រដូវធម្មតា

ថ្ងៃអាទិត្យ អាទិត្យទី៨
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១០,១-៥.៧

ព្រះមេស្ស៊ីជាព្រះមហាក្សត្រ និងជាបូជាចារ្យ

ព្រះគ្រីស្តត្រូវតែគ្រងរាជ្យ ទម្រាំដល់ព្រះជាម្ចាស់បង្ក្រាបខ្មាំងសត្រូវទាំង​ប៉ុន្មាន មកដាក់ក្រោមព្រះបាទារបស់ព្រះអង្គ (១ករ ១៥,២៥)។

បន្ទរទី១ ៖ ព្រះអង្គសព្វព្រះហឫទ័យបង្កើតព្រះករុណា ក្នុងសិរី​រុង​រឿង​អស់កល្បជានិច្ច តាំងពីមុនថ្ងៃរះទៅទៀត អាលេលូយ៉ា !

១	ព្រះអម្ចាស់មានព្រះបន្ទូលមកកាន់ព្រះរាជាជាអម្ចាស់របស់ខ្ញុំថា ៖ “សូមគង់នៅខាងស្តាំយើង ទម្រាំដល់យើងបង្ក្រាបខ្មាំងសត្រូវរបស់ព្រះអង្គ មកដាក់ក្រោមព្រះបាទារបស់ព្រះអង្គ!” ។
២	សូមព្រះអង្គប្រោសប្រទានឱ្យព្រះរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះករុណាបង្ក្រាបខ្មាំងសត្រូវដែលនៅជុំវិញ!
៣	នៅថ្ងៃព្រះករុណាកេណ្ឌទ័ពទៅច្បាំង ប្រជារាស្ត្រចូលរួមដោយស្ម័គ្រចិត្ត ពួកយុវជននាំគ្នាចូលគាល់ព្រះករុណា នៅលើភ្នំដ៏វិសុទ្ធ ប្រៀបដូចជាទឹកសន្សើម នៅពេលព្រឹកព្រលឹម។
៤	ព្រះអម្ចាស់មានព្រះបន្ទូលសន្យា ដោយឥតប្រែប្រួលថា ៖ “ព្រះអង្គជាបូជាចារ្យអស់កល្បតរៀងទៅ តាមរបៀបស្តេចមែលគីសេដែក” ។
៥	ព្រះអម្ចាស់គង់នៅខាងស្តាំព្រះករុណា នៅថ្ងៃដែលព្រះអង្គទ្រង់ព្រះពិរោធ ព្រះអង្គកម្ទេចស្តេចនានា។
៧	នៅតាមផ្លូវ ព្រះរាជាសោយទឹកជ្រោះ រួចហើយ ព្រះអង្គងើបព្រះភក្ត្រប្រកបដោយជោគជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះអង្គសព្វព្រះហឫទ័យបង្កើតព្រះករុណា ក្នុងសិរី​រុង​រឿង​អស់កល្បជានិច្ច តាំងពីមុនថ្ងៃរះទៅទៀត អាលេលូយ៉ា!

ទំនុកតម្កើងលេខ ១១២

សុភមង្គលរបស់មនុស្សសុចរិត

ចូររស់នៅឱ្យសមជាមនុស្សដែលមានពន្លឺក្នុងខ្លួនទៅ។ ផលនៃពន្លឺនោះ គឺសេចក្តីសប្បុរស សេចក្តីសុចរិត និងសេចក្តីពិតគ្រប់បែបយ៉ាង (អភ ៥,៨-៩)។

បន្ទរទី២ ៖ អ្នកណាស្រេកឃ្លានសេចក្តីសុចរិត អ្នកនោះមានសុភមង្គលហើយ ដ្បិតព្រះជាម្ចាស់នឹងប្រទានឱ្យពួកគេបានឆ្អែត !

(បទពាក្យ ៧)

១-	អ្នកអោនកោតខ្លាចព្រះអម្ចាស់	ប្រតិបត្តិច្បាស់តាមព្រះទ័យ
	ស្មោះស្ម័គ្រគោរពតាមវិន័យ	បានសុខពេកក្រៃមានមង្គល	។
២-	ពូជរបស់គេមានអំណាច	ចិត្តក្លាអង់អាចគ្មានកង្វល់
	ដ្បិតព្រះជាម្ចាស់ប្រទានផល	ព្រះពរពិតដល់អ្នកសុចរិត	។
៣-	ក្នុងផ្ទះមនុស្សដែលចិត្តធម៌	មានទ្រព្យបវរល្អប្រណីត
	សេចក្តីសុចរិតនៅស្ថេរស្ថិត	ព្រះអង្គអាណិតឱ្យពរជាប់	។
៤-	ក្នុងទីងងឹតមានពន្លឺ	លេចឡើងបំភ្លឺមិនស្រអាប់
	ចិត្តគាត់ប្រណីល្អគួរគាប់	សន្តោសលើសព្វជនប្រុសស្រី	។
៥-	មនុស្សដែលមានចិត្តទូលាយ	យកអ្វីទៅឱ្យអ្នកផងខ្ចី
	ព្រមទាំងរកស៊ីមិនកេងគៃ	អ្នកនោះប្រពៃល្អបំផុត	។
៦-	កេរ្តិ៍ឈ្មោះរន្ទឺឮសុសសាយ	ទីជិតទីឆ្ងាយមិនរលត់
	មនុស្សគ្រប់សម័យតែងចាំស្ទាត់	នឹកទៅដល់គាត់ជាប់ជានិច្ច	។
៧-	អ្នកនោះមិនស្លុតមិនព្រឺខ្លាច	មានចិត្តអង់អាចមិនមានល្បិច
	មិនខ្លាចគេដៀលត្មះពន្លិច	ហើយផ្ញើជីវិតលើព្រះម្ចាស់	។
៨-	គាត់មានចិត្តនឹងហើយអង់អាច	មិនចេះភ័យខ្លាចអ្វីទាំងអស់
	ទាល់តែគាត់ឃើញខ្មាំងទាំងនោះ	បាក់ទ័ពប្រាសអស់ទើបស្កប់ចិត្ត	។
៩-	គាត់តែងចែកទានដល់អ្នកក្រ	ដោយចិត្តស្មោះសរស្ម័គ្រពិតៗ
	ចិត្តគាត់ទូលាយត្រង់សុចរិត	កម្លាំងគាត់ស្ថិតមិនបាត់បង់	។
១០-	ពេលជនអាក្រក់ឃើញដូច្នោះ	ចិត្តគេទោមនស្សខាំធ្មេញផង
	បាក់ធ្លាក់ទឹកចិត្តខូចបំណង	ពុំសម្រេចម្តងណាសោះឡើយ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ អ្នកណាស្រេកឃ្លានសេចក្តីសុចរិត អ្នកនោះមានសុភមង្គលហើយ ដ្បិតព្រះជាម្ចាស់នឹងប្រទានឱ្យពួកគេបានឆ្អែត !

បទលើកតម្កើងតាមគម្ពីរវិវរណៈ (វវ ១៩,១-២.៥-៧)

វិវាហមង្គលការកូនចៀម

បន្ទរទី៣ ៖ អ្នករាល់គ្នាជាអ្នកបម្រើព្រះជាម្ចាស់ទាំងតូចទាំងធំអើយ ! ចូរសរសើរតម្កើងព្រះជាម្ចាស់ ! អាលេលូយ៉ា !

១	អាលេលូយ៉ា! សូមលើកតម្កើងព្រះជាម្ចាស់នៃយើង ព្រះអង្គសង្គ្រោះយើង ព្រះអង្គប្រកបដោយសិរីរុងរឿង និងឫទ្ធានុភាព
២	ដ្បិតទ្រង់វិនិច្ឆ័យយ៉ាងត្រឹមត្រូវ តាមយុត្តិធម៌ អាលេលូយ៉ា!
៥	អាលេលូយ៉ា! អ្នករាល់គ្នាជាអ្នកបម្រើព្រះជាម្ចាស់ អ្នករាល់គ្នាជាអ្នកគោរពកោតខ្លាចព្រះអង្គ ទាំងតូចទាំងធំអើយ! ចូរសរសើរតម្កើងព្រះជាម្ចាស់នៃយើង!។ អាលេលូយ៉ា!
៦	អាលេលូយ៉ា! ដ្បិតព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ទ្រង់បានតាំងព្រះរាជ្យរបស់ព្រះអង្គហើយ
៧	យើងនាំគ្នាអរសប្បាយឡើង ត្រូវមានអំណររីករាយឱ្យខ្លាំង ហើយនាំគ្នាលើកតម្កើងសិរីរុងរឿងព្រះអង្គ អាលេលូយ៉ា! អាលេលូយ៉ា! ដ្បិតដល់ពេលរៀបវិវាហមង្គលការកូនចៀមហើយ ភរិយាថ្មោងថ្មីរបស់កូនចៀម ក៏បានរៀបចំខ្លួនរួចជាស្រេចហើយដែរ” ។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ អ្នករាល់គ្នាជាអ្នកបម្រើព្រះជាម្ចាស់ទាំងតូចទាំងធំអើយ ! ចូរសរសើរតម្កើងព្រះជាម្ចាស់ ! អាលេលូយ៉ា !

ព្រះបន្ទូលរបស់ព្រះជាម្ចាស់ (ហប ១២,២២-២៤)

បងប្អូនចូលមកជិតភ្នំស៊ីយ៉ូន មកជិតក្រុងរបស់ព្រះដ៏មានព្រះជន្មរស់ គឺក្រុងយេរូសាឡឹមនៅស្ថានបរមសុខ ដែលមានទេវទូតរាប់លានរាប់កោដិ និងមានព្រះសហគមន៍របស់ពួករៀមច្បង ដែលមានឈ្មោះកត់ទុកនៅស្ថានបរមសុខ កំពុងជួបជុំគ្នាយ៉ាងអធិកអធម។ បងប្អូនចូលមកជិតព្រះជាម្ចាស់ដែលវិនិច្ឆ័យមនុស្សទាំងអស់ និងចូលមកជិតវិញ្ញាណក្ខន្ធអ្នកសុចរិតដែលបានគ្រប់លក្ខណៈ បងប្អូនចូលមកជិតព្រះយេស៊ូដែលជាស្ពាននៃសម្ពន្ធមេត្រីថ្មី ហើយចូលមកជិតព្រះលោហិតសម្រាប់ប្រោះ គឺជាព្រះលោហិតដែលទូលអង្វរ ប្រសើរជាងលោហិតរបស់លោកអេបិលទៅទៀត។

បន្ទរ៖ ព្រះជាអម្ចាស់ *ជាព្រះដ៏មានព្រះចេស្តាលើអ្វីៗទាំងអស់។ បន្ទរឡើងវិញ៖…
—ព្រះប្រាជ្ញាញាណរបស់ព្រះអង្គ គ្មានអ្វីប្រៀបផ្ទឹមបានឡើយ។ បន្ទរ៖ *…
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ គេ​ស្ងើច​សរសើរ​ព្រះ‌យេស៊ូ​គ្រប់ៗ​គ្នា ទាំង​នឹក​ឆ្ងល់​អំពីព្រះបន្ទូលប្រកប​ដោយ​ព្រះ‌ហឫ‌ទ័យ​ប្រណី‌សន្ដោស ដែល​ហូរ​ចេញ​ពី​ព្រះឱស្ឋរបស់ព្រះ‌អង្គ។

៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ គេ​ស្ងើច​សរសើរ​ព្រះ‌យេស៊ូ​គ្រប់ៗ​គ្នា ទាំង​នឹក​ឆ្ងល់​អំពីព្រះបន្ទូលប្រកប​ដោយ​ព្រះ‌ហឫ‌ទ័យ​ប្រណី‌សន្ដោស ដែល​ហូរ​ចេញ​ពី​ព្រះឱស្ឋរបស់ព្រះ‌អង្គ។

ពាក្យអង្វរសកល

ចូរយើងអរសប្បាយក្នុងព្រះអម្ចាស់ ដ្បិតអ្វីៗដ៏ល្អគ្រប់យ៉ាងសុទ្ធតែកើតមកពីព្រះអង្គ យើងខ្ញុំសូមទូលអង្វរព្រះអង្គថា ៖

បន្ទរ៖ ឱព្រះអម្ចាស់អើយ ! សូមទទួលពាក្យអង្វររបស់យើងខ្ញុំផង។

បពិត្រព្រះបិតា ! ជាព្រះអម្ចាស់នៃអ្វីៗទាំងអស់ ព្រះអង្គបានចាត់ព្រះបុត្រាឱ្យយាងមកក្នុងពិភពលោក ដើម្បីឱ្យព្រះនាមព្រះអង្គត្រូវបានលើកតម្កើងគ្រប់ទីកន្លែងទាំងអស់
—សូមព្រះអង្គពង្រឹងព្រះសហគមន៍ឱ្យធ្វើជាសាក្សីរបស់ព្រះអង្គ ក្នុងចំណោមជាតិសាសន៍ទាំងឡាយផង។ (បន្ទរ)

សូមព្រះអង្គប្រោសប្រទានឱ្យយើងខ្ញុំចេះស្តាប់បង្គាប់ តាមការប្រៀនប្រដៅរបស់ក្រុមគ្រីស្តទូត
—ហើយសូមឱ្យជំនឿរបស់យើងខ្ញុំចងភ្ជាប់នឹងសេចក្តីពិតជានិច្ចផង។ (បន្ទរ)

ដូចព្រះអង្គបានស្រឡាញ់អ្នកគ្មានទោស
—សូមព្រះអង្គផ្តល់នូវភាពយុត្តិធម៌ដល់អ្នកដែលបានប្រព្រឹត្តខុសផង។ (បន្ទរ)

សូមព្រះអង្គដោះលែងអ្នកជាប់ជាទាសករឱ្យមានសេរីភាព និងសូមប្រោសមនុស្សខ្វាក់ឱ្យមើលឃើញវិញ
—សូមព្រះអង្គលើកអ្នកដួលឱ្យក្រោកឈរឡើង និងការពារជនបរទេសផង។ (បន្ទរ)

សូមព្រះអង្គបំពេញតាមព្រះបន្ទូលសន្យា ដល់អស់អ្នកដែលបានចូលសម្រាកក្នុងសេចក្តីសុខសាន្តរបស់ព្រះអង្គ
—តាមរយៈព្រះបុត្រា សូមព្រះអង្គប្រទានឱ្យពួកគាត់ទាំងនោះ បានរស់ឡើងវិញផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាជាអម្ចាស់យើងខ្ញុំ ! ព្រះអង្គសព្វព្រះហឫទ័យចាត់ព្រះបុត្រាឱ្យយាងមករំដោះយើងខ្ញុំ និងប្រទានសេចក្តីសុខសាន្តយ៉ាងបរិបូណ៍។ សូមព្រះអង្គមេត្តាប្រោសឱ្យយើងខ្ញុំចេះគោរពស្រឡាញ់ព្រះអង្គ អស់ពីដួងចិត្ត និងប្រព្រឹត្តតាមដោយយកចិត្តទុកដាក់ជានិច្ច។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។