រដូវបុណ្យចម្លង សប្តាហ៍ទី៣ ថ្ងៃព្រហស្បតិ៍

Posted on 8 ខែឧសភា 202520 ខែមីនា 2025 by Siya Khim

រដូវបុណ្យចម្លង

ថ្ងៃព្រហស្បតិ៍ អាទិត្យទី៣
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១៣២

ព្រះ‌អម្ចាស់មានព្រះ‌បន្ទូលសន្យាជាមួយព្រះ‌បាទដាវីឌ

ព្រះជាម្ចាស់នឹងតាំងបុត្រនោះ ឱ្យគ្រងរាជ្យលើបល្ល័ង្ករបស់ព្រះបាទដាវីឌ ជាព្រះអយ្យកោរបស់ព្រះអង្គ (លក ១,៣២)។

បន្ទរទី១ ៖ ព្រះជាម្ចាស់នឹងតាំងបុត្រនោះឱ្យគ្រងរាជ្យលើបល្ល័ង្ករបស់ព្រះបាទដាវីឌ ជាព្រះអយ្យកោរបស់ព្រះអង្គ អាលេលូយ៉ា!

(ក)

^១	ឱព្រះអម្ចាស់អើយ! សូមនឹកដល់ព្រះបាទដាវីឌ និងការនឿយហត់ទាំងប៉ុន្មានរបស់ព្រះរាជាផង។
^២	ព្រះរាជាបានស្បថជាមួយព្រះអម្ចាស់ គឺទ្រង់បានសន្យាជាមួយព្រះដ៏មានព្រះចេស្តារបស់លោកយ៉ាកុបថា ៖
^៣	“ទូលបង្គំនឹងមិនចូលទៅជ្រកនៅក្នុងពន្លាទូលបង្គំ ទូលបង្គំនឹងមិនឡើងទៅដេកនៅលើគ្រែទូលបង្គំទេ
^៤	ទូលបង្គំមិនព្រមបិទភ្នែក ទូលបង្គំមិនព្រមទទួលទានដំណេកលង់លក់ឡើយ
^៥	ដរាបណាទូលបង្គំពុំទាន់រកកន្លែងថ្វាយព្រះអង្គបាន ដរាបណាទូលបង្គំពុំទាន់រកព្រះដំណាក់ថ្វាយព្រះដ៏មានចេស្តារបស់លោកយ៉ាកុបបានទេនោះ!” ។
^៦	យើងបានឮគេនិយាយថា ហិបនៃសម្ពន្ធមេត្រីស្ថិតនៅឯភូមិអេប្រាតា យើងបានរកឃើញហិបនេះនៅតំបន់យ៉ាអារ។
^៧	ចូរយើងនាំគ្នាចូលទៅក្នុងព្រះដំណាក់របស់ព្រះអម្ចាស់ ចូរយើងក្រាបនៅទាបព្រះបាទារបស់ព្រះអង្គ!
^៨	ឱព្រះអម្ចាស់អើយ! សូមតើនឡើង សូមយាងមកជាមួយហិបនៃឫទ្ធានុភាពរបស់ព្រះអង្គ ហើយគង់នៅក្នុងទីសម្រាករបស់ព្រះអង្គរហូតតរៀងទៅ។
^៩	សូមឱ្យអស់លោកបូជាចារ្យរបស់ព្រះអង្គប្រព្រឹត្តអំពើសុចរិតជានិច្ច សូមឱ្យប្រជារាស្ត្ររបស់ព្រះអង្គ ស្រែកហ៊ោរឡើងយ៉ាងសប្បាយ!
^១០	ដោយយល់ដល់ព្រះបាទដាវីឌ ជាអ្នកបម្រើរបស់ព្រះអង្គ សូមកុំបោះបង់ចោលស្តេច ដែលព្រះអង្គបានចាក់ប្រេងអភិសេកនេះឡើយ!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះជាម្ចាស់នឹងតាំងបុត្រនោះ ឱ្យគ្រងរាជ្យលើបល្ល័ង្ករបស់ព្រះបាទដាវីឌ ជាព្រះអយ្យកោរបស់ព្រះអង្គ អាលេលូយ៉ា!

បន្ទរទី២ ៖ មានតែព្រះគ្រីស្តមួយគត់ ដែលជាព្រះអធិបតី ព្រះអង្គជាព្រះមហាក្សត្រ ធំលើសមហាក្សត្រនានា ជាព្រះអម្ចាស់ធំលើសអម្ចាស់នានា អាលេលូយ៉ា!

(ខ)

(បទព្រហ្មគីតិ)

^១១-	ព្រះអង្គបានសន្យា	នឹងស្តេចដាវីឌល្អឯក
	យើងនឹងតែងតាំងពូជ	ឱ្យគ្រងរាជ្យជាបន្ត	។
^១២-	ប្រសិនបើបុត្រអ្នក	កាន់បានជាក់សម្ពន្ធល្អ
	មេត្រីយើងតៗ	ហើយធ្វើតាមយើងប្រដៅ	។
	នោះពូជគេនឹងបាន	ល្អថ្កើងថ្កានមិនអាស្រូវ
	ឡើងគ្រងរាជ្យតទៅ	តកូនចៅឥតស្រាកស្រាន្ត	។
^១៣-	ព្រះអម្ចាស់បានជ្រើស	ពិនិត្យរើសក្រុងថ្កើងថ្កាន
	ជាទីល្អចំណាន	ស៊ីយ៉ូនបានជាលំនៅ	។
^១៤-	យើងនឹងស្នាក់សម្រាក	រហូតជាក់មិនចេញទៅ
	ចង់រស់ស្ថិតនិត្យនៅ	កន្លែងនេះមិនទៅណា	។
^១៥-	យើងនឹងប្រទានពរ	ក្រុងបវរតាមត្រូវការ
	ឱ្យអ្នកខ្សត់វេទនា	មានអាហារមិនខ្វះទេ	។
^១៦-	យើងនឹងសង្គ្រោះក្រុង	ឱ្យរឿងរុងល្អឡើងទ្វេ
	ដោយបូជាចារ្យគេ	ឱ្យរាស្ត្រហ៊ោរអរអនេក	។
^១៧-	ទីនេះយើងឱ្យស្តេច	មានអំណាចខ្ពស់ពន់ពេក
	កើតចេញមកពីពូជ	នៃដាវីឌដ៏ខ្លាំងក្លា	។
	យើងនឹងរៀបចំឱ្យ	ស្តេចអង្គក្រោយមានចេស្តា
	គ្រងរាជ្យយូរវស្សា	ជំនួសស្តេចយើងអភិសេក	។
^១៨-	យើងនឹងធ្វើឱ្យខ្មាំង	បាក់មុខខ្លាំងខ្មាសពន់ពេក
	តែយើងនឹងឱ្យរាជ្យ	របស់គេបានថ្កុំថ្កើង	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ មានតែព្រះគ្រីស្តមួយគត់ ដែលជាព្រះអធិបតី ព្រះអង្គជាព្រះមហាក្សត្រ ធំលើសមហាក្សត្រនានា ជាព្រះអម្ចាស់ធំលើសអម្ចាស់នានា អាលេលូយ៉ា!

បទលើកតម្កើងតាមគម្ពីរវិវរណៈ (វវ ១១,១៧-១៨ និង ១២,១០-១២)

ការវិនិច្ឆ័យទោសរបស់ព្រះជាម្ចាស់

បន្ទរទី៣ ៖ ព្រះអម្ចាស់អើយ តើមានព្រះណាអាចផ្ទឹមនឹងព្រះអង្គបាន? តើនរណាមានភាពថ្កុំ‌ថ្កើងដ៏‌វិសុទ្ធដូចព្រះអង្គ អាលេលូយ៉ា!

^១៧	“បពិត្រព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ព្រះអង្គមានព្រះជន្មគង់នៅសព្វថ្ងៃនេះ ហើយក៏មានព្រះជន្មគង់នៅ តាំងពីដើមរៀងមកដែរ! យើងខ្ញុំសូមអរព្រះគុណព្រះអង្គ ព្រោះទ្រង់បានយកឫទ្ធានុភាពដ៏ខ្លាំងក្លារបស់ព្រះអង្គ មកតាំងព្រះរាជ្យរបស់ព្រះអង្គឡើង។
^១៨	ជាតិសាសន៍នានាបាននាំគ្នាខឹង ហើយពេលដែលព្រះអង្គសម្តែងព្រះពិរោធក៏មកដល់ដែរ គឺជាពេលកំណត់ដែលព្រះអង្គវិនិច្ឆ័យទោសមនុស្សស្លាប់។ នៅពេលនោះ ព្រះអង្គនឹងប្រទានរង្វាន់ដល់ពួកព្យាការី ជាអ្នកបម្រើរបស់ព្រះអង្គ ដល់ប្រជាជនដ៏វិសុទ្ធ និងដល់អស់អ្នកដែលគោរពកោតខ្លាចព្រះនាមព្រះអង្គ ទាំងអ្នកតូច ទាំងអ្នកធំ ហើយក៏ជាពេលដែលព្រះអង្គត្រូវបំផ្លាញអស់អ្នកដែលបានបំផ្លាញផែនដីដែរ” ។
^១០	ពេលនោះ ខ្ញុំបានឮសំឡេងមួយបន្លឺយ៉ាងខ្លាំងនៅលើមេឃថា ៖ “ឥឡូវនេះ ដល់ពេលព្រះជាម្ចាស់សង្គ្រោះមនុស្សលោកហើយ ហើយឫទ្ធានុភាព និងព្រះរាជ្យព្រះជាម្ចាស់របស់យើង ព្រមទាំងអំណាចព្រះគ្រីស្តរបស់ព្រះអង្គក៏បានមកដល់ដែរ ដ្បិតអ្នកចោទប្រកាន់ទោសបងប្អូនយើង ត្រូវគេទម្លាក់ចោលហើយ គឺអ្នកនោះឯង ដែលចោទប្រកាន់បងប្អូនយើង ទាំងថ្ងៃ ទាំងយប់ នៅមុខព្រះភក្ត្រនៃព្រះរបស់យើង។
^១១	បងប្អូនយើងបានឈ្នះវា ដោយសារព្រះលោហិតរបស់កូនចៀម និងដោយសក្ខីភាពរបស់ពួកគេ ហើយបងប្អូនទាំងនោះ បានស៊ូប្តូរជីវិតឥតស្តាយសោះឡើយ។
^១២	ហេតុនេះ ស្ថានបរមសុខ និងអស់អ្នកដែលរស់នៅក្នុងស្ថានបរមសុខអើយ! ចូរមានអំណរសប្បាយឡើង!

បន្ទរ ៖ ព្រះអម្ចាស់អើយ តើមានព្រះណាអាចផ្ទឹមនឹងព្រះអង្គបាន? តើនរណាមានភាពថ្កុំ‌ថ្កើងដ៏‌វិសុទ្ធដូចព្រះអង្គ អាលេលូយ៉ា!

ព្រះបន្ទូលរបស់ព្រះជាម្ចាស់ (១សល ៣,១៨.២២)

សូម្បីតែព្រះ‌គ្រីស្តក៏ព្រះ‌អង្គបានសោយទិវង្គតម្ដងជាសូរេច ព្រោះតែបាបដែរ គឺព្រះដ៏សុចរិតបានសោយទិវង្គត ជាប្រយោជន៍ដល់មនុស្សទុច្ចរិត ដើម្បីនាំបង‌ប្អូនទៅថ្វាយព្រះ‌ជាម្ចាស់។ កាលព្រះ‌អង្គមានឋានៈជាមនុស្ស ព្រះ‌អង្គត្រូវគេធ្វើគុត តែព្រះ‌ជាម្ចាស់បានប្រោសព្រះ‌អង្គឱ្យមានព្រះ‌ជន្មរស់ ដោយ‌សារព្រះ‌វិញ្ញាណវិញ។ ព្រះ‌អង្គបានយាងឡើងទៅស្ថានបរម‌សុខ គង់នៅខាងស្ដាំព្រះ‌ជាម្ចាស់ ហើយពួកទេវទូត ព្រមទាំងវត្ថុស័ក្តិ‌សិទ្ធិនានាដែលមានអំណាច និងឫទ្ធា‌នុភាពនានា ចុះចូលនឹងព្រះ‌អង្គទាំងអស់។

បន្ទរ៖ ពួកសាវ័កសប្បាយចិត្តជាខ្លាំង *អាលេលូយ៉ា! អាលេលូយ៉ា!។ បន្ទរឡើងវិញ…
-ដោយបានឃើញព្រះអម្ចាស់មានព្រះជន្មរស់ឡើងវិញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ «ខ្ញុំនេះហើយជាអាហារដែលមានជីវិត ចុះមកពីស្ថានបរម‌សុខ។ អ្នកណាបរិភោគអាហារនេះ នឹងរស់នៅអស់កល្ប‌ជានិច្ច។ អាហារដែលខ្ញុំនឹងឱ្យនោះ គឺខ្លួនខ្ញុំផ្ទាល់ដែលត្រូវបូជាសម្រាប់ឱ្យមនុស្សលោកមានជីវិត» អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ «ខ្ញុំនេះហើយជាអាហារដែលមានជីវិត ចុះមកពីស្ថានបរម‌សុខ។ អ្នកណាបរិភោគអាហារនេះ នឹងរស់នៅអស់កល្ប‌ជានិច្ច។ អាហារដែលខ្ញុំនឹងឱ្យនោះ គឺខ្លួនខ្ញុំផ្ទាល់ដែលត្រូវបូជាសម្រាប់ឱ្យមនុស្សលោកមានជីវិត» អាលេលូយ៉ា!

ពាក្យអង្វរសកល

ព្រះគ្រីស្តតើនឡើងពីចំណោមមនុស្សស្លាប់ ទុកដូចជាផលផ្លែដំបូងនៃអស់អ្នកដែលសម្រាន្តលក់។ ចូរយើងកោតសរសើរព្រះអង្គ ដោយអំណរសប្បាយថា ៖

បន្ទរ៖ បពិត្រព្រះយេស៊ូ ! ព្រះអង្គជាផលផ្លែដំបូងដែលកើតពីចំណោមមនុស្សស្លាប់ សូមព្រះសណ្តាប់ពាក្យអង្វរយើងខ្ញុំផង !

បពិត្រព្រះអម្ចាស់យេស៊ូ ! សូមព្រះអង្គនឹកដល់ព្រះសហគមន៍ដ៏វិសុទ្ធ ដែលព្រះអង្គបានសង់លើក្រុមគ្រីស្តទូត ហើយលាតសន្ធឹងដល់ទីដាច់ស្រយាលនៃផែនដី
—សូមព្រះអង្គប្រទានព្រះពរដល់អស់អ្នកដែលជឿសង្ឃឹមលើព្រះអង្គ។ (បន្ទរ)

ព្រះអង្គជាគ្រូពេទ្យដែលព្យាបាលទាំងព្រលឹង និងរូបកាយ
—សូមព្រះអង្គយាងមក ហើយសង្រ្គោះយើងខ្ញុំក្នុងសេចក្តីស្រឡាញ់របស់ព្រះអង្គ។ (បន្ទរ)

សូមព្រះអង្គប្រោសអ្នកជំងឺឱ្យបានជាសះស្បើយ និងប្រទានកម្លាំងដល់ពួកគេ
—សូមព្រះអង្គរំដោះពួកគេឱ្យរួចពីភាពទន់ខ្សោយរបស់ខ្លួនផង។ (បន្ទរ)

សូមព្រះអង្គជួយដល់អស់អ្នកដែលធ្លាក់ទឹកចិត្ត ឬរាងកាយ
—ដោយក្តីមេត្តារបស់ព្រះអង្គ សូមព្រះអង្គលើកអ្នកត្រូវការជំនួយឱ្យឈរឡើងវិញផង។ (បន្ទរ)

តាមរយៈឈើឆ្កាង និងការរស់ឡើងវិញ ព្រះអង្គបានបើកផ្លូវឱ្យមនុស្សចូលទៅកាន់ជីវិតអមតៈ
—សូមព្រះអង្គប្រោសឱ្យបងប្អូនដែលលាចាកលោក នេះ បានទទួលអំណរសប្បាយនៃព្រះរាជ្យរបស់ព្រះអង្គ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះបិតាដ៏មានឫទ្ធានុភាពសព្វប្រការ ហើយមានព្រះជន្មគង់នៅអស់កល្បជានិច្ច ! ព្រះអង្គប្រោសមនុស្សគ្រប់ជាតិសាសន៍ឱ្យស្គាល់ព្រះអង្គ ដោយមិនរើសមុខនរណាឡើយ។ សូមព្រះអង្គមេត្តាបំភ្លឺចិត្តគំនិតរបស់យើងខ្ញុំ ឱ្យយកចិត្តទុកដាក់ស្តាប់ព្រះបន្ទូលព្រះអង្គ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

5 Views

Post Views: 5