រដូវធម្មតា សប្តាហ៍ទី៥ ថ្ងៃសៅរ៍

Posted on 15 ខែកុម្ភៈ 202528 ខែមករា 2025 by Siya Khim

រដូវធម្មតា

ថ្ងៃសៅរ៍ អាទិត្យទី៥
_{(ពេលថ្ងៃ)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩,៣៣-៤០

សូមបង្រៀនក្រិត្យវិន័យរបស់ព្រះអង្គឱ្យទូលបង្គំស្គាល់

បន្ទរទី១ ៖ សូមនាំទូល‌បង្គំដើរតាមមាគ៌ានៃវិន័យរបស់ព្រះ‌អង្គ។

^៣៣	ឱព្រះអម្ចាស់អើយ! សូមបង្រៀនក្រិត្យវិន័យរបស់ព្រះអង្គឱ្យទូលបង្គំស្គាល់ ដើម្បីឱ្យទូលបង្គំកាន់តាមគ្រប់ពេលវេលា! ។
^៣៤	សូមប្រទានឱ្យទូលបង្គំមានប្រាជ្ញា ទូលបង្គំនឹងកាន់តាមធម្មវិន័យរបស់ព្រះអង្គ ហើយប្រតិបត្តិតាមយ៉ាងអស់ពីចិត្ត! ។
^៣៥	សូមនាំទូលបង្គំតាមមាគ៌ានៃវិន័យរបស់ព្រះអង្គ ដ្បិតទូលបង្គំពេញចិត្តនឹងវិន័យទាំងនេះណាស់។
^៣៦	សូមទាក់ទាញចិត្តទូលបង្គំ ឱ្យធ្វើតាមដំបូន្មានរបស់ព្រះអង្គ មិនមែនឱ្យរកកំរៃឡើយ!
^៣៧	សូមទាញអារម្មណ៍ទូលបង្គំ ឱ្យបែរចេញពីអ្វីៗដែលឥតខ្លឹមសារ សូមឱ្យទូលបង្គំមានជីវិត ដោយសារមាគ៌ារបស់ព្រះអង្គ!
^៣៨	សូមសម្រេចចំពោះទូលបង្គំ ជាអ្នកបម្រើរបស់ព្រះអង្គ តាមព្រះបន្ទូលដែលព្រះអង្គបានសន្យា សម្រាប់អស់អ្នកគោរពកោតខ្លាចព្រះអង្គ។
^៣៩	សូមកុំឱ្យមាននរណាជេរប្រមាថទូលបង្គំ ជាការដែលទូលបង្គំខ្លាចរអែងណាស់ ដ្បិតការសម្រេចរបស់ព្រះអង្គសុទ្ធតែល្អទាំងអស់។
^៤០	ទូលបង្គំប្រាថ្នាចង់ធ្វើតាមច្បាប់របស់ព្រះអង្គ សូមប្រទានឱ្យទូលបង្គំមានជីវិតឡើងវិញ ដោយសេចក្តីសុចរិតរបស់ព្រះអង្គ!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ សូមនាំទូល‌បង្គំដើរតាមមាគ៌ានៃវិន័យរបស់ព្រះ‌អង្គ។

ទំនុកតម្កើងលេខ ៣៤

ព្រះ‌ហឫទ័យសប្បុរសរបស់ព្រះ‌អម្ចាស់

បើបងប្អូនពិតជាបានក្រេបជញ្ជក់ដឹងថា ព្រះអម្ចាស់មានព្រះហឫទ័យសប្បុរសមែន! (១សល ២,៣)។

បន្ទរទី២ ៖ អស់អ្នកដែលស្វែងរកព្រះអម្ចាស់ នឹងមិនខ្វះអ្វីសោះឡើយ។

(ក)

(បទកាកគតិ)

^២-	ខ្ញុំអរព្រះគុណ	អម្ចាស់ពេកពន់	គ្រប់ពេលវេលា
	សូមលើកតម្កើង	ព្រះអង្គគ្រប់គ្រា	ឥតមានរួញរា
		ឈប់ឈរសោះឡើយ	។
^៣-	ខ្ញុំខ្ពស់មុខព្រោះ	ព្រះម្ចាស់សង្គ្រោះ	ខ្ញុំមិនកន្តើយ
	ចូរអ្នកទន់ទាប	ស្តាប់កុំព្រងើយ	នឹងបានធូរស្បើយ
		អំណរខ្លាំងក្លា	។
^៤-	សូមមកប្រកាស	នឹងខ្ញុំឱ្យច្បាស់	ដោយពោលឡើងថា
	ព្រះម្ចាស់ថ្កុំថ្កើង	រុងរឿងក្រៃណា	យើងនាំគ្នីគ្នា
		តម្កើងព្រះអង្គ	។
^៥-	ខ្ញុំបានស្វែងរក	ព្រះម្ចាស់តបមក	ឥតមានបង្អង់
	ទ្រង់បានរំដោះ	ខ្ញុំអស់ទុក្ខផង	តក់ស្លុតមួរហ្មង
		ឆ្លងផុតទាំងអស់	។
^៦-	អ្នកដែលសម្លឹង	ឆ្ពោះទៅព្រះអង្គ	បានសុខឥតមោះ
	ផុតអស់ទុក្ខសោក	វិយោគរងគ្រោះ	ពួកគេទាំងនោះ
		មិនខកចិត្តឡើយ	។
^៧-	អស់អ្នកកំសត់	និងមនុស្សទុរគត	គេស្រែកដង្ហោយ
	ហៅរកព្រះអង្គ	ទ្រង់សណ្តាប់ហើយ	សង្គ្រោះគេឱ្យ
		ផុតពីគ្រោះកាច	។
^៨-	ទេវទូតរបស់	ព្រះម្ចាស់ទាំងអស់	ថែទាំអ្នកខ្លាច
	រក្សាការពារ	គេក្រោមអំណាច	រំដោះឱ្យរួច
		ផុតពីទុក្ខភ័យ	។
^៩-	ចូរអ្នកផ្អែកពឹង	ពិសោធន៍ឱ្យដឹង	ថាព្រះម្ចាស់ថ្លៃ
	ទ្រង់មានមេត្តា	សប្បុរសពេកក្រៃ	អស់ជនប្រុសស្រី
		មានជ័យមង្គល	។
^១០-	ឱប្រជារាស្ត្រ	របស់ព្រះម្ចាស់	ចូរកោតខ្លាចដល់
	ព្រះម្ចាស់នៃយើង	បានសុខឥតខ្វល់	មិនជួបអំពល់
		ឬខ្វះខាតអ្វី	។
^១១-	អ្នកមានមុខជា	ជួបទុក្ខវេទនា	ខ្វះម្ហូបចំណី
	តែអ្នកដែលស្វែង	រកព្រះម្ចាស់ថ្លៃ	នឹងមិនខ្វះអ្វី
		សុខសាន្តតទៅ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ ៖ អស់អ្នកដែលស្វែងរកព្រះអម្ចាស់ នឹងមិនខ្វះអ្វីសោះឡើយ។

បន្ទរទី៣ ៖ ចូរខិតខំស្វែងរកសេចក្តីសុខសាន្តយ៉ាងអស់ពីចិត្ត។

(ខ)

^១២	កូនចៅអើយ! ចូរនាំគ្នាស្តាប់ពាក្យខ្ញុំ ខ្ញុំនឹងប្រៀនប្រដៅអ្នកឱ្យចេះគោរពកោតខ្លាចព្រះអម្ចាស់
^១៣	តើមាននរណាចង់បានអាយុវែង និងចង់រស់នៅប្រកបដោយសុភមង្គលឬទេ?
^១៤	ចូរទប់អណ្តាតកុំពោលពាក្យអាក្រក់ និងចៀសវាងនិយាយបោកបញ្ឆោត!។
^១៥	ចូរងាកចេញពីអំពើអាក្រក់ ហើយប្រព្រឹត្តអំពើល្អវិញ ចូរខិតខំស្វែងរកសេចក្តីសុខសាន្តយ៉ាងអស់ពីចិត្ត។
^១៦	ព្រះអម្ចាស់តែងតែរំពៃមើលមនុស្សសុចរិត ព្រះអង្គក៏យកព្រះហឫទ័យទុកដាក់នឹងសម្រែករបស់ពួកគេ។
^១៧	ព្រះអម្ចាស់តែងតែប្រឆាំងនឹងអស់អ្នកដែលប្រព្រឹត្តអំពើអាក្រក់ កុំឱ្យមាននរណានឹកនាដល់ពួកគេទៀតឡើយ។
^១៨	ពេលមនុស្សសុចរិតស្រែករកព្រះអម្ចាស់ ព្រះអង្គទ្រង់ព្រះសណ្តាប់ពាក្យគេ ព្រះអង្គរំដោះពួកគេឱ្យរួចពីគ្រោះកាចទាំងប៉ុន្មាន។
^១៩	ព្រះអម្ចាស់គង់នៅជិតអស់អ្នកដែលគ្រាំចិត្ត ព្រះអង្គសង្គ្រោះអស់អ្នកដែលមានចិត្តសោកសង្រេង។
^២០	មនុស្សសុចរិតរមែងជួបនឹងទុក្ខលំបាកជាច្រើន ប៉ុន្តែ ព្រះអម្ចាស់តែងតែរំដោះគេឱ្យរួចផុតគ្រប់ពេលវេលា។
^២១	ព្រះអង្គតាមថែរក្សាគេជានិច្ច គ្មានឆ្អឹងណាមួយត្រូវបាក់បែកឡើយ។
^២២	អំពើអាក្រក់តែងបណ្តាលឱ្យមនុស្សពាលបាត់បង់ជីវិត អ្នកដែលប្រឆាំងនឹងមនុស្សសុចរិត តែងតែទទួលទោសពុំខាន។
^២៣	ព្រះអម្ចាស់សង្គ្រោះជីវិតអ្នកបម្រើរបស់ព្រះអង្គ អស់អ្នកដែលមកពឹងផ្អែកលើព្រះអង្គ តែងតែរួចផុតពីទុក្ខទោស។

បន្ទរ ៖ ចូរខិតខំស្វែងរកសេចក្តីសុខសាន្តយ៉ាងអស់ពីចិត្ត។

ព្រះបន្ទូលរបស់ព្រះជាម្ចាស់

ម៉ោង៩ ព្រឹក

ព្រះបន្ទូលរបស់ព្រះជាម្ចាស់ (៩ ព្រឹក) ១ពង្ស ៨,៦០-៦១

ជាតិសាសន៍ទាំងអស់នៅលើផែនដីនឹងទទួលស្គាល់ថា មានតែព្រះអម្ចាស់ប៉ុណ្ណោះ ដែលពិតជាព្រះជាម្ចាស់ គឺគ្មានព្រះឯណាទៀតឡើយ។ ចូរមានចិត្តស្មោះត្រង់ចំពោះព្រះអម្ចាស់ជាព្រះនៃយើង ហើយប្រតិបត្តិតាមក្រិត្យវិន័យរបស់ព្រះអង្គ និងកាន់តាមបទបញ្ជារបស់ព្រះអង្គ ដូចអ្នករាល់គ្នាធ្វើនៅពេលនេះដែរ។

បន្ទរ៖ ព្រះ‌អម្ចាស់អើយ សូមបង្រៀនទូល‌បង្គំឱ្យស្គាល់មាគ៌ារបស់ព្រះ‌អង្គ។
—ទូល‌បង្គំនឹងប្រព្រឹត្តតាមសេចក្ដីពិតរបស់ព្រះ‌អង្គ។

ពាក្យអធិដ្ឋាន

បពិត្រព្រះជាម្ចាស់ជាព្រះបិតា ដ៏មានឫទ្ធានុភាពសព្វប្រការ! សូមព្រះអង្គចាត់ពន្លឺនៃព្រះវិញ្ញាណដ៏វិសុទ្ធមកលើប្រជារាស្រ្តព្រះអង្គ ដើម្បីឱ្យយើងខ្ញុំរួចផុតពីគ្រោះថ្នាក់របស់ខ្មាំងសត្រូវទាំងឡាយ ហើយយើងខ្ញុំអាចច្រៀងកោតសរសើរព្រះអង្គដោយអំណរសប្បាយផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ម៉ោង១២ ថ្ងៃត្រង់

ព្រះបន្ទូលរបស់ព្រះជាម្ចាស់ (១២ ថ្ងៃត្រង់) យរ ១៧,៩-១០

ចិត្តរបស់មនុស្សតែង‌តែវៀច‌វេរមិនអាចកែតម្រង់បានឡើយហើយក៏គ្មាននរណាអាចមើលចិត្តធ្លុះដែរ។ ព្រះ‌អម្ចាស់មានព្រះ‌បន្ទូលថា: យើងឈ្វេងយល់ជម្រៅចិត្តរបស់មនុស្សយើងមើលធ្លុះអាថ៌‌កំបាំងរបស់គេដូច្នេះ យើងនឹងតបស្នងឱ្យមនុស្សម្នាក់ៗតាមកិរិយាមារយាទរបស់ខ្លួននិងតាមអំពើដែលខ្លួនបានប្រព្រឹត្ត។

បន្ទរ៖ សូមលើក‌លែងទោសឱ្យទូល‌បង្គំ នូវកំហុសណាដែលទូល‌បង្គំមើលមិនឃើញនោះផង។
—សូមការ‌ពារទូល‌បង្គំឱ្យរួចពីចិត្តអួតបំប៉ោង។

ពាក្យអធិដ្ឋាន

បពិត្រព្រះអម្ចាស់! សូមព្រះអង្គបំពេញយើងខ្ញុំជាមួយនឹងពន្លឺដ៏ត្រចះត្រចង់នៃសេចក្តីស្រឡាញ់អស់កល្បជានិច្ចរបស់ព្រះអង្គ។ សូមឱ្យយើងខ្ញុំស្រឡាញ់ព្រះអង្គលើសអ្វីៗទាំងអស់ និងស្រឡាញ់បងប្អូនឯទៀតៗផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ម៉ោង៣ រសៀល

ព្រះបន្ទូលរបស់ព្រះជាម្ចាស់ (៣ រសៀល) ប្រាញ ៧,២៧ក. ៨,១

ព្រះ‌ប្រាជ្ញាញាណមានតែមួយអង្គគត់ តែព្រះ‌អង្គអាចសម្រេចកិច្ច‌ការទាំងអស់បាន។ ព្រះ‌ប្រាជ្ញាញាណលាតត្រដាងឫទ្ធា‌នុភាពពីជើងមេឃម្ខាង ទៅជើងមេឃម្ខាង ហើយត្រួតត្រាអ្វីៗទាំងអស់ដោយព្រះ‌ហឫទ័យសប្បុរស។

បន្ទរ៖ ឱព្រះ‌អម្ចាស់អើយ ស្នាព្រះ‌ហស្ដរបស់ព្រះ‌អង្គប្រសើរឧត្តុង្គ‌ឧត្ដមណាស់។
—ព្រះ‌តម្រិះរបស់ព្រះ‌អង្គជ្រៅពន់ប្រមាណ! ។

ពាក្យអធិដ្ឋាន

បពិត្រព្រះអម្ចាស់ ! សូមប្រោសឱ្យសន្តិភាពដែលយើងខ្ញុំទូលសូម អាចកើតឡើងយ៉ាងពិតប្រាកដ សូមឱ្យជីវិតរស់នៅប្រចាំថ្ងៃរបស់យើងខ្ញុំ ពោរពេញដោយអំណរសប្បាយ ហើយតាមរយៈពាក្យទូលអង្វររបស់ព្រះនាងព្រហ្មចារិនីម៉ារី សូមឱ្យយើងខ្ញុំអាចចូលក្នុងព្រះរាជ្យរបស់ព្រះអង្គយ៉ាងសុខសាន្តផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

សូមកោតសរសើរព្រះអម្ចាស់!
សូមអរព្រះគុណព្រះជាម្ចាស់!

49 Views

Post Views: 50