ថ្ងៃសៅរ៍ សប្តាហ៍បុណ្យចម្លង

Posted on 26 ខែមេសា 202521 ខែមីនា 2025 by Siya Khim

សប្តាហ៍បុណ្យចម្លង

ថ្ងៃសៅរ៍ សប្តាហ៍បុណ្យចម្លង
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១០,១-៥.៧

ព្រះមេស្ស៊ី គឺជាព្រះមហាក្សត្រ និងជាបូជាចារ្យ

ព្រះគ្រីស្តត្រូវតែគ្រងរាជ្យ ទម្រាំដល់ព្រះជាម្ចាស់បង្ក្រាបខ្មាំងសត្រូវទាំងប៉ុន្មាន មកដាក់ក្រោមព្រះបាទារបស់ព្រះអង្គ (១ករ ១៥,២៥)។

បន្ទរទី១ ៖ នាងម៉ារីជាអ្នកស្រុកម៉ាដាឡា និងនាងម៉ារីម្នាក់ទៀតនាំគ្នាទៅមើលផ្នូរ អាលេលូយ៉ា! ។

^១	ព្រះជាអម្ចាស់មានព្រះបន្ទូលមកកាន់ព្រះរាជា ជាព្រះអម្ចាស់របស់ខ្ញុំថា ៖ “សូមគង់នៅខាងស្តាំយើង ទម្រាំដល់យើងបង្ក្រាបខ្មាំងសត្រូវរបស់ព្រះអង្គ មកដាក់ក្រោមព្រះបាទារបស់ព្រះអង្គ! ”។
^២	សូមព្រះជាអម្ចាស់ប្រោសប្រទាន ឱ្យព្រះរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះករុណាបង្ក្រាបខ្មាំងសត្រូវដែលនៅជុំវិញ!
^៣	នៅថ្ងៃព្រះករុណាកេណ្ឌទ័ពទៅច្បាំង ប្រជារាស្ត្រចូលរួមដោយស្ម័គ្រចិត្ត ពួកយុវជននាំគ្នាចូលគាល់ព្រះករុណានៅលើភ្នំដ៏វិសុទ្ធ ប្រៀបដូចជាទឹកសន្សើមនៅពេលព្រឹកព្រលឹម។
^៤	ព្រះអម្ចាស់មានព្រះបន្ទូលសន្យា ដោយឥតប្រែប្រួលថា ៖ “ព្រះអង្គជាបូជាចារ្យអស់កល្បតរៀងទៅ តាមរបៀបស្តេចមែលគីសេដែក”។
^៥	`ព្រះអម្ចាស់គង់នៅខាងស្តាំព្រះករុណា នៅថ្ងៃដែលព្រះអង្គទ្រង់ព្រះពិរោធ ព្រះអង្គកម្ទេចស្តេចនានា។`
^៧	នៅតាមផ្លូវ ព្រះរាជាសោយទឹកជ្រោះ រួចហើយ ព្រះអង្គងើបព្រះភក្រ្តប្រកបដោយជោគជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ នាងម៉ារីជាអ្នកស្រុកម៉ាដាឡា និងនាងម៉ារីម្នាក់ទៀតនាំគ្នាទៅមើលផ្នូរ អាលេលូយ៉ា! ។

ទំនុកតម្កើងលេខ ១១៤,១-៨

ប្រជាជនអ៊ីស្រាអែលបានសេរីភាពពីប្រទេសអេស៊ីប

អ្នកដែលបានលះបង់ពិភពលោកនេះ ក៏ត្រូវបានដឹកនាំចេញពីប្រទេសអេស៊ីបផងដែរ (សន្តអូគូស្ទីន)។

បន្ទរទី២៖ សុំមកមើលកន្លែងដែលគេដាក់ព្រះ‌សពព្រះ‌អង្គឯ‌ណេះសិន។ អាលេលូយ៉ា !

(បទពាក្យ ៧)

^១-	ពេលអ៊ីស្រាអែលបានចាកចេញ	ពីអេស៊ីបវិញហើយពេលនោះ
	ពូជពង្សយ៉ាកុបចេញទាំងអស់	ពីដីបរទេសមិនសល់នៅ	។
^២-	ឯប្រជាជនជាតិយូដា	បានក្លាយទៅជាឥតហ្មងសៅ
	ជាប្រជាជាតិមិនអាស្រូវ	វិសុទ្ធពេកកូវផ្ទាល់ព្រះអង្គ	។
^៣-	ពេលទឹកសមុទ្រឃើញពួកគេ	តក់ស្លុតម៉្លេះទេមិនបង្អង់
	គេចខ្លួនថយទៅមិនរេរង់	ទាំងយ័រដាន់ផងក៏ថយដែរ	។
^៤-	ភ្នំតូចភ្នំធំភ្នំទាំងអស់	នៅមិនស្ងៀមសោះដូចពពែ
	លោតទៅលោតមកមិនឈប់ទេ	ភ្នំតូចលោតដែរដូចកូនចៀម	។
^៥-	ឱសមុទ្រអើយម្តេចក៏អ្នក	រត់គេចជាជាក់ទៅនៅស្ងៀម
	អ្នកធ្លាប់រលកលោតរវាម	ម្តេចសំងំស្ងៀមធ្មឹងដូច្នេះ	។
	ឱទឹកទន្លេយ័រដាន់អើយ	ពេលនេះម្តេចឡើយរត់លឿនម៉្លេះ
	ម្តេចអ្នកដកខ្លួនឆាប់ដូច្នេះ	តើរឿងទាំងនេះមកពីអ្វី	។
^៦-	ភ្នំអើយម្តេចអ្នកមិនឈប់លោត	ផ្លាស់ប្តូររហូតដូចសត្វព្រៃ
	ភ្នំតូចអើយអ្នកលោតព្រោះអ្វី	មិនស្គាល់យប់ថ្ងៃមិនសម្រាក	។
^៧-	ឱផែនដីអើយចូររីករាយ	អំណរសប្បាយចំពោះភក្រ្ត
	ព្រះជាអម្ចាស់របស់អ្នក	និងចំពោះភក្រ្តព្រះយ៉ាកុប	។
^៨-	គឺទ្រង់បានធ្វើឱ្យសិលា	ប្រែក្លាយទៅជាបឹងសាយសព្វ
	ឱ្យថ្មប្រែក្លាយជាប្រភព	ទឹកហូរឥតឈប់ឥតស្រាកស្រាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ សុំមកមើលកន្លែងដែលគេដាក់ព្រះ‌សពព្រះ‌អង្គឯ‌ណេះសិន។ អាលេលូយ៉ា !

បទលើកតម្កើងតាមគម្ពីរវិវរណៈ (វវ ១៩,១-២.៥-៧)

វិវាហមង្គលការកូនចៀម

បន្ទរទី៣៖ ព្រះ‌យេស៊ូមានព្រះ‌បន្ទូលថា៖ «កុំភ័យ‌ខ្លាចអ្វីឡើយ! សុំទៅប្រាប់បង‌ប្អូនខ្ញុំឲ្យទៅស្រុកកាលី‌ឡេទៅ គេនឹងឃើញខ្ញុំនៅទីនោះ» ។ អាលេលូយ៉ា !

^១	អាលេលូយ៉ា! សូមលើកតម្កើងព្រះជាម្ចាស់នៃយើង ព្រះអង្គសង្គ្រោះយើង ព្រះអង្គប្រកបដោយសិរីរុងរឿង និងឫទ្ធានុភាព
^២	ដ្បិតទ្រង់វិនិច្ឆ័យទោសយ៉ាងត្រឹមត្រូវ តាមយុត្តិធម៌ អាលេលូយ៉ា!
^៥	អាលេលូយ៉ា! អ្នករាល់គ្នាជាអ្នកបម្រើព្រះជាម្ចាស់ អ្នករាល់គ្នាជាអ្នកគោរពកោតខ្លាចព្រះអង្គ ទាំងតូចទាំងធំអើយ! ចូរសរសើរតម្កើងព្រះជាម្ចាស់នៃយើង!។ អាលេលូយ៉ា!
^៦	អាលេលូយ៉ា! ដ្បិតព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ព្រះអង្គបានតាំងព្រះរាជ្យរបស់ព្រះអង្គហើយ
^៧	យើងនាំគ្នាអរសប្បាយឡើង ត្រូវមានអំណររីករាយឱ្យខ្លាំង ហើយនាំគ្នាលើកតម្កើងសិរីរុងរឿងព្រះអង្គ អាលេលូយ៉ា! អាលេលូយ៉ា! ដ្បិតដល់ពេលរៀបវិវាហមង្គលការកូនចៀមហើយ ភរិយាថ្មោងថ្មីរបស់កូនចៀម ក៏បានរៀបចំខ្លួនរួចជាស្រេចហើយដែរ។ អាលេលូយ៉ា!

បន្ទរ៖ ព្រះ‌យេស៊ូមានព្រះ‌បន្ទូលថា៖ «កុំភ័យ‌ខ្លាចអ្វីឡើយ ! សុំទៅប្រាប់បង‌ប្អូនខ្ញុំឲ្យទៅស្រុកកាលី‌ឡេទៅ គេនឹងឃើញខ្ញុំនៅទីនោះ» ។ អាលេលូយ៉ា!

ព្រះបន្ទូលរបស់ព្រះជាម្ចាស់ (១សល ២,៩-១០)

រីឯបង‌ប្អូនវិញ បង‌ប្អូនជាពូជសាសន៍ដែលព្រះ‌អង្គបានជ្រើស‌រើស ជាក្រុមបូជា‌ចារ្យរបស់ព្រះ‌មហាក្សត្រ ជាជាតិសាសន៍ដ៏‌វិសុទ្ធ ជាប្រជា‌រាស្ដ្រដែលព្រះ‌ជាម្ចាស់បានយកមកធ្វើជាកម្ម‌សិទ្ធិផ្ទាល់របស់ព្រះ‌អង្គ ដើម្បីឲ្យបង‌ប្អូនប្រកាសដំណឹងអំពីស្នាព្រះ‌ហស្ដដ៏អស្ចារ្យរបស់ព្រះ‌អង្គ ដែលបានហៅបង‌ប្អូនឲ្យចេញពីទីងងឹត មកកាន់ពន្លឺដ៏រុង‌រឿងរបស់ព្រះ‌អង្គ។ ពីដើម បង‌ប្អូនមិនមែនជាប្រជា‌រាស្ដ្ររបស់ព្រះ‌ជាម្ចាស់ទេ តែឥឡូវនេះ បង‌ប្អូនជាប្រជា‌រាស្ដ្ររបស់ព្រះ‌អង្គហើយ ពីដើមបង‌ប្អូនពុំបានទទួលព្រះ‌ហឫទ័យមេត្តា‌ករុណាទេ តែឥឡូវនេះ បង‌ប្អូនបានទទួលព្រះ‌ហឫទ័យមេត្តា‌ករុណាហើយ។

បន្ទរ៖ នេះជាថ្ងៃដែលព្រះអម្ចាស់បានបង្កើតមក ចូរយើងត្រេកអរសប្បាយ និងរីករាយឡើង អាលេលូយ៉ា! ។

ទំនុកតម្កើងរបស់ព្រះនាងម៉ារី

បន្ទរ៖ ប្រាំបីថ្ងៃក្រោយមក ពួកសាវ័កជួប‌ជុំគ្នានៅក្នុងផ្ទះសាជាថ្មី។ ពេលនោះ ទ្វារផ្ទះនៅខ្ទាស់ជាប់ ព្រះ‌យេស៊ូយាងមកឈរនៅកណ្ដាលចំណោមពួកគេ ទាំងមានព្រះ‌បន្ទូលថា៖ «សូមឲ្យអ្នករាល់គ្នាបានប្រកបដោយសេចក្ដីសុខ‌សាន្ត!» ។ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ ប្រាំបីថ្ងៃក្រោយមក ពួកសាវ័កជួប‌ជុំគ្នានៅក្នុងផ្ទះសាជាថ្មី។ ពេលនោះ ទ្វារផ្ទះនៅខ្ទាស់ជាប់ ព្រះ‌យេស៊ូយាងមកឈរនៅកណ្ដាលចំណោមពួកគេ ទាំងមានព្រះ‌បន្ទូលថា៖ «សូមឲ្យអ្នករាល់គ្នាបានប្រកបដោយសេចក្ដីសុខ‌សាន្ត!» ។ អាលេលូយ៉ា!

ពាក្យអង្វរសកល

ព្រះគ្រីស្តបានបំផ្លាញអំណាចនៃសេចក្តីស្លាប់ និងបានប្រទានជីវិតសាជាថ្មី ដោយការរស់ឡើងវិញរបស់ព្រះអង្គ។ ចូរយើងស្រែករកព្រះអង្គ ហើយទូលថា ៖

បន្ទរ៖ បពិត្រព្រះអម្ចាស់យេស៊ូ ! ព្រះអង្គមានព្រះជន្មគង់នៅអស់កល្បជានិច្ច ! សូមព្រះសណ្តាប់ពាក្យអង្វរយើងខ្ញុំ !

ព្រះអង្គជាថ្មដែលជាងសំណង់បោះបង់ចោល ហើយបានត្រឡប់មកជាថ្មគ្រឹះដ៏សំខាន់បំផុត
—សូមប្រោសឱ្យយើងខ្ញុំធ្វើជាថ្មដ៏មានជីវិត ក្នុងព្រះដំណាក់នៃព្រះសហគមន៍របស់ព្រះអង្គ។ (បន្ទរ)

ព្រះអង្គស្មោះត្រង់ និងជាសាក្សីដ៏ពិតប្រាកដ។ ព្រះអង្គជាផលដំបូងពីចំណោមមនុស្សស្លាប់
—សូមប្រោសឱ្យព្រះសហគមន៍ធ្វើជាសាក្សីអំពីព្រះអង្គឥតឈប់ឈរសោះឡើយ។ (បន្ទរ)

ព្រះអង្គតែមួយគត់ជាកូនកំលោះរបស់ព្រះសហគមន៍ ដែលកើតចេញពីស្នាមរបួសត្រង់ឆ្នឹងជំនីរព្រះអង្គ
—សូមប្រោសឱ្យយើងខ្ញុំអាចបង្ហាញអំពីសេចក្តីស្រឡាញ់របស់កូនកំលោះ និងកូនក្រមុំ ទៅកាន់ពិភពលោកផង។ (បន្ទរ)

ព្រះអង្គជាដើមដំបូង និងចុងក្រោយបំផុត ព្រះអង្គបានស្លាប់ និងមានជីវិតរស់ឡើងវិញ
—សូមព្រះអង្គថែរក្សាអស់អ្នកដែលបានទទួលពិធីជ្រមុជទឹក ឱ្យមានចិត្តស្មោះត្រង់រហូតដល់ថ្ងៃស្លាប់ ដើម្បីពួកគេអាចទទួលមកុដនៃជ័យជម្នះ។ (បន្ទរ)

ព្រះអង្គជាព្រះពន្លឺ និងជាចង្កៀង ដែលបំភ្លឺក្រុងដ៏វិសុទ្ធរបស់ព្រះជាម្ចាស់
—សូមបំភ្លឺមិត្តសម្លាញ់របស់ព្រះអង្គ ដែលបានស្លាប់ទៅហើយ ដើម្បីឱ្យពួកគេអាចសោយរាជ្យរួមជាមួយព្រះអង្គជារៀងរហូត។ (បន្ទរ)

ធម៌ “ឱព្រះបិតា”

ឱព្រះបិតាយើងខ្ញុំ ដែលគង់នៅស្ថានបរមសុខអើយ!
សូមសម្តែងព្រះបារមី ឱ្យមនុស្សលោកស្គាល់ព្រះនាមព្រះអង្គ
សូមឱ្យព្រះរាជ្យព្រះអង្គបានមកដល់
សូមឱ្យព្រះហឫទ័យរបស់ព្រះអង្គបានសម្រេចនៅលើផែនដី
ដូចនៅស្ថានបរមសុខដែរ។
សូមប្រទានអាហារ ដែលយើងខ្ញុំត្រូវការនៅថ្ងៃនេះ។
សូមអត់ទោសឱ្យយើងខ្ញុំ ដូចយើងខ្ញុំអត់ទោសឱ្យ
អស់អ្នកដែលបានប្រព្រឹត្តខុសនឹងយើងខ្ញុំ។
សូមកុំបណ្តោយឱ្យយើងខ្ញុំ ចាញ់ការល្បួងឡើយ
តែសូមរំដោះយើងខ្ញុំ ឱ្យរួចពីមារកំណាច។

ពាក្យអធិដ្ឋាន

បពិត្រព្រះបិតាដ៏មានធម៌មេត្តាករុណាយ៉ាងក្រៃលែង ហួសពីការស្មាន ! សូមព្រះអង្គមេត្តាពង្រឹងជំនឿរបស់យើងខ្ញុំ កុំឲ្យមានចិត្តសង្ស័យឡើយ។ សូមប្រោសឲ្យយើងខ្ញុំយល់កាន់តែច្បាស់អំពីអគ្គសញ្ញាជ្រមុជទឹក ដែលជម្រះយើងខ្ញុំឲ្យមានជីវិតថ្មីក្នុងព្រះវិញ្ញាណដ៏វិសុទ្ធ។ សូមរំដោះយើងខ្ញុំឲ្យរួចពីបាប ដោយសារព្រះលោហិតរបស់ព្រះអង្គ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

10 Views

Post Views: 10