រដូវធម្មតា សប្តាហ៍ទី៧ ថ្ងៃចន្ទ

Posted on 24 ខែកុម្ភៈ 20253 ខែកុម្ភៈ 2025 by Siya Khim

រដូវធម្មតា

ថ្ងៃចន្ទ អាទិត្យទី៧
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១២៣

ព្រះជាម្ចាស់ជាសេចក្តីសង្ឃឹមរបស់ប្រជារាស្រ្តព្រះអង្គ

ពេលនោះ មានមនុស្សខ្វាក់ពីរនាក់អង្គុយនៅក្បែរផ្លូវ។ អ្នកទាំងពីរឮថា ព្រះ‌យេស៊ូយាងមក ក៏ស្រែកឡើងថា៖
«ឱព្រះ‌អម្ចាស់ជាព្រះ‌រាជ‌វង្សព្រះ‌បាទដាវីឌអើយ! សូមអាណិតមេត្តាយើងខ្ញុំផង!» (មថ ២០,៣០)។

បន្ទរទី១ ៖ យើងខ្ញុំសម្លឹងមើលព្រះជាអម្ចាស់នៃយើង ហើយទន្ទឹងរង់ចាំព្រះអង្គប្រណីសន្តោស។

^១	ឱព្រះអម្ចាស់ដែលគង់នៅស្ថានបរមសុខអើយ! ទូលបង្គំងើបមុខឡើងសម្លឹងទៅរកព្រះអង្គ។
^២	យើងខ្ញុំក៏សម្លឹងមើលព្រះ‌ជា‌អម្ចាស់នៃយើង ហើយទន្ទឹងរង់‌ចាំព្រះ‌អង្គប្រណី‌សន្ដោស ដូចអ្នកបម្រើសម្លឹងមើលទៅដៃម្ចាស់របស់ខ្លួន និងដូចស្ត្រីបម្រើសម្លឹងមើលទៅដៃម្ចាស់ស្រីរបស់ខ្លួនយ៉ាងនោះដែរ។
^៣	ឱព្រះអម្ចាស់អើយ! សូមអាណិតមេត្តាយើងខ្ញុំ សូមអាណិតមេត្តាយើងខ្ញុំផង ដ្បិតយើងខ្ញុំត្រូវគេមើលងាយខ្លាំងណាស់។
^៤	យើងខ្ញុំពុំអាចទ្រាំទ្រនឹងការមើលងាយពីសំណាក់មនុស្សព្រហើន ព្រមទាំងការជេរប្រមាថពីសំណាក់មនុស្សវាយឫកខ្ពស់បានទៀតឡើយ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ យើងខ្ញុំសម្លឹងមើលព្រះជាអម្ចាស់នៃយើង ហើយទន្ទឹងរង់ចាំព្រះអង្គប្រណីសន្តោស។

ទំនុកតម្កើងលេខ ១២៤

ព្រះអម្ចាស់ផ្ទាល់បានជួយយើង ដោយព្រះនាមព្រះអង្គ

លោកប៉ូលនិមិត្តឃើញព្រះអម្ចាស់មានព្រះបន្ទូលមកលោកថាៈ “កុំខ្លាចអី! ត្រូវនិយាយតទៅទៀត កុំនៅស្ងៀមឡើយ ដ្បិតយើងស្ថិតនៅជាមួយអ្នកហើយ” (កក ១៨,៩-១០)។

បន្ទរទី២ ៖ ព្រះអម្ចាស់ផ្ទាល់បានជួយយើង ដោយព្រះនាមព្រះអង្គ គឺព្រះអង្គដែលបានបង្កើតផ្ទៃមេឃ និងផែនដី។

(បទពាក្យ ៧)

^១-	ប្រសិនបើគ្មានព្រះអម្ចាស់	មិនជួយសន្តោសគាំទ្រទេ
	សូមអ៊ីស្រាអែលពោលហូរហែរ	ពោលកុំទំនេរតាមយើងថា	។
^២-	ប្រសិនបើគ្មានព្រះអម្ចាស់	នៅខាងយើងនោះគ្រប់វេលា
	ពេលណាសត្រូវលើកគ្នីគ្នា	សម្រុកពុះពារវាយលើយើង	។
^៣-	ពេលណាគេមានកំហឹងខ្លាំង	គេមកប្រឆាំងយើងនឹងប៉ើង
	គេនឹងត្របាក់លេបពួកយើង	មិនឱ្យរស់បានសុខសាន្តឡើយ	។
^៤-	យើងនឹងលិចលង់ក្នុងសមុទ្រ	ភិតភ័យតក់ស្លុតឥតមានស្បើយ
	ទឹកហូរនាំយើងគ្មានកោះត្រើយ	ទៅកាន់ទីឆ្ងាយគ្មានគោលដៅ	។
^៥-	ពេលយើងកំពុងអស់កម្លាំង	មានទឹកកួចខ្លាំងពន្លិចទៅ
	ដល់បាតជលសាដ៏សែនជ្រៅ	ជីវិតយើងត្រូវលង់ក្សិណក្ស័យ	។
^៦-	សូមលើកតម្កើងព្រះអម្ចាស់	ដ្បិតទ្រង់ជាព្រះមានបារមី
	ទ្រង់ពុំប្រគល់យើងក្នុងដៃ	ធ្វើរំពានៃពួកនោះឡើយ	។
^៧-	យើងរួចជីវិតដូចបក្សី	គេចផុតពីដៃព្រានព្រៃហើយ
	គឺលប់ធ្លុះធ្លាយគ្មានសល់ឡើយ	យើងបានធូរស្បើយរស់ជីវ៉ា	។
^៨-	ព្រះអម្ចាស់បានសង្គ្រោះយើង	ដោយព្រះនាមថ្កើងមានចេស្តា
	គឺព្រះអង្គដែលមានមេត្តា	បង្កើតមេឃានិងផែនដី	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ ព្រះអម្ចាស់ផ្ទាល់បានជួយយើង ដោយព្រះនាមព្រះអង្គ គឺព្រះអង្គដែលបានបង្កើតផ្ទៃមេឃ និងផែនដី។

បទលើកតម្កើងតាមលិខិតអេភេសូ (អភ ១,៣-១០)

ព្រះជាម្ចាស់ជាព្រះសង្រ្គោះរបស់យើង

បន្ទរទី៣ ៖ ព្រះជាម្ចាស់បានជ្រើសរើសយើងក្នុងអង្គព្រះគ្រីស្ត ព្រះអង្គបានតម្រូវយើងទុកជាមុន ឱ្យធ្វើជាបុត្រធីតារបស់ព្រះអង្គ។

^៣	សូមលើកតម្កើងព្រះជាម្ចាស់ ជាព្រះបិតារបស់ព្រះយេស៊ូគ្រីស្ត ជាព្រះអម្ចាស់នៃយើង ដែលបានប្រោសប្រទានព្រះពរគ្រប់យ៉ាង ផ្នែកខាងវិញ្ញាណពីស្ថានបរមសុខមកយើង ក្នុងអង្គព្រះគ្រីស្ត។
^៤	ព្រះអង្គបានជ្រើសរើសយើងក្នុងអង្គព្រះគ្រីស្ត តាំងពីមុនកំណើតពិភពលោកមកម៉្លេះ ដើម្បីឱ្យយើងបានវិសុទ្ធ និងឥតសៅហ្មង នៅចំពោះព្រះភក្ត្រព្រះអង្គ ព្រោះព្រះអង្គមានព្រះហឫទ័យស្រឡាញ់យើង។
^៥	ព្រះអង្គបានតម្រូវយើងទុកជាមុន ឱ្យធ្វើជាបុត្រធីតារបស់ព្រះអង្គ ដោយសារព្រះយេស៊ូគ្រីស្ត ស្របនឹងបំណងដ៏សប្បុរសរបស់ព្រះអង្គ
^៦	ដើម្បីឱ្យយើងលើកតម្កើងសិរីរុងរឿងនៃព្រះហឫទ័យប្រណីសន្តោស ដែលទ្រង់បានប្រោសប្រទានមកយើង ក្នុងអង្គព្រះបុត្រាដ៏ជាទីស្រឡាញ់របស់ព្រះអង្គ។
^៧	ដោយយើងរួមក្នុងអង្គព្រះគ្រីស្តនេះ ព្រះជាម្ចាស់បានលោះយើង ដោយព្រះលោហិតរបស់ព្រះអង្គ និងលើកលែងទោសឱ្យយើងបានរួចពីបាប តាមព្រះហឫទ័យប្រណីសន្តោសដ៏លើសលប់របស់ព្រះអង្គ។
^៨	ព្រះជាម្ចាស់ប្រណីសន្តោសយើងយ៉ាងខ្លាំងបំផុត គឺទ្រង់ប្រទានឱ្យយើងមានតំរិះ និងមានប្រាជ្ញាដ៏វាងវៃគ្រប់យ៉ាង។
^៩	ព្រះអង្គបានប្រោសឱ្យយើងស្គាល់ពីគម្រោងការដ៏លាក់កំបាំង នៃព្រះហឫទ័យរបស់ព្រះអង្គ តាមព្រះបំណងដ៏សប្បុរស ដែលទ្រង់បានសម្រេចទុកជាមុន ដោយព្រះអង្គផ្ទាល់។
^១០	ព្រះអង្គចាត់ចែងគម្រោងការនេះឱ្យបានសម្រេច នៅគ្រាចុងក្រោយបំផុត គឺប្រមូលអ្វីៗទាំងអស់ ដែលនៅស្ថានបរមសុខ និងនៅលើផែនដី ឱ្យរួមគ្នានៅក្នុងអង្គព្រះគ្រីស្ត ជាម្ចាស់តែមួយ។

បន្ទរ ៖ ព្រះជាម្ចាស់បានជ្រើសរើសយើងក្នុងអង្គព្រះគ្រីស្ត ព្រះអង្គបានតម្រូវយើងទុកជាមុន ឱ្យធ្វើជាបុត្រធីតារបស់ព្រះអង្គ។

ព្រះបន្ទូលរបស់ព្រះជាម្ចាស់ (យក ៤,១១-១២)

បងប្អូនអើយ មិនត្រូវនិយាយដើមគ្នាទៅវិញទៅមកឡើយ។ អ្នកណានិយាយដើម ឬថ្កោលទោសបងប្អូនណាម្នាក់ អ្នកនោះក៏ដូចជានិយាយដើមវិន័យ និងថ្កោលទោសវិន័យដែរ។ ប្រសិនបើអ្នកថ្កោលទោសវិន័យ បានសេចក្តីថា អ្នកមិនមែនកាន់វិន័យទេ គឺអ្នកថ្កោលទោសវិន័យទៅវិញ។ មានតែព្រះអម្ចាស់មួយព្រះអង្គគត់ ដែលបង្កើតវិន័យ ហើយទ្រង់ជាចៅក្រមវិនិច្ឆ័យទោស។ មានតែព្រះអង្គប៉ុណ្ណោះ ដែលអាចសង្គ្រោះ និងធ្វើឱ្យវិនាស។ រីឯអ្នកវិញ តើអ្នកមានឋានៈអ្វី បានជាហ៊ានថ្កោលទោសបងប្អូនឯទៀតៗដូច្នេះ?។

បន្ទរ៖ ឱព្រះ‌អម្ចាស់អើយ សូមប្រោសទូល‌បង្គំឱ្យជាឡើងវិញផង *ដ្បិតទូល‌បង្គំបានប្រព្រឹត្តអំពើបាបទាស់នឹងព្រះ‌ហឫទ័យព្រះ‌អង្គហើយ។ បន្ទរឡើងវិញ៖…
-ខ្ញុំទូលថា “ឱព្រះអម្ចាស់អើយ សូមអាណិតមេត្តាទូលបង្គំផង” ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ ព្រលឹងខ្ញុំសូមលើកតម្កើងព្រះអម្ចាស់ ព្រះ‌អង្គទតមើលមកខ្ញុំ ដែលជាអ្នកបម្រើដ៏ទន់‌ទាបរបស់ព្រះអង្គ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ព្រលឹងខ្ញុំសូមលើកតម្កើងព្រះអម្ចាស់ ព្រះ‌អង្គទតមើលមកខ្ញុំ ដែលជាអ្នកបម្រើដ៏ទន់‌ទាបរបស់ព្រះអង្គ។

ពាក្យអង្វរសកល

ព្រះគ្រីស្តមានព្រះហឫទ័យចង់ណែនាំមនុស្សទាំងអស់ ឱ្យទទួលការសង្គ្រោះ។ យើងខ្ញុំសូមទូលអង្វរព្រះអង្គ ដោយអស់ពីដួងចិត្តថា ៖

បន្ទរ ៖ ឱព្រះអម្ចាស់អើយ ! សូមព្រះអង្គទាញមនុស្សទាំងអស់ មកឯព្រះអង្គផង។

ឱព្រះអម្ចាស់អើយ! ព្រះអង្គបានរំដោះយើងខ្ញុំចេញពីទាសភាពនៃអំពើបាប ដោយសារព្រះលោហិតរបស់ព្រះអង្គ
—សូមប្រោសប្រទានសេរីភាពឱ្យយើងខ្ញុំជាបុត្រធីតារបស់ព្រះអង្គផង។ (បន្ទរ)

សូមព្រះអង្គប្រោសប្រទានព្រះអំណោយទានដល់លោក……….ជាអភិបាលព្រះសហគមន៍យើងខ្ញុំ និងអស់លោកអភិបាលព្រះសហគមន៍នានាទូទាំងពិភពលោក
—សូមឱ្យអស់លោកដែលទទួលខុសត្រូវលើអគ្គសញ្ញារបស់ព្រះអង្គមានអំណរសប្បាយយ៉ាងក្លៀវក្លាផង។ (បន្ទរ)

សូមព្រះអង្គប្រោសប្រទានដល់អស់អ្នកដែលកំពុងស្វែងរកសេចក្តីពិត សូមឱ្យពួកគេអាចរកឃើញសេចក្តីពិតដែលមាននៅក្នុងព្រះអង្គ
—ហើយសូមឱ្យពួកគេកាន់តែមានចិត្តចង់ស្វែងរកបន្ថែមទៀតផង។ (បន្ទរ)

ឱព្រះអម្ចាស់អើយ! សូមព្រះអង្គលួងលោមដល់ស្ត្រីមេម៉ាយ កុមារកំព្រា និងអស់អ្នកដែលត្រូវគេបោះបង់ចោល
—ដើម្បីឱ្យពួកគេមានអារម្មណ៍ជិតស្និទ្ធ និងជាប់ចិត្តជាមួយព្រះអង្គផង។ (បន្ទរ)

សូមព្រះអង្គទទួលបងប្អូនយើងខ្ញុំដែលបានទទួលមរណភាពទៅហើយនោះ បានចូលទៅក្នុងព្រះរាជ្យនៃស្ថានបរមសុខ
—ឱ្យពួកគេបាននៅជាមួយព្រះបិតា និងព្រះវិញ្ញាណដ៏វិសុទ្ធ និងព្រះអង្គផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះជាម្ចាស់ ជាព្រះបិតា! នៅចុងបញ្ចប់នៃថ្ងៃនេះ យើងខ្ញុំចូលមកចំពោះព្រះភក្រ្តព្រះអង្គ ដែលជាពន្លឺមិនចេះរលត់។ សូមព្រះពន្លឺព្រះអង្គបំភ្លឺក្នុងទីងងឹតនាពេលរាត្រី ហើយសូមព្រះអង្គលើកលែងទោសអំពើបាប និងភាពបរាជ័យរបស់យើងខ្ញុំផង។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

40 Views

Post Views: 40