រដូវធម្មតា សប្តាហ៍ទី៤ (អ.ទី៣២)ថ្ងៃអង្គារ

Posted on 11 ខែវិច្ឆិកា 202516 ខែកក្កដា 2025 by Siya Khim

រដូវធម្មតា

សន្តម៉ាតាំង ជាអភិបាលនៅក្រុងទួរ

(បុណ្យរំឭកចាំបាច់)

ថ្ងៃអង្គារ អាទិត្យទី៣២
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១៥

បន្ទរទី១៖ នៅទីនេះមានបុរសម្នាក់ ដែលពាក្យសម្តីមិនអាចបរិយាយប្រាប់អស់បាន។ សេចក្តីស្លាប់មិនអាចយកឈ្នះគាត់បានទេ។ គាត់មិនខ្លាចសេចក្តីស្លាប់ ហើយក៏មិនព្រមរស់ដែរ។

^១	ឱព្រះអម្ចាស់អើយ តើនរណាអាចស្នាក់នៅក្នុងព្រះពន្លារបស់ព្រះ‌អង្គបាន? តើនរណាអាចស្ថិតនៅលើភ្នំដ៏‌វិសុទ្ធរបស់ព្រះ‌អង្គបាន?
^២	គឺមានតែមនុស្សឥតសៅ‌ហ្មងដែលប្រព្រឹត្តអំពើសុចរិត ហើយនិយាយតែសេចក្ដីពិត ដែលមាននៅក្នុងដួងចិត្តរបស់ខ្លួនប៉ុណ្ណោះ ទើបអាចនៅបាន។
^៣	គេមិននិយាយមួលបង្កាច់ មិនធ្វើបាបអ្នកដទៃ ហើយក៏មិនបង្អាប់‌បង្អោនកិត្តិយសបង‌ប្អូនរួមជាតិរបស់ខ្លួនដែរ។
^៤	គេមិនរាប់រកអស់អ្នកដែលព្រះ‌ជាម្ចាស់មិនគាប់ព្រះ‌ហឫទ័យនោះឡើយ តែគេលើកកិត្តិយសអស់អ្នកដែលគោរពកោតខ្លាចព្រះ‌អម្ចាស់។ បើគេសន្យាអ្វីមួយ ទោះបីត្រូវខាតបង់យ៉ាងណាក៏ដោយ ក៏គេនៅតែគោរពតាមពាក្យសម្ដីរបស់ខ្លួនជា‌និច្ច។
^៥	គេឱ្យប្រាក់អ្នកដទៃខ្ចី ដោយមិនយកការ ហើយគេក៏មិនព្រមទទួលសំណូក ដើម្បីដាក់ទោសជនស្លូតត្រង់ដែរ។ អ្នកណាប្រព្រឹត្តដូច្នេះ អ្នកនោះនឹងបានសុខជានិច្ច។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ នៅទីនេះមានបុរសម្នាក់ ដែលពាក្យសម្តីមិនអាចបរិយាយប្រាប់អស់បាន។ សេចក្តីស្លាប់មិនអាចយកឈ្នះគាត់បានទេ។ គាត់មិនខ្លាចសេចក្តីស្លាប់ ហើយក៏មិនព្រមរស់ដែរ។

ទំនុកតម្កើងលេខ ១១២

បន្ទរទី២៖ បពិត្រព្រះអម្ចាស់ ! ប្រសិនបើប្រជារាស្រ្តព្រះអង្គនៅតែត្រូវការទូលបង្គំ ទូលបង្គំត្រៀមខ្លួនរួចជាស្រេច ចំពោះកិច្ចការដែលព្រះអង្គដាក់ឱ្យទូលបង្គំធ្វើ។

(បទពាក្យ ៧)

^១-	អ្នកអោនកោតខ្លាចព្រះអម្ចាស់	ប្រតិបត្តិច្បាស់តាមព្រះទ័យ
	ស្មោះស្ម័គ្រគោរពតាមវិន័យ	បានសុខពេកក្រៃមានមង្គល	។
^២-	ពូជរបស់គេមានអំណាច	ចិត្តក្លាអង់អាចគ្មានកង្វល់
	ដ្បិតព្រះជាម្ចាស់ប្រទានផល	ព្រះពរពិតដល់អ្នកសុចរិត	។
^៣-	ក្នុងផ្ទះមនុស្សដែលចិត្តធម៌	មានទ្រព្យបវរល្អប្រណីត
	សេចក្តីសុចរិតនៅស្ថេរស្ថិត	ព្រះអង្គអាណិតឱ្យពរជាប់	។
^៤-	ក្នុងទីងងឹតមានពន្លឺ	លេចឡើងបំភ្លឺមិនស្រអាប់
	ចិត្តគាត់ប្រណីល្អគួរគាប់	សន្តោសលើសព្វជនប្រុសស្រី	។
^៥-	មនុស្សដែលមានចិត្តទូលាយ	យកអ្វីទៅឱ្យអ្នកផងខ្ចី
	ព្រមទាំងរកស៊ីមិនកេងគៃ	អ្នកនោះប្រពៃល្អបំផុត	។
^៦-	កេរ្តិ៍ឈ្មោះរន្ទឺឮសុសសាយ	ទីជិតទីឆ្ងាយមិនរលត់
	មនុស្សគ្រប់សម័យតែងចាំស្ទាត់	នឹកទៅដល់គាត់ជាប់ជានិច្ច	។
^៧-	អ្នកនោះមិនស្លុតមិនព្រឺខ្លាច	មានចិត្តអង់អាចមិនមានល្បិច
	មិនខ្លាចគេដៀលត្មះពន្លិច	ហើយផ្ញើជីវិតលើព្រះម្ចាស់	។
^៨-	គាត់មានចិត្តនឹងហើយអង់អាច	មិនចេះភ័យខ្លាចអ្វីទាំងអស់
	ទាល់តែគាត់ឃើញខ្មាំងទាំងនោះ	បាក់ទ័ពប្រាសអស់ទើបស្កប់ចិត្ត	។
^៩-	គាត់តែងចែកទានដល់អ្នកក្រ	ដោយចិត្តស្មោះសរស្ម័គ្រពិតៗ
	ចិត្តគាត់ទូលាយត្រង់សុចរិត	កម្លាំងគាត់ស្ថិតមិនបាត់បង់	។
^១០-	ពេលជនអាក្រក់ឃើញដូច្នោះ	ចិត្តគេទោមនស្សខាំធ្មេញផង
	បាក់ធ្លាក់ទឹកចិត្តខូចបំណង	ពុំសម្រេចម្តងណាសោះឡើយ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ បពិត្រព្រះអម្ចាស់ ! ប្រសិនបើប្រជារាស្រ្តព្រះអង្គនៅតែត្រូវការទូលបង្គំ ទូលបង្គំត្រៀមខ្លួនរួចជាស្រេច ចំពោះកិច្ចការដែលព្រះអង្គដាក់ឱ្យទូលបង្គំធ្វើ។

បទលើកតម្កើងតាមគម្ពីរវិវរណៈ (វវ ១៥,៣ខ-៤)

បន្ទរទី៣៖ សន្តម៉ាតាំងជាអភិបាល បានលះបង់អ្វីៗក្នុងពិភពលោកនេះ ជាពន្លឺដែលរះបំភ្លឺក្នុងចំណោមលោកបូជាចារ្យ ឥឡូវនេះ លោករស់នៅជាមួយព្រះគ្រីស្តអស់កល្បជានិច្ច។

^៣

«ឱព្រះជាអម្ចាស់ដ៏មានព្រះចេស្ដាលើអ្វីៗទាំងអស់អើយ
ស្នាព្រះ‌ហស្ដរបស់ព្រះ‌អង្គប្រសើរឧត្ដម គួរឱ្យកោតស្ញប់ស្ញែងពន់ពេកណាស់!
ឱព្រះ‌មហាក្សត្រនៃប្រជាជាតិទាំង‌ឡាយអើយ
មាគ៌ារបស់ព្រះ‌អង្គសុទ្ធតែសុចរិត និងត្រឹមត្រូវទាំងអស់!

^៤

បពិត្រព្រះអម្ចាស់! តើមាននរណាមិនគោរពកោតខ្លាចព្រះនាមព្រះអង្គ!
តើនរណាមិនលើកតម្កើងសិរី‌រុងរឿងនៃព្រះ‌នាមព្រះ‌អង្គ!
ដ្បិតមានតែព្រះ‌អង្គប៉ុណ្ណោះជាព្រះដ៏‌វិសុទ្ធ។
មនុស្សគ្រប់ជាតិសាសន៍នឹងនាំគ្នាមកក្រាបថ្វាយបង្គំព្រះអង្គ
ដ្បិតគេបានឃើញច្បាស់ថា ព្រះ‌អង្គវិនិច្ឆ័យដោយយុត្តិធម៌»។

បន្ទរ៖ សន្តម៉ាតាំងជាអភិបាល បានលះបង់អ្វីៗក្នុងពិភពលោកនេះ ជាពន្លឺដែលរះបំភ្លឺក្នុងចំណោមលោកបូជាចារ្យ ឥឡូវនេះ លោករស់នៅជាមួយព្រះគ្រីស្តអស់កល្បជានិច្ច។

ព្រះបន្ទូលរបស់ព្រះជាម្ចាស់ (១សល ៥,១-៤)

ចំពោះព្រឹទ្ធា‌ចារ្យដែលនៅក្នុងចំណោមបង‌ប្អូន ក្នុងនាមខ្ញុំជាព្រឹទ្ធា‌ចារ្យដូចគ្នា ហើយជាបន្ទាល់អំពីទុក្ខលំបាករបស់ព្រះ‌គ្រីស្ត និងជាអ្នករួមទទួលសិរី‌រុងរឿងដែលនឹងត្រូវលេចមក ខ្ញុំសូមដាស់‌តឿនថាៈ សូមមើលថែរក្សាហ្វូងចៀមដែលព្រះ‌ជាម្ចាស់ផ្ញើទុកនឹងបង‌ប្អូន ដោយចិត្តស្មោះស្ម័គ្រ ស្របតាមព្រះ‌ហឫទ័យព្រះ‌ជាម្ចាស់ គឺមិនមែនដោយទើសទ័ល ឬដោយចង់បានកម្រៃអ្វីដែរ តែត្រូវមើលថែ‌រក្សាដោយសុទ្ធចិត្ត។ កុំប្រើអំណាចជិះជាន់អស់អ្នកដែលព្រះជាម្ចាស់ប្រទានមកឱ្យបង‌ប្អូនថែរក្សានោះឡើយ គឺត្រូវធ្វើជាគំរូដល់ហ្វូងចៀមវិញ។ ពេលគង្វាលដ៏ឧត្ដមយាងមកដល់ បង‌ប្អូននឹងទទួលមកុដដ៏រុង‌រឿងដែលមិនចេះអាប់រស្មី។

បន្ទរ៖ នេះគឺជាបុរសម្នាក់ដែលស្រឡាញ់បងប្អូនរបស់គាត់ *ហើយតែងតែអធិដ្ឋានឱ្យពួកគេជានិច្ច។ បន្ទរឡើងវិញ៖…
-គាត់ចំណាយពេលផ្ទាល់ខ្លួនក្នុងការបម្រើពួកគេ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ លោកអភិបាលដ៏មានសុភមង្គលម្នាក់នេះ បានស្រឡាញ់ព្រះគ្រីស្តអស់ពីកម្លាំងរបស់គាត់ ហើយលោកគ្មានការភ័យខ្លាចចំពោះអ្នកគ្រប់គ្រងផែនដីឡើយ។ ទោះបីលោកមិនបានស្លាប់ដូចសេចក្តីស្លាប់របស់មរណសាក្សីក្តី ក៏អ្នកប្រកាសជំនឿដ៏វិសុទ្ធនេះ បានឈ្នះធាងទន្សែនៃមរណសាក្សីដែរ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ លោកអភិបាលដ៏មានសុភមង្គលម្នាក់នេះ បានស្រឡាញ់ព្រះគ្រីស្តអស់ពីកម្លាំងរបស់គាត់ ហើយលោកគ្មានការភ័យខ្លាចចំពោះអ្នកគ្រប់គ្រងផែនដីឡើយ។ ទោះបីលោកមិនបានស្លាប់ដូចសេចក្តីស្លាប់របស់មរណសាក្សីក្តី ក៏អ្នកប្រកាសជំនឿដ៏វិសុទ្ធនេះ បានឈ្នះធាងទន្សែនៃមរណសាក្សីដែរ។

ពាក្យអង្វរសកល

យើងខ្ញុំសូមលើកតម្កើងព្រះគ្រីស្ត ដែលបានប្រទានតេជានុភាព និងកម្លាំងដល់ប្រជារាស្ត្រព្រះអង្គ។ យើងខ្ញុំសូមទូលអង្វរព្រះអង្គថា ៖

បន្ទរ៖ ឱព្រះអម្ចាស់អើយ ! សូមព្រះអង្គទ្រង់ព្រះមេត្តាសណ្តាប់ពាក្យអង្វររបស់យើងខ្ញុំ ហើយយើងខ្ញុំនឹងសរសើរតម្កើងព្រះអង្គជារៀងរហូត។

ព្រះគ្រីស្តជាកម្លាំងរបស់យើង ព្រះអង្គបានត្រាស់ហៅអ្នកជឿ ឱ្យស្គាល់ពីសេចក្តីពិតរបស់ព្រះអង្គ
—សូមព្រះអង្គប្រោសប្រទានឱ្យពួកគេមានជំនឿ និងចិត្តតស៊ូផង។ (បន្ទរ)

សូមព្រះអង្គជួយតម្រង់ផ្លូវមេដឹកនាំ ឱ្យបានស្របតាមព្រះហឫទ័យរបស់ព្រះអង្គ
—សូមព្រះអង្គជួយដល់មេដឹកនាំទាំងនេះ ឱ្យចេះរក្សាសន្តិភាព និងស្វែងរកផលប្រយោជន៍រួមផង។ (បន្ទរ)

ព្រះអង្គបានប្រទាននំប៉័ងដល់បណ្តាជនដែលស្រេកឃ្លាន
—សូមព្រះអង្គជួយយើងខ្ញុំឱ្យចេះចែករំលែកធនធានរបស់ខ្លួន ទៅដល់អ្នកដែលខ្វះខាតផង។ (បន្ទរ)

សូមព្រះអង្គកុំបណ្តោយឱ្យមេដឹកនាំពិភពលោក យកចិត្តទុកដាក់តែចំពោះតម្រូវការរបស់ប្រជាជាតិខ្លួនប៉ុណ្ណោះ
—ប៉ុន្តែ សូមឱ្យអស់លោកទាំងនោះ ចេះគោរព និងខ្វល់ខ្វាយពីតម្រូវការរបស់ប្រជាជនទាំងអស់ផង។ (បន្ទរ)

សូមព្រះអង្គប្រោសប្រទានសុភមង្គល និងការរស់ឡើងវិញ ដល់បងប្អូនយើងខ្ញុំដែលបានទទួលមរណភាព
—ហើយសូមឱ្យអ្នកជឿលើព្រះអង្គបានទទួលសិរីរុងរឿងពីព្រះអង្គផង។ (បន្ទរ)

ធម៌ “ឱព្រះបិតា”

ឱព្រះបិតាយើងខ្ញុំ ដែលគង់នៅស្ថានបរមសុខអើយ!
សូមសម្តែងព្រះបារមី ឱ្យមនុស្សលោកស្គាល់ព្រះនាមព្រះអង្គ
សូមឱ្យព្រះរាជ្យព្រះអង្គបានមកដល់
សូមឱ្យព្រះហឫទ័យរបស់ព្រះអង្គបានសម្រេចនៅលើផែនដី
ដូចនៅស្ថានបរមសុខដែរ។
សូមប្រទានអាហារ ដែលយើងខ្ញុំត្រូវការនៅថ្ងៃនេះ។
សូមអត់ទោសឱ្យយើងខ្ញុំ ដូចយើងខ្ញុំអត់ទោសឱ្យ
អស់អ្នកដែលបានប្រព្រឹត្តខុសនឹងយើងខ្ញុំ។
សូមកុំបណ្តោយឱ្យយើងខ្ញុំ ចាញ់ការល្បួងឡើយ
តែសូមរំដោះយើងខ្ញុំ ឱ្យរួចពីមារកំណាច។

ពាក្យអធិដ្ឋាន

ឱព្រះជាម្ចាស់អើយ ! សន្តម៉ាតាំងជាអភិបាលបានលើកតម្កើងព្រះអង្គទាំងពេលលោកមានជីវិតរស់នៅ ទាំងពេលលោកទទួលមរណភាព។ យើងខ្ញុំសូមទូលអង្វរព្រះអង្គ សូមទ្រង់បង្ហូរព្រះហឫទ័យប្រណីសន្តោសដ៏អស្ចារ្យរបស់ព្រះអង្គ ជ្រាបចូលក្នុងដួងចិត្តយើងខ្ញុំ និងសូមកុំឱ្យការរស់នៅ ឬសេចក្តីស្លាប់ នាំយើងខ្ញុំឱ្យឃ្លាតឆ្ងាយពីសេចក្តីស្រឡាញ់របស់ព្រះអង្គ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

41 Views

Post Views: 41