រដូវបុណ្យចម្លង សប្តាហ៍ទី៤ ថ្ងៃអង្គារ

Posted on 13 ខែឧសភា 202524 ខែមីនា 2025 by Siya Khim

រដូវបុណ្យចម្លង

(ព្រះនាងម៉ារីនៅហ្វាទីម៉ា)

ថ្ងៃអង្គារ អាទិត្យទី៤
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១៣៧,១-៦

ទន្លេនៃស្រុកបាប៊ីឡូន

ការជាប់ឃុំឃាំងនៅស្រុកបាប៊ីឡូន គឺជាប្រភេទនៃការជាប់ឃុំឃាំងខាងវិញ្ញាណរបស់យើង (សន្តហ៊ីលឡារី)។

បន្ទរទី១ ៖ «ចូរនាំគ្នាច្រៀងបទខ្លះពីក្រុងស៊ីយ៉ូនឱ្យយើងស្ដាប់ផង!» អាលេលូយ៉ា!

^១	យើងអង្គុយនៅមាត់ទន្លេស្រុកបាប៊ីឡូន នាំគ្នាយំស្រណោះក្រុងស៊ីយ៉ូន។
^២	យើងភ្ជួរពិណរបស់យើងនឹងដើមឈើ នៅជិតមាត់ទន្លេ។
^៣	ពេលនោះ ពួកអ្នកដែលចាប់យើងមកជាឈ្លើយសឹក បានសុំឱ្យយើងច្រៀង ពួកអ្នកធ្វើទោសយើង បានសុំឱ្យយើងច្រៀងបទសប្បាយ គេពោលថា: «ចូរនាំគ្នាច្រៀងបទខ្លះពីក្រុងស៊ីយ៉ូនឱ្យយើងស្ដាប់ផង!» ។
^៤	តើឱ្យយើងច្រៀងបទតម្កើងថ្វាយព្រះអម្ចាស់ នៅលើទឹកដីបរទេសដូចម្តេចកើត?
^៥	ឱក្រុងយេរូសាឡឹមអើយ ! បើខ្ញុំភ្លេចអ្នក សូមឱ្យដៃស្តាំរបស់ខ្ញុំស្ពឹកចុះ !
^៦	ប្រសិនបើខ្ញុំមិននឹកដល់អ្នកទេ ហើយប្រសិនបើខ្ញុំមិនចាត់ទុកអ្នក ជាអំណរដ៏ខ្លាំងក្លាបំផុតរបស់ខ្ញុំទេនោះ សូមឱ្យអណ្ដាតខ្ញុំរឹងទៅចុះ !

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ «ចូរនាំគ្នាច្រៀងបទខ្លះពីក្រុងស៊ីយ៉ូនឱ្យយើងស្ដាប់ផង!» អាលេលូយ៉ា!

ទំនុកតម្កើងលេខ ១៣៨

ពាក្យអរព្រះគុណ

ជាតិសាសន៍នានា នឹងដើរក្នុងពន្លឺរបស់ក្រុងនោះ ហើយស្តេចនានានឹងនាំរាជទ្រព្យចូលមកក្នុងក្រុងនោះដែរ (វវ ២១,២៤)។

បន្ទរទី២ ៖ នៅពេលទូលបង្គំមានទុក្ខវេទនា ព្រះបន្ទូលសន្យារបស់ព្រះអង្គបានធ្វើឱ្យទូលបង្គំមានជីវិតឡើងវិញ អាលេលូយ៉ា!

(បទកាកគតិ)

^១-	ខ្ញុំសូមតម្កើង	ព្រះម្ចាស់ខ្ពស់ឡើង	អស់ពីដួងចិត្ត
	នៅមុខទេវតា	ទូលបង្គំស្មូតបទ	តម្កើងថ្វាយថ្វាត់
		ដល់ព្រះអង្គថ្លៃ	។
^២-	ខ្ញុំក្រាបបែរមុខ	តម្រង់ទៅរក	វិហារប្រពៃ
	ខ្ញុំលើកតម្កើង	ព្រះនាមថ្លាថ្លៃ	ដោយព្រះហឫទ័យ
		ស្មោះស្ម័គ្រឥតស្បើយ	។
^៣-	នៅថ្ងៃដែលខ្ញុំ	ស្រែកអង្វរសុំ	ព្រះអង្គតបឆ្លើយ
	ព្រះអង្គប្រទាន	ឥតមានកន្តើយ	ឱ្យខ្ញុំបានស្បើយ
		ក្នុងចិត្តក្លាហាន	។
^៤-	ឱព្រះម្ចាស់អើយ	សូមទ្រង់ផ្តល់ឱ្យ	ស្តេចទាំងប៉ុន្មាន
	នៅលើផែនដី	នាំគ្នាគ្រប់ប្រាណ	តម្កើងពេលបាន
		ឮទ្រង់សន្យា	។
^៥-	សូមឱ្យគេនាំ	គ្នីគ្នាច្រៀងរាំ	តម្កើងកិច្ចការ
	ថាព្រះអម្ចាស់	រុងរឿងអស្ចារ្យ	ឧត្តមថ្លៃថ្លា
		បំផុតគ្មានពីរ	។
^៦-	ទោះបីព្រះម្ចាស់	ខ្ពង់ខ្ពស់ពេកណាស់	ក៏ទ្រង់សំភី
	គិតមនុស្សលោក	គ្រប់វិនាទី	មនុស្សកាចយាយី
		ទ្រង់ស្គាល់ពីឆ្ងាយ	។
^៧-	ពេលទូលបង្គំ	ជួបអាសន្នធំ	ទ្រង់ឥតជិនណាយ
	ជួយការពារខ្ញុំ	វាយខ្មាំងខ្ចាត់ខ្ចាយ	សង្គ្រោះខ្ញុំដោយ
		ឫទ្ធីបារមី	។
^៨-	បពិត្រព្រះម្ចាស់	ការគ្រប់យ៉ាងនេះ	ពិតជាប្រពៃ
	ព្រះអង្គប្រកប	ដោយព្រះហឫទ័យ	ករុណាក្រៃ
		ឥតបីបោះបង់	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ ៖ នៅពេលទូលបង្គំមានទុក្ខវេទនា ព្រះបន្ទូលសន្យារបស់ព្រះអង្គបានធ្វើឱ្យទូលបង្គំមានជីវិតឡើងវិញ អាលេលូយ៉ា!

បទលើកតម្កើងតាមគម្ពីរវិវរណៈ (វវ ៤,១១.៥,៩-១០.១២)

ទំនុកតម្កើងការប្រោសលោះ

បន្ទរទី៣ ៖ ព្រះអម្ចាស់អើយ ព្រះអង្គជាព្រះដ៏ឧត្តុង្គ‌ឧត្ដម ប្រកបដោយឫទ្ធានុភាព ព្រះបារមី តេជានុភាព និងសិរី‌រុងរឿង អាលេលូយ៉ា!

^១១	“បពិត្រព្រះអម្ចាស់ជាព្រះនៃយើងខ្ញុំ ព្រះអង្គសមនឹងទទួលសិរីរុងរឿង ព្រះកិត្តិនាម និងឫទ្ធានុភាព ដ្បិតព្រះអង្គបានបង្កើតរបស់សព្វសារពើមក អ្វីៗទាំងអស់សុទ្ធតែកើតមាន ហើយនៅស្ថិតស្ថេរ ដោយសារព្រះហឫទ័យរបស់ព្រះអង្គ” ។
^៩	គេនាំគ្នាច្រៀងបទចម្រៀងថ្មីថា ៖ “ព្រះអង្គសមនឹងទទួលក្រាំង ហើយបកត្រាផង ព្រោះទ្រង់ត្រូវគេសម្លាប់ធ្វើយញ្ញបូជា ព្រះអង្គបានលោះមនុស្សពីគ្រប់ពូជ គ្រប់ភាសា គ្រប់ប្រជាជន និងពីគ្រប់ជាតិសាសន៍ យកមកថ្វាយព្រះជាម្ចាស់ ដោយសារព្រះលោហិតរបស់ព្រះអង្គ។
^១០	ព្រះអង្គបានធ្វើឱ្យគេទៅជារាជាណាចក្រ និងជាក្រុមបូជាចារ្យ បម្រើព្រះជាម្ចាស់របស់យើង ហើយអ្នកទាំងនោះនឹងគ្រងរាជ្យលើផែនដី” ។
^១២	នាំគ្នាបន្លឺសំឡេងយ៉ាងខ្លាំងៗថា៖ កូនចៀមដែលគេសម្លាប់ធ្វើយញ្ញបូជា ទ្រង់សមនឹងទទួលឫទ្ធានុភាព រាជសម្បត្តិ ព្រះប្រាជ្ញាញាណ ឥទ្ធិឫទ្ធិ ព្រះកិត្តិនាម សិរីរុងរឿង និងការសរសើរតម្កើង” ។

បន្ទរ ៖ ព្រះអម្ចាស់អើយ ព្រះអង្គជាព្រះដ៏ឧត្តុង្គ‌ឧត្ដម ប្រកបដោយឫទ្ធានុភាព ព្រះបារមី តេជានុភាព និងសិរី‌រុងរឿង អាលេលូយ៉ា!

ព្រះបន្ទូលរបស់ព្រះជាម្ចាស់ (១សល ២,៤-៥)

សូមបង‌ប្អូនចូលមកជិតព្រះ‌គ្រីស្ត ជាសិលាដ៏មានជីវិត ជាសិលាដែលមនុស្សលោកបានបោះបង់ចោល តែព្រះ‌ជាម្ចាស់បានរើសយក ព្រោះព្រះ‌អង្គឈ្វេងយល់ថាមានតម្លៃវិសេស។ រីឯបង‌ប្អូនវិញ បង‌ប្អូនប្រៀបបាននឹងថ្មដ៏មានជីវិតដែរ ដូច្នេះ ចូរផ្គុំគ្នាឡើង កសាងជាព្រះ‌ដំណាក់របស់ព្រះ‌វិញ្ញាណ ធ្វើជាក្រុមបូជា‌ចារ្យដ៏‌វិសុទ្ធ ដើម្បីថ្វាយយញ្ញ‌បូជាខាងវិញ្ញាណ ជាទីគាប់ព្រះ‌ហឫទ័យព្រះ‌ជាម្ចាស់ តាម‌រយៈព្រះយេស៊ូ‌គ្រីស្ត។

បន្ទរ៖ ពួកសាវ័កសប្បាយចិត្តជាខ្លាំង *អាលេលូយ៉ា! អាលេលូយ៉ា!។ បន្ទរឡើងវិញ៖…
-ដោយបានឃើញព្រះអម្ចាស់មានព្រះជន្មរស់ឡើងវិញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ ខ្ញុំស្គាល់ចៀមទាំងនោះ ហើយចៀមទាំងនោះមកតាមខ្ញុំ។ ខ្ញុំឱ្យគេមានជីវិតអស់កល្ប‌ជានិច្ច អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ខ្ញុំស្គាល់ចៀមទាំងនោះ ហើយចៀមទាំងនោះមកតាមខ្ញុំ។ ខ្ញុំឱ្យគេមានជីវិតអស់កល្ប‌ជានិច្ច អាលេលូយ៉ា!

ពាក្យអង្វរសកល

ដោយព្រះគ្រីស្តមានព្រះជន្មរស់ឡើងវិញ ព្រះអង្គបានប្រទានសេចក្តីសង្ឃឹមដ៏ពិតប្រាកដដល់ប្រជារាស្រ្តព្រះអង្គ។ ចូរយើងទូលសូមព្រះអង្គឱ្យអស់ពីដួងចិត្តថា ៖

បន្ទរ៖ បពិត្រព្រះអម្ចាស់យេស៊ូ ដែលមានព្រះជន្មគង់នៅអស់កល្បជានិច្ច ! សូមព្រះសណ្តាប់ពាក្យអង្វរយើងខ្ញុំផង !

បពិត្រព្រះអម្ចាស់យេស៊ូ ! ព្រះលោហិត និងទឹកបានហូរចេញពីស្នាមរបួសត្រង់ឆ្នឹងជំនីរព្រះអង្គ
—សូមប្រោសឱ្យព្រះសហគមន៍របស់ព្រះអង្គធ្វើជាកូនក្រមុំ ដែលគ្មានស្លាកស្នាមផង។ (បន្ទរ)

ឱម្ចាស់គង្វាលទាំងឡាយអើយ ! ក្រោយព្រះអង្គមានព្រះជន្មរស់ ឡើងវិញ ព្រះអង្គបានធ្វើឱ្យលោកសិលាក្លាយជាគង្វាលហ្វូងចៀមរបស់ព្រះអង្គ នៅពេលលោកប្រកាសថាស្រឡាញ់ព្រះអង្គ
—សូមព្រះអង្គពង្រីកសេចក្តីស្រឡាញ់ និងការលះបង់របស់សម្តេចប៉ាបព្រះនាម…ពីមួយថ្ងៃទៅមួយថ្ងៃផង។ (បន្ទរ)

ព្រះអង្គបានបង្ហាញឱ្យពួកសាវ័កស្គាល់ពីរបៀបចាប់ត្រី ដែលល្អប្រសើរជាង
—សូមព្រះអង្គផ្ញើអ្នកដទៃឱ្យបន្តការងារជាអ្នកនេសាទមនុស្សពីអស់លោកផង។ (បន្ទរ)

នៅមាត់បឹង ព្រះអង្គបានរៀបចំនំប៉័ង និងត្រីសម្រាប់ពួកសាវ័ក
—សូមកុំឱ្យយើងខ្ញុំអនុញ្ញាតឱ្យអ្នកដទៃត្រូវស្លាប់ ដោយការអត់ឃ្លាននោះឡើយ។ (បន្ទរ)

ព្រះយេស៊ូជាលោកអដាំថ្មី និងមានវិញ្ញាណដែលផ្តល់ជីវិត សូមព្រះអង្គបំផ្លាស់បំប្រែមនុស្សស្លាប់ឱ្យមានលក្ខណៈដូចព្រះអង្គ
—ដើម្បីឱ្យអំណរសប្បាយដ៏ពេញបរិបូណ៌របស់ព្រះអង្គស្ថិតក្នុងពួកគេ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានធម៌មេត្តាករុណាយ៉ាងក្រៃលែង ! ព្រះអង្គប្រោសឱ្យព្រះសហគមន៍លូតលាស់ជាលំដាប់ ដោយសារឫទ្ធានុភាពរបស់ព្រះអង្គ។ សូមព្រះអង្គមេត្តាប្រទានឱ្យអស់អ្នកដែលមានឈ្មោះជាគ្រីស្តបរិស័ទយកចិត្តទុកដាក់រស់នៅឱ្យសមរម្យនឹងឋានៈរបស់ខ្លួន។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

2 Views

Post Views: 2