ថ្ងៃទី២ កុម្ភៈ (ពេលល្ងាចទី១)

Posted on 1 ខែកុម្ភៈ 202511 ខែមេសា 2025 by Siya Khim

បុណ្យថ្វាយព្រះឱរសយេស៊ូនៅក្នុងព្រះវិហារ

(បុណ្យគោរព)

^{(ពេលល្ងាចទី១)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៣

បន្ទរទី១ ៖ មាតាបិតាព្រះយេស៊ូបាននាំព្រះអង្គទៅថ្វាយព្រះអម្ចាស់ នៅក្រុងយេរូ‌សាឡឹម។

^១	ចូរសរសើរតម្កើងព្រះ‌អម្ចាស់ ! អ្នកបម្រើរបស់ព្រះ‌អម្ចាស់អើយ ចូរនាំគ្នាសរសើរតម្កើងព្រះអង្គ ! ចូរនាំគ្នាសរសើរតម្កើងព្រះ‌នាមព្រះអម្ចាស់ !
^២	ចូរលើកតម្កើងព្រះ‌នាមព្រះ‌អម្ចាស់តាំងពីពេលនេះរហូតតទៅ!
^៣	តាំងពីពេលថ្ងៃរះ រហូតទល់ថ្ងៃលិច ចូរសរសើរតម្កើងព្រះ‌នាមរបស់ព្រះ‌អម្ចាស់!
^៤	ព្រះ‌អម្ចាស់គង់នៅពីលើប្រជាជាតិទាំងឡាយ សិរី‌រុងរឿងរបស់ព្រះ‌អង្គខ្ពស់ជាងផ្ទៃមេឃទៅទៀត។
^៥	តើមាននរណាអាចផ្ទឹមស្មើនឹងព្រះអម្ចាស់ជាព្រះរបស់យើងបាន? ព្រះ‌អង្គគង់នៅលើស្ថានដ៏ខ្ពស់បំផុត
^៦	ព្រះ‌អង្គទតមើលមកផ្ទៃមេឃនិងផែន‌ដី ដែលនៅខាងក្រោមព្រះ‌អង្គ។
^៧	ព្រះ‌អង្គលើកមនុស្សទន់ខ្សោយឡើងពីធូលីដី ព្រះ‌អង្គលើកមនុស្សទុរគតឡើងពីភក់ជ្រាំ
^៨	ដើម្បីឲ្យគេកាន់កាប់អំណាចរួមជាមួយពួកអ្នកធំ គឺរួមជាមួយពួកអ្នកធំនៅក្នុងចំណោមប្រជា‌រាស្ដ្ររបស់ព្រះ‌អង្គ។
^៩	ព្រះ‌អង្គប្រទានឲ្យស្ត្រីអារមានកូន ឲ្យនាងរស់នៅក្នុងផ្ទះយ៉ាងសប្បាយជាមួយកូនៗរបស់នាង។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ មាតាបិតាព្រះយេស៊ូបាននាំព្រះអង្គទៅថ្វាយព្រះអម្ចាស់ នៅក្រុងយេរូ‌សាឡឹម។

ទំនុកតម្កើងលេខ ១៤៧,១២-២០

បន្ទរទី២ ៖ ក្រុងស៊ីយ៉ូនអើយ ! ចូររៀបចំបន្ទប់អាពាហ៍ពិពាហ៍របស់អ្នក ដើម្បីទទួលព្រះគ្រីស្តជាព្រះមហាក្សត្រ។

(បទព្រហ្មគីតិ)

^១២-	ក្រុងយេរូសាឡឹម	កុំស្ងាត់ស្ងៀមនៅរេរង់
	ព្រមទាំងក្រុងស៊ីយ៉ូន	ចូរត្រៀមខ្លួនថ្កើងព្រះម្ចាស់	។
^១៣-	ដ្បិតព្រះអង្គការពារ	អ្នករាល់គ្នាបានសុខណាស់
	ទ្រង់ឲ្យពរដល់រាស្រ្ត	ដែលរស់ពាសពេញទីក្រុង	។
^១៤-	ទ្រង់ប្រទានទឹកដី	មានសេរីសុខត្រចង់
	សន្តិភាពគ្រប់ជ្រុង	ស្រូវបម្រុងច្រើនមហិមា	។
^១៥-	នៅលើផ្ទៃផែនដី	ស្រស់ប្រិមប្រីយ៍ទ្រង់បញ្ជា
	ផ្សព្វផ្សាយគ្រប់ទិសា	ពីបញ្ជាព្រះអម្ចាស់	។
^១៦-	ព្រះអង្គឲ្យទឹកកក	ធ្លាក់ចុះមកច្រើនដេរដាស
	សន្សើមត្រជាក់ណាស់	ក៏ធ្លាក់ចុះតាមបញ្ជា	។
^១៧-	ព្រះអង្គធ្វើឲ្យព្រឹល	ធ្លាក់មិនខ្ជិលច្រើនមហិមា
	ឲ្យមានធាតុរងា	តើនរណាអាចទ្រាំបាន?	។
^១៨-	ពេលទ្រង់មានបន្ទូល	ធ្វើឲ្យព្រឹលទាំងប៉ុន្មាន
	ទឹកកកគ្រប់ទីស្ថាន	រលាយបានជាទឹកអស់	។
	ធ្វើឲ្យមានទាំងខ្យល់	បោកវិលវល់មិនឈប់សោះ
	បក់យកទឹកទាំងនោះ	ហូរតាមជ្រោះទៅមិនសល់	។
^១៩-	ទ្រង់សម្តែងឲ្យពូជ	លោកយ៉ាកុបស្តាប់បន្ទូល
	ក្រឹត្យវិន័យនិមល	ឲ្យអ៊ីស្រាអែលបានដឹង	។
^២០-	ព្រះអង្គពុំបញ្ជា	សព្វកិច្ចការអស់ទាំងហ្នឹង
	ឲ្យជាតិសាសន៍ផ្សេងដឹង	វិន័យទ្រង់នោះសោះឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ក្រុងស៊ីយ៉ូនអើយ ! ចូររៀបចំបន្ទប់អាពាហ៍ពិពាហ៍របស់អ្នក ដើម្បីទទួលព្រះគ្រីស្តជាព្រះមហាក្សត្រ។

បទលើកតម្កើងតាមលិខិតភីលីព ២,៦-១១

បន្ទរទី៣ ៖ លោកតាស៊ីម៉ូនមានសុភមង្គលហើយ ! ដ្បិតលោកបានបីព្រះគ្រីស្តជាអម្ចាស់ ជាព្រះសង្រ្គោះនៃប្រជារាស្រ្តរបស់ព្រះអង្គ។

^៦	ទោះ‌បីព្រះ‌អង្គមានឋានៈជាព្រះ‌ជាម្ចាស់ក៏ដោយ ក៏ព្រះ‌អង្គពុំបានក្ដោប‌ក្តាប់ឋានៈដែលស្មើនឹងព្រះ‌ជាម្ចាស់នេះ ទុកជាកម្ម‌សិទ្ធិដាច់មុខរបស់ព្រះ‌អង្គឡើយ។
^៧	ផ្ទុយទៅវិញ ព្រះ‌អង្គបានលះ‌បង់អ្វីៗទាំងអស់មកយកឋានៈជាទាសករ ព្រះ‌អង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។
^៨	ព្រះ‌អង្គបានដាក់ខ្លួន ធ្វើតាមព្រះ‌បញ្ជារហូតដល់សោយទិវង្គត គឺរហូតដល់សោយទិវង្គតលើឈើឆ្កាងថែមទៀតផង។
^៩	ហេតុនេះហើយបានជាព្រះជាម្ចាស់លើកតម្កើងព្រះអង្គឡើងយ៉ាងខ្ពង់ខ្ពស់បំផុត ព្រមទាំងប្រោសប្រទានឲ្យព្រះ‌អង្គមានព្រះ‌នាមប្រសើរលើសអ្វីៗទាំងអស់
^១០	ដើម្បីឲ្យអ្វីៗទាំងអស់ ទាំងនៅស្ថានបរម‌សុខ ទាំងនៅលើផែន‌ដី ទាំងនៅក្រោមដី នាំគ្នាក្រាបថ្វាយ‌បង្គំ នៅពេលណាឮព្រះ‌នាមព្រះ‌យេស៊ូ
^១១	និងឲ្យមនុស្សគ្រប់ភាសាប្រកាសឡើងថា ព្រះ‌យេស៊ូ‌គ្រីស្តជាព្រះ‌អម្ចាស់ ដើម្បីលើកតម្កើងសិរី‌រុងរឿងព្រះ‌ជាម្ចាស់ជាព្រះ‌បិតា។

បន្ទរ ៖ លោកតាស៊ីម៉ូនមានសុភមង្គលហើយ ! ដ្បិតលោកបានបីព្រះគ្រីស្តជាអម្ចាស់ ជាព្រះសង្រ្គោះនៃប្រជារាស្រ្តរបស់ព្រះអង្គ។

ព្រះបន្ទូលរបស់ព្រះជាម្ចាស់ (ហប ១០,៥-៧)

ហេតុនេះ នៅពេលដែលព្រះ‌គ្រីស្តយាងចូលមកក្នុងពិភព‌លោក ព្រះអង្គមានព្រះបន្ទូលទៅកាន់ព្រះជាម្ចាស់ថា៖ «ព្រះអង្គមិនចង់បានយញ្ញ‌បូជា ឬតង្វាយអ្វីទេ តែព្រះ‌អង្គបានធ្វើរូបកាយមួយឱ្យទូលបង្គំ ព្រះអង្គមិនសព្វព្រះ‌ហឫទ័យនឹងតង្វាយដុត ឬយញ្ញ‌បូជាសុំឱ្យរួចពីបាបឡើយ ដូច្នេះ ទូលបង្គំពោលថាៈ បពិត្រព្រះ‌ជាម្ចាស់ឥឡូវនេះ ទូលបង្គំសូមមកធ្វើតាមព្រះ‌ហឫទ័យរបស់ព្រះ‌អង្គ ស្របតាមសេចក្ដីដែលមានចែងទុកពីទូលបង្គំនៅក្នុងគម្ពីរ»។

បន្ទរ៖ ព្រះអម្ចាស់បានបង្ហាញ *ការសង្គ្រោះរបស់ព្រះ‌អង្គ។ បន្ទរឡើងវិញ៖…
—ដែលព្រះអង្គបានប្រទានមកឱ្យប្រជាជាតិទាំងអស់។ បន្ទរ៖ *…
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ បុរសចំណាស់បីព្រះឱរស ប៉ុន្តែ ព្រះឱរសជាព្រះអម្ចាស់របស់បុរសចំណាស់។ នាងព្រហ្មចារិនីបានផ្តល់កំណើតឱ្យព្រះឱរស ប៉ុន្តែ នាងនៅតែជាព្រហ្មចារិនីរហូតតរៀងទៅ។ នាងលុតជង្គង់ក្រាបថ្វាយបង្គំនៅមុខព្រះឱរសរបស់នាង។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ បុរសចំណាស់បីព្រះឱរស ប៉ុន្តែ ព្រះឱរសជាព្រះអម្ចាស់របស់បុរសចំណាស់។ នាងព្រហ្មចារិនីបានផ្តល់កំណើតឱ្យព្រះឱរស ប៉ុន្តែ នាងនៅតែជាព្រហ្មចារិនីរហូតតរៀងទៅ។ នាងលុតជង្គង់ក្រាបថ្វាយបង្គំនៅមុខព្រះឱរសរបស់នាង។

ពាក្យអង្វរសកល

នៅថ្ងៃនេះ ព្រះសង្រ្គោះរបស់យើងបានបង្ហាញខ្លួនក្នុងព្រះវិហារ។ ចូរយើងនាំគ្នាលើកតម្កើងព្រះអង្គ ដោយទូលថា ៖

បន្ទរ៖ បពិត្រព្រះអម្ចាស់ ! សូមឱ្យភ្នែករបស់យើងខ្ញុំមើលឃើញការសង្រ្គោះរបស់ព្រះអង្គ !

បពិត្រព្រះគ្រីស្តយេស៊ូ ! ព្រះអង្គជាពន្លឺដែលបំភ្លឺមនុស្សគ្រប់ជាតិសាសន៍
—សូមព្រះអង្គចាំងពន្លឺលើអស់អ្នកដែលមិនស្គាល់ព្រះអង្គ ដើម្បីឱ្យគេមកជឿលើព្រះអង្គ ជាព្រះជាម្ចាស់ដ៏ពិតប្រាកដតែមួយ។ (បន្ទរ)

ព្រះអង្គជាព្រះប្រោសលោះ និងជាសិរីរុងរឿងរបស់ប្រជាជនអ៊ីស្រាអែល
—សូមឱ្យព្រះសហគមន៍ប្រកាសពីការសង្រ្គោះរបស់ព្រះអង្គ រហូតដល់ចុងបំផុតនៃផែនដី។ (បន្ទរ)

បពិត្រព្រះយេស៊ូ! ព្រះអង្គជាក្តីប្រាថ្នារបស់ប្រជាជាតិទាំងឡាយ។ លោកតាស៊ីម៉ូន ជាមនុស្សសុចរិត មានអំណរសប្បាយយ៉ាងខ្លាំង ដោយបានឃើញព្រះអង្គយាងមក
—សូមព្រះអង្គណែនាំមនុស្សទាំងអស់ឱ្យចេះទទួលស្គាល់ថា ព្រះអង្គនៅតែយាងមករកពួកគេ។ (បន្ទរ)

បពិត្រព្រះអម្ចាស់ ! នៅពេលព្រះអង្គបង្ហាញខ្លួនក្នុងព្រះវិហារ លោកតាស៊ីម៉ូនបានទស្សន៍ទាយថា មានដាវនៃទុក្ខលំបាកមួយនឹងចាក់ទម្លុះដួងចិត្តរបស់មាតាព្រះអង្គ
—សូមព្រះអង្គពង្រឹងយើងខ្ញុំ ឱ្យចេះទទួលយកទុក្ខលំបាក ឱ្យយើងខ្ញុំចេះស៊ូទ្រាំ ដើម្បីជាប្រយោជន៍ដល់ព្រះនាមព្រះអង្គ។ (បន្ទរ)

បពិត្រព្រះគ្រីស្តយេស៊ូ ! ព្រះអង្គជាអំណរសប្បាយនៃសន្តបុគ្គលទាំងឡាយ។ លោកតាស៊ីម៉ូនចង់ឃើញព្រះអង្គមុនពេលគាត់ស្លាប់ ហើយព្រះអង្គបានឆ្លើយតបនឹងពាក្យអធិដ្ឋានរបស់គាត់
—សូមព្រះអង្គសណ្តាប់ពាក្យអង្វរដែលយើងខ្ញុំទូលសម្រាប់មរណបុគ្គលទាំងឡាយ ដែលនៅតែប្រាថ្នាចង់ឃើញព្រះភក្រ្តព្រះអង្គផ្ទាល់នឹងភ្នែកផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះជាម្ចាស់ដ៏មានឫទ្ធានុភាពសព្វប្រការ ហើយមានព្រះជន្មគង់នៅជានិច្ច! ព្រះអង្គស្រឡាញ់មនុស្សលោកខ្លាំងណាស់ រហូតដល់ចាត់ព្រះបុត្រាតែមួយរបស់ព្រះអង្គមកប្រសូត្រជាមនុស្ស។ នៅថ្ងៃនេះ យើងខ្ញុំនាំគ្នានឹករឭកដល់ព្រះបុត្រាដែលនាងម៉ារី និងលោកយ៉ូសែប យកទៅថ្វាយព្រះអម្ចាស់ក្នុងព្រះវិហារក្រុងយេរូសាឡឹម។ ដោយព្រះហឫទ័យប្រណីសន្តោស សូមព្រះអង្គប្រោសយើងខ្ញុំឱ្យថ្វាយខ្លួនទៅព្រះអង្គ ដោយចិត្តបរិសុទ្ធផង។

យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

58 Views

Post Views: 59