រដូវសែសិបថ្ងៃ សប្តាហ៍ទី២ ថ្ងៃសៅរ៍

Posted on 15 ខែមីនា 202512 ខែកុម្ភៈ 2025 by Siya Khim

រដូវសែសិបថ្ងៃ

ថ្ងៃអាទិត្យ អាទិត្យទី២
_{(ថ្ងៃសៅរ៍ ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩,១០៥-១១២

ការស្មឹងស្មាធិ៍លើច្បាប់របស់ព្រះជាម្ចាស់

វិន័យរបស់ខ្ញុំមានដូចតទៅនេះ គឺអ្នករាល់គ្នាស្រឡាញ់គ្នាទៅវិញទៅមក (យហ ១៥,១២)។

បន្ទរទី១ ៖ ព្រះយេស៊ូនាំលោកសិលា លោកយ៉ាកុប និងលោកយ៉ូហាន ជាប្អូន ឡើងទៅលើភ្នំ ដាច់ឡែកពីគេ។ ពេលនោះ ព្រះអង្គប្រែជាមានទ្រង់‌ទ្រាយប្លែកពីមុន នៅមុខសាវ័កទាំងបី។

^១០៥	ព្រះបន្ទូលរបស់ព្រះអង្គជាចង្កៀង ដែលបំភ្លឺជំហានទូលបង្គំ និងជាពន្លឺដែលបំភ្លឺផ្លូវរបស់ទូលបង្គំ។
^១០៦	ទូលបង្គំសូមសន្យាដោយឥតងាករេថា ទូលបង្គំនឹងប្រតិបត្តិតាមសេចក្តីសម្រេចដ៏សុចរិតរបស់ព្រះអង្គ។
^១០៧	បពិត្រព្រះអម្ចាស់! ទូលបង្គំរងទុក្ខវេទនាខ្លាំងពន់ពេកណាស់ សូមប្រោសប្រទានឱ្យទូលបង្គំមានជីវិតឡើងវិញ ស្របតាមព្រះបន្ទូលរបស់ព្រះអង្គផង!
^១០៨	ឱព្រះអម្ចាស់អើយ! សូមទទួលពាក្យអង្វររបស់ទូលបង្គំ ទុកជាតង្វាយ សូមបង្រៀនក្រិត្យវិន័យរបស់ព្រះអង្គឱ្យទូលបង្គំស្គាល់ផង!
^១០៩	ជីវិតទូលបង្គំប្រឈមមុខទល់នឹងអន្តរាយជានិច្ច ប៉ុន្តែ ទូលបង្គំមិនភ្លេចធម្មវិន័យរបស់ព្រះអង្គទេ។
^១១០	មនុស្សអាក្រក់នាំគ្នាដាក់អន្ទាក់ចាំចាប់ទូលបង្គំ តែទូលបង្គំមិនវង្វេងចេញឆ្ងាយពីច្បាប់របស់ព្រះអង្គឡើយ។
^១១១	ដំបូន្មានរបស់ព្រះអង្គជាកេរមត៌ករបស់ទូលបង្គំ ដំបូន្មានទាំងនេះធ្វើឱ្យទូលបង្គំមានអំណរនៅក្នុងចិត្ត។
^១១២	ទូលបង្គំប្តេជ្ញាចិត្តធ្វើតាមក្រិត្យវិន័យរបស់ព្រះអង្គ គឺជារង្វាន់របស់ទូលបង្គំរហូតដល់ទីបំផុត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ព្រះយេស៊ូនាំលោកសិលា លោកយ៉ាកុប និងលោកយ៉ូហាន ជាប្អូន ឡើងទៅលើភ្នំ ដាច់ឡែកពីគេ។ ពេលនោះ ព្រះអង្គប្រែជាមានទ្រង់‌ទ្រាយប្លែកពីមុន នៅមុខសាវ័កទាំងបី។

ទំនុកតម្កើងលេខ ១៦

បពិត្រព្រះអម្ចាស់ ! ព្រះអង្គជាចំណែកមត៌ករបស់ខ្ញុំ

ព្រះ‌ជាម្ចាស់បានប្រោសលោកឲ្យរស់ឡើងវិញ ព្រះ‌អង្គដោះលែងលោកឲ្យរួចពីទុក្ខលំបាកនៃសេចក្ដីស្លាប់ (កក ២,២៤)។

បន្ទរទី២៖ ព្រះភក្ត្ររបស់ព្រះអង្គបញ្ចេញរស្មីចែងចាំងដូចពន្លឺថ្ងៃ ហើយព្រះពស្ដ្ររបស់ព្រះ‌អង្គត្រឡប់ជាមានពណ៌សដូចព្រិល។

(បទពាក្យ ៧)

^១-	ឱព្រះជាម្ចាស់ដ៏ឧត្តម	សូមការពារខ្ញុំឱ្យសុខសាន្ត
	ដ្បិតទូលបង្គំសុំផ្ញើប្រាណ	ជ្រកក្រោមទីស្ថានម្លប់បារមី	។
^២-	ខ្ញុំសូមទូលថ្វាយព្រះម្ចាស់ថា	ព្រះអង្គពិតជាអម្ចាស់ថ្លៃ
	ក្រៅពីព្រះអង្គឥតមានអ្វី	ផ្តល់មង្គលជ័យគ្រាអាសន្ន	។
^៣-	អារុក្ខអារក្សអ្នកតាព្រៃ	ម្ចាស់ទឹកម្ចាស់ដីកាលពីមុន
	ដែលខ្ញុំពេញចិត្តខ្លាំងពេកពន់	ផ្តល់តែទារុណរាល់វេលា	។
^៤-	ទូលបង្គំនឹងមិនចូលរួម	មិនទទួលព្រមរួមជាគ្នា
	គោរពនិងថ្វាយយញ្ញបូជា	មិនពោលនាមាព្រះក្លែងក្លាយ	។
^៥-	បពិត្រព្រះអម្ចាស់ឧត្តម	ព្រះអង្គជាចំណែកស្រស់ស្រាយ
	មត៌កនៃខ្ញុំឥតក្លែងក្លាយ	ផ្តល់អ្វីទាំងឡាយតាមប្រាថ្នា	។
^៦-	ព្រះអង្គប្រទានកេរមត៌ក	វិសេសឥតអាក់ដ៏ថ្លៃថ្លា
	មកទូលបង្គំខ្ញុំនេះណា	ជាកេរអស្ចារ្យប្រសើរផុត	។
^៧-	ខ្ញុំសូមតម្កើងព្រះអម្ចាស់	ព្រោះព្រះអង្គនេះសែនមោះមុត
	ទ្រង់ផ្តល់យោបល់ខ្ញុំម្នាក់គត់	ទោះយប់ងងឹតក៏តឿនដែរ	។
^៨-	ខ្ញុំនឹកដល់ព្រះអម្ចាស់ជាប់	ដែលជាទម្លាប់ទ្រង់គង់ក្បែរ
	ខាងស្តាំរូបខ្ញុំឥតប្រួលប្រែ	ខ្ញុំមិនបែកបែរញាប់ញ័រឡើយ	។
^៩-	ហេតុនេះបានជាខ្ញុំរីករាយ	ត្រេកអរសប្បាយបានល្ហែល្ហើយ
	ខ្ញុំបានសម្រាកកាយធូរស្បើយ	ដោយសុខសាន្តហើយផុតកង្វល់	។
^១០-	ដ្បិតព្រះអង្គមិនបោះបង់ខ្ញុំ	ឱ្យរងទុក្ខធំស្លាប់សោតសល់
	ព្រះអង្គក៏មិនបណ្តោយដល់	សពបម្រើផ្ទាល់ស្អុយរលួយ	។
^១១-	ព្រះអង្គបង្ហាញផ្លូវជីវិត	ឱ្យខ្ញុំឃើញពិតគ្មានភ័យព្រួយ
	ដោយព្រះអង្គនៅគង់ជាមួយ	ទូលបង្គំគ្មានព្រួយអរសប្បាយ	។
	ដោយព្រះអង្គគង់នៅខាងស្តាំ	ជាប់ជាប្រចាំមិនជិនណាយ
	ទូលបង្គំសែនរីករាយសប្បាយ	អស់កល្បវែងឆ្ងាយតរៀងទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ ព្រះភក្ត្ររបស់ព្រះអង្គបញ្ចេញរស្មីចែងចាំងដូចពន្លឺថ្ងៃ ហើយព្រះពស្ដ្ររបស់ព្រះ‌អង្គត្រឡប់ជាមានពណ៌សដូចព្រិល។

បទលើកតម្កើងតាមលិខិតទៅភីលីព (ភីល ២,៦-១១)

ព្រះគ្រីស្តជាអ្នកបម្រើដ៏វិសុទ្ធរបស់ព្រះជាម្ចាស់

បន្ទរទី៣ ៖ លោកម៉ូសេ និងព្យាការីអេលី កំពុងតែសន្ទនាជាមួយព្រះយេស៊ូអំពីទុក្ខលំបាក និងការសោយទិវង្គតរបស់ព្រះអង្គ ហើយទ្រង់នឹងសម្រេចរាល់កិច្ចការទាំងអស់នៅក្រុងយេរូសាឡឹម។

^៦	ទោះបីព្រះអង្គមានឋានៈជាព្រះជាម្ចាស់ក៏ដោយ ក៏ព្រះអង្គពុំបានក្តោបក្តាប់ឋានៈ ដែលស្មើនឹងព្រះជាម្ចាស់នេះ ទុកជាកម្មសិទ្ធិដាច់មុខរបស់ព្រះអង្គឡើយ។
^៧	ផ្ទុយទៅវិញ ព្រះអង្គបានលះបង់អ្វីៗទាំងអស់ មកយកឋានៈជាទាសករ ព្រះអង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។
^៨	ព្រះអង្គបានដាក់ខ្លួនធ្វើតាមព្រះបញ្ជា រហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។
^៩	ហេតុនេះហើយ បានជាព្រះជាម្ចាស់ លើកតម្កើងព្រះអង្គឡើងយ៉ាងខ្ពង់ខ្ពស់បំផុត ព្រមទាំងប្រោសប្រទានឱ្យព្រះអង្គមានព្រះនាមប្រសើរលើសអ្វីៗទាំងអស់
^១០	ដើម្បីឱ្យអ្វីៗទាំងអស់ ទាំងនៅស្ថានបរមសុខ ទាំងនៅលើផែនដី ទាំងនៅក្រោមដី នាំគ្នាក្រាបថ្វាយបង្គំ នៅពេលណាឮព្រះនាមព្រះយេស៊ូ
^១១	និងឱ្យមនុស្សគ្រប់ភាសាប្រកាសឡើងថា ព្រះយេស៊ូគ្រីស្តជាព្រះអម្ចាស់ ដើម្បីលើកតម្កើងសិរីរុងរឿងព្រះជាម្ចាស់ជាព្រះបិតា។

បន្ទរ ៖ លោកម៉ូសេ និងព្យាការីអេលី កំពុងតែសន្ទនាជាមួយព្រះយេស៊ូអំពីទុក្ខលំបាក និងការសោយទិវង្គតរបស់ព្រះអង្គ ហើយទ្រង់នឹងសម្រេចរាល់កិច្ចការទាំងអស់នៅក្រុងយេរូសាឡឹម។

ព្រះបន្ទូលរបស់ព្រះជាម្ចាស់ (២ករ ៦,១-៤^ក)

ដោយយើងធ្វើការរួមជាមួយព្រះ‌ជាម្ចាស់ យើងសូមទូន្មានបង‌ប្អូនថា កុំទទួលការប្រណី‌សន្ដោសរបស់ព្រះ‌អង្គ យកមកទុកចោលជាអសារឥតការឡើយ ដ្បិតព្រះ‌ជាម្ចាស់មានព្រះ‌បន្ទូលថា: «យើងបានឆ្លើយតបមកអ្នកនៅគ្រាណាដែលយើងគាប់ចិត្ត យើងបានជួយអ្នកនៅថ្ងៃណាដែលយើងសង្គ្រោះមនុស្សលោក»។ គ្រាដែលព្រះ‌ជាម្ចាស់គាប់ព្រះ‌ហឫទ័យ គឺឥឡូវនេះហើយ! គឺឥឡូវនេះហើយ ជាថ្ងៃដែលព្រះ‌ជាម្ចាស់សង្គ្រោះមនុស្សលោក!។ យើងមិនចង់ឲ្យកើតមានរឿងអ្វីមួយ ដែលបណ្ដាលឲ្យនរណាម្នាក់ជំពប់ចិត្ត បាត់ជំនឿឡើយ ដើម្បីកុំឲ្យគេបន្ទោសមុខ‌ងាររបស់យើង។ ផ្ទុយទៅវិញ យើងតាំងខ្លួនជាអ្នកបម្រើរបស់ព្រះ‌ជាម្ចាស់ ក្នុងគ្រប់កាលៈ‌ទេសៈទាំងអស់។

បន្ទរ៖ ឱព្រះ‌អម្ចាស់អើយ ! សូមព្រះសណ្តាប់ និងអាណិត‌អាសូរយើងខ្ញុំផង! *ដ្បិតយើងខ្ញុំបានប្រព្រឹត្តអំពើបាប ទាស់នឹងព្រះ‌ហប្ញទ័យរបស់ព្រះ‌អង្គ។ បន្ទរឡើងវិញ៖…
-សូមព្រះគ្រីស្តយេស៊ូសណ្តាប់ពាក្យអង្វររបស់យើងខ្ញុំ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ មានព្រះ‌សូរ‌សៀងបន្លឺពីក្នុងពពកមកថា៖ «នេះជាបុត្រដ៏ជាទីស្រឡាញ់របស់យើង យើងគាប់‌ចិត្តនឹងព្រះ‌អង្គណាស់ ចូរស្ដាប់ព្រះ‌អង្គចុះ!» ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ មានព្រះ‌សូរ‌សៀងបន្លឺពីក្នុងពពកមកថា៖ «នេះជាបុត្រដ៏ជាទីស្រឡាញ់របស់យើង យើងគាប់‌ចិត្តនឹងព្រះ‌អង្គណាស់ ចូរស្ដាប់ព្រះ‌អង្គចុះ!» ។

ពាក្យអង្វរសកល

ចូរយើងលើកតម្កើងសិរីរុងរឿងរបស់ព្រះជាម្ចាស់ ដែលបានខ្វល់ខ្វាយពីយើងរាល់គ្នា។ ចូរយើងហៅរកព្រះអង្គ ហើយទូលថា ៖

បន្ទរ៖ បពិត្រព្រះអម្ចាស់ ! សូមសង្រ្គោះប្រជារាស្រ្តដែលព្រះអង្គបានលោះ !

បពិត្រព្រះអម្ចាស់ដែលប្រទានអំណោយ និងជាប្រភពនៃសេចក្តីពិតគ្រប់យ៉ាង! សូមព្រះអង្គប្រទានព្រះពរយ៉ាងបរិបូណ៍ដល់លោកអភិបាល
—និងថែរក្សាអស់អ្នកដែលជឿទុកចិត្តលើភាពស្មោះត្រង់របស់អស់លោក ក្នុងសេចក្តីបង្រៀនរបស់ក្រុមគ្រីស្តទូត។ (បន្ទរ)

សូមព្រះអង្គចាក់បង្ហូរសេចក្តីស្រឡាញ់របស់ព្រះអង្គ មកក្នុងដួងចិត្តនៃអស់អ្នកដែលបានរួមចំណែកទទួលនំប៉័ងនៃជីវិត
—ដើម្បីឱ្យពួកគេអាចរួមគ្នាជាអង្គតែមួយ ក្នុងព្រះកាយរបស់ព្រះបុត្រាព្រះអង្គ។ (បន្ទរ)

សូមព្រះអង្គជួយយើងខ្ញុំឱ្យចេះដកខ្លួនចេញពីអំពើបាប
—ហើយសូមបំពាក់ព្រះគ្រីស្តជាព្រះបុត្រាព្រះអង្គ គឺលោកអដាំថ្មីឱ្យយើងខ្ញុំផង។ (បន្ទរ)

សូមព្រះអង្គប្រោសឱ្យមនុស្សទាំងអស់ដែលដឹងខ្លួនខុស និងស្វែងរកការលើកលែងទោស
—អាចរួមចំណែកក្នុងផលផ្លែនៃការសង្រ្គោះ ដែលព្រះគ្រីស្តបានសោយទិវង្គត។ (បន្ទរ)

សូមឱ្យអស់អ្នកដែលបានទទួលមរណភាព ក្នុងសេចក្តីសុខសាន្តរបស់ព្រះអង្គ លើកតម្កើងសិរីរុងរឿងរបស់ព្រះអង្គឯស្ថានបរមសុខ
—គឺស្ថានដែលយើងខ្ញុំសង្ឃឹមថា នឹងបានកោតសរសើរព្រះអង្គ អស់កល្បជាអង្វែងតរៀងទៅ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះបិតាដ៏មានធម៌មេត្តាករុណាយ៉ាងក្រៃលែងអើយ ! ព្រះអង្គចាត់ព្រះបុត្រាដ៏ជាទីស្រឡាញ់ ឲ្យធ្វើជាព្រះបន្ទូលក្នុងលោកនេះ។ សូមព្រះអង្គមេត្តាប្រោសឲ្យយើងខ្ញុំយកចិត្តទុកដាក់ស្តាប់សេចក្តី ដែលព្រះអង្គមានព្រះបន្ទូលមកយើងខ្ញុំ តាមរយៈអ្នកដទៃ និងតាមរយៈព្រឹត្តិការណ៍នានាប្រចាំជីវិតយើងខ្ញុំ។ សូមប្រោសឲ្យយើងខ្ញុំមានជំនឿមាំមួន ដើម្បីស្គាល់សិរីរុងរឿងរបស់ព្រះគ្រីស្ត ដែលមានព្រះជន្មគង់នៅជាមួយយើងខ្ញុំសព្វថ្ងៃនេះផង។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

64 Views

Post Views: 64