រដូវធម្មតា

ថ្ងៃចន្ទ អាទិត្យទី៧
_{(ពេលព្រឹក)}

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ៖ ចូរ​យើង​នាំ​គ្នា​ចូល​មក​ចំពោះ​ព្រះ‌ភក្ត្រ​ព្រះ‌អង្គ ទាំង​អរ​ព្រះ‌គុណ និង​ស្មូត​ទំនុក‌តម្កើង​ថ្វាយ​ព្រះ‌អង្គ។

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៨៤

ទូលបង្គំ​ស្រឡាញ់​ព្រះ‌ដំណាក់​របស់​ព្រះអង្គ​ណាស់!

ក្នុងលោកនេះ យើងគ្មានក្រុងដែលនៅស្ថិតស្ថេរគង់វង្សរហូតឡើយ យើងខំស្វែងរកក្រុងដែលនឹងមាននៅពេលខាងមុខនោះវិញ (ហប ១៣,១៤)។

បន្ទរទី១ ៖ អស់អ្នកដែលរស់នៅក្នុងព្រះដំណាក់របស់ព្រះអង្គ មានសុភមង្គលហើយ។

២	ឱព្រះអម្ចាស់នៃពិភពទាំងមូលអើយ! ទូលបង្គំស្រឡាញ់ព្រះដំណាក់របស់ព្រះអង្គខ្លាំងណាស់!
៣	ទូលបង្គំអន្ទះអន្ទែង ប្រាថ្នាចង់ចូលទៅក្នុងព្រះវិហាររបស់ព្រះអម្ចាស់ពន់ពេកក្រៃ ទូលបង្គំចង់នៅជាមួយព្រះដែលមានព្រះជន្មគង់នៅ អស់ពីកម្លាំងកាយ និងកម្លាំងចិត្ត។
៤	ឱព្រះអម្ចាស់នៃពិភពទាំងមូល! ឱព្រះអម្ចាស់ជាព្រះមហាក្សត្រនៃទូលបង្គំអើយ! សូម្បីតែសត្វចាប និងសត្វត្រចៀកកាំ ក៏រកកន្លែងធ្វើសំបុកដាក់កូនចៅវា ឱ្យនៅជិតអាសនៈរបស់ព្រះអង្គបានដែរ។
៥	អស់អ្នកដែលរស់នៅក្នុងព្រះដំណាក់របស់ព្រះអង្គ មានសុភមង្គលហើយ គេនឹងសរសើរតម្កើងព្រះអង្គរហូតតរៀងទៅ។
៦	អ្នកណាពឹងផ្អែកលើកម្លាំងដែលមកពីព្រះអង្គ អ្នកនោះមានសុភមង្គលហើយ! ដ្បិតគេធ្វើដំណើរឡើងទៅកាន់ព្រះដំណាក់របស់ព្រះអង្គ ដោយចិត្តស្មោះសរ។
៧	នៅពេលពួកគេដើរកាត់ជ្រោះរីងស្ងួត ព្រះអង្គធ្វើឱ្យទឹកនោះ ប្រែទៅជាប្រភពទឹក ភ្លៀងនៅដើមរដូវ ក៏ធ្លាក់មកជាព្រះពរលើកន្លែងនោះដែរ។
៨	ពួកគេកាន់តែខិតចូលជិត ក៏កាន់តែមានកម្លាំងខ្លាំងឡើងៗ គេមកនៅចំពោះព្រះភក្ត្រព្រះជាម្ចាស់ នៅលើភ្នំស៊ីយ៉ូន។
៩	ឱព្រះអម្ចាស់ជាព្រះនៃពិភពទាំងមូលអើយ! សូមស្តាប់ពាក្យអង្វររបស់ទូលបង្គំ! ឱព្រះនៃលោកយ៉ាកុបអើយ! សូមផ្ទៀងព្រះកាណ៌ស្តាប់ទូលបង្គំផង!។
១០	ឱព្រះជាម្ចាស់អើយ! សូមទតមើលស្តេចដែលជាខែលការពារយើងខ្ញុំ សូមទ្រង់ព្រះសន្តោសទតមកព្រះរាជា ដែលព្រះអង្គបានចាក់ប្រេងអភិសេក!។
១១	មួយថ្ងៃនៅក្នុងព្រះវិហាររបស់ព្រះអង្គ ប្រសើរជាងមួយពាន់ថ្ងៃនៅកន្លែងផ្សេងទៀត ខ្ញុំសម្រេចចិត្តឈរនៅមាត់ទ្វារព្រះដំណាក់នៃព្រះជាម្ចាស់របស់ខ្ញុំ ជាជាងទៅស្នាក់នៅក្នុងផ្ទះរបស់មនុស្សអាក្រក់
១២	ព្រះជាអម្ចាស់ជាពន្លឺថ្ងៃ និងជាខែលការពារយើង ព្រះអម្ចាស់ប្រណីសន្តោស និងប្រទានឱ្យយើងបានរុងរឿង ព្រះអង្គតែងតែប្រទានសុភមង្គល ឱ្យអស់អ្នកដែលរស់នៅដោយគ្មានកំហុស។
១៣	ឱព្រះអម្ចាស់ជាព្រះនៃពិភពទាំងមូលអើយ! អ្នកណាផ្ញើជីវិតលើព្រះអង្គ អ្នកនោះមានសុភមង្គលហើយ!។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ អស់អ្នកដែលរស់នៅក្នុងព្រះដំណាក់របស់ព្រះអង្គ មានសុភមង្គលហើយ។

បទលើកតម្កើងតាមព្យាការីអេសាយ (អស ២,២-៥)

ភ្នំ​ដែល​មាន​ព្រះដំណាក់​របស់​ព្រះ‌អង្គដាក់​នៅ​លើ​កំពូល​ភ្នំ​ទាំង‌ឡាយ

“មនុស្សគ្រប់ជាតិសាសន៍នឹងនាំគ្នាមកក្រាបថ្វាយបង្គំព្រះអង្គ ដ្បិតគេបាន​ឃើញច្បាស់ថា ព្រះអង្គវិនិច្ឆ័យដោយយុត្តិធម៌” (វវ ១៥,៤)។

បន្ទរទី២ ៖ ចូរនាំគ្នាមក យើងឡើងលើភ្នំរបស់ព្រះអម្ចាស់! ។

(បទព្រហ្មគីតិ)

បន្ទរ ៖ ចូរនាំគ្នាមក យើងឡើងលើភ្នំរបស់ព្រះអម្ចាស់! ។

ទំនុកតម្កើងលេខ ៩៦

ព្រះអម្ចាស់ជាព្រះមហាក្សត្រ និងជាអ្នកវិនិច្ឆ័យទោសពិភពលោក

អ្នកទាំងនោះច្រៀងចម្រៀងថ្មីនៅមុខបល្ល័ង្ក នៅមុខសត្វមានជីវិតទាំងបួន (វវ ១៤,៣)។

បន្ទរទី៣ ៖ ចូរច្រៀងថ្វាយព្រះអម្ចាស់ ចូរសរសើរតម្កើងព្រះនាមព្រះអង្គ។

១	ចូរច្រៀងបទថ្មីថ្វាយព្រះអម្ចាស់! មនុស្សនៅផែនដីទាំងមូលអើយ! ចូរច្រៀងថ្វាយព្រះអម្ចាស់!
២	ចូរច្រៀងថ្វាយព្រះអម្ចាស់ ចូរសរសើរតម្កើងព្រះនាមព្រះអង្គ ចូរប្រកាសជារៀងរាល់ថ្ងៃនូវការសង្គ្រោះរបស់ព្រះអង្គ។
៣	ចូរប្រកាសនៅក្នុងចំណោមប្រជាជាតិនានា នូវសីរីរុងរឿងរបស់ព្រះអង្គ ចូរប្រកាសនៅក្នុងចំណោមប្រជាជនទាំងឡាយ នូវស្នាព្រះហស្តដ៏អស្ចារ្យរបស់ព្រះអង្គ !
៤	ដ្បិតព្រះអម្ចាស់ជាព្រះដ៏ប្រសើរឧត្តម យើងត្រូវតែសរសើរតម្កើងឱ្យអស់ពីដួងចិត្ត ព្រះ‌អង្គ​គួរ​ជា​ទី​ស្ញែង​ខ្លាច​ជាង​ព្រះ​ផង​ទាំង​ពួង។
៥	ព្រះទាំងប៉ុន្មានរបស់ជាតិសាសន៍នានា សុទ្ធតែឥតបានការអ្វីទាំងអស់ រីឯព្រះអម្ចាស់វិញ ព្រះអង្គបានបង្កើតផ្ទៃមេឃ។
៦	មានពន្លឺរស្មីចិញ្ចែងចិញ្ចាចចាំងចេញពីព្រះភក្ត្ររបស់ព្រះអង្គ ព្រះដំណាក់របស់ព្រះអង្គពោរពេញទៅដោយឫទ្ធិបារមីដ៏ថ្កុំថ្កើងរុងរឿង។
៧	ប្រជាជាតិទាំងឡាយអើយ! ចូរនាំគ្នាលើកតម្កើងសីរីរុងរឿងព្រះអម្ចាស់! ចូរថ្លែងអំពីឫទ្ធានុភាពរបស់ព្រះអង្គ!។
៨	ចូរលើកតម្កើងសីរីរុងរឿងនៃព្រះនាមរបស់ព្រះអម្ចាស់ ចូរនាំគ្នាយកតង្វាយចូលមកក្នុងព្រះវិហាររបស់ព្រះអង្គ!
៩	ចូរនាំគ្នាក្រាបថ្វាយបង្គំព្រះអម្ចាស់ នៅពេលព្រះអង្គសម្តែងភាពវិសុទ្ធរបស់ព្រះអង្គ! មនុស្សនៅលើផែនដីទាំងមូលអើយ! ចូរញាប់ញ័រនៅចំពោះព្រះអង្គចុះ!
១០	ចូរប្រកាសនៅក្នុងចំណោមប្រជាជាតិនានាថា ព្រះអម្ចាស់គ្រងរាជ្យ ពិភពលោកនៅតែរឹងមាំឥតរង្គើឡើយ។ ព្រះអម្ចាស់គ្រប់គ្រងលើប្រជារាស្ត្រនានាដោយយុត្តិធម៌។
១១	ចូរឱ្យផ្ទៃមេឃមានអំណរសប្បាយ ចូរឱ្យផែនដីរីករាយឡើង ចូរឱ្យសមុទ្រ និងអ្វីៗដែលមានជីវិតនៅក្នុងសមុទ្រ បន្លឺសំឡេងយ៉ាងអឺងកង!
១២	ចូរឱ្យស្រែចម្ការ និងអ្វីៗដែលស្ថិតនៅទីនោះ ត្រេកអរសប្បាយ ចូរឱ្យព្រៃព្រឹក្សាទាំងប៉ុន្មាន ស្រែកហ៊ោរនៅចំពោះព្រះភក្ត្រព្រះអម្ចាស់
	ដ្បិតព្រះអង្គយាងមក ព្រះអង្គយាងមកវិនិច្ឆ័យផែនដី ព្រះអង្គនឹងវិនិច្ឆ័យផែនដីដោយយុត្តិធម៌ ព្រះអង្គនឹងវិនិច្ឆ័យប្រជាជនទាំងឡាយ ដោយទៀងត្រង់។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ចូរច្រៀងថ្វាយព្រះអម្ចាស់ ចូរសរសើរតម្កើងព្រះនាមព្រះអង្គ។

ព្រះបន្ទូលរបស់ព្រះជាម្ចាស់ (យក ២,១២-១៣)

បងប្អូនត្រូវនិយាយ និងប្រព្រឹត្តឱ្យស្របនឹងវិន័យដែលផ្តល់សេរីភាព គឺមានតែវិន័យនោះហើយ ដែលនឹងវិនិច្ឆ័យបងប្អូន ដ្បិតអ្នកណាគ្មានចិត្តមេត្តាករុណា ព្រះជាម្ចាស់ក៏នឹងវិនិច្ឆ័យទោសអ្នកនោះ ដោយឥតមេត្តាករុណាដែរ។ អ្នកមានចិត្តមេត្តាករុណា មិនខ្លាចព្រះអង្គវិនិច្ឆ័យទោសឡើយ។

បន្ទរ៖ សូម​លើក​តម្កើង​ព្រះ‌អម្ចាស់ជា​ព្រះ​នៃយើង *តាំង​ពី​ដើម​រៀង​មក ហើយ​អស់‌កល្ប​ត​រៀង​ទៅ!។ បន្ទរឡើងវិញ៖….
-គ្មាន​នរណា​អាច​ផ្ទឹម​ស្មើនឹង​ព្រះ‌អង្គ​បាន​ទេ ការ​អស្ចារ្យ​ទាំង​នោះ​មាន​ចំនួន​ច្រើន​ឥត​គណនា ទូលបង្គំមិន​អាច​ពណ៌នា​អស់​ឡើយ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ ៖ សូមលើកតម្កើងព្រះអម្ចាស់ ជាព្រះជាម្ចាស់នៃយើង។

៦៨	”សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល ដ្បិតទ្រង់សព្វព្រះហឫទ័យយាងមករំដោះប្រជារាស្ត្ររបស់ព្រះអង្គ។
៦៩	ទ្រង់បានប្រទានព្រះសង្គ្រោះដ៏មានឫទ្ធិមួយព្រះអង្គ ពីក្នុងចំណោមព្រះញាតិវង្សរបស់ព្រះបាទដាវីឌ ជាអ្នកបម្រើព្រះអង្គឱ្យមកយើង។
៧០	ព្រះជាម្ចាស់ប្រទានព្រះសង្គ្រោះនេះមកយើង ស្របនឹងព្រះបន្ទូលសន្យា ថ្លែងតាមរយៈព្យាការីរបស់ព្រះអង្គនៅជំនាន់ដើម
៧១	គឺព្រះអង្គសង្គ្រោះយើងឱ្យរួចពីកណ្តាប់ដៃរបស់ខ្មាំងសត្រូវ និងរួចពីអំណាចរបស់អ្នកដែលស្អប់យើង
៧២	ព្រះអង្គសម្ដែងព្រះហឫទ័យមេត្តាករុណាដល់បុព្វបុរសយើង ហើយគោរពតាមសម្ពន្ធមេត្រីរបស់ព្រះអង្គយ៉ាងស្មោះស្ម័គ្រ
៧៣	គឺព្រះអង្គបានសន្យាយ៉ាងម៉ឺងម៉ាត់ដល់លោកអប្រាហាំ ជាបុព្វបុរសរបស់យើងថា
៧៤	ទ្រង់នឹងរំដោះយើងឱ្យរួចពីកណ្តាប់ដៃរបស់ខ្មាំងសត្រូវ ដើម្បីយើងអាចគោរពបម្រើព្រះអង្គបានដោយឥតភ័យខ្លាច
៧៥	ព្រមទាំងឱ្យយើងរស់នៅបានបរិសុទ្ធ និងសុចរិតជាទីគាប់ព្រះហឫទ័យព្រះជាម្ចាស់ ជារៀងរាល់ថ្ងៃ រហូតអស់មួយជីវិត។
៧៦	ចំណែកឯកូនវិញ កូននឹងទៅជាព្យាការីរបស់ព្រះដ៏ខ្ពង់ខ្ពស់បំផុត ព្រោះកូននឹងដើរមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។
៧៧	កូននឹងឱ្យប្រជារាស្ត្ររបស់ព្រះអង្គដឹងថា ព្រះអង្គសង្គ្រោះគេ ដោយលើកលែងគេឱ្យរួចពីបាប។
៧៨	ព្រះរបស់យើងមានព្រះទ័យមេត្តាករុណាដ៏លើសលប់ ព្រះអង្គប្រទានថ្ងៃរះពីស្ថានលើមក ដើម្បីរំដោះយើង
៧៩	និងដើម្បីបំភ្លឺអស់អ្នកដែលស្ថិតនៅក្នុងទីងងឹត ក្រោមអំណាចនៃសេចក្តីស្លាប់ ព្រមទាំងតម្រង់ផ្លូវយើងឆ្ពោះទៅរកសេចក្តីសុខសាន្ត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ឬ ទំនុកតម្កើងរបស់លោកសាការី (តាមបែបស្មូត) បទពាក្យ ៧

៦៨-	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្ម័គ្រស្មោះ	យាងមករំដោះរាស្ត្រព្រះអង្គ	។
៦៩-	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	នៃអង្គដាវីឌបម្រើជាក់	។
៧០-	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលអាក់
	ដូចបានសន្យាតាមរយៈ	ព្យាការីធ្លាប់ស្ម័គ្រកាលគ្រាមុន	។
៧១-	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២-	ព្រះអង្គសម្ដែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣-	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូច្នេះថា	។
៧៤-	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបវន្ទា	ព្រះអង្គគ្រប់គ្រាគ្មានភ័យភិត	។
៧៥-	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦-	ចំណែកឯរូបរបស់កូន	នឹងក្លាយខ្លួនជាព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧-	កូននឹងធ្វើឱ្យអស់ប្រជា	រាស្ត្រទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨-	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩-	សម្រាប់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះទៅរកក្តីសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ សូមលើកតម្កើងព្រះអម្ចាស់ ជាព្រះជាម្ចាស់នៃយើង។

ពាក្យអង្វរសកល

ព្រះជាម្ចាស់បានបង្កើតមនុស្សមក ដើម្បីឱ្យគេថ្វាយសិរីរុងរឿងទៅព្រះអង្គ តាមរយៈកិច្ចការដែលគេប្រព្រឹត្ត។ យើងខ្ញុំសូមទូលអង្វរព្រះអង្គថា ៖

បន្ទរ៖ ឱព្រះអម្ចាស់អើយ ! សូមឱ្យយើងខ្ញុំថ្វាយសិរីរុងរឿងទៅព្រះនាមព្រះអង្គ។

សូមព្រះអង្គគង់នៅជាមួយយើងខ្ញុំ នៅពេលយើងខ្ញុំបំពេញមុខងារប្រចាំថ្ងៃ
—ហើយសូមព្រះអង្គជួយយើងខ្ញុំយកចិត្តទុកដាក់ ដល់អស់អ្នកដែលគ្មានការងារធ្វើផង។ (បន្ទរ)

យើងខ្ញុំសូមអរព្រះគុណព្រះអង្គដែលបានប្រទាននូវថ្ងៃថ្មីនេះ
—ហើយសូមព្រះអង្គថែរក្សាការពារជីវិតរបស់យើងខ្ញុំផង។ (បន្ទរ)

ព្រះអង្គបានត្រាស់ហៅយើងខ្ញុំឱ្យចេះទទួលខុសត្រូវក្នុងលោកនេះ
—សូមព្រះអង្គជួយយើងខ្ញុំឱ្យចេះកសាងសង្គមប្រកបទៅដោយយុត្តិធម៌។ (បន្ទរ)

សូមព្រះអង្គប្រោសប្រទានអំណរសប្បាយ និងសេចក្តីសុខសាន្តដល់យើងខ្ញុំ
—សូមព្រះអង្គប្រទានពរដល់អស់អ្នកដែលយើងខ្ញុំនឹងជួបនៅថ្ងៃនេះផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះជាអម្ចាស់ ! ព្រះអង្គជាព្រះមហាក្សត្រនៅស្ថានបរមសុខ និងនៅលើផែនដី។ សូមព្រះអង្គដឹកនាំចិត្តគំនិត និងរូបកាយរបស់យើងខ្ញុំឱ្យបានវិសុទ្ធពេញមួយថ្ងៃនេះ។ សូមជួយយើងខ្ញុំឱ្យមានចិត្តស្មោះត្រង់កាន់តាមវិន័យរបស់ព្រះអង្គ ទាំងចិត្តគំនិត ទាំងពាក្យសម្តី និងការប្រព្រឹត្តរបស់យើងខ្ញុំ។ សូមជួយយើងខ្ញុំចាប់ពីពេលនេះ និងរហូតតទៅ ហើយសូមរំដោះយើងខ្ញុំឱ្យរួចពីបាប ព្រមទាំងនាំយើងខ្ញុំទៅកាន់ការសង្រ្គោះ ក្នុងព្រះរាជ្យដែលព្រះអង្គគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។