ព្រះអង្គឡើយ។
^២៣	ទោះបីគេជេរប្រមាថព្រះអង្គ ក៏ព្រះអង្គមិនតបតទៅគេវិញដែរ ព្រះអង្គបានរងទុក្ខលំបាក តែព្រះអង្គពុំបានគំរាមកំហែងគេវិញទេ ព្រះអង្គផ្ញើជីវិតទៅលើព្រះជាម្ចាស់ ដែលព្រះអង្គវិនិច្ឆ័យដោយយុត្តិធម៌។
^២៤	ព្រះគ្រីស្តបានផ្ទុកបាបរបស់យើងក្នុងព្រះកាយរបស់ព្រះអង្គ ដែលជាប់លើឈើឆ្កាង ដើម្បីឲ្យយើងលែងជំពាក់‌ជំពិននឹងបាបតទៅមុខទៀត ហើយឲ្យយើងមានជីវិត ដោយប្រព្រឹត្តតែអំពើសុចរិត។ បងប្អូនបានជាសះ‌ស្បើយ ដោយសារស្នាមរបួសរបស់ព្រះអង្គ។

បន្ទរ ៖ លោកបានរងទុក្ខវេទនាជំនួសយើង លោកទទួលយកការឈឺចាប់របស់យើងមកដាក់លើខ្លួនលោក។

ព្រះបន្ទូលរបស់ព្រះជាម្ចាស់ (១ករ ៩,២៤-២៧)

បងប្អូនជ្រាបស្រាប់ហើយថា អស់អ្នកដែលរត់ប្រណាំងនៅកីឡា‌ដ្ឋាន គេរត់ទាំងអស់គ្នា ប៉ុន្តែ មានតែម្នាក់ប៉ុណ្ណោះ ដែលបានទទួលរង្វាន់។ សូមបង‌ប្អូនរត់តាមរបៀបនោះដែរទៅ ដើម្បីឲ្យបានទទួលរង្វាន់។ អ្នកប្រកួតកីឡាទាំងអស់តែង‌តែលត់‌ដំខ្លួន ដោយធ្វើតាមក្បួនតំរាគ្រប់យ៉ាង ដើម្បីឲ្យបានទទួលភួងជ័យ ដែលនឹងរលាយសាប‌សូន្យទៅ។ រីឯយើងវិញ យើងនឹងទទួលភួងជ័យ ដែលមិនចេះរលាយសាប‌សូន្យឡើយ។ ហេតុនេះ ចំពោះរូបខ្ញុំ ខ្ញុំមិនរត់ដូចជាមិនស្គាល់ទី‌ដៅនោះទេ ខ្ញុំក៏មិនប្រដាល់ខ្យល់ដែរ។ ផ្ទុយទៅវិញ ខ្ញុំលត់‌ដំរូបកាយខ្ញុំយ៉ាងតឹង‌តែង ហើយខ្ញុំធ្វើម្ចាស់លើរូបកាយខ្លួនឯង ក្រែងលោក្រោយពីបានផ្សាយដំណឹង‌ល្អដល់អ្នកឯទៀតៗហើយ ខ្លួនខ្ញុំផ្ទាល់បែរជាត្រូវគេផាត់ចោលទៅវិញ។

បន្ទរ៖ ឱព្រះ‌អម្ចាស់អើយ! សូមព្រះសណ្តាប់ និងអាណិត‌អាសូរយើងខ្ញុំផង! *ដ្បិតយើងខ្ញុំបានប្រព្រឹត្តអំពើបាប ទាស់នឹងព្រះ‌ហប្ញទ័យរបស់ព្រះ‌អង្គ។ បន្ទរឡើងវិញ៖…
-សូមព្រះគ្រីស្តយេស៊ូសណ្តាប់ពាក្យអង្វររបស់យើងខ្ញុំ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ ព្រះ‌យេស៊ូមានព្រះ‌បន្ទូលទៅនាងថា៖ រីឯអ្នកដែលពិសាទឹកខ្ញុំឲ្យនោះ នឹងមិនស្រេកទៀតសោះឡើយ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ព្រះ‌យេស៊ូមានព្រះ‌បន្ទូលទៅនាងថា៖ រីឯអ្នកដែលពិសាទឹកខ្ញុំឲ្យនោះ នឹងមិនស្រេកទៀតសោះឡើយ។

ពាក្យអង្វរសកល

ចូរលើកតម្កើងព្រះជាម្ចាស់ជាព្រះបិតា ព្រះអង្គបាននាំប្រជាជនដែលព្រះអង្គបានជ្រើសរើសឱ្យកើតជាថ្មី ចេញពីគ្រាប់ពូជដែលមិនចេះរលួយ តាមរយៈព្រះបន្ទូលដែលគង់នៅអស់កល្បជានិច្ច។ ដោយយើងជាបុត្រធីតាព្រះអង្គ យើងទូលសូមព្រះអង្គថា ៖

បន្ទរ ៖ បពិត្រព្រះអម្ចាស់ ! សូមព្រះអង្គប្រោសប្រណីប្រជារាស្រ្តព្រះអង្គផង !

បពិត្រព្រះជាម្ចាស់នៃព្រះហឫទ័យមេត្តាករុណា! សូមព្រះអង្គសណ្តាប់ពាក្យអធិដ្ឋានរបស់យើងខ្ញុំដែលថ្វាយទៅព្រះអង្គ សម្រាប់ប្រជាជនទាំងមូល
—សូមឱ្យពួកគេស្រេកឃ្លានព្រះបន្ទូលព្រះអង្គ ខ្លាំងជាងអាហារខាងរូបកាយផង។ (បន្ទរ)

សូមព្រះអង្គប្រទានឱ្យយើងខ្ញុំមានចិត្តស្មោះត្រង់ និងមានសេចក្តីស្រឡាញ់យ៉ាងក្លៀវក្លាចំពោះប្រជាជាតិរបស់យើងខ្ញុំ និងមនុស្សទាំងអស់
—សូមឱ្យយើងខ្ញុំប្រព្រឹត្តកិច្ចការណាដែលជួយកសាងពិភពលោក ក្នុងសេចក្តីសុខសាន្ត និងសេចក្តីសប្បុរស។ (បន្ទរ)

សូមព្រះអង្គទតមកដោយព្រះហឫទ័យស្រឡាញ់ចំពោះអស់អ្នកដែលបានកើតជាថ្មី ក្នុងអគ្គសញ្ញាជ្រមុជទឹក
—ដើម្បីឱ្យពួកគេបានធ្វើជាថ្មគ្រឹះដ៏មានជីវិត ក្នុងព្រះដំណាក់នៃព្រះវិញ្ញាណដ៏វិសុទ្ធ។ (បន្ទរ)

ព្រះអង្គបានធ្វើឱ្យអ្នកក្រុងនីនីវេកែប្រែចិត្តគំនិត ដោយសារសេចក្តីប្រៀនប្រដៅរបស់ព្យាការីយ៉ូណាស
—ដោយព្រះហឫទ័យមេត្តាករុណារបស់ព្រះអង្គ សូមព្រះអង្គប៉ះពាល់ចិត្តអ្នកបាប ដោយការប្រកាសព្រះបន្ទូលនៃព្រះអង្គផង។ (បន្ទរ)

សូមឱ្យអស់អ្នកដែលបានចែកឋានទៅហើយ មានសង្ឃឹមថានឹងបានជួបជាមួយព្រះគ្រីស្ត ដែលជាចៅក្រមរបស់ពួកគេ
—សូមឱ្យពួកគេមានអំណររីករាយជារៀងរហូត ក្នុងសិរីរុងរឿងរបស់ព្រះអង្គ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះជាម្ចាស់អើយ ! ព្រះអង្គសព្វព្រះហឫទ័យប្រទានព្រះជន្មផ្ទាល់របស់ព្រះអង្គ ឲ្យអស់អ្នកដែលផ្ញើជីវិតទៅលើព្រះយេស៊ូគ្រីស្តជាព្រះបុត្រាព្រះអង្គ។ សូមព្រះអង្គប្រទានព្រះអំណោយទានដ៏អស្ចារ្យនេះដល់អស់បងប្អូនយើងខ្ញុំ ដែលត្រៀមខ្លួនទទួលអគ្គសញ្ញាជ្រមុជទឹក ក្នុងឱកាសបុណ្យចម្លងខាងមុខ។
យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

18 Views

Post Views: 18